Ukiorpassuarni Biibililersaarutitsinni nassuiarneqartarpoq taaguut Gogi Magogimeersoq Saatanimut, qilammit igitaasimasumut, innersuussutaasoq. Sooq? Saqqummersitani Saatani nunarsuaq tamakkerlugu Guutip innuttaanik saassussinermi siulersuisutut allaatigineqarmat. (Saqq 12:1-17) Taamaattumik isummerpugut Gogi Saatanip taaguutaasa ilagigaat.

Taamaattorli taamatut nassuiaaneq aappaatigoqarpoq. Una eqqarsaatigiuk: Gogip suujunnaarsitaanissaa Jehovap oqaatigigamiuk eqqaavaa Gogi “timmissanut tigutsisilinnut nersutinullu nujuartanut [nerisassanngortissallugu]”. (Ez 39:4) Taava Jehova ima nangippoq: “Ullussami tassani Gogi Israelikkunni ilivissaanik tunissavara.” (Ez 39:11) Qanorli Saatani, pinngortitaasoq anersaajusoq takussaanngitsoq, timmissanit nersutinillu nerineqarsinnaagami? Qanoq nunarsuarmi ilineqarsinnaagami? Biibilimi paatsuugassaanngitsumik allassimavoq Saatani ukiuni 1000-ni itinersuarmi qilersorneqassasoq. Nerineqarnanilu ilisaassanngilaq. — Saqq 20:1, 2.

Biibilimi allassimavoq ukiut 1000-t naaneranni Saatani itinersuarmit iperagaaguni aallassasoq “inuiaqatigiit nunarsuup sammiviini sisamani tamaniittut tammartinniassallugit, Gogi aamma Magogi, sorsunnissamullu katersorniassallugit”. (Saqq 20:8) Saatanili tassaaguni Gogi imminut tammartittariaqassagaluarpoq. Taamaattumik “Gogi” Ezekielip allagaani Saqqummersitanilu Saatanimut innersuussutaanngilaq.

Taavami Gogi Magogimeersoq kinaava? Apeqqut tamanna akissutissarsiumallugu kina Guutip innuttaanik saassussissanersoq Biibilimi misissortariaqarparput. ‘Gogip Magogimeersup’ saassussinera, ‘Avannarliup kunngiata’ saassussinera aamma ‘nunarsuarmi kunngit’ saassussinerat Biibilimi eqqaaneqarput. (Ez 38:2, 10-13; Dan 11:40, 44, 45; Saqq 17:14; 19:19) Taakku saassussinerit assigiinngitsuuppat? Ilimananngilaq. Saassussinermut ataatsimut taaguutit assigiinngitsut Biibilimi atorneqarpasipput. Sooq taamatut oqarsinnaavugut? Biibilimi allassimammat nunarsuarmi inuiaat tamarmik naggammik saassussinermi, Harmagedonimi sorsunnermut aallarniutaasumi, sorsoqataassasut. — Saqq 16:14, 16.

Biibilimi innersuussutit eqqaaneqartut tamaasa Guutip innuttaanut naggammik  saassussinermut sanilliukkutsigit paasissavarput taaguut Gogi Magogimeersoq Saatanimut innersuussutaanani inuiannut eqimattanut innersuussutaavoq. “Avannarliup kunngia” eqimattanik taakkuninnga siulersuissava? Tamanna ilisimanngilarput. Taamatulli nassuiaaneq Jehovap Gogi pillugu oqaasiinut naapertuuppasippoq: “Illit inuiappassuillu ilagisatit tamassi hesterlusi sakkutoorpassuullusi nunamit avannarlerpaamit illit nunagisannit aggissaasi.” — Ez 38:6, 15.

Tamatumunnga assingusumik pruffiiti Danieli, Ezekielip nalaani inuusoq, Avannarliup kunngia pillugu ima allappoq: “Kangianit avannaanillu tusakkani annilaarutigilissavai, uumitsallunilu aallassaaq inuppassuit toqorarlugit nungutillugit. Tupissaarsuanilu immap qaqqallu alianaatsup, qaqqap illernartup, akornanni nappartissavai. Naggatissaali nalliutissaaq, ikiortissaqassanngilarlu.” (Dan 11:44, 45) Tamanna Gogip iliuuserisassaanut tunngatillugu Ezekielip allagaani eqqaaneqartumut assinguvoq. — Ez 38:8-12, 16.

Naggammik saassussinerup kingorna susoqassava? Danielip ima paasitippaatigut: “Taamaalisukkut [Harmagedonimi] saqqummerumaarpoq Mikaeli [Jiisusi Kristusi], naalagaanersuaq, illit nunaqqatinnik [1914-imiilli] illersuisoq. Ullullu annikilliornartut [annikilliornartussarsuaq] nalliukkumaarput inuiaqaleqqaarneranit ullut makku tikillugit nalisineqanngitsut. Ullulli taakku nalliuppata nunaqqatitit annaanneqassapput, inuit mappersakkami allassimasut tamarmik.” (Dan 12:1) Jiisusip iliuuseriumaagai tamatumunnga assingusut Saqqummersitani atuarsinnaavavut. — Saqq 19:11-21.

Kisianni Saqqummersitat 20:8-mi “Gogi aamma Magogi” eqqaaneqartoq kinaava? Taaguut taanna Jehovamut pikitsitsisunut ukiullu 1000-t naaneranni taassuma innuttaanik naggammik saassussisunut tamanut innersuussutaavoq. Taakku Gogip Magogimeersup, annikilliornartussarsuup naggataani inuiaat Guutip innuttaanik saassussisut, pisimaneratut uumissuissapput. Inuiaat taakkua Harmagedonimi suujunnaarsinneqarnerattut Gogi aamma Magogi suujunnaarsinneqassaaq. (Saqq 19:20, 21; 20:9) Taamaattumik ukiut 1000-t naaneranni pikitsitsisut tamarmik ‘Gogitut aamma Magogitut’ taaneqarnissaat naleqquppasippoq.

Biibilimik pimoorussilluta atuaqqissaartaratta ‘Avannarliup kunngiata’ ungasinngitsukkut kinaassusersinissaa qilanaaraarput. Guutilli innuttaanik saassussinermik siulersuisoq kinaagaluarpalluunniit ukua marluk qularutiginngilavut: (1) Gogi Magogimeersoq taassumalu sakkutuui ajugaaffigineqarlutillu suujunnaarsinneqassapput. (2) Kunngitta, Jiisusip Kristusip, Guutip innuttai aniguisissallugillu silarsuassamut nutaamut eqqissineqarfiusumut toqqissisimanartumullu siulersussavai. — Saqq 7:14-17.