JULIANIP ernermi Jehovamik Nalunaajaasutut ilaajunnaarsitaanera nalunaarutigineqarmat qanoq misigisimanerluni suli eqqaamavaa. Ima oqarpoq: “Silarsuara sequmittutullusooq ippoq. Angajullequtigaarput qanimullu attaveqarluarfigalutigu; sammisaqaqatigiittaqaagut.” Julian nassuiaavoq ernini ileqqorissaartuujuaannaraluarluni ajortumik iliortalersoq. Julianip nuliani qiajuartoq qanoq tuppallersassanerlugu naluaa. Ima oqarpoq: “Angajoqqaatut sumiginnaasimanerluta eqqarsaatigiuarparput.”

Biibili naapertorlugu ilaajunnaarsitsinissamut suut pissutaappat? Tamannalu anniaataangaartarmat sooq oqartoqarsinnaava ilaajunnaarsitsineq asannittuliornerusoq?

Jehovap Nalunaajaasuisa ilaat kuisimasoq peqqissiminani ingasattumik ajortulioruni ilaajunnaarsitaassaaq.

Jehovap naammalluinnartuunissarput piumasarinngilaa, kiffamili inatsisiminik maleruaanissaat illernartuujuarnissaallu piumasaraa. Assersuutigalugu Jehovap kiffami ingasattumik ajortuliunnginnissaat — soorlu kinguaassiuutitigut inuunerlunnginnissaat, guutipilussiunnginnissaat, tillinnginnissaat, iluanaarniapilunnginnissaat, toqutsinnginnissaat anersaalerinnginnissaallu — peqqussutigaa. — 1 Kor 6:9, 10; Saqq 21:8.

Jehovap piumasaqaatai artornartuunatik uagutsinnut illersuutaapput. Assersuutigalugu tamatta inuit eqqissinermik nuannarisaqartut unneqqarissullu peqatiginissaat nuannarisarparput, anersaakkullu qatanngutivut peqatigigaangatsigit tamanna misigisarparput. Sooq qatanngutivut taama pissuseqarpat? Jehovamut tunniulluinnarsimagamik Biibilimilu allassimasut malillugit inuuniarlutik neriorsuisimagamik.

Taavami kristumiu kuisimasoq inuttut sanngiissutini pissutigalugu ingasattumik ajortuliorpat? Itsaq Jehovap kiffami ilaat ingasattumik  ajortulioraluartut ajattunngilai. Assersuutigalugu kunngi Daavi allasioraluartoq toqutsigaluartorlu pruffiitip Natanip oqarfigaa Jehovamit isumakkeerfigineqartoq. — 2 Sam 12:13.

Sooq Jehovap Daavi isumakkeerfigaa? Jehovap takusinnaagamiuk Daavi ilumoorluni peqqissimisoq. (Tuss 32:1-5) Aamma ullumikkut inuk ajortuliortoq peqqissimisoq ajortuliortarunnaartorlu isumakkeerfigineqartarpoq. (ApS 3:19, 20; 26:20) Utoqqaanertat eqqartuussisinnaanermut ataatsimiititaliami ilaasortaasut ajortuliortoq peqqissiminngitsutut naliligaat ilaajunnaarsitaasarpoq.

Ilaquttavit ilaata imaluunniit qanimut ikinngutigisappit ilaajunnaarsitaanissaanik aalajangiineq akueriuminaatsillugulu sakkortuallaarsorisinnaavat. Jehovalli oqaasiani paatsuugassaanngitsumik paasitinneqarpugut ilaajunnaarsitsineq asannittuliornerusoq.

Jiisusip eqqaavaa ‘ilisimassuseq suliamigut eqqortuutitaasoq’. (Matt 11:19) Peqqissiminngitsumik ilaajunnaarsitsinissamik aalajangernerup asannittuliorneruneranut pissutaasut pingasut sammeriartigit.

Ilaajunnaarsitsineq Jehovap aqqanik nikanarsaanissamut illersuutaavoq. Jehovap Nalunaajaasuisut taassuma aqqanik taaguuteqaratta iliuutsivut aqqanut ataqqinaataasinnaapput imaluunniit nikanarsaataasinnaallutik. (Es 43:10) Soorlu nukappiaqqap iliuutsimigut angajoqqaani ataqqinarsarlugilluunniit nikanarsarsinnaagai taamatuttaaq Jehovap kiffaasa taassuma aqqa ataqqinarsarluguluunniit nikanarsarsinnaavaat. Ezekielip nalaani inuusut juutit Jehovap aqqanut atassusertarpaat. (Ez 36:19-23) Taamatuttaaq nalitsinni inuit Jehovap Nalunaajaasui Jehovap aqqanut atassusertarpaat. Taamaattumik Jehovap inatsisai maleruaraangatsigit taanna ataqqinarsisittarparput.

Apustilip Petrusip kristumiut ima siunnersorpai: “Meeqqatut naalattutut nalusuugallarassi kajungerisasi ileqquliunniaqinasigit, soorlu qaaqqusisersi illernartuusoq ilississaaq inuunissigut tamatigut illernartuussaasi, allassimavormi: ‘Illernartuussaasi uanga illernartuugama.’” (1 Petr 1:14-16) Assersuutigalugu kinguaassiuutitigut inuunerlukkutta Guutip aqqa kanngunarsassavarput. Ileqqorissuuguttali Jehova ataqqinarsisissavarput.

Inuit Jehovamik Nalunaajaasumik ilisarisimannittut taassuma ajortuliortarnera paasigunikku iliuuserisartagai eqqumaffiginialersinnaavaat. Tusarunikkulu taanna Jehovamik Nalunaajaasuujunnaarsimasoq Jehovap innuttaasa Biibili maleruarlugulu ilagiit minguitsuutittuaraat paasissavaat. Assersuutigalugu angut Schweizimi ataatsimiigiarpoq oqarlunilu ilagiinnut ilaasortanngorusulluni. Ilaquttami ilaat kinguaassiuutitigut inuunerlunnini pissutigalugu ilagiinnut ilaajunnaarsitaammat peqatigiissortanut ‘ajortumik iliortunik akuersaanngitsunut’ ilaasortanngorusulerpoq.

Ilaajunnaarsitsineq kristumiut ilagiivisa minguissusiannut illersuutaavoq. Inuup ajortuliortup peqqissiminngitsup ilagiinnut ilaajunnaarsitaanngitsup allanut navianaataasinnaanera pillugu apustilip Paulusip Korinthimiut mianersoqquai. Ajortuliortut taakkua ajortumik sunniuteqarnerat seernarsaammut naqittakkamik pullalersitsisumut assersuuppai. Paulusi ima allappoq: ‘Seernarsaatimininnguup naqittagaq tamaat seernarsartarpaa.’ Taava taakku ima siunnersorpai: “Ajortoq akornassinnit piissavarsi.” — 1 Kor 5:6, 11-13.

Inuk “ajortoq” taanna peqqissimissutiginngisaminik kinguaassiuutitigut inuunerluppoq. Ilagiinniittut ilaasa taassuma ajortuliornera  akuersaalersimavaat. (1 Kor 5:1, 2) Tamanna navianaateqarsinnaavoq kristumiut allat kinguaassiuutitigut inuunerlunneq, Korinthimi nalinginnaaqisoq, sunnertissutigisinnaammassuk. Taamatuttaaq ullumikkut ingasattumik ajortuliortoqarnera ilagiinniittunit sumiginnarneqarpat inuit ilaasa Jehovap najoqqutassiai pingaaruteqanngitsutut isigilersinnaavaat. (Oqal 8:11) Soorlu ikkarluit umiatsiamik umiutitsisinnaasut taamatuttaaq inuit peqqissiminatik ajortuliortartut ilagiinniittunik upperunnaarsitsisinnaapput. — Jud 4.

Ajortuliortup ilaajunnaarsitaanini silattuaqissutigisinnaavaa. Jiisusip assersuusiorluni angut inuusuttoq ataatami angerlarsimaffianik qimatsilluni kingornussarsiaminik tamanik inuunerlunnermut atuisoq oqaluttuaraa. Piffissap ingerlanerani angutip inuusuttup paasilerpaa ataatani najunnginnamiuk siunertaqanngitsumik inuulluni. Peqqissimivoq aalajangerlunilu ilaquttaminut uterniarluni. Ataataasup ernini inooriaatsiminik allannguisimasoq takugamiuk nuannaangaarpoq tikilluaqqullugulu. (Luk 15:11-24) Assersuusiaq tamanna iluaqutigalugu peqqissimisoqaraangat Jehova qanoq misigisarnersoq paasivarput. Taanna ima oqarpoq: “Piumasarinngilara iluanngitsoq toqussasoq, kisiannili piumasaraara ileqqorisani ajortut tunullugit uannut saassasoq inuuginnaqqulluni.” — Ez 33:11.

Ilagiit kristumiut anersaakkut ilaqutaraavut. Ilaajunnaarsitaasoq ilaqutariinnut taakkununnga ilaajunnaartarpoq. Taassuma ajortuliami kingunipilui misigereerunigit kukkusimanini kiisalu Jehovamut ilagiinnullu attaveqarluarallarami pilluarnerujussuulluni paasilersinnaavaa. Tamanna anersaakkut ilaqutariinnut uternissaminut kajumississutigisinnaavaa.

Aatsaat Jehovamut aalajaakkutta ilaajunnaarsitaasimasoq asannittuliorfigisinnaallugulu ilagiinnut uteqqinnissaanut ikiorsinnaavarput. Pisullutik angalasartut marluk ukiukkut annaanneqarnissartik utaqqigaat takorlooriaruk. Angalasup aappaa qiiagami qasusorujussuanngorpoq uernalerlunilu. Sinilerninili toqussutigisussaavaa. Eqqumajuarniassammat angalaqataata kiinaatigut patippaa. Patinneqarnera annernaraluartoq inuuinnarneranik kinguneqarsinnaavoq. Daavi taassumunnga assingusumik ima allappoq: ‘Iluartup patippanga isumassorneqassaanga.’ (Tuss 141:5, 1900) Daavip naqqinneqarnini annernaraluartoq iluaqutigisinnaallugu nassuerutigaa.

Ajortuliortup ilaajunnaarsinneqarnini Jehovamut uternissaminut iluaqutigisinnaavaa. Julianip ernerata, allaaserisap aallaqqaataani eqqaaneqartup, inooriaatsini allanngortippaa ilaajunnaarsitaanerminillu ukiut qulit qaangiuttut ilagiinnut uteqqilluni. Maannakkut utoqqaanertaavoq. Ima nassuerpoq: “Ilaajunnaarsinneqarnikkut inooriaatsima kingunipiloqarnera paasivara. Taamatut naqqinneqarneq pisariaqartissimavara.” — Hebr 12:7-11.

Ilaajunnaarsitaasoqaraangat alianartaqaaq. Ilaajunnaarsitaasulli Jehovamut uteqqissinnaapput. Tamattali naqqiinerup iluaqutaanissaanut suleqataanissarput pingaaruteqarpoq. Qanoq taamaaliorsinnaagatta?

Utoqqaanertat Jehovap asanninnera, ingammik qatanngut Jehovamik Nalunaajaasutut ilaajunnaarsin­neqarneranik nalunaarfiginia­raangamikku, ilaarniartuarpaat. Jehovamut uteqqikkumalluni ilagiinnullu ilaaleqqikkumalluni qanoq iliorsinnaaneranik inussiarnersumik paasiuminartumillu nassuiaatissavaat. Ilaajunnaarsitaasimasoq ilagiinnut uteqqinnissaminik kissaateqartoq qanoq iliorsinnaaneranik  nassuiaakkumallugu utoqqaanertat pulaartarsinnaavaat. *

Ilaqutaasut utoqqaanertat aalajangiinerannik tapersersuinermikkut ilagiinnut ilaajunnaarsinneqartumullu asanninnertik ersersissavaat. Julian ima nassuiaavoq: “Erneraara, kisianni inooriaasia pissutaalluni peqatigiittarsinnaanngilagut.”

Ilagiinniittut tamarmik Jehovap utoqqaanertat aqqutigalugit naqqiinerata tapersersorneratigut ilaajunnaarsinneqartumut asanningaarnertik ersersissinnaavaat. Tassa ilaginavianngilaat oqaloqatiginaguluunniit. (1 Kor 5:11; 2 Joh 10, 11) Ilagiinniittullu ilaajunnaarsinneqartup ilaqutai asannittuliorfigingaartariaqarpaat tapersersortariaqarlugillu. Tamanna ilaqutariinnut artornartorujussuusinnaammat ilagiinnut ilaajunnaarsitaasimasutut misigitinngisaannassavavut. — Rom 12:13, 15.

Julian ima oqarpoq: “Ilaajunnaarsitsinermut tunngatillugu aaqqissuussaq pisariaqartipparput, Jehovammi najoqqutassiai naapertorlugit inuunissatsinnut iluaqutigigatsigit.” Imalu nangippoq: “Tamanna sapernartorujussuugaluartoq piffissap ingerlanerani kinguneqarluarsinnaavoq. Ernerma inuunerlunnera akuersaarsimasuugaluarukku uteqqissimanavianngikkaluarpoq.”