Ataatarpooq malillugu inuugit — Immikkoortoq 1
“Aqqit illernartitaali.” — MATT 6:9.
1. Jiisusip qinnutaa Matthæusip allagaani kapitali 6-imi allassimasoq oqaluussinermi qanoq atortarparput?
QINNUT Matthæusip allagaani kapitali 6-imi allassimasoq inuppassuit nalunngilaat. (Matt 6:9-13) Oqaluussigaangatta qinnummi tassani oqaatsit atorlugit Naalagaaffiup Guutimeersup piviusuusup nunarsuarmik paratiisinngortitsiumaarnera inunnut ilinniartitsissutigisarparput. Aamma oqaatsit “aqqit illernartitaali” atorlugit ersersittarparput Guuti ateqartoq atialu illernartumik atorneqartariaqartoq.
2. Qanoq nalunngilarput Jiisusip qinunerit tamaasa oqaatsivut uteqattaartassagivut kissaatiginngikkaa?
2 Jiisusip, inuit pisarnerattut, qinunerit tamaasa oqaatsivut uteqattaartassagivut kissaatigaa? Naamik. Jiisusi ima oqarpoq: ‘Qinugaangassi oqaatsisi uteqattaartassanngilasi.’ (Matt 6:7, NW) Kingusinnerusukkut ajoqersukkani qanoq qinusarnissaannik ilinniartikkamigit qinnut allanngulaarlugu uteqqippaa. (Luk 11:1-4) Taamaattumik Jiisusip suut qinnutigineqartariaqarnerannik ersersitsisumik ataatarpuumik, imaluunniit qinnummik najoqqutassaasumik, ilinniartippaatigut.
3. Ataatarpuup misissoqqissaarnerani imminut qanoq aperisariaqarpit?
3 Allaaserisami matumani tulliuttumilu qinnut najoqqutassaasoq
misissoqqissaassavarput. Taamaaliornitsinni imminut ima aperisarit: ‘Qinnut taanna qinoriaatsima pitsaanerulersinnissaanut qanoq iluaqutigisinnaavara?’ Pingaarnermillu: ‘Ataatarpooq malillugu inuuvunga?’“ATAATARPUT QILANNIITTUTIT!”
4. Oqaaseq “Ataatarput” uagutsinnut sumik eqqaasitsiva, Jehovallu uagutsinnut Ataataanera qanoq paasisariaqarpa?
4 Jiisusip qinnut ima aallarnerpaa: “Ataatarput.” Tamanna Jehovap nunarsuaq tamakkerlugu qatanngutigiissuarnut Ataataaneranik uagutsinnut eqqaasitsissutaavoq. (1 Petr 2:17) Qilaliartussatut Jehovap toqqagai suli nunarsuarmiittut qitornavissiarai, taamaattumik Jehova taakkununnga immikkuullarissumik Ataataavoq. (Rom 8:15-17) Nunarsuarmi naassaanngitsumik inuusussat Jehova aamma ‘Ataatatut’ taasinnaavaat. Jehovap inuunermik asannillunilu pisariaqartitaannik tunivai. Taakku naammalluinnartunngoreerunik naggammillu misilinneqarnermi Jehovamut ilumoorfiginnikkunik ‘Guutip qitornaattut’ taaneqarsinnaanngussapput. — Rom 8:21; Saqq 20:7, 8.
5, 6. Angajoqqaat qitornaminnut tunissutigisinnaasaat pitsaanerpaaq suua, meeqqallu tunissummut tunngatillugu susariaqarpat? (Allaaserisap aallaqqaataani asseq takuuk).
5 Angajoqqaat qitornatik tunissummik tunisarpaat Ataatatsinnik qilammiusumik, Jehovamik, taassumunngalu qinusarnissamik ilinniartikkaangamikkit. Sydafrikami ilagiinnik nakkutilliisoq ima oqaluttuarpoq: “Panivut inunnguinnartut unnuit tamaasa, angalasarnikka eqqaassanngikkaanni, qinoqatigisarpakka. Panivut oqartarput unnukkut sorpiaat qinnutigineqartarnersut eqqaamasinnaanagit. Taamaattorli qinoqatigiittarnerput, Ataatatsinnik, Jehovamik, attaveqaqateqarnermik pingaartitsinerput aamma eqqissisimasutut toqqissisimasutullu misigisarnertik eqqaamavaat. Oqalussinnaaliinnartut eqqarsaatitik misigissutsitillu pillugit Jehovamik oqaloqateqartut tusaaniassagakkit nipilimmik qinusarnissaannut kajumissaartalerpakka. Tamanna uummammiuinut tusarnaarnissamut periarfissatsialaavoq. Siunertaqarluartumik qinusalerniassammata qinoreeraangata qinnutip najoqqutassaasup immikkoortuinik pingaarutilinnik ilanngussisarnissaannik ilinniartittarpakka.”
6 Panii peroramik Jehovamut qanilliartortuarput. Maanna uitillu piffissaq tamaat Jehovamut kiffartorput. Angajoqqaat qitornatik tunissummik pitsaanerpaamik tunisarpaat Jehovap kinaassusiliunera ikinngutigilerneqarsinnaaneralu pillugit ilinniartikkaangamikkit. Meeqqalli Jehovamik ikinnguteqarnertik namminneerlutik ineriartortittariaqarpaat. — Tuss 5:12, 13; 91:14.
“AQQIT ILLERNARTITAALI”
7. Suut ataqqinaatigaavut, susariaqarpugulli?
7 Guutip aqqanik ilisimanninneq ‘atianullu innuttaaneq’ ataqqinaatigaavut. (ApS 15:14; Es 43:10) ‘Aqqata illernarsisinneqarnissaa’ qinnutigisarparput. Aamma Jehovamik nikanarsaataasumik oqaaseqannginnissamut iliuuseqannginnissamullu ikioqqulluta qinusarpugut. Kristumiut siulliit ilaat ilinniartitsisarnermittut iliorneq ajortut assigerusunngilavut. Paulusip taakku ima allaffigai: “Ilissi pissutaallusi Guutip aqqa inuianni allani mitaatigisaavoq.” — Rom 2:21-24.
8, 9. Jehovap aterminik illernarsisitserusuttunik ikiuisarneranik ersersitsisumik assersuuteqarit.
Uss 27:11.
8 Sapinngisarput tamaat Jehovap atia ataqqinarsisikkusupparput. Norgemi qatanngut arnaq ernini marlunnik ukioqartoq uillarninngorami ima oqaluttuarpoq: “Taamani artorsaqaanga. Silatusaanngitsumik aalajangiinera aalajaannginneraluunniit pissutigalugu Saatani Jehovamik mitaatiginninnissamut pissutissaqarterusunnginnakku misigissutsikkut oqimaaqatigiissaarisinnaajumallunga ullut tamaasa, allaat nalunaaquttap-akunneri tamangajaasa, qinusarpunga. Jehovap aqqa illernarsisikkusullugulu ernerma ataatani paratiisimi takussagaa kissaatigaara.” —9 Qinnutaa Jehovap akivaa? Aap. Qatanngutit ilagikulasarnerisigut qiimmassarneqarpoq. Ukiut tallimat tamatuma kingorna utoqqaanertamik uinippoq. Ernera, maanna 20-nik ukiulik, kuisimasuuvoq. Anaanaasoq ima oqarpoq: “Uima erninnik perorsaaninni ikiormanga qujamasungaarpunga.”
10. Guutip atini qanoq illernarsisilluinnassavaa?
10 Jehovap imminik nikanarsaasut naalakkersuinerminillu ajattuisut suujunnaarsinnerisigut atini illernarsisilluinnassavaa. (Ezekieli 38:22, 23 atuakkit). Siunissami inuit naammalluinnartunngussallutillu qilammi nunarsuarmilu kikkut tamarmik Jehovamik pallorfiginnissapput aqqanullu illernartumut ataqqinnillutik. Naggataatigut Ataatarput asannittoq inunni ‘tamani tamarsuussaaq’. — 1 Kor 15:28.
“NAALAGAAFFIIT TIKIULLI”
11, 12. 1876-imi Jehovap innuttani sumik paasitippai?
11 Jiisusi qilalianngitsiartoq ajoqersugaasa ima aperaat: “Naalagaq, maannakkununa Israelikkunnut naalagaaffik kingumut pilersinniarit?” Guutip naalagaaffiata qaqugu naalakkersuilernissaata paasinissaanut Jiisusip piffissaannginnerarpaa. Ajoqersukkanili oqarfigai oqaluussinermik pingaarnerpaatitsissasut. (Apustilit Suliaat 1:6-8 atuakkit). Aamma ilinniartippai Guutip naalagaaffiata tikiunnissaa qinnutigisarlugulu qilanaarissagaat. Taamaattumik Naalagaaffiup tikiunnissaa suli qinnutigisarparput.
12 Piffissaq Jiisusip qilammi naalakkersuilerfissaa nalliutingajalermat ukiumi sorlermi tamatuma pissaneranik Jehovap innuttani paasitippai. 1876-imi Charles Taze Russellip allaaserisaq ima qulequtalik allappaa: “Guutimik nalusunut piffissarititaasut qaqugu naassappat?” Allaaserisamini nassuiarpaa Danielip siulittuutaani ‘piffissarititat arfineq-marluk’ Jiisusip siulittuutaani “Guutimik nalusunut piffissarititaasut”, taakkulu 1914-imi naassasut. * — Dan 4:13; Luk 21:24.
13. 1914-imi susoqarpa, ukiumiillu tamatumaniit nunarsuarmi pisut sumik ersersitsippat?
13 1914-imi Europami sorsunneq aallartimmat nunarsuarmi tamarmi sorsunneqalerpoq. Sorsunnersuaq pissutaalluni sualuttumik kaannersuaqalerpoq. Sorsunnersuullu naangajalernerani, 1918-imi, nuallussuarmik toqquteqartut sorsunnersuarmi toqutaasunit amerlanerupput. Tamakku tamarmik ‘nalunaaqummut’ Jiisusip eqqaasaanut ilaapput. Nalunaaqummit erserpoq Jiisusi 1914-imi qilammi kunnginngortoq. (Matt 24:3-8; Luk 21:10, 11) Ukiumi tamatumani Jiisusi ‘aallarpoq ajugaalluni ajugaalluinnassallunilu’. (Saqq 6:2, NW) Jiisusip Saatani anersaapiluilu qilammit nunarsuarmut igippai. Tamatuma kingorna siulittuut una eqquuppoq: “[Eqqanaq] nuna imarlu Diaavulu ilissinnut aqqarmat kamattorsuulluni, piffissakissutsi nalunnginnamiuk.” — Saqq 12:7-12.
14. (a) Sooq Guutip naalagaaffiata tikiunnissaa suli qinnutigisarparput? (b) Suliaq pingaarutilik suna naammassisariaqarparput?
14 Saqqummersitat kapitali 12-imi siulittuut iluaqutigalugu paasisinnaavarput sooq piffissaq Guutip naalagaaffiani Jiisusip kunnginngorfia aallarnerfigalugu nunarsuarmi alianartunik pisoqartalersoq. Jiisusi qilammi naalakkersuigaluartoq Saatani suli nunarsuarmi naalakkersuivoq. Ungasinngitsukkulli Jiisusi nunarsuarmi ajussusermik atuukkunnaarsitsinermigut ‘ajugaalluinnassaaq’. Tamanna nalliutserlugu Guutip naalagaaffiata tikiunnissaa qinnutigiuassallugulu Naalagaaffik taanna pillugu oqaluussinermi ulapputeqartuassaagut. Oqaluussinerput Jiisusip siulittuutaanik uuminnga eqquutitsivoq: “[Naalagaaffimmik] iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.” — Matt 24:14.
‘PIUMASAT NUNAMI PILI’
15, 16. Guutip piumasaata nunami pinissaata qinnutiginissaa naammappa? Nassuiaruk.
15 Ukiut 6000-t missiliorlugit matuma siorna Guutip piumasaa nunarsuarmi pivoq. Taamaattumik Jehova oqarpoq suut tamarmik “ajunngingaartut”. (1 Mos 1:31) Taava Saatani pikitsitsilerpoq, taamanimiilli inuit amerlanerit Guutip piumasaa naapertorlugu inuunngillat. Ullumikkulli inuit 8 millionit missaanniittut Jehovamut kiffartorput. Guutip piumasaata nunarsuarmi pinissaa qinnutigisarpaat Guutillu piumasaatut iliortarlutik. Guutip iluarisaatut inooriaaseqarlutillu taassuma Naalagaaffia pillugu aallussilluarlutik inunnut oqaluussisarput.
16 Assersuutigalugu Afrikami ajoqersuiartortitaq 80-inik ukiulik 1948-milu kuisittoq ima oqarpoq: “Inuit eqqortuliorusuttut attavigineqarnissaat piffissaagallartillugulu Jehova pillugu ilinniarnissamut ikiorneqarnissaat qinnutigikulasarpara. Aamma oqaluussiffigisassama uummataa killissinnaajumallugu ilisimassusermik tuneqqullunga qinusarpunga. Eqqortuliorusuttullu nassaarineqareersimasut isumassornissaannut Jehovamit pilluaqquneqaqqulluta qinusarpunga.” Qatanngutip arnap utoqqaap inuppassuit Jehovamik ilisarisimannilerniarneranni ikiorsimavai. Utoqqarnik allanik aallussilluarlutik Jehovap piumasaatut iliortunik eqqaasaqarsinnaavit? — Filippimiut 2:17 atuaruk.
17. Jehova inuiannut nunarsuarmullu tunngatillugu siunissami iliuuserisassai qanoq isumaqarfigaagit?
17 Jehovap nunarsuarmi akeqqaminik suujunnaarsitsinissaata tungaanut taassuma piumasaata pinissaa qinnutigiuassavarput. Taava nunarsuaq paratiisinngortinneqassallunilu inuit milliardillit makitinneqassapput. Jiisusi oqarpoq ‘piffissaq nalliukkumaartoq ilivermiittut tamarmik nipiminik tusarumaarfissaat ilivernillu aniumaarfissaat’. (Joh 5:28, 29) Asasavut toqusunit makititaasut tikilluaqqulerutsigit qanoq nuannaartigissasugut takorlooriaruk! Guutip tamatta ‘isitsinnit qulliit allarterumaarpai’. (Saqq 21:4) Toqusunit makitinneqartut amerlanerit tassaassapput ‘iluaatsut’, tassa naapertuilluanngitsut, Jehova Jiisusilu pillugit sallusuissummik ilisimanninngitsut. ‘Naassaanngitsumik inuuniassammata’ Guutip piumasaa pillugu ilinniartinnissaat nuannaarutigissavarput. — ApS 24:15; Joh 17:3.
18. Inuiaat suna pisariaqartinnerpaavaat?
18 Guutip naalagaaffia tikiuppat taassuma aqqa illernarsisinneqassallunilu qilammi nunarsuarmilu kikkut tamarmik ataasiussuseqarlutik Jehovamik pallorfiginnissapput. Aap, Guutip qinnummi najoqqutassaasumi qinnutigineqartut siulliit pingasut akigunigit inuiaat pisariaqartinnerpaasaat matussusissavai. Allaaserisami tulliuttumi Jiisusip qinnutigineqartartussat sisamat allat ilinniartitsissutigisai misissussavavut.
^ imm. 12 Siulittuutip tamatuma 1914-imi eqquunnera qanoq nalunngikkipput paasiumallugu takuuk atuagaq Biibilimi sorpiaat ajoqersuutigineqarpat? qupp. 215-218.