1970-IMI juunimi Pen­nsylvaniami USA-miit­tumi 20-nik ukioqarlunga sak­kutuujul­lunga aseruut­toor­nin­nik nap­parsim­mavim­mut unip­punga. Peq­qis­saasup angutip nalunaaqut­tap-akun­nera af­fak­kaarlugu aam­ma naqitsinera takusar­paa. Peq­qis­saasoq uan­nit angajul­liulaatsiar­toq er­numar­pasip­poq. Aam­ma naqitsinera ap­paralut­tuin­narmat oqarfigaara: “Toqusumik takunikuun­ngisaan­narsimavutit, ilaa?” Kiinaa qarsor­poq akil­lunilu: “Aap, takunikuun­ngisaan­nar­punga.” Toqus­sangaleraluar­punga, anigor­parali. Inuunin­ni misigisimasak­ka oqalut­tuarilaas­savak­ka.

Vietnamimi sorsun­nerup nalaani inimi pilat­taasarfim­mi teknikerisut sulitil­lunga nap­parsimaler­punga. Nap­parsimasunik ikiligaasimasunil­lu ikiuisar­nera nuan­nareqaara pilat­taasar­tun­ngor­nis­saralu siun­nius­simal­lugu. 1969-imi juulimi Vietnamimut tikik­kama sak­kutuunut tikerlaanut ileq­quusoq malil­lugu nalunaaqut­tap nikinganeranut kias­suarmul­lu sungius­siniar­nis­san­nut sapaatip-akun­nera ataaseq sulin­ngif­feqaq­qaar­punga.

Dong Tamimi kuus­suup Mekongip eq­qaani sak­kutuut nap­parsim­mavian­ni suliler­punga. Qulimiguul­lit sak­kutuunik nap­parsim­maviliaas­siuar­put. Nunaga asavara sulinerlu nuan­naralugu, taamaat­tumik nunaq­qatik­ka ikiorusoqaak­ka. Ikiligaasimasut suliaritin­nis­samut piareersar­neqar­tar­put containerinul­lu nil­lalaarsaatitalin­nut pilat­taasarfit­tut ator­neqaral­lar­tunut ingerlateq­qin­neqapal­lat­tarlutik. Pilat­taasar­toq, sinitsitsisar­toq peq­qis­saasul­lu marluk ilungersungaarlutik ikilik­kanik an­naas­siniar­tar­put. Puus­siarsuit qer­ner­tut qulimiguulin­niit niuneqar­neq ajor­tut maluginiar­pak­ka. Oqalut­tuun­neqar­punga puus­siarsuit taak­ku sak­kutuut qaar­tar­tumeer­neqarsimasut timaasa ilaan­nik imaqar­tut. Tas­sa sorsun­nermi misigisama siul­liit ilaat.

Inuusut­tuaraal­lunga sal­lusuis­sut Jehovap Nalunaajaasuinit tusaq­qaar­para. Taak­kua anaanaga atuaq­qis­saaqatigisar­paat, kuisin­ngisaan­nar­porli.  Uangali atuaq­qis­saaqatigiit­tar­nerat malin­naaf­figalugu nuan­narisaqaara. Ul­lut ilaan­ni ataatas­saralu naalagaaf­filersaarfik saneq­quk­katsigu ima oqar­poq: “Inuit taak­ku qanil­lin­ngisaan­nas­savatit!” Ataatas­sara asagak­ku tatigalugulu naalal­lunga Jehovap Nalunaajaasui at­tavigiun­naar­pak­ka.

Vietnamimiit uterama sorsun­nermi misigisapilup­pas­suak­ka puior­neq ajor­pak­ka, misigis­suseqan­ngitsutul­lu pis­suseqaler­punga. Soorluli Vietnamimi susoqar­nera nunaq­qatin­nit paasineqar­piarsiman­ngitsoq. Eq­qaamavara tusatsiak­kat pis­sutigalugit Amerikamiut sak­kutuui meeq­qanik toqoraasuunerarlugit akerlius­sutsimik takutitsisut nil­liasut. Misigisimasak­ka tamak­ku pis­sutaal­lutik Guutimut at­taveqarusun­neruler­punga.

Guutimik ujar­tuinin­ni oqaluf­fin­ni as­sigiin­ngitsuni najuut­taler­punga. Guuti asajuaan­narsimavara, oqaluf­fin­nili takusar­tak­kak­ka nuan­narin­ngilak­ka. Taamaal­lunga Delray Beachimi Floridamiit­tumi naalagaaf­filersaarfiliar­punga. 1971-imi februaarimi sapaam­mi siul­ler­paamik ataatsimeeqataavunga.

Oqalugiaat naasorlu naalagaaf­filersaarfim­mut iser­punga Napasuliaq Alapernaarsuiffik-mil­li atuaq­qis­saaqatigiin­nermut najuul­lunga. Atuagas­siami suna sam­mineqar­toq eq­qaaman­ngilara, meeq­qal­li al­las­simaf­fin­nik Biibilimin­ni qup­peraasut eq­qaamavak­ka. Tupigusoqaanga! Tusar­naarlungalu alaper­naap­punga. Anilerut­tor­tunga nalunaajaasup angutip 80-it mis­saan­nik ukiul­lip or­nip­paanga. James Gardnerimik ateqar­poq. Atuagaq sagdlusuíssut inûnigssamut nâgssáungitsumut sangmisoĸ tun­niup­paa aperalungalu: “Perusup­piuk?” Akuersivunga isumaqatigiil­lutalu sisaman­ngor­nermi ul­laatungaani Biibilimik atuaq­qis­saaqatigiit­taler­niarluta.

Ataatsimiin­neq naam­mat suliar­tor­punga. Nap­parsim­mavim­mi Boca Ratonimi Floridamiit­tumi sulisar­punga, un­nul­lu taan­na aq­qaner­niit ul­laak­kut arfineq-marluk tungaanut sulisus­saal­lunga. Un­nuk taan­na unin­ngasoqar­pian­ngim­mat atuagaq sagdlusuíssut atuar­para. Suleqatima peq­qis­saasup atuak­kamik arsaar­paanga, saq­qaalu takugamiuk paaserusuler­paa Jehovap Nalunaajaasuinut ilan­ngutiler­nersunga. Atuagaq tigoriarlugu oqarfigaara atuagaq aatsaat qiteq­qun­nerarlugu nalunaajaasun­ngor­nis­saralu eq­qarsaatin­niilereersoq. Qimap­paanga, un­nuarlu taan­na atuagaq naal­lugu atuar­para.

James Gardnerip atuaq­qis­saaqatigeq­qaar­nialermanga aperaara: “Atuagaq sorleq atuas­savar­put?” Ima akivaanga: “Atuagaq tun­nius­sara.” Oqarfigaarali: “Naal­lugu atuareer­para.” James Gardnerip, Jimimik taasalik­kama, inus­siar­nersumik oqarfigaanga: “Ataguli, kapitali siul­leq eq­qar­toq­qaalaariar­tigu.” Tupigusuutigaara atuak­kan­ni paasisiman­ngisak­ka taama amerlatigim­mata. Al­las­simaf­fip­pas­suit Biibiliutiga King James atorlugu atuaq­qusar­pai. Kiisami Guuti ilumoor­toq, Jehova, pil­lugu paasisaqar­punga. Ul­laaq taan­na atuak­kami kapitalit pingasut atuaqatigiis­sutigaavut. Taava sisaman­ngor­nerit tamaasa kapitalit pingasut atuaqatigiis­sutigisar­pavut. Atuaq­qis­saaqatigiit­tar­ner­put nuan­nareqaara. Qatan­ngum­mit Charles T. Rus­sel­limik ilisarisiman­nit­tumit atuaq­qis­saaqatigineqar­tar­nera uan­nut im­mik­kut pisin­naatitaaf­fiuvoq nuan­nersoq.

 Sapaatit-akun­nialun­ni atuaq­qis­saaqatigineqareerlunga oqaluus­sisar­tun­ngor­punga. Il­lumiit il­lumut oqaluus­sinis­sara saper­nar­tilaar­tar­para, Jimil­li sapiis­suseqar­neruler­nis­san­nut ikior­paanga. (ApS 20:20) Ikior­neqarluarama oqaluus­sineq nuan­naril­lualer­para. Ul­loq man­na tikil­lugu oqaluus­sineq uan­nut suliak­kiun­neqarsimasoq im­mik­kut pisin­naatitaaf­fit­tut an­ner­paatut isigaara. Guutimut suleqataalersin­naagama tul­luusimaarutigeqaara! – 1 Kor 3:9.

Misigisara im­mik­kut il­luin­nar­toq oqalut­tuarilaas­savara, tas­sa Jehovamut asan­nin­nera siul­leq. (Saq­q 2:4) Sorsun­nermi misigisimasak­ka erloqinar­tut ajor­nar­torsiutil­lu al­lat naam­magalugit ator­nis­saan­nut Jehovamut asan­nin­nera iluaqutigisimaqaara. – Es 65:17.

1971-imi angajoq­qaama inaataan­nit uan­nut at­tar­tor­titaan­nit anisitaavunga. Sooq? Jehovap Nalunaajaasuinit najugaqarfigineqar­nis­saa ataatas­sama kis­saatigin­ngil­luin­narmagu! Taamanik­kut aningaasaateqar­pal­laan­ngilanga. Nap­parsim­mavim­mi sulinin­ni ul­lut 14-ik­kaarlugit akis­sarsisar­punga, Jehovamul­lu ataq­qinaataasumik oqaluus­sinermi atisas­saqarumal­lunga akis­sarsiak­ka tamangajaasa atisanut atoq­qam­mer­pak­ka. Aningaasaateqalaaraluar­punga, taak­kuali peroriar­torfin­ni Michiganimi aningaaserivim­miip­put. Taamaat­tumik ul­lualun­ni biilin­ni sinit­tariaqar­tarsimavunga, orsiisarfiil­lu anar­tarfiini asat­torlungalu un­ngiar­tar­punga.

Ul­lut ilaan­ni sulereerlunga katersuut­toqar­niar­toq nalunaaqut­tap-akun­nialui sioq­qul­lugit naalagaaf­filersaarfim­mukar­punga. Angalaaqatis­sak­ka utaq­qitil­lugit Vietnamimi pisimasut  takorluuler­pak­ka. Soorlulusooq inuup timaa ikumasimasoq naamasin­naal­lugulu aak takusin­naagiga, isumatsan­nermik nunusin­naajun­naar­punga. Soorlumi tusaallugillu takusinnaagikka angutit inuusut­tut isumatsas­simal­lutik aperisut: “Anigus­savara? Anigus­savara?” Nalunngikkaluarlugu toqusus­saasut tatiginar­pasin­niarsaralunga iluarsinis­saan­nik isumal­lualersin­niar­tar­pak­ka. Tamak­ku eq­qarsaatigilerlugit misigis­sutsik­kut aalas­sal­latsitaangaar­punga.

Qis­saserlungalu Jehovamut qinuler­punga. (Tus­s 56:9) Makititaanis­saq piviusorsior­tumik eq­qarsaatigiler­para. Makititaanis­samik neriuut takorluuinerin­naan­ngitsuusoq tas­sani up­per­narsil­lualer­para! Jehovap angutit inuusut­tut taak­ku inuunermut makitik­kumaar­pai, taan­nalu pil­lugu ilumoor­toq ilin­nias­sal­lugu periarfis­sin­neqas­sap­put. An­niaatit naal­liuutil­lu misigisimasavut paratiisimi eq­qaamaneqaq­qin­ngisaan­nas­sap­put. (ApS 24:15) Taman­na paasil­lualerak­ku Jehovamut asan­nin­nera aatsaat taama sak­kor­tutigiler­poq. Ul­loq taan­na puiun­ngisaan­nar­para. Taamanimiil­li Jehovamut asan­nin­nera siul­leq eriagiuar­tuar­para, ingam­mik inuunin­ni ajor­nar­torsiuleraangama.

Inuit sorsun­nerup nalaani ajor­torujus­suarmik iliuuseqar­tar­put, uangat­taaq pisooqataavunga. Al­las­simaf­fiit nuan­naril­luak­kak­ka marluk tup­pal­lersaatigisar­pak­ka. Siul­leq tas­saavoq Saq­qum­mersitat 12:10, 11-lu, tas­sani al­las­simam­mat Saatanip ajugaaf­figineqar­neranut oqaluus­siner­put pis­sutaagin­narani aam­mali Jiisusip aava pis­sutaasoq. Aap­paat­tut, Galatiamiunut al­lak­kat 2:20, tas­sani Jiisusip uanga pil­lunga toquneranik eq­qaasin­neqar­tar­punga. Jiisusip pil­liutaa pis­sutigalugu iliuuserisimasak­ka pil­lugit Jehovamit isumak­keerfigineqar­punga. Taamaat­tumik mas­sak­kut ilerasuuteqar­nanga Guuti nal­lit­tuingaar­toq, Jehova, pil­lugu al­lanut nalunaajaajuarumal­lunga aalajangerluin­narsimavunga! – Hebr 9:14.

Inuunin­ni misigisimasak­ka eq­qarsaatigigaangak­kit paasisar­para Jehovap isumas­sor­tuarsimagaanga. As­sersuutigalugu Jimip paasigamiuk biilin­ni un­nuisar­tunga qatan­ngum­mut ar­namut, ininik at­tar­tor­titsisar­tumut, in­nersuup­paanga. Qularutigin­ngilara angerlarsimaf­feqar­nin­nut Jehovap Jim qatan­ngul­lu ar­naq aq­qutigisimagai. Ilumut Jehovap ajun­ngingaas­susia! Kif­faminik aalajaatsunik isumas­suiuar­tuuvoq.

1971-imi maajimi Michiganimukar­tariaqaler­punga. Floridamiit aal­lan­ngin­nin­ni biilin­ni nas­sataasivik ulik­kaarlugu Biibililersaarutinik im­mer­para avan­namul­lu aal­larlunga. Angalanera qiteq­qutiin­narigalu Biibililersaarutit nas­satak­ka agguaal­lugit nungoriikatap­pak­ka. Sumut pigaluaraangama Naalagaaf­fim­mik nutaarsias­saq nuan­nersoq oqaluus­sis­sutiginiarlugu ilungersuutigiuar­tar­para. Par­naarus­sivin­ni oqaluus­sisar­punga, al­laal­lu biilinut unin­ngaar­tarfin­ni angutit perusuersar­tarfiini naqitaaq­qanik agguaas­sisarlunga. Eq­qarsaatigisar­para inuit oqaloqatiginikuusama taak­kua sal­lusuis­sut ilik­karsimaneraat. – 1 Kor 3:6, 7.

Nas­suerutigis­savara sal­lusuis­sut ilik­kaq­qaarak­ku periaaserip­pal­laar­nanga oqaluus­sisarama, ingam­mik ilaqut­tak­ka oqaloqatigigaangak­kit. Ilaatigut toq­qaan­nar­pal­laamik oqar­toor­tar­punga. Qatan­ngutik­ka, John Ronilu, asaqaak­ka, oqaluus­sif­figigaangak­kil­lu pin­ngitsaalil­lugit up­perisar­taan­nik paasitin­niar­tar­pak­ka. Kingor­natigut utoq­qatserfigaak­ka kimigiiserfigisarsimagak­kit. Sal­lusuis­sum­mil­li up­perin­nileq­qul­lugit Jehovamut qinujuar­tar­punga. Taamanimiil­li periaaserin­nerul­lunga nalunaajaal­lungalu ilin­niar­titsisar­nis­san­nik Jehovap ikiorsimavaanga. – Kol 4:6.

Inuunin­ni Jehovamut at­taveqar­nera pingaar­ner­paatit­tuaan­nas­savara. Al­lanil­li aam­ma asasaqar­punga, as­sersuutigalugu nuliara, Susan. Jehovamik  kif­far­tor­nin­nik ikiuil­luarsin­naasumik nuliar­nis­sara kis­saatigiuarsimavara. Susan ar­naavoq anersaak­kut nukit­tooq Jehovamut asan­ningaar­toq. Ul­lut ilaan­ni angajoq­qaavisa najugaan­ni, Rhode Islandimi, pulaar­para. Aneerasaar­tarfim­mi is­siarusaarluni Napasuliaq Alapernaarsuiffik-mik Biibiliminil­lu atuar­poq. Puiunaatsutut maluginiar­para al­laaserisaq atuaq­qis­saaqatigiis­sutis­saan­ngitsoq misis­soq­qis­saarlugulu Biibilimini al­las­simaf­fiit tamaasa qup­per­tarai. Tas­sani paasivara Jehovamut at­taveqar­nini pingaar­tingaaraa. 1971-imi decembarimi katip­pugut. Qujamasoqaanga uan­nik taama tapersersuil­luar­tigisumik nuliarsimagama. Qujamasuutiginer­paavarali uan­nut asan­nik­kaluarluni Jehova asanerum­magu.

Jes­semik Paulimil­lu er­ner­taar­nitsigut nuliaralu pil­luaq­qusaangaar­pugut. Peroriar­tor­nermin­ni Jehovamit siulersor­neqar­tuarsimap­put. (1 Sam 3:19) Susanimut uan­nul­lu pil­luaataangaar­tumik sal­lusuis­sut pigiliup­paat. Ukiut 20-t sin­nerlugit pif­fis­saq tamaat kif­far­tor­put. Jehovamut asan­nin­ner­tik siul­leq eriagigamik­ku suli kif­far­tor­put. Ukus­sak­ka marluk, Stephanie Racquelilu, tul­luusimaarutigeqaak­ka panit­tul­lu isigalugit. Er­nik­ka Jehovamut uum­matimik­kut asan­ningaarlutil­lu kif­far­tor­tunik nuliarmata qujamasuutigeqaara. – Ef 6:6.

 Ukiut 16-it Rhode Islandimi kif­far­tor­punga tas­sanilu ikin­nguter­pas­suaqalerlunga. Suli eq­qaamasar­pak­ka utoq­qaaner­tat kif­far­toqatigisak­ka pik­koris­sorsuit. Aam­mat­taaq nak­kutil­liisut angalasar­tut uan­nik ikiuil­luarsimasut qujamasuutigisar­pak­ka. Angutit Jehovamut asan­nin­nermin­nik siul­lermik eriagin­nit­tut kif­far­toqatigalugit im­mik­kut pisin­naatitaaf­figisimavara. 1987-imi Nor­th Carolinamut pisariaqar­titsif­fiunerusumut nuup­pugut tas­sanilu aam­ma ikin­nguter­pas­suaqalerluta. *

2002-mi aggustimi Pat­tersonimi USA-miit­tumi Betelimi suleqatiserineqarat­ta Susanilu akuersivugut. Uanga Kif­far­tor­nermik Nak­kutil­liisoqarfim­mi suliler­punga Susanilu errorsisarfim­mi, nuan­narilingaak­kamini, suliler­poq. 2005-imi aggustimi Siulersuisoqatigiin­nut ilaasor­tan­ngor­titaanera im­mik­kut pisin­naatitaaf­figiler­para. Sulias­samut tamatumun­nga nutaamut ajuk­kuk­kaluar­punga. Aam­ma akisus­saaf­fik taman­na, sulias­saq angalasar­nis­sarlu Susanip isumatsaatigai. As­sersuutigalugu Susanip tim­misar­tor­nis­sani nuan­narin­ngivit­tar­paa, tim­misar­tukulasar­pugul­li. Siulersuisoqatigiin­nut ilaasor­tat al­lat nuliaasa asan­nit­tumik siun­nersuutaat iluaqutigisaqai. Taamaat­tumik tapersersor­niarlunga aalajanger­poq, qujas­sutis­saqarfigeqaaralu.

Al­laf­fin­ni nuan­nersor­pas­suar­nik as­siuteqar­punga nuan­nersumik inuuneqarsimanin­nik eq­qaasitsisunik. Jehovamut asan­nin­nera siul­leq eriagiuarak­ku pil­luaq­quneqaatigeqaara!