Ulluni kingullerni makkunani ikinngutipalaaqarnaveersaarit
“Ikinngutipalaaqarneq ileqqorikkaluartunut aseruutissiisarpoq.” – 1 KOR 15:33.
1. Piffissaq qanoq ittoq inuuffigaarput?
‘ULLUNI atugarliungaarfiusuni’ inuuvugut. ‘Ullut kingulliit’ 1914-imi aallartimmatali silarsuarmi pissutsit ajorsiartuinnarsimapput. (2 Tim 3:1-5) Suli ajorsiartuinnarnissaat qularutiginngilarput, Biibilimimi ima siulittuuteqarpoq: ‘Inuit ajortut peqquserluttullu ajortumut nakkaakkiartuinnartussaapput.’ – 2 Tim 3:13.
2. Inuppassuit sunik aliikkutaqarniartarpat? (Allaaserisap aallaqqaataani assit takukkit).
2 Inuppassuit ullumikkut nakuusertortalinnik, inuunerluttortalinnik anersaarsiornertalinnilluunniit aliikkutaqarniartarput. Assersuutigalugu internetikkut, fjernsynikkut, filmini, atuakkani atuagassianilu nakuuserneq inuunerlunnerlu isorisassatut isigineqarunnaaraluttuinnarput. Pissusilersoriaatsit inuit siornatigut quarsaarutigisartagaat ima nalinginnaalersimatigipput allaat inatsisitigut sumiiffiit ilaanni akuerisaalersimallutik. Romamiut 1:28-32 atuakkit.
Imaanngilarli pissusilersoriaatsit taakku Jehovap akuersaarai. –3. Guutip najoqqutassiaanik malinnittut qanoq inuppassuarnit isumaqarfigineqarpat?
3 Aamma ukiuni hundredini siullerni inuit nakuusernernik inuunerluttuliornernillu aliikkutaqartarput. Jiisusilli ajoqersugai Guutip najoqqutassiaanik malinnittuugamik taamaattunik aliikkutaqarneq ajorput. Inuit tamanna ‘tupigusuutigisarpaat’ illaruaatigalugillu mitaatigisarlugit. (1 Petr 4:4) Ullumikkuttaaq inuppassuit isumaqarput inuit Guutip najoqqutassiaanik malinnittut eqqumiitsuusut. Biibilimi ilisimatinneqarpugut Kristusip Jiisusip maligassiaanik malinnittut allaat ‘qinugineqarumaartut’, tassa malersorneqarumaartut. – 2 Tim 3:12.
‘IKINNGUTIPALAAQARNEQ ASERUUTISSIISARPOQ’
4. Sooq silarsuaq manna asassanngilarput?
4 Guutip piumasaatut iliorniarutta ‘silarsuaq taassumaluunniit pii asasinnaanngilavut’. (1 Johannesi 2:15, 16 atuakkit). Saatanip, ‘silarsuup matuma guutiata’, silarsuaq pissaaneqarfigaa. Upperisarsiornikkut, politikkikkut niuernikkullu aaqqissuussaanerit aamma tusagassiuutit aqqutigalugit inuit tammarsaarniartarpai. (2 Kor 4:4; 1 Joh 5:19) Silarsuarmit sunnertikkumannginnata kikkut ilagisarnerlugit mianersortariaqarpugut. Biibilimi paatsuugassaanngitsumik mianersoqquneqarpugut: “Tammarnaveeritsi! Ikinngutipalaaqarneq ileqqorikkaluartunut aseruutissiisarpoq.” – 1 Kor 15:33.
5, 6. Kikkut ilagisartagarerusussanngilavut, aamma sooq?
5 Jehovamut attaveqarluartuaannarumalluta Guutip uumigisaanik iliuuseqartartut – aamma Jehovamik pallorfiginnittuuneraraluarlutik naalakkumanngitsut – ilagisartagarinngilavut. Taamatuttaaq kristumiut ingasattumik ajortuliorsimasut peqqissimiumanngippata peqatigiunnaassavavut. – Rom 16:17, 18.
6 Inuit ikinngutiminnut iluareqqusaartarput akuerineqarumallutik. Jehovamut naalakkumanngitsut ilagisarutsigit ajortuliornissamut ussernartorsiulersinnaavugut. Assersuutigalugu ilagisartakkavut kinguaassiuutitigut inuunerluttuuppata pissusilersornerisigut assigileriartorsinnaavavut. Ajoraluartumik uppeqatitta ilaasa tamanna nakkaannarfigisimavaat, peqqissiminngitsullu ilaajunnaarsitaasimapput. (1 Kor 5:11-13) Peqqissimiumanngitsut Petrusip allaatigisaatut ilerput. – 2 Petrusi 2:20-22 atuakkit.
7. Kikkut qanimut ikinngutiginiartassavavut?
7 Kikkut tamaasa inussiarnisaarfigiumagaluarlutigit Guutimut naalasseriitsut ikinngutigilertariaqanngilavut. Aamma Jehovamut kiffartunngitsumik Mark 3:35.
kuisimanngitsumik takumasaqalerneq eqqortuliornerunngilaq. Guutimit iluarisaaneq Guutimik asanninngitsunut iluareqqusaarnermit pingaarnerungaarpoq. Guutip peqqussutaanik malinnittut kisiisa qanimut ikinngutiginiartariaqarpavut. Jiisusi ima oqarpoq: “[Guutip] piumasaanik iliortoq tassaavoq qatanngutiga angut qatanngutigalu arnaq anaanagalu.” –Jehovamit iluarisaaneq taassumunnga asanninngitsunut iluareqqusaarnermit pingaarnerungaarpoq
8. Ikinngutipalaaqarneq Israelikkunnut qanoq sunniuteqarpa?
8 Ikinngutipalaaqarneq ajunaarutaasarpoq. Israelikkut misigisimasaat assersuutigeriartigu. Nunamut neriorsuutigisamut pinngitsiarneranni Jehovap nunap inuiinut mianersoqquai. Ima oqarpoq: “Guutigisaat pallorfigissanngilatit guutisiorfigissanagillu ileqquiluunniit malinniassanagit, guutiliaalli aserortissavatit ujaqqallu nappartitaat sequtserlugit. Naalagaq Guutersi guutisiorfigissavarsi.” (2 Mos 23:24, 25) Israelikkulli amerlanerit Guutip ilitsersuutai malikkunnaarpaat taannalu aalajaaffigiunnaarlugu. (Tuss 106:35-39) Qanoq kinguneqarpa? Kingusinnerusukkut Jehovap inuiaqatigiit Israelikkut innuttariunnaarlugit ilagiit kristumiut innuttassamisut qinerpai. – Matt 23:38; ApS 2:1-4.
ATUARNIAKKATIT ISIGINNAARNIAKKATILLU EQQUMAFFIGIKKIT
9. Sooq silarsuarmi aliikkusersuutit tusagassiuutillu ajoqutaasinnaappat?
9 Silarsuarmi aliikkusersuutit tusagassiuutillu amerlanerit, soorlu fjernsynimi aallakaatittakkat, nittartakkat atuakkallu, Jehovamik attaveqarnitsinnut ajoqutaasinnaapput. Tamakku Jehovamik taassumalu neriorsuutaanik qulalersitsisinnaapput Saatanillu silarsuaanik tatiginninnissamut kajumissaarutaasarlutik. Taamaattumik ‘silarsuarmiut kajungerisaannut’ pilerissuseqalersitsisinnaasunik isiginnaannginnissarput, atuannginnissarput tusarnaannginnissarpulluunniit eqqumaffigisariaqarparput. – Tit 2:12.
10. Silarsuarmi aliikkusersuutit tusagassiuutillu suneqassappat?
10 Saatanip silarsuaa tassanilu aliikkusersuutit tusagassiuutillu ajoqutaasut piuneerunneqangajalerput. Biibilimi ima allassimavoq: ‘Silarsuaq piumatussusialu nungussapput, Guutilli piumasaanik iliortoq naassaanngitsumik atassaaq.’ (1 Joh 2:17) Assingusumik tussiaasiortoq ima erinarsorpoq: “[Pinerluttut] piiagaasussaapput ... Kisianni qanilaartut nuna kingornutissavaat pilluangaarnertillu nuannaarutigissallugu.” Qanoq sivisutigisumik? “Iluartut nuna kingornutissavaat najugaqassallutillu tassani naassaanngitsumik.” – Tuss 37:9, 11, 29.
11. Aalajaattuarsinnaaqqulluta Jehovap qanoq isumassortarpaatigut?
11 Saatanip silarsuaata neqeroorutigisaata akerlianik Jehovap peqatigiissortani aqqutigalugit tunniussai iluaqutigigutsigit naassaanngitsumik inuulersinnaavugut. Jiisusi Jehovamut ima qinuvoq: “[Inuuneq] naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.” (Joh 17:3) Jehovap ilisimaleqqulluni peqatigiissortani aqqutigalugit pisariaqartitatsinnik tamanik isumassortarpaatigut. Assersuutigalugu kiffartorfigiuaannaqqulluni atuagassianik, quppersakkanik, atuakkanik, isiginnaagassianik nittartakkamillu iluaqutissatsinnik pilersorpaatigut. Aamma nunarsuaq tamakkerlugu ilagiinni 110.000-nit amerlanerusuni ataatsimiittarnerit aaqqissuunneqartarput. Jehovamik taassumalu neriorsuutaanik upperinninnerput ataatsimiinnerni ataatsimeersuarnernilu Biibilimi ilikkakkatsinnit nakussatsinneqartarpoq. – Hebr 10:24, 25.
TAAMAALLAAT “NAALAKKAMI” KATIGIT
12. “Naalakkami” katinnissamik Biibilimi peqqussut nassuiaruk.
12 Kristumiu katinnissaminik kissaateqartoq ikinngutissarsiornermini mianersoqqissaartariaqarpoq. Guutip oqaasiani mianersoqquneqarpugut: “Uppinngitsut qamutinik uniaqatiginiaqinasigik! Iluarnerummi inatsisaanneq sukkut peqatiginerpaa? Qaamasoq taartorlu sukkut assigiissuteqarpat?” (2 Kor 6:14) Guutip kiffai Biibilimi siunnersorneqarput taamaallaat “Naalakkami”, tassa tunniulluinnarsimalluni kuisimasumut Jehovallu najoqqutassiaanik maleruaasumut, katittaqqullugit. (1 Kor 7:39) Jehovamik asannittumut katikkuit Guutimut aalajaattuarnissannut tapersersorteqalissaatit.
Jehovamik asannittumut katikkuit Guutimut aalajaattuarnissannut tapersersorteqalissaatit
13. Aappaninnissaq pillugu Jehova Israelikkunnut qanoq inerteqquteqarpa?
13 Jehovap nalunngilaa uagutsinnut suna pitsaanerpaasoq, aamma “Naalakkami” katinnissamut peqqussutaa nutaajunngilaq. Israelikkunnut peqqussutaa eqqarsaatigeriaruk. Jehova inuit imminut pallorfiginninngitsut pillugit Mosesi aqqutigalugu ima oqarpoq: “Aappaninnikkut atassuteqarfigissanngilatit, panitit ernerinut nuliartaaritissanngilatit taakkualuunniit panii erninnut nuliartaaritissanagit, ernitit uannik tunussitinneqaqqunagit guutit allat guutisiorfigilerlugit. Naalanngikkussi Naalakkap kamaatingaarumaarpaasi tassuuguinnarlu nungutikkumaarlutit.” – 5 Mos 7:3, 4.
14, 15. Salomop Jehovap peqqussutaanik sumiginnaanera qanoq kinguneqarpa?
14 Salomo Israelimi kunnginngoqqammernermi kingorna ilisimassusermik qinuvoq, Jehovallu assissaqanngitsumik ilisimassuseqalersippaa. Tamatuma kingunerisaanik Salomo inuiannut ingerlalluartunut naalakkersuisutut silatuutut tusaamaneqalerpoq. Sabap dronningiata Salomop ilisimassusia tupigusuutigalugu ima oqarfigaa: “Ilisimassutsit peqangaarutitillu tusaamanerinit annerungaarput.” (1 Kng 10:7) Aammali Guutip peqqussutaanik sumiginnaaneq Jehovamillu pallorfiginninngitsumik katinneq qanoq kinguneqarsinnaasoq Salomop inuuneranit erserpoq. – Oqal 4:13.
15 Salomo Jehovamit pilluaqquneqaraluarluni Guutip peqqussutaanut ersarissunut naalakkunnaarpoq. “Salomop arnat nunani allamiut amerlaqisut” Jehovamik pallorfiginninngitsut asavai, allaallu 700-nik nuliaqalerpoq 300-nillu panerfaqalerluni. Tamanna qanoq kinguneqarpa? Salomo utoqqalimmat nuliaasa “uummataa guutinut allanut saatsippaat”, Jehovallu “isaani ajortumik iliorpoq”. (1 Kng 11:1-6) Allanit ajortumik sunnerneqarnini Jehovamut aalajaakkunnaassutigaa. Salomomut silatuumut taamatut kinguneqarsinnaappat uagutsinnuttaaq taamatut kinguneqarsinnaavoq. Taamaattuminguna Jehovamik asanninngitsumut katinnissarput periarfissatut eqqarsaatiginerluunniit ajoripput.
16. Uppeqatiginngisamik aappallit Biibilimi qanoq siunnersorneqarpat?
16 Taavami aappaqareersumik Jehovamik nalunaajaasunngortoqarpat? Biibilimi ima allassimavoq: “Taamatuttaaq ilissi nuliaasusi uissinnut naalatsigitissaasi, uiusut ilaat oqaatsimut naalasseriikkaluartut oqaluffigineqanngikkaluarlutik nuliamilli inuusaasiatigut ilanngussinnaaqqullugit.” (1 Petr 3:1) Uiusumut Jehovamik nalunaajaasuunngitsumik nulialimmut aamma tamanna atuuppoq. Guutip oqaasiani siunnersuut ersarippoq: Aappaalluartuugit Guutillu aappariinnermut najoqqutassiai maleruarlugit. Pitsaanerusumut allannguinitit aappavit maluginiarunigit, immaqa nammineq aamma Jehovamut kiffanngorumalissaaq. Aappariippassuit tamanna misiginikuuaat.
JEHOVAMIK ASANNITTUT ILAGISARTAGARIKKIT
17, 18. Sooq Noa kristumiullu siulliit annappat?
17 Ikinngutipalaaqarneq Jehovamut naalakkunnaarsitsisarpoq, ajunngitsunilli ilagisartagaqarneq taassumunnga aalajaattuarnissamut iluaqutaasarpoq. Noa uagutsinnut maligassaalluarpoq. Taassuma nalaani ‘nunarsuarmi inuit ajussusiat angeqaaq ullorlu tamaat iliuuseriumasaat pilersaarusiaallu ajortuinnaapput’. (1 Mos 6:5) Inuit taama ajortigimmata Jehova aalajangerpoq silarsuaq ajortoq piuneerunniarlugu. Noali taakkunannga allaaneruvoq. Angutaavoq assuarnaatsoq Guutip iluarisaanik iliortoq. – 1 Mos 6:7-9.
18 Noa Jehovamik asanninngitsunik ikinnguteqanngilaq. Taassuma ilaqutaasalu umiarsualiornertik ulapputigaat. Tamatuma saniatigut Noa ‘iluarnermik nalunaariartortitaavoq’. (2 Petr 2:5) Noa taassumalu nulia taakkualu erneri pingasut nuliilu peqatigiillutik Guutip iluarisaanik ulapputeqartuaramik ulersuarmi annapput. Taakkununnga kinguaajuvugut, taamaattumik Noap ilaqutaasalu Jehovamut naalattuullutillu ikinngutipalaaqarsimannginnerat qujamasuutigisariaqarparput. Taamatuttaaq kristumiut siulliit inunnik Jehovamik asanninngitsunik ilagisartagaqarneq ajorput. Jehova naalakkamikku ukiumi 70-imi Jerusalemip aserugaanerani annapput. – Luk 21:20-22.
19. Jehovamut aalajaattuarnissatsinnut suna iluaqutigisinnaavarput?
19 Noa ilaqutaalu aamma kristumiut siulliit assigalugit Jehovamik asanninngitsunik ikinnguteqarnaveersaartarpugut. Millionilinnik aalajaatsunik ikinngutigisinnaasatsinnik uppeqateqarpugut. Taakkua ulluni artornartorsiungaarfiusuni ‘uppernitsinni aalajaattuarnissatsinnut’ ikiorsinnaavaatigut. (1 Kor 16:13; Uss 13:20) Takorlooriaruk silarsuup naggatissaani aniguisitaalluni silarsuarmilu nutaami inooqataalluni qanoq nuannertigissasoq! Ila ikinngutipalaaqalinnginnissatta pingaaruteqassusia!