UKIUT 200-t matuma siorna inuit aviisini allassimasut ilaannaat tatigisinnaavaat. Ullumikkuttaaq internetimi atuakkavut takusavulluunniit ilaannaat upperisinnaavavut. Internetimi nassaareriaannaasatsinnik paasissutissarpassuaqarpoq. Ilarpassui ilumoorput, atoriaannaapput ajoqutaanatillu, aammali eqqunngitsut, atorsinnaanngitsut ulorianartullu amerlaqaat. Taamaammat suut atuassanerlugit toqqaaniaraangatta mianersortariaqarpugut. Ilaasa internetertaleraangamik internetimi allaqqanera ikinngutiminnilluunniit nassiunneqarsimanera pissutigiinnarlugu ilumoorsorisarpaat. Oqaluttuaq qanorluunniit qaqutigoortigigaluarpat upperisinnaasarpaat. Biibilimili ima mianersoqquneqarpugut: “Nakutikkuminartup upperisarpai oqaaserineqartut suut tamaasa, silatuulli alloriarnini sianigeqqissaartarpai.” – Uss 14:15, 1990.

Silatuujusoq uppertikkuminartuunngilaq. Mianersortarami internetimi takusani qanorluunniit nuannarineqartigigaluarpat aatsaat ilumoornersoq uppernarsinikuugaangamiuk upperisarpaa, taamaalilluni uupakaatitaaneq ajorpoq. Illit qanoq silatuujusinnaavit? Imminut ima aperigit: ‘Oqaluttuaq pisortatigoortumit tutsuiginartumillu nittartakkameersuua? Imaluunniit nittartakkameersuua kikkut tamarmik isummaminnik saqqummiussiffigisinnaasaannit, allaalluunniit suminngaanneernera ilisimaneqarani? Nittartakkamit tutsuiginartumit oqaluttuaq taanna ilumuunnginnerarneqarsimava?’ * Taava naliliisinnaassuseqarlutit ‘pututikkuminaatsuugit’. (Uss 7:7, 1990) Uppernaakkuni immaqa ilumoorsimassanngilaq. Aamma allat pillugit nuanninngitsunik atuagaqaruit eqqarsaatigiuk oqaluttuaq siammartinneqarpat kimut iluaqutaassanersoq aamma sooq allat siammartikkusussimaneraat.

Inuit ilaasa oqaluttuaq ilumoornersoq misissoqqaarnagu nassiunnerisaluunniit kingunissai eqqarsaatigeqqaarnagit ingerlatitseqqiisarput. Immaqa malugeqqusaartuaannaramik nutaarsiassat  siulliullutik siammarterusuttarpaat. (2 Sam 13:28-33) Silatuulli kingunipiloqarsinnaanera eqqarsaatigeqqaartarpaa. Assersuutigalugu inuk peqatigiiffilluunniit tusaamanerlunneqalersinnaavoq.

Immaqa nassiussisup nutaarsiassat ilumoornerannik misissuineq piffissartornarmat misissoqqaarnagit siammartertarpai. Eqqarsarpoq nassiussiffigineqartut misissuiumaartut. Taakkuali piffissaat aamma pingaarpoq. (Ef 5:15, 16) Taamaammat ilumoortuunera nalunarpat nassiunnagu pitsaanerussaaq ima eqqarsaruit: “Qularigukku peertariaqarpara!”

Imminut ima aperigit: ‘E-mailit ingerlateqqittuaannarpakka? Paasissutissanik eqqunngitsunik nassiussisimanera pissutigalugu utoqqatsertariaqarsimavunga? Arlaata ingerlatitseqqiisarunnaaqqullunga qinnuiginikuuaanga?’ Eqqaamajuk ikinngutitit e-maileqarunik namminneq internetersinnaallutillu ilinnit ikiorneqaratik misissuisinnaammata. E-mailerpassuit oqaluttuanik, isiginnaagassianik assinilluunniit tissinartunik ilallit tigorusunngilaat. Aamma Biibili tunngavigalugu oqalugiaatinik immiussanik allattueqqissaarnernilluunniit ingerlatitseqqiineq silatusaarnerunngilaq. * Eqqaamajuk nammineq misissuineq, Biibilimi allassimaffinnik quppiineq namminerlu ataatsimiinnerni akissutissanik piareersarneq allamit taamatut paasissutissarsinermit iluaqutaanerussammat.

Taavami internetikkut Jehovap peqatigiissortai pillugit salluliuutinik takusaqaruit? Tamakku ingerlaannaq itigartikkit! Upperiniaqinagit. Allat isumasiorniarlugit tamakkuninnga ingerlatitseqqiineq silatusaarnerunngilaq, taamaaliornermi salluliuutit siammarneruunnassammata. Isumakuluutigilikkannik internetimi takusaqaruit Jehova ilisimassusermik qinnuigiuk qatanngutinillu inersimalluartunik oqaloqateqarlutit. (Jaak 1:5, 6; Jud 22, 23) Inuit uagutsinnik salluliuutiginnittarnerat tupaallaatigissanngilarput. Inuit Jiisusi salluliuutigisarpaat, ajoqersukkanilu malersorneqartarnissaannik ‘tamanillu sallullutik oqaatigineqartarnissaannik’ oqaluttuuppai. (Matt 5:11; 11:19; Joh 10:19-21) Taamaammat silatusaarlutit eqqarsaqqissaaruit allat salluliornersut uupakaatitsiniarnersullu paasisinnaassavat. – Uss 2:10-16.

Aamma qatanngutivut pillugit nutaarsiassanik misigisimasanilluunniit tusarsimasatsinnik ingerlatitseqqiisarnermut tunngatillugu mianersortariaqarpugut. Ilaannikkut paasissutissamik eqqortuugaluartumilluunniit siammarterineq eqqortuliornerusaranilu asannittuliornerusanngilaq. (Matt 7:12) Assersuutigalugu mamarliineq asannittuliornerunanilu qiimmassaataanngilaq. (2 Th 3:11; 1 Tim 5:13) Nutaarsiassallu ilaat allanut oqaatigeqqusaanngillat. Taamaattunik paasissutissaatillit qaqugu qanorlu saqqummiussisinnaatitaanerat ataqqisariaqarparput. Tassami paasissutissaq tamanna allanut oqaluttuariaarpallaarutsigu ajoquseerujussuarsinnaavugut.

Ullumikkut nutaarsiassat sukkasoorujussuarmik siammarsinnaapput, ilumoorunik ilumuunngikkaluarunilluunniit, atorneqarsinnaagunik pingaanngikkunilluunniit, ajoqutaanngikkunik navianarunilluunniit. Ataasiinnarmulluunniit allakkaluaruit, nassiussiffigisavit sekundit ingerlanerinnaanni allatat silarsuaq tamakkerlugu ingerlateqqissinnaavaa. Taamaammat kikkunnut tamanut ingerlaannaq paasititserusunnerit akioruk. Pissanganartunik atuagaqaraangavit eqqaamajuk asanninneq ‘tamatigut uppertaraluarlunilu’ pasillerumatuujunngikkaluarlunilu uppertikkuminartuunngitsoq. (1 Kor 13:7) Jehovap peqatigiissortai qatanngutivullu asasavut pillugit salluliuutit upperinngisaannassavavut. Eqqaamajuk salluliuutiginnittut tamakkuninngalu siammarterisut Saatani Diaavulu, ‘sallumut ataataasoq’, nuannaartittarmassuk. (Joh 8:44) Taamaattumik silatuujulluta paasissutissarpassuit atuariaannaasavut qanoq atornerlutigit mianersorta. Biibilimi allassimaneratut “uppiasut sianiissuseq kingornussatut pisassaraat, sianisuulli ilisimassusermik niaqoruserneqassapput”. – Uss 14:18.