MISIGISALIKKERSAARUT
Guuti anaanagalu eqqisseqatigaakka
ANAANAMA aperaanga: “Soorliaasiit siuaasatit pallorfigiumajunnaarpigit? Paasinnginnakku taakku pissutigalugit illit inuusutit? Qujamasuffiginngiligilluunniit? Qanoq ilillutit ileqqut kinguaariippassuarni ileqqorineqarsimasut ataqqiumajunnaarsinnaavigit? Siuaasatsinnik ataqqinnikkumajunnaarnerpit assigiinnarpaa oqartutit uagut pallorfiginninnerput sianiitsorpallannerusoq.” Taama oqariarluni anaanaga qissaserpoq.
Pisimasoq tamanna qaammatialunnik sioqqullugu anaanaga Jehovap Nalunaajaasuinit Biibilimik atuaqqissaaqatigineqarnissamik neqeroorfigineqarsimavoq. Atuaqqissaarumanngilaq, inussiarnisaarusukkamili neqeroorfigai uanga atuaqqissaaqatigisinnaagaannga. Atuartalernerali ilutigalugu aaqqiagiinngissuteqartalerpugut. Anaanaga naalattuaannarnikuuara, maannakkulli assuarilerpaanga. Jehova nuannaartikkusukkakku tamatumuuna anaanama piumasaa malissinnaanngilara. Tamanna oqitsuinnaanngilaq, Jehovalli nakussatsippaanga.
JEHOVA PILLUGU ILINNIARNEQ
Japanimi inuit amerlanerit assigalugit ilaquttakkalu Buddhasiortuuvugut. Jehovap Nalunaajaasuinit qaammatini marlunni atuaqqissaaqatigineqareerlunga paasilerpara Biibili ilumoortuusoq. Qilammiusumik ataataqarlunga paasigakku ilisarisimallualerusuummeqaara. Aallaqqaataani ilikkakkakka pillugit anaanagalu oqaloqatigiilluta nuannarisaqaarput. Naalagaaffilersaarfimmi sapaatikkut ataatsimiinnerit najuuffigisalerpakka. Ilikkagaqarluariarama anaanaga oqaluttuuppara Buddhasiortut ileqqulersuutaannut ilaasarunnaarniarlunga. Tassanngaannaq allanngorpoq. Ima oqarpoq: “Siuaasatsinnik asannikkunnaartumik ilaqutaqarluni nikanarsaataavoq.” Naalakkerpaanga Biibilimik atuaqqissaartarnera ataatsimiigiartarneralu unitsissagikka. Anaanama taama oqarnissaa ilimaginngisaannarpara! Soorlu inuk alla.
Ataatama anaanaga isumaqatigaa. Efesosimiunut allakkat kapitali 6-imi ilikkarnikuuara Jehovap kissaatigigaa angajoqqaakka naalassagikka. Ilaqutariittut eqqisseqatigiinnissarput kissaatigaara, eqqarsarpungalu taakku naalakkukkit aamma uannut tusarnaarumanerulissasut. Tamatuma nalaani gymnasiami atualernissamut misilitsinnissamut piareersartussaavunga, taamaattumik aalajangerpunga qaammatini pingasuni angajoqqaakka naalanniarlugit. Jehovali neriorsorpara qaammatit pingasut taakku qaangiuppata ataatsimiinnerit najuuffigeqqittalerniarlugit.
Aalajangernera marlutsigut silatusaarnerunngilaq. Siullertut, eqqarsarsimagaluarpunga qaammatit pingasut taakku qaangiuppata Jehovamut kiffartornissara suli kissaatigingaassallugu.
Akerlianilli taassumunnga attaveqarnera sanngiillipallappoq. Aappassaattut, anaanaga ataatagalu Jehovamut kiffartorunnaarsinniarlunga suli ilungersornerulerput.IKIORNEQARNEQ AKERLILERSORNEQARNERLU
Naalagaaffilersaarfimmi nalunaajaasorpassuit ilaquttaminnit akerlilersorneqartut naapittarpakka. Taakkua qularunnaarsippaannga Jehovap nakussatsikkumaaraanga. (Matt 10:34-37) Oqarput aalajaattuaruma ilaquttama Jehova ilikkarumaaraat. Jehovap tatiginissaa kissaatigigakku pimoorussillunga qinusalerpunga.
Ilaquttama assigiinngitsutigut akerlilersorpaannga. Anaanama tunngavilersuiffigalunga kimigiiserfigaanga atuaqqissaartarnera unitseqqullugu. Amerlanertigut oqaaseqarneq ajorpunga. Oqaaseqaraangamalu tamatta tunngavilersuutitta ilumoortuunerat uppernarsarniarlugu assortuutikulasarpugut. Maannakkut paasilerpara anaanama misigissusaanik upperisaanillu ataqqinninnerusimasuuguma eqqissisimanarnerusimassagaluartoq. Angajoqqaama angerlarsimatiinnarniarlunga suliakkernerusalerpaannga. Ilaannikkut illumut iseqqunanga matu parnaartarpaat nerisassaqartissanangalu.
Upperisara qimatsinniarlugu anaanaga allanut ikiortissarsiorpoq. Ilinniartitsisora oqaluukkaluarpaa iluaqutaanngilarli. Anaanama suliffimmini pisortamukaappaanga upperisarsiornerit tamarmik iluaqutaannginnerarlugit oqaluffigeqqullunga. Allaat ilaquttatsinnut sianertarpoq qialluni ikioqqulluni. Tamanna kamaatigeqaara. Ataatsimiinnernili utoqqaanertat eqqaasittarpaannga anaanaga atukkavut pillugit allanik oqaloqateqaraangami taakkununnga nalunaajaasartoq.
Pitsaasumik suliffeqarniassagama angajoqqaama universitetimi ilinniaqqugaluarpaannga. Tamanna
pillugu eqqissilluta oqaloqatigiissinnaannginnatta anguniakkakka pillugit nassuiaallugit arlaleriarlunga allaffigisarpakka. Ataataga kamattorujussuuvoq oqarlunilu: “Isumaqaruit suliffittaarsinnaallutit aqagumut nassaareersimassaatit, taamaanngippat maanngaanniit anissaatit.” Jehovamut ikioqqullunga qinuvunga. Aqaguani oqaluussitillunga qatanngutit marluk immikkoorlutik aperaannga meeqqatik akissarsiaqaatigalugu immikkut ilinniartissinnaanerikka. Ataatama suliffittaarnera iluarinnginnamiuk oqaloqatigiumajunnaavippaanga. Allaallumi anaanaga oqarpoq Jehovamik nalunaajaasunngornanga pitsaanerusimassagaluartoq pinerluttunngorsimaguma.Eqqarsartaatsinnik aaqqiinissannut Jehovap ikiorpaanga qanorlu iliornissannik ilisimatillunga
Ilaannikkut qularilertarpara Jehovap ilumut kissaatigineraa angajoqqaakka taamarsuaq akerlilersussagikka. Taava Jehovamut qinuvunga asanninneralu pillugu Biibilimi qanoq allassimasoqartoq eqqarsaatigeqqissaarlugu. Isumalluartumik eqqarsarnissannut tamanna iluaqutigaara, paasivaralu angajoqqaama akerlilersoraannga ernumagigaminnga. Eqqarsartaatsinnik aaqqiinissannut Jehovap ikiorpaanga qanorlu iliornissannik ilisimatillunga. Aamma oqaluussinerulernera ilutigalugu oqaluussineq nuannarinerujartuinnarpara. Aap, aalajangerpunga pionerinngornissara anguniarniarlugu.
PIONERITUT KIFFARTORNEQ
Qatanngutit ilaasa tusaramikku pionerinngornissara kissaatigigiga, siunnersorpaannga angajoqqaama eqqissiallannissaat utaqqimaaqqullugu. Ilisimassuseq qinnutigaara, misissuivunga, pionerinngorusunninnut pissutiginiakkakka eqqarsaatigaakka qatanngutillu misilittagartuut oqaloqatigalugit. Naggataatigut aalajangerpunga Jehova nuannaartinniarlugu. Aamma paasivara pionerinngornissannut utaqqisimagaluarumaluunniit angajoqqaama suli akerlilersortuaannassagaannga.
Gymnasia naammassingajalerlugu pioneritut aallartippunga. Pionerinngoreersimatsiarlunga pisariaqartitsiffiunerusumut nuukkusulerpunga. Angajoqqaamali aallaqqunngilaannga. Taamaattumik 20-nik ukioqalereernissannut kinguartippara. Anaanaga ernumavallaannginniassammat Japanip kujataani ilaquttannut ungasippallaanngitsumi suliassaqarnersoq immikkoortortaqarfimmut apeqqutigaara.
Japanip kujataani kiffartortillunga Biibilimik atuaqqissaaqatigisartakkakka arlallit kuisimmata nuannaarutigeqaara. Annertunerusumik kiffartulerumallunga tuluit oqaasii ilinnialerpakka. Ilagiinni specialpionerit marluk ilungersuussinerat allanillu qanoq ikiuisarnerat takoreerlugit specialpioneriorusulerpunga. Tamatuma nalaani anaanaga marloriarluni perululluni napparsimalerpoq, ikiorumallugulu marloriarlunga ornippara. Tamanna tupaallaatigeqaa, inussiarnisaarfiginerulaalerpaangalu.
JEHOVAMIT PILLUAQQUSSUTERPASSUIT
Ukiut arfineq-marluk qaangiuttut specialpionerimit siulianik eqqaasama ilaannit, Atsushimit, allagarsivunga. Nuliarusuppoq, aperivaangalu soqutigineriga. Atsushi misigissuseqarfiginikuunngilara isumaqarlungalu aamma taassuma misigissuseqarfiginngikkaanga. Qaammat ataaseq qaangiummat allaffigaara ilisarisimanerulerusullugu. Paasivarput assigiimmik anguniagaqarluta. Piffissaq tamaat kiffartornerput ingerlatiinnarusupparput suliassallu tunniunneqartut suugaluarpataluunniit akuersaarumallutigit. Kingusinnerusukkut katippugut. Katikkatta angajoqqaama ilaquttamalu ilaat allat najuunnerat nuannaarutigeqaara.
Nepali
Tamatuma kingorna pioneriutilluta Atsushi nakkutilliisutut angalasartutut taartaasartussanngortinneqarpoq. Kingornatigut specialpionerinngortinneqarpugut, taavalu uiga aalajangersimasumik
nakkutilliisutut angalasartutut suliassinneqarpoq. Ilageeqatigiit tamakkerlugit siullerpaamik tikeraareerlugit immikkoortortaqarfimmiit sianerfigitippugut. Aperivaatigut ilageeqatigiinni angalasartutut kiffartorluta Nepalimut nuukkusunnersugut.Nunani assigiinngitsuni kiffartortarninni Jehova pillugu ilikkagaqaqaanga
Taama ungasitsigisumut nuunnissara angajoqqaama qanoq igissaneraat ernummatigeqaara. Sianerfigigakkit, ataataga akileriallartoq: “Nunamut nuannersorsuarmukalerputit.” Sunaaffa sapaatip-akunnera sioqqullugu ataataga ikinngumminit Nepali pillugu atuakkamik tunisissimasoq, allaallu tikeraarfigissallugu nuannerunartillugu.
Nepalimi inuit inussiarnersut akornanni kiffartornerput nuannareqaarput. Kingusinnerusukkut Bangladeshi angalaarfigisartakkatsinnut ilanngunneqarpoq. Nepalimut qanikkaluarluni allaanerulluinnarpoq. Oqaluussinitsinni assigiinngitsorpassuarnik misigisaqartarpugut. Ukiuni tallimani nunani taakkunaneereerluta Japanimut uteqquneqarpugut, tassanilu ulloq manna tikillugu ilageeqatigiinni angalasartutut kiffartorpugut.
Japanimi, Nepalimi Bangladeshimilu kiffartornitsinni Jehova pillugu ilikkagaqaqaanga. Nunani taakkunani inuit assigiinngitsunik kultureqarput, pissuseqarput ileqqoqarlutillu. Inuillu immikkut tamarmik asseqanngilluinnartuupput. Takusarpara Jehovap inuit ataasiakkaatut soqutigigai, ataqqigai, ikiortarai aammalu pilluaqqusarai.
Jehovamut qutsatissaqaqaanga. Uannut ilisaritissimavoq suliareqqusaanillu sulisinnaatillunga kristumiumillu pitsaasumik uitaartissimallunga. Jehovap silatusaartumik qanoq aalajangiinissannik ikiorsimavaanga, maannakkullu Guutimut ilaquttannullu attaveqarluarpunga. Jehovamut qujamasoqaanga anaanagalu ikinngutigiilluaqqileratta. Guuti anaanagalu eqqisseqatigigakkit qujamasoqaanga.
Ilageeqatigiinni angalasarnerput nuannareqaarput