Jehovap kisimi oqartussaanera Guutillu naalagaaffia

„[Jehova], illit pigaatit angingaassuseq, pissaaneq, naalannassuseq, kusanassuseq alutornassuserlu . . . [Jehova], illit pigaat naalagaaffik.“ — 1 NALUNAARSUUTIT 29:11.

1. Sooq Jehova qilammi nunamilu kisimi oqartussaalluni Naalagaasinnaatitaava?

’JEHOVAP issiavissaarsuani qilammi aalajaatsumik inissippaa, kunngisullu tamaasa naalagaaffigai.’ (Tussiaat 103:19) Taamatut oqarluni tussiaasiortup naalagaassuseq pillugu ilumoortoq tunngaviusoq saqqummiuppaa. Jehova Guutip Pinngortitsisuugami qilammi nunamilu kisimi oqartussaalluni Naalagaanissani pisinnaatitaaffigaa.

2. Jehovap najugaa anersaakkut ittoq Danielip qanoq oqaluttuaraa?

² Naalagaasoq kisimi oqartussaanerminik atuisinnaajumalluni soorunami innuttaqartariaqarpoq. Aallaqqaammut Jehova anersaanut pinngortitaminut naalakkersuivoq — siullermik ernituaminut kingornalu inngilerpassuarnut. (Kolossemiut 1:15-17) Tamatuma kingunerujussuatigut pruffiiti Danieli qilammi pisunik takorruugaqarpoq. Ima oqaluttuarpoq: „Imaattumillu takusaqarpunga: Issiavissaarsuit inissitsiterneqarput, innalu ittuinnartoq arlaannut ingippoq. . . . Tuusintit, ilumut tuusintilippassuit, kiffartuuppaat, tituusintit, ilumut tituusintilippassuit saani qeqarput.“ (Danieli 7:9, 10) Ukiuni kisissaanngitsuni Jehovap, ’ittuinnartup’, ernini anersaajusut ilaqutariittut ittut amerlasoorpassuullutillu aaqqissuulluagaasut, ’kiffani’ piumasaminik naammassinnittut, kisimi oqartussaalluni siulersorpai. — Tussiaat 103:20, 21.

3. Jehovap kisimi oqartussaalluni naalagaassuseqarfigisani qanoq annertusivaa?

³ Ilaanni Jehovap naalagaassuseqarfigisani annertusivaa avataarsuanik isorartoqalunilu imaannaanngeqisumik aammattaaq nunarsuarmik pinngortitsinermigut. (Jobi 38:4, 7) Qimerluuisumut nunarsuarmiittumut qaammatip, seqernup ullorissallu ingerlaarnerat ima aaqqissugaalluartigalutillu eqqoqqissaartigipput arlaannit siulersorneqarnissaminnik aqunneqarnissaminnilluunniit pisariaqartitserpasissorinaratik. Tussiaasiortorli ima allappoq: „[Jehovap] peqqusineratigut [pinngortitaapput]. Aalajangiiffigai inissaannik naassaanngitsumik, killiliilluni qaangerneqaqqusaanngitsumik.“ (Tussiaat 148:5, 6) Jehovap anersaat silarsuaanni, avataarsuani nunarsuarmilu pisunik siulersuillunilu aaqqissuussillunilu aqutsinermigut kisimi oqartussaassutsini atortuaannarsimavaa. — Nehemia 9:6.

4. Jehovap kisimi oqartussaanini inunnut qanoq atortarpaa?

⁴ Inuit aappariit siulliit pinngortinneqarmata Guutip kisimi oqartussaassutsini allatut atulerpaa. Inuit siunertaqarluartumik nalerisimaarnartumillu inuunissamut pisariaqagaannik tamanik tuniinnarnagit aamma  nunarsuarmi uumasunut naalagaasinnaatippai — oqartussaaffilerpai. (1 Mosesi 1:26-28; 2:8, 9) Taamaattumik erseqqippoq Guuti naalagaassutsiminik atuinermini ajunngitsuliorumatuujuinnarnanilu tukkortuuinnanngitsoq, aammattaarli innuttaminik ataqqinassusiliisoq. Adami Evalu Jehovap kisimi oqartussaalluni naalakkersuineranut naalatsigitittuartillutik nunarsuarmi paratiisiusumi naassaanngitsumik inuunissamik neriuuteqarput. — 1 Mosesi 2:15-17.

5. Jehovap kisimi oqartussaassutsiminik atueriaasia pillugu qanoq oqartoqarsinnaava?

⁵ Tamakkua tamaasa pissutigalugit qanoq isummersinnaavugut? Siullermik, Jehovap kisimi oqartussaassutsini pinngortitaminut tamanut atortuaannarpaa. Aappassaanik, Guuti naalagaassutsiminik atuinermini ajunngitsuliorumatuujullunilu tukkortuuvoq, aamma innuttaminik ataqqinassusiliisarpoq. Kiisalu, Guutip naalakkersuineranut naalatsigitillutalu tamatuminnga tapersersuinerput naassaanngitsumik pilluaqqussutisinitsinnik kinguneqassaaq. Itsaq kunngi Daavi pissutissaqarluarluni ima oqarsinnaasimavoq: „[Jehova], illit pigaatit angingaassuseq, pissaaneq, naalannassuseq, kusanassuseq alutornassuserlu; tassami qilammiittut nunamiittullu tamaasa pigaatit. [Jehova], illit pigaat naalagaaffik, illimmi tamanut qullersaasutut qutsissisitaavutit.“ — 1 Nalunaarsuutit 29:11.

Sooq Guutip naalagaaffia pisariaqartinneqarpa?

6. Guutip kisimi oqartussaanera naalagaaffialu qanoq imminnut attuumassuteqarpat?

⁶ Jehova, qilammi nunamilu Kisimi Oqartussaasoq, pissaaneqartuaannarlunilu naalagaassutsiminik atuiuaannarmat, ima aperisoqarsinnaavoq: Sooq Guutip naalagaaffia pisariaqartinneqarpa? Kisimi oqartussaalluni naalagaasup amerlanertigut innuttaminut oqartussaassuseqartitani aqqutigalugu oqartussaassutsini atortarpaa. Taamaattumik Guutip naalagaaffia Jehovap qilammi nunamilu kisimi oqartussaalluni pinngortitaminik pissaaneqarfiginninneranut ersiutaavoq, taannalu aqqutigalugu naalagaassutsini atortarpaa.

7. Sooq Jehovap kisimi oqartussaanini allatut atorpaa?

⁷ Jehovap kisimi oqartussaanini piffissani assigiinngitsuni assigiinngitsunik periaaseqarluni atortarsimavaa. Allamik pisoqarnerata kingunerisaanik kisimi oqartussaanini allatut atorpaa. Taamatut pisoqarpoq Guutip ernerata anersaajusup tunussisimasup, Saatanip, Adamimik Evamillu Jehovap naalagaassusianut pikitsitsisitsiniarnera iluatsimmat. Pikitsitsineq tamanna Guutip kisimi oqartussaaneranut saassussineruvoq. Qanoq? Saatanip Eva oqarfigigamiuk paarnamik nereqqusaanngitsumik nerigaluaruni ’toqussanngivissoq’, Jehovap sallutuujunera taamaattumillu tatiginanngitsuunera oqaatigimisaarpaa. Saatanip nangilluni Eva ima oqarfigaa: „Guutip nalunngilaa neriffigigaluarussiuk isisi uisitaajumaartut Guutisullu ilerumaartusi ajunngitsoq ajortorlu nalujunnaassallugit.“ Taamaalilluni Saatani oqamisaarpoq Adamimut Evamullu pitsaanerussasoq Guutip peqqussutaanik sumiginnaagunik taassumunngalu atajunnaarunik. (1 Mosesi 3:1-6) Tamanna Guutip eqqortumik aqutsineranut toqqaannartumik saassussineruvoq. Jehova qanoq iliussava?

8, 9. (a) Naalakkersuisoq nunamiusoq pikitsitsiffigineqaruni qanoq pissagaluarpa? (b) Edenimi pikitsitsisoqarmat Jehova qanoq iliorpa?

⁸ Naalagaaffimmini toqqaannartumik pikitsitsisoqartillugu naalakkersuisup sunissaa ilimagineqartarpa? Silamiut oqaluttuarisaanerannik ilisimasallit qularnanngitsumik taamatut pisoqarsimaneranik eqqaamasaqarput. Pisut sumiginnarnagit naalakkersuisup uummatiginnerpaagaluartulluunniit pikitsitsisut amerlanertigut eqqartuuttarpai killuussisutullu pisuutittarlugit. Tamatuma kingorna naalakkersuisoq qularnanngitsumik pikitsitsisunik piuneerutitsinissamut eqqissineqalersitseqqinnissamullu piginnaatitaqassaaq. Taamatuttaaq Jehovap pissaaneqarnerpaanini ersersippaa ingerlaannaq iliuuseqarami pikitsitsisunullu eqqartuussut oqaatigigamiuk. Adami  Evalu inuunermik naassaanngitsumik tunissummik tunineqarnissamut naleqqutinngitsutut nalunaarutigai Naatsiivimmillu Edenimit anisillugit. — 1 Mosesi 3:16-19, 22-24.

⁹ Jehovap Saatanimut eqqartuussut oqaatigigamiuk kisimi oqartussaanerminik atueriaatsimik allamik atorniakkaminik paasinarsisitsivoq. Oqartussaaffigisamini tamarmi eqqissinermik atuutilersitseqqinnissamut pissutsinillu torersumik ingerlatitseqqilernissamut atorniakkani uparuarpaa. Guutip Saatani ima oqarfigaa: „Akerariissikkumaarpassi illit arnarlu, illit kinguaassat taassumalu kinguaassaa. Taassuma niaqqut aserortissavaa, illillu taassuma kimmia aserortissavat.“ (1 Mosesi 3:15, NV) Taamaalilluni Jehovap paasinarsisippaa Saatanimik taassumalu tapersersortaanik aserorterinissamut ’kinguaassamik’ piginnaatitsinissani siunertaralugu aamma eqqortumik kisimi oqartussaanerminik uppernarsaajumanini. — Tussiaat 2:7-9; 110:1, 2.

10. (a) ’Kinguaassap’ kikkuunerat paasinarsiva? (b) Siulittuutip siulliup eqquunnera pillugu Paulusi qanoq allappa?

¹⁰ Paasinarsivoq ’kinguaassaq’ taanna tassaasoq Jiisusi Kristusi taassumalu naalakkersueqatai. Taakkua ataatsimut tassaapput Guutip naalagaaffia Missiarsikkoortoq. (Danieli 7:13, 14, 27; Matthæusi 19:28; Lukasi 12:32; 22:28-30) Tamakkuali tamarmik ingerlaannaq paasinarsisinneqanngillat. Siulittuutip siulliup qanoq eqquukkumaarnera tassaavoq ’anngigisaq illernartoq sivisoorujussuarmik nipangiusimaneqarsimasoq’. (Romamiut 16:25, NV) Ukiuni hundredelinni inuit uppertut piffissaq ’anngigisap illernartup’ paasinarsisinneqarfissaa siulittuutillu siulliup eqquutitinneqarfissaa qilanaarisimavaat Jehovap kisimi oqartussaanera qutsissisinneqarniassammat. — Romamiut 8:19-21.

„Anngigisaq illernartoq“ paasinarsisikkiartuaarneqarpoq

11. Jehovap Aaperaamut suut nalunaarutigai?

¹¹ Piffissap ingerlanerani ’Guutip naalagaaffiata anngigisaanut’ tunngasunik amerlanerusunik Jehova paasinarsisitsivoq. (Markusi 4:11) Paasissutissat taakkua ilaannik nalunaarfigisaasa ilaat tassaavoq Aaperaat, „Guutip ikinngutaanik“ taaneqartoq. (Jaaku 2:23) Jehovap Aaperaat neriorsorpaa ’inuiassuanngortikkumaarlugu’. Kingusinnerusukkut Aaperaat neriorsorpaa ’kunnginit nagguigineqarumaartoq’, sulilu kingusinnerulaartukkut ’taassuma kinguaassaatigut nunarsuarmi inuiaat tamarmik pilluaqqunarsiumaartut’. — 1 Mosesi 12:2, 3; 17:6; 22:17, 18.

12. Saatanip kinguaassaata kinaanera Ulersuup kingorna qanoq ililluni erseqqissiva?

¹² Aaperaap inuunerata nalaanili inuppassuaqarpoq allanik naalakkersuiniarsaralutillu qunusiarinninniarsarisunik. Assersuutigalugu Nimrodi, Noap ernutaqqiutaa, pillugu Biibilimi ima allassimasoqarpoq: „Taanna siulliulluni nunarsuarmi pissarsuulerpoq, pinerrarissorsuuvorlu [Jehovap] saavani [Jehovamik akerlilersuisoq, NV].“ (1 Mosesi 10:8, 9) Erseqqippoq Nimrodi naalakkersuisullu imminut naalakkersuisunngortittut allat Saatanip aqutarigai. Taakkua malittaallu Saatanip kinguaassaanut ilaalerput. — 1 Johannesi 5:19.

13. Jehovap Jaaku aqqutigalugu suna siulittuutigaa?

 ¹³ Saatani nunamiusunik naalakkersuisunngortitsiniarluni ilungersoraluartoq Jehovap siunertaa naammassineqarumaarpoq. Aaperaap ernutaa Jaaku aqqutigalugu Jehova matuminnga paasisitsivoq: „Piissanngilaq Judamit kunngip tigumiaa ajaappiarluunniit nalunaaqut isigaasa akornannit tikiutserlugu naalagaasussaq — taanna inuiaat naalassavaat.“ (1 Mosesi 49:10) Oqaatsit siulittuutaasut taakku ersersitsipput ’kunngip tigumiaanik’ pinissamut imaluunniit ’inuiannut’ naalagaassuseqarnissamut inatsisit naapertorlugit pisinnaatitaasumik saqqummersoqarumaarneranik. Taanna kinaassavamita?

„Tikiutserlugu naalagaasussaq“

14. Angeruseq suna Jehovap Daavimut angeruseraa?

¹⁴ Judap kinguaavinit Jehovap innuttaminut kunngiusussatut toqqagaa siulleq tassaavoq savanik paarsisoq Daavi, Isajip ernera. * (1 Samueli 16:1-13) Ajortulioraluarluni aamma kukkusaraluarluni Daavi Jehovamit iluarisaavoq Jehovap kisimi oqartussaaneranut ilumoorfiginnikkami. Jehovap Edenimi siulittuutigineqartoq erseqqinnerusumik paasinarsisippaa Daavi angerfigeqatigigamiuk ima oqarluni: „Kinguaavit ilaat, illit uininnit aannillu pisoq, ilinnut kingoraartigitikkumaarpara, kunngeqarfialu aalajaallisikkumaarpara.“ Tamanna tassaaginnanngilaq Daavip ernera kingoraartaalu, Salomo, Jehovami angerutsimi nangilluni ima oqarpoq: „Kunngisut issiavissaarsua soraajuitsumik aalajaallisikkumaarpara.“ Daavimut angerutsimi tamatumani erseqqippoq ’kinguaassaq’ neriorsuutigisaq piffissap ingerlanerani Daavip kinguaavisigut saqqummerumaartoq. — 2 Samueli 7:12, 13.

15. Sooq Juda Guutip naalagaaffianut assersuutaanerarneqarsinnaava?

¹⁵ Daavi aallarniutigalugu kunngit kinguaariit uuliamik illernartumik palasiunermit taninneqartartut aallartipput. Taamaattumik kunngit taakkua tanitanik, imaluunniit Missiarsinik, taaneqarsinnaapput. (1 Samueli 16:13; 2 Samueli 2:4; 5:3; 1 Kunngit 1:39) Taakkua Jehovap issiavissaarsuani issiasutut Jerusalemimilu Jehovap saani kunngiullutik naalakkersuisutut oqaatigineqartarput. (2 Nalunaarsuutit 9:8) Taamaalilluni Juda Guutip naalagaaffianut 1914-imi qilammi pilersinneqartumut assersuutaavoq Jehovallu kisimi oqartussaassuseqarneranut ersiutaalluni.

16. Judami kunngit naalakkersuinerat qanoq kinguneqarpa?

¹⁶ Kunngi innuttaasullu Jehovap oqartussaassusianut naalatsigitikkaangata taassumannga sernissorneqarlutillu pilluaqquneqartarput. Pingaartumik Salomop naalakkersuinerata nalaa asseqanngitsumik eqqissineqarfiullunilu pigissaarfiuvoq, Saatani sunniuteqarunnaavippat Jehovallu kisimi oqartussaanera qutsissisinneqarpat Guutip naalagaaffiata aqutsinera siulittuutaasumik takutillatsiarneqarluni. (1 Kunngit 4:20; 5:5) Ajoraluartumik kunngit Daavip kinguaavisa amerlanersaat Jehovap piumasaqaataanik eqqortitsinngillat, inuiaqatigiillu guutipilussiornermut kinguaassiuutitigullu inuunerlunnermut nakkaannarput. Naggataatigut, ukiumi 607-imi u.n.s., Jehovap naalagaaffiup Babylonimiunit aserorneqarnissaa akueraa. Saatani Jehovap kisimi oqartussaassusianik tusaamanerlugaalersitsiniaanermini iluatsitsisimarpasippoq.

17. Sumit erserpa Daavip kinguaavisa kunngeqarfiat ajorsartinneqaraluartoq Jehova suli naalagaassuseqartoq?

¹⁷ Daavip kinguaavisa kunngeqarfiata ajorsartinneqarnera — naalagaaffiullu avannarliup Israelip siusinnerusukkut ajorsartinneqarnera — Jehovap kisimi oqartussaassusiata ajoquteqarneranut uppernarsaataanani Saatanip sunniuteqarnerata inuillu Guutimut atajunnaarnerata kingunerinut alianartunut takussutissaavoq. (Ussatit 16:25; Jeremia 10:23) Kisimi oqartussaanerminik suli atuinini ersersinniarlugu Jehova pruffiiti Ezekieli aqqutigalugu ima nalunaarpoq: ’Nasarusersuaq piissasoq, niaqorussuaq iperassasoq; . . . mumillugu mumillugu mumillugu pissavara; tamannaluunniit  atassanngilaq; kisianni piginnittussaq tikiuppat, taassumunnga tunniukkumaarpara.“ (Ezekieli 21:31, 32, 1900) Matumani allassimasuni erserpoq ’kinguaassaq’ neriorsuutigisaq, ’piginnittussaq’, suli tikiutinngitsoq.

18. Inngilip Gabrielip Maria qanoq oqarfigaa?

¹⁸ Maanna ukiup 2-p u.n.s. missaanut periarta. Taamani inngili Gabrieli niviarsiamut Mariamik atilimmut Nazaretimiittumut, illoqarfimmi Palæstinap avannarpasissuani Galilæamiittumut, aallartinneqarpoq. Inngili ima oqarpoq: „Naartulissaatit ernertaassallutillu, taannalu Jiisusimik atsissavat. Pingaartorsuanngussaaq Qutsinnerussaartullu erneranik taaneqassalluni, Guutillu [Jehovap] tunissavaa ataataata Daavip issiavissaarsuanik; Jaakukkunnut kunngiussaaq naassaanngitsumik, naalagaassusialu atajuaannassaaq.“ — Lukasi 1:31-33.

19. Pissanganartunik sunik qanittukkut pisoqassava?

¹⁹ Kiisami ’anngigisap illernartup’ paasinarsisinneqarfissaa qanillivoq. ’Kinguaassap’ neriorsuutigisap pingaarnerusortaa qanittukkut saqqummissaaq. (Galatiamiut 4:4; 1 Timotheusi 3:16) Kimmimmigut Saatanimit kiineqassaaq, tamatumali kingorna Saatanip niaqua nammineq aserortissavaa taannalu taassumalu malittai suujunnaarsissallugit. Aamma Guutip naalagaaffiata Saatanip ajoqusiinerinik tamanik aaqqiiumaarnera nalunaajaatigissavaa, taamaalillunilu Jehovap kisimi oqartussaanera qutsissisinneqassaaq. (Hebræerit 2:14; 1 Johannesi 3:8) Jiisusip qanoq ililluni tamakkua tamaasa iliuuserissavai? Qanoq maligassippaatigut? Apeqqutit taakkua allaaserisami tulliuttumi akissutissarsissavavut.

[Quppernerup ataani ilanngussaq]

Uku nassuiarsinnaavigit?

• Sooq Jehovap qilammi nunamilu Kisimi Oqartussaasuunissani pisinnaatitaaffigaa?

• Sooq Jehova aalajangerpa naalagaaffimmik pilersitsiniarluni?

• Jehovap qanoq ililluni ’anngigisaq illernartoq’ paasinarsisikkiartuaarpaa?

• Sumit erserpa Jehova tamakkiisumik naalagaassuseqartoq Daavip kinguaavisa kunngeqarfiat ajorsartitaagaluartoq?

[Atuaqqissaarnermi apeqqutit]

[Qupp. 5-mi assiliartaq]

Jehovap Aaperaat aqqutigalugu suna siulittuutigaa?

[Qupp. 7-mi assiliartaq]

Sooq Daavip kinguaavisa kunngeqarfiata ajorsartinneqarnera Jehovap oqartussaassusiata ajoquteqarneranut uppernarsaataanngila?