Jehovap kisimi oqartussaanera tapersersorpiuk?
Jehovap kisimi oqartussaanera tapersersorpiuk?
„Inuiannut torlulagitsi: ’[Jehova] kunngiuvoq!’“ — TUSSIAAT 96:10.
1, 2. (a) Pisimasoq pingaarutilik suna ukiumi 29-mi u.n.k. oktobarip missaani piva? (b) Pisimasoq tamanna Jiisusimut qanoq isumaqarpa?
PISIMASOQ pingaarutilik, siornatigut nunarsuarmi pisimanngisaannartoq, ukiumi 29-mi u.n.k. oktobarip missaani pivoq. Iivangkiiliumik allattoq Johannesi ima oqaluttuarpoq: „Johannesi [Kuisisoq] ima nalunaajaavoq: ’Takuara Anersaaq tuisut illuni qilammit aqqartoq qulangersimajualerlugulu. Kinaasoq nalusimagaluarpara, imermilli kuisiartoqqullunga uannik aallartitsisup oqarfigaanga: ’Takusat taanna Anersaap aqqarfigisaa qulangersimajualigaalu tassaavoq Anersaamik Illernartumik kuisisoq.’ Tamanna takuara, nalunaajaatigaaralu taanna tassaasoq Guutip ernera.’“ Pisimasoq tamanna pisimasuuvoq iivangkiiliunik allattunit sisamanit tamanit eqqaaneqartut ikittunnguit ilaat. — Matthæusi 3:16, 17; Markusi 1:9-11; Lukasi 3:21, 22; Johannesi 1:32-34.
2 Anersaamik illernartumik takussaasumik kuisinermi tamatumani erserpoq Jiisusi Missiarsiusoq, imaluunniit Kristusiusoq, oqaaseq Tanitamik isumaqartoq. (Johannesi 1:33) ’Kinguaassaq’ neriorsuutigisaq kiisami saqqummerpoq! Johannesip Kuisisup saavani nikorfavoq kimmia Saatanimit aserorterneqartussaq, Jehovamullu taassumalu kisimi oqartussaassusianut akeraanerpaasup niaquanik aserorterisussaq. (1 Mosesi 3:15) Taamanimiilli Jiisusip nalunngilluinnarpaa Jehovap kisimi oqartussaassusianut taassumalu naalagaaffianut tunngatillugu siunertaa naammassiniarlugu sapinngisani tamaat iliuuseqartariaqarluni.
3. Jiisusi Jehovap kisimi oqartussaassusianik qutsissisitsiniarluni iliuuserisariaqakkaminut qanoq piareersarpa?
3 „Jiisusi Jordanimiit uterpoq Anersaamik Illernartumik ilumioqangaarluni; Anersaamillu [ingerlanneqarpoq]“ suliariumaakkaminut piareersarneqarluni. (Lukasi 4:1; Markusi 1:12) Tamaani Jiisusi ulluni 40-ni kisimi oqartussaassuseq pillugu akerleriissummik Saatanip pilersitaanik Jehovallu kisimi oqartussaassusianik qutsissisitsiniarluni qanoq iliortariaqarnerminik eqqarsaatiginneqqissaarnissaminut piffissaqarpoq. Pinngortitat sianissusillit qilammiittut nunarsuarmiittullu tamarmik akerleriissummi tamatumani akuliunneqarput. Taamaattumik Jiisusip aalajaannera aamma Jehovap kisimi oqartussaaneranik tapersersuinitsinnik ersersitsiniarluta qanoq iliorsinnaanerluta eqqarsaatigisariaqarparput. — Jobi 1:6-12; 2:2-6.
Saatanip Jehovap kisimi oqartussaassusia isertuarani unammillerpaa
4. Saatanip Jehovap kisimi oqartussaanera qanoq unammillerpaa?
4 Soorunami pisimasut eqqartoriikkavut tamaasa Saatanip arajutsinngilai. ’Arnap’ Guutip pigisaata ’kinguaassaata’ pingaarnerusortaa ingerlaannaq saassuppaa. (1 Mosesi 3:15) Saatanip Jiisusi pingasoriarluni usserpaa siunnersorlugulu Ataatami iliuusereqqusaatut iliornani imminut iluaqutaanerpaassasorisaminik iliuuseqaqqullugu. Pingaartumik ussiinermi pingajussaanni Saatanip Jehovap kisimi oqartussaassusia unammillerpaa. Saatanip „silarsuarmi naalagaaffiit tamaasa taakkualu alutornassusiat“ Jiisusimut takutippai kannguttaallunilu ima oqarluni: „Tamakku tamaasa ilinnut tunniutissavakka pallorfigigumma.“ Jiisusip nalunngilaa Diaavulup „silarsuarmi naalagaaffiit tamaasa“ ilumut naalakkersorai, akerleriissummili pingaarutilerujussuarmi qanoq inissisimanini ersersippaa ima akilluni: „Nigorit, Saatani! Allassimavormi: ’[Jehova] Guutit pallorfigissavat taannalu kisiat kiffartuullugu.’“ — Matthæusi 4:8-10.
5. Suliassaq imaannaanngitsoq suna Jiisusip suliassaraa?
5 Jiisusip inuunerani erseqqippoq Jehovap kisimi oqartussaaneranik tapersersuinissaq taassumunnga pingaaruteqarnerpaasoq. Jiisusip nalunngilluinnarpaa Saatanip pisuussutigisaanik toqunissani — arnap ’kinguaassaata’ kimmiata aserorterneqarneratut siulittuutigineqartoq — tikillugu aalajaattuartariaqarluni Guutip eqqortumik kisimi oqartussaalluni Naalagaanera uppernarsarniarlugu. (Matthæusi 16:21; 17:12) Aamma nalunaajaatigisariaqarpaa Guutip naalagaaffia tassaasoq Jehovap pikitsitsisumik Saatanimik suujunnaarsitsiniarnermini pinngortitanullu tamanut eqqissinermik atuutilersitseqqinniarnermini atorniagaa. (Matthæusi 6:9, 10) Suliassaq imaannaanngitsoq tamanna naammassiniarlugu Jiisusi qanoq iliorpa?
„Guutip naalagaaffia qanillivoq“
6. Jiisusip qanoq ililluni ersersippaa Guuti naalagaaffini atorlugu ’Diaavulup suliaanik suujunnaarsitsiniartoq’?
6 Siullermik, „Jiisusi Galilæamut pivoq Guutillu iivangkiiliua oqaluussissutigalugu oqarluni: ’Piffissaq nalliuppoq, Guutillu naalagaaffia qanillivoq.’“ (Markusi 1:14, 15) Allaat ima oqarpoq: „Guutip naalagaaffianik iivangkiiliu . . . tusarliussassaraara; tamanna pillugu aallartitaavunga.“ (Lukasi 4:18-21, 43) Jiisusip nuna tamaat angalaffigaa „oqaluussisarluni Guutillu naalagaaffianik iivangkiiliu tusarliuttarlugu“. (Lukasi 8:1) Aamma malunnangaartuliarpassuaqarpoq — inuppassuit nerisassaannik tunillugit, anorersuaq qatsortillugu, napparsimasunik ajorunnaarsitsisarluni toqusunillu makititsisarluni. Taamatut tupinnartuliornermigut Jiisusip Guutip Edenimi pikitsitsinerup ajoqusiinerinik tamannalu pissutigalugu naalliuutigineqartunik tamanik aaqqiisinnaanera taamaalillunilu ’Diaavulup suliaanik suujunnaarsitsiumaarnera’ ersersippaa. — 1 Johannesi 3:8.
7. Jiisusip ajoqersukkani sunissaannik ilinniartippai, tamannalu qanoq kinguneqarpa?
7 Guutip naalagaaffianik nutaarsiassaq nuannersoq oqaluussissutigineqarluarsinnaaqqullugu Jiisusip ajoqersukkat aalajaatsut katersorpai oqaluussinermillu ilinniartillugit. Siullermik apustilini aqqaneq-marluk piginnaatippai „[aallartillugillu] Guutip naalagaaffia oqaluussissutigeqqullugu“. (Lukasi 9:1, 2) Tamatuma kingorna 70-it allat aallartippai tusarliussamik matuminnga oqaluussissutiginnittussat: ’Guutip naalagaaffia ilissinnut qanillivoq.’ (Lukasi 10:1, 8, 9, 1936) Ajoqersukkat uteramik Jiisusilu oqaluttuullugu Guutip naalagaaffianik tusarliussamik oqaluussissutiginninnerup qanoq ingerlalluartigisimaneranik, taanna ima akivoq: „Saatani innaallannertut qilammit nakkartoq takuara.“ — Lukasi 10:17, 18.
8. Jiisusip inuunerani suna erseqqippa?
8 Jiisusip Guutip naalagaaffia oqaluussissutiginiarlugu nukini tamaasa atorpai periarfissallu tamaasa atorluartarlugit. Ulloq unnuarlu suliinnavippoq allaallu nalinginnaasumik inuunermi ilorrisimaarutigineqartartut pinngitsoorlugit. Ima oqarpoq: „Terianniat siseqartarput qilaallu timmiai ulloqartarlutik, Inuulli Ernera niaqquminut iigarfissaqanngilarluunniit.“ (Lukasi 9:58; Markusi 6:31; Johannesi 4:31-34) Toqunngitsiarnermini Pontiusi-Pilatusimut ima oqarpoq: „Taamaattumik inunngorpunga, taamaattumillu silarsuarmut pivunga sallusuissut nalunaajaassutigissallugu.“ (Johannesi 18:37) Aap, Jiisusip inuunerani tamarmi erserpoq taanna ajoqersuisorsuunissani, tupinnartuliortartuunissani annaassissutullu imminut pilliutigeriaannaanissani kisiisa pinnagit, Jehovalli kisimi oqartussaalluni piumasaanik qutsissisitsinissani Guutillu piumasaminik tamatuminnga naalagaaffini iluaqutigalugu naammassinnissinnaaneranik nalunaajaatiginninnissani pillugit tikiussimasoq. — Johannesi 14:6.
„Naammassivoq“
9. Saatanip arnap Guutip pigisaata ’kinguaassaata’ kimmianik aserorteriniarnera naggataatigut qanoq ililluni iluatsippa?
9 Jiisusip Guutip naalagaaffia pillugu iliuuserisai tamaasa akerlilersuisup, Saatani Diaavulup, iluarinngilai. Arlaleriarluni ’kinguaassami’ ilai nunamiittut — politikki upperisarsiornerlu — atorlugit arnap Guutip pigisaata ’kinguaassaanik’ nipangersitseriaraluarpoq. Jiisusi inunngornerminiit nunarsuarmi inuujunnaarnerminut Saatanimit malittaanillu saassutarineqarpoq. Ukiumi 33-mi u.n.k. upernaakkut Inuup Ernerata taassuma kimmia aserorterniarlugu akerlilersuisumut tunniunneqarfissaa kiisami nalliuppoq. (Matthæusi 20:18, 19; Lukasi 18:31-33) Iivangkiiliuni erseqqippoq Saatanip qanoq inunnik — soorlu Judasi Iskariotimik, palasiunernik, allakkanik ilisimasunik, farisiiarinik Romamiunillu — uukapaatitsisarnera taakkuninngalu Jiisusimik toqumut eqqartuussisitsinera nappakkamilu anniartitaaffimmi naalliunnartumik toqutsisitsinera. — Apustilit Suliaat 2:22, 23.
10. Jiisusip nappakkami anniartitaaffimmi toqunermini naammassisaa pingaarneq suua?
10 Jiisusip nappakkami anniartitaaffimmi kigaatsumik naalliunnartumillu toqujartornera takorlooraangakku suut eqqarsaatigisarpigit? Immaqa Jiisusip namminissarsiorani inunnut ajortilinnut iluaqutissatut pilliutaa eqqarsaatigisarpat. (Matthæusi 20:28; Johannesi 15:13) Immaqa Jehovap pilliummik tamatuminnga pilersitsinermigut asannittuliungaarnera qujamasuutigingaalertarpat. (Johannesi 3:16) Immaqaluunniit Romamiut sakkutuuisa naalagaattut ima oqarusulertarputit: „Ilumut taanna Guutip erneraa.“ (Matthæusi 27:54) Periarnerit taakku tamarmik pissusissamisoorluinnarput. Jiisusilli nappakkami anniartitaaffimmi oqaasia kingulleq una eqqarsaatigeriaruk: „Naammassivoq.“ (Johannesi 19:30) Sunaana naammassineqartoq? Jiisusi inuunermini toqunermigullu naammassisarpassuaqaraluarluni, nunarsuarmukarneranut pissutaasoq pingaarneq tassaannginnerpa Jehovap kisimi oqartussaanera pillugu akerleriissummut inaarutaasumik akissutaanissaq? ’Kinguaassatut’ Jehovap aqqata kanngunarsagaanera tamaat piiarniarlugu Saatanimit sakkortunerpaamik misilinneqarumaarnera siulittuutigineqannginnerpa? (Esaja 53:3-7) Tamanna akisussaafferujussuuvoq, Jiisusilli nunarsuarmut aallartinneqaatigisani tamaasa naammassivai. Ila naammassinnilluangaarami!
11. Edenimi siulittuutigineqartoq tamakkiisumik eqquussinnaaqqullugu Jiisusi qanoq iliorumaarpa?
11 Aalajaannini ilumoorfiginnittuuninilu pissutigalugit Jiisusi, inuttuunngitsoq, ’anersaatulli uumassuseqalersitsisutut’ makitinneqarpoq. (1 Korinthimiut 15:45; 1 Petrusi 3:18) Jehovap ernerminut naalannarsisitaasumut neriorsuutaa imaappoq: „Talerpimma tungaanut inginniarit akeqqatit uannit tummarfiliunneqarserlugit illit isikkannut.“ (Tussiaat 110:1) ’Akeqqanut’ taakkununnga ilaapput pikitsitsinermik aallarniisoq, Saatani taassumalu ’kinguaassaanut’ ilaasut tamarmik. Qilammi nunamilu pikitsitsisut tamarmik suujunnaarsinneqalerpata Jiisusi Kristusip Jehovap naalagaaffiani Missiarsikkoortumi kunngitut sakkutoorpassuit siulersussavai. (Saqqummersitat 12:7-9; 19:11-16; 20:1-3, 10) Tamatuma kingorna Mosesimik allakkani siullerni 3:15-imi siulittuut qinnullu Jiisusip ajoqersukkaminut ilinniartitsissutigisaa una tamakkiisumik eqquutissapput: „Naalagaaffiit tikiulli, piumasat qilammisut nunamissaaq pili.“ — Matthæusi 6:10; Filippimiut 2:8-11.
Uagutsinnut maligassaq
12, 13. (a) Guutip naalagaaffianik nutaarsiassaq nuannersoq ullumikkut qanoq igineqarpa? (b) Kristusip tumaanik atuaajumalluta suut eqqarsaatigisariaqarpavut?
12 Ullumikkut Guutip naalagaaffianik nutaarsiassaq nuannersoq nunarpassuarni oqaluussissutigineqarpoq, soorlu Jiisusip taamatut pisoqarumaarnera siulittuutigisimagaa. (Matthæusi 24:14) Tamatuma kingunerisaanik inuit millionillit inuunertik Guutimut tunniulluinnarsimavaat. Guutip naalagaaffiata pilluaqqussutissartai qilanaaraat. Eqqissillutik toqqissisimallutillu nunarsuarmi paratiisiusumi naassaanngitsumik inuunissartik qilanaaraat, neriuutertillu angorniorlutik allanut oqaluttuarisarpaat. (Tussiaat 37:11; 2 Petrusi 3:13) Illit oqaluussisartunut taakkununnga ilaavit? Taamaappat nersualaarneqartariaqarputit. Tamattali immikkut aamma allamik eqqarsaatigisassaqarpugut.
13 Apustili Petrusi ima allappoq: „Kristusi aamma anniartitaammat ilissi pillusi maligassamillu qimatsivigalusi, tumini atuarlugit malinnaaqqullusi.“ (1 Petrusi 2:21) Malugiuk Petrusip matumani eqqaasaa tassaanngimmat Jiisusip oqaluussinermi aallussilluartuunera imaluunniit ilinniartitsinermut pikkorissuunera, eqqaasaali tassaammat anniartitaasimanera. Petrusip takunnittutut nalunngilluinnarpaa Jiisusi Jehovap kisimi oqartussaaneranut naalatsigitinniarluni Saatanillu sallutuujunera qulaarniarlugu naalliunnissamut qanoq piareersimatigisoq. Qanormi ililluta Jiisusip tumai atuarsinnaagatsigit? Imminut ima aperisariaqarpugut: ’Jehovap kisimi oqartussaaneranik tapersersuillungalu ataqqinninniarlunga naalliunnissannut qanoq piareersimatigaanga? Inooriaatsikkut kiffartorninnilu aallussilluarnikkut ersersippara Jehovap kisimi oqartussaaneranik qutsissisitsinissaq uannut pingaaruteqarnerpaasoq?’ — Kolossemiut 3:17.
14, 15. (a) Jiisusi tammarsaataasinnaasunik siunnersorneqarlunilu neqeroorfigineqaraangami qanoq periartarpa, tamatumunngalu suna pissutaava? (b) Suna eqqarsaatigiuartariaqarparput? (Aamma takuuk ungalusaq „Jehova illersoruk“).
14 Ullut tamaasa annerusunik minnerusunilluunniit misilinneqartarlutalu aalajangigassaqartarpugut. Taakkua qanoq periarfiginissaannut suna aalajangiisuusariaqarpa? Assersuutigalugu Guutimut attaveqarnitsinnik navianartorsiortitsisumik iliuuseqarnissamut ussernartorsioraangatta qanoq periartarpugut? Jiisusi Petrusip imminut ajunngisaarfigeqqulluni siunnersormani qanoq piva? Jiisusi ingerlaannaq ima akivoq: „Tununnut nigorit, Saatani! . . . Guutip pii pinnagit inuit pii isumagaatit.“ (Matthæusi 16:21-23) Imaluunniit anersaakkut peqqissutsitsinnut akornutaasinnaasumik aningaasaqarnitsinnik pitsaanerulersitsinissamut atorfitsinniluunniit qaffatsinneqarnissamut periarfissaqaleraangatta qanoq iliortarpugut? Taamatut pisoqaraangat Jiisusitut iliortarpugut? Taamani Jiisusip paasigamiuk tusarnaartumi „kunnginngortikkumalluni tigujartorniaraanni“ qimaapallappoq. — Johannesi 6:15.
15 Sooq Jiisusi pisimasumi tamatumani allanilu taamatut iliorpa? Paasisimagamiuk nammineq isumannaassutsini iluaqutigisinnaasaniluunniit pingaarnerpaajunngitsut. Kissaatigaa sapinngisani tamaat Ataatami piumasaatut iliornissani Jehovallu kisimi oqartussaaneranik qutsissisitsinissani. (Matthæusi 26:50-54) Akerleriissutiviusoq eqqarsaatigiuartanngikkutsigu eqqortumik iliunngitsoorsinnaallutalu eqqortuusup akerlianut akuerseriaannaavugut. Sooq taamaappa? Saatanip qoqassiiniarnerinut nakkaannariaannanngorsinnaagatta. Taannami eqqunngitsunik pilerinartutut isikkoqalersitsillaqqinnerpaavoq, soorlu taamani Eva usseramiuk. — 2 Korinthimiut 11:14; 1 Timotheusi 2:14.
16. Oqaluussinitsinni anguniagarput pingaarneq suusariaqarpa?
16 Oqaluussigaangatta inuit isumakuluutaat pillugit oqaloqatiginiartarpavut isumakuluutaannullu tunngatillugu Biibilimi qanoq allassimasoqarnera takutinniartarlugu. Taamaalilluta pitsaasumik periaaseqarluta Biibilimik atuaqqissaarnissamut soqutiginnilersitsisarpugut. Anguniagarpulli pingaarneq tassaanngilaq inuit Biibilimi qanoq allassimasoqarneranik paasitinnissaat imaluunniit Guutip naalagaaffiata sunik pilluaqqussutissartaqarneranik oqaluttuunnissaat. Akerleriissutiviusumik paasinninnissaannut ikiortariaqarpavut. Kristumiunngorusuppat ilumoortut aamma ’nappakkamik anniartitaaffimminnik’ (NV) ersukkiussinissaminnut Guutillu naalagaaffia pillugu naalliunnissaminnut piareersimarusuppat? (Markusi 8:34) Jehovap kisimi oqartussaaneranik tapersersuisunut ilanngunnissaminnut taamaalillutillu Saatanip sallutuujullunilu mamarliisuuneranik uppernarsaanissaminnut piareersimappat? (Ussatit 27:11) Imminut taamaaliornissamut ikiorsinnaanerput allanillu taamaaliornissamut ikiuisinnaanerput immikkut pisinnaatitaaffigaarput. — 1 Timotheusi 4:16.
Guuti ’tamani tamarsuanngorpat’
17, 18. Jehovap kisimi oqartussaaneranik tapersersuinitsinnik ersersitsigutta piffissaq nuannersoq suna qilanaarisinnaavarput?
17 Pissutsitsigut kiffartornitsigullu Jehovap kisimi oqartussaaneranik tapersersuinerput ersersinniarlugu sapinngisarput tamaat iliuuseqartilluta piffissaq Jiisusi Kristusip ’Naalagaaffimmik Guutimut Ataatamut tunniussiffissaa’ qilanaarisinnaavarput. Tamanna qaqugu pissava? Apustili Paulusi ima nassuiaavoq: „Pissaaneq piginnaatitaanerlu nakuussuserlu suut tamaasa [suujunnaarsereerpagit]. . . . Kristusimi kunngiussaaq akerartuisut tamarmik Guutimit taassuma isigaasa ataannut pisinneqarserlugit. . . . Taava Erneq nammineq naalatsigitikkumaarpoq tamanik imminut naalatsigititsisumut, Guuti tamani tamarsooqqullugu.“ — 1 Korinthimiut 15:24, 25, 28.
18 Guuti ’tamani tamarsuanngorpat’ nuannerunangaarami, ilaa? Taamanikkussamut Guutip naalagaaffiata anguniakkani angusimassavaa. Jehovap kisimi oqartussaaneranik akerlilersuisut tamarmik peerneqarsimassapput. Qilammi nunarsuarmilu eqqissineqaqqilissaaq pissutsillu torersumik ingerlaqqilissallutik. Tussiaasiortup oqaasii uku atorlugit pinngortitat tamarmik ima erinarsussapput: „[Jehovap] aqqa ataqqinartissiuk . . . Inuiannut torlulagitsi: [Jehova] kunngiuvoq!“ — Tussiaat 96:8, 10. (w07 12/01-E)
Qanoq akissavit?
• Jiisusip qanoq ersersippaa Guutip kisimi oqartussaaneranik akerleriissummik paasinnilluarluni?
• Jiisusip kiffartornermini toqunerminilu pingaarnermik suna naammassivaa?
• Jiisusip maligassiaanik malinninnerput taamaalillutalu Jehovap kisimi oqartussaaneranik tapersersuinerput qanoq ililluta ersersissinnaavarput?
[Atuaqqissaarnermi apeqqutit]
[Qupp. 11-mi ungalusaq/assiliartat]
JEHOVA ILLERSORUK
Kristumiut ilungersunartumik misilinneqaraangamik misilinneqarnerminnut pissutaasumik eqqarsaatiginninnertik iluaqutigisarpaat. Qatannguterpassuit Koreamiittut allamiittullumi tamanna misigisimavaat.
Jehovap Nalunaajaasuisa ilaat Sovjetunionip nalaani parnaarussaasoq ima oqaluttuarpoq: „Pinertusaarnissamut iluaqutigisarput tassaavoq akerleriissummik Edenimi pilersinneqartumik — Guutip naalakkersuisinnaatitaanera pillugu akerleriissummik — paasinnilluarneq. . . . Nalunngilarput Jehovap naalagaassusianik illersuinissamut periarfissaqarluta. . . . Tamanna nukittuunnguutigalugulu assuarnaattuarsinnaannguutigaarput.“
Allap nammineq uppeqatimilu pinngitsaaliissummik sulisitsivimmi suna iluaqutigisimanerlugu nassuiarpaa. Ima oqarpoq: „Jehovap najorpaatigut. Pissutsit ilungersunaraluartut anersaakkut eqqumavugut. Qiimmassaqatigiittarpugut immitsinnut eqqaasittarluta qilammi nunamilu kisimi oqartussaassuseq pillugu akerleriissummi Jehova illersorlutigu.“
[Qupp. 8-mi assiliartaq]
Jiisusi Saatanimit usserneqarami Jehovap kisimi oqartussaassusianik qanoq ililluni tapersersuiva?
[Qupp. 10-mi assiliartaq]
Jiisusip toqunera sumik kinguneqarpa?