Matthæusip iivangkiiliuanit pingaarnersat
Jehovap oqaasia uumavoq
Matthæusip iivangkiiliuanit pingaarnersat
JIISUSIP inuunera kiffartorneralu pillugit tiguartinnartumik allaatiginnittoq siulleq tassaavoq Matthæusi ilanngaaserisuusimasoq Jiisusi Kristusip qanittumik suleqataasa ilaat. Matthæusip iivangkiiliua hebræerisut allanneqaqqaarpoq kingusinnerusukkullu grækerisuumut nutserneqarluni. Ukiup 41-p missaani allallugu naammassineqarpoq Allakkanullu Hebræerisuunut aamma Kristumiut Allagaataannut Grækerisuunut atassusiilluni.
Iivangkiiliu killitsinnartoq imaqaqisorlu taanna atuartartunut juutinuunerugunartoq allataavoq, Jiisusimi oqaluttuarineqarpoq Missiarsitut neriorsuutigisaasutut, Guutip erneratut. Tusarliussaq soqutigilluarutsigu Guutimut ilumoortumut, Taassuma erneranut neriorsuutaanullu uppernerput nakussatsinneqassaaq. — Hebræerit 4:12.
„QILAAP NAALAGAAFFIA QANILLIVOQ“
Matthæusip allakkamini Guutip naalagaaffia pingaarnersaatippaa aamma Jiisusip ajoqersuutaanik erseqqissaasarpoq taamaalilluni pisimasut pisimaneri tulleriiaaqqissaarlugit oqaluttuariunnaartaraluarlugit. Assersuutigalugu qaqqami oqaluuseq iivangkiiliup aallaqqaataatungaani allaatigineqarpoq naak Jiisusip kiffartornermi affaata missaa qaangiuttoq oqalugiaatigigaluaraa.
Jiisusi Galilæami oqaluussinermini tupinnartuliortarpoq, apustilit aqqaneq-marluk qanoq oqaluussissanerannik ilinniartittarpai, farisiiarit assuarisarpai Guutillu naalagaaffia pillugu assersuusiat oqaluttuarisarlugit. Taava „Galilæa qimallugu Judæamukarpoq nuna Jordanip kangianiittoq aqqutigalugu“. (Matthæusi 19:1) Jerusalemimut aqqutaa qiteqqullugulu Jiisusip ajoqersukkani oqaluttuuppai ’Inuup Ernera toqumut eqqartuussaajumaartoq ullullu pingajuanni makititaajumaartoq’. — Matthæusi 20:18, 19.
Allassimaffiit pillugit apeqqutit akineqartut:
3:16 — Jiisusi kuisimmat ’qilaat ammartut’ qanoq paasisariaqarpa? Isumaqarunarpoq inuttut inunngunngikkallarami qilammi piusimanerminik Jiisusi eqqaamasaqaqqilersoq.
5:21, 22 — Kamassamik anisitsineq kamassaraluarluni nununermit ajornerua? Jiisusi mianersoqqusilluni oqarpoq qatanngumminut kamassartoq ingasattumik ajortuliortoq. Kamamminilli nikassaalluni appisaluussinikkut ersersitsineq suli ingasannerunerarpaa, eqqartuussivimmummi qulliunerusumut akisussaatinneqartussaavoq.
5:48 — Ilumut ’iluarluinnarsinnaavugut, soorlu Ataatarput qilammiittoq iluarluinnartuusoq’? Aap, killilimmik. Matumani Jiisusip asanninneq eqqartorpaa, tusarnaartinilu peqquai Guuti ilaassagaat asanninnerminnullu tunngatillugu naammalluinnartuussasut, imaluunniit asannilluinnartuussasut. (Matthæusi 5:43-47) Qanoq? Asanninnerminnik neruttuinermikkut aamma akeqqaminnik asannillutik.
7:16 — ’Inerititat’ suut upperisamut ilumoortumut ilisarnaataappat? Pissusilersornerput kisimi pineqanngilaq. Inerititanut ilaapput ajoqersuutit upperisatsinnut ilaasut.
10:34-38 — Tusarliussaq Biibilimeersoq ilaqutariit avissaartuunnerannut pissutaava? Naamerluinnaq. Avissaartuunneq pilertarpoq ilaqutaasut allamik upperisallit aalajangeraangata kristumiut ajoqersuutaat itigartinniarlugu akerlilersorniarluguluunniit. — Lukasi 12:51-53.
11:2-6 — Johannesip Guutip Jiisusimik akuerinnilluni oqarneranik tusaasimanini pissutigalugu nalunngereeruniuk Jiisusi Missiarsiusoq sooq aperiva Jiisusi tassaanersoq „tikiuttussaq“? Johannesi aperisimasinnaavoq Jiisusi nammineq uppernarsaatinniarlugu. Aamma Johannesip paaserusuppaa kunngitut pissaaneqartussamik juutillu neriugisaannik tamanik piviusunngortitsisussamik ’allamik’ tikiuttussaqarnersoq. Jiisusip akissutaata ersersippaa allamik kingoraarneqartussaanngitsoq.
19:28 — Sumut assersuutaappat „Israelip naggueqatigiissortai aqqaneq-marluusut“ eqqartuunneqartussat? Israelip anersaakkut ittup naggueqatigiissortaanut aqqaneq-marluusunut assersuutaanngillat. (Galatiamiut 6:16; Saqqummersitat 7:4-8) Apustilit, Jiisusip oqaluussai, Israelimut anersaakkut ittumut ilaasussaapput, taakkununnga ilaasunut eqqartuussisuunatik. Taakku Jiisusip ’angerfigeqatigai, naalagaaffik pillugu’, tassaassappullu „kunngikkormiuusut“ aamma ’Guutitsinnut palasit’. (Lukasi 22:28-30, NV; Saqqummersitat 5:10) Israelimut anersaakkut ittumut ilaasut ’silarsuaq eqqartuutissavaat’. (1 Korinthimiut 6:2) Taamaattumik „Israelip naggueqatigiissortai aqqaneq-marluusut“, qilammi issiavissaarsuarni issiasunit eqqartuunneqartussat, assersuutaagunarput inuiaat silarsuaannut palaseqatigiit kunngikkormiuusut avataanniittunut, taakkualu ullormi saammaannartitsivimmi uinikkut Israelip naggueqatigiissortaanut aqqaneq-marluusunut assersuunneqarput. — 3 Mosesi kap. 16.
Ilinniarfigisinnaasavut:
4:1-10. Oqaluttuap tamatuma ersersippaa Saatani ajussutsimut assersuutaaginnarani ilumut piviusuusoq. Usserniarsaraatigut „uinngup pilerigisai, isit pilerigisaat nunallu piinik usorsisimaaruteqarneq“ atorlugit. Biibilimili najoqqutassiat malikkutsigit Guutimut aalajaattuarnissatsinnut nakussatsinneqassaagut. — 1 Johannesi 2:16.
5:1–7:29. Anersaakkut pisariaqartitaqarnerit paasilluaruk. Eqqisseqatigiissitsisuugit. Eqqarsaatit kanngunartut itigartikkit. Neriorsuutitit eqqortittakkit. Qinugaangavit anersaakkut ittut nunap piinit pingaarnerutittakkit. Guutimi pisuujugit. Guutip naalagaaffia naapertuilluassuserlu taassuma pia ujaqqaakkit. Eqqartuusseqqajaaqinak. Guutip piumasaatut iliorit. Aap, qaqqami oqaluuseq atorluarsinnaasunik ilinniutissarpassuaqarpoq!
9:37, 38. Naalakkatsinnut „katersuisussanik aallartitseqqullugu“ qinnutitsinnut naapertuuttumik iliuuseqartariaqarpugut nammineq ajoqersuganngortitsiortornermik ulapputiginninnitsigut. — Matthæusi 28:19, 20.
10:32, 33. Upperisatta oqaluuserinissaa annilaanngatiginngisaannartariaqarparput.
13:51, 52. Guutip naalagaaffia pillugu sallusuissut paasisimagutsigu, akisussaaffigaarput allanik ilinniartitsinissaq taakkuninngalu erlinnartuummik tamatuminnga avitseqatiginninnissaq.
14:12, 13, 23. Eqqarsaatiginneqqissaartassagutta taamaaliornerlu pissarsiffigisassagutsigu kisimiikulasarneq pisariaqartipparput. — Markusi 6:46; Lukasi 6:12.
17:20. Anersaakkut siumukarnissatsinnut akornutaasut qaqqarsuartut ittut ajornartorsiutillu naammagalugit atussagutsigit uppissuseqartariaqarpugut. Jehovamik taassumalu neriorsuutaanik upperinninnitta ineriartortinnissaa nakussatsinnissaalu sumiginnassanngilarput. — Markusi 11:23; Lukasi 17:6.
18:1-4; 20:20-28. Inuttut naammalluinnanngissuseq upperisarsiornikkullu avatangiisit, inuiaqatigiinni inissisimaffimmik pingaartitsisut, Jiisusip ajoqersugaasa pingaartorsoorusulissutigaat. Maniguunnermik ineriartortitsisariaqarpugut ajortulioqqajaanitta mianersuutiginerisigut immikkullu pisinnaatitaaffinnut akisussaaffinnullu eqqortumik isiginnittaaseqartuarnitsigut.
„INUUP ERNERA TUNNIUNNEQASSAAQ SANNINGASULIMMUT [NAPPAKKAMUT, NV] KIKIATTORNEQASSALLUNI“
Ukiumi 33-mi nisanip 9-ani Jiisusi „siutituup qaani qimusserluni“ Jerusalemimut iserpoq. (Matthæusi 21:5) Aqaguani naalaffimmut iserpoq minguiarlugulu. Nisanip 11-ani naalaffimmi ilinniartitsivoq, allakkanik ilisimasut farisiiarillu assuarai tamatumalu kingorna ’tikiunnissaminut silarsuullu naggatissaanut nalunaaqutaasussaq’ ajoqersukkaminut saqqummiullugu. (Matthæusi 24:3) Aqaguani ima oqarfigai: „Nalunngilarsi ullut marluk qaangiuppata poorski nalliutissasoq. Taava Inuup Ernera tunniunneqassaaq sanningasulimmut [nappakkamut, NV] kikiattorneqassalluni.“ — Matthæusi 26:1, 2.
Nisanip 14-iat qaavoq. Jiisusip toqunngitsiarluni toqunini pillugu eqqaaniaalluni nalliuttorsiortarnissaq pilersereeraa killuutigineqarpoq, tigusaavoq, killisiorneqarpoq nappakkamullu kikiattugaalluni. Taava ullut pingajuanni toqusunit makititaavoq. Jiisusip makititaasimasup qilaliartinnani ajoqersukkani ima peqquai: „Taamaattumik aallarlusi inuiaqatigiit tamaasa uannut ajoqersuganngortissigik.“ — Matthæusi 28:19.
Allassimaffiit pillugit apeqqutit akineqartut:
22:3, 4, 9 — Katittorsiornissamut qaaqqusissutit pingasut qanga tutsiuppat? ’Nuliassat’ katersorneqarnissaannik kajumissaarut siulleq tutsiuppoq Jiisusi ajoqersugaalu ukiumi 29-mi oqaluussillutik aallartimmata, tamannalu ukiup 33-p tungaanut atuuppoq. Qaaqqusinerup aappaa ukiumi 33-mi piinsip ulluaniit, anersaap illernartup kuineqarneraniit, ukiup 36-p tungaanut atuuppoq. Qaaqqusissutit marluk taakku juutinuinnaq, juutit upperisaannut ilanngussimasunuinnaq Samariamiunuinnarlu atuupput. Qaaqqusissutilli pingajuat inunnut illoqarfiup avataani aqqusinerniittunut, tassa kipineqanngitsunut juutiunngitsunut, ukiumi 36-mi, Romamiut sakkutuuisa naalagaata Corneliusip kristumiunngorneraniit, qaaqqusissutaalerpoq.
23:15 — Sooq farisiiarit malitsissarsiaat farisiiarinut ’naleqqiullugu marloriaammik anniarfimmut [grækerisut: Gehennamut] qitornaasussanngortarpa’? Farisiiarinut malitsinngortut ilaat immaqa ingasattumik ajortuliortuunikuusarsimapput. Farisiiarinulli ingasattajaarnianut ilaalersut ilaasa, ajortoq ajornerulersiinnartarpaat immaqa ilinniartitsisuminnit, assuarisaasunit, ingasattajaarnerulernermikkut. Taamaalillutik farisiiarinit juutiusunit marloriaammik Gehennamut ’qitornaasussanngortarput’.
27:3-5 — Sunaana Judasip peqqissimissutigigaa? Judasip peqqissiminera ilumoorluni allamik isumataarneranut takussutissartaqanngilaq. Guutimit isumakkeerfigineqarnissani ujartunngilaa, eqqunngitsuliorninili palasiunernut utoqqaanertanullu anngiiaatigaa. Judasip ’ajortuliaa toqumik kinguneqartussaammat’, taanna pissutissaqarluartumik pisuusutut misiginermit neriuutaarulluinnarnermillu sapilersinneqarpoq. (1 Johannesi 5:16) Neriuutissaqannginnamiuna peqqissimisoq.
Ilinniarfigisinnaasavut:
21:28-31. Jehovamut pingaaruteqavissoq tassaavoq piumasaatut iliornerput. Assersuutigalugu Guutip naalagaaffia pillugu oqaluussinermi ajoqersuganngortitsiortornermilu aallussilluarluta peqataasariaqarpugut. — Matthæusi 24:14; 28:19, 20.
22:37-39. Inatsisini annerni marlunni Guutip pallorfiginnitsiminut qanoq piumasaqarnera eqikkarneqarpoq. (w08 01/15-E)
[Qupp. 15-mi assiliartaq]
Katersinermi aallussilluarlutit peqataavit?
[Suminngaanneernera]
© 2003 BiblePlaces.com
[Qupp. 15-mi assiliartaq]
Matthæusip Guutip naalagaaffia allakkamini pingaarnersaatippaa