Sakkut suulluunniit Guutip kiffaanut sakkuaatissatut saffiukkat atorsinnaassuseqassanngillat

„Sakkut ilinnut sakkuaatissatut saffiukkat atorsinnaassuseqassanngillat.“ — ESAJA 54:17.

1, 2. Jehovap Nalunaajaasuisa Albaniami misigisimasaat Esaja 54:17-ip ilumoorneranut qanoq uppernarsaataappat?

UKIUT qulikkuutaat matuma siorna Europap kujataata kangisissuani nunami anginngitsumi qaqqartuumi qunusuitsunik kristumioqarpoq. Nunami kommunistiusumi tamatumani naalakkersuisut Guuteqannginneraasut kristumiut taakku nungutinniarlugit sapinngisartik tamaat iliorput. Taakkuli naalliutsinneqaraluarlutik, pinngitsaalisaallutik sulisitaagaluarlutik tusagassiuutitigullu saassunneqaraluarlutik nipangersinneqarsinnaanngillat. Taakku kikkuugamik? Jehovap Nalunaajaasui Albaniamiittut. Ataatsimeeqatigiinnissaq oqaluussinissarlu taakkununnga ajornakusoortupilussuugaluartoq ukiuni qulikkuutaani pinertusaarnerat kristumiussutsimik qutsissisitsillunilu ataqqinarsisitsivoq Jehovallu aqqanik naalannarsisitsilluni. Siorna immikkoortortaqarfittaavat atoqqaartinneqarmat, ukiorpassuarni Jehovamut nalunaajaasuusoq ima oqarpoq: „Saatani qanorluunniit ilungersortigigaluaruni ajorsartuaannassaaq Jehovalu ajugaajuaannassalluni!“

² Tamakku tamarmik uppernarsaataapput assortorneqarsinnaanngitsut Guutip innuttaminut neriorsuutiminik Esaja 54:17-imi ima allassimasumik eqqortitsisimaneranut: „Sakkut ilinnut sakkuaatissatut saffiukkat atorsinnaassuseqassanngillat, oqqat ilinnik unnerluutiginnittut tamaasa eqqartuutitissavatit pisuusutut.“ Oqaluttuarisaanermi uppernarsarneqarpoq Saatanip silarsuaata iliuuserisinnaasaasa suulluunniit Jehova Guutip kiffai tunniulluinnarsimasut qaqugumulluunniit taassuminnga pallorfiginninnerani akornusersinnaassanngikkaat.

Saatanip misiliigaluarnera iluatsinngitsoortoq

3, 4. (a) Saatanip sakkuisa ilaat suuppat? (b) Saatanip sakkuisa atorsinnaassuseqannginnerat qanoq ersersinneqarpa?

³ Guutip kiffaanut ilumoortunut sakkugineqartut ilagaat inerteqquteqarnerit, inuppassuulluni  saassussinerit, parnaarussinerit ’inatsisillu tunngavigisuusaarlugit ajunaartitsiniarnerit’. (Tussiaat 94:20, 1990) Allaat maannakkorpiaq, allaaserisamik matuminnga atuaqqissaarnitsinni, nunat ilaanni Jehovap Nalunaajaasuisa Guutimik ilumoorfiginninnerat misilinneqarpoq. — Saqqummersitat 2:10.

⁴ Assersuutigalugu Jehovap Nalunaajaasuisa immikkoortortaqarfiisa ilaat nalunaaruteqarpoq ukiup ataasiinnaap ingerlanerani Guutimut kiffaasut oqaluussitillutik 32-riarlutik nakuuserfigineqarsimasut. Aammattaaq politiit Jehovap Nalunaajaasuinik — inuusuttunik utoqqarnillu, angutinik arnanillu — 59-eriarlutik tigummigallagassanik tigusarinnissimapput taakkua tamanut oqaluussinerat pissutigalugu. Ilaasa inuaat ipassiorneqarput, assilineqarput pinerluttutullu parnaarunneqarlutik. Allat nakuuserfigineqarnissaminnik sioorasaarneqarput. Nunami allami Jehovap Nalunaajaasuinik parnaarussinerit, akiligassiinerit unataanerilluunniit uppernarsaatissallit 1100-t sinneqarput. Pisimasut taakkua ilaat 200-t sinneqartut ullormi Jiisusip toquneranik eqqaaniaallutik katersuuffianni pipput! Jehovalli anersaava innuttaanik aniguisinnaanngortitsisarsimavoq, nunani taakkunani nunanilu allani taakkua atugaat ajortorujussuugaluartut. (Zakaria 4:6) Akeraasut kamangaarnerat Jehovamik unnersiutiginnittunik nipangersitsisinnaassanngilaq. Aap, sakkut suulluunniit Guutip siunertaanik akornusiisinnaannginnerat qularutiginngilarput.

Oqqat ilumuunngitsumik oqaluttut pisuusutut eqqartuunneqartut

5. Ukiuni hundredelinni siullerni oqqat ilumuunngitsumik oqaluttut Jehovap kiffaanik unnerluutiginnittut kikkuuppat?

⁵ Esajap siulittuutigaa Guutip innuttaasa oqqat imminnik unnerluutiginnittut tamaasa pisuusutut eqqartuutitikkumaaraat. Ukiuni hundredelinni siullerni kristumiut eqqunngitsumik unnerluutigineqartarlutillu inatsisinik unioqqutitsisutut isigineqalersinniarneqartarput. Apustilit Suliaannik allakkani 16:20, 21-mi allassimasut unnerluutiginnissutinut taamaattunut assersuutissaalluarput: „Inuit uku illoqarfitsinni eqqissiunnaarsitsipput. . . . Ileqqut uatsinnut Romamiusunut pigiliuteqqusaanatillu maleqqusaanngitsut nalunaajaatigaat.“ Ilaanni upperisarsiornikkut akerlilersuisut illoqarfimmi pisortaasunik Kristusip ajoqersugaanut akuliutsitsinniarsaripput ima oqarlutik: „Inuit taakku silarsuarmi tamarmi pikitsitsisut maangattaaq tikiupput, [taakkulu] kaasarip maleruaqqusaanut akerliusunik iliuuseqarsimapput.“ (Apustilit Suliaat 17:6, 7) Apustili Paulusi ’nappaatitut toqoraataasutut ajoqutaatigisutut’ eqqartorneqarpoq immikkoorniaqatigiinnullu „silarsuarmi tamarmi“ pikitsitsinissamik kajumissaarisunut siuttuusutut unnerluutigineqarluni. — Apustilit Suliaat 24:2-5.

6, 7. Kristumiut ilumoortut oqaatsitigut saassunneqaraangamik saassussinerit eqqunngitsuunerinik uppernarsaariaasiisa ilaannik eqqaasaqarit.

⁶ Taamaattumik tupinnanngilaq kristumiut ilumoortut ullumikkut eqqunngitsumik unnerluutigineqarlutillu mamarlerniarneqartarmata. Oqaatsikkut saassussinerit taamaattut qanoq ilumuunnginnerat uppernarsarsinnaavarput? — Esaja 54:17.

⁷ Sunniiniarnerit unnerluutiginninnerillu taama ittut Jehovap Nalunaajaasuisa pissuserissaarnerannit uppernarunnaarsinneqarajupput. (1 Petrusi 2:12) Unnerluutiginnissutit eqqunngitsuunerat paasineqartarpoq kristumiut ersersitsigaangata innuttaaqataallutik inatsisinut naalattuusut aamma ileqqorissaartuullutik tulliminnik ilumoorlutik isumassuisut. Pissuserissaartuunerput immini nalunaajaataavoq. Inuit ajunngitsuliortuarnitsinnik maluginiaasartut Ataatatsinnik qilammiusumik ataqqinartitsinissamut Guutillu kiffaasa inooriaasiata pitsaanerpaaneranik nassuerutiginninnissamut killinneqartarput. — Esaja 60:14; Matthæusi 5:14-16.

8. (a) Aalajangiussarput Biibilimik tunngaveqartoq illersorniarlugu ilaannikkut qanoq iliornissaq pisariaqarsinnaava? (b) Oqqanik uagutsinnik akiuisunik pisuusutut eqqartuutititsineq eqqarsaatigalugu Kristusip maligassiaa qanoq malittarparput?

⁸ Pissuserissaarnerput immini nalunaajaataagaluartoq nakimaalluta aalajangiussatsinnik Biibilimik tunngaveqartumik illersuisarnissarput ilaannikkut aamma pisariaqartarsinnaavoq. Tamatuminnga illersueriaatsit ilaat tassaavoq naalakkersuisunut eqqartuussisunullu illersorneqarnissamik qinnuteqarneq. (Esteri 8:3; Apustilit Suliaat 22:25-29; 25:10-12) Jiisusip nunarsuarmiikkallarami ilaannikkut isornartorsiortini ammasumik oqalliseqatigisarpai unnerluutiginnissutaasalu eqqunngitsut eqqunngitsuunerat uppernarsartarlugu. (Matthæusi 12:34-37; 15:1-11) Upperisatsinnik neriuutitsinnillu nassuiaanissamut periarfissanik tamanik kajumilluta atuisarnitsigut Jiisusip maligassiaa malittarparput. (1 Petrusi 3:15) Atuarfimmi, suliffimmi ilaquttanilluunniit uppinngitsunit mitaatigineqarneq  Guutip oqaasia pillugu sallusuissutip ilisimaneqalersinniarnerani unitsitsisuutinngisaannartariaqarparput. — 2 Petrusi 3:3, 4.

Jerusalemi — ’ujarak oqimaatsorsuaq’

9. Jerusalemi sorleq ’ujaqqamut oqimaatsorsuarmut’ Zakaria 12:3-mi eqqartorneqartumut assersuunneqarpa, nunarsuarmilu kikkut sinniisigai?

⁹ Zakariap siulittuutaa inuiaqatigiit kristumiunik ilumoortunik akiuinerannut pissutaasumik paasinarsisitsivoq. Zakaria 12:3-mi allassimasoq maluginiariaruk: „Ullussami tassani Jerusalemi ujaranngortikkumaarpara oqimaatsorsuaq inuiannut tamanut.“ Zakariap siulittuutaani Jerusalemi sorleq eqqartorneqarpa? „Jerusalemi qilammiittoq“, naalagaaffik qilammiittoq kristumiut tanitat qaaqqusaaffigisaat, pineqarpoq. (Hebræerit 12:22) Naalagaaffimmik Missiarsikkoortumik kingornussisussat ilaat kinguleruttut ikittunnguit taakku suli nunarsuarmiipput. Taakkua suleqatitik, ’savat allat’, peqatigalugit inuit kajumissaartarpaat suli piffissaqarallartillugu Guutip naalagaaffianut naalatsigitileqqullugit. (Johannesi 10:16; Saqqummersitat 11:15) Inuiaqatigiit kajumissaarummut tamatumunnga qanoq periarpat? Ullumikkullu Jehovap kiffani ilumoortut qanoq annertoqqusersorpai? Zakariap allagaani kapitalip 12-ip isumaa misissorlugu apeqqutit taakku akissutissarseriartigit. „Sakkut“ suulluunniit Guutip tanitaanik taakkualu suleqataannik ilumoorussilluarlutik aallussilluartunik ajoqusiisinnaassanngillat. Misissuinerput tamanna tamatuminnga qularutiginninnginnerulissutigissavarput.

10. (a) Sooq Guutip innuttai saassunneqartarpat? (b) ’Ujaqqamik oqimaatsorsuarmik’ kivillugu peersiniarsarisimasut qanoq pippat?

¹⁰ Zakaria 12:3-mi erserpoq inuiaqatigiit ’kilertassasut aanaalerlutik’. Qanoq ilillutik ’kilertarpat aanaalerlutik’? Guutip aalajangernikuuaa naalagaaffimminik nutaarsiassaq nuannersoq oqaluussissutigineqassasoq. Jehovap Nalunaajaasui oqaluussinissamut pisussaaffimminnik pimoorussilluinnarput. Guutilli naalagaaffiata inuiannut neriuutissatuaaneranik tusarliussaq inuiaqatigiinnut ’ujaranngorsimavoq oqimaatsorsuaq’. Guutip naalagaaffianik oqaluussissutiginnittunut akuliunnermikkut ujarak taanna kivillugu peerniarsaraat. Taamaalioramik inuiaqatigiit ’kilerput aanaalerlutik’. Allaat tusaamanerlugaalerput iluatsinngilluinnaramik. Taakku Guutip kiffaanik ilumoortunik, pissutsit aaqqissuussaanerata matuma naggatissaata nalliutinnginnerani Guutip naalagaaffia Missiarsikkoortoq pillugu ’nutaarsiassamik nuannersumik atajuartussamik’ oqaluussissutiginninnermik immikkut pisinnaatitaaffigisaminnik pingaartitsisunik, nipangersitsisinnaanngillat. (Saqqummersitat 14:6, NV) Nunami Afrikamiittumi parnaarussivimmi paarsisup Jehovap kiffaasa nakuuserfigineqarnerat takugamiuk ima oqarpoq: ’Inunnik taakkuninnga malersuinissigut nukisi asuli atorpasi. Isumaqatiginngisaminnut akuersiinnanngisaannarput. Amerleriaannartarput.’

11. Guutip neriorsuutini Zakaria 12:4-mi allanneqarsimasoq qanoq eqqortippaa?

¹¹ Atuaruk Zakaria 12:4. Jehova neriorsuivoq naalagaaffimminik oqaluussissutiginnittartunut sapiitsunut akerlilersuisunik assersuutaasumik tappiillisitsillunilu ersitsatsitsiumaarluni imaluunniit paatsiveerutitsiumaarluni. Neriorsuutini eqqortippaa. Assersuutigalugu nunami pallorfiginninnermik ilumoortumik inerteqquteqarfiusumi akerlilersuisut Guutip innuttaasa anersaakkut inuussutissanik pinissaat akornuserluinnarsinnaanngilaat. Allaat aviisimi allassimavoq Jehovap Nalunaajaasui ballonngit  atorlugit atuakkanik atuagassianillu Biibililersaarutinik nunamut eqqussisartut! Guutip kiffaminut ilumoorfiginnittunut neriorsuutaa una eqqortinneqarpoq: „Judakkut qiviarumaarpakka akeraasali hestii tappiillisillugit.“ Kamannermit tappiillisimagamik Guutip naalagaaffianut akeraasut sukkuussanerlutik naluaat. Uagulli qularutiginngilarput Jehovap innuttani tamaasa ataatsimut isigalugit sernissorlugillu isumassorumaarai. — 2 Kunngit 6:15-19.

12. (a) Jiisusi nunarsuarmiikkallarami qanoq ililluni ikuallatsitsiva? (b) Tanitat kinguleruttut qanoq ilillutik anersaakkut ittumik ikuallatsitsippat, tamannalu qanoq kinguneqarpa?

¹² Atuaruk Zakaria 12:5, 6. Oqariartaatsimi „Judakkut eqqarleriissortaat“-ni imaluunniit „Judakkut siulersortaat“-ni (1900) pineqarput Guutip innuttaanik nakkutilliisut. Jehovap taakku soqutigisaminik nunarsuarmiittunik ilungersuutiginningaalersippai. Ilaanni Jiisusip ajoqersukkani ima oqarfigai: „Innermik nunamut nalussiartorpunga.“ (Lukasi 12:49) Jiisusilu ilumut ikuallatsitsivoq. Jiisusip aallussilluarluni oqaluussinermigut Guutip naalagaaffia oqallisissanngortippaa pingaaruteqarluinnartoq, tamannalu inuiaqatigiit juutit tamarmik akornanni akerleriittoqangaalerneranut aallarniutaavoq. (Matthæusi 4:17, 25; 10:5-7, 17-20) Taamatulli Kristusip ajoqersugai ullutsinni „puugutaasarsuartut ikumatitsivittut qisuit akornanniittutut nanerussatullu ikualasutut karrit qilertat akornanniittutut“ ipput, anersaakkut ittumik ikuallatsitsillutik. Atuakkami Den fuldbyrdede Hemmelighed-imi, * 1917-imi tuluttut 1919-imilu qallunaatut saqqummersumi kristumiuunerartut ilumoortuusaarniarnerat toqqaannartumik erseqqissumillu qulaarneqarpoq. Tamanna  palasinit kamaatigineqarpoq. Nalitsinni Naalagaaffimmik Nutaarsiassat nr. 37, „Upperisarsiorneq eqqunngitsoq qanittukkut peerutissaaq!“, pissutigalugu inuppassuit Guutip naalagaaffia tapersersorniarlugu akerlilersorniarluguluunniit aalajangersimapput.

„Judap toqqi“ annaanneqarput

13. Oqariartaatsimi „Judap toqqi“-mi suna pineqarpa, aamma sooq Jehovap saassunneqartut annaappai?

¹³ Atuaruk Zakaria 12:7, 8. Itsaq Israelimi nunaannarmi tupertoqartarnera nalinginnaavoq, savanimmi paarsisut naasorissaasullu ilaannikkut tupertarput. Inuiaqatigiit akeqqersimaartut illoqarfik Jerusalemi tiguarniarlugu takkutissagaluarpata inuit taakku siulliullugit saassunneqassagaluarput, sernissorneqarnissartillu pisariaqartissavaat. Oqariartaatsimi „Judap toqqi“-mi erserpoq nalitsinni tanitat kinguleruttut narsaammiittullusooq, pallittaalisalinni illoqarfinniinnatik. Tassani naalagaaffiup Missiarsikkoortup soqutigisaanik sapiillutik illersuipput. Katersaarsuit Jehovaata „Judap toqqi siulliutillugit“ annaatissavai taakkumi Saatanip toqqaannartumik saassussineranit navianartorsiortinneqarnerpaammata.

14. ’Judap toqqiniittut’ Jehovap qanoq illersorlugillu naakkiutsinnaveersaarpai?

¹⁴ Oqaluttuarisaanermi pisimasunit uppernarsineqarluinnarpoq Guutip naalagaaffia sinnerlugu ambassadørit tanitat taakku narsaammi ’tuperminniittut’ Jehovap illersortarai. * ’Naakkiutsinnaveersaarpai’ kunngitut sorsuttartutut Daavitut nukittutigilersillugillu sapiitsigilersillugit.

15. Sooq Jehovap ’inuiaqatigiit tamaasa nungutikkumaarpai’, qaqugulu taamaaliorumaarpa?

¹⁵ Atuaruk Zakaria 12:9. Sooq Jehovap ’inuiaqatigiit tamaasa nungutikkumaarpai’? Taakkua naalagaaffik Missiarsikkoortoq akerlilersortuarmassuk. Guutip innuttaanik akornusersuillutillu malersuisimapput, taamaattumillu pisuusutut eqqartuunneqarput. Qanittukkut Saatanip ikiortai nunarsuarmiittut Guutip kiffaanik ilumoortunik naggammik saassussissapput, tamannalu kinguneqassaaq Biibilimi Harmagedonimik taaneqartup aallartinneranik. (Saqqummersitat 16:13-16) Saassussineq tamanna periarfigalugu Eqqartuussisup pingaarnersaata kiffani illersussavai inuiaqatigiillu takkuanni atini illernarsisissallugu. — Ezekieli 38:14-18, 22, 23.

16, 17. (a) „[Jehovap] kiffaasa“ suna ’pissarsiassaraat’? (b) Saatanimit saassunneqartilluta pinertusaarnerput sumut uppernarsaataava?

¹⁶ Saatani Guutip innuttaanik uppernikillisitsisinnaasunik aallussilluarunnaarsitsisinnaasunilluunniit sakkoqanngilaq. Anersaakkut eqqissisimanerput, Jehovap annaassinissamut pissaaneqarnerata kingunerisaa, tassaavoq „[Jehovap] kiffaasa pissarsiassaat“. (Esaja 54:17) Kialuunniit eqqissisimanitsinnik anersaakkullu atugarissaarnitsinnik arsaarsinnaanngilaatigut. (Tussiaat 118:6) Saatanip inneq ikummarissarniarlugu supoortuassavaa akerlilersuineq malersuinerlu ingasatsisinniarlugit uagullu ajornartorsiortinniarluta. Oqalorujuunneqartaraluarluta ilumoorfiginnittuarutta, tamanna Guutip anersaavanit najorneqarnitsinnut ersiutaassaaq. (1 Petrusi 4:14) Jehovap naalagaaffia pilersinneqareersoq pillugu nutaarsiassaq nuannersoq maanna silarsuaq tamakkerlugu oqaluussissutigineqarpoq. Guutip kiffai annilaartinniarlugillu susinnaajunnaarsinniarlugit akerlilersorneqarput soorlulusooq amerlasoorpassuarnik illusariarfigineqartut. Jehovalli akerlilersuinernik ujaqqatut illusariunneqartutut ittunik tullaarinninnissamut nakussatsittarpai ujaqqat sunniuteqannginniassammata. (Zakaria 9:15) Tanitat kinguleruttut taakkualu suleqataat ilumoorfiginnittut unitsinneqarnavianngillat!

¹⁷ Diaavulumit saassunneqartarunnaarluinnarnissarput qilanaaraarput. Sakkut suulluunniit uagutsinnut sakkuaatissatut saffiukkat atorsinnaassuseqarnaviannginnerat oqqallu uatsinnik unnerluutiginnittut tamarmik pisuusutut eqqartuunneqarumaarnerat qularutiginngilluinnarsinnaallugu nuanningaarami! (w07 12/15-E)

[Quppernerup ataani ilanngussaq]

Qanoq akissavit?

• Saatanip sakkuisa atorsinnaassuseqannginnerat sumit paasinarsiva?

• Jerusalemi qilammiittoq qanoq ililluni ’ujaranngorpa oqimaatsorsuaq’?

• Jehovap „Judap toqqi“ qanoq ililluni annaappai?

• Maanna Harmagedoni qanilliartortillugu suna qularutiginngilluinnarsinnaavarput?

[Atuaqqissaarnermi apeqqutit]

[Qupp. 28-mi assiliartat]

Jehovap innuttai Albaniamiittut Saatanimit saassunneqaraluarlutik aalajaattuarput

[Qupp. 30-mi assiliartaq]

Jiisusip unnerluutiginnissutit eqqunngitsut eqqunngitsuunerat uppernarsartarpaa

[Qupp. 31-mi assiliartat]

Sakkut suulluunniit nutaarsiassamik nuannersumik oqaluussissutiginnittunut sakkuaatissatut saffiukkat atorsinnaassuseqassanngillat