Angut pisooq naalagaasut ilaat isumatusaanngitsumik aalajangertoq

ANGUT inuusuttoq pisooq naalagaasut ilaat taanna ilumoortuullunilu inatsisinik maleruaasuullunilu Guutimik mianerinnittuuvoq. Jiisusi ornillugu seeqqumiarfigaa imalu aperalugu: „Ajoqersuisoq ajunngitsuusutit, qanoq iliussaanga inuuneq naassaanngitsoq kingornussariumallugu?“

Akissutitut Jiisusip oqarfigaa inuuneq pissarsiariumallugu Guutip peqqussutai maleruarneqartariaqartut. Angutip peqqussutit taakku itisileqqummagit Jiisusi ima oqarpoq: „’Inuassanngilatit, allasiussanngilatit, tillissanngilatit, sallullutit nalunaajaassanngilatit, ataatat anaanallu ataqqikkit’ aamma: ’Tullit ilittut asassavat.’“ Taakku inatsisinut Mosesikkut tunniunneqartunut tunngaviusumik peqqussutaapput. Taava angut Jiisusimut ima oqarpoq: „Tamakku tamaasa maleruareerpakka. Taavami suna amigaatigaara?“ — Matthæusi 19:16-20.

Jiisusip „isigaa asalerlugulu“, imalu oqarfigaa: „Ataaseq amigaatigaat: Pigisatit tamaasa akigiartukkit piitsunullu tunniullugit, taava qilammi pisuussuteqalerumaarputit. Qaallutillu malinnga!“ — Markusi 10:17-21.

Angut inuusuttoq naalagaasut ilaat taanna pingaarutilimmik aalajangigassaqaleriataarpoq. Qanoq iliussanerpa? Nunap piisigut pisuussutiminik isumakkeerinissaminut Jiisusimullu ajoqersuganngornissaminut piumassuseqarpa, pigisaniluunniit pigiinnarusuppai? Nunami pisuussutit ujassavai, imaluunniit qilammi pisuussutit ujassavai? Aalajangeruminaatsissimassavaa. Erseqqippoq pingaarutilinnik anersaakkut ittunik soqutiginnittoq, inatsisimmi maleruarpai Guutimillu iluarisaajumalluni qanoq iliortariaqarnerluni apersuutigalugu. Qanoq aalajangerpa? ’Aliasulluni qimaguppoq, pisoorsuugamimi.’ — Markusi 10:22.

Angut inuusuttoq naalagaasut ilaat taanna isumatusaartumik aalajangiinngilaq. Jiisusimut aalajaalluni ajoqersuganngorsimagaluaruni ujakkani — inuuneq naassaanngitsoq — pisimassagaluarpaa. Angut inuusuttoq taanna qanoq pisimanersoq naluarput.  Nalunngilarpulli tamatuma kingorna ukiut 40-t missaat qaangiuttut Romamiut sakkutuui Jerusalemimik Judæallu ilarujussuanik aseruisut. Juuterpassuit pisuussutitik inuunertillu annaavaat.

Angutip inuusuttup naalagaasut ilaata taassuma aalajangigaanit allaanerulluinnartumik Petrusi ajoqersukkallu allat isumatusaartumik aalajangerput. Suut tamaasa qimallugit Jiisusi malippaat. Taamatut aalajangernertik qanoq iluaqutigaat? Jiisusip oqarfigai qimatamik nalingi sinnerujussuarlugit pissarsiumaartut. Aammattaaq naassaanngitsumik inuussapput. Aalajangigartik kingusinnerusukkut peqqissimissutigissanngilaat. — Matthæusi 19:27-29.

Tamatta ilaannikkut aalajangigassaqartarpugut — pingaarutilinnik pingaaruteqannginnerusunillu. Aalajangigassat taamaattut pillugit Jiisusi qanoq oqarpa? Siunnersuutaa malissaviuk? Taamaalioruit pilluaqquneqangaassaatit. Jiisusi qanoq malissinnaanerlugu oqaasiilu qanoq iluaqutigisinnaanerlugit sammeriartigu.