’Kiffartuutissaq Naalakkami pisat nakkutigiuaruk’

’Kiffartuutissaq Naalakkami pisat sianiginiaruk [nakkutigiuaruk, NV] naammasseqqullugu.’ — KOLOSSEMIUT 4:17, 1936.

1, 2. Kristumiut inoqatiminnut qanoq akisussaaffeqarpat?

INOQATITSINNUT akisussaafferujussuaqarpugut. Taakkua maanna aalajangigaat „annikilliortitaangaarnermit“ aniguissanerannut aniguissannginnerannulluunniit aalajangiisuussapput. (Saqqummersitat 7:14) Kajumissaarut isumassarsiarititaasoq Ussatiniittoq imaappoq: „Iperagaatikkit toqutaaffissaminnukaanneqartut, asattuutikkit orloqqajaallutik toqutaaffissaminnut ingerlasut!“ Oqaatsit pikkunassusii! Inuit aalajangertariaqarnerat pillugu mianersoqqunissaat akisussaaffigiumanngikkutsigu taakkua toqunerannut pisuutitaasinnaavugut. Allassimaffimmi ima nangippoq: „Oqaruit: ’Angummi una ilisarisimanngilarput [Ata naluarput, 1900],’ uummatinik misiliisartup paasereersimassannginnerpaa? Inuuninnik paaqqinnittup tamanna nalunngilaa inullu akilertarpaa suliai naapertorlugit.“ Erseqqippoq Jehovap kiffaasa inuit navianartorsiornerat ’nalunerarsinnaanngikkaat’. — Ussatit 24:11, 12.

² Jehovap inuuneq pingaartingaarpaa, kiffanilu kajumissaarpai inunnik sapinngisamik amerlanerpaanik sapinngisartik tamaat annaassiniaqataaniaqqullugit. Guutimut kiffaasut tamarluinnarmik tusarliussamik inuunartumik Guutip oqaasianiittumik oqaluussissutiginnittariaqarput. Suliassarput alaatsinaattuutitap suliassaanut assinguvoq. Navianartumik pisoqaleraangat ingerlaannaq kalerrisaarisarpoq. Kissaatiginngilarput allat inuunerata navianartorsiornerat pillugu mianersoqqusinngitsoornerput pissutigalugu taakkua toqunerannut pisuutitaanissarput. (Ezekieli 33:1-7) Taamaammat ’oqaatsimik oqaluussissutiginnittuarnissarput’ assut pingaaruteqarpoq! — Atuaruk 2 Timotheusi 4:1, 2, 5.

3. Allaaserisami matumani allaaserisanilu tulliuttuni marlunni suut sammineqassappat?

³ Allaaserisami matumani inuunermik annaassissutaasumik kiffartorninni akornutissanik qanoq ilillutit aniguisinnaanerit qanorlu ilillutit inunnik amerlanerusunik immaqa ikiuisinnaanerit sammineqassaaq. Allaaserisami tulliuttumi sammineqassaaq sallusuissutit inuunermik annaassissutaasut pillugit qanoq ilillutit ilinniartitsillaqqissisinnaanersutit. Allaaserisallu atuaqqissaaqatigiissutissat pingajuanni oqaluussisartut nunani assigiinngitsuni angusimasaat qiimmaallannartut oqaluttuarineqassapput. Tamakkuali sammilinnginneranni ullutsinni pissutsit sooq taama ernumanartiginerat misissoqqilaassallugu pitsaassaaq.

Sooq inuppassuit neriuuteqanngitsut

4, 5. Inuiaat sunik misigisaqartarpat, inuppassuillu tamakku qanoq periarfigisarpaat?

⁴ Silarsuarmi pisartut ’pissutsit aaqqissuussaanerata naggatissaanni’ (NV) inuunitsinnut naggatissallu qanittuararsuuneranut uppernarsaataapput. Pisut pissutsillu Jiisusip taassumalu ajoqersugaasa ’ullussanut kingullernut’ ilisarnaataaneragaat inuiannit misigineqarput. ’Nallisitsinerit’, tassa sorsunnerit, nerisassaaleqineq, nunap sajuttarneri ajunaarnerillu allat inuiannit annikilliuutigineqarput. Aammattaaq inatsisaanneq, namminissarsiorneq guutiitsuunerlu sumi tamani atuupput. Allaat najoqqutassiat Biibilimiittut naapertorlugit inuuniarlutik sapinngisaminnik iliortunut tamakku tassaapput ’ullut atugarliungaarfiusut’. — Matthæusi 24:3, 6-8, 12; 2 Timotheusi 3:1-5.

⁵ Inuilli amerlanerpaartaasa silarsuarmi pisut qanoq isumaqavinnerat naluaat, taamaattumillu ilarpassuisa namminneq inuunertik ilaquttamillu inuunerat isumakuluutigaat. Toqusoornerit alianartunillu allanit inuttut eqqugaanerit pissutigalugit inuppassuit isumatsattarlutillu periusissaaruttarput. Sooq tamakkuninnga pisoqartarnera eqqorluartumik ilisimannginnamikku sumilu aaqqiissutissarsisoqarsinnaanera nalugamikku neriuuteqanngillat. — Efesosimiut 2:12.

6. Sooq „Babylonersuaq“ malitsiminik ikiuisinnaasimanngila?

 ⁶ ’Babylonersuup’, upperisarsiornerup eqqunngitsup silarsuarmi tamarmi naalagaaffissuata, inuiaat tuppallersaatissinngilai. ’Kinguaassiuutitigulli inuunerlunnermi viinnia’ atorlugu inuit tusindillit anersaakkut ittumik paatsiveerutitillugit uppeqqajaasutut ingerlatippai. Aammattaaq upperisarsiornerup eqqunngitsup ’nunarsuup kunngii’ arnatut atortittartutut iliorluni kanngunartuliorfigalugillu pissaaneqarfigilerpai ajoqersuutit salluliuutaasut anersaarsiornerlu atorlugit inuit amerlanerpaartaat naalakkersuisuminnut naalaannartilerlugit. Taamaalilluni upperisarsiorneq eqqunngitsoq pissaaneqalerlunilu sunniuteqalerpoq, upperisarsiornikkulli sallusuissummik ajattuilluinnarluni. — Saqqummersitat 17:1, 2, 5; 18:23.

7. Inuit amerlanerpaartaasa suna siunissaraat, inuilli ilaat immaqa qanoq ikiorneqarsinnaappat?

⁷ Jiisusi oqarpoq aqqut tammarfimmut sammisoq inuit amerlanerpaartaasa ingerlavigigaat. (Matthæusi 7:13, 14) Inuit ilaasa aqqut silittoq taanna ingerlavigaat Biibilimi ajoqersuutigineqartunik piaaralutik itigartitsigamik, allarpassuilli aqqut taanna ingerlavigaat Jehovamit qanorpiaq piumaffigineqarnertik eqqarsaatigalugu salloqittarneqaramik, imaluunniit taartumiitinneqaramik. Taakkua ilaat immaqa inooriaatsiminnik allannguissagaluarput taamaaliornissamut pissutissanik Biibilimeersunik erseqqissunik oqaluttuunneqartuugunik. Babylonersuarmiiginnartulli najoqqutassianillu Biibilimeersunik itigartitsiuartut ’annikilliortitaangaarnermi’ annaanneqassanngillat. — Saqqummersitat 7:14.

’Soraarnak’ oqaluussiuarit

8, 9. Ukiuni hundredelinni siullerni kristumiut akerlilersorneqaleramik qanoq periarpat, aamma sooq?

⁸ Jiisusi oqarpoq ajoqersukkani Guutip naalagaaffia pillugu nutaarsiassamik nuannersumik oqaluussissutiginnikkumaartut ajoqersuganngortitsiortorumaartullu. (Matthæusi 28:19, 20) Taamaattumik oqaluusseqataaneq Guutimik ilumoorfiginninnermut tunngassuteqartutut kristumiussutsimilu piumasaqaatit tunngaviusut ilaattut kristumiunit ilumoortunit isigineqartuarsimavoq. Taamaammallu Jiisusip ajoqersugai siulliit akerlilersorneqaraluarlutik oqaluussiuarput. Qularutiginngilaat Jehovap nakussatsikkumaaraatik, aamma taassumunnga qinnutigaat ’oqaasianik siooranngivillutik oqaatiginnittuarsinnaanngorteqqullutik’. Qinnummut tamatumunnga akissutitut Jehovap anersaaminik illernartumik ilumioqangaalersippai, Guutillu oqaasia siooranatik, imaluunniit nakimaallutik, oqaluussissutigaat. — Apustilit Suliaat 4:18, 29, 31.

⁹ Jiisusip ajoqersugai akerlilersortiminnit nakuuserfigineqartaleramik qanoq periarpat? Tamanna nutaarsiassamik nuannersumik oqaluussissutiginninnissamik aalajangiusimannikkunnaassutigaat? Naamerluinnaq. Juutit upperisarsiornikkut siuttuisa apustilit oqaluussinerat ima kamaatigitigaat taakkua parnaarunneqartillugit, sioorasaarneqartillugit iperartorneqartillugillu. Taamaakkaluartorli apustilit „soraarnatik ajoqersuiuaannarput Missiarsimillu, Jiisusimik, nutaarsiassaq nuannersoq oqaluussissutigalugu“ (NV). ’Guutip inunnit naalattariaqarnerunera’ paasilluinnarpaat. — Apustilit Suliaat 5:28, 29, 40-42.

10. Kristumiut ullumikkut sunik unamminiagaqarpat, pissuserissaarnerallu qanoq kinguneqarsinnaava?

 ¹⁰ Ullumikkut Guutip kiffaasa amerlanersaat oqaluussinertik pissutigalugu nakuuserfigineqarsimanatillu parnaarunneqarsimanngillat. Kristumiulli ilumoortut tamarmik arlaatigut misilinneqarlutillu annikilliortinneqartarput. Assersuutigalugu imaassinnaavoq nalunngeqatiginnissutit Biibili tunngavigalugu ilinniartinneqarsimasoq pissutigalugu inuit amerlanersaasa nuannarinngisaannik imaluunniit inuit amerlanersaannit allaanerussutigisannik iliuuseqartariaqartutit. Immaqa suleqativit, atuaqativit sanilivilluunniit eqqumiigaatsit najoqqutassiat Biibilimiittut tunngavigalugit aalajangiisaravit. Taakkua akuersaannginnerat nikalluutigeqinagu. Silarsuaq anersaakkut taartumiippoq, kristumiulli ’qilaap qaammaqqutaasut qinngussapput’. (Filippimiut 2:15) Immaqa inuit eqqortuliorusuttut ilaasa suliatit ajunngitsut malugalugillu nersornartissavaat Jehovalu ataqqinartillugu. — Atuaruk Matthæusi 5:16.

11. (a) Oqaluussinerput inuit ilaasa qanoq periarfigisinnaavaat? (b) Apustili Paulusi qanoq akerlilersorneqarpa, akerlilersorneqarninilu qanoq periarfigaa?

¹¹ Sapiissuseq pissusiuvoq Guutip naalagaaffia pillugu tusarliussamik oqaluussissutiginnittuarsinnaassagutta pisariaqartoq. Immaqa inuit, allaat ilaquttavit, ilaasa mitaatigissavaatsit arlaatigulluunniit nikallortinniarsaralutit. (Matthæusi 10:36) Apustili Paulusi aalajaalluni kiffartornini pissutigalugu ataasiaannarnani annersarneqarpoq. Maluginiariaruk taamatut akerlilersorneqarnini qanoq periarfigineraa. Ima allappoq: „Erloqisinneqaqqammeraluarluta naalliutsitaaqqammeraluarlutalu Guutitsinni nakimaassuseqalersitaavugut ilungersungaarluta iivangkiiliua ilissinnut tusarliussinnaanngorlugu.“ (1 Thessalonikamiut 2:2) Paulusimut illoqarfimmi siuttunut sassartinneqarnermi, atisaajarneqarnermi iperartorneqarnermi parnaarunneqarnermilu kingorna nutaarsiassap nuannersup oqaluussissutigiuarnissaa qularnanngivissumik unamminiarnartuusimavoq. (Apustilit Suliaat 16:19-24) Sunaana oqaluussiuarnissaminut nakimaassuseqalissutigigaa? Oqaluussinissamut pisussaaffimminik Guutimeersumik naammassinnerusungaarnini nakimaassuseqalissutigaa. — 1 Korinthimiut 9:16.

12, 13. Inuit ilaat sunik unamminiagaqarpat, qanorlu ilillutik taakkua naammagalugit atorniarsaraat?

¹² Aamma angalaarfigisartakkani angerlarsimasoqanngingajaffiusartuni imaluunniit Guutip naalagaaffia pillugu tusarliussamik tusarusuttut ikittuinnaaffianni aallussilluartuarnissaq unamminiarnarsinnaavoq. Pissutsini taama ittuni qanoq iliorsinnaavugut? Immaqa inuit torrutiinnarlugu oqaluussiffiginiarlugit sapiillisaarnerusariaqarpugut. Aamma imaassinnaavoq pilersaarutivut allanngortittariaqalerivut piffissanilu allani oqaluussisariaqalersugut, imaluunniit sumiiffinni inunnik amerlanerusunik naapitaqarfigisinnaasatsinni oqaluussinissarput salliutittariaqaleripput. — Naleqqiuguk Johannesi 4:7-15; Apustilit Suliaat 16:13; 17:17.

¹³ Inuppassuit ajornartorsiutigisartagaat allat tassaapput utoqqalineq peqqiilliornerlu, oqaluussinermi iliuuseqarnerorusukkaluarlutik immaqa akornutigisartagaat. Illit utoqqalinerit peqqiilliornerilluunniit pissutigalugu pisinnaasatit killeqarpata nikalloqinak. Jehovap pisinnaasatit nalunngilluinnarpai iliuuserisinnaasatillu nuannaarutigalugit. (Atuaruk 2 Korinthimiut 8:12). Ajornartorsiutitit suugaluarpataluunniit — akerlilersuinerugaluarpat, soqutigisaqannginnerugaluarpat peqqiilliornerugaluarpalluunniit — taava nutaarsiassaq nuannersoq allanut oqaluussissutiginiarlugu pissutsit maanna atukkatit naapertorlugit sapinngisat tamaat iliuuseqarit. — Ussatit 3:27; naleqqiuguk Markusi 12:41-44.

’Kiffartuutissat nakkutigiuaruk’

14. Apustilip Paulusip uppeqatini kristumiut qanoq maligassippai, qanorlu siunnersuiva?

¹⁴ Apustilip Paulusip kiffartornini pimoorulluinnarpaa, aamma uppeqatini taamatut ilioqqullugit kajumissaarpai. (Apustilit Suliaat 20:20, 21; 1 Korinthimiut 11:1) Paulusip immikkut kajumissaagaasa ilaat tassaavoq kristumiu Arkipumik atilik. Kolossemiunut allakkamini ima allappoq: „Arkipu oqarfigisiuk: kiffartuutissaq Naalakkami pisat sianiginiaruk [nakkutigiuaruk, NV] naammasseqqullugu.“ (Kolossemiut 4:17, 1936) Arkipu kinaanersoq imaluunniit qanoq atugaqarsimanersoq naluarput, qularnanngitsumilli suliassinneqarsimavoq. Illit kristumiuuguit tunniulluinnarsimasoq, illittaaq suliassinneqarsimassaatit. Illit kiffartuutit naammassiniarlugu nakkutigiuarpiuk?

15. Kristumiutut tunniulluinnarnermut suut ilaappat, suullu apeqqutaalerpat?

¹⁵ Kuisinnginnitsinni qamannga pisumik qinulluta Jehovamut tunniulluinnarpugut. Tassa imaappoq taassuma piumasaatut iliornissarput aalajangiusimagipput. Taamaattumik pitsaassaaq maanna  imminut ima aperigutta: ’Guutip piumasaatut iliornissaq inuuninni ilumut pingaarnerpaatippara?’ Immaqa Jehovap uagutsinnut isumageqqusaanik assigiinngitsunik akisussaaffeqarpugut — soorlu ilaquttatsinnik isumassuinissamik akisussaaffik. (1 Timotheusi 5:8) Piffissarpulli sinneruttoq nukittalu sinneri qanoq atortarpavut? Inuunitsinni suut pingaarnerpaatippavut? — Atuaruk 2 Korinthimiut 5:14, 15.

16, 17. Kristumiut inuusuttut pisussaaffippassuaqanngitsullu periarfissat suut eqqarsaatigisinnaavaat?

¹⁶ Illit kristumiuuit inuusuttoq tunniulluinnarsimasoq atuarunnaareersimasoq imaluunniit atuarunnaangajalersoq? Taamaappat qularnanngitsumik ilaquttanut tunngasunik immikkut ittunik suli akisussaaffeqalinngilatit. Inuunerpit qanoq atornissaa eqqarsaatigalugu qanoq pilersaaruteqarpit? Qanoq aalajangeruit Jehovap piumasaatut iliorniarlutit neriorsuutit eqqortilluarsinnaanerussaviuk? Ilarpassuisa pissutsit atukkatik naleqqussarsimavaat pioneriusinnaaniassagamik, tamannalu pissutigalugu nuannaangaarlutillu nalerisimaangaarput. — Tussiaatit 110:3; Oqaluussisartup oqaasii 12:1.

¹⁷ Immaqa inersimasuuvutit inuusuttoq. Imaassinnaavoq ulloq naallugu suliffeqartutit imminullu pilersornissavit saniatigut pisussaaffippassuaqanngitsutit. Qularnanngilaq qanoq piffissaqartiginerit naapertorlugu ilagiinni sammisassanut peqataasarnerit nuannaarutigisarit. Immaqali suli nuannaarnerulersinnaavit? Oqaluussinerup piffissaqarfiginerunissaa eqqarsaatiginikuuiuk? (Tussiaat 34:9; Ussatit 10:22) Angalaarfigisartakkat ilaanni sallusuissut pillugu tusarliussaq inuunermik annaassissutaasoq tamanut tusartinniarlugu suli iliuuserisassarpassuaqarpoq. Immaqa Guutip naalagaaffianik oqaluussissutiginnittunik pisariaqartitsiffiunerusumi kiffartorniarlutit illit nammineq inuuninni allannguisinnaavit? — Atuaruk 1 Timotheusi 6:6-8.

18. Aappariit inuusuttut qanoq allannguippat, qanorlu kingunilimmik?

¹⁸ Kevin Elenalu USA-meersut pillugit oqaluttuaq ilinniarfigisinnaavarput. * Najugaqarfimminni katerngaat amerlanersaasa pisarnerattut taakkua misigipput illusisariaqarlutik. Marluullutik ulloq naallugu suliffeqarput ilorrisimaarnartumillu inooriaaseqarsinnaallutik. Suliffitilli illumilu suliassat pissutigalugit oqaluussinissamut piffissaqarpianngillat. Paasivaat piffissartik tamangajaat nukitillu tamangajaasa pigisaminnut atorlugit. Kevinip Elenallu pionerit aappariit pilluartut pilimanianngitsumik inuunerat maluginiaramikku aalajangerput inuunerminni pingaarnerpaatitatik allanngortinniarlugit. Jehovamit siulersorneqarnissartik qinnutigereeramikku illortik tuniniarpaat inissiamullu nuullutik. Elena sivikinnerusumik sulisalerpoq pionerinngorlunilu. Kevinip nuliami oqaluussinermini misigisimasai nuannersut qiimmassaatigingaaramigit aamma nammineq ulloq naallugu suliffimminit soraarpoq pionerinngorlunilu.  Tamatuma kingunerileraa Amerikamut Kujallermut nuupput nunami oqaluussisartunik pisariaqartitsiffioqisumi kiffartorniarlutik. Kevin ima oqaluttuarpoq: „Aappariittut pilluartuaannarpugut, marluullutali anersaakkut ittunik anguniagaqaleratta suli pilluarnerulerpugut.“ — Atuaruk Matthæusi 6:19-22.

19, 20. Sooq nutaarsiassamik nuannersumik oqaluussissutiginninneq suliat ullumikkut suliarineqartut pingaaruteqarnerpaartaraat?

¹⁹ Ullumikkut nunarsuarmi suliarineqartut pingaaruteqarnerpaartaat tassaavoq nutaarsiassamik nuannersumik oqaluussissutiginninneq. (Saqqummersitat 14:6, 7) Tamanna Jehovap aqqanik illernarsisitseqataavoq. (Matthæusi 6:9) Tusarliussaq Biibilimiittoq ukiut tamaasa inuit tusindilippassuit inuunerannik pitsaanerulersitsisarpoq, tamannalu taakkua annaanneqaatigisinnaavaat. Kisiannili, apustilip Paulusip aperineratut, inuit „qanoq ilillutik tusassappat oqaluussisoqanngippat?“ (Romamiut 10:14, 15) Aap, qanoq ilillutik? Soormi kiffartuutit naammassiniarlugu iliuuserisinnaasatit tamaasa iliuuseriniarlugit aalajangeruit?

²⁰ Inuit ullut ernumanartorsiorfiit makkua pingaaruteqassusiannik aalajangigaasalu qanoq kinguneqarumaarnerannik paasinninnissaannut ikiorniarlugit periaaserineqarsinnaasoq alla tassaavoq ilinniartitsinermut pikkorinnerulerniarneq. Ilinniartitsinermut qanoq ilillutit pikkorinnerulersinnaanersutit allaaserisami tulliuttumi sammineqassaaq.

[Quppernerup ataani ilanngussaq]

Qanoq akissavit?

• Kristumiut inoqatiminnut sumik akisussaaffeqarpat?

• Oqaluussinermi akornutaasut qanoq anigorniassavavut?

• Uagutsinnut suliassiissutigineqartoq qanoq ililluta naammassisinnaavarput?

[Atuaqqissaarnermi apeqqutit]

[Qupp. 9-mi assiliartaq]

Akerlilersuisoqaraluartoq oqaluussisinnaajumalluni sapiitsuunissaq pisariaqarpoq

[Qupp. 11-mi assiliartaq]

Oqaluussiffigisartakkanni angerlarsimasoqarpiartanngippat qanoq iliorsinnaavit?