Jehovap oqaasia uumavoq

Markusip iivangkiiliuanit pingaarnersat

MARKUSIP IIVANGKIILIUA iivangkiiliunit sisamaasunit naannersaavoq. Taanna Jiisusi Kristusip toqunerata makinneratalu kingorna ukiut 30-t missaat qaangiuttut Johannesi Markusimit allagaasoq, Jiisusip ukiuni sisamassaat qiteqqullugu kiffartornerani pisimasorpassuarnik pissanganartunik oqaluttuaavoq.

Juutiunngitsut, pingaartumik Romamiut, eqqarsaatigigunarlugit allataalluni Markusip iivangkiiliuani Jiisusi Guutip erneratut tupinnartuliortartutut sunniuteqarluartumillu oqaluussisartutut oqaluttuarineqarpoq. Tassani Jiisusip suliai ajoqersuutaanit sammineqarnerupput. Markusip iivangkiiliua peqqissaartumik atuarutsigu Missiarsimik upperinninnitsinnut nakussatsissutaassaaq Guutillu tusarliussaata oqaluussissutiginerani aallussilluarnissamut kajumississutaassalluni. — Hebræerit 4:12.

Jiisusip Galilæami kiffartornera nalissaqanngitsoq

(Markusi 1:1–9:50)

Johannesi Kuisisup sulinera Jiisusillu ulluni 40-ni inoqajuitsumiinnera versini 14-iniinnarni oqaluttuarereerlugu Jiisusip Galilæami kiffartorneranik oqaluttuaq pissanganartoq Markusip aallartippaa. Oqaatsimik „erniinnaq“-mik atueqattaarneq nukinginnarpaluttunngortitsivoq. — Markusi 1:12, 18.

Ukiut pingasuunngitsulluunniit ingerlaneranni Jiisusi Galilæami pingasoriarluni oqaluussilluni angalaarpoq. Markusip oqaluttuamini pisut pisimaneri tulleriiaarnerusarpai. Qaqqami oqaluuseq Jiisusillu oqalugiaataasa takinerit ilarpassui ilanngutinngilai.

Allassimaffiit pillugit apeqqutinut akissutit:

1:15 — ’Piffissaq nalliuppat’ qanoq pisoqartussaasimava? Jiisusi oqarpoq kiffartornissaminut piffissanngortoq. Guutip naalagaaffia qanillivoq, namminermi kunngitut Guutip toqqagaasut tikiuppoq. Inuit eqqortumik isumaqarfiginnittut Jiisusip oqaluussinera tunngavigalugu maanna isummersinnaalerput Guutimillu akuerisaalissutigisaminnik iliuuseqarlutik.

1:44; 3:12; 7:36 — Sooq Jiisusip kissaatiginngilaa tupinnartuliami nalunaarutigineqartarnissaat? Jiisusip kissaatigaa inuit namminneq uppernarsissagaat nammineq Kristusiulluni uppernarsaatillu tunngavigalugit inuttut namminneq aalajangiissasut, tusakkat tupinnartut immaqaluunniit allaat eqqunngitsut tunngaviginagit. (Esaja 42:1-4; Matthæusi 8:4; 9:30; 12:15-21; 16:20; Lukasi 5:14) Angulli anersaapiloqartuugaluaq Gerasamiut nunaanni najugalik allatut periaaseqarfigaa. Jiisusip peqquaa angerlarluni pisimasoq ilaminut oqaluttuarissagaa. Jiisusi nunamit tamaanngaanniit qimaguteqquneqarsimagami inuit tamaaniittut attaveqarfigisinnaassagunigit annikitsuinnarmik attaveqarfigisinnaassavai. Angutip tamaaniinnerata Jiisusimillu ajunngitsuliorfigineqarsimanerminik uppernarsaasinnaanerata, puulukinik annaasaqarneq pillugu ajortumik qanorluunniit oqaluuserinnittoqarsinnaanerigalua pinngitsoortitsisinnaavaa. — Markusi 5:1-20; Lukasi 8:26-39.

2:28 — Sooq Jiisusi ’sabbatimut naalagaasutut’ imminut taasinnaava? ’Inatsisit ajunngitsuutit nalliuttussat tarraannaannik pigisaqarput’, apustili Paulusi allappoq. (Hebræerit 10:1) Inatsisit malillugit ullut suliffiusut arfinillit kingorna sabbatiusarpoq, ullormilu tamatumani Jiisusi tupinnartuliarpassuaqarpoq. Tamanna eqqissisimanartumik qasuersaarnermut pilluaqqussutinullu allanut Jiisusi Kristusip ukiuni tusindini naalakkersuinissaata Saatani Diaavulup naqisimannittumik naalagaanerata kingoraartissaata nalaani inuit misigiumaagaannut siumut assersuutaavoq. Taamaattumik naalagaaffimmi tassani kunngiusoq aamma „sabbatimut naalagaavoq“. — Matthæusi 12:8; Lukasi 6:5.

3:5; 7:34; 8:12 — Pisuni assigiinngitsuni Jiisusip misigissusii Markusip qanoq ilisimasaqarfigisimasinnaagamigit?  Markusi apustilit aqqaneq-marluusut ilaginngilaat aamma Jiisusi qanittumik suleqatiginngilaa. Kinguaariinnit oqaluttuarsiat pisoqaanerpaat naapertorlugit apustili Petrusi Markusimut, qanittumik suleqatiminut, paasissutissiinerpaavoq. — 1 Petrusi 5:13.

6:51, 52 — Sunaana ’timiusanut’ tunngasoq ajoqersukkat paasinngikkaat? Nalunaaquttap-akunnialui tamatuma siorna Jiisusip angutit 5000-it, arnat meeqqallu ilanngunnagit, timiusanik tallimaannarnik aalisakkanillu marluinnarnik nerisippai. Pisumi tamatumani ’timiusanut’ tunngasoq ajoqersukkat paasisassaraluat tassaavoq Jehova Guutip Jiisusi tupinnartuliorsinnaatillugu pissaanermik tunisimagaa. (Markusi 6:41-44) Jiisusip qanoq pissaaneqartitaanera paasisimagaluarunikku, tupinnartuliornikkut immakkut pisussinnaanera tupaallaatigisariaqassanngikkaluarpaat.

8:22-26 — Sooq Jiisusip tappiitsoq tassanngaannaq tappissisinnagu isigisinnaaleriartuaartippaa? Pissutaasimasinnaavoq Jiisusip angummik misiginneqatiginninnera. Angut sivisuumik taarmiuusimasoq tappissiartuaaruni seqernup qaammaarinneranut sungiussinissaminut piffissaqassaaq.

Ilinniarfigisinnaasavut:

2:18; 7:11; 12:18; 13:3. Markusip ileqqut, oqariartaatsit, inatsisit sumiiffiillu atuartartut juutiunngitsut nalusimasinnaasaat nassuiarpai. Uparuuppai farisiiarit ’iisinnginniartartuusut’, ’korbani’ tassaasoq „naalaffimmut tunissut“, saddukiiarit ’makinnissaqannginnerarlugu oqartuusut’ naalaffillu ’Uuliap Qaqqaata’ akianiittoq. Jiisusip siuaasaasa allattorsimaffiat juutinuunerusunut soqutiginarmat ilanngutinngivissimavaa. Taamaalilluni Markusi uagutsinnut maligassiuilluarpoq. Oqaluussigaangatta ilagiinniluunniit oqalugiaraangatta tusarnaartutta tunuliaqutaat eqqarsaatigisariaqarpavut.

3:21. Jiisusip eqqarlii allamik upperisaqartuupput. Taamaattumik Jiisusip paasilluarsinnaavaa upperneq pissutigalugu mitaatiginnittunik akerlilersuisunilluunniit allamik upperisalinnik ilaqutaqarneq qanoq innersoq.

3:31-35. Kuisinnermigut Jiisusi Guutimit anersaakkut ernerineqalerpoq, ’Jerusalemilu qilammiittoq’ anaanagaa. (Galatiamiut 4:26) Taamanerniit Jiisusi misigaaq anersaakkut ilaquttaminut uinikkut ilaquttamininngarnit qaninnerulluni. Taamaanneranit paasivarput anersaakkut soqutigisat sunit tamanit salliutittariaqarivut. — Matthæusi 12:46-50; Lukasi 8:19-21.

8:32-34. Kukkusumik inussiarnisaarnernik paasinnipallattuusariaqarlutalu itigartitsipallattuusariaqarpugut. Kristusimut ajoqersugaasoq piareersimasariaqarpoq ’imminut isumakkeernissaminut’, tassa imaappoq imminut tunulliulluni nammineq kissaatini angorusutanilu taamaatillugit. Piumassuseqartariaqarpoq ’sanningasulimmi [nappagaq anniartitaaffimmi, NV] ersukkiunnissaanut’ — pisariaqassappat Jiisusi Kristusip  ajoqersugaatut anniarnissaminut, mitaatigineqarnissaminut naalliutsitaanissaminut allaalluunniit toqutaanissaminut. Jiisusillu maligassiaanut naapertuuttumik inuunermigut malittuartariaqarpaa. Kristusimut ajoqersugaasutut taassuma imminut pilliutigeriaannaaneratut ineriartortitsillunilu imminut pilliutigeriaannaajuartariaqarpugut. — Matthæusi 16:21-25; Lukasi 9:22, 23.

9:24. Upperisarput pillugu allanut oqaluttuarnissarput uppernerulernissattaluunniit qinnutiginissaa kanngusuutigisariaqanngilarput. — Lukasi 17:5.

Qaammat kingulleq

(Markusi 10:1–16:8)

Ukiup 32-p naalernerani Jiisusi „Judæamut nunamullu Jordanip kangianiittumut“ pivoq, kingumullu inuit katersuuffigaat. (Markusi 10:1) Tamaani oqaluussereerami Jerusalemimut aallarpoq.

Nisanip 8-ani Jiisusi Betaniamiippoq. Nereqataatillugu arnaq iserpoq niaqualu uuliamik tipigissumik kuillugu. Jiisusip ajugaalluni Jerusalemimut iserneraniit toqusunit makititaanerata tungaanut pisimasut pisimaneri tulleriiaarlugit allataapput.

Allassimaffiit pillugit apeqqutinut akissutit:

10:17, 18 — Sooq Jiisusip angut imminik ’ajoqersuisumik ajunngitsuuneraasoq’ naqqippaa? Jiisusi taamatut qujanarniartumik taaguuteqarumanngilaq ataqqinaat taamaattoq Jehovamut ataqqinaataatikkusukkamiuk, ajunngitsut tamarmik tassannga pimmata. Aammattaaq Jiisusip ilumoortoq tunngaviusoq erseqqissarpaa tassa sunik tamanik Pinngortitsisoq, Jehova Guuti, kisimi ajunngitsut ajortullu pillugit najoqqutassiornissamut aalajangiisinnaatitaasoq. — Matthæusi 19:16, 17; Lukasi 18:18, 19.

14:25 — Jiisusip apustiliminut aalajaatsunut ima oqarami sunaana pigaa: „Viinnequtip inerititaanit imeqqinngisaannassaanga ulloq Guutip naalagaaffiani nutaamik imerfissara nalliutserlugu.“ Uani Jiisusip qilammi viinnivimmik peqarnera oqaatiginngilaa. Ilaannikkut nuannaarneq viinnimut assersuunneqartarmat, siunissami Guutip naalagaaffiani ajoqersukkami tanitat makissimasut ilaginerisa nuannaarutiginissaa Jiisusip pivaa. — Tussiaat 104:15; Matthæusi 26:29.

14:51, 52 — Angut inuusuttoq ’tamaqarani qimaasoq’ kinaava? Pisumik tamatumannga Markusi kisimi eqqartuimmat pissusissamisuussaaq isummiutissallugu imminut oqaluttuarisoq.

15:34 — „Guutiga, Guutiga! Sooq qimappinga?“-mik Jiisusip oqarnera uppernikinneranut ersiutaava? Naagga. Qulakkeerlugu ilisimanngilarput sooq Jiisusi taama nillernersoq, oqaasiili ima paasineqarsinnaapput ernertut assuarnaassutsimi tamakkiisumik misilinneqarnissaa pillugu Jehovap imminik sernissuiunnaarnera paasigaa. Aamma imaassinnaavoq Jiisusip Tussiaat 22:2-mi siulittuutigineqarnini eqquutitikkusukkaa. — Matthæusi 27:46.

Ilinniarfigisinnaasavut:

10:6-9. Guutip aallaqqaammulli siunertaraa aappariit aappariiginnassasut. Uiusut nuliaasullu avinniapallannatik aappariinnermi ajornartorsiutaalersinnaasut Biibilimi najoqqutassiat atorlugit aaqqinniartariaqarpaat. — Matthæusi 19:4-6.

12:41-44. Uillarnermik piitsumik oqaluttuamit ilinniarparput namminissarsiorata pallorfiginninneq ilumoortoq tapersersortariaqaripput. (w08 02/15-E)

[Qupp. 31-mi assiliartaq]

Sooq Jiisusip angut una qinnuigaa qanoq pineqarnerminik eqqarliminut oqaluttuassasoq?