Naalagaaffimmik piginnilernissamut qinngaqqunnanngitsuutitaasut

„Tamanna ilimasaarutaavoq Guutip eqqartuussutaanut naapertuilluartumut, Guutip naalagaaffianut . . . isernissamut qinngaqqunnanngitsuutitaassagassi.“ — 2 THESSALONIKAMIUT 1:5.

1, 2. Siunissami eqqartuussinissamut tunngatillugu Guutip suna siunertaraa, kinalu eqqartuussisuussava?

UKIUP 50-ip u.n.k. missaani apustili Paulusi Athenimiippoq. Guutipiluppassuit tassaniittut takusani narrutsaatigigamigit sunniuteqarluartumik nalunaajaarusulerpoq. Ima oqarluni naggasiinera tusarnaartuisa guutimik nalusut maluginiarsimassavaat: „Maanna [Guutip] inuit peqqusiffigai tamarmik sumiluunniit ittut allamik isumataassasut, aalajangersimavaami ulloq silarsuarmik tamarmik naapertuilluartumik eqqartuussiffissani angutikkut tamatumunnga qinereersimasamigut; tamannalu tamanut upperisassanngortippaa toqusunit makitikkamiuk.“ — Apustilit Suliaat 17:30, 31.

² Tassa Guuti ullormik inunnik eqqartuussiffissaminik aalajangeereerpoq. Paulusip Athenimi oqalugiaatimini eqqaanngisaanit, nalunngisatsitulli Jiisusi Kristusimit makititaasimasumit, eqqartuussut nalunaarutigineqassaaq. Eqqartuussut tamanna inuunermik toqumilluunniit kinguneqartussaavoq!

3. Sooq Jehovap Aaperaat angerfigeqatigaa, Guutillu siunertaata naammassineqarneranut tunngatillugu kina immikkut ittumik inissisimaffeqarumaarpa?

³ Ulloq eqqartuussiffik taanna ukiunik 1000-inik sivisussuseqassaaq. Jiisusip Guutip naalagaaffiani kunngiugami eqqartuussineq Jehovap aqqani siulittaasuuffigissavaa, kisimili eqqartuussisuussanngilaq.  Jehova Jiisusimut kunngioqataasussanik ullormilu eqqartuusiffissami ukiunik tusindinik sivisussuseqartussami eqqartuussisussanik inuit akornannit toqqartuivoq. (Naleqqiuguk Lukasi 22:29, 30). Ukiut 4000-ingajaat matuma siorna Jehovap ulloq eqqartuussiffissaq tamanna tunngavilerpaa, tassa kiffani aalajaatsoq Aaperaat angerfigeqatigigamiuk. (Atuaruk 1 Mosesi 22:17, 18). Angeruseq tamanna 1943-mi u.n.s. atuutilerunarpoq. Soorunami Aaperaap paasilluinnanngilaa angerutsip tamatuma inunnut qanoq sunniuteqarumaarnera. Uagulli ullumikkut inuusugut paasivarput angeruseq taanna naapertorlugu inuit eqqartuunneqarnissaannut tunngatillugu Guutip siunertaata naammassineqarnerani Aaperaap kinguaassaa immikkut ittumik inissisimaffeqarumaartoq.

4, 5. (a) Aaperaap kinguaassaata pingaarnerusortaa kinaava, taannalu Guutip naalagaaffia pillugu qanoq oqarpa? (b) Qanga Guutip naalagaaffiani ilaanissamik neriuuteqalertoqarsinnaanngorpa?

⁴ Paasinarsivoq Aaperaap kinguaassaata pingaarnerusortaa tassaasoq Jiisusi, ukiumi 29-mi anersaamik illernartumik taninneqartoq Missiarsinngortorlu, imaluunniit Kristusinngortoq, neriorsuutigisaq. (Galatiamiut 3:16) Ukiuni pingasuni affarmilu tulliuttuni Guutip naalagaaffia pillugu nutaarsiassaq nuannersoq juutinut oqaluussissutigaa. Johannesip Kuisisup parnaarunneqarnerata kingorna Jiisusip ersersippaa allat Guutip naalagaaffiani ilaanissamik neriuuteqalersinnaasut, imami oqarpoq: „Johannesip Kuisisup ullui aallarniutigalugit mannalu tikillugu qilammiup naalagaaffia anguniagaavoq inuit tamaviaarutigisaat, tamaviaartullu angusarpaat.“ — Matthæusi 11:12, NV.

⁵ Maluginiarnarpoq Jiisusi, qilaat naalagaaffiannik ’angusiumaartunik’ eqqartuinngitsiarnermini, ima oqarmat: „Ilumut oqarfigaassi: Arnanit erniusuni Johannesimit Kuisisumit annerusumik saqqummersoqanngilaq. Qilaalli Naalagaaffiani minnerpaaq taassumannga anneruvoq.“ (Matthæusi 11:11) Sooq taamatut oqarsinnaava? Ukiumi 33-mi piinsip ulluani anersaaq illernartoq kuineqartinnagu Guutip naalagaaffiani ilaanissamik neriuuteqalertoqarsinnaanngimmat. Tamatuma nalaani Johannesi Kuisisoq toqoreerpoq. — Apustilit Suliaat 2:1-4.

Aaperaap kinguaassaa naapertuilluartuutitaavoq

6, 7. (a) Aaperaap kinguaassaata „qilaap ulloriaasut“ amerlatigilersussaanerat qanoq paasisariaqarpa? (b) Aaperaat qanoq pilluaqquneqarpa, taassumalu kinguaassai qanoq pilluaqquneqarpat?

⁶ Aaperaat neriorsorneqarpoq kinguaassani „qilaap ulloriaasut sioqqatullu sissamiittutut“ amerlatigilerumaartut. (1 Mosesi 13:16; 22:17) Allatut oqaatigalugu Aaperaap nalaani inuusut ilisimasinnaanngilaat taassuma kinguaassaanut ilaasussat qassiujumaarnerat. Anersaakkulli kinguaassaata amerlassusiat eqqoqqissaartoq piffissap ingerlanerani paasinarsivoq. Jiisusi ilanngunnagu taakku 144.000-iusussaassapput. — Saqqummersitat 7:4; 14:1.

⁷ Aaperaap uppernera pillugu Biibilimi ima allassimasoqarpoq: „Abramip upperimmani tamanna [Jehovap] taassumunnga iluartuutitaassutigitippaa [naapertuilluartuutitaassutigitippaa, NV].“ (1 Mosesi 15:5, 6) Ilumoorpoq inoqanngimmat naapertuilluarluinnartumik. (Jaaku 3:2) Taamaakkaluartorli Jehovap Aaperaap uppernera asseqanngitsoq pissutigalugu taanna naapertuilluartutut pivaa allaallu ikinngutiginerarlugu. (Esaja 41:8) Aammattaaq inuit Jiisusi peqatigalugu Aaperaamit anersaakkut kinguaarineqartut naapertuilluartuutitaapput, tamannalu pissutigalugu Aaperaap pilluaqquneqarneranit suli annerusumik pilluaqquneqarput.

8. Aaperaap kinguaassaanut ilaasut sunik pilluaqqussutisiaqarnissartik neriuutigaat?

⁸ Kristumiut tanitat Jiisusip utertitsissutitut pilliutaanik upperinninnertik pissutigalugu naapertuilluartuutitaalertarput.  (Romamiut 3:24, 28) Jehovap isaani taakku ajortimut naalattaajunnaartarput anersaamillu illernartumik taninneqarsinnaanngortarlutik Guutimit anersaakkut ernerineqartussatut, Jiisusi Kristusimut qatanngutaasussatut. (Johannesi 1:12, 13) Angerusisaamut ilaalertarput tassaalertarlutillu inuiaqatigiit nutaat, „Israeli Guutip pigisaa“. (Galatiamiut 6:16; Lukasi 22:20) Immikkut pisinnaatitaaffik nuanningaarami! Guutip kristumiut tanitat pillugit iliuuserisaasa kingunerisaannik taakkua nunarsuarmi naassaanngitsumik inuunissaq neriuutiginngilaat. Neriuut tamanna isumakkeerpaat ullormi eqqartuussiffissami Jiisusimik ataasioqateqalernissaq taassuminngalu qilammi naalakkersueqateqalernissaq, immikkut pisinnaatitaaffiusoq asseqanngitsoq, nuannaarutigisinnaajumallugu. — Atuaruk Romamiut 8:17.

9, 10. (a) Kristumiut tanitat qanga anersaamik illernartumik taninneqarpat, taamanimiillu susariaqarpat? (b) Tanitat qanoq ikiorneqarpat?

⁹ Ukiumi 33-mi piinsip ulluani inuppaaluit uppertunngortut ullormi eqqartuussiffissami Jiisusimik naalakkersueqateqalersussanut ilaalernissaminnut periarfissaqalerput. Jiisusip ajoqersugaasa ilaat 120-t missaanniittut anersaamik illernartumik kuineqarput taamaalillutillu kristumiunngorlutik tanitat siulliit. Tamannali aallaqqaataannaavoq. Taamanimiilli Saatanip imminnik misiliinerani Jehovamut ilumoorfiginninnertik uppernarsartariaqarpaat. Niaqorut qilammi inuussutaasussaq pissagunikku toqumut allaat aalajaattariaqarput. — Saqqummersitat 2:10.

¹⁰ Tamanna anguniarlugu Jehovap oqaatsini aqqutigalugu ilagiillu kristumiut iluaqutigalugit kristumiut tanitat kajumissaarneqartittarlugillu qiimmassarneqartittarpai. Assersuutigalugu Paulusip kristumiut Thessalonikamiittut ima allaffigai: „Ilisimavarsi qanoq uagut ataatap qitornaminut ileqqorisartagaatut tamassi immikkut oqaaqqissaartarissi kajumissaartarlusilu qiimmassartarlusilu, tamassi immikkut inooqqullusi Guutip ilissinnik naalagaaffimminut naalannassutsiminullu qaaqqusisup piumasaa naapertorlugu.“ — 1 Thessalonikamiut 2:11, 12.

11. Oqaluttuap allanneqarsimasup suup ’Israelimut Guutip pigisaanut’ tunniunneqarnissaa Jehovap isumagaa?

¹¹ Tanitat ilagiissaannut ilaasussat siulliit toqqarneqarnerata kingorna Jiisusip nunarsuarmi inuunera kiffartorneralu aamma taassuma taamanikkut tanitanut kristumiunut oqaasii siunnersuutaalu oqaluttuaralugit piujuartussanik allattoqarnissaa Jehovap isumagaa. Taamaalilluni Kristumiut Allagaataat Grækerisuut isumassarsiarititaasut Allakkanut Hebræerisuunut isumassarsiarititaasunut pioreersunut ilanngunneqarput. Aallaqqaammut Allakkat Hebræerisuut uinikkut Israelikkut immikkut ittumik Guutimut attaveqarneranni iluaqutissaattut allanneqarput. Kristumiut Allagaataat Grækerisuut pingaarnerpaamik ’Israelimut Guutip pigisaanut’, Kristusip qatanngutaanut tanitanut Guutillu anersaakkut qitornaanut, iluaqutissatut allanneqarput. Soorunami imaanngilaq juutiunngitsut Allakkanik Hebræerisuunik atuarnertik atuaqqissaarnertillu iluaqutigisinnaanngikkaat. Taamatulli kristumiut anersaamik illernartumik tanitaanngitsut Kristumiut Allagaataannik Grækerisuunik atuarnertik atuaqqissaarnertillu aamma siunnersuutinik tamatumaniittunik malinninnertik iluaqutigingaarsinnaavaat. — Atuaruk 2 Timotheusi 3:15-17.

12. Paulusip taamanikkut tanitat sumik eqqaasippai?

¹² Ukiuni hundredelinni siullerni kristumiut naapertuilluartuutitaallutillu anersaamik illernartumik taninneqarput qilammi akissarsiassartik pisinnaaniassammassuk. Taninneqarnertilli nunarsuarmiitillutik kristumiunut tanitanut allanut kunnginngussutiginngilaat. Kristumiut siulliit ilaasa tamanna puiorsimannguatsiarpaat qatanngutiminnillu ilagiinniittunit nuimanerusutut imminnut isigilerlutik. Tamanna pissutigalugu Paulusi ima allannissaminut killinneqarpoq: „Ilissi qaarsilareerpusi! Pisuujoreerpusi! Kunngiuvusi uagulli naamik! Kunngiugaluarussitoq, taava uagut kunngioqatigissagaluarpassi.“ (1 Korinthimiut 4:8) Taamaattumik taamanikkut tanitanut eqqaasitsissutitut Paulusi ima allappoq: „Uppernissinnut naalagaanngilagut nuannaartuarnissarsili suleqataaffigaarput.“ — 2 Korinthimiut 1:24.

Siulittuutigineqartutut amerlatigilerput

13. Ukiup 33-p kingorna tanitanik toqqartuineq qanoq ingerlava?

¹³ Tanitat 144.000-it tamakkerlugit ukiuni hundredelinni siullerni toqqarneqanngillat. Taakkuninnga toqqartuineq apustilit nalaanni pivoq, toqqartuinerlu ingerlaannarpoq ukiuni hundredelinni tulliuttuni uagut nalerput tikillugu, tamatumali nalaani toqqarneqartut  ikittuinnaasimagunarlutik. (Matthæusi 28:20) Jiisusilli Kristusip 1914-imi kunnginngortinneqarnerata kingorna toqqartuisoqarneruleqqippoq.

14, 15. Tanitanik qaaqqusinermut atatillugu ullutsinni susoqarsimava?

¹⁴ Siullermik Jiisusip qilammi Guutip aqutsineranik akerlilersuinermut attuumassuteqartut tamaasa piiarpai. (Atuaruk Saqqummersitat 12:10, 12). Taava naalagaaffimmi naalakkersueqataasussanik kinguleruttunik katersuineq sammilerpaa 144.000-it tamakkerneqarniassammata. 1930-ikkut qeqqanni katersuineq tamanna naammassingajalersorineqarpoq, oqaluussinermummi ajunngitsumik periartorpassuit qilaliarnissamik kissaateqanngillat. Anersaap taakkua anersaavat nalunaajaaqatiginngilaa Guutip qitornarigai. (Naleqqiuguk Romamiut 8:16). Paasivaalli ’savanut allanut’, nunarsuarmi paratiisiusumi naassaanngitsumik inuulernissamik neriuuteqartunut, ilaallutik. (Johannesi 10:16) Taamaattumik 1935-p kingorna oqaluussinermi pingaarnerutinneqartoq tassaalerpoq ’amerlangaartunik’, apustilip Johannesip takorruukkamini takusaanik ’annikilliortitaangaarnermilu’ aniguisussanik, katersuineq. — Saqqummersitat 7:9, 10, 14.

¹⁵ Taamaakkaluartorli 1930-ikkunniilli arlaqanngitsut qilammi inuunissamut qaaqqusaasarput. Sooq? Imaassinnaavoq siornatigut qaaqqusaasimagaluartunik, ilumoorunnaarsimasunilli, ilaatigut taarsiisartut. (Naleqqiuguk Saqqummersitat 3:16). Assersuutigalugu Paulusi sallusuissummik qimatsisimasunik nalunngisaqarpoq. (Filippimiut 3:17-19) Jehovap taakku taarserniarlugit kikkut qaaqqussavai? Soorunami Jehovap tamanna nammineq aalajangigassaraa. Tunngavissaqarluassaarli isumaqassalluni kristumiunngorlaanik qaaqqusinavianngitsoq, inunnilli — ajoqersukkat Jiisusip eqqaaniaalluni nalliuttorsiornermik pilersitsigami oqaluffigisaasa pisimanerattut — ilumoorfiginnittuunerminnik annertungaatsiartumik uppernarsaareersimasunik qaaqqusisimassasoq. * — Lukasi 22:28.

16. Tanitat eqqarsaatigalugit suna qujamasuutigaarput, sunalu qularutigissanngilarput?

¹⁶ 1930-ikkunniilli ulloq manna tikillugu qilaliarnissamut qaaqquneqartut tamakkerlutik tunussisunut taartaasimagunanngillat. Pissutsit aaqqissuussaanerata maanna atuuttup ulluini kingullerni inuutilluta, ’Babylonersuup’ aserorneqarnissaata tungaanut akornatsinni tanitanik kristumioqarnissaa Jehovap isumagisimagunarpaa. * (Saqqummersitat 17:5) Qularutigissanngilarput piffissaq Jehovap aalajangigaa nalliuppat 144.000-it tamakkereersimanissaat taakkualu tamarmik Guutip naalagaaffiani naggataatigut naalakkersuilerumaarnissaat. Aamma amerlangaartut amerliartortuartut ataatsimut isigalugit aalajaattuarumaarnerat pillugu oqaatsit siulittuutaasut upperisinnaavavut. Qanittukkut amerlangaartut ’annikilliortitaangaarnermit’ Saatanip silarsuaanut atugaritinneqarumaartumit ’aniguiumaarput’ Guutillu silarsuassaani nutaami nuannaarlutik inuuinnarsinnaassallutik.

Guutip qilammi naalakkersuisuutitai tamakkingajalersut!

17. 1 Thessalonikamiut 4:15-17 aamma Saqqummersitat 6:9-11 naapertorlugit tanitat toqumut allaat aalajaattuarsimasut qanoq pineqarpat?

¹⁷ Ukiumi 33-miilli u.n.k. kristumiut tanitat titusindillit  uppernerminnik ersersitsisimapput toqumullu allaat pinertusaarsimallutik. Guutip naalagaaffianik piginnilernissamut qinngaqqunnanngitsuutitaareerput Kristusillu najuunnerani siusissukkut akissarsiassartik pereersimassagunarlugu. — Atuaruk 1 Thessalonikamiut 4:15-17; Saqqummersitat 6:9-11.

18. (a) Tanitat suli nunarsuarmiittut suna qularutiginngilaat? (b) Savat allat qatanngutitik tanitat qanoq isigaat?

¹⁸ Tanitat suli nunarsuarmiittut qularutiginngilluinnarpaat aalajaattuarunik aalajaannertik pillugu qanittukkut akissarsisinneqarumaarlutik. Savat allat millionillit qatanngutimik tanitat uppernerat eqqarsaatigigunikku Paulusip tanitanut Thessalonikamiittunut allanneratut ima oqassapput: „Usorsisimaarutigisinnaavassi Guutip ilagiissaani allani, nikallujuikkassi uppersuseqarassilu qinugineqarnissinni annikilliuutinilu atortariaqakkassinni tamani. Tamanna ilimasaarutaavoq Guutip eqqartuussutaanut naapertuilluartumut, Guutip naalagaaffianut maannakkut erloqinartorsiuutissinnut isernissamut qinngaqqunnanngitsuutitaassagassi.“ (2 Thessalonikamiut 1:3-5) Tanitap kingulliup nunarsuaq qimappagu — tamatuma pinissaa qaquguussagaluarpalluunniit — Guutip qilammi naalakkersuisuutitai tamakkissapput. Taava tamanna qilammi nunarsuarmilu nuannaarutigineqangaassaaq!

[Quppernerup ataani ilanngussaq]

Uku nassuiarsinnaavigit?

• Guutip Aaperaamut neriorsuutaa ullorlu eqqartuussiffissaq qanoq imminnut attuumassuteqarpat?

• Sooq Aaperaat naapertuilluartuutitaava?

• Aaperaap kinguaassaanut ilaasut naapertuilluartuutitaanerat taakkununnga qanoq kinguneqassava?

• Kristumiut tamarmik suna qularutiginngilaat?

[Atuaqqissaarnermi apeqqutit]

[Qupp. 21-mi assiliartaq]

Jiisusip ajoqersukkani kajumissaarpai Guutip naalagaaffianik noqqaassutiginneqqullugit

[Qupp. 22-mi assiliartaq]

Ukiumi 33-mi piinsip ulluani Jehova Aaperaap kinguaassaanut pingaannginnerusunut ilaasussanik toqqartuilerpoq

[Qupp. 24-mi assiliartat]

Savat allat ulluni kingullerni kristumiunit tanitanit najorneqarnertik qujamasuutigaat