Qanoq ilinniartitsinerlutit eqqumaffigiuk

„Oqaaseq oqaluussissutiguuk . . . nakimajunnaarsitsigit, naqqissuisarit, oqaaqqissaarisarit, nikallujuillutit ajoqersuiuarlutillu!“ — 2 TIMOTHEUSI 4:2.

1. Jiisusip ajoqersukkani sumik suliassippai, uagutsinnullu qanoq maligassiuiva?

JIISUSI nunarsuarmi kiffartornermini inuppassuarnik ajorunnaarsitsigaluartoq nakorsatut tupinnartuliortartutullu ilisimaneqarnani, pingaarnerpaamik ajoqersuisutut ilinniartitsisutullu ilisimaneqarpoq. (Markusi 12:19; 13:1) Jiisusimut Guutip naalagaaffia pillugu nutaarsiassamik nuannersumik oqaluussissutiginninneq pingaaruteqarnerpaavoq, aamma ullumikkut taassuma ajoqersugaanut taamaappoq. Jiisusip peqqussutaanik tamanik maleruaanissaq pillugu ilinniartitsinikkut ajoqersuganngortitsiortortuarnissaq kristumiunut suliassiissutigineqarpoq. — Matthæusi 28:19, 20.

2. Oqaluussinissaq uagutsinnut suliassiissutigineqartoq naammassiniarlugu qanoq iliortariaqarpugut?

² Ajoqersuganngortitsiortornermut tunngatillugu suliassarput naammassisinnaajumallugu ilinniartitsinermut pikkorinnerulernissarput sulissutigiuarparput. Apustilip Paulusip tamatuma pingaaruteqassusia erseqqissarpaa oqaluusseqatigisartakkani Timotheusi ima allaffigigamiuk: „Imminut nakkutiginiarit, aamma ajoqersuisutut suliat nakkutiginiaruk aalajangiullugulu, tassami taamaalioruit imminut annaatissagavit tusartitillu annatsillugit.“ (1 Timotheusi 4:16) Ilinniartitseriaaseq Paulusip eqqarsaatigisaa tassaaginnanngilaq ilisimasanik ingerlatitseqqinneq. Sunniuteqarluartumik oqaluussisartut kristumiut inuit uummataat killittarpaat taakkualu inuunerminni allannguinissaannut kajumissisittarlugit. Taamatut ilinniartitsisinnaaneq ilinniagassaavoq. Guutip naalagaaffia pillugu nutaarsiassaq nuannersoq oqaluussissutigigaangatsigu taamatut ilinniartitsisinnaanissaq qanoq ilinniarsinnaavarput? — 2 Timotheusi 4:2.

Ilinniartitsillaqqinneq ilinniaruk

3, 4. (a) Ilinniartitsillaqqinneq qanoq ililluta ilinniarsinnaavarput? (b) Teokratiimik Ilinniarfik ilinniartitsinermut pikkorissinissamut qanoq iluaqutigaarput?

³ Pikkoriffigisaqarumagaanni atuarnissaq, sungiusarnissaq  qimerluuinissarlu pisariaqarput. Taakkua pingasut aamma ilinniartitsillaqqissuunerup ilinniarnissaanut nutaarsiassamillu nuannersumik oqaluussissutiginninnermut pikkorissinissamut pingaaruteqarput. Aatsaat Guuti ikioqqulluta qinnuigigutsigu misissukkatsinnik eqqortumik paasinnissinnaavugut. (Atuaruk Tussiaat 119:27, 34). Oqaluussinermut pikkorissut ilinniartitsigaangata qimerloortarutsigit, tamanna periaasiinik ilinniarnissamut ilaarsinissamullu iluaqutigissavarput. Ilikkakkattalu aalajangersimasumik atortarnissaat ilungersuutigigutsigu, tamanna piginnaanitta pitsanngorsarnissaannut iluaqutigissavarput. — Lukasi 6:40; 1 Timotheusi 4:13-15.

⁴ Jehova Ajoqersuisorsuaraarput. Taassuma peqatigiissortami takussaasortaa aqqutigalugu kiffami nunarsuarmiittut qanoq oqaluussisassanerannik ilitsersorneqartarnissaat isumagaa. (Esaja 30:20, 21) Taakkua ilitsersorneqarnissaat siunertaralugu ilagiinni tamani sapaatip-akunneri tamaasa Teokratiimik Ilinniarfik — tamatumunnga ilaaniarlutik nalunaarsimasut Guutip naalagaaffia pillugu sunniuteqarluartumik oqaluussisinnaanngorniassammata aallarnerneqartoq — ingerlanneqartarpoq. Ilinniarfimmi tamatumani atuagaq ilinniutigineqartoq pingaarneq tassaavoq Biibili. Jehovap oqaasiani isumassarsiarititaasumi oqaluttuarineqarpoq suut ilinniartitsissutigissagivut. Aamma Biibilimi ersersinneqarpoq ilinniartitseriaatsit suut sunniuteqarluarlutillu naleqquttuunersut. Teokratiimik Ilinniarfimmi eqqaasinneqarajuppugut ilinniartitsinerput Guutip oqaasianik tunngaveqartikkutsigu, apeqqutit atorluartarutsigit, paasiuminartumik ilinniartitsigutta allallu ilumoorluta soqutigigutsigit ilinniartitsisutut pikkorinnerulissasugut. Taakkua ataasiakkaarlugit misissoriartigit. Tamatuma kingorna ilinniartup uummataa qanoq ililluta killissinnaaneripput sammissavarput.

Ilinniartitsinerit Guutip oqaasianik tunngaveqartiguk

5. Ilinniartitsinerput sumik tunngaveqartariaqarpa, aamma sooq?

⁵ Jiisusip, ilinniartitsisut nunarsuarmi inuusimasut pingaaruteqarnerpaartaata, ilinniartitsinini Allakkanik tunngaveqartippaa. (Matthæusi 21:13; Johannesi 6:45; 8:17) Nammineq atermini oqalunnani Ataatamili aqqani oqaluttarpoq. (Johannesi 7:16-18) Taassumaana maligassiaa malikkipput. Taamaattumik matumiit matumut oqaluussigaangatta inuilluunniit angerlarsimaffianni Biibilimik atuaqqissaaqatigigaangatsigit Guutip oqaasia uppernarsaatitut atortariaqarparput. (2 Timotheusi 3:16, 17) Uagut nammineq qanorluunniit tunngavilersuillaqqitsigigaluarutta tunngavilersuutivut Allakkat isumassarsiarititaasut sunniuteqarsinnaassusiannut sanilliunneqarsinnaanngisaannassapput. Biibili uppernarsaataavoq. Ilinniartumut paasitinniagarput sumulluunniit tunngagaluarpat, periaaserisinnaasarput pitsaanerpaaq tassaavoq tamanna pillugu Biibilimi qanoq allassimasoqarnera ilinniartumut atuartillugu. — Atuaruk Hebræerit 4:12.

6. Ilinniartup sammineqartunik paasinninnera ilinniartitsisutut qanoq ililluni qulakkeerneqarsinnaava?

⁶ Soorunami imaanngilaq Biibilimik atuaqqissaaqatigiinnissamut piareersarnissaq pisariaqanngitsoq. Eqqarsaatigeqqissaarneqartariaqarporli atuaqatigiinnermi allassimaffiit innersuussutigineqartut Biibilimeersut sorliit atuarneqassanersut. Amerlanertigut pitsaasarpoq allassimaffinnik upperisatsinnut tunngaviusunik atuartarneq. Aamma ilinniartoq allassimaffinnik atuakkaminik tamanik paasinninnissaminut ikiorneqartariaqarpoq. — 1 Korinthimiut 14:8, 9.

Sunniuteqarluartunik apeqquteqartarit

7. Sooq ilinniartitsigaanni apeqquteqartarneq sunniuteqarluartarpa?

⁷ Apeqqutinik atorluaaneq eqqarsalersitsisarpoq  ilinniartitsisullu ilinniartup uummataanik killiiniarnerani iluaqutaasarluni. Allassimaffiit ilinniartitannut nassuiarnagit, taanna allassimaffinnik ilinnut nassuiaaqqujuk. Ilinniartitavit eqqortumik paasinninnissaa anguniarlugu ilaannikkut suli allamik imaluunniit allaat arlalinnik apeqquteqartarnissat pisariaqarsinnaavoq. Ilinniartitat taamatut apeqqutit atorlugit ilinniartikkaangakku isummiussamut tunngavilersuutaasunik paasinninnissaanut ikiuinnarnagu, aammattaarli nammineq qularunnaarnissaanut ikiortarpat. — Matthæusi 17:24-26; Lukasi 10:36, 37.

8. Ilinniartup qanoq uummammioqarnera qanoq ililluta paasisinnaavarput?

⁸ Atuagaatitsinnik atuagassiaatitsinnillu atuaqatigiittoqartarpoq apeqqutit akissutillu atorlugit. Biibilimik atuaqqissaaqatigisartakkavit amerlanersaasa qularnanngitsumik apeqqutinut atuakkami atuagassiamiluunniit allassimasunut akissutit immikkoortuniittut naninissaat ilikkapallassavaa. Ilinniartitsisulli naliliilluarsinnaasup eqqortumik akineqarnissani naammagiinnarnavianngilaa. Assersuutigalugu ilinniartup kinguaassiuutitigut inuunerlunneq pillugu Biibilimi qanoq allassimasoqarnera immaqa ingerlaannaq nassuiarsinnaavaa. (1 Korinthimiut 6:18) Periaaserillunili ilinniartoq qanoq isumaqarnersoq aperisaraanni taassuma ilinniakkani pillugit qanorpiaq eqqarsartarnera paasimisaarneqarsinnaavoq. Taamaattumik ilinniartitsisoq soorlu ima aperisinnaavoq: „Sooq aappariinnerup avataatigut aamma katissimanani kinguaassiuutitigut atoqateqarneq Biibilimi assuarineqarpa? Guutip uagutsinnik taamatut killiliinera qanoq isumaqarfigaajuk? Guutip ileqqussatigut najoqqutassiai malillugit inuuneq iluaqutissartaqarsoraajuk?“ Apeqqutinut taama ittunut akissutit ilinniartup qanoq uummammioqarneranik ersersitsisinnaapput. — Atuaruk Matthæusi 16:13-17.

Paasiuminartuliorit

9. Biibili pillugu allanik ilinniartitsigaangatta suna eqqaamasariaqarparput?

⁹ Sallusuissutit Guutip oqaasianiittut amerlanersaat imminni paasiuminartuugaluarput. Imaalluarsinnaavorli Biibilimik atuaqqissaaqatigisartakkatta upperisarsiornikkut ajoqersuutit eqqunngitsut paatsiveerussutigisimagaat. Ilinniartitsisutut suliassarput tassaavoq Biibilimik paasiuminarsaanissaq. Ilinniartitsisut pikkorissut paasissutissat paasiuminartumik eqqorluartumillu ingerlateqqittarpaat. Tamanna eqqaamagutsigu sallusuissut paasiuminaannerulersissanngilarput. Annikitsualuit pisariaqanngitsut sammeqinagit. Allassimaffimmi atuakkatsinni pineqartut tamaviisa oqaaseqarfiginissaat pisariaqanngilaq. Sammisassi tunngavilersornissaanut pingaaruteqartut pingaarnerutiinnassavatit. Ilinniartup paasinninnerujartortilluni sallusuissutit anersaakkut ittut itinerusut paasissaqqaarpai. — Hebræerit 5:13, 14.

10. Atuaqqissaaqatigiinnermi sammisassat qanoq takitigisukkuutaarlugit sammineqartarnissaannut suut aalajangiisuuppat?

¹⁰ Atuaqqissaaqatigiinnerit tamaasa sammisassat qanoq takitigisukkuutaarlugit sammineqartassappat? Tamanna aalajangerniarlugu naliliilluarsinnaassuseqartariaqarpoq. Ilinniartup ilinniartitsisullu tamarmik immikkut piginnaaneri pissutsillu atugaat allanngorartarput, eqqumaffigiuartariaqarparpulli ilinniartitsisutut anguniagarput tassaammat ilinniartup upperluarnermik ineriartortitsinissaanut ikiornissaa. Taamaattumik atuarnissaanut, paasinninnissaanut sallusuissutinillu Guutip oqaasianiittunik akuerinninnissaanut  naammattumik piffissaqartittarparput. Atuaqatigineqartoq sapinngisaa sinnerlugu atuaqatigineq ajorparput, tamatumali saniatigut atuaqqissaaqatigiinneq naleqquttumik sukkassuseqartinniartarparput. Ilinniartup sammineqartoq paasigaangagu tullianut ingerlaqqittarpugut. — Kolossemiut 2:6, 7.

11. Ilinniartitsineq pillugu apustili Paulusi sumik ilinniarfigisinnaavarput?

¹¹ Apustilip Paulusip nutaarsiassaq nuannersoq paasiuminartumik oqaluussissutigisarpaa. Ilinniarluarsimasuugaluarluni inornarsaarpaluttumik oqalunnaveersaartarpoq. (Atuaruk 1 Korinthimiut 2:1, 2). Sallusuissut paasiuminartoq Biibilimeersoq inunnut eqqortuliorusuttunut kajungernartuullunilu uppernartuusarpoq. Sallusuissummik paasinnikkumalluni ilinniagartuujunissaq pisariaqanngilaq. — Matthæusi 11:25; Apustilit Suliaat 4:13; 1 Korinthimiut 1:26, 27.

Ilinniartut ilikkakkaminnik pingaartitsinissaannut ikiukkit

12, 13. Ilinniartup ilikkakkaminut periarnissaminut suna kajumississutigisinnaavaa? Assersuuteqarit.

¹² Ilinniartitsinerput sunniuteqarluassaguni ilinniartup uummataanik killiisariaqarpoq. Ilinniartup paasissutissat qanoq nammineq atorsinnaanerlugit, qanoq iluaqutigisinnaanerlugit aamma siunnersuutinik Biibilimeersunik maleruaaguni maleruaanermi inuunerminik qanoq pitsaanerulersitsisussaanera paasisariaqarpaa. — Esaja 48:17, 18.

¹³ Assersuutigalugu immaqa Hebræerinut allakkat 10:24, 25, kristumiunut Biibilimeersunik qiimmassarneqarniarlutik asannittumillu attaveqatigiinneq nuannaarutiginiarlugu uppeqatinik katerisimaaqateqarnissamut kajumissaarutaasoq, atuarparput. Ilinniartoq ilagiit ataatsimiinnerinut suli najuuttalersimanngippat ataatsimiinnerit qanoq ingerlasarnerat suullu sammineqartarnersut naatsumik oqaluttuarisinnaavarput. Ataatsimiinnerit pallorfiginninnitsinnut ilaanerat eqqaasinnaavarput ersersillugulu nammineq inuttut iluaqutigalugit. Taava ilinniartoq ataatsimiigiaqatiserisinnaavarput. Biibilimi peqqussutigineqartunut periarnissaminut kajumississutigisaa tassaasariaqarpoq Jehovamut naalakkusunnera, tassaanani atuaqatiginnitsiminik nuannaartitserusunnera. — Galatiamiut 6:4, 5.

14, 15. (a) Biibilimik atuaqqissaaqatigineqartartoq Jehova pillugu sunik paasisaqarsinnaava? (b) Guutip kinaassusia pillugu ilisimasaqarneq Biibilimik atuaqqissaaqatigineqartartumut qanoq iluaqutaasinnaava?

¹⁴ Ilinniartut Biibilimik atuaqqissaarnermikkut najoqqutassianillu tamatumaniittunik atuinermikkut iluaqutigisaat pingaaruteqarnerpaaq tassaavoq Jehovamik kinaassusilittut ilisarisimannilertarnerat asannilertarnerallu. (Esaja 42:8) Jehova tassaaginnanngilaq Ataataq asannittoq aamma qilammik nunamillu Pinngortitsisuullunilu Piginnittoq, aammattaarli kinaassutsini pissusinilu asannitsiminut kiffartortiminullu saqqummersittarpai. (Atuaruk 2 Mosesi 34:6, 7). Mosesip Israelikkut Egyptenimi inussiaataanermit aniguisittussanngormagit, Jehovap kinaanini nalunaarutigaa ima oqarluni: „Tassaavunga uangaasoq.“ (2 Mosesi 3:13-15) Tassa imaappoq Jehova innuttaminut toqqakkaminut neriorsuutigisaminik eqqortitsisinnaajumalluni pisariaqarnera naapertorlugu sunngorsinnaasorluunniit. Taamaalillutik Israelikkut Jehova Annaassisutut, Sorsuttartutut, Pilersuisutut, neriorsuutiminik eqqortitsisartutut allatigullu imminnik isumassuisartutut ilisarisimalerpaat. — 2 Mosesi 15:2, 3; 16:2-5; Josva 23:14.

¹⁵ Biibilimik atuaqqissaaqatigisartakkatta Jehovap Mosesimut tunngatillugu iliorsimaneratut misinnartigisumik inuunerminnut akuliunnissaa misiginaviarunanngilaat. Qularutissaanngilarli ilinniartitatta uppernermikkut ineriartortillutik ilikkakkaminnillu pingaartitsinerujartortillutillu maleruaanerujartortillutik paasiumaaraat Jehovamit sapiissuseqalersinneqartariaqarlutillu ilisimassuseqalersinneqartariaqarlutillu siunnersorneqartariaqarlutik. Taamaaliorunik Jehova aamma ilisarisimalissavaat Siunnersuisutut ilisimallunilu silatuutut, Sernissuisutut Pilersuisutullu tukkortutut pisariaqartitaminnik tamanik matussusiisartutut. — Tussiaat 55:23; 63:8; Ussatit 3:5, 6.

Asannillutit soqutiginnigit

16. Sooq piginnaanerit inunnguuserisat sunniuteqarluartumik ilinniartitsisinnaanitsinnut aalajangiisuunerpaanngillat?

¹⁶ Misigiguit kissaatigisattut ilinniartitsinermut pikkoritsiginak, nikalloqinak. Jehova Jiisusilu ullumikkut silarsuaq tamakkerlugu ilinniartitsinermik  nakkutilliipput. (Apustilit Suliaat 1:7, 8; Saqqummersitat 14:6) Taakkua ilungersornivut pilluaqqusinnaavaat oqaatsivut inummut eqqortuliorusuttumut sunniuteqarluartillugit. (Johannesi 6:44) Ilinniartitsisup ilinniartitaminik ilumoorluni asanninnera inunnguuserisamik piginnaanikissutsimik soqutaajunnaarsitsilluinnarsinnaavoq. Erseqqippoq apustilip Paulusip ilinniartitanik asanninnissap qanoq pingaaruteqartiginera paasisimagaa. — Atuaruk 1 Thessalonikamiut 2:7, 8.

17. Qanoq ililluta Biibilimik atuaqqissaaqatigisartakkavut tamaasa immikkut ilumoorluta soqutigisinnaavavut?

¹⁷ Aammattaaq Biibilimik atuaqqissaaqatigisartakkavut ilumoorluta soqutigisariaqarpavut, taakkua ilisarisimanerulerniarnissaat piffissaqarfigalugu. Qularnanngilaq najoqqutassiat Biibilimiittut ilinniartorlu oqaloqatigiissutigineranni pissutsit taassuma atugai ilisimasaqarfigilissagivut. Immaqa paasissavarput najoqqutassiat Biibilimi ilikkakkami ilaat malillugit inuulereersoq. Immaqa allatigut suli allannguisariaqarpoq. Ilinniartoq Biibilimik atuaqqissaaqatigiinnerup nalaani sammisatsinnik nammineq qanoq atuisinnaaneranik paasitinneratigut, Kristusimut ajoqersugavinngornissaanut asannilluta ikiorsinnaavarput.

18. Sooq ilinniartitatsinnik qinoqateqarnissaq qinnussinissarlu pingaaruteqarpa?

¹⁸ Pingaaruteqarnerpaaq tassaavoq ilinniartitatsinnik qinoqateqarsinnaallutalu qinnussisinnaanerput. Anguniakkatta suuneranik paasinnilluartariaqarpoq. Pinngortitsisumik ilisarisimannilluarnerulernissaanut, taassumunnga qanittumik attaveqalernissaanut taassumalu siunnersuutaanik iluaqutiginninnissaanut ikiorusupparput. (Atuaruk Tussiaat 25:4, 5). Jehova qinnuigigaangatsigu ilinniartup ilikkakkani malillugit inuuniarluni ilungersorneranik pilluaqquseqqullugu, tamanna ’oqaatsimik maleruaasunngornissap’ qanoq pingaaruteqartigineranik paasinninnissaminut iluaqutigisinnaavaa. (Jaaku 1:22) Aamma ilinniartup ilumoorluta qinnutivut tusarnaaraangamigit nammineq qanoq qinusinnaanerluni ilinniartarpaa. Biibilimik atuaqqissaaqatigisartakkanik Jehovamut qanittumik attaveqalernissaannut ikiuineq nuannaarutaangaartarpoq!

19. Allaaserisami tulliuttumi suna sammineqassava?

¹⁹ Qiimmaallannarpoq nalunagu silarsuaq tamakkerlugu Jehovap Nalunaajaasui 6.500.000-init amerlanerusut ilinniartitsillaqqinnermik ilinniarneq ulapputigigaat, inuit eqqortuliorusuttut Jiisusip peqqussutaanik tamanik malinninnissaannut ikiornissaat anguniarlugu. Oqaluussinitsigut sunik angusaqartarpugut? Apeqqummut tamatumunnga akissut allaaserisami tulliuttumi paasinarsissaaq.

Eqqaamavigit?

• Sooq kristumiut ilinniartitsillaqqinneq ilinniartariaqarpaat?

• Periaatsit suut ilinniartitsinitsinnik sunniuteqarluarnerulersitsisinnaappat?

• Suna inunnguuserisamik piginnaanikissutsitsinnik tamanik soqutaajunnaarsitsisinnaava?

[Atuaqqissaarnermi apeqqutit]

[Qupp. 13-mi assiliartaq]

Teokratiimik Ilinniarfimmut ilaavit?

[Qupp. 14-mi assiliartaq]

Ilinniartitavit Biibilimit atuaqqusarnissaa sooq pingaaruteqarpa?

[Qupp. 16-mi assiliartaq]

Ilinniartitat qinoqatigisarlugulu qinnuttaruk