Ajoqersuiartortitat pingaarnerpaartaat ilaaruk

„Uannik ilaarsisunngoritsi, soorluttaaq uanga Kristusi ilaariga.“ — 1 KORINTHIMIUT 11:1, NV.

1. Sooq Jiisusi Kristusi ilaartariaqarparput?

APUSTILIP Paulusip ajoqersuiartortitat pingaarnerpaartaat, Jiisusi Kristusi, ilaarpaa, kristumioqatinilu tamaasa ima kajumissaarpai: „Uannik ilaarsisunngoritsi, soorluttaaq uanga Kristusi ilaariga.“ (1 Korinthimiut 11:1, NV) Jiisusip apustilimi isigaannik asaanermigut taakkua maniguunnermut tunngatillugu maligassioreeramigit ima oqarfigai: „Maligassippassi uanga ilissinnut iliornittut ilioqqullusi.“ (Johannesi 13:12-15) Kristumiuugatta Jiisusip oqaatsitsigut, iliuutsitsigut pissuserisartakkatsigullu ilaarnissaa pisussaaffigaarput. — 1 Petrusi 2:21.

2. Siulersuisoqatigiinnit ajoqersuiartortitatut toqqarneqarnikuunngikkaluarluni qanoq isiginnittaaseqartoqarsinnaava?

² Allaaserisap matuma siuliani paasivarput ajoqersuiartortitaq tassaasoq iivangkiiliumik oqaluussissutiginnittartutut aallartinneqartartoq — nutaarsiassamik nuannersumik allanut tusarliisartoq. Tamatumunnga tunngatillugu Paulusi soqutiginartunik apeqquteqarpoq. (Atuaruk Romamiut 10:11-15.) Maluginiaruk apustili ima aperimmat: „Qanoq ilillutik tusassappat oqaluussisoqanngippat?“ Taava oqaatsit Esajap siulittuutaanneersut issuarpai: „Qaqqani takusap ila takorannissusia: pisuinnarluni aggerpoq nutaarsiassanik nuannersunik tusarliisoq!“ (Esaja 52:7, NV) Nunamut allamut aallartinneqarlutit ajoqersuiartortitanngortinneqanngikkaluarlutit oqaluussisartutut anersaaqarsinnaavutit nutaarsiassamik nuannersumik oqaluussissutiginnittartutut aallussilluartutut Jiisusi ilaarlugu. Siorna oqaluussisartut 6.957.854-it nunani 236-ni „iivangkiiliumik oqaluussisartup suliassaa“ suliaraat. — 2 Timotheusi 4:5, NV.

„Suut tamaasa qimallugit malippatsigit“

3, 4. Jiisusip qilammi suut qimappai, taassuminngalu malinnikkumalluta susariaqarpugut?

³ Jiisusip qilammi inuunini naalannassutsinilu  „iperarpaa kiffap isikkua atillugu“ nunarsuarmi imminut suliassiissutigineqartoq naammassisinnaajumallugu. (Filippimiut 2:7) Taanna ilaarniarlugu iliuuserisavut suugaluarpataluunniit, iliuuserisavut taassuma nunarsuarmut pigami iliuuserisaanut sanilliunneqarsinnaanngillat. Jiisusitulli aalajaattuarsinnaavugut, Saatanip silarsuaani inuunerisimasarput maqaasinagu. — 1 Johannesi 5:19.

⁴ Ilaanni Petrusip Jiisusi ima oqarfigaa: „Takuat, uagut suut tamaasa qimallugit malippatsigit.“ (Matthæusi 19:27) Petrusi, Andreasi, Jaaku Johannesilu Jiisusimik malinninnissaminnut kajumissaarneqaramik qassutitik ingerlaannaq qimappaat. Aalisartuujunnaarput oqaluussinerlu suliassamittut pingaarnerpaanngortillugu. Lukasip oqaluttuaa naapertorlugu Petrusi ima oqarpoq: „Takuat, pigisavut tamaasa qimallugit malippatsigit.“ (Lukasi 18:28) Amerlanersavut Jiisusimik malinnikkumallutik ’pigisaminnik’ tamanik qimatsisariaqarsimanngillat. Imminulli ’isumakkeertariaqarsimavugut’ taanna malikkumallugu uummatikkullu iluunngarluta Jehovamut kiffartorsinnaajumalluta. (Matthæusi 16:24) Taamaaliorneq pilluaqqusaangaarnermik kinguneqartarpoq. (Atuaruk Matthæusi 19:29.) Jiisusimik ilaarsinitsigut oqaluussisartutut anersaaqarneq qamannga pisumik nuannaalissutigissavarput, ingammik Jehova Guutimik Jiisusimillu Kristusimik ilisarisimannilernissamut arlaannik immannguaannarluunniit ikiueqataasimagutta.

5. Misigisamik nunamut allamut nuussimasup sallusuissummik Biibilimeersumik paasinnereerluni qanoq aalajangersinnaaneranik ersersitsisumik eqqaasaqarit.

⁵ Brasiliamiu Valmirimik atilik Surinamip timaani najugaqartoq kuultisiorfimmik piginneqataavoq. Imerajuttuuvoq kinguaassiuutitigullu inuunerlulluni inuulluni. Ilaanni illoqarfiit ilaanniitilluni Jehovap Nalunaajaasuinit Biibilimik atuaqqissaaqatigineqartalerpoq. Ullut tamaasa atuaqqissaartarpoq, amerlasuutigut allannguilluni sivitsunngitsorlu kuisilluni. Paasileramiuk suliffini upperisartaaminut naapertuuttumik inuunissaminut artornarnerulersitsisoq suliffimminit aningaasarsilluarnartumit soraarpoq Brasiliamullu uterluni ilaquttani anersaakkut erlinnartuutinik nanisinissaannut ikiorniarlugit. Inuppassuit nunani pigissaarfiusuni suliniarlutik nunanut allanut nuussimasut suliffimminnit soraarnissaminnut piumassuseqartarput nunagisaminnullu utertarlutik, ilaquttatik allallu sallusuissummik paasinninnissaannut ikiorniarlugit. Oqaluussisartut taakkunatut ittut ilumut oqaluussisartutut anersaaqarput.

6. Oqaluussisartunik pisariaqartitsiffiunerusunut nuussinnaanngikkutta susinnaavugut?

⁶ Jehovap Nalunaajaasui arlallit nunagisaminni sumiiffinnut oqaluussisartunik pisariaqartitsiffiunerusunut nuussinnaasimapput. Ilaat allaat nunamut allamut  nuussimapput. Immaqa uagut nuussinnaasimanngilagut, Jiisusili ilaarsinnaavarput oqaluussinermi sapinngisarput tamaat iliuuseqartuarnitsigut.

Jehovap pisariaqartumik ilinniartippaatigut

7. Oqaluussisartutut pikkorinnerulerusuttunut sunik ilinniarfeqarpa?

⁷ Soorlu Jiisusi Ataataminit ilinniartinneqartoq, Jehovap maanna ilinniartitsinera iluaqutigisinnaavarput. Jiisusi nammineq ima oqarpoq: „Pruffiitini ima allassimasoqarpoq: ’Tamarmik Guutimit ajoqersorneqarsimassapput.’“ (Johannesi 6:45; Esaja 54:13) Ullumikkut ilinniarfeqarpoq uagutsinnik oqaluussisartutut ilinniartitsiffiusussatut naatsorsuussaasunik. Qularnanngitsumik tamatta ilagiitsinni Teokratiimik Ilinniarfik arlaatigut iluaqutigisimavarput. Pionerit Pionerit Ilinniarfiannut qaaqqusaasarnertik immikkut pisinnaatitaaffigaat, pionerillu misilittagaqarluartut aappassaanik ilinniarfimmi tassani ilinniarnertik nuannaarutigisimavaat. Utoqqaanertat ilagiinnilu kiffartortut Naalagaaffimmut Kiffartornermik Ilinniarfik peqataaffigisimavaat ilinniartitsinermut qatanngutiminnillu isumaginninnermut pikkorinnerulerniarlutik. Utoqqaanertat ilagiinnilu kiffartortut aappaqanngitsut ilarpassui Kiffartortut Toqqakkat Ilinniarfianni oqaluussinermi allanik ikiuinissamut ilinniartinneqarsimapput. Qatanngutillu ilarpassui ajoqersuiartorfissaminnut aallartinneqarsimasut Napasuliap Alapernaarsuiffiup Biibilimik Ilinniarfiani Gileadimi ilinniartinneqarsimapput.

8. Qatanngutit angutit ilaat Jehovamit ilinniartinneqarumallutik pilliuteqarnissaminnut qanoq piumassuseqartigisimappat?

⁸ Jehovamut nalunaajaasorpassuit ilinniarfiit taakkua ilaanni ilinniarumallutik allannguisimapput. Qatanngut angut Yugumik atilik Canadami Kiffartortut Toqqakkat Ilinniarfianni peqataasinnaajumalluni suliffimminit soraarpoq sulisitsisumi sulinngiffeqartikkumanngimmani. Yugu ima oqarpoq: „Soraarnera peqqissimissutiginngilara. Aap, ikiorniarlunga sulinngiffeqartissimasuuguninnga immaqa ilumoorlunga suliffeqarfimmiiginnarnissara naatsorsuutigisimassagaluarpaat. Maannali Jehovamit sumilluunniit suliassinneqarnissannut akuersinissannut kiffaanngissuseqarpunga.“ Inuppassuit Jehovap ilinniartitsineranik iluaqutiginnissinnaajumallutik siornatigut pingaartingaarsimasaminnik kajumeqalutik pilliuteqarsimapput. — Luk. 5:28.

9. Biibili pillugu ilinniartitsinerup ilinniartullu ilungersorluni iliuuseqarnerata qanoq kinguneqarsinnaanerannik assersuuteqarit.

⁹ Biibili pillugu ilinniartitsineq ilinniartullu ilungersorluni iliuuseqarnera maluginiarnartumik kinguneqartarput. (2 Timotheusi 3:16, 17) Assersuutigalugu Saulo Guatemalami najugaqartoq qanoq pisimanersoq eqqaaneqarsinnaavoq. Taanna eqqarsartaatsikkut annikitsumik innarluuteqarluni inunngorsimavoq, ilinniartitsisullu taassuma anaanaa oqarfigisimavaa nukappiaraq pinngitsaalillugu atuarnermik ilinniartissanngikkaa, tamanna pakatsissutigiinnassammagu. Taamaattumik Saulo atuarfimmit anivoq atuarneq ilikkarsimanagu. Oqaluussisartulli Saulo atuarnermik ilinniartippaa atuagassiaaraq Apply Yourself to Reading and Writing (Atuarneq allannerlu pingaartikkit) * iluaqutigalugu. Naggataatigut Saulo ima siumukartigaaq Teokratiimik Ilinniarfimmi saqqummiussisinnaalluni. Kingusinnerusukkut Saulop anaanaata ilinniartitsisoq taanna illumiit illumut angalaarluni naapippaa. Ilinniartitsisup tusaramiuk Saulop atuarneq ilikkarsimagaa, anaanaa qinnuigaa tulliani pulaalerpani Saulo ilageqqullugu. Sapaatip-akunnerani tulliuttumi ilinniartitsisup Saulo ima aperaa: „Sumik ilinniartikkusuppinga?“ Saulop atuakkami Hvad er det Bibelen virkelig lærer?-mi * immikkoortoq atuarlugu aallartippaa. Taava ilinniartitsisoq ima oqarpoq: „Maanna illit uannik ilinniartitsisutit uppernanngingajappoq.“ Qullilillunilu Saulo eqeruloorpaa.

Ilinniartitsineq uummatinik killiisoq

10. Biibili pillugu ilinniartitsinitsinni suna atortorilluarsinnaavarput?

¹⁰ Jiisusi Jehovap imminut toqqaannartumik ilinniartitsissutigisai tunngavigalugit aamma Guutip oqaasiani allassimasut tunngavigalugit ilinniartitsisarpoq. (Lukasi 4:16-21; Johannesi 8:28) Uagut Jiisusip ilinniartitsinera Biibililu tunngavigalugit ilinniartitsisarpugut. Taamaalilluta tamatta oqaatsitsigut eqqarsartaatsitsigullu isumaqatigiippugut, tamannalu ataasiussutsitsinnik siuarsaasarpoq.  (1 Korinthimiut 1:10) Aamma ’inussiap aalajaallunilu silatuup’ atuakkanik atuagassianillu Biibililersaarutinik ilinniartitsinitsinni ataasiussuseqartuarnissamut iivangkiiliumillu oqaluussissutiginnittutut suliatsinnik assigiiaartumik suliarinninnissatsinnut iluaqutigisartakkatsinnik saqqummersitsisarnera qujamasuutigeqaarput. (Matthæusi 24:45, NV; 28:19, 20) Saqqummersinneqartut taakkua ilagaat atuagaq Hvad er det Bibelen virkelig lærer?, maanna oqaatsinut 179-inut naqiterneqarsimasoq.

11. Etiopiami qatanngutip arnap atuagaq taanna iluaqutigalugu akerlilersorneqarneq qanoq ililluni ajugaaffigaa?

¹¹ Atuagaq taanna iluaqutigalugu Biibilimik atuaqqissaaqateqarneq allaat akerlilersuisut isumaannik allanngortitsisinnaavoq. Lula, Etiopiami qatanngut arnaq pioneriusoq, Biibilimik atuaqqissaaqateqaleruttortoq soqutiginnittup ilaqutaa innimigisaqarani tassaanngaannaq iserpoq oqarlunilu taamatut atuaqqissaartariaqanngitsut. Lulap eqqissisimalluni taanna eqqarsalersinniarlugu oqaloqatigaa, aningaasalianik peqquserluutinik assersuusiaq atuakkami kapitalimi 15-imiittoq atorlugu. Arnaq taanna kamakkunnaamivoq, atuaqqissaarneratalu nangeqqinnissaa akueralugu. Allaat tulliani atuaqqissaarmata najuuppoq namminerlu atuaqqissaaqatigineqartalerumalluni, atuaqqissaaqatigineqarnermilu akilernissaa neqeroorutigalugu! Sivitsunngitsoq sapaatip-akunneranut pingasoriarluni atuaqqissaartalerpoq siumakarluarlunilu.

12. Meeqqat inuusuttullu Biibilimi allassimasut pillugit sunniuteqarluartumik qanoq ilillutik ilinniartitsisinnaanersut assersuuteqarit.

¹² Meeqqat inuusuttullu atuagaq taanna iluaqutigalugu allanik ikiuisinnaapput. Keanup aqqanilinnik ukiullip Hawaiimiup atuagaq taanna atuarfimmi atuarujooraa atuaqataata ima aperaa: „Sooq nalliuttorsiorneq ajorpisi?“ Keanup apeqqut taanna atuakkami tapiliussamit „Kristumiut nalliuttut qanoq isigissavaat?“-mik qulequtalimmit atuarluni akivaa. Taava atuakkap ujarliutaa qupperpaa atuaqatinilu aperalugu sammisaq sorleq soqutigineruneraa. Tamanna Biibilimik atuaqqissaaqatigiittalernerannik kinguneqarpoq. Ukiumi kiffartorfiusumi kingullermi Jehovap Nalunaajaasui 6.561.426-nik Biibilimik atuaqqissaaqateqarput, taakkualu ilarpassui atuagaq taanna iluaqutigalugu atuaqatigineqarput. Taanna atortarpiuk?

13. Biibilimik atuaqqissaarneq qanoq sunniuteqangaarsinnaava?

¹³ Atuagaq taanna iluaqutigalugu Biibilimik atuaqqissaarneq Guutip piumasaatut iliorusuttunut sunniuteqangaarsinnaavoq. Norgemi aappariit specialpioneriusut ilaqutariinnik Zambiameersunik Biibilimik atuaqqissaaqateqartalerput. Aappariit Zambiameersut pingasunik paneqarput meerartaaqqikkusunnatillu. Taamaattumik arnaq naartulermat aappariit taakku aalajangerput naartuersissasoq. Nakorsamik oqaloqateqarnissaa ullualunnik sioqqullugu kapitali „Guutip inuunermut isiginnittaasia“-mik quleqatalik atuaqqissaaqatigiissutigaat. Meeqqap erniusimanngitsup assinga kapitalimi tamatumaniittoq aappariit attortissutigingaaramikku aalajangerput naartuersissanngitsoq. Siumukartuarput, nuliaasorlu ernertaarmat  aappariit ernertik specialpionerip atuaqatigiinnerminni siulersuisuusartup atianik atserpaat.

14. Ilikkakkavut malillugit inuunitta kinguneqarluartarnera assersuuteqarlutit ersersiguk.

¹⁴ Jiisusip ilinniartitsineranut tunngasoq pingaaruteqartoq tassaavoq allanut ilinniartitsissutigisani malillugit inuunera. Jehovap Nalunaajaasuisa aamma tamatumunnga tunngatillugu Jiisusi ilaartarpaat. New Zealandimi niuertup biilianut tillinniartoqarsimavoq niuertullu mappia tillinneqarsimalluni. Tillinniartoqarsimanera politeeqarfimmut nalunaarutigaa, politiillu taanna ima oqarfigaa: „Pigisavit utertitsissinnaanissaannut periarfissatuat tassaassaaq Jehovap Nalunaajaasuisa ilaata nassaarippagu.“ Arnap Jehovamut nalunaajaasuusup aviisinik agguaaleruttorluni mappi nassaaraa. Niuertoq tamanna pillugu paasitinneqarami qatanngutip arnap taassuma angerlarsimaffianukarpoq. Pappiaraq taarserneqarsinnaanngitsoq suli mappimiittoq takugamiuk eqqissiallappoq. Qatanngutip arnap taanna ima oqarfigaa: „Uanga piginngisannik tunniussinissara pissusissamisuuginnarpoq, ingammik Jehovamut nalunaajaasuunera pissutigalugu.“ Niuertoq tupigutsappoq, maannami ullaap tungaani politiip oqaasii eqqaavai. Kristumiut ilumoortut soorunami Jiisusi ilaarusuppaat ajoqersuutigineqartullu Biibilimiittut naapertorlugit inoorusullutik. — Hebræerit 13:18.

Jiisusip allanut isiginnittaasia ilaaruk

15, 16. Qanoq ililluta inuit tusarliussamik soqutiginnilersissinnaavavut?

¹⁵ Jiisusip oqaluussaminut isiginnittaasia pissutigalugu inuit tusarliussaa kajungerilertarpaat. Assersuutigalugu asanninnera maniguunneralu pissutigalugit maniguuttut atugarliortullu taassumunnga kajungilertarput. Imminut orniguttut misiginneqatigisarpai, oqaatsiminik tuppallersartarlugit amerlasuullu ajorunnaarsillugit. (Atuaruk Markusi 2:1-5.) Uagut tupinnartuliorsinnaanngilagut, asannittuliorsinnaavugulli maniguussinnaallutalu misiginneqatiginnissinnaallutalu — tamakku tassa pissuserineqartussat inunnik sallusuissummut kajungilersitsisartut.

¹⁶ Oqaluussinermi misiginneqataanerup pingaaruteqarnera misigisalikkersaarummi tulliuttumi erserpoq. Qatanngutip arnap specialpionerip Tariuamik atillip angut utoqqaq Beeremik atilik Kiribatimi Manerassuup kujasinnerusortaani qeqertat avinngarusimanerusumiittut ilaanni najugaqartoq pulaarpaa. Angut soqutiginnippasinngilaq, Tariualli taassuma timaata ilaa nukillaarsimasoq maluginiarpaa naakkigilerlugulu. Taamaattumik ima aperaa: „Tusarnikuuiuk Guutip utoqqaat napparsimasullu qanoq neriorsornerai?“ Taava versinik Esajap siulittuutaaneersunik atuffappaa. (Atuaruk Esaja 35:5, 6.) Angut soqutiginnilersoq maanna ima oqarpoq: „Ukiorpassuarni Biibili atuartarpara ajoqersuiartortitamillu uanga upperisaqatigisannit pulaarneqartarnikuullunga, Biibilimili allassimasut taakku takusimanngisaannarpakka.“ Beere Biibilimik atuaqqissaaqatigineqartalerpoq, siumukarluarporlu. Ilungersunartumik innarluuteqaraluarluni kuisippoq maannalu gruppe avinngarusimasumiittoq isumagisaralugu. Qeqertaq tamakkerlugu pisuttarpoq nutaarsiassaq nuannersoq oqaluussissutigalugu.

Kristusi ilaartuaruk

17, 18. (a) Oqaluussinermi qanoq ililluta angusaqarluarsinnaavugut? (b) Oqaluussinermik pimoorussisut suna qilanaarisinnaavaat?

¹⁷ Soorlu oqaluussinermi misigisartakkatsinni ersertuartoq, pissutsit Jiisusip ilisarnaatigisai ilaarutsigit angusaqarluarsinnaavugut. Tassa pissusissamisoorpoq oqaluussisartutut aallussilluartutut Jiisusimik ilaarsinissarput.

¹⁸ Taamani Petrusip ima aperimmani: „Sunami taava pisassaraarput?“ Jiisusi ima akivoq: „Kinaluunniit illuminik, qatanngutiminik angutinik arnanillu, ataataminik anaanaminillu, qitornaminik narsaamminilluunniit atera pillugu qimatsisimasoq pissarseqqissaaq 100-riaammik inuunerlu naassaanngitsoq kingornutissallugu.“ (Matthæusi 19:27-29) Tamanna misigissavarput ajoqersuiartortitat pingaarnerpaartaat, Jiisusi Kristusi, ilaartuarutsigu.

[Quppernerup ataani ilanngussat]

Qanoq akissavit?

• Jehovap iivangkiiliumik oqaluussissutiginnittungornissamut qanoq ilinniartippaatigut?

• Sooq atuagaq taanna oqaluussinermi atortorineqarluarsinnaava?

• Oqaluussiffigisatsinnut isiginnittaatsitsigut Jiisusi qanoq ilaarsinnaavarput?

[Atuaqqissaarnermi apeqqutit]

[Qupp. 21-mi assiliartaq]

Jiisusip Petrusi, Andreasi, Jaaku Johannesilu maleqqulluni kajumissaarmatik ingerlaannaq malippaat

[Qupp. 23-mi assiliartaq]

Atuagaq soorlu „Hvad er det Bibelen virkelig lærer?“ oqaluussinermi ataasiussuseqartuarnissatsinnut iluaqutigaarput