Aqagussaq eqqarsaatigalugu inuugit

„AQAGUSSAQ isumakuluutigeqinasiuk,“ Jiisusi Kristusi Galilæami qaqqap sivingarnani oqaluutsimini ilisimaneqarluartumi oqarpoq. „Aqagussaq nammineq piminik isumakuluutissaqassaaq.“ — Matthæusi 6:34.

Oqaatsit uku qanoq paasisariaqarsoraagit: „Aqagussaq nammineq piminik isumakuluutissaqassaaq“? Aqagussaq puigorlugu ullumikkut-innaq eqqarsaatigalugu inuunissamut kajumissaarinerua? Jiisusip ajoqersugaasalu upperisaannut naapertuuppa?

„Inuunersi isumakuluutigeqinasiuk“

Jiisusip oqaasii Matthæusi 6:25-32-mi allassimasut versit tamaasa atuakkit. Ilaatigut ima oqarpoq: „Inuunersi isumakuluutigeqinasiuk, suna nerissagissi, suna imissagissi imaluunniit timissigut suna atissagissi. . . . Qilaap timmiai isigeriarsigit; siaruarterinatillu katersuinngillat quinullu qimatulinatik, Ataatassilu qilammiittup nerisittarpai. . . . Kiammi arlassi isumakuluuteqarnermigut ullut inuuffigisassani ataasiinnarmilluunniit ilasinnaanerpai? Soormi atisassat pillugit isumakuluuteqarpisi? Malugeriarsigit narsaatip naasui liljat qanoq naajartortartut; sulisanngillat qissisarnatilluunniit. . . . Taamaattumik isumakuluuteqassanngilasi ima aperalusi: Suna nerissavarput? Suna imissavarput imaluunniit suna atissavarput? Tamakku tamaasa Guutimik nalusut ujartarpaat, ataatassilu qilammiittup nalunngilaa tamakku tamaasa pisariaqartikkisi.“

Jiisusip qaqqami oqaluutsimi immikkoortua taanna naggaserpaa tusarnaartini marlunnik siunnersorlugit. Siulleq imaappoq: „Guutilli naalagaaffia iluarneralu ujaqqaarsigit, taava tamakku tamarmik ilanngullutik ilissinnut tunniunneqarumaarput.“ Aappaa imaappoq: „Taamaattumik aqagussaq isumakuluutigeqinasiuk; aqagussaq nammineq piminik isumakuluutissaqassaaq. Ullup suugaluartulluunniit erloqinartua  ullormut naammattarpoq.“ — Matthæusi 6:33, 34.

Ataatassi pisariaqartitasi suusut nalunngilai

Jiisusip ajoqersukkani, ilaatigut naasorissaasuusut nikallortippai ’siaruarterinissamut, katersinissamut quinulluunniit qimatulinissamut’ kajumissuseerutsillugit? Pisariaqartitaminnilluunniit atisassaqarniarlutik ’sulinissamut qissinissamullu’ kajumissuseerutsippai? (Ussatit 21:5; 24:30-34; Oqaluussisartup oqaasii 11:4) Naamerluinnaq. Suliunnaaraluarunik ilimanarluinnarpoq ’katersuiffiup nalaani inerittunik ujaasisaraluarlutik nassaassaqaratik’ nerisassaqaratillu atisassaqassanngitsut. — Ussatit 20:4, 1990.

Isumakuluutimmi? Jiisusi isumaqarpa tusarnaartimi isumakuluutit pinngitsuuissinnaagaat? Tamanna piviusorsiornerunavianngilaq. Jiisusi nammineq unnuami tigusaaffimmini assut isumakuluppoq misigissutsikkullu tatineqangaarluni. — Lukasi 22:44.

Jiisusip ilumoortoq tunngaviusoq oqaatigiinnarpaa. Qanorluunniit ajornartorsiuteqaraluaraanni ajornartorsiutip anigorniarnerani ingasattumik isumakulunneq iluaqutaanngisaannassaaq. Assersuutigalugu isumakulunnikkut sivisunerusumik inuusoqarsinnaanngilaq. Jiisusi oqarpoq ’isumakuluuteqarnikkut ullut inuuffigisassat ataasiinnarmilluunniit ilaneqarsinnaanngitsut’. (Matthæusi 6:27) Sivisuumilli isumakuluuteqangaarneq inuunermik sivikillisitsisarpoq.

Jiisusip siunnersuutaa pitsaalluinnarpoq. Amerlanertigummi isumakuluutigisatsitut pisoqarneq ajorpoq. Tuluup politikerip nuimasup Winston Churchillip sorsunnersuup aappaata nalaani ullunut taarsiorfiusunut atatillugu tamanna nassuerutigaa. Taamani isumakuluutigisimasani pillugit ima allappoq: „Isumakuluutit tamakku tamaasa kingumut eqqarsaatigigaangakkit, angut utoqqaq toqulerluni nallavimmini oqartoq inuunermini isumakuluuterpassuaqarsimalluni, amerlanersaalli isumakuluutigisamisut pisimanngitsut pillugu oqaluttuaq eqqaasarpara.“ Silatusaarnerulluinnarpoq ullut nalliuttut naammagalugit atornissaat, pingaartumik tatineqartarnitta ajornartorsiutittalu isumakulungaalerseriaannaammatigut.

’Guutip naalagaaffia ujaqqaarsiuk’

Jiisusip tusarnaartimi timikkut misigissutsikkullu peqqissuunissaat eqqarsaatigiinnanngilaa,  aammali allarpassuit. Nalunngilaa inuunermi pisariaqartut piniarnerannut aamma nuannaarniutinut nunallu piinut kajungernermut tunngatillugu isumakuluuteqarneq pingaaruteqarnerusunit allamut saatsitsisinnaasoq. (Filippimiut 1:10) ’Inuunermili pisariaqartut piniarnerannit suna pingaaruteqarnerusinnaava?’ immaqa eqqarsarputit. Tassaapput anersaakkut ittut Guutimik pallorfiginninnitsinnut tunngasut. Jiisusip erseqqissarpaa inuunitsinni pingaarnerpaatittariaqagarput tassaasoq ’Guutip naalagaaffianik iluarneranillu ujaaseqqaarneq’. — Matthæusi 6:33.

Jiisusip nalaani inuppassuit nunap piinik katersineq ulapputigisorujussuuaat. Taakkununnga pisuunngornissaq pingaarnerpaajuvoq. Jiisusilli tusarnaartini kajumissaarpai allatut isiginnittaaseqaqqullugit. Guutimut tunniulluinnarsimasutut ’naammassiniagassaat tamarmi’ (NV) tassaavoq ’Guutimik mianerinninneq inatsisaanillu maleruaaneq’. — Oqaluussisartup oqaasii 12:13.

Nunap piinik ulapputeqarneq — „silarsuarmi matumani isumakuluutit pisuussutillu nakutitsisarnerisa“ — Guutimik pallorfiginninnermiit allamut sangussutigisinnaavaat. (Matthæusi 13:22) Apustili Paulusi ima allappoq: „Inuit pisuunngorumasut usserneqarlutillu napitinneqartarput ueqqivigisarlugillu kajungerfigiligarpassuatik sianiitsuliornerusut ajoqutaasullu, inunnut aseruutaasut tammartitsisullu.“ (1 Timotheusi 6:9) Ajoqersukkani ’napiaaniummit’ tamatumannga napitinnaveersaarniassammata Jiisusip eqqaasippai taakkua Ataataata qilammiusup nalunngikkaa tamakku tamaasa pisariaqartikkaat. Guutip isumagissavai ’qilaap timmiaanik’ isumaginninnermisut. (Matthæusi 6:26, 32) Isumakuluutinit artorsartitaanaveersaarlutik pisariaqartitatik matussuserniarlugit sapinngisaminnik iliuuseqartariaqarput, taavalu isumalluarlutik pisariaqartitatik Jehovamut isumagisassaanngortillugit. — Filippimiut 4:6, 7.

Jiisusi oqarami ’aqagussaq nammineq piminik isumakuluutissaqassasoq’ isumaqaannarpoq aqagu qanoq pisoqarsinnaaneranik pisariaqanngitsumik isumakuluuteqarneq ullumikkut ajornartorsiutitsinnut ilasaataatissanngikkipput. Biibilimik nutsikkami allami Jiisusip oqaasii ima nutserneqarput: „Aqagussaq isumakuluutigeqinasiuk; aqagussaq nammineq piminik isumakuluutissaqassaaq. Pisariaqanngilaq ullormut eqqasuutit amerlisarnissaat.“ — Matthæusi 6:34, Today’s English Version.

„Naalagaaffiit tikiulli“

Aqagussaq pillugu pisariaqanngitsumik isumakuluuteqannginneq aqagussamillu soqutiginninngilluinnarneq assigiinngitsorujussuupput. Jiisusip ajoqersukkani aqagussamik soqutiginninngeqqunagit kajumissaanngisaannarpai. Kajumissaarpaali siunissamik soqutigisaqaqqullugit. Maannakkorpiaq pisariaqartitamik matussuserneqarnissaat — ullormut inuussutissaqarnissartik — qinnutigilluarsinnaavaat. Qinnutigeqqaartussaavaalli siunissami pisussat — Guutip naalagaaffiata tikiunnissaa, aamma Guutip piumasaata nunami pinissaa. — Matthæusi 6:9-11.

Inuit Noap nalaani inuusut assigissanngilagut. Taakkua „nerillutik imerlutillu nuliartaarlutillu uinitsitsisarput“, tamakkulu ulapputigingaaramikkit qanoq pisoqalernera ’paasinngitsoorpaat’. Tamanna qanoq kinguneqarpa? ’Ulersuaq nalliuppoq tamaasalu nungutillugit.’ (Matthæusi 24:36-42) Apustili Petrusip pisimasuvik taanna innersuussutigaa aqagussaq eqqarsaatigalugu inuusariaqarnitsinnik eqqaasinniarluta. Ima allappoq: „Tamakku tamarmik suujunnaartussaammata taava tamatigut illernartuullusilu Guutimillu mianerinnillusi inuusariaqarpusi, Guutip ullussaata nalliunnissaa utaqqillugu.“ — 2 Petrusi 3:5-7, 11, 12.

„Qilammi katersigitsi erlinnartuutinik“

Jehovap ullussaa ’eqqarsaatigiuartigu’. Piffissatta, nukitta, aningaasaatitta piginnaanittalu qanoq atornerinut sunniuteqangaassaaq. Nunap pii — inuussutissaagaluarpata nuannaarniutaagaluarpataluunniit — ima ulapputigitigissanngilagut iliuutsinut ’Guutimik mianerinninnermik’ ersersitsisunut piffissaqalaaginnarluta. Ullumiinnaq kisiat pingaartikkaanni immaqa naatsorsuutigineqartarpoq ingerlaannaq angusaqassalluni, ajunngitsorsialli pitsaanerpaajugaluarunilluunniit tammartussaapput. Jiisusi oqarpoq nunami katersinermit ’qilammi erlinnartuutinik katersineq’ silatusaarnerungaartoq. — Matthæusi 6:19, 20.

 Jiisusip tamanna angut siunissamut pilersaaruterpassualik pillugu assersuusiamini erseqqissarpaa. Pilersaarutaali Guutimik eqqarsaatiginninnermik ilaqanngillat. Angut narsaatiminit pissarsilluarsimavoq. Aalajangerpoq quini isaterlugit anginernik sananiarluni eqqasuuteqarani nerillunilu imerlunilu nuannaarlunilu inuuniassagami. Tamanna ajorpa? Suliami inerititai suli inuulluutiginagit toquvoq. Ajornerusoqarporli. Guutimut ajunngitsumik attaveqalerniarluni iliuuseqarsimanngilaq. Jiisusi ima inerniliivoq: „Taama pisarpoq pisuussutinik katersisoq Guutimili pisuujunani.“ — Lukasi 12:15-21; Ussatit 19:21.

Illit qanoq iliorsinnaavit?

Angutip Jiisusip uani oqaluttuarisaata kukkussutigisaatut kukkussuteqarniaqinak. Guutip siunissamut siunertaa suunersoq paasiniaruk, inuuninnilu qitiutillugu. Guutip qanoq iliorniarnerminik inuit arajutsisissimanngilai. Pruffiiti Amosi ima allappoq: „Guutimi [Jehova] qanoq iliortarinngilaq pilersaarutini kiffaminut pruffiitinut saqqummerseqqaartinnagit.“ (Amosi 3:7) Jehovallu pruffiitimigut saqqummersittagai Biibilip, taassuma oqaasiata isumassarsiarititaasup, atuarneratigut paasisaqarfigisinnaavatit. — 2 Timotheusi 3:16, 17.

Biibilimi ersersinneqarpoq siunissami qaninnerpaami nunarsuarmut tamarmut aatsaat taama sunniuteqartigisumik pisoqarumaartoq. Jiisusi ima oqarpoq: „Taamaanneranimi naalliunnartoqangaassaaq silarsuup pileqqaarneraniit maannamut asseqanngitsumik.“ (Matthæusi 24:21) Inuup kialuunniit pinngitsoortissinnaanngilaa. Pallorfiginnittulli ilumoortut pisussamik tamatuminnga pinngitsoortitsinissamik kissaateqarnissamut pissutissaqanngillat. Sooq? Nunarsuarmi ajussutsimik suujunnaarsitsisussaammat aallarniutaasussaallunilu ’qilaap nutaap nunallu nutaap’, qilammi naalakkersuisut nutaat nunamilu inuiaat nutaat, atuutilernissaannut. Silarsuassami nutaami Guutip inuit ’qullii tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq’. — Saqqummersitat 21:1-4.

Taamatut pisoqarnissaa Biibilimi qanoq oqaatigineqarnersoq misissussallugu silatusaarnerussanngila? Taamaaliornissannut ikiortariaqarpit? Taamaappat Jehovap Nalunaajaasuinut ikioqqugit. Imaluunniit atuagassiamik matumannga saqqummersitsisunut allagit. Ullumiinnaq eqqarsaatigalugu inuussanngilatit, aammali aqagussaq nuanningaartussaq eqqarsaatigalugu. (w07 10/15-E)

[Qupp. 7-mi assiliartat]

„Aqagussaq isumakuluutigeqinasiuk; aqagussaq nammineq piminik isumakuluutissaqassaaq“