Jehova takkutsinniitittuartariaqarparput

„[Jehova] takkunniitittuaannarpara.“ — TUSSIAAT 16:8.

1. Oqaluttuat Biibilimiittut uagutsinnut qanoq sunniuteqarsinnaappat?

JEHOVAP inunnik qanoq isumassuisimaneranik oqaluttuat nuannersut taassuma oqaasiani allanneqarsimasumiipput. Guutip siunertaanik naammassinneqataasimasorpassuit Biibilimi oqaluttuarineqarput. Soorunami taakkua oqaaserisaat iliuuserisimasaallu Biibilimi oqaluttuarineqanngillat uagut taakkuninnga nuannaarutiginninnissarput piinnarlugu. Aammali oqaluttuat tamakku Guutimut qanillissutigisinnaavavut. — Jaaku 4:8.

2, 3. Tussiaat 16:8-mi allassimasut qanoq paasisariaqarpat?

² Inuit Biibilimi oqaluttuarineqartut ilisimaneqarluartut, soorlu Aaperaat, Sara, Mosesi, Ruthi, Daavi, Esteri apustililu Paulusi, tamatta ilinniarfigilluarsinnaavavut. Aammattaarli inuit nuimannginnerusut pillugit oqaluttuat iluaqutigisinnaavavut. Oqaluttuanik Biibilimiittunik eqqarsaatiginneqqissaartarnerput tussiaasiortup oqaasiinut ukununnga naapertuuttumik iliuuseqarnissamut iluaqutigisinnaavarput: „[Jehova] takkunniitittuaannarpara, taanna talerpimma tungaaniippoq, patajalernavianngilangalu.“ (Tussiaat 16:8) Oqaatsit taakku qanoq paasisariaqarpat?

³ Sakkutuup amerlanertigut pannani talerpimminik tigumiartarpaa taamaalillunilu talerpiata tungaa eqqornaveeqqummit saamimminik tigummiaanit illersorneqartarnani. Ikinngutaasorli talerpiata tungaani akiuuppat illersorneqassaaq. Uagut Jehova eqqarsaatigiuartarutsigu piumasaatullu iliortarutta taassuma illersussavaatigut. Taamaattumik misissoriartigu oqaluttuanik Biibilimiittunik eqqarsaatiginneqqissaarneq qanoq uppernitsinnut nakussatsissutaasinnaanersoq ’Jehova takkutsinniitittuarsinnaaniassagatsigu’.

Jehovap qinnutivut tusartarpai

4. Oqaluttuaq Biibilimiittoq suna Guutip qinnutinik tusartarneranik ersersitsiva?

⁴ Jehova takkutsinniitittuarutsigu qinnutivut tusartassavai. (Tussiaat 65:3; 66:19) Aaperaap kiffaanut utoqqaanersamut Eliezeriugunartumut pisuni tamanna erserpoq. Aaperaap taanna Aram-Naharajimimut aallartippaa Iisaaq Guutimik mianerinnittumik nuliassarsiuutsinniarlugu. Eliezerip Guuti qinnuigaa siulersoqqulluni, Rebekkallu qatigattuujutini immimmagit tamanna Guutip siulersuineratut isigaa. Eliezerip qamannga pisumik qinnutini pissutigalugu arnaq Iisaap asasamisut nuliartaarisaa nanivaa. (1 Mosesi 24:12-14, 67) Ilumoorpoq Aaperaap kiffaa immikkut ittumik suliassinneqartoq. Kisianni uaguttaaq Jehovap qinnutitsinnik tusartarneranik taassumatulli qularutiginninngitsigisariaqarpugut, ilaa?

5. Sooq oqartoqarsinnaava naakkaluamik nipaqanngikkaluamillu Jehovamut qinuneq sunniuteqangaarsinnaasoq?

⁵ Ilaannikkut pisariaqarsinnaavoq Guutimut ikioqqulluni qinupallattarnissaq. Ilaanni Perserit kunngiata Artaxerxesip malugaa immitsisuni Nehemia nikallungasoq. Kunngip taanna ima aperaa: „Suna kissaatigaajuk?“ Taava Nehemia ’qilaap Guutianut qinuvoq’. Taassuma nipaatsumik Guutimut qinnutaa takisimanavianngilaq. Taamaakkaluartorli Guutip tusarpaa, Nehemiammi kunngimit tapersersorneqarluni Jerusalemip qarmarsui qarmaqqippai. (Atuaruk Nehemia 2:1-8.) Aap, naakkaluamik nipaqanngikkaluamillu Jehovamut qinuneq sunniuteqangaarsinnaavoq.

6, 7. (a) Epafrasi qinunermut tunngatillugu qanoq maligassiuiva? (b) Sooq allanik qinnussisariaqarpugut?

⁶ Kajumissaarneqarpugut ’qinnuteqatigiittaqqulluta’, aamma qinnutitta tusarneqarsimanerat tamatigut ingerlaannaq uppernarsisanngikkaluarlutigu. (Jaaku 5:16) Epafrasip, ’unneqqarilluni Kristusimut kiffaasup’, uppeqatini qamannga pisumik qinnuttarpai. Paulusi Romamit ima allappoq: „Epafrasip nunaqqatissi [Kolossemiup], Kristusi-Jiisusip kiffaata inuulluaqquaasi. Taassuma qinnutimini ilungersuutigiuartarpaasi aalajaaqqullusi naammalluinnartooqqullusi qularutiginngilluinnaqqullugulu tamatigut Guutip piumasaata suunera qanoq ittutigulluunniit. Uanga uppernarsaasuusinnaavunga taanna  ilissi pillusi aammalu Laodikeamiittut Hierapolisimiittullu pillugit qanoq ilungersuuteqartartigisimasoq.“ — Kolossemiut 1:7; 4:12, 13.

⁷ Illoqarfiit Kolosse, Laodikea Hierapolisilu Asiaaqqami sumiiffimmi aalajangersimasumiipput imminnut qanillutik. Hierapolisimi kristumiut guutipilummik arnamik Kybelemik pallorfiginnittut akornanni inuupput, Laodikeami kristumiut pigisalerituut akornanni inuupput, Kolossemilu navianartorsiortitsisut tassaapput inuit isumaliutersuutaat. (Kolossemiut 2:8) Tupinnanngilaq Epafrasip Kolossemeersuusup uppertut illoqarfimmi tassaniittut qinnutimini ilungersuutigimmagit! Biibilimi oqaluttuarineqanngilaq Epafrasip qinnutai qanoq akineqarsimanersut, taassumali uppeqatini qinnukkunnaanngilai. Uaguttaaq qatanngutivut qinnukkunnaartariaqanngilavut. ’Susassarinngisatsinnut akuliukkusunngilagut’, kisianni immaqa nalunngilarput ilaquttatta ikinngutittaluunniit ilaat uppernikkut sakkortuumik misilinneqartoq. (1 Petrusi 4:15) Taava pissusissamisuussaaq nammineq qinnutitsinni taassuminnga qinnussinissaq! Paulusip allat qinnutaat iluaqutigai, taamatuttaaq uagut qinnutivut iluaqutaangaarsinnaapput. — 2 Korinthimiut 1:10, 11.

8. (a) Qanoq ililluta nalunngilarput utoqqaanertat Efesosimeersut qinuneq pingaartingaaraat? (b) Qinunermut qanoq isiginnittaaseqartariaqarpugut?

⁸ Guutimut qinusinnaanermik immikkut pisinnaatitaaffimmik qujamasuutiginnittutut allanit isigineqarpugut? Paulusip utoqqaanertat Efesosimeersut naapeqatigigamigit „seeqqummerpoq qinoqatigalugillu“. Taava „tamarmik qissaserput, Paulusilu qungasiagut eqippaat kunillugulu. Anniaatiginerusaat tassaavoq oqarmat takoqqinnaveeritsik“. (Apustilit Suliaat 20:36-38) Utoqqaanertat taakkua aqqi nalugaluarpavut, erseqqipporli qinuneq pingaartingaaraat. Uaguttaaq Guutimut qinusinnaanermik immikkut pisinnaatitaaffimmik pingaartitsisariaqarpugut ’upperluarlutalu assavut qullartariaqarlugit’, qularutiginagu Ataatatta qilammiusup tusarumaaraatigut. — 1 Timotheusi 2:8.

Guutimut naalalluinnartariaqarpugut

9, 10. (a) Selofkadip panii qanoq maligassiuilluarpat? (b) Selofkadip paniisa naalannerat kristumiup aappaqanngitsup aappariinnermut isiginnittaasianut qanoq sunniuteqarsinnaava?

⁹ Jehova eqqarsaatigiuartarutsigu tamanna taassumunnga naalannissamut iluaqutigissavarput, pilluaqquneqassaagullu. (5 Mosesi 28:13; 1 Samueli 15:22) Tassa naalannissamut piumassuseqartariaqarpugut. Eqqarsaatigeriakkit Selofkadip panii, uinikkut qatanngutigiit tallimat, Mosesip nalaani inuusut. Israelikkunni ileqquusut malillugit ataataasut nunaat kingornuttaqattaagassaq ernerminnut kingornutitittarpaat. Selofkadi erneqarnani toquvoq, Jehovallu isumagaa arnat tallimat taakku nunaat kingornuttaqattaagassaq tamakkerlugu pissagaat — ataatsimilli piumasaqaateqarpoq. Namminneq naggueqatiminneersunik aappartaartariaqarput, nunaat kingornuttaqattaagassaq Manassep kinguaaviniiginnarniassammat. — 4 Mosesi 27:1-8; 36:6-8.

¹⁰ Selofkadip paniisa upperaat Guuti naalakkunikku suut tamarmik ingerlalluarumaartut. Biibilimi ima allassimavoq: „Selofkadip panii [Jehovap] Mosesimut peqqusineratut iliorput. Makla, Tirsa, Hogla, Milka Noalu, Selofkadip panii, akkammik ernerinik uinipput. Manassemit Josefip erneranit naggueqartut ilaannik uinipput taamaalillunilu nuna pigisaat naggueqatigiinni arnat taakkua naggueqataanniiginnarluni.“ (4 Mosesi 36:10-12) Arnat taakkua Jehovap peqqusineratut iliorput. (Josva 17:3, 4) Aamma kristumiut aappaqanngitsut anersaakkut inersimalluartut qularinngilaat ingerlalluarumaarlutik ’Naalakkamiinnaq’ katinnermikkut Guuti naalakkunikku. — 1 Korinthimiut 7:39.

11, 12. Kalebip Guutimik tatiginninni qanoq ersersippaa?

 ¹¹ Jehova sutigut tamatigut naalattariaqarparput, soorlu Kalebi taamatut iliorsimasoq. (5 Mosesi 1:36) 1500-kkunni u.n.s. Israelikkut Egyptenimit aniguisitaanerata kingorna Mosesip angutit aqqaneq-marluk Kana’anip nunaanut alapernaarsuiartortippai, taakkuali ilaasa marluinnaat — Kalebip Josvallu — inuiaqatigiit kajumissaarpaat Jehovamik tatiginnilluinnaqqullugit nunamillu tamatuminnga tiguaaqqullugit. (4 Mosesi 14:6-9) Ukiut 40-t missiliorlugit tamatuma kingorna Josva Kalebilu suli inuupput uummatikkullu iluunngarlutik Jehovamut kiffartorlutik, Guutillu Josva Israelikkunnik nunamut neriorsuutigisamut siulersuinermut atorpaa. Alapernaarsuiartortitat uppinngitsut qulit Israelikkut ukiuni 40-ni inoqajuitsumi ingerlaarneranni toqusimagunarput. — 4 Mosesi 14:31-34.

¹² Kalebi inoqajuitsumi ingerlaarnermi aniguivoq taamaattumillu Josvamut ima oqarsinnaalluni: „[Jehova] Guutiga maleruaqqissaarpara.“ (Atuaruk Josva 14:6-9.) Kalebip, maanna 85-inik ukiullip, nuna qaqqalik Guutip imminut neriorsuutigisaa piumavaa, naak tamanna imminnut akeraasut pallittaalisalinnik illoqarferujussuallit najugarigaluaraat. — Josva 14:10-15.

13. Qanorluunniit misilinneqaraluarluta pilluaqquneqarumalluta susariaqarpugut?

¹³ Kalebip aalajaallunilu Guutimut naalattup pineqarsimaneratut uaguttaaq Jehovamit annertoqqusersorneqassaagut taanna ’maleruaqqissaarutsigu’. Ajornartorsiuteqaraluarluta ’Jehovamik maleruaaqqissaartarutta’ pilluaqquneqassaagut. Kalebilli pisimaneratut inuuneq tamaat taamaaliornissaq artornarsinnaavoq. Kunngip Salomop naalakkersuileqqaarami Jehova malippaa, nuliaasali uummataa allamut saatsippaat utoqqalimmat guutipilunnut kiffartortilerlugu, „ataatanilu Daavi assiginagu [Jehovamik] malinnilluartuujunnaarpoq“. (1 Kunngit 11:4-6) Taamaattumik qanorluunniit misilinneqaraluarutta qanortoq Guutimut naalalluinnartuaannarta taannalu takkutsinniitittuarlugu!

Jehova tatigiuartigu

14, 15. Guutimik tatiginninnissap qanoq pingaaruteqartiginera pillugu No’omimik oqaluttuami suna paasiviuk?

¹⁴ Ingammik siunissamik neriunanngitsutut isiginninnerput pissutigalugu nikallungagaangatta Guuti tatigisariaqarparput. Eqqarsaatigeriaruk No’omi utoqqalisimasoq, uillarlunilu ernerminik marlunnik toqusoorsimasoq. Moabimit Judamut uterami ima oqarpoq: „No’omimik [’inequnartumik imaluunniit inussiarnersumik’, q.a.i. *] taananga Maramik [’narrutsassimasumik’, q.a.i.] taasalerniarsinga Ajugaqanngitsup narrutsatsissimammanga. Peqangaarlungami maanngaanniit aallarpunga, suerutitillungali [Jehovap] maanga utertippaanga. Sooq taava No’omimik taasassavisinga uffa [Jehovap] pisuutillunga uppernarsaasoq, uffa Ajugaqanngitsup ajunaartikkaanga?“ — Ruthi 1:20, 21.

¹⁵ Aap, No’omi pilluaappoq, Ruthilli allagaanik atuaqqissaaraanni paasinarsisarpoq taanna Jehovamik tatiginnittuartoq. Aamma pissutsit taassuma atugai allanngorujussuarput! No’omip ukuaata Ruthip, aamma uillarnerusup, Boazi aappartaaraa ernertaarlutillu. No’omi meeqqamut taassumunnga arnarsianngorpoq, imalu oqaluttuarineqarpoq: „Arnat No’omip eqqaamiorisaasa nukappiaraq atserpaat oqarlutik: „No’omi erneqalerpoq!“ Obedimik atserpaat. Taassuma erneraa Isaji Daavip ataataa.“ (Ruthi 4:14-17) No’omi nunarsuarmi inuunermut makititaaguni paasissavaa Ruthi, aamma nunarsuarmi inuunermut makititaajumaartoq, Jiisusimut, Missiarsimut, siuaasanngorsimasoq. (Matthæusi 1:5, 6, 16) No’omitut nalusarparput ilungersunartorsioraangatta pissutsit qanoq kinguneqarumaarnersut. Taamaattumik Guuti tatigiuartigu, soorlumi Ussatit 3:5, 6-imi taama kajumissaarneqartugut: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“

Anersaamit illernartumit siulersorneqarneq

16. Itsaq Israelimi utoqqaanertat Guutip anersaavanit illernartumit qanoq ikiorneqarpat?

¹⁶ Jehova takkutsinniitittuarutsigu anersaani illernartoq iluaqutigalugu siulersussavaatigut. (Galatiamiut 5:16-18) Utoqqaanertat 70-it Mosesip ’inuiannit erloqisinneqarneranik’ taassuminnga ’nammaqatiginnittussatut’ toqqarneqartut Guutip anersaava pigaat. Eldadi Medadilu atiisigut taaneqartutuaapput, utoqqaanertalli taakkua tamarmik suliassaminnik anersaamit naammassinnissinnaalersinneqarput. (4 Mosesi 11:13-29) Qularnanngivissumik  taakku siornatigut toqqarneqarsimasut assigalugit angutaapput pikkorissut, Guutimik mianerinnittut, tatiginartut unneqqarissullu. (2 Mosesi 18:21) Aamma ullumikkut utoqqaanertat kristumiut taamatut pissuseqartarput.

17. Anersaaq illernartoq toqqup naapeqatigiittarfiup sananeqarnerani qanoq pingaaruteqarsimava?

¹⁷ Jehovap anersaava illernartoq toqqup naapeqatigiittarfiup inoqajuitsumi sananeqarnerani pingaaruteqangaarpoq. Jehovap Besal’eli toqqup naapeqatigiittarfiup sananeqarnerani pisortaasussatut toqqarpaa neriorsorlugulu ’ilumiulerumallugu Guutip anersaavanik, ilisimassusermik, silatussusermik suliassanillu tamanik paasisimasaqassutsimik’. (2 Mosesi 31:3-5) Besal’eli taassumalu ikiortaa Oholiabi suliassamik pissanganartumik tamatuminnga naammassinninnissamut angutinit ’paasisimasaqarluartunit’ ikiorneqarput. Aammattaaq inuiaqatigiinni ’tunisinissaminnut kajumittut’ kikkulluunniit tukkungaarlutik tunissuteqarnissaminnut Jehovap anersaavanit kajumissisinneqarput. (2 Mosesi 31:6; 35:5, 30-34) Ullumikkut Guutip kiffai anersaamit tamatumanngarpiaq Guutip naalagaaffiata soqutigisaanik siuarsaaniarlutik sapinngisaminnik iliuuseqarnissaminnut kajumissisinneqartarput. (Matthæusi 6:33) Imaassinnaavoq piginnaaneqarlutalu arlaannik pikkoriffeqartugut, Jehovalli ullumikkut innuttaminut suliassiissutigisaa naammassissagutsigu anersaaq illernartoq qinnutigisariaqarparput tamatumanngalu siulersortittariaqarluta. — Lukasi 11:13.

Katersaarsuit Jehovaannik mianerinninneq

18, 19. (a) Guutip anersaava illernartoq sumut iluaqutigaarput? (b) Simmiuup Annallu maligassiaat sumik ilinniarfigaagit?

¹⁸ Jehova takkutsinniitittuarniassagatsigu taassuminnga mianerinninnissamut anersaaq illernartoq iluaqutigisarparput. Guutip itsaq innuttai pillugit allassimasoqarpoq taakku Jehovap ’atia illernartikkumaaraat’ aamma taanna ’mianeriumaaraat’. (Esaja 29:23, 1990) Ukiuni hundredelinni siullerni ’upperluartut’, imaluunniit ’Guutimik mianerinnittut’ (NV), marluk, Simmiuut Annalu, Jerusalemimiipput. Marluullutik utoqqaapput. (Atuaruk Lukasi 2:25-38.) Simmiuup Missiarsi pillugu siulittuutit upperai ’Israelimullu tuppalliutissamik pisoqarnissaa utaqqisaralugu’. Guutip anersaamigut illernartukkut Simmiuut qularunnaarsippaa Missiarsi takoqqaartinnagu toqussanngitsoq. Taamatullu pisoqarpoq. Ukiumi 2-mi u.n.s. ullut ilaanni Jiisusi Mariamit Josefimillu, anaanaminit ataatarsiaminillu, naalaffimmukaanneqarpoq. Anersaap illernartup sunniineratigut Simmiuut Missiarsi pillugu siulittuivoq Mariallu aliasukkumaarnera siulittuutigalugu, Mariallu tamanna misigaa Jiisusi nappakkamut kikiattorneqarmat. Takorlooriarulli Simmiuut „[Jehovap] Tanitaa“ kissumissiukkamiuk qanoq nuannaartigisimassasoq. Aamma Simmiuut Guutimik mianerinninneq eqqarsaatigalugu ullumikkut Guutip kiffaanut maligassaalluangaarami!

¹⁹ Uillarnerup Annap, 84-inik ukiullip Guutimillu mianerinnittup, „naalaffik qimanngisaannarpaa“. Ulloq unnuarlu Jehova illernartumik kiffartorfigisarpaa „iisinnginniartarluni qinusarlunilu“. Aamma Anna najuuppoq naalungiarsuk Jiisusi naalaffimmukaanneqarmat. Missiarsiusussaq takugamiuk qujamasoqaaq. Aap, „Guuti unnersiutigaa meerarlu pillugu Jerusalemip aniguisitaanissaanik utaqqisunut tamanut oqaaseqarluni“. Anna misigaaq nutaarsiassaq nuannersoq allanut oqaluttuarisariaqarlugu! Kristumiut maanna utoqqalisimasut Jehovap nalunaajaasuisa ilaattut taassumunnga kiffartornissamut utoqqaavallaalertoqanngisaannarnera Simmiuutut Annatullu nuannaarutigalugulu qujamasuutigaat.

20. Qanoq utoqqaatiginerput apeqqutaatinnagu susariaqarpugut, aamma sooq?

²⁰ Qanoq utoqqaatiginerput apeqqutaatinnagu Jehova takkutsinniitittuartariaqarparput. Taava taassuma kunngeqarfia tupinnartuliaalu pillugit allat oqaluttuunniarlugit maniguulluta iliuuserisavut pilluaqqussavai. (Tussiaat 71:17, 18; 145:10-13) Jehovali ataqqissagutsigu pissuserineqartussat taassuma iluarisai pissuserisariaqarpavut. Oqaluttuat Biibilimiittut misissornerugutsigit pissuserineqartussat tamakku pillugit sunik paasisaqarsinnaavugut?

[Quppernerup ataani ilanngussaq]

Qanoq akissavit?

• Qanoq ililluta nalunngilarput Jehova qinnutinik tusartartoq?

• Sooq Guutimut naalalluinnartariaqarpugut?

• Sooq nikallungagaluaraangattaluunniit Jehova tatigiuartariaqarparput?

• Guutip anersaava illernartoq innuttaanut qanoq iluaqutaava?

[Atuaqqissaarnermi apeqqutit]

[Qupp. 9-mi assiliartaq]

Nehemiap Jehovamut qinnutaa sunniuteqarluarpoq