Kristusip najuunnera illit qanoq paasiviuk?
Kristusip najuunnera illit qanoq paasiviuk?
„Oqarfigitigut qaqugu tamanna pissasoq sunalu nalunaaqutaassasoq illit tikiunnissannut [najuunnissannut, NV] silarsuullu naggatissaanut.“ — MATTHÆUSI 24:3.
1. Apustilit Jiisusi soqutiginartumik sumik qinnuigaat?
UKIUT 2000-ingajaat matuma siorna Jiisusip apustiliisa ilaasa sisamat ilaanni Uuliap Qaqqaani Naalagartik kisimeeqatigigamikku oqaluttuuteqqullutik qinnuigaat. Ima oqarput: „Oqarfigitigut qaqugu tamanna pissasoq sunalu nalunaaqutaassasoq illit tikiunnissannut [najuunnissannut, NV] silarsuullu naggatissaanut [pissutsillu aaqqissuussaanerata naggataatungaanut, NV].“ (Matthæusi 24:3) Uani apustilit oqariartaatsit soqutiginartut marluk atorpaat, tassa ’illit najuunnissat’ aamma ’pissutsit aaqqissuussaanerata naggataatungaa’. Oqariartaatsit taakku qanoq paasisariaqarpat?
2. Grækerit oqaasiat synteʹleia Biibilimi kalaallisuumi amerlanertigut ’naggatissaq’-mik nutserneqartartoq qanoq isumaqarpa?
2 Siullermik oqariartaatsit aappaat sammeriartigu. Biibilimi kalaallisuumi grækerit oqaasii marluk (synteʹleia aamma teʹlos) amerlanertigut ’naggatissaq’-mik nutserneqartarput. Grækerilli oqaasii taakku marluk isumamikkut assigiinngissuteqarput. Oqaaseq synteʹleia Matthæusi 24:3-mi atorneqartoq isumaqarpoq ’naggataatungaa’, oqaaserlu teʹlos isumaqarpoq ’naggataa’. Isumamikkut assigiinnginnerat erseqqissarneqarsinnaavoq naalagaaffilersaarfimmi oqalugiaat assersuutigalugu. Oqalugiaatip ’naggataatungaa’ tassaavoq immikkoortoq kingulleq, oqalugiartup piffissamineq atorlugu tusarnaartunut oqalugiaatimini sammineqartunik eqqaasitsinera taavalu tamatuminnga taakkua inuunerminni qanoq atuisinnaanerannik ersersitsinera. Oqalugiaatip ’naggataa’, imaluunniit ’naanera’, tassaavoq uisorerneq oqalugiartup oqaluttarfimmit aqqarfia. Taamatuttaaq ’pissutsit aaqqissuussaanerata naggataatungaa’ tassaavoq ’pissutsit aaqqissuussaanerata’ naggataatungaani piffissaq killilik naggataa ilanngullugu.
3. Kristusip najuunnerata ingerlanerani pisut ilaannik eqqaasaqarit.
3 Taavami apustilit oqaluttuuteqqullutik qinnutaanni oqaaseq ’najuunnissaq’? Grækerit oqaasiannit parousiʹa-mit nutserneqarpoq. * Jiisusi 1914-imi qilammi kunnginngortinneqarmat Kristusip parousiʹa-a, imaluunniit najuunnera, aallartippoq ingerlaannassallunilu ’naalliunnartussarsuaq’, piffissaq ajortut nungutinniarlugit tikiuffissaa, ilanngullugu. (Matthæusi 24:21) Tassa imaappoq: ’Kristusip najuunnerata’ ingerlanerani pisut ilaatigut tassaapput pissutsit aaqqissuussaanerata ajortup maanna atuuttup ’ulluisa kingulliit’ ingerlanerat, qinikkat katersorneqarnerat taakkualu toquniariartut qilammi inuunermut makititaasarnerat. (2 Timotheusi 3:1; 1 Korinthimiut 15:23; 1 Thessalonikamiut 4:15-17; 2 Thessalonikamiut 2:1) Oqartoqarsinnaavoq piffissap killiliusup ’pissutsit aaqqissuussaanerata naggataatungaajusup’ (synteʹleia-p) pineqarnerani piffissallu killiliusup Kristusip najuunneranik taaneqartup (parousiʹa-p) pineqarnerani piffissaq ataaseq pineqartoq.
Piffissaq killilik sivisunerusoq
4. Jiisusip najuuffia Noallu ullui qanoq assigiissuteqarpat?
4 Oqaatsip parousiʹa-p piffissamut killilimmut sivisunerusumut atornera Jiisusip ’tikiuffissani’ imaluunniit ’najuunnissani’ (NV) pillugu oqaasiinut naapertuuppoq. (Atuaruk Matthæusi 24:37-39.) Maluginiariaruk Jiisusip najuunnissani piffissamut sivikikujuttumut ulersuaqarfiusumut assersuutinngikkaa. Najuunnissanili Ulersuup tungaanut piffissamut killilimmut sivisunerungaartumut assersuuppaa. Piffissami killilimmi tamatumani Ulersuarlu tikivillugu Noa umiarsualiorlunilu inunnut oqaluussisarpoq. Piffissaq killilik tamanna ukiunik qulikkuutaanik arlalinnik sivisussuseqarpoq. Kristusip najuunneranut tunngatillugu aamma taamaappoq. Taamaalinerani pisut tassaapput annikilliornartorsuup tungaanut pisut annikilliornartorsuaq ilanngullugu. — 2 Thessalonikamiut 1:6-9.
5. Saqqummersitat kapitali 6-imi oqaluttuarineqartumi qanoq ersersinneqarpa Jiisusip najuunnera tassaasoq piffissaq killilik sivisunerusoq?
5 Biibilimi siulittuutini allani aamma paasinarsivoq Kristusip najuunnera tassaasoq piffissaq killilik sivisunnerusoq tassaaginnarnanilu uisorerneq, ajortut piuneerunniarlugit tikiuffissaa. Saqqummersitani Jiisusi hestimik qaqortumik hestersutut niaqoruserneqartutullu allaatigineqarpoq. (Atuaruk Saqqummersitat 6:1-8.) Jiisusi 1914-imi kunngisut niaqoruserneqareerami hesterluni „aallarpoq ajugaajuarlunilu [ajugaalluinnassallunilu, NV]“. Oqaluttuami ersersinneqarpoq taanna hestinik allanik qalipaatilinnik hestersunit arlalinnit malinneqartoq. Taakku sorsunnernut, kaannersuarnut nappaassuarnullu siulittuutitut assersuutaapput, taakkulu tamarmik piffissami killilimmi sivisuumi ’ullunik kingullernik’ taaneqartumi nalliutereerput. Uagut nalitsinni siulittuutip tamatuma eqquunnera isigaarput.
6. Kristusip najuunneranut tunngatillugu suup paasinissaanut Saqqummersitat kapitali 12 iluaqutigaarput?
6 Saqqummersitat kapitali 12-imi allaatigineqarpoq Guutip naalagaaffia qilammi pilersinneqarmat qanoq aamma pisoqarnersoq. Qilammi takussaanngitsumi sorsunneq oqaluttuarineqarpoq. Mikaeli — tassa Jiisusi Kristusi qilammi inissisimaffimminiittoq — taassumalu inngilii Diaavulumut taassumalu inngiliinut akersuupput. Akersuunnerup tamatuma kingunerisaanik Diaavulu taassumalu inngilii nunamut iginneqarput. Oqaluttuarineqarpoq taamaalinerani Diaavulu kamattorsuusoq „piffissakissutsi nalunnginnamiuk“. (Atuaruk Saqqummersitat 12:7-12.) Taamaattumik paasinarluinnarpoq sooq Kristusip naalagaaffiata qilammi pilersinneqarnera malitseqartoq piffissamik killilimmik, nunarsuup tassanilu inuusut eqqanartorsiornerannik sakkortunerujartuinnartumik.
7. Tussiaat 2-mi suna pineqarpa, periarfissarlu suna tassani eqqaaneqarpa?
7 Jiisusip Qaqqami Zionimi qilammiittumi kunngisut ivertinneqarnera aamma Tussiaat 2-mi siulittuutitut eqqaaneqarpoq. (Atuaruk Tussiaat 2:5-9; 110:1, 2.) Tussiaammi tamatumani aamma ersersinneqarpoq nunarsuarmi naalakkersuisut taakkualu innuttaat Kristusip aqutsineranut naalatsigitilernissaminnut piffissami killilimmi periarfissinneqartut. ’Silatusaalernissaminnik’ aamma ’siunnersuutinik akuersaarnissaminnik [perorsartinnissaminnik, NV]’ oqaaqqissaarneqarput. Aap, piffissami killilimmi tamatumani „pilluarpoq kinaluunniit taassumani [Guutimi] qimarnguffissarsiortoq“ Jehovamut taassumalu kunngianut ivertitaasumut kiffartornermigut. Tassa Kristusip kunngisut pissaaneqarluni najuunnerani nunarsuarmi „kunngit“ taakkualu innuttaat pisariaqartumik allannguinissaminnut periarfissaqarput. — Tussiaat 2:10-12.
Nalunaaqummik takunninneq paasinninnerlu pillugu
8, 9. Kristusip najuunneranut nalunaaqut kikkut takujumaarlugulu isumaa paasiumaarpaat?
8 Farisiiarit aperimmanni Guutip naalagaaffia qaqugu tikiutissanersoq Jiisusip akivai, ilimagisaattut pinnani, ’takussaalluni tikiutissanngitsoq’. (Lukasi 17:20, 21) Tikiuppat uppertuunngitsut tamanna paasissanngilaat. Qanoq ilillutik taamaaliorsinnaassagaluaramik? Jiisusimi kunngissamissut akuerinngilaalluunniit. Taava Kristusip najuunneranut nalunaaqut kikkut takujumaarlugulu isumaa paasiumaarpaat?
9 Jiisusi oqarpoq ajoqersukkami nalunaaqut innaallannertut ’qilaap killinganiit killinganut qaammaallattarnertut’ erseqqaritsigisutut takujumaaraat. (Atuaruk Lukasi 17:24-29.) Maluginiarnarpoq Jiisusip aamma Matthæusi 24:23-27-mi assersuusiaq tamanna atoraa najuunnissaminullu nalunaaqummut atassuserlugu.
Kinguaariissoqatigiit nalunaaqummik takunnittut
10, 11. (a) Matthæusi 24:34-mi oqariartaaseq „kinguaariissoqatigiit uku“ (NV) siornatigut qanoq nassuiarneqarpa? (b) Oqariartaaseq tamanna Jiisusip ajoqersugaasa qularnanngitsumik qanoq paasisimassavaat?
10 Atuagassiami matumani siornatigut nassuiarneqarpoq Matthæusi 24:34-mi oqariartaaseq „eqqarleriit [kinguaariissoqatigiit, NV] uku“ ukiuni hundredelinni siullerni isumaqartoq „juutit taamani inuusut uppinngitsut“. * Nassuiaat tamanna taamani naleqquppasippoq, tassami Biibilimi allassimaffinni allani Jiisusip oqaaseq „kinguaariissoqatigiit“ atoraangamiuk tamatigut ajortumik isumaqartittarmagu amerlanertigullu oqaaseq soorlu „ajortut“ tamatumunnga tunngatillugu atortarlugu. (Matthæusi 12:39; 17:17; Markusi 8:38) Taamaattumik taamani nassuiarneqarpoq siulittuutip ullumikkut eqquunneranut tunngatillugu Jiisusip pigai inuit „kinguaariissoqatigiit“ ajortut uppinngitsut, pisunik „pissutsit aaqqissuussaanerata naggataatungaanut“ (synteʹleia-mut) ilisarnaataasunik aamma ’naggataanik’ (teʹlos-imik) takunnikkumaartut.
11 Ilumoorpoq Jiisusip oqaaseq „kinguaariissoqatigiit“ ajortumik isumaqartillugu atoraangamiuk inuit ajortut nalimini inuusut oqaluffigisarai pisaraaluunniit. Kisianni oqaaserisaanut Matthæusi 24:34-mi allassimasumut tunngatillugu aamma taamaattariaqarpa? Eqqaamavarput „taakkuinnaagamik“ Jiisusip ajoqersugaasa ilaat sisamat taassumunnga saaffiginnittut. (Matthæusi 24:3) Jiisusip „kinguaariissoqatigiit uku“ pillugit oqaluummatik oqaatsini ajortumik isumaqartinngimmagit qularnanngitsumik imatut paasisimassavaat: namminneq ajoqersukkallu allat ’kinguaariissoqatigiinnut’ „tamakku tamaasa pereersinnagit“ nungussanngitsunut ilaallutik.
12. Versit ataqatigiinnerini suna ersersinneqarpa Jiisusip oqariartaaseq „kinguaariissoqatigiit uku“ atorlugu inuit pisai pillugit?
12 Qanoq ililluta taama isummerpugut? Versit ataqatigiinnerinik misissueqqissaarnikkut. Matthæusi 24:32, 33-mi allassimasutut Jiisusi ima oqarpoq: „Assersuut una figeneqummit ilinniarsiuk: Avalequtai isseqaleraangata pilutanillutillu nalusanngilarsi aasaq qanillisoq. Taamatuttaaq ilissi tamakku tamaasa takulerussigit ilisimassavarsi taanna tikiutilivissoq.“ (Naleqqiuguk Markusi 13:28-30; Lukasi 21:30-32.) Taavalu Matthæusi 24:34-mi ima allassimavoq: „Ilumut oqarfigaassi: Tamakku tamaasa pereersinnagit eqqarleriit [kinguaariissoqatigiit, NV] uku nungussanngillat.“
13, 14. Sooq oqarsinnaavugut „kinguaariissoqatigiit“ Jiisusip pisai tassaasimassasut ajoqersugai?
13 Jiisusi oqarpoq ajoqersukkani, qanittukkut anersaamik illernartumik taninneqartussaasut, tassaajumaartut ’tamakkuninnga tamanik’ takunnikkunik isummersinnaasussat. Taamaattumik Jiisusi ajoqersukkat eqqarsaatigisimassavai ima oqarami: „Tamakku tamaasa pereersinnagit eqqarleriit [kinguaariissoqatigiit, NV] uku nungussanngillat.“
14 Uppinngitsut assiginagit Jiisusip ajoqersugaasa nalunaaqut takuinnarnagu aammali isumaa paasiumaarpaat. Nalunaaqutip immikkoortui assigiinngitsut ’ilinniarfigiumaarpaat’, aamma ’nalussanngilaat’ qanoq isumaqarnersut. Paasiumaarpaat „taanna tikiutilivissoq“. Naak juutit uppinngitsut kristumiullu tanitat uppertut Jiisusip oqaasiisa ukiuni hundredelinni siullerni killilimmik eqquunnerannik takunnittuugaluarlutik, taamani ajoqersugai tanitat kisimik pisunik ilinniarfiginnissinnaapput, tassa pisut isumaviannik paasinnissinnaapput.
15. (a) „Kinguaariissoqatigiit“ Jiisusip pisai ullumikkut kikkuuppat? (b) Sooq naatsorsorneqarsinnaanngila ’kinguaariissoqatigiit ukua’ piffissaq inuuffigisaat qanorpiaq sivisutigissanersoq? (Takuuk qupperneq 29-mi ungalusaq).
15 Ullumikkut anersaakkut ittunut tunngatillugu paasisimasaqanngitsut isumaqarput Jiisusip najuunneranut nalunaaqut malunnarpallaanngitsoq. Isumaqarput suut tamarmik taamaattuaannartut. (2 Petrusi 3:4) Kristusilli qatanngutaasa tanitat aalajaatsut, ullumikkut katersat Johannesitut ittut, nalunaaqut innaallannertut erseqqaritsigisutut takuaat, paasivaallu qanoq isumaqarnersoq. Tanitat taakku eqimattatut tassaapput ullumikkut „kinguaariissoqatigiit“ ataatsikkut inuusut „tamakku tamaasa pereersinnagit“ nungussanngitsut. * Taamaammat annikilliornartorsuaq siulittuutigineqartoq aallartippat Kristusip qatanngutaasa tanitat ilaat suli nunarsuarmi inuussagunarput.
„Eqqumagitsi“
16. Kristusip ajoqersugai tamarmik qanoq iliortariaqarpat?
16 Nalunaaqummilli takunninnerinnaq paasinninnerinnarlu naammanngillat. Jiisusi nangilluni ima oqarpoq: „Ilissinnut oqaaserisara una tamanut oqaaseraara: Eqqumagitsi!“ (Markusi 13:37) Tanitanut amerlangaartunulluunniit ilaagaluarutta tamanna uagutsinnut tamatsinnut ullumikkut inuusunut pingaaruteqarluinnarpoq. Jiisusip 1914-imi qilammi kunnginngortinneqarneraniit ukiut 90-init amerlanerusut qaangiupput. Piareersimasariaqarlutalu eqqumasariaqarpugut naak tamanna unamminiarnangaaraluartoq. Iluaqutigissavarpulli paasigutsigu Kristusi Guutip naalagaaffiani kunngisut pissaaneqarluni takussaanani najuuttoq imminullu akeraasut nungutinniarlugit qanittukkut ’piffissakkut ilimaginngisatsigut’ tikiutissasoq. — Lukasi 12:40.
17. Tamakkuninnga tamanik paasinninneq uagutsinnut qanoq sunniuteqartussaava, sunalu aalajangiusimasariaqarparput?
17 Kristusip najuunnerata isumaa paasigutsigu tamanna piffissap nukinginnassusianik misigisimanninnerulissutigissavarput. Nalunngilarput Jiisusi najuutilereerlunilu qilammi 1914-imiilli kunngisut takussaanani naalakkersuisoq. Qanittukkut ajortut nungutinniarlugit nunarsuarmilu tamarmi allanngornersuaqartitsiniarluni tikiutissaaq. Taamaattumik suliassamut Jiisusip siulittuutigisaanut peqataanissarput aatsaat taama aalajangiusimatigisariaqarparput, ima siulittuivoq: „Naalagaaffimmik iivangkiiliu [nutaarsiassaq nuannersoq, NV] taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq [teʹlos] nalliutissaaq.“ — Matthæusi 24:14. (w08 02/15-E)
[Quppernerup ataani ilanngussaq]
^ imm. 3 Oqaatsip parousiʹa-p isumaa paasinarpoq oqaatsit „najorassi“-p isumaata aamma „najuutinnginninni“-p imaluunniit „qimassimatillusi“-p isumaata assigiinnginnerannit. Apustilip Paulusip imminut tunngatillugu oqaatsit taakku atorpai Korinthimiunut allakkat aappaat 10:10, 11-mi aamma Filippimiunut allakkat 2:12-imi. Sukumiisumik nassuiarneqarpoq atuakkami Indsigt i Den Hellige Skrift-imi, atuagaq 2-mi, qupp. 430-33-mi. Jehovap Nalunaajaasuinit saqqummersinneqartoq.
^ imm. 10 Takuuk Vagttårnet 1. novembari 1995-imoortoq, qupp. 11-15, 19, 30, 31.
^ imm. 15 Imaakkunarpoq piffissaq killilik ’kinguaariissoqatigiit ukua’ inuuffigisaat aamma piffissaq killilik Saqqummersitani takorruukkami siullermi pineqartoq tassaasut piffissaq ataaseq. (Saqqummersitat 1:10–3:22) „Naalakkap ulluani“ takorruukkap tamatuma eqquunnera 1914-imiit tanitat aalajaatsut kingullersaata toqullunilu makitinneqarnissaata tungaanut pissaaq. — Takuuk atuagaq Åbenbaringen — Det store klimaks er nær!, qupp. 24, imm. 4. Jehovap Nalunaajaasuinit saqqummersinneqartoq.
Qanoq akissavit?
• Qanoq ililluta nalunngilarput Jiisusip najuunnera tassaasoq piffissaq killilik sivisunerusoq?
• Kikkut Jiisusip najuunneranut nalunaaqut takuaat paasillugulu qanoq isumaqarnersoq?
• Kinguaariissoqatigiit Matthæusi 24:34-mi eqqaaneqartut siulittuutip tamatuma ullumikkut eqquunnerani kikkuuppat?
• Sooq naatsorsorsinnaanngilarput ’kinguaariissoqatigiit ukua’ piffissaq inuuffigisaat qanorpiaq sivisutiginersoq?
[Atuaqqissaarnermi apeqqutit]
[Qupp. 29-mi ungalusaq]
’Kinguaariissoqatigiit ukua’ piffissaq inuuffigisaat qanoq sivisutigissanersoq naatsorsorneqarsinnaava?
Oqaaseq „kinguaariissoqatigiit“ inunnut assigiinngitsunik ukiulinnut piffissami killilimmi aalajangersimasumi ataatsikkut inuusunut atorneqartarpoq. Assersuutigalugu Mosesimik allakkat aappaanni 1:6-imi ima allassimasoqarpoq: „Josefi qatanngutaalu kinguaariissoqatigiillu taakku tamarmik toqoreersimapput.“ Josefi qatanngutaalu assigiinngitsunik ukioqarput, ataatsikkulli inuupput pisullu misigisaat assigiipput. ’Kinguaariissoqatigiinnut taakkununnga’ ilaapput Josefip qatanngutaasa ilaat taanna sioqqullugu inunngortut, taakkualu ilaat taassuma toqunerata kingorna suli inuupput. (1 Mosesi 50:24) ’Kinguaariissoqatigiinnut taakkununnga’ ilaasut allat, assersuutigalugu Benjamini, Josefip inunngornerata kingorna inunngorput immaqalu taassuma toqunerata kingorna suli inuullutik.
Tassa oqaaseq „kinguaariissoqatigiit“ atorneqaraangat piffissaq killilik, piffissaq „kinguaariissoqatigiit“ pineqartut inuuffigisaat, qanorpiaq sivisutiginersoq naatsorsorneqarsinnaanngilaq, oqaatigineqaannarsinnaallunili naaffeqarumaartoq sivisoorsuussanngitsorlu. Taamaammat imaanngilaq Matthæusi 24:34-mi Jiisusip oqariartaaseq „kinguaariissoqatigiit uku“ atoramiuk ’ullut kingulliit’ qaqugu naajumaarnerannik ajoqersukkani naatsorsuisinnaangortikkai. Aammami nangilluni Jiisusip erseqqissarpaa „ulloq taanna nalunaaquttap-akunneraluunniit“ ilisimassanngikkaat. — 2 Timotheusi 3:1; Matthæusi 24:36.
[Qupp. 26, 27-mi assiliartaq]
Jiisusi 1914-imi kunngisut niaqoruserneqareerami hesterluni „aallarpoq ajugaajuarlunilu [ajugaalluinnassallunilu, NV]“
[Qupp. 28-mi assiliartaq]
„Tamakku tamaasa pereersinnagit eqqarleriit [kinguaariissoqatigiit, NV] uku nungussanngillat“