Ullumiinnaq eqqarsaatigalugu inuusoqassava?

„SIUNISSAQ eqqarsaatiginngisaannarpara. Takkutissaqqaarpoq.“ Oqaatsit issuarneqakulasut taakku ilisimatuumit tusaamasaasumit Albert Einsteinimit oqaatigineqarsorineqarput. Inuit ilarpassui taamatupajaaq oqartarput. „Sooq siunissaq isumakuluutigineqassava?“ immaqa oqartarput. Imaluunniit ima oqartunik tusaasimavutit: „Inuunerit ingerlaqqittariaqarpoq.“ „Ullumiinnaq eqqarsaatigalugu inuugit.“ „Aqagussaq eqqarsaatiginagu.“

Soorunami isiginnittaaseq taamaattoq nutaajunngilaq. ’Neriit, imerit nuannaarlutillu. Sinneri soqutaanngillat.’ Oqaatsit taakku itsaq Epikuræerit oqaasinnaaralugit najoqqutarisimavaat. Paulusip nalaani inuusut ilaat taamatupajaaq isumaqarsimapput. „Nerillutalu erngutiinnarniarta, aqagu toqussagatta“ oqaasinnaaraat. (1 Korinthimiut 15:32) Isumaqarput uagut inuusugut inuuneq manna naatsoq kisiat pisassarigipput, taamaattumillu sapinngisamik pissarsiviginerpaanissaanik isuma illersorpaat.

Nunarsuarmi maani inuit millionillit massakkorpiaq inuunerminni atugarissaarneruniarnerat imaanngilluinnarpoq inuulluapilunniarlutik nuannaarniutinik noqqaassuteqartut. Inuppassuit atukkatik ajungaarmata inuuginnarniarlutik naalliuutinut atugarliuutinullu akiuuttuartariaqarput. Sooq siunissaq, „aqagussaq“ amerlanertigut ernumanangaartoq neriunartoqarpasinngitsorlu, eqqarsaatigissavaat?

Siunissamut pilersaarusiussaagut?

Allaat inuit atugarliorpallaaratik inuusut siunissamut pilersaarusiornissaq asuliinnaasorigajuppaat. „Sooq isumakuluttoqassava?“ aperisinnaapput, immaqalu pilersaarusiortartut pakatsisarnerat tunngavilersuutigisarlugu. Itsaq Ataataanerpaaq Jobi isumatsangaarpoq pilersaarutigigaluani ’sequmisitaammata’ ilaquttamilu siunissami pilluaatigisassaralui tamarmik sequmimmata. — Jobi 17:11; Oqaluussisartup oqaasii 9:11.

Skotlandimiup taalliortup Robert Burnsip atukkavut imaannaanngitsut assersuuppai terissap narsarmiup, Burnsip assallatserumminit terissap taassuma inaanik aseruisoornerata kingorna, atugaanut. Teriaq atukkani allanngorluinnarmata aniguiniarluni qimaarsuataarpoq. ’Aap, pisunik sunniuteqarfigisinnaanngilluinnakkatsinnik nalaataqarnerput pissutigalugu qasseriarluta soriarsinnaanata misigisimasannginnerpugut pilersaarutit allaat eqqarsaatigilluagaanerpaat iluatsinngitsoorluinnaraangata,’ Robert Burns eqqarsarpoq.

 Siunissamut pilersaarusiorneq iluaqutaanngila? Ilumoorpoq pilersaarusiorsimannginneq anorersuarujussuaraangat pinngortitamiluunniit ajunaarnersuaqaraangat alianarluinnartunik kinguneqarsinnaasoq. Soorunami kialuunniit anorersuarujussuaq Katrina unitsissinnaasimanngilaa. Pilersaarusiorluarnerunikkulli sillimareernikkullu anorersuarujussuup illoqarfimmut tassanilu innuttaasunut ajoqusiineri annikinnerpaatinneqarsinnaagaluarput, ilaa?

Illit qanoq isumaqarpit? Aqagussaq soqutiginngilluinnarlugu ullumiinnaq eqqarsaatigalugu inuuneq silatusaarnerua? Malugiuk apeqqut taanna pillugu allaaserisami tulliuttumi qanoq allassimanersoq.

[Qupp. 3-mi assiliartat]

„Neriit, imerit nuannaarlutillu. Sinneri soqutaanngillat“

[Qupp. 4-mi assiliartaq]

Anorersuarujussuup Katrinap ajoqusiinera sillimareernikkut pilersaarusiornikkullu killilersimaarneqarsinnaagaluarpa?

[Suminngaanneernera]

U.S. Coast Guard Digital