Aappariinnersi nuannaarutigiuk

„Ilisimassuseq atorlugu illu sananeqartarpoq, silaqassuseq [naliliisinnaaneq, NV] atorlugu tunngavilerneqartarpoq.“ — USSATIT 24:3.

1. Guutip ilisimassusia inummut siullermut tunngatillugu qanoq erserpa?

ATAATATTA qilammiusup ilisimasup nalunngilaa suut uagutsinnut iluaqutaanersut. Assersuutigalugu siunertami naammassineqarnissaa eqqarsaatigalugu Edenimi ’inuup kisimiinnera iluannginnerarpaa’. Siunertamut tamatumunnga ilaasoq pingaarutilik tassaavoq aappariit meerartaartussaanerat nunarsuarmillu ulikkaarisussaanerat. — 1 Mosesi 1:28; 2:18.

2. Aaqqissuussaq suna inuiaat iluaqutissaannut Jehovap pilersippaa?

² Jehova ima oqarpoq: „Ikiortissiussavara taassumunnga tulluartumik.“ Taava inuk siulleq itisuumik sinitsippaa, timaanillu naammalluinnartumit najungasumik tigusilluni, taannalu atorlugu arnaliorluni. Jehovap arnaq naammalluinnartoq taanna, Eva, Adamimukaammagu, angut taanna ima oqarpoq: „Tamanna tassa saaneq saanerma ilaa uinillu uinimma ilaa. Una arnamik taaneqassaaq angummit tigusaagami.“ Eva ilumut Adamimut naammaataavoq. Tamarmik immikkut immikkooruteqarput, marluullutillu naammalluinnartuupput Guutilu assilillugu pinngortitaallutik. Taamaalilluni Jehova katititseqqaarpoq. Adamip Evallu Guutip aaqqissuussaa ikioqatigiinnissaminnut iluaqutaasussaasoq akueriuminaatsinngilaat. — 1 Mosesi 1:27; 2:21-23.

3. Inuppassuit aappariinnermik tunissut qanoq pisarpaat, tamannalu apeqqutinik sunik pilersitsiva?

³ Ajoraluartumik ullumikkut silarsuaq pikitsitsiumatuujunermit  sunnerneqarluinnarsimavoq. Tamatuma kingunerisaanik ajornartorsiutaalersimasut Guutip pisuussutiginngilai. Inuppassuit aappariinneq Guutip tunissutigisaa asissortarpaat, aamma isumaqarput aaqqissuussaq tamanna pisoqaavallaartoq, pakatsisitsisartoq isumaqatigiinngissitsisartorlu. Aappariippassuit avittarnerat nalinginnaavoq, meerarpassuillu immaqa pissusissamisoortumik tunniusimaffigineqarnermik asaneqangaarnermillu misigitinneqanngitsoortarput; angajoqqaat allaat eqqisseqatigiinnissaq ataasiussuseqarnissarluunniit pillugit suleqatigiinnissaminnut akuersiinnarnissaminnullu piumassuseqanngitsut isumaqatigiinnginneranni meeqqat sakkugineqartarput. (2 Timotheusi 3:3) Ulluni ernumanartorsiorfiusuni makkunani aappariit nuannaarnertik qanoq ilillutik attatiinnarsinnaavaat? Akuersiinnarnissamut naleqqussaqatigiinnissamullu piumassuseqarneq aappariittuarnissamut qanoq pingaaruteqartigaa? Inuit ullumikkut inuusut aappariittut nuannaarnermik attassisimasut sumik ilinniarfigisinnaavavut?

Jehovap siunnersuutai malillugit iliortariaqarpugut

4. (a) Aappassarsiorneq pillugu Paulusi qanoq siunnersuiva? (b) Kristumiut naalattut Paulusip siunnersuutaa malinniarlugu qanoq iliortarpat?

⁴ Apustilip Paulusip kristumiuusup uillarnerit isumassarsiarititaasumik siunnersorpai uineqqinniarlutik aalajangerunik, taamaallaat „Naalakkami“ katittariaqartut. (1 Korinthimiut 7:39) Kristumiunut siornatigut Mosesip inatsisaanik malinnissimasunut tamanna nutaajunngilaq. Guutip Israelikkunnut inatsisaani inuiannut eqqaamiunut juutiunngitsunut katinnissaq erseqqissumik inerteqqutigineqarpoq. Jehovap tunngavilersuut najoqqutassiaminik sumiginnaanerup qanoq navianartigineranik ersersitsisoq ilannguppaa: „Ernitit [Israelikkuunngitsunit] uannik tunussitinneqaqqunagit guutit allat guutisiorfigilerlugit. Naalanngikkussi [Jehovap] kamaatingaarumaarpaasi tassuuguinnarlu nungutikkumaarlutit.“ (5 Mosesi 7:3, 4) Tamatumunnga tunngatillugu Jehovap nalunaajaasigisani ullumikkut inuusut sumik piumasaqarfigai? Tamanna erseqqippoq. Guutimut kiffaasoq taamaallaat „Naalakkami“, tassa uppeqammik tunniulluinnarsimasumik kuisissimasumillu, aappaninniarluni aalajangertariaqarpoq. Aappassamik toqqaaniaraanni Jehovap unnersuussutaanik maleruaanissaq silatusaarnerussaaq.

5. Jehovap aappariillu kristumiut katinnermi neriorsoqatigiinneq qanoq isigaat?

⁵ Katinnermi neriorsoqatigiinneq Guutip isaani illernartuuvoq. Aappariit siulliit innersuussutigalugit Guutip nammineq ernera, Jiisusi, ima oqarpoq: „Guutip ataqatigiilersitai inuup avissaartissanngilai.“ (Matthæusi 19:6) Tussiaasiortup neriorsuinerup qanoq pimooruttariaqartiginera pillugu ima eqqaasippaatigut: „Qujaniummik Guuti pilliiffiginiaruk naammassillugillu Qutsinnerussaartumut neriorsuutitit.“ (Tussiaat 50:14) Aappariinneq nuannaarutaangaarsinnaavoq, katinnermili neriorsuutigisat pimooruttariaqarput, aamma akisussaaffittaqarput. — 5 Mosesi 23:22.

6. Jeftap maligassiaa sumik ilinniarfigisinnaavarput?

⁶ Jefta, 1100-kkunni u.n.s. Israelimi eqqartuussisuusoq, pillugu oqaluttuaq eqqarsaatigeriaruk. Taanna Jehovamut ima neriorsuivoq: „Ammonikkut uanga assannut tunniukkukkit, taava Ammonikkut sorsuffigereerlugit ajornanga uterninni parsiarlunga siulliulluni illunnit anisoq illit [Jehova] pigissavat. Taanna ikikkagassatut pilliutigissavara.“ Mispamut uterami panimmi, qitornatuami, parsiaraani takugamiuk, Jefta neriorsuutimi unioqqutinnissaanut periarfissarsiorpa? Naagga. Ima oqarpoq: „[Jehova] neriorsuiffigisimavara, neriorsuutigalu unioqqutissinnaanngilara.“ (Eqqartuussisut 11:30, 31, 35) Jeftap Jehovamut neriorsuutini eqqortippaa, naak tamanna kinguaaqarsinnaajunnaarnerminik kingornussisussaarunnerminillu kinguneqaraluartoq. Jeftap neriorsuutaa katinnermi neriorsuummit allaaneruvoq, neriorsuutiminilli eqqortitsinermigut uiusunut nuliaasunullu kristumiunut maligassiuilluarpoq.

Aappariinnerup iluatsilluarnissaanut suut iluaqutaasarpat?

7. Katerngaat imminnut naleqqussarumallutik qanoq iliortariaqarpat?

⁷ Aappariippassuit aappassiariinnermik nalaa nuanningaartutut eqqaamasarpaat. Aappassaq ilinniarlugu nuanneqaaq! Aappassiariit ilagiinnerujartortillutik imminnut qaninnerujartuinnartarput. Sivikitsunnguamilli imaluunniit sivisunerusumik aappassiareereerlutik, imaluunniit aappassarsiuussinikkut, katikkaluarunik, uiusutut nuliaasutullu imminnut naleqqussartariaqarput. Uiusoq ima nassuerpoq: „Katerngaajulluta ajornartorsiutiginerpaasarput tassaavoq paasigatsigu kisimiikkallarnitsitut pissusilersorsinnaajunnaarluta. Piffissap ilaani ikinngutitta  ilaquttattalu tulluartumik attaveqarfiginissaat artornartipparput.“ Uiusup maanna ukiuni 30-ni aappaqarsimasup katereernermi kinguninngua paasivaa oqimaaqatigiissaarilluarsinnaajumalluni imminuinnaq eqqarsaatiginani aappani aamma eqqarsaatigisariaqarlugu. Qaaqqusissummut suliassiissummulluunniit akuersinnginnermini nuliani isumasioqqaartarpaa taavalu aalajangiisarluni, marluullutik soqutigisatik eqqarsaatigalugit. Pissutsini taama ittuni akuersiinnarnissamut innimittarnissamullu piumassuseqarnissaq iluaqutaassaaq. — Ussatit 13:10.

8, 9. (a) Sooq attaveqatigiilluarnissaq pingaaruteqarpa? (b) Sunut tunngatillugu naleqqussarsinnaanissaq pitsaassava, aamma sooq?

⁸ Pingaartumik aappariit assigiinngitsunik kultureqaraangata attaveqatigiilluarnissaq pisariaqartarpoq. Oqaloqatiginneriaatsit assigiinngissinnaapput. Maluginiarukku aappavit ilaquttani qanoq oqaloqatigisarnerai aappat paasilluarsinnaanerussavat. Ilaannikkut oqaatigineqartut pinnatik, kisianni qanoq oqaatigineqarnerat inuup eqqarsaataanik misigissusiinillu ilorlerpaanik paasinarsisitsisarpoq. Aamma oqaatigineqanngitsut ilinniarfigilluarneqarsinnaapput. (Ussatit 16:24; Kolossemiut 4:6) Aap, aappariinneq pilluarnartuussappat naliliisinnaanissaq pingaaruteqangaarpoq. — Atuaruk Ussatit 24:3.

⁹ Aappariippassuit paasisimavaat sunngiffimmi soqutigisanut tunngatillugu naleqqussarsinnaaneq pingaaruteqartoq. Katinngikkallarassi aappavit immaqa piffissangaatsiaq timersornermut soqutigisanulluunniit allanut atortarpaa. Maanna arlaatigut naleqqussaanissaq pissusissamisuussava? (1 Timotheusi 4:8) Taamatut aperinissaq aamma naleqquppoq ilaquttanut allanut piffissamik atuinermut tunngatillugu. Paasinarpoq aappariit anersaakkut ittunik sammisassanillu allanik ulapputeqaqatigiinnissaminnut piffissaqarnissartik pisariaqartikkaat. — Matthæusi 6:33.

10. Angajoqqaat taakkualu qitornaasa aappallit attaveqatigiilluarnerannut suna siuarsaataassava?

¹⁰ Angutip katikkaangami ataatani anaananilu qimattarpai, aamma arnamut tunngatillugu taamatut oqartoqarsinnaavoq. (Atuaruk 1 Mosesi 2:24.) Guutilli ataatamik anaanamillu ataqqinninnissamik peqqussutaata katereeraanni suli atuunnera eqqaamasariaqarpoq; taamaattumik katereeraluartut qularnanngitsumik tamarmik immikkut angajoqqaatik piffissaqarfigisassavaat. Angut ukiuni 25-ni aappaqarsimasoq ima maluginiagaqarpoq: „Ilaannikkut aappap kissaatigisai pisariaqartitaalu assigiinngitsut  angajoqqaat, qatanngutit sakillu kissaatigisaannut pisariaqartitaannullu naleqqussaruminaattarput. Suna pitsaanerpaassanersoq aalajangissagaangakku Mosesimik allakkani siullerni 2:24-mi allassimasut iluaqutigisarpakka. Ilaquttat ilaat allat ilumoorfigineqartariaqarput, aamma taakkununnga akisussaaffeqarpugut, versimili tamatumani ilikkarpara pingaarnerpaamik aappannut ilumoorfiginnittariaqarnera.“ Angajoqqaat kristumiut tamatuminnga paasinnittut qitornamik aappallit maanna ilaqutariiunerat, uiusullu ilaqutariinni siuttuunissamik akisussaaffeqarnera, ataqqissavaat.

11, 12. Sooq aappariit atuaqqissaaqatigiittarlutillu qinoqatigiittarnissaat pingaaruteqarpa?

¹¹ Aalajangersimasumik ilaqutariittut atuaqqissaaqatigiittarnissaq pingaaruteqarpoq. Tamanna ilaqutariippassuit kristumiut misilittagaannit erseqqissarneqarpoq. Immaqa taamatut atuaqatigiittalernissaq imaluunniit atuaqqissaaqatigiittuartarnissaq imaannaanngilaq. Ilaqutariinni ittuusoq ima nassuerpoq: „Piffissaq utertissinnaasuugutsigu pereersunillu allanngortitsisinnaasuugutta qulakkiissagaluarpara katerngaajunitsinniilli aalajangersimasumik ilaqutariittut atuaqqissaaqatigiittarnissarput.“ Ima nangippoq: „Atuaqqissaaqatigiinnitsinni sallusuissummik Biibilimeersumik soqutiginartumik paasisaqaraangatta nuliama nuannaarnera qiimmatsanneralu takullugu nuannertaqaaq.“

¹² Aamma uiusup nuliaasullu qinoqatigiittarnerat aappariinnerannut nakussatsissutaasarpoq. (Romamiut 12:12) Jehovamut pallorfiginninnermi ataasioqatigiikkaangamik, taassumunnga qanittumik attaveqarnerat aappariinnerannut nakussatsissutaasinnaavoq. (Jaaku 4:8) Uiusoq kristumiu tamatumunnga tunngatillugu ima oqarpoq: „Kukkussutit pillugit utoqqatsipallattaraanni kukkussutillu qinoqatigiinnermi eqqaasaraanni, ersersinneqartarpoq kukkulaarninnguilluunniit aapparmut ajuallaataasut ilumoorluni ajuusaarutigalugit.“ — Efesosimiut 6:18.

Aappariinnermi akuersiinnarnissamut piumassuseqarit

13. Paulusi aappariittut atoqatigiinneq pillugu qanoq siunnersuiva?

¹³ Kristumiut aappallit aappariittut attaveqatigiinnermut nikanarsaataasunik iliuuseqarnaveersaartariaqarput, soorlu iliuutsit ullutsinni silarsuarmi tiingasulerituffiulluinnartumi nalinginnaasut. Tamatumunnga tunngatillugu Paulusi ima siunnersuivoq: „Angutip nulii iliorfigiliuk taassumunnga iliuuserisariaqakkaminik arnallu uini taamatut. Nuliaq nammineq timiminut naalagaanngilaq, kisianni uia; taamatuttaaq uiusoq nammineq timiminut naalagaanngilaq, kisianni nulia.“ Taava Paulusi erseqqissumik ima unnersuussivoq: „Aappariittut atoqatigiinnissamut immissinnut itigartinniaqinasi isumaqatigiissutigisimanngikkussiuk.“ Sooq? „Qinunissamut tunniulluinnarallarnissaq kingornatigullu atoqatigiittaleqqilluni [Qinunermut piffissaqarsinnaaqqullusi taavalu atoqatigiittaleqqillusi, NV], Saatanimit usserneqaqqunasi pinaveersaarsinnaanngikkussi.“ (1 Korinthimiut 7:3-5) Paulusip tamatumunnga tunngatillugu qinuneq pillugu oqaasiini erserpoq kristumiup suna pingaarnerpaatittariaqaraa. Aammali erseqqissarpaa kristumiup aappallip kialuunniit aapparmi timikkut misigissutsikkullu pisariaqartitai eqqumaffigisariaqarai.

14. Aappariittut atoqatigiinnermut tunngatillugu najoqqutassianik Biibilimeersunik maleruaanissaq qanoq iluaqutaasinnaava?

 ¹⁴ Uiusup nuliaasullu imminnut ammaffigeqatigiinnissaat pisariaqarpoq, aamma paasisariaqarpaat atoqatigiinnermut tunngatillugu innimittannginneq ajornartorsiuteqalernermik kinguneqarsinnaasoq. (Atuaruk Filippimiut 2:3, 4; naleqqiuguk Matthæusi 7:12.) Aamma aappariinnut upperisaqaqatigiinngitsunut tamanna atuuppoq. Isumaqatigiittuaannanngikkaluarlutik kristumiuusoq amerlanertigut aappariinnermik nakussatsitsisinnaasarpoq pissuserissaarnermigut, inussiarnernermigut suleqataanissamullu piumassuseqarnermigut. (Atuaruk 1 Petrusi 3:1, 2.) Jehovamik aapparmillu asanninneq, aammattaaq akuersiinnarnissamut piumassuseqarneq, aappariinnerup ilaanut tamatumunnga iluaqutaassaaq.

15. Ataqqinninneq pilluarluni aappariinnissamut qanoq pingaaruteqarpa?

¹⁵ Aamma allanut tunngatillugu uiusup innimittartup nuliani ataqqinnittumik pissavaa. Assersuutigalugu nuliami misigissusii isumaalu eqqarsaatigalugit iliuuseqartassaaq, aamma annikitsutigut. Angut ukiuni 47-ni aappaqarsimasoq ima nassuerpoq: „Tamatumunnga tunngatillugu suli ilikkagassaqarpunga.“ Nuliaasut kristumiut oqaaqqissaarneqarput uiminnik ataqqinningaaqqullugit. (Efesosimiut 5:33) Uimik nikaginnippalulluni oqaluuserinninneq allallu tusaatillugit kukkussutaanik qaqqaqqalaarutiginninneq ataqqinninnerunngilaq. Tamatumunnga tunngatillugu Ussatit 14:1 eqqaamajuk: „Arnat ilisimassuseqartut angerlarsimaffik sanasarpaat, kisianni arnap sianiitsup assamminik ingutsertarpaa.“ (1990)

Diaavulumut nakkaannaqinak

16. Aappariit qanoq ilillutik siunnersuut Efesosimiut 4:26, 27-miittoq malillugu iliorsinnaappat?

¹⁶ „Kamassimariannguaritsi, kisiannili ajortuliornasi. Seqineq tarrisinaveersiuk narrutsassimanissinni. Diaavululu inissaqarteqinasiuk.“ (Efesosimiut 4:26, 27) Oqaatsinik taakkuninnga maleruaaneq aappariittut isumaqatigiinngissuteqarnaveersaarnissamut isumaqatigiinngissutinilluunniit aaqqiinissamut iluaqutigisinnaavarput. Qatanngut arnaq ima oqarpoq: „Eqqaamasaqanngilanga uigalu isumaqatigiinngissimanitsinnik ajornartorsiut oqaloqatigiissutiginagu, ajornartorsiut tiimerpassuit atorlugit aaqqinniartariaqarsimagaluarutsiguluunniit.“ Katerngaajullutik taanna uinilu aalajangersimapput ullup naannginnerani isumaqatigiinngissutitik aaqqittarniarlugit. Ima oqaluttuarpoq: „Aalajangerpugut ajornartorsiut suugaluarpalluunniit isumakkeerfigeqatigiittarniarluta isumaqatigiinngissullu puiortarniarlugu ullullu tamaasa aallaqqaataaniit aallarteqqittarniarluta.“ Taamaalillutik ’Diaavulu inissaqartinngilaat’.

17. Aappaq takorluukkatut inngippat suna iluaqutaasinnaava?

¹⁷ Taavami katitat takorluukkattut inngippat? Immaqa aappariinnersi allat aappariinnerata pilluarnarpasitsiginerattulli pilluarnartiginngilaq. Matumani iluaqutigissavat Guutip aappariinnermik qanoq isiginninneranik eqqarsaatiginninnissat. Paulusi isumassarsisinneqarluni kristumiunik ima oqaaqqissaarivoq: „Aappariinneq tamanit ataqqineqassaaq, aappariillu siniffiat minguitsuussaaq. Guutimmi eqqartuukkumaarpai kinguaassiuutitigut inuunerluttut allasiortullu.“ (Hebræerit 13:4) Aamma oqaatsit uku puioqinagit: „Allunaasaq pingasulik kittorajaatsuuvoq.“ (Oqaluussisartup oqaasii 4:12) Uiusup nuliaasullu Jehovap aqqanik qutsissisitsinissaq kajumeqalutik ulapputigigaangamikku imminnut Guutimullu qanillisarput. Aappariinnerup nakussatsinnissaa sulissutigisariaqarpaat, nalunnginnamikku tamanna Jehovamut, aappariinnermik pilersitsisumut, ataqqinaataassasoq. — 1 Petrusi 3:11.

18. Aappariinnermut tunngatillugu suna qularutiginngilluinnarsinnaaviuk?

¹⁸ Qularnanngivippoq kristumiut aappariinnerminnik nuannaarutiginnissinnaasut. Nuannaarsinnaajumallutik iliuuseqartariaqarput, aamma kristumiutut pissuserineqartussanik ersersitsisariaqarput, ilaatigut akuersiinnarnissaminnut piumassuseqarnermikkut. Ullumikkut nunarsuarmi tamarmi Jehovap Nalunaajaasuisa ilagiivini aappariippassuaqarpoq taamaattoqarsinnaaneranut uppernarsaataasunik.

Qanoq akissavit?

• Sooq aappariinnerup pilluarnartuusinnaanera naatsorsuutigissallugu piviusorsiornerua?

• Aappariinnerup iluatsilluarnissaanut suut iluaqutaasinnaappat?

• Pissuserineqartussat suut aappariit ineriartortittariaqarpaat?

[Atuaqqissaarnermi apeqqutit]

[Qupp. 14-mi assiliartaq]

Aappariit silatusaassapput qaaqqusissummut akuersinnginnerminni isumaqatigiissuteqannginnerminniluunniit oqaloqatigiikkunik

[Qupp. 15-mi assiliartaq]

Ullup naannginnerani isumaqatigiinngissutissinnik aaqqiisaritsi, ’Diaavulu inissaqartinnginniassagassiuk’