Ingasaassinianngitsuugit, akuersiinnarnissamut piumassuseqarit

„Eqqaasittassavatit . . . saamasooqqullugit.“ — TITUSI 3:1, 2.

1, 2. Ingasaassinianngitsuuneq akuersiinnarnissamullu piumassuseqarneq pillugu Biibilimi qanoq allassimasoqarpa, aamma sooq pingaaruteqarpa?

JEHOVA, Ataatarput qilammiusoq asannittoq, killeqanngitsumik ilisimassuseqarpoq. Taassumannga pinngortitaagatta taassumunnga siunnersortissarsiortarpugut. (Tussiaat 48:15) Ajoqersugaq Jaaku kristumiuusoq ima allappoq: „Ilisimassuseq pavannga pisoq pingaarnerpaamik minguitsuuvoq, tamatumalu saniatigut eqqissinermik nuannarisaqartuuvoq, saamasuulluni, ilakkuminartuullunilu, nallittuingaartuulluni, ajunngitsunik inerititaqarluni, kinaassusersiortuunani unneqqarissuullunilu.“ — Jaaku 3:17.

² Apustili Paulusi ima kajumissaarivoq: „Qanilaarsusersi ilisimaneqalerli inunnit tamanit.“ * (Filippimiut 4:5) Kristusi Jiisusi ilagiinnut kristumiunut Naalagaallunilu Niaquuvoq. (Efesosimiut 5:23) Taamaattumik pingaaruteqangaarpoq tamatta immikkut ingasaassinianngitsuunissarput, Kristusip siulersuineranut naalatsigitilluta pisariaqaraangallu inoqatitsinnut akuersiinnarnissatsinnut piumassuseqarluta.

3, 4. (a) Akuersiinnarnissamut piumassuseqarnerup kinguneqarluartarneranik assersuuteqarit. (b) Suut sammissavavut?

³ Taamatut isiginnittaaseqarnerput iluaqutigissavarput. Makku eqqarsaatigeriakkit: Tuluit Nunaanni peqqarniisaarniarluni pilersaartoqarnera pasitsaanneqarluni isumannaallisaasoqarnerulernissaa pisariaqartinneqalermat timmisartunut ilaasartut amerlanersaasa siornatigut nassarneqarsinnaasunik nassaqqusaajunnaarnertik akueraat. Aamma biileraangatta kigaallannissaq inatsisinilu akuerisaasutut sukkatigisumik biilinnginnissaq ilaannikkut pisariaqarsinnaavoq, kikkut tamarmik navianartorsiunnginnissaat qulakkeerniarlugu ajutoortoqarnissaalu pinngitsoorniarlugu.

⁴ Inuppassuilli allanut akuersiinnarnissartik sapernartittarpaat. Taamaattumik akuersiinnarnissamut piumassuseqarnermut tunngassuteqartut pingasut sammissavavut, tassa pissutiginiagarput, oqartussaassulinnut isiginnittaaserput akuersiinnarnerlu qaqugukkut eqqortuusarnersoq qaqugukkullu pisariaqartarnersoq.

Sooq akuersiinnartarnissamut piumassuseqassaagut?

5. Mosesip inatsisai naapertorlugit inussiap naalakkaminiiginnarniarluni aalajangernissaminut suna kajumississutigisinnaavaa?

⁵ Nammineq pisinnaatitaaffigisanik aalajangiusimanniinnannginnissamut piumassuseqarnermut pissutiginiagaq eqqortoq itsaq Israelimi pissutsini erseqqissarneqarpoq. Mosesip inatsisai naapertorlugit inussiat hebræeriusut ukiut kiffartorfimmik arfineq-aappassaani ukiumiluunniit utertitsiviusumi inussiaajunnaarsinneqartussaapput. Inussiarli aalajangersinnaavoq inussiaaginnarniarluni. (Atuaruk 2 Mosesi 21:5, 6.) Inussiap naalakkaminit oqartussaaffigineqaannarumalluni aalajangernissaminut suna kajumississutigisinnaagamiuk? Naalakkaminut soqutigittartumut asanninnini.

6. Asanninneq innimittarnerlu qanoq imminnut atassuteqarpat?

⁶ Taamatuttaaq uagut Jehovamik asanninneq pissutigalugu taassumunnga tunniulluinnartarlutalu tunniulluinnarnerput eqqortittuartarparput. (Romamiut 14:7, 8) Apustili Johannesi ima allappoq: „Guutimut asanninneq tassaavoq inassutai maleruaratsigit, inassutaalu artornartuunngillat.“ (1 Johannesi  5:3) Asanninneq taama ittoq namminissarsiorneq ajorpoq. (1 Korinthimiut 13:4, 5) Allat attavigigaangatsigit tullermik asanninneq kajumississutigalugu taakkua innimiginissaat pingaarnerpaatittassavarput. Namminissarsiorata allat soqutigisaat eqqarsaatigisarpavut. — Filippimiut 2:2, 3.

7. Naleqqussarnissamut piumassuseqarnerput oqaluussinitsinnut qanoq pingaaruteqarpa?

⁷ Oqaatsivut iliuutsivulluunniit allanut naakkiussutaasussaanngillat. (Efesosimiut 4:29) Inuit assigiinngitsunik tunuliaqutallit kulturillillu Jehovamut kiffartornissamut siumukarnissaannut akornutaasinnaasumik iliunnginnissamut asanninneq kajumississutigissavarput. Tamatumunnga atatillugu naleqqussartarnissarput amerlanertigut pisariaqartarpoq. Assersuutigalugu ajoqersuiartortitat arnat pinnersarnermik sungiusimannittut, angalaarfigisartakkani pinnersartarnermik naakkiussutaasinnaaffianni pinnersartarnertillu pissutigalugu ileqqorissuunermik qularutigineqarsinnaaffianni, pinnersartarnertik aalajangiusimaannarnavianngilaat. — 1 Korinthimiut 10:31-33.

8. Guutimik asanninneq ’minnerpaajusutut’ pissusilersornissamut qanoq iluaqutigisinnaavarput?

⁸ Jehovamik asanninnerput makitanerup akiornissaanut iluaqutigaarput. Jiisusip ajoqersukkami kina arlartik ilaminit annerunersoq assortuussutigigaat tusaramiuk meerannguaq taakkua akornannut pisippaa imalu oqarluni: „Uanga atikkut meeqqamik uuminnga ilassinnittup uanga ilassivaanga; uannillu ilassinnittup aallartitsisiga ilassivaa. Ilissinnimi minnerpaajusoq taanna angisuujuvoq.“ (Lukasi 9:48; Markusi 9:36) ’Minnerpaajusutut’ pissusilersornissaq uagutsinnut inunnut ataasiakkaanut artornarsinnaavoq. Naammalluinnanngissuseq kingornussarput makitaqqajaanerlu pissutigalugit nuimasumik inissisimaffeqarnissaq noqqaassutigilersinnaavarput, maniguunnerli anneruniajuitsuunissamut ataqqinninnissamullu iluaqutigissavarput. — Romamiut 12:10.

9. Akuersiinnarnissamut piumassuseqarnermut suna ilaava?

⁹ Akuersiinnarnissamut piumassuseqarneq aamma Guutip oqartussaassutsimut tunngatillugu aaqqissuussaanik ataqqinninnertut paasisariaqarpoq. Kristumiut ilumoortut tamarmik siulersuinermut najoqqutassiap pingaaruteqangaarnera isumaqatigaat. Apustilip Paulusip najoqqutassiaq taanna Korinthimiunut paasiuminartumik ima allaaseraa: „Ilisimaqquara angutip kialuunniit Kristusi niaqorimmagu, arnap angut niaqorimmagu, Kristusillu niaqua Guutiummat.“ — 1 Korinthimiut 11:3.

10. Jehovamut naalatsigitikkaangatta suna ersersittarparput?

¹⁰ Guutimut naalatsigitikkaangatta ersersittarparput taanna Ataatatsitut asannittutut tatigalugu. Taassuma pisut suut tamaasa ilisimavai, pisariaqartitavullu naapertorlugit akissarsisissinnaavaatigut. Tamanna eqqarsaatigalugu iluaqutaasarpoq allat ataqqinninngitsumik pigaangatigut imaluunniit kamaatilerlutalu puffaakkaangatigut. Paulusi ima allappoq: „Ajornanngippat — ilissi aalajangiisuusinnaagussi — inuit tamaasa eqqisseqatiginiarsigit.“ Siunnersuullu erseqqissarpaa ima nangilluni: „Nammineerlusi akiniaaqinasi, asasakka, Guutilli kamaassinera periarfississiuk — allassimasoqarmat: ’Akiniut pigaara, uanga akiliiumaarpunga, oqarpoq [Jehova].’“ — Romamiut 12:18, 19.

11. Qanoq ililluta ersersissinnaavarput Kristusip siulersuineranut naalatsigitilluta?

¹¹ Oqartussaassuseq Guutip ilagiinni kristumiuniittut ilaannut tunniussaa aamma ataqqisariaqarparput. Saqqummersitat kapitali 1-imi Kristusi  Jiisusi ilagiit ’ulloriaannik’ talerpimminik tigumiaqartutut oqaluttuarineqarpoq. (Saqqummersitat 1:16, 20) Nalinginnaasumik isumaqartillugu „ullorissat“ taakku ilagiit utoqqaanertaqatigiivinut, nakkutilliisoqatigiivinut assersuutaapput. Nakkutilliisut toqqakkat taakku Kristusip siulersuinera malillugu iliorput taassumalu innimittarluni allanik iliorfiginnittarnera ilaarlugu. Ilagiinniittut tamarmik aaqqissuussamut Jiisusip, „inussiaq aalajaallunilu silatooq“ (NV) piffissaq eqqorlugu anersaakkut inuussutissanik pilersuisinnaaqqullugu, atulersitaanut naalatsigitipput. (Matthæusi 24:45-47) Ullumikkut Kristusip siulersuineranut naalatsigitilluta ersersittarparput kajumilluta atuakkanik atuagassianillu saqqummersinneqartunik atuaqqissaarnitsigut ilikkakkavullu malillugit iliornitsigut. Taamaalilluta eqqissinermik ataasiussusermillu siuarsaasarpugut. — Romamiut 14:13, 19.

Qaqugukkut akuersiinnartassaagut?

12. Sooq naleqqussarnissamut piumassuseqartarnerput killeqarpa?

¹² Ingasaassinianngitsuugattali, akuersiinnarnissatsinnut piumassuseqaratta, imaanngilaq upperisatsinnut Guutilluunniit najoqqutassiaanut tunngatillugu aalajangiusimasatsinnik qasukkartitsisartugut. Ukiuni hundredelinni siullerni kristumiut qanoq aalajangerpat upperisarsiornikkut siuttut inertermatik Jiisusip aqqani nalunaajaaqqunatik? Petrusi apustilillu allat nakimaallutik ima akipput: „Guuti inunnit naalattariaqarneruvoq.“ (Apustilit Suliaat 4:18-20; 5:28, 29) Taamaattumik nunami oqartussaasut pinngitsaalilluta nutaarsiassamik nuannersumik oqaluussissutiginnittarunnaarsinniarsarigaangatigut oqaluussiunnaarnata oqaluusseriaatsivut naleqqussartarpavut malugineqannginniassagatta. Illumiit illumut oqaluussinissarput oqartussaasunit inerteqqutigineqarpat inunnut attaveqarnissamut allanik periarfissarsiussaagut Guutillu uagutsinnut suliassiissutaa suliariuarlugu. ’Naalakkersuisullu qullersaasut’ ataatsimiittarnivut inerteqqutigippatigik ikittunnguakkuutaarluta malunnaarsaarluta naapittarpugut. — Romamiut 13:1; Hebræerit 10:24, 25.

13. Oqartussaassusilinnut naalatsigitinnissaq pillugu Jiisusi qanoq oqarpa?

¹³ Jiisusip qaqqami oqaluutsimi oqartussaasunut naalatsigitinnissarput malugeqquaa. Ima oqarpoq: „Eqqartuussisutigut ilupaannik arsaarniarneqaruit, qallersaatittaaq tunniuguk. Kialuunniillu miili ataaseq ingerlaqatigeqqulluni pinngitsaaliniarpatit miilit marluk ingerlaqatigiuk.“ (Matthæusi 5:40, 41) * Allanik innimiginninneq ikiuerusunnerlu kajumississutigalugit miilimik suli ataatsimik ingerlaqqittarpugullusooq. — 1 Korinthimiut 13:5; Titusi 3:1, 2.

14. Sooq tunussisunut akuersiinnanngisaannartariaqarpugut?

¹⁴ Akuersiinnarnissamut piumassuseqartaraluarluta tunussisunut akuersiinnanngisaannartariaqarpugut. Sallusuissut minguitsuutittuarumallugulu mingutsinneqatsaaliumallugu ilagiillu ataasiussuseqartittuarumallugit matumani aalajaalluinnarnissarput pisariaqarpoq. ’Qatanngutaasuusaartut’ pillugit Paulusi ima allappoq: „Minnerpaamilluunniit taakkununnga maleruutiinnanngilagut naalatsigitinnataluunniit, siunertarigatsigu iivangkiiliup ilumoorsusiata ilissinniiginnarnissaa.“ (Galatiamiut 2:4, 5) Qaqutigut tunussisoqartaraluartoq kristumiut tunniusimasut eqqortoq pillugu aalajaattuassapput.

Nakkutilliisut akuersiinnarnissaminnut piumassuseqartariaqarput

15. Nakkutilliisut kristumiut qanoq ersersissinnaavaat ataatsimiikkaangamik akuersiinnarnissaminnut piumassuseqarlutik?

¹⁵ Nakkutilliisutut toqqarneqartut piukkunnaatigisassaasa ilaat tassaavoq ingasaassinianngitsuunerat. Paulusi ima allappoq: ’Nakkutilliisoq sallaatsuussaaq [ingasaassinianngitsuussaaq, NV].’ (1 Timotheusi 3:2, 3) Taamaattuunissaat ingammik pingaaruteqarpoq utoqqaanertat ilagiinnut tunngassuteqartut oqaloqatigiissutiginiarlugit ataatsimiikkaangata. Aalajangiisoqannginnerani najuuttut tamarmik isummatik ammasumik oqaatigisinnaavaat, naak utoqqaanertat tamarmik oqaaseqarnissaat pisariaqanngikkaluartoq. Oqaloqatigiittoqarnerani imaassinnaavoq najuuttut ilaata isummani allanngortikkaa, allat najoqqutassianik Biibilimeersunik naleqquttunik saqqummiussisut tusarnaartillugit. Utoqqaanertaq inersimalluartoq nammineq isummaminik uteriilluni aalajangiusimanniinnarnavianngilaq, akuersiinnarnissaminulli piumassuseqassaaq. Aallaqqaammut immaqa isummat assigiinngitsut saqqummiunneqartarput, qinunikkulli eqqarsaatiginnilluarneq utoqqaanertat ingasaassinianngitsuusut  ilakkuminartullu ataasiussusiannik siuarsaasarpoq. — 1 Korinthimiut 1:10; atuaruk Efesosimiut 4:1-3.

16. Nakkutilliisoq kristumiu qanoq isiginnittaaseqartariaqarpa?

¹⁶ Utoqqaanertaq kristumiu iliuutsimini tamani teokratiimik aaqqissuussamik malinninniarluni sapinngisaminik iliortariaqarpoq. Aamma savaatinik paarsinermini kiffartuusserusussuseqarnini ilisarnaatigisussaavaa, tamannalu allanut innimittartunnguutigalugulu qajassuussisunnguutigissavaa. Petrusi ima allappoq: „Guutip savaataanik ilissinniittunik paarsisuuniaritsi, paarisigit tamatumunnga pinngitsaalisaasutut pinnasi namminerli kajumissutsissinnit.“ — 1 Petrusi 5:2.

17. Ilagiinniittut tamarmik qanoq ersersissinnaavaat suleqataajumassuseqarlutik?

¹⁷ Utoqqaat ilagiinniittut inuusunnerusunit asannittumik ikiorneqartarnertik qujamasuutigaat taakkuninngalu pingaartitsinertik ersersittarlugu. Inuusuttullu utoqqaat ukiorpassuarni Jehovamut kiffartornermi misilittagaqarluartut ataqqisarpaat. (1 Timotheusi 5:1, 2) Utoqqaanertat kristumiut angutinik piumasaqaatinik eqqortitsisunik akisussaaffilersinnaasaminnik Guutillu savaataanik isumaginninnissamut ilinniartissinnaasaminnik qinerlerput. (2 Timotheusi 2:1, 2) Kristumiut tamarmik immikkut Paulusip siunnersuutaa isumassarsiarititaasoq una uummammiuliuttariaqarpaat: „Siulersortisi naalassigit peqqusaallu maleruarlugit [pitseriartuugitsilu, NV], taakkuami tarnisi pigaappaat nalunnginnamikku taakku pillugit akisussaatitaajumaarlutik. Taamaaliorsinnaalit nuannaarlutik anersaarulunnatilli; taamaanngippammi ilissi tamanna atugarliuutigissavarsi.“ — Hebræerit 13:17.

Ilaqutariinni akuersiinnarnissamut piumassuseqarneq

18. Sooq ilaqutariinni akuersiinnarnissamut piumassuseqarnissaq pingaaruteqarpa?

¹⁸ Aamma ilaqutariittut aaqqissuussaanermut tunngatillugu akuersiinnarnissamut piumassuseqarnissaq pingaaruteqarpoq. (Atuaruk Kolossemiut 3:18-21.) Ilaqutariinni kristumiuniittut ataasiakkaat inissisimaffii Biibilimi allaaserineqarput. Ataataasoq nuliaminut niaquuginnarnani aammali meeqqanik perorsaanermut akisussaanerpaassaaq. Nuliaasup uimi oqartussaanera akuerissavaa, meeqqallu naalattuujumallutik, ’Naalakkami iluartumik’ iliorumallutik, sapinngisartik tamaat iliuuseqartariaqarput. Ilaqutariinniittut tamarmik pisariaqaraangat akuersiinnarnissamut piumassuseqarnermikkut angerlarsimaffimmi ataasiussusermik eqqissinermillu siuarsaasinnaapput. Oqaluttuat tamatuminnga ersersitsisut Biibilimi eqqartorneqarput.

19, 20. (a) Elip Jehovallu iliuusiisa assigiinngissutaat oqaluttuariuk. (b) Oqaluttuat taakku angajoqqaat qanoq ilinniarfigisinnaavaat?

¹⁹ Samueli suli nukappiaraasoq Eli Israelimi  palasiunertut kiffartorpoq. Taassumali erneri, Hofni Pinehasilu, ’iluaatsuupput Jehovamik ilisarisimanninngitsut’. Taakkua iliuuserisimasaat ajortut, ilaatigut arnanik toqqup naapeqatigiittarfiup isaariaani kiffartortunik kinguaassiuutitigut inuunerloqateqarnerat, Elip tusarpai. Tamanna qanoq periarfigaa? Ernini oqarfigai Jehovamut ajortuliorunik qinnussisussaqassanngitsut; naqqissunngilaali perorsaatissinnagillu. Taamaammat erneri unioqqutitsiuarput. Naggataatigut Jehovap eqqortumik aalajangerpaa toqusariaqartut. Elip tusaramiuk ernini toqusimasut, toquvoq. Alianassusia! Erseqqippoq Eli eqqunngitsuliortoq ernerminut guutiitsunut maleruutiinnarnermigut taakkuninngalu ilaginnaanermigut. — 1 Samueli 2:12-17, 22-25, 34, 35; 4:17, 18.

²⁰ Tamatuma akerlia, tassa Guutip ernerminik anersaajusunik pinneriaasia, eqqarsaatigeriartigu. Pruffiiti Mika Jehovap inngiliminik ataatsimeeqateqarnera pillugu maluginiarnartumik takorruugaqarpoq. Jehova aperivoq inngilit arlaata kia kunngi Akabi nakutissinnaaneraa kunngi ajortoq taanna toqutaaniassammat. Jehovap ernerit anersaajusut arlallit siunnersuutaat tusarnaarpai. Taava inngilit ilaat oqarpoq Akabi nakutissinnaallugu. Jehovap taanna aperaa qanoq ililluni nakutinniarneraa; inngilillu siunnersuutaa ajorpalunngimmat taamaaliortippaa. (1 Kunngit 22:19-23) Oqaluttuaq taanna ilaqutariinnut tunngatillugu akuersiinnarnissamut piumassuseqartariaqarnerput pillugu ilinniarfigaarput, ilaa? Uiusoq ataataasorlu kristumiu nuliami meeqqamilu isumassarsiaannik siunnersuutaannillu eqqarsaatiginnikkuni pitsaassaaq. Paarlattuanilli nuliaasup meeqqallu paasisariaqarpaat, qanoq isumaqarnerlutik sunillu kissaateqarnerlutik oqaatigereerunikku, ataqqinnillutik akuersiinnartariaqarsinnaallutik Biibililu naapertorlugu aalajangiinissamut oqartussaassuseqartup unnersuussutai malillugit iliortariaqarsinnaallutik.

21. Allaaserisami tulliuttumi suna sammissavarput?

²¹ Akuersiinnarnissamut piumassuseqarnissaq pillugu Jehovap asannittumik silatuumillu oqaaqqissaarutaasa qujamasuutiginissaannut pissutissaqarluarpugut. (Tussiaat 119:99) Allaaserisami tulliuttumi sammissavarput akuersiinnarnissamut piumassuseqarneq aappariinnermi nuannaarnermut qanoq siuarsaasinnaasoq.

[Quppernerup ataani ilanngussat]

Qanoq akissavit?

• Akuersiinnarnissamut piumassuseqarneq qanoq kinguneqarsinnaava?

• Nakkutilliisut qanoq ilillutik ersersissinnaavaat akuersiinnarnissaminnut piumassuseqarlutik?

• Sooq ilaqutariit iluanni akuersiinnarnissamut piumassuseqarnissaq pingaaruteqarpa?

[Atuaqqissaarnermi apeqqutit]

[Qupp. 9-mi assiliartaq]

Utoqqaanertat Jiisusip asannilluni allanik pinneriaasia ilaartarpaat

[Qupp. 11-mi assiliartaq]

Qinunikkut eqqarsaatiginnilluarneq akuersiinnarnissamullu piumassuseqarneq utoqqaanertat ataatsimiinneranni ataasiussusermik siuarsaasarput