Jehovap ikioqqulluta suaartarnivut tusartarpai
Jehovap ikioqqulluta suaartarnivut tusartarpai
„[Jehovap] isaasa sammivigaat iluartut, ikioqqullutik nillianerat siutaasa tusartarpaat.“ — TUSSIAAT 34:16.
1, 2. (a) Ullumikkut inuppassuit qanoq misigisimappat? (b) Sooq tamanna uagut tupaallaatiginngilarput?
ALIASUUTEQARLUTILLU isumakuluuteqarpit? Taamaappat kisimiinngilatit. Inuit millionillit pissutsit aaqqissuussaaneranni ajortumi matumani inuuneq erloqinartoq naammagalugu atorniarlugu tamaviaarput. Ilaat misigipput sapililivillutik. Taakku tussiaasiortup Daavip misigisimaneratut misigipput, taannami ima allappoq: „Sequmisitaavunga nukeerullungalu, uummatima eqqissiveerunneranit nilliavunga. Uummatiga tilleruluppoq, nukeeruppunga, isikka allaat qaamaneerupput.“ — Tussiaat 38:9, 11.
2 Kristumiuugatta inuunermi aliasuutit isumakuluutillu nalaattakkavut tupaallaatigineq ajorpavut. Nalunngilarput ’nallisitsinerit’ Jiisusip najuunneranut nalunaaqqummut siulittuutaasumut ilaasussaasut. (Markusi 13:8; Matthæusi 24:3) Oqaaseq grækerisooq matumani ’nallisitsinernik’ nutserneqartoq aliasuutinut annikilliuutinullu tunngatillugu aamma atorneqarsinnaavoq. Oqaaseq taanna annikilliuutinut erloqinartunut inuppassuit ulluni ’ernumanartorsiorfiusuni’ makkunani ’anigoruminaatsuni’ naammagalugit atortariaqagaannut naleqquppoq. — 2 Timotheusi 3:1, NV.
Jehovap annikilliuutigisartakkavut paasisarpai
3. Jehovap kiffaasa suna nalunngilluinnarpaat?
3 Jehovap kiffaasa nalunngilluinnarpaat annikilliuutit tamakkua sunnertinngitsoorfigisinnaanagit, ilimanarporlu ilungersunartorsiorfiusut suli ilungersunarnerulissasut. Inuit tamarmik nalaattagaasa saniatigut uagut Guutimut kiffaagatta ’akerartuisoq, Diaavulu’, uagutsinnik upperunnaarsitsinissaminik aalajangiusimannittoq, aamma akiortariaqarparput. (1 Petrusi 5:8) Taamaattumik Daavitut ima misigeriaannaasinnaavugut: „Asissuinerisa uummatiga sequmissimavaat iluarsisassaajunnaarlugu. Ilimasussimagaluarpunga misiginneqataasussamik, kisianni naami, tuppallersaasussamillu, takkuttoqanngilarli.“ — Tussiaat 69:21.
4. Annikillioraangatta suna tuppallersaatigisarparput?
4 Daavimuna neriuutissaqanngilluinnarnini tassani pigaa? Naamik. Maluginiariaruk tussiaammi versini tulliuttuni qanoq oqarnera: „[Jehovap] piitsut tusaajumasarpai, asasini tiguagaasut suusupagisarnagit.“ (Tussiaat 69:34) Immaqa ilaannikkut annikilliuutitsinnit misilinneqarnitsinnillu tiguarneqarsimasutullusooq misigisarpugut. Allat pissutsit atukkavut paasilluartannginnguatsiarpaat. Daavilli pisimaneratut Jehovap annikilliuutitsinnik paasinninneranik ilisimanninnerput tuppallersaatigisinnaavarput. — Tussiaat 34:16.
5. Kunngip Salomop suna upperilluinnarpaa?
5 Daavip ernerata Salomop naalaffiup Jerusalemimiittup atoqqaartinneqarnerani qinnutimini Jehovap misiginneqataanera erseqqissarpaa. (Atuaruk 2 Nalunaarsuutit 6:29-31.) Jehova ilungersorluni qinnuigaa kialuunniit ilumoorluni ’perluutini erloqissutinilu’ (1900) pillugit qinuniarluni Imminut palliguttup qinnutaa tusartaqqullugu. Guutip inuit annikilliornerminni imminut qinusut qanoq periarfigissavai? Salomop ersersippaa upperilluinnarlugu Guuti taakkua qinnutaat tusaaginnarnagit, aammali taakkununnga iluaqutaasumik akuliukkumaartoq. Taamaaliorumaarporlu „inuit uummammiugisaat“ tamarluinnaasa nalunnginnamigit.
6. Isumakuluuteqaraangatta qanoq iliorsinnaavugut, aamma sooq?
6 Uaguttaaq ’perluutivut erloqissutivullu’ — uagut nammineq nanertuutigisavut — pillugit qinunikkut Jehovamut palligussinnaavugut. Jehovap annikilliuutitsinnik paasinninneranik uagutsinnillu isumassuineranik ilisimaarinninnerput tuppallersaatigisinnaavarput. Apustilip Petrusip tamanna uppernarsarpaa ima allalluni: „Isumakuluutisi tamaasa taassumunnga pisissigit isumassormasi.“ (1 Petrusi 5:7) Jehovap misigisartakkavut ilumoorluni soqutigai. Guutip asannilluni isumassuinera Jiisusip erseqqissarpaa ima oqarami: „Qupaloraarsuit marluk skillingimik akilersillugit tunineqartannginnerpat? Taakkua ilaat ataaserluunniit nunamut nakkarnavianngilaq Ataatarsi najortiginagu. Ilissimi nutsasiluunniit tamarmik kisissimapput. Taamaattumik erseqinasi, ilissi qupaloraarsuppassuarnit pingaarneruvusi.“ — Matthæusi 10:29-31.
Jehovap ikiuiumaarnera upperilluinnaruk
7. Qanoq tapersersorneqarnissarput qularutiginngilluinnarsinnaavarput?
7 Annikilliuuteqaleraangatta Jehovap uagutsinnik ikiuisinnaallunilu ikiuiumanera qularutiginngilluinnarsinnaavarput. Biibilimi ima allassimavoq: „Guuti tassa qimarnguffipput nakuussuterpullu, tamatigut ikiuiserput annikilliornartuni.“ (Tussiaat 34:16-19; 46:2) Guutip qanoq ililluni ikiortarpaatigut? Maluginiariaruk 1 Korinthimiut 10:13-imi qanoq allassimasoqarnersoq: „Guuti unneqqarippoq; akuersaarumanngilaa artukkassinnik usserneqarnissarsi, kisianni usserneqarnermut ilagitillugu aniguiffissaq pilersissavaa artorsartitaaqqunasi.“ Jehova akuliussinnaavoq naalliuutitsinnut pissutaasoq peerniarlugu imaluunniit naalliuutitta naammagalugit atornissaannut pisariaqartitatsinnik nakussatsinniarluta. Arlaatigut ikiorumaarpaatigut.
8. Guutimit ikiorneqarumalluta qanoq iliorsinnaavugut?
8 Taamatut ikiorneqarumalluta qanoq iliortariaqarpugut? Petrusip siunnersuutaa eqqaamajuk: „Isumakuluutisi tamaasa taassumunnga pisissigit.“ Tassa imaappoq aliasuutitsinnut isumakuluutitsinnullu tamanut akisussaaffik Jehovamut tunniukkippullusooq. Isumakulukkunnaarniarsarivugut erinitsajuillutalu upperalugu pisariaqartitavut taassuma matussuserumaarai. (Matthæusi 6:25-32) Tamanna upperisinnaassagutsigu maniguuttuusariaqarpugut, nammineq pisinnaanerput ilisimassuserpulluunniit tatiginagu. „Guutip assaata pissarsuup ataani“ maniguukkaangatta, taassuminnga pinngitsuuisinnaannginnerput akuerisarparput. (Atuaruk 1 Petrusi 5:6.) Tamanna Guutip akuerisaasa naammagalugit atornissaannut iluaqutigisarparput. Immaqa maannakkorpiaq aniguerusukkaluaqaagut, qularinngilarpulli Jehovap nalunngikkaa qaqugorpiaq qanorpiarlu uagutsinnut iluaqutaasumik akuliutissanerluni. — Tussiaat 54:9; Esaja 41:10.
9. Daavip nanertuutigisani suna Jehovamut tunniuttariaqarpaa?
9 Daavip oqaasii Tussiaat 55:23-miittut eqqaamakkit: „Nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa.“ Daavip oqaatsit taakku allakkamigit annikillioqaaq. (Tussiaat 55:5) Tussiaat taanna allanneqarsimasorineqarpoq Daavi ernerminit Absalomimit issiavissaarsuarminik assaariarneqaraluarmat. Daavip siunnersuisartua tatiginerpaasaa, Akitofeli, pikitsitseqataalerpoq, kunngilu inuuinnarumalluni Jerusalemimit qimaasariaqalerpoq. (2 Samueli 15:12-14) Daavip taamatut misilinneqaraluarluni Guuti tatigiuarpaa, pakatsinngilarlu.
10. Annikilliuuteqaleraangatta qanoq iliortassaagut?
10 Sunilluunniit annikilliuuteqaraluarluta Daavip pisimaneratut Jehovamut qinunissarput pingaaruteqarpoq. Annikilliuuteqaleraangatta apustilip Paulusip qanoq iliortaqqulluta kajumissaarneraatigut misissoriartigu. (Atuaruk Filippimiut 4:6, 7.) Jehovamut qamannga pisumik qinunerput qanoq kinguneqassava? „Eqqissinerup Guutimit pisup siuneqassusernit tamanit annerungaartup [uummativut eqqarsaativullu] sernigissavai Kristusi-Jiisusimi.“
11. „Eqqissinerup Guutimit pisup“ uummativut eqqarsaativullu qanoq sernigisinnaavai?
11 Qinuneq pissutsinik atukkatsinnik allannguissava? Immaqa. Nalunngittariaqarparpulli Jehovap qinnutivut kissaatigisatsitut akiuaannanngikkai. Pissutsilli qanorluunniit ikkaluarpata qinuneq oqimaaqatigiissaariuarnissamut iluaqutigisarparput misilinneqarnivut pissutigalugit tunniutiinnannginniassagatta. Misigissutsikkut naalliuuteqaraangatta ’eqqissineq Guutimit pisoq’ eqqissiallaatigisinnaallugulu ilorraallaatigisinnaavarput. Sakkutooqatigiit illoqarfik akeqqanit tiguarneqannginniassammat illoqarfimmik illersuisarnerattut, „eqqissinerup Guutimit pisup“ uummativut eqqarsaativullu sernigissavai. Aamma taanna iluaqutigalugu nalorniunnaarsinnaallutalu sioorajunnaarsinnaallutalu nikallornartunik eqqarsaateqarunnaarsinnaavugut, aamma isumaalliornaveersaarutigalugulu sianiilliornaveersaarutigisinnaavarput. — Tussiaat 145:18.
12. Qanoq ililluni qamuuna eqqissisoqarsinnaanersoq oqaluttuariuk.
12 Misilinneqaraangatta qanoq ililluta qamuuna eqqissisimasinnaavugut? Assersuusiaq pissutsinut uagut atukkatsinnut ilaatigut assingusoq eqqarsaatigeriaruk: Sulisoq suliffimmini qaffasinnerusumik atorfilimmit malersorneqarpoq. Sulisorli pissutsit atukkani misigissutsinilu suliffeqarfimmik piginnittumut, inussiarnersuullunilu isumatuumut, oqaluttuarinissaannut periarfissaqarpoq. Piginnittup sulisoq uppernarsaavigaa pissutsinik paasinninnerminik, neriorsuivorlu malersuisoq taanna suliffimminit qanittukkut peersitaassasoq. Sulisumut tamanna qanoq sunniuteqarpa? Neriorsuutip tamatuma eqqortinneqarumaarneranik upperinninnini qanorlu pisoqarumaarneranik ilisimanninnini suliinnarnissaminut aalajangiusimanninnerulissutigaa, pissutsit nuanninngitsut suli naammagalugit atortariaqaraluarlugit. Uaguttaaq nalunngilarput Jehova pissutsinik atukkatsinnik paasinnittoq, neriorsoqqissaarpaatigullu ’silarsuup matuma naalagaanera qanittukkut ajattorneqassasoq’. (Johannesi 12:31) Tamanna tuppallersaataangaarpoq!
13. Qinunerup saniatigut susariaqarpugut?
13 Taava ajornartorsiutitta qinunikkut Jehovamut saqqummiunnissaat naammappa? Naamik. Naammanngilaq. Qinnutivut naapertorlugit iliuuseqartariaqarpugut. Kunngi Sauli Daavi toqukkiartortillugu angutinik taassuma illuanukartitsimmat, Daavi ima qinuvoq: „Aniguisinnga akeqqannit, Guuti, serniginnga akerartortinnut. Aniguisinnga pinerluttunit, annaannga inuarnianit!“ (Tussiaat 59:2, 3) Daavi qinuinnanngilaq — nuliani tusarnaarpaa qimaanissaminullu pisariaqartunik iliuuseqarluni. (1 Samueli 19:11, 12) Uaguttaaq eqqortumik iliornissamut immaqalu pissutsinik atukkatsinnik imaannaanngitsunik pitsaanerulersitsinissamut ilisimassusermik atoriaannaasumik tuneqqulluta qinusinnaavugut. — Jaaku 1:5.
Pinertusaarnissamut qanoq ililluta nukissaqalersinnaasugut
14. Misilinneqarnermi pinertusaarnissamut suna iluaqutigisinnaavarput?
14 Misilinneqaatigisavut immaqa ingerlaannaq peerunnavianngillat. Allaat sivisujaamik taamaaginnarsinnaapput. Taamaappat suna pinertusaarnissamut iluaqutigisinnaavarput? Siullermik, eqqaamasariaqarparput artornartorsioraluarluta aalajaalluta Jehovamut kiffartortuarnerput taassumunnga asanninnitsinnut uppernarsaataasoq. (Apustilit Suliaat 14:22) Eqqarsaatigeriaruk Saatanip Jobi qanoq unnerluutigineraa. Jehovamut ima oqarpoq: „Jobi pissutissaqarluarunarpoq Guutimik mianerinninnerminut. Taanna ilaqutaalu pigisaalu tamaasa tamatigut sernissugarisimannginnerpigit? Sulinera tamaat pilluaqqusimavat, nersutaataalu amerlangaaramik nunamut tamarmut siammarsimapput. Ataguli assat isatseriassagit pigisai tamaasa attorlugit, taava kiinnat toqqavillugu perloqqussagaluarpaatit!“ (Jobi 1:9-11) Jobi assuarnaattuarpoq taamaalillunilu uppernarsarlugu unnerluutiginnissut taanna salluliuutaalluinnartoq. Misilinneqarnitsinni artornartorsiornitsinnilu pinertusaarutta uaguttaaq uppernarsarsinnaavarput Saatani sallutuujusoq. Aamma pinertusaarnerput neriuutitsinnut Jehovamillu tatiginninnitsinnut nakussatsiissutaassaaq. — Jaaku 1:4.
15. Kikkut maligassiaat nakussatsissutigisinnaavavut?
15 Aappassaanik, eqqaamasariaqarparput „[qatanngutivut] silarsuarmiittut taamatuttaaq atugarliortitaasartut“. (1 Petrusi 5:9) Aap, „[usserneqaatigisimasavut] inuit atortagaattut iinnarput“. (1 Korinthimiut 10:13) Taamaattumik uagut nammineq artornartorsiutivut isiginiarnerunagit allat maligassiaannik eqqarsaatiginninneq nakussatsissutigisinnaallugulu sapiissuseqalissutigisinnaavarput. (1 Thessalonikamiut 1:5-7; Hebræerit 12:1) Ilisarisimasatta aliasungaaraluarlutik isumakuluuteqangaaraluarlutillu aalajaallutik pinertusaarsimanerisa eqqarsaatiginissaat piffissaqarfigisaruk. Atuagaatitsinni atuagassiaatitsinnilu uagut ajornartorsiutitsinnut assingusunik ajornartorsiuteqarsimasut misigisalikkersaarutaannik ujarlernikuuvugut? Tamakkua assut qiimmaallannarlutillu tuppallersaataasinnaapput.
16. Assigiinngitsunik misilinneqaraangatta Guutip qanoq nakussatsittarpaatigut?
16 Pingajussaanik, eqqaamasariaqarparput Jehova tassaasoq „Ataataq nallittuisoq Guutilu tuppallersaajuartoq, annikilliuuteqarnitsinni tamani uatsinnik tuppallersaasartoq annikilliuuteqartut tamaasa [sumilluunniit annikilliuuteqartut, NV] uatsinnut tuppallersarsinnaaqqullugit Guutip uatsinnut tuppallersaatigisaanik“. (2 Korinthimiut 1:3, 4) Soorlu tassa Guuti sanitsinniittoq qiimmassarniarluta nakussatsinniarlutalu, maannakkorpiaq annikilliornitsinniinnaanngitsoq, aammali „annikilliuuteqarnitsinni tamani“. Taamaattumik aamma uagut ’sumilluunniit annikilliuuteqartut tuppallersarsinnaavavut’. Oqaatsit taakkua ilumuussusiat Paulusip nammineq misigaa. — 2 Korinthimiut 4:8, 9; 11:23-27.
17. Annikilliuutitta naammagalugit atornissaannut Biibili qanoq iluaqutigisinnaavarput?
17 Sisamassaanik, Guutip oqaasia, Biibili, pigaarput ’iluaqutaasoq ajoqersuinermut, uppernarsaanermut, ilitsersuinermut iluarnermullu perorsaanermut, inuk Guutip pigisaa inerilluinnaqqullugu ajunngitsuliornernut tamanut piginnaanngorsagaalluni [piareersarluagaaqqullugu, NV].’ (2 Timotheusi 3:16, 17) Guutip oqaasia iluaqutigalugu ’ajunngitsuliornermut piareersagaaginnassanngilagut’. ’Piareersarluarneqassaagut’, tamannalu pissutigalugu inuunermi aliasuutit isumakuluutillu naammagalugit atorsinnaanngussavavut. Oqaaseq oqaatsinit allassimaqqaataanit, grækerisuumit, „piareersarluagaaqqullugu“-mik nutserneqartoq nutserluaannarlugu isumaqarpoq „piareersimalluinnartoq“-mik. Oqaaseq taanna itsarsuaq umiatsiamut umiartornissamut pisariaqartunik tamanik atortulersorneqarsimasumut tunngatillugu, imaluunniit sakkumut sumulluunniit atorneqarsinnaasumut tunngatillugu, atorneqartarsimavoq. Taamaalilluni aamma Jehovap oqaatsini aqqutigalugu nalaatatta suulluunniit naammagalugit atornissaannut pisariaqartitatsinnik tamanik tunisarpaatigut. Taamaattumik ima oqarsinnaavugut: „Guutip tamanna akuerippagu taassuma ikiuineratigut naammagalugu atorsinnaavara.“
Misilinneqarnitsinnit tamanit aniguisitaaneq
18. Aamma suna aalajaalluta pinertusaarnissamut iluaqutigisinnaavarput?
18 Tallimassaanik, Jehovap qanittukkut inuiannik tamanik aliasuutinit isumakuluutinillu tamanit aniguisitsinissaa nuanningaartoq eqqarsaatigiuartariaqarparput. (Tussiaat 34:20; 37:9-11; 2 Petrusi 2:9) Maannakkut annikilliuutitsinnit tamanit aniguisiinnassanngilaatigut. Aammali, qilammi Jiisusi peqatigalugu imaluunniit nunarsuarmi paratiisiusumi, naassaanngitsumik inuunissamut periarfissippaatigut.
19. Qanoq ililluta aalajaalluta pinertusaarsinnaavugut?
19 Tamanna nalliutserlugu silarsuarmi ajortumi matumani pissutsit misilinneqaataasut naammagalugit atortuarsinnarpavut. Piffissaq pissutsit tamakkua atuukkunnaarfissaat qilanaareqaarput. (Tussiaat 55:7-9) Eqqaamatigu aalajaalluta pinertusaarnitsigut Diaavulup sallutuujunera uppernarsarlutigu. Qinuneq qatanngutigiissuillu kristumiut nakussatsissutigisartigit, eqqaamallutigu qatanngutivut misilinneqarnitsinnut assingusumik misilinneqartartut. ’Piareersarluagaajuarta’ Guutip oqaasianik atorluaasarnitsigut. ’Guutip tuppallersaajuartup’ asannilluni uagutsinnik isumassuiumaarneranik qularinnilersinneqarnissarput akuerinngisaannartigu. Eqqaamatigu ’Jehovap isaasa sammivigigaat iluartut, ikioqqullutik nillianerat siutaasa tusartaraat’. — Tussiaat 34:16.
Qanoq akissavit?
• Daavi misilinneqarami qanoq misigiva?
• Kunngip Salomop suna upperilluinnarlugu ersersippaa?
• Jehovap akuerisaasa naammagalugit atornissaannut suna iluaqutigisinnaavarput?
[Atuaqqissaarnermi apeqqutit]
[Qupp. 18-mi assiliartaq]
Salomop upperilluinnarpaa Jehova kiffaminut annikilliortunut iluaqutaasumik akuliukkumaartoq
[Qupp. 20-mi assiliartaq]
Daavip nanertuutigisani qinunikkut Jehovamut tunniuppai taavalu qinnutini naapertorlugit iliuuseqarluni