Johannesip iivangkiiliuanit pingaarnersat
Jehovap oqaasia uumavoq
Johannesip iivangkiiliuanit pingaarnersat
JOHANNESI, „ajoqersugaq Jiisusip asasaa“, Jiisusip inuunera kiffartorneralu pillugit oqaluttuamik isumassarsiarititaasumik allattut kingullersaraat. (Johannesi 21:20) Iivangkiiliu Johannesip allagaa ukiup 98-ip missaani allataavoq iivangkiiliunilu pingasuni allani allassimasunik uteqqiinertaqanngingajalluni.
Apustili Johannesip iivangkiiliu allatani siunertaq aalajangersimasoq eqqarsaatigalugu allappaa. Tamanna pillugu ima allappoq: „Makku allattorneqarsimapput ilissinnut uppereqqullugu Jiisusi Kristusiusoq, Guutip ernera, ilissilu uppertuususi aqqagut inooqqullusi.“ (Johannesi 20:31) Taamaattumik iivangkiiliumi tusarliussaq uagutsinnut pingaaruteqangaarpoq. — Hebræerit 4:12.
„AAJUNA GUUTIP SAVAARAA“
Johannesip Kuisisup Jiisusi aggersoq takugamiuk, isumalluarluni ima nillerpoq: „Aajuna Guutip savaaraa silarsuup ajortaanik nammattoq.“ (Johannesi 1:29) Jiisusi Samaria, Galilæa, Judæa nunalu Jordanip kangianiittoq angalaarfigalugit oqaluussitillugu, ilinniartitsitillugu tupinnartuliortartillugulu ’amerlasuut ornippaat upperfigilerlugulu’. — Johannesi 10:41, 42.
Jiisusip tupinnartuliaasa misinnangaarnersaasa ilaat tassaavoq Lazarusimik makititsinera. Inuppassuit takugamikku angut ulluni sisamani toqungasimasoq uummartinneqartoq Jiisusimut uppertunngorput. Palasiunerilli farisiiarillu Jiisusi toqunnialerpaat. Taamaattumik Jiisusi qimagulluni „nunaannarmut inoqajuitsup qanittuani illoqarfimmut Efraimimik atilimmut aallarpoq“. — Johannesi 11:53, 54.
Allassimaffiit pillugit apeqqutinut akissutit:
1:35, 40 — Andreasip saniatigut Johannesi Kuisisup ajoqersugaq kinaana qeqaqatigigaa? Iivangkiiliumik allattup ateq Johannesi atoraangamiuk tamatigut Johannesi Kuisisoq pisarpaa iivangkiiliuminilu nammineq atini taanngisaannarlugu. Taamaattumik ajoqersugaq aqqatigut taaneqanngitsoq tassaagunarpoq iivangkiiliumik allattoq Johannesi nammineq.
2:20 — Naalaffik sorleq ’ukiuni 46-ni sananeqarpa’? Juutit taama oqaramik Zerubbabelip naalaffia kunngi Herodesip sanaqqitaa pivaat. Oqaluttuarisaanermik ilisimatooq Josefus naapertorlugu Herodesip suliaq tamanna aallartippaa naalakkersuiffimmi ukiuisa 18-issaanni, imaluunniit ukiumi 18/17 u.n.s. Naalaffittaa illorsuillu allat ukiut arfineq-pingasut ingerlaneranni sananeqarput. Sanaartukkalli tamarmiusut sanaartorneqarput ukiumi 30-mi poorski tikivillugu tamatumalu kingorna, tamatuma nalaani juutit oqarput sanaartorneq ukiuni 46-ni ingerlasimasoq.
5:14 — Nappaatit inuup ajortuliorneranik pissuteqarpat? Taamaattariaqanngilaq. Angut Jiisusip ajorunnaarsitaa taanna ukiuni 38-ni napparsimasimavoq naammalluinnanngissuseq inunnguuserisaq pissutigalugu. (Johannesi 5:1-9) Jiisusip pisaa tassaavoq angutip taassuma, maanna nallittorneqareerami, annaanneqarnissamut aqqutikkoortariaqartoq piaaralunilu ajortuliussanngitsoq, napparsimalernermit ajornerusumik nalaataqaqqunagu. Angut isumakkeerfigineqarsinnaanngitsumik ajortuliorsinnaavoq makititaanissarlu neriuutiginagu toqusariaqarluni. — Matthæusi 12:31, 32; Lukasi 12:10; Hebræerit 10:26, 27.
5:24, 25 — Kikkunuku ’toqumiit inuunermut nuussimasut’? Jiisusip eqqartorpai anersaakkut toqungasimasut, oqaasianilli tusarnermikkut taassumunnga uppertunngortut ajortumillu inooriaaseqarunnaartut. Taakku ’toqumiit inuunermut nuussimapput’ tassa imaappoq toqup perloqqusineranit aniguisimapput, Guutimut uppernertik pissutigalugu inuunermik naassaanngitsumik neriuuteqartitaallutik. — 1 Petrusi 4:3-6.
5:26; 6:53 — ’Immini inuuneqarneq’ qanoq paasisariaqarpa? Jiisusi Kristusimut isumaqarpoq Guutip piginnaaneqartikkaa immikkut ittunik marlunnik — inunnik Jehovamut ajunngitsumik attaveqalersitsisinnaatillugu aammattaaq toqungasunik makititsinikkut inuunermik tunisisinnaatillugu. Jiisusip ajoqersugaanut isumaqarpoq naassaanngitsumik inuulissasut. Tanitat tamanna angussavaat qilammi inuunermut makititaagunik. Guutip kiffai aalajaatsut nunarsuarmi inuunissamik neriugisallit aatsaat naassaanngitsumik inuulissapput Kristusip ukiuni tusindini naalakkersuinera naappat tamakkiisumillu misilinneqareerunik. — 1 Korinthimiut 15:52, 53; Saqqummersitat 20:5, 7-10.
6:64 — Jiisusip Judasi Iskarioti toqqaramiuk nalunngereersimanerlugu taassuma killuutigissagaani? Ilimananngilaq. Ilaannili ukiumi 32-mi Jiisusi apustiliminut ima oqarpoq: „Ilarsi ataaseq diaavuluuvoq [mamarliisuuvoq, NV].“ Imaassinnaavoq tamatuma nalaani Judasi Iskariotip ajortumik iliuuseqartalernerata ’aallaqqaataa’ malugereersimagaa. — Johannesi 6:66-71.
Ilinniarfigisinnaasavut:
2:4. Jiisusip Maria paasitippaa Guutip erneratut kuisimasutut Ataataminit qilammiusumit ilitsersorneqartariaqarluni. Jiisusip kiffartornini aallarteqqammeraluarlugu ’piffissani’ — tassa imminut suliassiissutigineqartoq, ilaatigut pilliutitut toqunissani, qaqugu naammassissanerlugu — nalunngilluinnarpaa. Allaat Maria qanigisaa iliuuserisassaanut — tassa Ataatami piumasaata naammassinissaanut — akuliuttussaanngilaq. Taamatut aalajangersimalluinnartigaluta Jehovamut kiffartortariaqarpugut.
3:1-9. Nikodemusi, juutit siuttuisa ilaat, marlunnik ilinniarfigisinnaavarput. Siullermik, Nikodemusi maniguuttuulluni, paasisimasalissuulluni anersaakkullu pisariaqartitaqarnerminik ilisimannilluni, sanasup ernera nikanartoq ilinniartitsisutut Guutimit aallartitaasutut akueraa. Ullumikkut kristumiut ilumoortut aamma maniguuttuusariaqarput. Aappassaanik, Jiisusip nunarsuarmiinnerani Nikodemusi taassumunnga ajoqersuganngornissaminut tunuarsimaarpoq. Tamanna immaqa pissuteqarpoq inunnut qununermik, killisiuisoqatigiinnut ilaasortatut inissisimaffeqarneranik imaluunniit pisuussutinut asannittuuneranik. Tamanna pingaarutilimmik ilinniarfigaarput, tassa taamaaleqqajaanerit ’sanningasulitsinnik [nappakkamik anniartitaaffitsinnik, NV] ersunnissatsinnut Jiisusimillu malinnittuarnissatsinnut’ ajoqutaatissanngilavut. — Lukasi 9:23.
4:23, 24. Pallorfiginninnerput Guutimit akuerineqarsinnaassappat sallusuissummut Biibilimi saqqummersinneqartumut naapertuuttariaqarpoq Guutillu anersaavanit illernartumit siulersorneqartariaqarluni.
6:27. „Inuussutissat piujuarlutik naassaanngitsumik inuussutaasussat“ sulissutiginissaat isumaqarpoq anersaakkut pisariaqartitatsinnik isumaginninniarluta iliuuseqartariaqartugut. Taamaaliorutta pilluassaagut. — Matthæusi 5:3.
6:44. Jehovap nammineq isumassorpaatigut. Oqaluussineq aqqutigalugu tamatta immikkut kajungilersilluta sallusuissutinillu Biibilimeersunik paasinninnissatsinnut atuinissatsinnullu anersaamigut illernartukkut ikiorluta ernerminut qanillisittarpaatigut.
11:33-36. Misigissutsinik ersersitsineq sanngiinnermut ersiutaanngilaq.
MALITTUARUK
Ukiumi 33-mi juutit poorskiat qanillimmat Jiisusi Betaniamut uterpoq. Nisanip 9-ani siutituup piaraanik qimusserluni Jerusalemimut iserpoq. Nisanip 10-ani naalaffiliaqqippoq. Ataatami aqqata naalannarsisitaanissaanik Jiisusip qinnutaa akillugu qilammit nipi ima tutsiuppoq: „Naalannarsisereerpara, naalannarsiseqqikkumaarparalu.“ — Johannesi 12:28.
Jiisusip ajoqersukkani kingullermik poorskimi nereqatigitillugit naggammik oqaaqqissaarpai qinnullugillu. Tigusaareernermi, killisiorneqareernermi kikiattugaareernermilu kingorna Jiisusi toqusunit makititaavoq.
Allassimaffiit pillugit apeqqutinut akissutit:
14:2 — Jiisusip ajoqersukkani qanoq qilammi ’inissaannik piareersaakkiartorniarpai’? Taamaaliorsinnaajumalluni Jiisusip angeruseq nutaaq atuutilersittariaqarpaa aammi nalinga Guutimut sassaallugu. Aamma kunngisut pissaaneqalertariaqarpoq, taava ajoqersugaasa tanitat qilammut makititaanissaat aallartissinnaalissaaq. — 1 Thessalonikamiut 4:14-17; Hebræerit 9:12, 24-28; 1 Petrusi 1:19; Saqqummersitat 11:15.
19:11 — Jiisusip imminik pisitsisoq Pilatusimut eqqartoramiuk Judasi Iskarioti eqqarsaatigaa? Jiisusip Judasi inulluunniit alla ataaseq eqqarsaatigigunanngilaa, toqumulli eqqartuunneqarnerminut pisooqataasut tamaasa eqqarsaatigigunarpai. Taakkununnga ilaapput Judasi, „palasiunerit Killisiuisoqatigiillu tamarmiusut“ aamma „inuit“ Barabbap iperagaatinneqarnissaa qinnutigeqqullugu kajumissaarneqartut. — Matthæusi 26:59-65; 27:1, 2, 20-22.
20:17 — Sooq Jiisusip Maria Magdalene ima oqarfigaa: „Uninngateqinanga“? Mariap Jiisusi qimagutsaaliorsimagunarpaa isumaqarami qilaliarnialersoq, takoqqissanngissorigamiullu. Suli qimalernagit uppernarsaaviginiarlugu oqarfigaa qimagutsaaliuunnarnani toqusunit makissimanerminik ajoqersukkani oqaluttuukkiartussagai.
Ilinniarfigisinnaasavut:
12:36. ’Qaamasumut qitornanngorniarluta’, imaluunniit qaammaqqusersuisunngorniarluta, Guutip oqaasianeersumik eqqorluartumik ilisimasaqalertariaqarpugut. Taava ilisimasaqarneq taanna atorlugu allat anersaakkut taarsiorunnaartinniarlugit Guutillu qaamasuaniilersinniarlugit ikiortariaqarpavut.
14:6. Jiisusi Kristusi aqqutiginagu allakkut Guutimit akuerineqarsinnaanngilagut. Jiisusimut uppernikkuinnaq maligassiaanillu malinninnikkuinnaq Jehovamut qanillisinnaavugut. — 1 Petrusi 2:21.
14:15, 21, 23, 24; 15:10. Guutip Ernerullu asanninneraniittuarsinnaavugut naalalluta Guutip piumasaatut iliornikkut. — 1 Johannesi 5:3.
14:26; 16:13. Jehovap anersaava illernartoq ilinniartitsisigaarput eqqaasitsisorisarlugulu. Aamma sallusuissutinik paasinarsisitseqataasarpoq. Tassa ilisimasaqarnikkut, ilisimassutsikkut, paasisimasaqassutsikkut naliliisinnaassutsikkullu alliartornitsinni eqqarsarsinnaassusittalu pitsanngorsarnerani iluaqutigisinnaavarput. Taamaattumik qasusuilluta qinusariaqarpugut, pingaartumik anersaaq taanna qinnutigigaangatsigu. — Lukasi 11:5-13.
21:15, 19. Jiisusip Petrusi aperaa ’ilaminit allanit’ [„taakkunannga“, NV], tassa aalisakkanit siunerminiittunit, asaneruneraani. Taamaalilluni Jiisusip erseqqissarpaa Petrusi aalajangertariaqartoq piffissani tamaat atorlugu Jiisusi malissanerlugu imaluunniit aalisartuuinnassanerluni. Qanortoq iivangkiiliumik oqaluttuat atuarnerisigut kajungerisinnaasatsinnit allanit tamanit Jiisusimik asanninnerunnissatsinnik aalajangiusimanninnerulerta. Aap, uummatikkut iluunngarluta malittuartigu. (w08 04/15-E)
[Qupp. 31-mi assiliartaq]
Nikodemusimik oqaluttuaq qanoq ilinniutigisinnaavarput?