„Kina arlarsi ilisimasuullunilu sianisuujua?“

„Kina arlarsi ilisimasuullunilu sianisuujua? Taamaattoqaruni suliamigut takutilligit, torersumik inuulluni ilisimasutullu piuaalluni [saamalluni, NV].“ — JAAKU 3:13.

1, 2. Ilisimasuunerarneqartorpassuit pillugit qanoq oqartoqarsinnaava?

ILLIT kina ilisimassuseqavissutut isigaajuk? Immaqa angajoqqaatit, utoqqarluunniit, immaqaluunniit universitetimi ilinniartitsisoq? Illit kia ilisimasuuneranik paasinninnerit immaqa peroriartorninni pissutsinit pissutsinilluunniit allanit sunnerneqarsimavoq. Guutilli kiffaasa pingaarnerpaamik soqutigaat Guutip isaani kikkut ilisimassuseqavinnersut.

² Silarsuarmi ilisimasuunerarneqartut tamakkeratik Guutip isaani ilisimasuupput. Jobi angutinut imminnut ilisimasutut oqalunnerartunut ima oqarpoq: „Akornassinni ilisimasumik takusassaqanngilanga.“ (Jobi 17:10) Apustili Paulusi Guuti pillugu ilisimasaqarnermik ajattuisut pillugit ima allappoq: „Ilisimasuunerartaraluarlutik sianiitsunngorput.“ (Romamiut 1:22) Aamma pruffiiti Esaja aqqutigalugu Jehova toqqaannartupilussuarmik ima oqarpoq: „Eqqanaq taakku imminnut ilisimasuutittut.“ — Esaja 5:21.

3, 4. Piviusumik ilisimassuseqarumalluni suna pisariaqarpa?

³ Tassa paasiniartariaqarparput qanoq ililluni piviusumik ilisimassuseqalertoqarsinnaanersoq taamaalillunilu Guutimit qanoq iluarisaasoqalersinnaanersoq. Ussatit 9:10-mi ilikkagaqarfigilluarneqarsinnaasumik ima paasissutissinneqarpugut: „[Jehovamik] mianerinninneq ilisimassusermut aallarniutaavoq, Illernartuusumik ilisimanninneq silaqassuseqalersitsisarpoq.“ Tassa ilisimassuseqartoq Guutimik eqqortumik mianerinnittariaqarpoq taassumalu najoqqutassiaanik ataqqinnittariaqarluni. Silaqassutsikkuinnarli Guutip piuneranik aamma najoqqutassiaqarneranik akuerinninneq naammanngilaq. Tamannaana ajoqersukkap Jaakup uagutsinnut eqqarsaatigeqqugaa. (Atuaruk Jaaku 3:13.) Oqaatsit ukua maluginiariakkit: ’Suliamigut takutilligit torersumik inuulluni.’ Piviusumik ilisimassuseqarneq oqaatsitigut iliuutsitigullu ullut tamaasa ersersinneqartariaqarpoq.

⁴ Piviusumik ilisimassuseqarnermut ilaatigut ilaapput naliliilluarsinnaassuseqarneq aamma ilisimasanik paasisanillu kinguneqarluartumik inuunermi atuisinnaaneq. Iliuutsit suut taamatut ilisimassuseqarnitsinnut ersiutaassappat? Jaaku ilisimassuseqartut iliuusiini ersertartunik arlalinnik eqqaasaqarpoq. * Jaakup oqaasii uppeqatitsinnut  ilagiillu avataanniittunut attaveqarluarnissatsinnut qanoq iluaqutigisinnaavavut?

Iliuutsit ilisimassuseqavissumut ilisarnaataasut

5. Ilisimassuseqavissup ileqqut suut ilisarnaatigissavai?

⁵ Maluginiarnarpoq Jaakup ilisimassuseq ileqqorissaarnermut atassusermagu. Jehovamik mianerinninneq ilisimassusermut aallarniutaammat, ilisimassuseqartoq Guutip najoqqutassiaanut naapertuuttumik ileqqoqarniassaaq. Pavannga pisumik ilisimassuseqarneq inunnguuserinngilarput, piviusumilli ilisimassuseqalersinnaavugut aalajangersimasumik Biibilimik atuartarnitsigut atuakkatsinnillu eqqarsaatiginneqqissaartarnitsigut. Tamanna Efesosimiut 5:1-imi kajumissaarneqarnitsitut iliornissamut iluaqutigissavarput: „Guuti maligassarisiuk.“ Iliuutsivut Guutip pissusiinut naapertuunnerujartortillugit ilisimassuseq iliuutsitsinni erseqqinnerujartuinnassaaq. Jehovap aqqutigisai inuit aqqutigisaannit qutsinnerungaarput. (Esaja 55:8, 9) Taava Jehovap periaasii malikkaangatsigik, ilagiit kristumiut avataanniittut takussavaat inunnit allanit allaanerussuteqartugut.

6. Sooq saamasuuneq Guutimik malinninnermut uppernarsaataava, pissuserlu taanna sumut atassuserneqarpa?

⁶ Jaaku allappoq Jehova malissinnaagipput ilaatigut ’ilisimasutut saamasuunitsigut’. Saamasuuneq inussiarnersuunermut qajassuartuunermullu atassuserneqartaraluartoq, saamasoq aalajaatsumik pissuseqarsinnaavoq. Saamasuunini oqimaaqatigiissumik iliuuseqarnissaminut iluaqutigissavaa. Jehova killeqanngitsumik pissaaneqaraluarluni saamasuuvoq, taamaattumillu taassumunnga qanillinissarput qunuginngilarput. Guutip ernerata Ataatami saamanera ima ersersilluartigaa ima oqarsinnaalluni: „Ornissinga tamassi suleruluttusi nanertugaasusilu, nukissaqalerseqqissavassi. Nammaatara ilissinnut pisissiuk, ilinniarfigisingalu saamagama uummatikkullu makitajuikkama; tarnissigullu nukissaqalissaasi.“ — Matthæusi 11:28, 29, NV; Filippimiut 2:5-8.

7. Sooq Mosesi saamasuunermigut maligassaalluarpa?

⁷ Biibilimi maluginiarnartumik saamasuusut allat oqaluttuarineqarput. Taakkua ilagaat Mosesi. Taanna pingaarutilimmik akisussaaffilerneqarsimavoq, taamaakkaluartorli ’inunnit nunarsuarmiittunit tamanit anneruniajuinnerpaasutut’, imaluunniit saamanerpaatut, oqaluttuarineqarpoq. (4 Mosesi 11:29; 12:3) Aammattaaq maluginiaruk Jehovap Mosesimik nakussatsitsinera, taassuma imminut suliassiissutigineqartut suliarisinnaaniassammagit. Jehovap siunertani naammassineqartikkumallugu inuit saamasut atortarpai.

8. Inuit naammalluinnanngitsut qanoq ilillutik ’ilisimasutut saamasuusinnaappat’?

⁸ Tassa inuit naammalluinnanngitsut ’ilisimasutut saamasuusinnaapput’. Uagummi? Qanoq ililluta taamatut pissuseqarneq eqqarsaatigalugu siumukarsinnaavugut? Saamaneq Jehovap anersaavata illernartup inerititaasa ilagaat. (Galatiamiut 5:22, 23, NV) Tassa Guutip anersaava qinnutigisinnaavarput tamatumalu inerititaanik inerititaqarniarluta iliuuseqarniarsinnaalluta, qularinagu Guutip saamanerunissatsinnut, imaluunniit maniguunnerunissatsinnut, uagutsinnik ikiuiumaarnera. Tussiaasiortup neriorsuutaani matumani taamaaliornissatsinnut kajumissaarneqarpugut: „[Guutip] maniguuttut ingerlatittarpai naapertuilluarnikkut, ajoqersorlugillu aqqutigeqqusaminik.“ — Tussiaat 25:9.

9, 10. Saamasuunermut tunngatillugu qanoq iliortariaqarpugut, aamma sooq?

⁹ Tamatumunngali tunngatillugu siumukarumalluni iliuuseqangaatsiarnissaq pisariaqarsinnaavoq. Immaqa assigiinngitsunik pissuteqarluta saamasuunissarput uagutsinnut pissusissamisuunngilaq. Aamma imaassinnaavoq inuit ilagisartakkatta ilaasa saamasuuneq sanngiinnertut isigigaat. Oqartarput „ajortoq ajortoqataanik akineqartariaqartoq“. Tamannali ilumut taamaattussaava, silatusaarnerua? Illit illunni ikuallattoqalerpat, taava inneq uuliamik imermilluunniit qamissaviuk? Innermut uuliamik kueraaneq ajornerulersitsiinnassaaq, imermilli kueraaneq kissaatigisatut kinguneqassaaq. Oqqannermut tunngatillugu aamma taamaappoq. Siunnersuut Biibilimeersoq imaappoq: „Akissut sallaatsoq kamannaveersaartitsisarpoq, oqaatsilli ajuallannartut uumitsatsitsisarput.“ (Ussatit 15:1, 18) Tassa tullianik — ilagiinni ilagiilluunniit avataanni — aaqqiagiinngittoqarpat saamasuunitsigut ilisimassusermik piviusumik ersersitsisinnaavugut. — 2 Timotheusi 2:24.

¹⁰ Eqqaaneqareersutut inuppassuaqarpoq silarsuup anersaavanit sunnerneqarsimallutik inussiarnernatillu eqqissisimanatillu oqimaaqatigiissaarilluarsinnaanngitsunik, kisianni assortuiumatuujullutillu makitasuujusunik. Jaakup tamanna nalunngilaa, ilagiillu mianersoqquai anersaamit tamatumannga  mingutsinneqaqqunagit. Taassuma siunnersuutai sunik allanik ilinniarfigisinnaavavut?

Ilisimassuseqanngitsunut ilisarnaataasut

11. Misigissutsit pissutsillu suut piviusumik ilisimassuseqarnermut naapertuutinngillat?

¹¹ Jaakup misigissutsit ajortut pissuserineqartussallu piviusumik ilisimassuseqarnermut naapertuutinngitsut ammasumik allaatigai. (Atuaruk Jaaku 3:14.) Sinngatussuseq imminullu angisuutikkumassuseq, imaluunniit assortuiumatussuseq, pissusiupput anersaamut tunngasuunatik uinimmut atasut. Uinimmut atasumik eqqarsartaaseqarneq ingasatsikkaangat qanoq pisoqartarnersoq eqqarsaatigeriaruk. Upperisarsioqatigiit „kristumiuusut“ assigiinngitsut arfinillit tamarmik immikkut Annaassisup Ilerrata Oqaluffianik Jerusalemimiittumik, Jiisusip ilerranut inissisimaffiusorineqartumi sananeqarsimasumik, piginneqataatinneqarput. Upperisarsioqatigiit taakkua isumaqatigiinngittuarsimapput. 2006-imi atuagassiami Time-imi allaatigineqarpoq mattuttut „nalunaaquttap-akunnerpassuini oqqassimasut . . . naneruuserferujussuillu atorlugit imminnut saassussimasut“. Taakkua tatigeqatigiinngingaarmata oqaluffimmut matuersaat musliimiusumut tunniunneqarsimavoq.

12. Ilagiinni ilisimassuseqartoqanngippat qanoq pisoqarsinnaava?

¹² Ilagiinni kristumiuni ilumoortuni taamatut ingasattumik isumaqatigiinngittoqartussaanngilaq. Taamaakkaluartorli inuttut naammalluinnanngissuseq pissutigalugu inuit ilaat ilaannikkut namminneq paasinnittaatsiminnik uteriillutik aalajangiusimannittarput. Tamanna oqqannernik isumaqatigiinnginnernillu kinguneqartarpoq. Apustilip Paulusip maluginiarpaa ilagiinni Korinthimiittuni taamaattoqartoq, taamaattumillu ima allappoq: „Sinngaginnittarassi saqitsaattarlusilu taava uinimmut atannginnerpisi inuttorluinnarlu inuullusi [inuit ileqquisigut saqisinnarpusi ilaa, 1936]?“ (1 Korinthimiut 3:3) Ukiuni hundredelinni siullerni ilagiinni pissutsit alianartut sivisujaamik atuussimapput. Taamaattumik ullumikkut akunnitsinni taama ittumik anersaaqartoqaleqqunagu mianersortariaqarpugut.

13, 14. Uinimmut atasumik eqqarsartaaseqarnerup qanoq ersersinneqartarneranik assersuuteqarit.

¹³ Qanoq ililluni akunnitsinni taama ittumik anersaaqartoqalersinnaava? Tamanna amerlanertigut annikitsualutsigut aallartittarpoq. Assersuutigalugu naalagaaffilersaarfiliornermi qanoq iliortoqarnissaa pillugu assigiinngitsunik isumaqartoqarsinnaavoq. Immaqa qatanngutip siunnersuutini malillugu iliortoqannginnera naammagittaalliutigaa aalajangiunneqartunillu iluarinninnginnini nipituuliuutigalugu. Immaqa allaat sanaqataajumajunnaarpoq. Puiorpaa eqqissineq aalajangersimasumik suleriaaseqarnermit ilagiinni suliassamik naammassinninnissamut aalajangiisuunerusartoq. Jehova assortuiumatussusermik pilluaqqusinani, eqqissinartumik saamasumillu anersaaqarnermik pilluaqqusisarpoq. — 1 Timotheusi 6:4, 5.

¹⁴ Allamik assersuuteqariarta. Immaqa utoqqaanertat ilagiinniittut utoqqaanertaqatimik ukiuni arlalinni kiffartorsimasup piumasaqaatinik Biibilimiittunik eqqortitsiunnaarsimanera maluginiarpaat. Ilagiinnik nakkutilliisoq tikeraarmat, qatanngutip angutip eqqortitsiunnaarsimanera immikkullu siunnersorneqaraluarnini malillugu iliorsimannginnera taassumunnga ilisimatitsissutigineqarpoq. Taamaattumik taassuma utoqqaanertaajunnaarsinneqarnissaata unnersuussutigineqarnera nakkutilliisup isumaqataaffigaa. Qatanngutip taassuma tamanna qanoq isumaqarfigaa? Utoqqaanertanngoqqissinnaaniassagami maniguulluni saamallunilu utoqqaanertat isumaqatigiillutik aalajangigaat siunnersuutillu Biibilimiittut akuerissavai piumasaqaatinillu Biibilimiittunik eqqortitsinissani  aalajangiusimassallugu? Imaluunniit utoqqaanertatut kiffartornermik immikkut pisinnaatitaaffeqarunnaarnini pissutigalugu ajuallallunilu soqutigineqanngitsutut misigissava? Aamma ima aperisoqarsinnaavoq: Sooq qatanngutip utoqqaanertatut piukkunnartuunini aalajangiusimaannassavaa, uffa utoqqaanertat allat tamarmik utoqqaanertaanissamut piukkunnaateqannginneraraanni? Utoqqaanertat aalajangigaannik akuerinninnermigut siunnersuutaallu malillugit iliornermigut maniguukkuni silatusaarnerungaassaaq!

15. Sooq Jaaku 3:15, 16-imi siunnersuutigineqartoq isumassarsiarititaasoq assut pingaaruteqarpa?

¹⁵ Tamatumunnga assingusumik isiginnittaaseqarneq allatiguttaaq ersersinneqartarpoq. Qanorluunniilli atugaqaraluarutta sinnganaveersaarnissaq assortuiumatunaveersaarnissarlu ilungersuutigisariaqarpavut. (Atuaruk Jaaku 3:15, 16.) Ajoqersukkap Jaakup taamatut isiginnittaaseqarneq ’nunamut atasuunerarpaa’, ilisimassusermik pavannga pisumik tunngaveqanngimmat. ’Tarnimut atasuuvoq’, uinimmut atasumik eqqarsartaaseqarnermik tunngaveqarami. Aammattaaq ’anersaapilummut atasuuvoq’, anersaapiluit pissusiinik ersersitsimmat. Kristumiup taamatut pissuseqaqqajaanissaa eqqortuliornerussanngilaq.

16. Suna iliuuserineqartariaqarpa, aamma qanoq ililluta siumukartuarsinnaavugut?

¹⁶ Taamatut isiginnittaaseqarunnaarumalluta tamatta imminut misissoqqissaarutta silatusaassaagut, ingammilli ilagiinni ilinniartitsisuusut taamaaliortariaqarput. Tamanna imaannaanngilaq, tamattami naammalluinnanngitsuuvugut silarsuarmillu matumannga sunnerneqartarluta. Tamanna qummukajaakkut quasattukkut marullulikkullu majuarnermut assersuunneqarsinnaavoq. Najummatserfissaqanngikkutta sisoqqajaaginnassaagut. Siunnersuutinilli Biibilimeersunik tigulluartitaarinikkut Guutillu silarsuaq tamakkerlugu ilagiissaasa ikiuineratigut siumukartoqarsinnaavoq. — Tussiaat 73:23, 24.

Pissutsit piviusumik ilisimassuseqartut ilisarnaatigisaat

17. Ilisimassuseqartoq ajortuliornissamut ussernartorsiornartunik nalaataqaruni qanoq periassava?

¹⁷ Atuaruk Jaaku 3:17. Pissuserineqartussanik ’ilisimassusermut pavannga pisumut’ ilisarnaataasunik misissuinerput iluaqutigissavarput. Minguitsuuneq iliuutsitsigut pissutiginiakkatsigullu simerneqannginnertut mingutsinneqarsimannginnertullu paasisariaqarpoq. Ajortut suulluunniit ingerlaannaq itigartittariaqarpavut. Taamatut qisuariarneq pissusissamisoorluinnartussaavoq. Immaqa seeqquit qalequtaata ataatunginnguatigut ujalukkut nakorsamit kaataaqqamik anaatilaarnikuuvutit. Niut qisuariatallappoq. Aalariarnera pissusissamisoorluinnartumik pivoq; eqqarsaatigisariaqanngilalluunniit. Ajortuliornissamut usserneqaraangatta aamma taamaattariaqarpoq. Minguissuserput nalunngeqatiginnissuterpullu Biibili tunngavigalugu ilinniartinneqarsimasoq kajumississutigalugit ajortunik pissusissamisoorluinnartumik itigartitsisariaqarpugut.  (Romamiut 12:9) Taamatut qisuariartut Biibilimi oqaluttuarineqarput, soorlu Josefi Jiisusilu. — 1 Mosesi 39:7-9; Matthæusi 4:8-10.

18. Qanoq ililluni (a) ilagiinni eqqissinermik akornusersuisoqarsinnaava? (b) eqqisseqatigiissitsisoqarsinnaava?

¹⁸ Pavannga pisumik ilisimassuseqassagaanni aamma eqqisseqatigiissitsisuunissaq pisariaqarpoq. Tassa imaappoq makitasuujunata, assortuiumatuujunata eqqissinermulluunniit akornutaasumik iliuuseqartarnata. Jaaku versini tulliuttuni ima allappoq: „Iluarneq eqqissinermi siaruartikkat inerititaraat, eqqissisitsisullu pisassaraat.“ (Jaaku 3:18) Maluginiaruk oqaaseq „eqqissisitsisut“. Ilagiinni eqqissisitsisutut, imaluunniit eqqissinermik akornusersuisutut, ilisimaneqarpugut? Allat isumaqatiginngikulavavut, ajuallajavugut imaluunniit allanik ajuallatsitsisarpugut? Allat inuttut pissusitsinnik akuerinninnissaat piumasaraarput, imaluunniit inuttut pissutsinik allat pissutissaqarluarlutik ajuallaatigisartagaannik pissuseqarunnaarnissarput maniguulluta sulissutigaarput? Isumakkeerfiginneriaannaanitsigut allallu kukkunerinik puiueriaannaanitsigut allanik eqqisseqateqarnissatsinnik ilungersuutiginnittarnerput ilisimaneqaatigaarput? Tamatumunnga tunngatillugu ilisimassusermik pavannga pisumik ersersitsinissaq eqqarsaatigalugu ineriartornerusariaqarnerluta paasiniarlugu, unneqqarilluta imminut misissorneq iluaqutigisinnaavarput.

19. Qanoq ililluni ingasaassinianngitsuuneq ilisimaneqaatigineqalersinnaava?

¹⁹ Ilisimassusermut pavannga pisumut ilisarnaataasunik allaaserinninnermini Jaakup ’saamasuuneq’, oqaaseq grækerisut allassimaqqaarfiit naapertorlugit ’ingasaassinianngitsuuneq’-mik isumaqartoq, aamma eqqartorpaa. Allat isumaannut, najoqqutassiamik Biibilimeersumik unioqqutitsinerunngikkaangat, akuersiinnarumasarnitsigut allallu uagut isumarput naapertorlugu iliornissaannik pingaartitsivallaannginnitsigut ingasaassinianngitsuunerput ilisimaneqaatigaarput? Inussiarnersuunerput oqaloqatikkuminartuunerpullu ilisimaneqaatigaarput? Taamaappat, ingasaassinianngitsuunissarput ilikkarsimassavarput.

20. Pissuserineqartussat sammeriikkavut pissuserigaangatsigit tamanna qanoq kinguneqartarpa?

²⁰ Ilagiit nuannersuusarput qatanngutit pissuserineqartussat Jaakup allaatigisai pissuseriniarlugit suliniuteqaraangata. (Tussiaat 133:1-3) Saamasuunerput, eqqisseqatigiissitsisuunerput ingasaassinianngitsuunerpullu pissutigalugit immitsinnut attaveqarlualissaagut, aamma ’pavannga pisumik ilisimassuseqarnitsinnut’ ersiutaassapput. Aamma taamatut pissuseqarnerput Jehovap allanik isiginnittarneratut isiginninnissamut qanoq iluaqutigisinnaaneripput allaaserisami tulliuttumi sammineqassaaq.

[Quppernerup ataani ilanngussaq]

Uku nassuiarsinnaavigit?

• Kristumiup suna piviusumik ilisimassuseqalissutigisarpaa?

• Piviusumik ilisimassuseqarnermut tunngatillugu ineriartorumalluta qanoq iliorsinnaavugut?

• ’Pavannga pisumik ilisimassuseqartoqanngikkaangat’ tamanna qanoq ersertarpa?

• Pissuserineqartussat suut suli annerusumik pissuserilerniarlugit aalajangiusimasariaqarpavut?

[Atuaqqissaarnermi apeqqutit]

[Qupp. 23-mi assiliartaq]

Ullumikkut ilagiinni qanoq isumaqatigiinngittoqalersinnaava?

[Qupp. 24-mi assiliartaq]

Ajortunik itigartitsisarneq ilinnut pissusissamisoorpa?