Ilissi inuusuttuususi, Pinngortitsisersi eqqaamasiuk

„Pinngortitsisit eqqaamaniaruk inuusuttuunerpit ulluini.“ — OQALUUSSISARTUP OQAASII 12:1.

1. Jehovap qanoq ililluni ersersippaa pallorfiginnitsiminik inuusuttunik tatiginninnini?

INUUSUTTUT kristumiut Jehovap erlinnartutut isigai, aamma taakku taassuma isaani kanernertut inuummarissinartigipput. Siulittuutigaa angutit arnallu inuusuttut ernermi sakkutuui kiffartoqatiginiarlugit ’kajumillutik sassarumaartut ullormi Kristusip sorsuffigisaani’. (Tussiaat 110:3) Siulittuut tamanna piffissami inuit amerlanersaasa pikitsitsiumatuffianni, Guutimik soqutiginninngiffianni aamma imminnik aningaasarsiornermillu ulapputiginniffianni eqquuttussaasimavoq. Jehovalli nalunngilaa inuusuttut pallorfiginnitsini allaanerujumaartut. Ilumut ilissinnik, qatanngutinik angutinik arnanillu inuusuttunik, tatiginningaarpoq!

2. Jehovamik eqqaamanninneq qanoq paasisariaqarpa?

² Takorlooriaruk Guuti qanoq nuannaartigisartoq inuusuttut imminik Pinngortitsisutut eqqaamannittut takugaangamigit. (Oqaluussisartup oqaasii 12:1) Soorunami Jehovamik eqqaamanninneq tassaaginnanngilaq taassuminnga eqqarsaatiginninneq. Jehovamik eqqaamanninneq tassaavoq taassuma iluarisaanik iliuuseqarnerput ulluinnarnilu taassuma inatsisaanit najoqqutassiaanillu siulersortinnerput. Aamma Jehovamik tatiginninnitsitut paasisariaqarpoq, nalunnginnatsigumi taassuma ingerlalluarnissatsinnik kissaakkaatigut. (Tussiaat 37:3; Esaja 48:17, 18) Illit Pinngortitsisit taamatut isigaajuk?

’Jehova tatigiuk uummatikkut iluunngarlutit’

3, 4. Jiisusip qanoq ililluni ersersippaa Jehovamik tatiginnilluni, aamma sooq uaguttaaq taassuminnga tatiginninnissarput pingaaruteqarpa?

³ Guutimik tatiginninnermi maligassiuilluarnerpaaq soorunami tassaavoq Jiisusi Kristusi. Taassuma Ussatit 3:5, 6-imi allassimasut uku maleruarpai: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ Jiisusip kuisinnerata kinguninngua Saatanip taanna ornippaa silarsuarmi pissaaneqalernissamik ataqqisaalernissamillu neqeroorutiminut akuersitinniarsaralugu. (Lukasi 4:3-13) Jiisusili tammartinneqanngilaq. Taassuma nalunngilaa maniguunnikkut Jehovamillu mianerinninnikkut „pisuussutit ataqqinaallu inuunerlu“ ilumoortut anguneqartartut. — Ussatit 22:4.

⁴ Ullumikkut silarsuaq piumatunermit namminissarsiornermillu aqunneqarpoq. Taama ittunik avatangiiseqartilluta Jiisusip maligassiaa malikkutsigu silatusaassaagut. Aamma eqqarsaatigiuk Saatani qanorluunniit iliorusummat Jehovap kiffaanik aqqutikkut nerukitsukkut inuunermut sammisukkut ingerlajunnaarsitsiniarluni. Taassuma kissaatigaa kikkut tamarmik aqqut silittoq tammarfimmut sammisoq ingerlavigissagaat. Taassumannga tammartitaaqinak! Pinngortitsisinnilli eqqaamanninnissat aalajangiusimajuk. Taanna tatigilluinnaruk, aamma „inuunivik“, qanittukkut piviusunngortussaq, tigulluartitaaruk. — 1 Timotheusi 6:19.

Ilissi inuusuttuususi, silatusaaritsi!

5. Silarsuup matuma siunissaa qanoq ippasippa?

⁵ Inuusuttut Pinngortitsisiminnik eqqaamannittut ilutiminnit silatusaarnerusarput. (Atuaruk Tussiaat 119:99, 100.) Guutip isiginnittaasiatut isiginnittaaseqarput, taamaattumillu nalunngilluinnarpaat silarsuup matuma siunissaa qanoq neriulluarnanngitsigisoq. Ilissi inuusuttuususi, piffissaq inuuffigisimasarsi sivisuallaanngikkaluartoq, qularnanngitsumik malugisimassavarsi inuit ataatsimut isigalugit siunissaq pillugu siooranerulersimallutillu isumakulunnerulersimasut. Ilimanarpoq mingutsitsineq, nunarsuup kissatsikkiartornera, orpippassuit nungusarneqarnerat ajornartorsiutillu assingusut pillugit atuarfimmi tusagaqarsimanissarsi. Inuit pissutsit taamatut ingerlanerat isumakuluutigaat, Jehovalli Nalunaajaasuisa kisimik paasilluinnarpaat tamakkua tamarmik Saatanip silarsuaata  piuneerunneqarnissaanut nalunaaqummut ilaasut. — Saqqummersitat 11:18.

6. Inuusuttut ilaat qanoq tammartinneqarsimappat?

⁶ Ajoraluartumik inuusuttut Guutimut kiffartortut ilaat anersaakkut eqqumaniarpiarunnaarsimapput silarsuullu matuma qanoq piffissakitsigineranik eqqarsaatiginnikkunnaarsimallutik. (2 Petrusi 3:3, 4) Allat ikinngutipalaaqarneq pornografiiluunniit pissutigalugu ingasattumik ajortuliornissaminnut usserneqarsimapput. (Ussatit 13:20) Maanna naggatissaq taama qanitsigitillugu Guutimit iluarisaajunnaarutta qanoq alianartigissagaluarpa! Ilinniarfigeriartigilli Israelikkunnut ukiumi 1473-imi u.n.s. pisimasut, taakku Moabip narsartaani, nunap neriorsuutigisap killeqarfippiaani, tammaarsimaarmata.

Anguniagartik angunngitsiarlugu nakkaannarput

7, 8. (a) Saatanip Moabip narsartaani periaaseq suna atorpaa? (b)Ullumikkut Saatani qanoq periaaseqarpa?

⁷ Taamanikkut Saatanip erseqqissumik kissaatigaa Israelikkut taakkununnga neriorsuutigineqartumik kingornussinngitsoortinnissaat. Pruffiitimik Bileamimik taakkuninnga perloqqusisitsiniaanini iluatsinngimmat peqqusersusaarnerulerpoq — taakkua Jehovamit pilluaqqusaanissaannut piukkunnarunnaarsinniarsarai. Diaavulup arnat ajuutiginartut Moabikkuusut nakutitsiniutitut atorpai, maannalu siullermernit iluatsitsineruvoq. Israelikkut Moabikkut arnartaat kinguaassiuutitigut inuunerloqatigilerpaat Ba’al-Peorimillu pallorfiginnilerlutik! Israelikkut kingornussarsiassaminnut erlinnangaartumut, nunamut neriorsuutigisamut, qanillivikkaluarlutik, taakkua ilaat 24.000-it missaanniittut toqupput. Alianassusia! — 4 Mosesi 25:1-3, 9.

⁸ Uagut ’nuna neriorsuutigisaq’ pitsaanerungaartoq — pissutsit aaqqissuussaanissaat nutaaq — qanilliartorasuarparput. Ullumikkuttaaq Saatanip kinguaassiuutitigut inuunerlunneq Guutip innuttaanik ajortunngortitsiniutitut atorpaa. Silarsuarmi ileqqussatigut najoqqutarineqartut ima ajortunngorsimatigipput kinguaassiuutitigut inuunerlunneq nalinginnaalluinnartutut suiaassuseqammillu atoqateqartarneq nammineq aalajangigassanut tunngasutut isigineqarlutik. Qatanngut arnaq kristumiu ima oqarpoq: „Taamaallaat uagutsinni naalagaaffilersaarfimmilu meeqqama ilinniartarpaat suiaassuseqammik atoqateqartarneq aappariinnerullu avataatigut aamma katissimanani atoqateqartarneq Guutip isaani eqqunngitsuusut.“

9. Inuusuttuunerup nalaani qanoq pisoqarsinnaava, inuusuttullu tamanna qanoq anigorniarsinnaavaat?

⁹ Inuusuttut Pinngortitsisiminnik eqqaamannittut nalunngilaat kinguaassiuutitigut atoqatigiinneq tunissutaasoq illernartoq inuunermut meeqqiorsinnaanermullu tunngassutilik. Taamaattumik akueraat taamaallaat Guutip maleruagassiai naapertorlugit, tassa aappariinnermik aaqqissuussinerup iluani, kinguaassiuutitigut atoqatigiittoqartariaqartoq. (Hebræerit 13:4) Piffissamili kinguaassiuutitigut pilerissutsit sakkortunerpaaffianni naliliisinnaajunnaarsitsisinnaaffiannilu ileqqussatigut minguitsuujuarnissaq ilungersunarsinnaavoq. Kanngunartunik  eqqarsaateqaleruit qanoq iliorsinnaavit? Ineriartornartut eqqarsaatiginiarnerunissaannut ikioqqullutit Jehova qamannga pisumik qinnuigisinnaavat. Jehovap ilumoorlutik imminik saaffiginnittut tusarnaartuaannarpai. (Atuaruk Lukasi 11:9-13.) Allat ineriartornartut, assersuutigalugu uppernermut nakussatsissutaasut, pillugit oqaloqatigisarukkit, minguitsunik ajunngitsunillu eqqarsaateqarniarnerusinnaassaatit.

Silatusaarlutit pitsaasunik anguniagaqarit!

10. Qanoq ajortumik isiginnittaaseqarusunngilagut, aamma imminut qanoq aperisinnaavugut?

¹⁰ Silarsuarmi inuusuttorpassuit soqqusaatsumik pissusilersortarnerannut aliikkutassaannarnillu sammisaqarniartarnerannut pissutaasut ilaat tassaavoq takorluugaqannginnerat, anguniagaqannginnerat — siunissamut qularnaatsumik neriuuteqannginnerat Guutimillu siulersorneqannginnerat. (Ussatit 29:18) Taakku Esajap nalaani Israelikkutut ilumuunngitsutut ’tipaatsunnissamik nuannaarnissamillu’ aamma ’nerinissamik erngunnissamillu’ pingaarnerpaatitsisutut ipput. (Esaja 22:13) Taakkua usorinagit, Jehovap kiffaminut ilumoorfiginnittunut neriuutissiissutaanik pingaaruteqangaartumik eqqarsaatiginninnissaq pitsaanerunnginnerpa? Illit Guutimut kiffartortutut inuusuttutut silarsuassaq nutaaq pissangallutit qilanaaraajuk? ’Neriuutip pilluarnartup’ Jehovap ilinnut neriuutissiissutaata ’naammassineqarnissaa utaqqitillugu, silatusaarniarlutit’ sapinngisat tamaat iliuuseqarpit? (Titusi 2:12, 13) Apeqqummut tamatumunnga illit akissutit anguniakkannut inuuninnilu pingaarnerpaatitannut sunniuteqassaaq.

11. Sooq kristumiut inuusuttut suli atuartut atuarnerminnut tunngatillugu eqiasuittariaqarpat?

¹¹ Innuttaaqatigiinni kissaatigineqarpoq inuusuttut nukitik silarsuarmi matumani anguniagaqarnermut atussagaat. Soorunami ilissi suli atuartuususi tunngaviusumik ilinniagaqarluarumallusi eqiasuittariaqarpusi. Anguniagarsimi tassaaginnanngilaq suliffissarsinissarsi, aammali tassaavoq ilagiinni iluaqutaallusilu qiimmassaataanissarsi oqaluussinermilu naammassisaqarluartalernissarsi. Tamanna angujumallugu inunnut allanut attaveqallaqqissuusariaqarpusi, eqqarsallaqqissuusariaqarpusi aamma eqqissisimallusi ataqqinnillusilu inunnik eqqarsalersitsiniarlusi oqaloqatiginnillaqqissuusariaqarpusi. Inuusuttulli Biibilimik atuaqqissaartartut najoqqutassianillu tamatumaniittunik inuunerminni maleruaaniartartut pitsaanerpaamik ilinniartitaasarput, aamma pilluarnartumik naassaanngitsumillu siunissaqarnissaminnut tunngaviliilluartarput. — Atuaruk Tussiaat 1:1-3. *

12. Kikkut maligassiaat ilaqutariit kristumiut malittariaqarpaat?

¹² Israelimi angajoqqaajusut meeqqamik ilinniartinneqarluarnissaat pingaartippaat. Ilinniartinneqarnerat inuunermi sunut tamangajannut tunngavoq, pingaartumik Guutimut pallorfiginninnermut attuumassuteqartunut tunngalluni. (5 Mosesi 6:6, 7) Israelikkut inuusuttortaasa Jehovamik mianerinnittut, assersuutigalugu angajoqqaatik allallu imminnit utoqqaanerusut, tusarnaaraangamikkit ilisimasaqarnermiinnaanngitsoq, aammali ilisimassusermik, paasisimasaqassusermik, paasinnissinnaanermik eqqarsarsinnaanermillu — pissutsinik qaqutigoortunik Guutimit ilinniartinneqarnikkut pissuserineqalersinnaasunik — pigiliussisarput. (Ussatit 1:2-4; 2:1-5, 11-15) Ullumikkut ilaqutariit kristumiut meeqqamik taamatut ilinniartinneqarluarnissaat taamatulli eqqumaffigitigisariaqarpaat.

Ilinnik asannittut tusarnaartakkit

13. Inuusuttut ilaat qanoq siunnersorneqartarpat, aamma sooq mianersortariaqarpat?

¹³ Inuusuttut siunnersorneqartarput inunnit assigiinngitsorpassuarnit — ilaatigut atuarfimmi siunnersortinit amerlanertigut taamaallaat silarsuarmi qanoq ililluni iluatsitsilluartoqarsinnaanera pillugu atuartunik siunnersuisartunit. Siunnersuutit taama ittut eqqarsaatigigaangakkit Guuti siulersoqqullutit qinnuigisariaqarpat, taassuma oqaasia aamma atuakkat atuagassiallu inussiaqatigiinnit aalajaallutillu silatuunit pisut atorluarlugit. Biibilimi atuakkannit nalunngilat Saatani pingaarnerpaamik inuusuttunik misilittagaqanngitsunillu saassussisartoq. Assersuutigalugu Naatsiivimmi Edenimi Evap misilittagaqanngitsup Saatani, takornartaq imminik asanninnerminik ersersitsinngilluinnarsimasoq, tusarnaarpaa. Jehova, amerlasoorpassuartigut Evamik asanninnerminik ersersitsisimasoq, tusarnaarsimasuuguniuk allatorluinnaq kinguneqarsimassagaluarpoq. — 1 Mosesi 3:1-6.

14. Sooq inuusuttut Jehova angajoqqaatillu uppertut tusarnaartariaqarpaat?

 ¹⁴ Aamma Pinngortitsisivit asavaatit, asavaatit minguilluinnartumik pissutiginiagaqarluni. Illit pilluarnissat kissaatigaa, maannakkuinnaanngitsoq, kisianni naassaanngitsumik! Ataatatut isumassuingaartutut asannittutullu illit pallorfiginnitsinilu tamaasa ima oqarfigai: „Aajuna aqqusineq, taanna ingerlavigissavarsi!“ (Esaja 30:21) Angajoqqaaqaruit uppertunik Jehovamik asannittunik, tamanna aamma iluaqutaavoq. Sunik anguniagaqarniarnerlutit aalajangerniaraangavit taakkua siunnersuutaat ataqqinnillutit tusarnaartakkit. (Ussatit 1:8, 9) Tassami inuuinnarnissat kissaatigaat, tamannalu silarsuarmi matumani pigissaarnermit ataqqisaanermillu naleqarnerungaarpoq. — Matthæusi 16:26.

15, 16. (a) Jehovamut tunngatillugu suna qularutiginngilluinnarsinnaavarput? (b) Barukip misigisimasai sumik pingaarutilimmik ilinniutigaavut?

¹⁵ Pinngortitsisiminnik eqqaamannittut pilimanianngitsumik inuupput qularutiginagulu Jehovap ’iperassanngilluinnaraatik’ ’qimassanngilluinnaraatillu’, soorlu allassimaqqaarfinni grækerisuuni taama allassimasoq. (Atuaruk Hebræerit 13:5) Isiginnittaaseq ajunngitsoq tamanna silarsuup eqqarsartaasianit allaaneruvoq, taamaattumillu mianersortariaqarpugut silarsuup anersaavanit sunnerteqqunata. (Efesosimiut 2:2) Tamatumunnga tunngatillugu Barukimik oqaluttuaq eqqarsaatigeriaruk. Taanna ukiumi 607-imi u.n.s. Jerusalemip piuneerunneqarnera sioqqullugu ulluni erloqinartuni Jeremiamut allattaavoq.

¹⁶ Imaassinnaavoq Baruki pigisatigut atugarissaarnerorusulersimasoq. Jehovap tamanna malugaa, asannittumillu Baruki mianersoqquaa ’angisuunik’ ujaaseqqunagu. Barukip ersersippaa maniguuttuullunilu isumatuujulluni, taassumami Jehova tusarnaarpaa Jerusalemillu piuneerunneqarnerani aniguilluni. (Jeremia 45:2-5) Allalli Barukip nalaani pigisatigut ’angisuunik’ katersisut Jehovamillu pallorfiginninnermik tunulliutitsilersut, Kaldæerit (Babylonimiut) illoqarfik tiguarmassuk pigisatik tamaasa annaavaat. Inuppassuit aamma toqupput. (2 Nalunaarsuutit 36:15-18) Barukip misigisimasai Jehovamut attaveqarluarnissap silarsuarmi matumani pisuujunissaminngarnit nuimanissaminngarnillu pingaaruteqarnerungaarneranik paasinninnissamut iluaqutigaarput.

Maligassiuilluarnerpaat tatigikkit

17. Sooq Jiisusi, Paulusi Timotheusilu ullumikkut Jehovap kiffaanut maligassaalluarpat?

¹⁷ Inuunerup aqqutaatigut ingerlanissamut iluaqutissatut Guutip oqaasiani uagutsinnut maligassaalluartorpassuit oqaluttuarineqarput. Assersuutigalugu Jiisusi inuit inuusimasut piginnaaneqarnerpaartaraat, taamaakkaluartorli taassuma uagutsinnut naassaanngitsumik iluaqutaasussaq — „Guutip naalagaaffianik iivangkiiliu“, tassa Guutip naalagaaffianik nutaarsiassaq nuannersoq — pingaarnerpaatippaa. (Lukasi 4:43) Apustilip Paulusip qaffakkiartornissani isumakkeerlugu piffissani nukinilu nutaarsiassamik nuannersumik oqaluussissutiginninnermut atorpai, Jehovamut pitsaanerpaamik tunniussaqarsinnaajumalluni. Timotheusi, ’uppernermi qitornaalluartoq’, Paulusip maligassiuilluarneranik malinnippoq. (1 Timotheusi 1:2) Jiisusip, Paulusip Timotheusillu inooriaaseq qinersimasartik peqqissimissutigaat? Naamerluinnaq. Paulusi allappoq silarsuup neqeroorutigisinnaasai Guutimut kiffartornermik immikkut pisinnaatitaaffeqarnermut sanilliullugit ’perlukutut igitassaannaanerarlugit’. — Filippimiut 3:8-11.

18. Qatanngut angut inuusuttoq qanoq allannguerujussuarpa, aamma sooq aalajangiussani peqqissimissutiginngilaa?

¹⁸ Ullumikkut kristumiunik inuusuttorpassuaqarpoq uppernermik Jiisusip, Paulusip Timotheusillu ilisarnaatigisaannik ilaarsisunik. Assersuutigalugu qatanngut angut inuusuttoq siornatigut akissaatigissumik suliffeqarsimasoq ima allappoq: „Najoqqutassiat Biibilimiittut malillugit inuuvunga taamaattumillu sivitsunngitsoq atorfinni qaffatsitaallunga. Suliffigali aningaasaqarnikkut iluaqutaagaluartoq misigivunga ’anorimik tigusiniarsarinerusoq’. Suliffeqarfimmi siulersuisut saaffigigakkit oqaluttuullugit piffissaq tamaat kiffartulerusullunga, ingerlaannaq akissarsiama qaffatserujussuarneqarnissaannik neqeroorfigineqarpunga, suliinnarniassagama.  Aalajangersimalluinnarpungali. Inuit ilarpassuisa paasisinnaanngilaat sooq piffissaq tamaat kiffartortunngorumallunga atorfimmit aningaasarsilluarnartumit soraarnersunga. Taamaaliorpunga Guutimut tunniulluinnarninni neriorsuutiga eqqorterusukkakku. Maanna inuuninni sammisassat anersaakkut ittut qitiummata aningaasat tusaamasaanerullu nuannaartitsisinnaanerannit nalerisimaartitsisinnaanerannillu annerungaartumik nuannaarlungalu nalerisimaarpunga.“

19. Inuusuttut tamarmik qanoq isumatusaartumik aalajangiinissaannik kajumissaarneqarpat?

¹⁹ Silarsuarmi tamarmi inuusuttoqarpoq tusindilinnik isumatusaarlutik tamatumunnga assingusumik aalajangiisimasunik. Ilissi inuusuttut siunissarsi eqqarsaatigigaangassiuk, taava Jehovap ullussaa eqqarsaatigiuartarsiuk. (2 Petrusi 3:11, 12) Silarsuup neqeroorutigisinnaasaanik sapinngisamik annerpaartaannik piniarsarisut usorileqinagit. Ilissinnilli asannivissut tusarnaartarsigik. Ileqqaarutigisinnaasarsi pitsaanerpaaq — aamma naassaanngitsumik iluaqutigisinnaasatuarsi — tassaavoq ’erlinnartuutinik qilammiittunik’ katersineq. (Matthæusi 6:19, 20; atuaruk 1 Johannesi 2:15-17.) Aap, Pinngortitsisersi eqqaamasiuk. Eqqaamagussiuk Jehovap pilluaqqujumaarpaasi.

[Quppernerup ataani ilanngussaq]

Eqqaamavigit?

• Qanoq ililluta ersersissinnaavarput Guutimik tatiginnilluta?

• Ilinniartitaaneq pitsaanerpaaq suua?

• Baruki qanoq ilinniarfigisinnaavarput?

• Kikkut uagutsinnut maligassaalluarpat, aamma sooq?

[Atuaqqissaarnermi apeqqutit]

[Qupp. 20-mi assiliartaq]

Jehovap isumagisarpaa pitsaanerpaamik ilinniartinneqarnissarput

[Qupp. 23-mi assiliartaq]

Barukip Jehova tusarnaarpaa Jerusalemillu piuneerunneqarnerani aniguilluni. Taassuma maligassiaa qanoq ilinniarfigisinnaavarput?