Suna inuunermik pissarsinarnerulersitsisarpa?

„Guuti mianeruuk inatsisaalu maleruarlugit.“ — OQALUUSSISARTUP OQAASII 12:13.

1, 2. Oqaluussisartup oqaasiinik misissuineq qanoq iluaqutigisinnaavarput?

TAKORLOORIARUK angut sunik tamanik peqarpasissoq. Naalakkersuisuuvoq pikkorissoq ilisimaneqarluartoq naliminilu silassorinnerpaanut ilaasoq. Tamakkuninngali tamanik angusaqarsimagaluarluni imminut ima aperivorlusooq: ’Sunaana inuunermik pissarsinarnerulersitsisartoq?’

² Angut taanna ilumut inuusimavoq — ukiut 3000-it missiliorlugit matuma siorna. Salomomik ateqarpoq, Oqaluussisartullu oqaasiini inuunermi nalerisimaarneq qanoq ililluni anguniarsimanerini oqaluttuaraa. (Oqaluussisartup oqaasii 1:13) Salomop misigisai ilinniarfigilluarsinnaavavut. Aap, ilisimassuseq Oqaluussisartup oqaasiiniittoq inuunermik siunertaqarlualersitsisunik anguniagaqarnissamut iluaqutigisinnaavarput.

’Anorimik tigusiniarsarineq’

3. Ilumoortoq alianartoq inuunitsinnut tunngasoq suna atortariaqarparput?

³ Salomo nassuiaavoq Guuti nunarsuarmi kusanartorpassuarnik — tupigusuutigisinnaasatsinnik misissuiffigisinnaasatsinnillu nungunngisaannartussanik nuannaarutigiuaannarsinnaasatsinnik — pinngortitsisoq. Aap, tamakkuninnga misissuilluta aallartilluarsinnaanngilagulluunniit inuuneq sivikippallaarmat. (Oqaluussisartup oqaasii 3:11b, 1990; 8:17) Soorlu Biibilimi allassimasoq, ullut inuuffigisavut ikittuinnaapput qaangiutipallattarlutillu. (Jobi 14:1, 2; Oqaluussisartup oqaasii 6:12) Ilumoortoq alianartoq tamanna kajumississutigisariaqarparput silatusaarluta piffissamik atuinissamut. Tamannali imaannaanngilaq, Saatanimmi silarsuaa sunniisinnaavoq ajortumik iliortilluta.

4. (a) Oqaaseq ’piunngitsoq’ qanoq isumaqarpa? (b) Inuunermi noqqaassutigineqarsinnaasut suut sammissavavut?

⁴ Inuunermik iluaqutaanngitsunut atuinerup navianaataa erseqqissarniarlugu Salomop Oqaluussisartup oqaasiini oqaaseq ’piunngitsoq’ 30-riarluni atorpaa. Oqaaseq hebræerisooq ’piunngitsoq’-mik nutserneqarsimasoq imaqanngitsumik, asuliinnaasumik, isumaqanngitsumik naleqartuartuunngitsumillu isumaqarpoq. (Oqaluussisartup oqaasii 1:2, 3) Ilaannikkut oqaatsit ’piunngitsoq’ aamma ’anorimik tigusiniarsarineq’ isumaqatigiissillugit atortarpai. (Oqaluussisartup oqaasii 1:14; 2:11) Soorunami anorimik tigusiniarsarineq sunaluunniit asuliinnaavoq. Anorimik tigusiniarsarisoq suunngitsumik tigusiniarsarisarpoq. Inuunermi silatusaanngitsumik anguniagaqarneq taamatulli pakatsinartigissaaq. Inuuneq sivikippallaarpoq pissutsit aaqqissuussaaneranni maanna atuuttumi inuunerup pissarsinanngitsunut asuli atornissaanut. Taamatut kukkujumanata Salomop eqqaasaasa ilaat, assersuutigalugu inunnit noqqaassutigineqarnerpaasut, misissoriartigit. Siullermik sammissavavut aliikkutassat pigisallu. Tamatuma kingorna iluaqutaasumik sulinerup pingaaruteqassusia sammissavarput.

 Aliikkutassanik noqqaassutiginninneq pillualissutigissavarput?

5. Salomo qanoq ililluni nalerisimaalerniarsariva?

⁵ Ullumikkut inuppassuit pisarnerattut Salomo aliikkutassanik noqqaassuteqarnermigut nalerisimaalerniarsarivoq. Ima oqarpoq: „Uummatima nuannaarutigisinnaasai naaggaarneq ajorpakka.“ (Oqaluussisartup oqaasii 2:10) Aliikkutassat tamakku sumi ujartorpai? Oqaluussisartup oqaasii kapitali 2 naapertorlugu ’viinnisorsimavoq’ — ingasaassinanili — illuliortarlunilu, naatsiiviliorluni naatsiivissualiorlunilu, nipilersortunik tusarnaartarluni nerisassallu mamartut nuannaarutigalugit.

6. (a) Sooq inuunermi nuannersunik nuannaarutiginninneq eqqunngitsuliornerunngila? (b) Qasuersaarnermut aliikkutassanullu tunngatillugu suna eqqarsaatigineqartariaqarpa?

⁶ Ikinngutinik nuannisaaqateqarneq Biibilimi assuarineqarpa? Naamerluinnaq. Assersuutigalugu Salomo allappoq sulerulooreersimalluni eqqissisimanartunik avatangiiseqarluni nerineq Guutimit tunissutaasoq. (Atuaruk Oqaluussisartup oqaasii 2:24; 3:12, 13.) Aammattaaq Jehovap inuusuttut kajumissaarpai ’qiimasaaqqullugit uummatikkullu nuannaaqqullugit’, akisussaassuseqarpalaartumilli. (Oqaluussisartup oqaasii 11:9) Qasuersaarnissaq ineriartornartunillu aliikkutaqarnissaq pisariaqartipparput. (Naleqqiuguk Markusi 6:31.) Tamakkuali inuunermi pingaarnerpaatissanngilavut. Taakku nerisassatut pingaarnerpaatut innatik kinguleqqiutitut issapput. Qularnanngitsumik isumaqatigiissutigisinnaavarput kinguleqqiutit tungusunnitsut qanorluunniit mamaritigigaluaraanni, allanik nerineq ajoraanni erniinnaq sorsaanneqartartut, aamma inuussutissartaqarpianngitsut. Taamatuttaaq Salomop paasivaa inuunermi aliikkutassanik pingaarnerpaatitsineq ’anorimik tigusiniarsarinerusoq’. — Oqaluussisartup oqaasii 2:10, 11.

7. Sooq aliikkutassanik toqqaanitsinni mianersortariaqarpugut?

⁷ Aamma aliikkutassat tamakkeratik ineriartornartuupput. Aliikkutassat ilarpassui ajoqutaasupilussuupput, anersaakkut aamma ileqqussanut tunngatillugu. Inuit qanoq amerlatigisut — ikiaroornartut, imigassaq aningaasanoornerlu atorlugit — inuunerminnik aseruisimappat ’nuannisaarusunnertik’ pissutigiinnarlugu? Jehovap ajunngisaarluni mianersoqquaatigut ajoqutaasumik iliornissamut uummatitsinnit isitsinnilluunniit tammartitaanissarput akuerigutsigu, tamatuma kinguneri nammineq atortariaqarivut. — Galatiamiut 6:7.

8. Sooq inuunitsinnik eqqarsaatiginneqqissaarneq silatusaarnerua?

⁸ Aliikkutassat pingaartippallaarutsigit, taakku pingaaruteqarnerusunit allamut saassutigisinnaavavut. Eqqaamasariaqarparput inuunerup sivikitsuunera aamma peqqissuujuarnissatta isumakuluuteqanngittuarnissattalu qulakkeerneqarsinnaannginnerat. Salomop nangilluni maluginiaaqqusineratut, tamanna pissutaagunarpoq illumut nuannaffiusumukarnerminngarnit illumut aliasuffimmukarnitsinnik — qatanngutip angutip arnalluunniit ilumoorfiginnissimasup toquneranik aliasuutiginniffiusumukarnitsinnik — iluaqutiginninnerujumaarnitsinnut. (Atuaruk Oqaluussisartup oqaasii 7:2, 4.) Sooq taamaappa? Ilisinermi oqalugiaammik tusarnaarneq qatanngutillu aalajaatsup inuuneranik eqqarsaatiginninneq nammineq inuunitsinnik misissueqqissaarnissamut kajumississutigisinnaavarput. Tamatuma kingunerisaanik immaqa isummissaagut anguniakkavut allanngortittariaqarlugit inuunitta sinnera silatusaartumik atorsinnaaniassagatsigu. — Oqaluussisartup oqaasii 12:1.

Pigisat piviusumik nalerisimaalissutigissavavut?

9. Pisuussutinut tunngatillugu Salomop suna paasivaa?

⁹ Salomop Oqaluussisartup oqaasii allakkamigit nunarsuarmi angutinut pisuujunerpaanut ilaavoq. (2 Nalunaarsuutit 9:22) Kissaatigisaminik tamanik pissarsiarinninnissaminut akissaqarpoq. Ima allappoq: „Isikka pilerigisaqarpata itigartinngilakka.“ (Oqaluussisartup oqaasii 2:10) Paasivaali pigisat imminni nalerisimaalersitsineq ajortut. Ima isummerpoq:  „Aningaaseritooq aningaasaatiminik ilatsaasuiuartarpoq. Pisuussutinik nuannarinnittup tamakku pissarsissutigisanngilai.“ — Oqaluussisartup oqaasii 5:9.

10. Qanoq ililluni nalerisimaalivittoqarsinnaallunilu piviusumik pisuunngortoqarsinnaava?

¹⁰ Pigisat naleqassusiat qaangiuttaraluartoq pisuussutit pigissaarnerlu suli kajungerineqartupilussuusinnaasarput. Qanittukkut USA-mi misissuinermi erserpoq ukioq siulleq ilinniartuusut tamarmik 75 procentiisa aningaasatigut atugarissaarnissaq inuunermi pingaarnertut anguniagarigaat. Anguniakkamilli tamatuminnga angusigaluarunik, tamanna pillualivissutigissavaat? Immaqa naamik. Misissuinerni allani erserpoq pigisanik ingasattumik pingaartitsineq pilluarnissamut nalerisimaarnissamullu akornutaasinnaasoq. Salomo taamanimiilli taamatut isummersimavoq. Ima allappoq: „Katersuivunga kuultinik sølvinillu pisuussutinillu kunngit nunallu pigisaannik. . . . paasilerparalu sunaaffa tamarmik piunngitsuusut anorillu tiguniarsarineratut suallaataanngitsigalutik.“ * (Oqaluussisartup oqaasii 2:8, 11) Nunap piisigut pisuussutinik katersinata inuuneq uummatikkut iluunngarluni Jehovamut kiffartornermut atorutsigu taassumannga pilluaqqusaassaagut piviusumillu pisuunngorluta. — Atuaruk Ussatit 10:22.

Qanoq ittumik suliaqarneq piviusumik nalerisimaalersitsisarpa?

11. Suliaqarnerup pingaaruteqassusia pillugu Biibilimi qanoq allassimasoqarpa?

¹¹ Jiisusi ima oqarpoq: „Ataataga suliuarmat uangattaaq sulivunga.“ (Johannesi 5:17) Qularnanngilaq Jehova Jiisusilu sulinermikkut nalerisimaalertartut. Biibilimi ersersinneqarpoq Jehovap pinngortitani nalerisimaarutigigai, ima allassimagami: „Guutip pinngortitani tamaasa isigai, takuaalu ajunngingaartut.“ (1 Mosesi 1:31) Aamma inngilit ’tipaatsupput’ Guutip suliai tamaasa takugamikkik. (Jobi 38:4-7) Salomottaaq isumaqarluartumik suliaqarnerup pingaaruteqassusia nalunngilaa. — Oqaluussisartup oqaasii 3:13.

12, 13. (a) Inuit marluk sulilluarnermik kingunerisaanik nalerisimaarnertik qanoq oqaatigaat? (b) Sooq suliffiit ilaannikkut pakatsissutaasinnaappat?

¹² Inuppassuit suleruloornerup kingunerisaanik naammassisaqarsimasutut misigineq nalunngilluarpaat. Assersuutigalugu José, eqqumiitsulianik qalipaasartoq nersugaasoq, ima oqarpoq: „Eqqarsaatigisimasama qalipaaffissiamut qalipannissaa iluatsissimagaangakku misigisarpunga soorlu qaqqarsuaq qaqisimallugu.“ Miguel, * niuertuusoq, ima oqarpoq: „Sulinera nalerisimaarutigisarpara taamaalillunga ilaquttakka pilersorsinnaagakkit. Aamma naammassisaqarsimasutut misiginartarpoq.“

¹³ Aappaatigut suliffippassuaqarpoq assigiiaaginnarmik ingerlasunik nutaanillu pilersitsinissamut immannguaannaq periarfissiisunik. Ilaannikkut suliffimmi avatangiisit nukillalaarnartarput suliffillu naapertuilluanngissutsimik misigisaqarfiusarluni. Soorlu Salomo uparuaasoq, eqiasuttoq — immaqa sunniuteqarluartunut atassuteqarnini pissutigalugu — eqiasuitsup suliaanik akissarsissuteqartarpoq. (Oqaluussisartup oqaasii 2:21) Aamma allanik pakatsinartoqarsinnaavoq. Suliffik aningaasarsiorluarnarpasissoq aningaasaqarnikkut ajutoorneq pissutsilluunniit ilimaginngisat atuutilernerat pissutigalugu iluatsinngitsoorsinnaavoq. „Uterpunga seqernullu ataani takullugu arpannermi oqilasuut ajugaajuaannanngitsut, sorsunnermi sorsuttartut pissarsuit ajugaajuaannanngitsut, aammattaaq ilisimasut inuussutissaqartuaannanngitsut sianisuullu pisuussuteqartuaannanngitsut, ilisimasaqartullu nuannarineqartuaannanngitsut; piffissarmi nalaatsornikkullu pisut taakkuninnga tamanik attuisarput.“ (Oqaluussisartup oqaasii 9:11, NV) Amerlasoorpassuartigut suleruloorsimasoq naggataatigut narrutsassimaalertarlunilu pakatsisarpoq, nassuertariaqarluni ’suleruloorluni anori tiguniarsarisimallugu’. — Oqaluussisartup oqaasii 5:15.

14. Suliaq suna tamatigut piviusumik nalerisimaalersitsisarpa?

 ¹⁴ Suliassaqarpa pakatsissutaanngisaannartumik? José, eqqumiitsulianik qalipaasartoq eqqaariigarput, ima oqarpoq: „Qalipakkat tammarsinnaallutillu aserorsinnaapput. Guutimut kiffartornermi suliat eqqarsaatigalugit taamatut pisoqarsinnaanngilaq. Nutaarsiassamik nuannersumik oqaluussissutiginninnermut tunngatillugu Jehovamut naalannikkut atajuartussanik — kristumiunik Guutimik mianerinnittunik — ineriartortitseqataavunga. Suliaavoq nalissaqanngilluinnartoq.“ (1 Korinthimiut 3:9-11) Miguel tamatumunnga assingusumik oqarpoq Guutip naalagaaffia pillugu tusarliussamik oqaluussissutiginninneq nammineq suliffimminit nalerisimaarnangaarnerusoq. Ima oqarpoq: „Sallusuissutinik Biibilimeersunik allanut nassuiaassigaanni nassuiaaffigisallu killinneqaatigigai malugigaanni nuannaarnermut misigineqartartumut sanilliussisoqarsinnaanngilaq.“

„Nerisassaatitit imaanut eqqakkit“

15. Sunaana inuunermik pissarsinarnerulersitsisartoq?

¹⁵ Sunamiuna inuunermik pissarsinarnerulersitsisartoq? Piviusumik nalerisimaalissaagut pissutsit aaqqissuussaaneranni matumani piffissaq inuuffigisarput sivikitsoq ajunngitsuliornermut Jehovamillu nuannaartitsinermut atorutsigu. Guutimut qanittumik attaveqarnermik ineriartortitsisinnaavugut, pingaarutillit anersaakkut ittut piviusut pillugit meeqqavut ilinniartissinnaavavut, allat Jehovamik ilisarisimannilerniarneranni ikiorsinnaavavut, aamma qatanngutivullu ataavartumik ikinngutigiilersinnaavugut. (Galatiamiut 6:10) Tamakkua tamarmik naleqartuartuupput tamakkuninngalu iliuuseqartunut pilluaqqusaanarlutik. Salomo ajunngitsuliornerup naleqassusia nassuiarniarlugu soqutiginartupilussuarmik assersuusiorpoq. Ima allappoq: „Nerisassaatitit imaanut eqqakkit, kingunersuarilerpagu naniumaarpatit.“ (Oqaluussisartup oqaasii 11:1) Jiisusip ajoqersukkani ima kajumissaarpai: „Tunisigitsi, taava ilississaaq tunineqassaasi.“ (Lukasi 6:38) Aammattaaq Jehova neriorsuivoq allanut ajunngitsuliortut akissarsisikkumaarlugit. — Ussatit 19:17; atuaruk Hebræerit 6:10.

16. Qaqugukkut inuunermut pilersaarusiornissaq piffissaalluassava?

¹⁶ Biibilimi inuusuttut kajumissaarneqarput inuunerminnik qanoq atuiniarnerminnut tunngatillugu silatusaartumik aalajangeeqqullugit. Taamaalillutik inuunerminni kingusinnerusukkut pakatsinngitsuussapput. (Oqaluussisartup oqaasii 12:1) Qanoq alianartigissagaluarpa ukiut inuuffigisatik pitsaanerpaat silarsuup neqeroorutigisinnaasaanut atorpatigik naggataatigullu paasillugu taamaaliornertik anorimik tigusiniarsarinertut iinnartoq!

17. Inooriaatsimik pitsaanerpaamik qinersinissamut suna iluaqutigissavarput?

¹⁷ Ataatap asannittup kialuunniit pisarneratut Jehovap kissaatigaa inuuneq nuannaarutigissagipput, ajunngitsuliussasugut aliasuutillu  pisariaqanngitsut pinngitsuussagivut. (Oqaluussisartup oqaasii 11:9, 10) Taamaaliornissamut suna iluaqutaassava? Anersaakkut ittunik imminut anguniagassinneq anguniakkanillu angusinissamik sulissutiginninneq iluaqutaassaaq. Ukiut 20-ngajaat matuma siorna Javier aalajangertussanngorsimavoq nakorsatut atorfimmini qaffakkiartussanerluni piffissarluunniit tamaat kiffartortunngussanerluni. Ima oqarpoq: „Nakorsatut sulineq nalerisimaarnarsinnaagaluartoq nuannaarnermut allanik sallusuissummik ilinniartitsinikkut misigisartakkannut assersuunneqarsinnaanngilaq. Piffissaq tamaat kiffartorneq inuunermi piviusumik nuannaalissutigaara. Peqqissimissutigisatuara tassaavoq siusinnerusukkut aallartissimannginnera.“

18. Sooq Jiisusip nunarsuarmi inuunini taama pissarsiffigitigaa?

¹⁸ Pigerusullugu noqqaassutigisariaqakkatta pingaaruteqarnersaat suugami? Oqaluussisartup oqaasiini ima allassimavoq: „Ajunngitsumik tusaamaneqarneq pitsaaneruvoq tarnummit uuliamit akisuumit; ulloq toquffik pitsaaneruvoq ullormit inunngorfimmit.“ (Oqaluussisartup oqaasii 7:1) Jiisusip inuunerani tamanna pitsaanerpaamik erseqqissarneqarpoq. Taanna Jehovamit asseqanngitsumik tusaamaneqarpoq. Toqussi tikillugu aalajaattuarnermigut Ataatami kisimi oqartussaaneranik qutsissisitsivoq utertitsissummillu annaanneqarnissatsinnut tunngaviliisumik pilersitsilluni. (Matthæusi 20:28) Nunarsuarmi sivikitsuinnarmik inuunermini pissarsinartumik inuunermut tunngatillugu naammalluinnartumik maligassiuivoq, maligassiuivoq malinniarlugu noqqaassutigisinnaasatsinnik. — 1 Korinthimiut 11:1; 1 Petrusi 2:21.

19. Salomo pitsaasumik sumik siunnersuuteqarpa?

¹⁹ Uaguttaaq Guutimit tusaamasaallualersinnaavugut. Jehovap isaani tusaamasaalluarneq pisuussutinit naleqarnerungaarpoq. (Atuaruk Matthæusi 6:19-21.) Ullut tamarluinnaasa Jehovap isaani ajunngitsunik inuunitsinnullu pisuunnguallaataasussanik iliuuseqarniartarsinnaavugut. Assersuutigalugu nutaarsiassaq nuannersoq allanut oqaluussissutigisinnaavarput, aappariinnerput ilaqutariittullu inuunerput nakussatsissinnaavarput namminerlu atuaqqissaartarnikkut ataatsimiinnernilu peqataasarnikkut anersaakkut ittunik pingaartitsinitsinnik nakussatsitsisinnaalluta. (Oqaluussisartup oqaasii 11:6; Hebræerit 13:16) Pissarsinartumik inuunissat kissaatigaajuk? Taamaappat Salomop siunnersuutaa una maliguk: „Guuti mianeruuk inatsisaalu maleruarlugit, inuit tamarmik taamaaliortussaapput!“ — Oqaluussisartup oqaasii 12:13. (w08 04/15-E)

[Quppernerup ataani ilanngussat]

Qanoq akissavit?

• Inuunitsinni anguniakkatsinnik eqqarsaatiginneqqissaarnissamut suna kajumississutigisariaqarparput?

• Aliikkutassat pigisanillu noqqaassutiginninneq qanoq isigisariaqarpavut?

• Suliaq suna piviusumik nalerisimaarnarpa?

• Sumik noqqaassutiginninneq silatusaarnerussava?

[Atuaqqissaarnermi apeqqutit]

[Qupp. 31-mi assiliartaq]

Aliikkutassat inuunitsinni qanoq inissisimaffeqartariaqarpat?

[Qupp. 32-mi assiliartaq]

Sooq oqaluussineq nalerisimaarnangaarpa?