Sutigut tamatigut Guutip siulersuinissaa noqqaassutigiuk

„Guuti taama ittoq, naassaanngitsumik Guuterput, taanna siulersortigissavarput [siulersortigissavarput toqunissatta tungaanut, NV].“ — TUSSIAAT 48:15.

1, 2. Sooq uagut nammineq ilisimassuserput tatiginagu Jehovap siulersuinera naapertorlugu iliortariaqarpugut, aamma apeqqutit suut pilerpat?

SUUT naleqanngitsuunersut imaluunniit ajoqutaanersut isummerfigissagaangatsigu imminut salloqittariaannaasarpugut. (Ussatit 12:11) Kristumiup iliuuserisariaqanngisaanik iliuuseqarusussuataarutta, uummaterput tamatuma iliuuserinissaanut qularunnaarnartunik pissutissarsisinnaavoq. (Jeremia 17:5, 9) Taamaattumik tussiaasiortoq Jehovamut ima qinugami ilisimassuseqarnerminik ersersitsivoq: „Qaamassutsit sallusuissutsillu aallartikkit. Taakkua tasissersuullinnga.“ (Tussiaat 43:3) Ilisimassutsini killeqartoq tatiginagu Jehova tatigaa, allamillu pitsaanerusumik siunnersortissarsiorfissaqanngilaq. Tussiaasiortup pisimaneratut silatusaassaagut Jehovamut siunnersortissarsiortarutta.

² Kisianni sooq Jehova tatiginerpaasariaqarparput? Taassuma uagutsinnik siulersuinissaa qaqugukkut noqqaassutigisassavarput? Siulersuinera iluaqutigiumallugu qanoq isiginnittaaseqartariaqarpugut, aamma ullumikkut Jehovap qanoq siulersortarpaatigut? Apeqqutit taakku pingaarutillit allaaserisami matumani sammissavavut.

Sooq Jehovap siulersuineranik tatiginnissinnaavugut?

3-5. Suut pissutigalugit Jehovap siulersuineranik tatiginnilluinnarsinnaavugut?

³ Jehova tassaavoq Ataatarput qilammiusoq. (1 Korinthimiut 8:6) Tamatta immikkut ilisarisimalluarpaatigut, aamma sunik uummammioqarnersugut takusinnaavaa. (1 Samueli 16:7; Ussatit 21:2) Kunngip Daavip Guuti ima oqarfigaa: „Nalunngilarma issiagaluaruma nikorfagaluarumaluunniit, ungasissumit allaat paasereertarpat qanoq  eqqarsartunga. Oqaaseq uanga oqqanni pinngorianngitsoq illit [Jehova], ilisimareeraraat naammattumik.“ (Tussiaat 139:2, 4) Jehovap ilisarisimalluarpatigut, taava qanoq ililluta taassuma suut uagutsinnut pitsaanerpaanerannik ilisimanninnera qularisinnaavarput? Aammattaaq Jehova sunik tamanik ilisimasaqartuuvoq. Suut tamaasa takusinnaavai; inummit kimilluunniit takunnissinnaaneruvoq, aamma iliuuserisavut qanoq kinguneqarumaarnersut nalunngilaa. (Esaja 46:9-11; Romamiut 11:33) Taannaavoq ’Guuti ilisimasutuaasoq’. — Romamiut 16:27.

⁴ Aammattaaq Jehova uagutsinnik asannippoq, aamma uagutsinnut pitsaanerpaaq kissaatigiuaannarpaa. (Johannesi 3:16; 1 Johannesi 4:8) Guutiugami asannittoq aamma tukkortuuvoq. Ajoqersugaq Jaaku ima allappoq: „Tunissutit ajunngitsut naammalluinnartuusullu tamarmik pavannga qaamasut ataataannit . . . pisarput.“ (Jaaku 1:17) Guutimit siulersortittut taassuma tukkungaarnera misigisarpaat.

⁵ Aamma Jehova ajugaqanngitsuuvoq. Tamatumunnga tunngatillugu tussiaasiortup oqaasii ukua eqqarsaatigisinnaavavut: „Qutsinnerussaartup toqqorsimaffiani issiasoq, ineqarpoq Ajugaqanngitsup alanngigaani, [Jehova] pillugu ima oqarsinnaavoq: ’Qimarnguffiga pallittaalisaralu, Guutiga tatigisara.’“ (Tussiaat 91:1, 2) Jehovap siulersuinissaa noqqaassutigigaangatsigu, Guutimut sumiginnaaneq ajortumut qimarnguffissarsiortarpugut. Akerlilersorneqaraluaruttaluunniit Jehovap annertoqqusersussavaatigut. Isumakkiiginnarnavianngilaatigut. (Tussiaat 71:4, 5; atuaruk Ussatit 3:19-26.) Aap, Jehovap nalunngilaa suna uagutsinnut pitsaanerpaanersoq, aamma uagutsinnut pitsaanerpaaq kissaatigaa, aamma uagutsinnut pitsaanerpaamik iliuuseqarnissaminut pissaaneqarpoq. Taassuma siulersuineranik sumiginnaagutta qanoq sianiilliortigissagaluarpugut! Siulersuinerali qaqugukkut pisariaqartittarparput?

Guutip siulersuinera qaqugukkut pisariaqartittarparput?

6, 7. Qaqugukkut Guutip siulersuinera pisariaqartittarparput?

⁶ Guutip siulersuinera inuunerput tamaat, inunngornitsinnit toqunissatta tungaanut, pisariaqartipparput. Tussiaasiortoq ima allappoq: „Guuti taama ittoq, naassaanngitsumik Guuterput, taanna siulersortigissavarput [siulersortigissavarput toqunissatta tungaanut, NV].“ (Tussiaat 48:15) Sianisuut tussiaasiortutut Guutip siulersuinissaa noqqaassutigiunnaanngisaannassavaat.

⁷ Soorunami ilaannikkut misigisarpugut ikiorneqarnissamik immikkut pisariaqartitsilluta. Ilaannikkut ’annikilliortarpugut’, immaqa malersorneqarnerput, perulunnartumik napparsimanerput suliffissaaleqileriataarnerpulluunniit pissutigalugu. (Tussiaat 69:17, 18) Taamatut misigigaanni Jehovap pinertusaarnissatsinnut ikiuiumaarnera isumatusaartumillu aalajangiisinnaaniassagatta siulersuiumaarnera qularinagu taassumunnga saaffiginnissinnaaneq tuppallersaataangaartarpoq. (Atuaruk Tussiaat 102:18.) Aammali pisuni allani taassumannga ikiorneqarnissarput pisariaqartittarparput. Assersuutigalugu Guutip naalagaaffia pillugu nutaarsiassaq nuannersoq angalaarfigisartakkatsinni oqaluussissutigiartoraangatsigu  nalunaajaalluarsinnaajumalluta Jehovap siulersuinissaa pisariaqartittarparput. Aamma sunulluunniit tunngasunik — sunngiffimmi sammisassanut, atisanut isikkorissarnermullu, ilagisartakkanut, suliffinnut, ilinniagaqarnissamut allanulluunniit tunngasunik — aalajangigassaqaraangatta silatusaassaagut aatsaat Jehovap najoqqutassiaanik maleruaagutta. Ilumoortumik oqaatigissagaanni, sutigut tamatigut taassuma siulersuinissaa pisariaqartipparput.

Guutip siulersuinissaanik noqqaassutiginninnginnerup navianaatai

8. Evap paarnamik nereqqusaanngitsumik nerinera qanoq kinguneqarpa?

⁸ Eqqaamasariaqarparpulli Jehovap siulersuinera naapertorlugu iliornissamut piumassuseqartariaqaratta. Piumanngikkutta taassuma pinngitsaalinavianngilaatigut. Inuk Jehovap siulersuinera naapertorlugu iliorniarnani aalajangertoq siulleq tassaavoq Eva, taannalu pillugu oqaluttuami erserpoq aalajangiinerlunneq qanoq ajunaarutaasinnaatigisoq. Aamma qanoq kinguneqarnera eqqarsaatigeriaruk. Eva paarnamik nerivoq ’Guutisut ilerumagami ajunngitsoq ajortorlu nalujunnaarumallugit’. (1 Mosesi 3:5) Taamaalilluni ersersippaa Guutip inissisimaffiani inissisimaffeqarusulluni, nammineq aalajangerusukkamiuk suut ajunngitsuunersut suullu ajortuunersut, Jehovap siulersuinera naapertorlugu iliornani. Allatut oqaatigalugu Jehovap kisimi oqartussaanera akueriumanngilaa. Imminut naalagarerusuppoq — uiatalu, Adamip, pikitsitseqatigaa. — Romamiut 5:12.

9. Jehovap siulersuinera akuerinngikkutsigu ilumoortumik sussaagut, aamma sooq tamanna sianiilliornerungaarpa?

⁹ Ullumikkut uagut Jehovap siulersuinera naapertorlugu iliortanngikkutta, aamma uagut taassuma kisimi oqartussaanera akuerisimassanngilarput. Assersuutigeriartigu filminik pornografiimut tunngasunik isiginnaarnermik ileqquliussisimasoq. Ilagiinnut kristumiunut ilaaguni, nalunngilaa Jehovap tamanna qanoq isumaqarfigineraa. Kinguaassiuutitigut inuunerlunneq mingunnartullu taaneqassanngippataluunniit, taava kinguaassiuutitigut illigussutsimik naammassinninniarluni qanoq ililluni taakkua isiginnaarneqarsinnaagamik? (Efesosimiut 5:3) Najoqqutassianik Jehovamit pisunik itigartitsinikkut Jehovap kisimi oqartussaalluni Naalagaanera miserratigineqartarpoq, qullersaanera itigartinneqartarpoq. (1 Korinthimiut 11:3) Tamanna sianiilliornerungaarpoq, „ingerlasummi alloriartarnini aqussinnaanngilai“, soorlu Jeremia taama allattoq. — Jeremia 10:23, NV.

10. Nammineq piumasatsitut iliorsinnaatitaanerput qanoq atortariaqarparput, aamma sooq?

¹⁰ Ilaasa immaqa Jeremiap oqaasii apeqqusissavaat, eqqarsarlutik Jehovap piumasatsitut iliorsinnaatimmatigut, piumasatsitut iliorsinnaatitaanitsinnik atuinerput pillugu isornartorsiorsinnaanavianngikkaatigut. Puiussanngilarpulli nammineq piumasamik iliorsinnaatitaaneq tunissutaasoq akisussaaffittalik. Oqaaserisatsinnut iliuutsitsinnullu akisussaavugut. (Romamiut 14:10) Jiisusi ima oqarpoq: „Uummatip ulikkaarutaanik qaneq utsersortarpoq.“ Aamma ima oqarpoq: „Uummammit pisarput eqqarsaatipiluit, toqutsinerit, allasiornerit, kinguaassiuutitigut inuunerlunnerit, tillinnerit, sallulluni nalunaajaanerit mitallernerillu.“ (Matthæusi 12:34; 15:19) Tassa oqaatsivut iliuutsivullu uummammiutsinnik qulaarisarput. Qanorpiaq ittuunitsinnik ersersitsisarput. Tamanna pissutigalugu eqqortumik iliorusuttut sutigut tamatigut Jehovamit siulersorneqarnissartik noqqaassutigisarpaat. Taamaalilluni Jehovap paasisarpaa taakkua ’peqqusersuitsuusut’ ’ajunngitsuliorfigisarlugillu’. — Tussiaat 125:4.

11. Israelikkut oqaluttuarisaanerat qanoq ilinniarfigisinnaavarput?

¹¹ Israelikkut oqaluttuarisaanerat eqqarsaatigeriartigu. Israelikkut aalajangiilluaraangatta Jehovallu peqqussutaanut naalakkaangata Jehovap taakkua sernissortarpai. (Josva 24:15, 21, 31) Piumasamittulli iliorsinnaatitaanertik atornerlukkajuppaat. Jeremiap nalaani Jehova taakku pillugit ima oqarpoq: „Tusaajumanngillat naalaarumanatillu; pilersaarutitik uummatimillu ajortup manngertisimassusia malittariinnarpaat utimullu ingerlallutik siumut pinnatik.“  (Jeremia 7:24-26) Alianassusia! Qanortoq uteriinnerput namminissarsiornerpulluunniit pissutigalugu ’siumut pinnata utimut ingerlalerluta’ Jehovap siulersuineranik itigartitsinngisaannarisa namminerlu pilersaarutivut malillugit ingerlanngisaannarisa!

Guutip siulersuinera naapertorlugu iliussagaanni suut piumasarineqarpat?

12, 13. (a) Pissuserineqartussat suut Jehovap siulersuinera naapertorlugu iliorusulissutigaavut? (b) Sooq uppissuseqarnissaq pingaaruteqarpa?

¹² Jehovamik asanninnerput taassuma siulersuinera naapertorlugu iliorusulissutigaarput. (1 Johannesi 5:3) Paulusili pisariaqartitatsinnik allamik uparuaavoq ima oqarami: „Isigisavut pinnagit upperisarput malillugu saqivugut.“ (2 Korinthimiut 5:6, 7, NV) Sooq uppissuseqarnissaq pingaaruteqarpa? Soorlu nalunngikkipput, Jehovap ’aqqutaalluartukkut’ ingerlatittarpaatigut, aqqummillu tamatuminnga atuaaneq silarsuarmi matumani pisuunngornermik qaffasissumillu atorfeqalernermik kinguneqarneq ajorpoq. (Tussiaat 23:3) Taamaattumik uppernitta isaat Jehovamut kiffartornermi pilluaqqussutisiarineqartartunik anersaakkut ittunik pingaaruteqarnerungaartunik nakkussisariaqarput. (Atuaruk 2 Korinthimiut 4:17, 18.) Aamma upperneq pigisatigut pilimanianngitsuulluni inuunermik naammaginninnissamut iluaqutigaarput. — 1 Timotheusi 6:8.

¹³ Jiisusip oqaatigimisaarpaa pallorfiginninneq ilumoortoq imminut pilliutigeriaannaanermut attuumassuteqartoq, imminullu pilliutigeriaannaassagaanni uppissuseqarnissaq pisariaqarpoq. (Lukasi 9:23, 24) Guutip kiffaasa aalajaatsut ilaat pilliuteqangaarsimapput. Piitsuussuseq, naqisimaneqarneq, paqumisunneq, allaat peqqarniitsumik malersorneqarneq naammagalugit atorsimavaat. (2 Korinthimiut 11:23-27; Saqqummersitat 3:8-10) Aatsaat upperluaramik nuannaarlutik taakkua naammagalugit atorsinnaanngorpaat. (Jaaku 1:2, 3) Upperluarnerput pissutigalugu Jehovap siulersuinera naapertorlugu iliornerup pitsaanerpaajuaannarnera qularutiginngilluinnassavarput. Tamatigut uagutsinnut iluaqutaanerpaasassaaq. Qularutiginngilluinnarparput ilumoorfiginnillutik pinertusaartut naalliukkallarnermit annerungaartumik akissarsisinneqarumaarnerat. — Hebræerit 11:6.

14. Sooq Hagari maniguuttariaqarpa?

¹⁴ Aamma Jehovap siulersuinera naapertorlugu iliornermut tunngatillugu maniguunnissap pingaaruteqassusia eqqarsaatigeriaruk. Sarap inussiaataa Hagari pillugu oqaluttuami tamanna erserpoq. Sarap paasigamiuk meerartaarsinnaanani Hagari Aaperaamut tunniuppaa, tamannalu Hagarip naartulerneranik kinguneqarpoq. Maanna Hagarip Sara ernisuitsuunera pillugu makitasaarfigilerpaa. Tamatuma kingunerisaanik Sarap Hagari nikanarsartalerpaa, taamaammallu Hagari qimaavoq. Inngililli Jehovameersup Hagari ornippaa oqarfigalugulu: „Naalakkannut uterlutit maniguullutit kiffartorfiginiaruk.“ (1 Mosesi 16:2, 6, 8, 9) Imaassinnaavoq Hagari allatut nalunaarfigineqarusussimassagaluartoq, ingilimmi oqarneratut iliussaguni makitajunnaartariaqarpoq. Hagarili maniguulluni inngilip siunnersuutaa malillugu iliorpoq, erneralu Ismaeli ataatami tammaarsimaffiani avatangiisini toqqissisimanartuni inunngorpoq.

15. Jehovap siulersuinera naapertorlugu iliorumalluni pissutsini qanoq ittuni maniguunnissaq pisariaqarsinnaava?

¹⁵ Jehovap siulersuinera naapertorlugu iliorumagutta aamma uagut maniguuttariaqalersinnaavugut. Immaqa ilaasa nassuerutigisariaqarpaat aliikkusersoriaaseq nuannarisartik Guutip akuerinngikkaa. Immaqa allamik ajuallatsitsisimasoq utoqqatsertariaqarpoq. Imaluunniit kukkussuteqarsimasup  kukkusimanini nassuerutigisariaqarpaa. Taavami ingasattumik ajortulioraanni? Taava maniguuttariaqarpoq utoqqaanertanullu nassuerutigalugu. Tamanna ilagiinnut ilaajunnaarsitaanermik kinguneqarsinnaavoq. Ilagiinnut ilaaleqqikkumalluni maniguulluni peqqissimisariaqarpoq saallunilu. Pissutsinik taama ittunik assingusunillu atugaqartilluni Ussatit 29:23-mi allassimasut tuppallersaataapput: „Inuk makitanerata nikanarsartarpaa, anneruniajuitsulli ataqqinaat pisassaraa.“

Jehovap qanoq siulersortarpaatigut?

16, 17. Guutip siulersuinissaanik noqqaassuteqartilluni Biibili qanoq iluaqutigineqarnerpaassava?

¹⁶ Guutip siulersuinissaanik noqqaassuteqarfigisinnaasarput pingaarnerpaaq tassaavoq taassuma oqaasia isumassarsiarititaasoq, Biibili. (Atuaruk 2 Timotheusi 3:16, 17.) Guutilli oqaasia iluaqutiginerpaajumallugu, Biibilimiittunik iluaqutiginninniarluta unamminiarnartumik takkuttoqarnissaa utaqqisariaqanngilarput. Silatusaarnerussaaq ullut tamaasa Biibilimik atuartarnermik ileqquliussineq. (Tussiaat 1:1-3) Taamaalilluni Guutip oqaasia isumassarsiarititaasoq ilisimalluarneqalertarpoq. Guutip eqqarsaatai uaguttaaq eqqarsaatigilissavavut, aamma ajornartorsiutit naatsorsuutiginngisaraluilluunniit aaqqinnissaannut piareersimassaagut.

¹⁷ Aammattaaq pingaaruteqarpoq Biibilimi atuakkatsinnik eqqarsaatiginninnissaq tamatumunngalu tunngatillugu Guutimut qinusarnissaq. Taamaalioraangatta immikkoortut allassimaffiilluunniit ataasiakkaat pissutsini aalajangersimasuni qanoq atorneqarsinnaanerat eqqarsaatigisarsinnaavarput. (Tussiaat 77:13) Ilungersunartunik ajornartorsiuteqaleraangatta, Jehova qinnuigisariaqarparput taakkuninnga aaqqiiniarnitsinni siulersoqqulluta. Taava Jehovap anersaavata najoqqutassianik Biibilimeersunik pitsaasunik Biibilimi imaluunniit atuakkani atuagassianilu Biibililersaarutini atuarsimasatsinnik eqqaasaqarnissamut ikiussavaatigut. — Atuaruk Tussiaat 25:4, 5.

18. Jehovap uagutsinnik siulersuiniarnermini qatanngutigiissuit kristumiut qanoq atortarpai?

¹⁸ Qatanngutigiissuit kristumiut ilaaffigisavut Guutip siulersuinissaanik noqqaassutiginninnermi iluaqutaasinnaasut ilagaat. Qatanngutigiissuarni taakkunani qitiusoq tassaavoq „inussiaq aalajaallunilu silatooq“ (NV) taassumalu Siulersuisoqatigiivi. Taakkua anersaakkut inuussutissanik, atuakkanik atuagassianillu aamma ataatsimiinnernut ataatsimeersuarnernullu pilersaarutinik, pilersuiuarput. (Matthæusi 24:45-47; naleqqiuguk Apustilit Suliaat 15:6, 22-31.) Taakkua saniatigut qatanngutigiissuarni kristumiuusuni inoqarpoq anersaakkut inersimalluartunik, pingaartumik utoqqaanertanik, ikiuinissamut Biibilimillu tunngaveqartumik siunnersuinissamut piukkunnaateqartunik. (Esaja 32:1) Aammattaaq meeqqat inuusuttullu ilaqutariinni kristumiuniittut angajoqqaaminnit uppertunit, siunnersuinissamut Guutimit piginnaatitaasunit, naleqangaartumik ikiorneqarsinnaapput. Taamatut ikiorneqarsinnaanertik atorluartuartariaqarpaat. — Efesosimiut 6:1-3.

19. Jehovap siulersuinissaa noqqaassutigigutsigu pilluaqqussutit suut maanna naassaanngitsumillu nuannaarutigisinnaassavavut?

¹⁹ Aap, Jehovap assigiinngitsorpassuartigut siulersorumavaatigut, silatusaassaagullu tamanna atorluarniarutsigu. Israelikkut aalajaakkallarmata, taakku pillugit kunngi Daavi ima oqarpoq: „Siuaasatta illit tatigaatsit; tatigimmatsit aniguisippatit. Ilinnut torlulapput annaanneqarlutillu; illit tatigaatsit pakatsisinneqarnatillu.“ (Tussiaat 22:4-6) Taamatulli uagut Jehova tatigigutsigu siulersuineralu naapertorlugu iliortarutta, aamma uagut neriuuterput pillugu ’pakatsisinneqarnavianngilagut’. Nammineq ilisimassuserput tatiginagu ’aqqutigisassavut Jehovamut isumagitikkutsigit’, maannangaaq pilluaqquneqangaassaagut. (Tussiaat 37:5) Ilumoorfiginnillutalu pinertusaarutta pilluaqquneqaativut taakku naassaanngitsumik pilluaqquneqaatigissavavut. Kunngi Daavi ima allappoq: „[Jehovap] eqqortoq iluaraa imminullu ilumoortut imminiiginnarnagit. Taakku sernissorneqartuartarput. . . . Iluartut nuna kingornutissavaat najugaqassallutillu tassani naassaanngitsumik.“ — Tussiaat 37:28, 29.

Uku nassuiarsinnaavigit?

• Sooq Jehovap siulersuinera tatigaarput?

• Jehovap siulersuineranik akuerinninnginneq qanoq kinguneqartarpa?

• Pissutsini qanoq ittuni maniguuttariaqarpugut?

• Ullumikkut Jehovap qanoq siulersortarpaatigut?

[Atuaqqissaarnermi apeqqutit]

[Qupp. 15-mi assiliartaq]

Inuunermi sutigut tamatigut Jehova tunaaraajuk?

[Qupp. 16-mi assiliartaq]

Evap Jehovap kisimi oqartussaanera akuerinngilaa

[Qupp. 17-mi assiliartaq]

Hagarip inngilip peqqussutaa malikkumallugu pissuseq suna pissuserisariaqarpaa?