Ajunngitsuliortuarit

’Ajunngitsuliortuaritsi.’ — LUKASI 6:35, NV.

1, 2. Sooq allanut ajunngitsuliornissaq amerlanertigut unamminiarnartarpa?

ALLANUT ajunngitsuliornissaq unamminiarnarsinnaavoq. Inussiarnisaarfigisatsinnimmi ajunngitsumik akineqartuaannanngilagut. ’Guuti pilluartoq’ taassumalu ernera pillugit nutaarsiassaq nuannersoq allanut oqaluttuariniarlugu tamaviaarnitsigut inunnut iliuuserisinnaasatta pitsaanerpaartaat iliuuserigaluarlutigu, immaqa oqaluttuussavut tusarliussatsinnik soqutiginninnatilluunniit qujamasuutiginninngillat. (1 Timotheusi 1:11) Allat ’nappakkamut Kristusip anniartitaaffianut akeraallutik inuupput’. (Filippimiut 3:18, NV) Uagut kristumiutut taakku qanoq pissusilersorfigissavavut?

² Jiisusip ajoqersukkani ima oqarfigai: „Akeqqasi asajuassavasi ajunngitsuliortuarlusilu.“ (Lukasi 6:35, NV) Oqaaqqissaarut tamanna Jiisusillu tullermut ajunngitsuliornissaq pillugu oqaaserisai allat sammeriartigit.

’Akeqqasi asasigik’

3. (a) Jiisusip oqaaserisai Matthæusi 5:43-45-mi allassimasut nammineq oqaatsitit atorlugit oqaluttuarikkit. (b) Ukiuni hundredelinni siullerni juutit upperisarsiornikkut siuttuisa akornanni isuma juutinut juutiunngitsunullu tunngasoq suna nalinginnaalersimava?

³ Jiisusip Qaqqami oqaluutsimini tusaamasaasumi tusarnaartuni peqquai akeqqaminnik asanneqqullugit  imminnillu qinuginnittunik qinnusseqqullugit. (Atuaruk Matthæusi 5:43-45.) Pisumi tamatumani najuuttut juutiupput peqqussummik matuminnga ilisimannittut: „Inuiaqatinnut akinialerituussanngilatit puttarsisaqarnalluunniit. Tullit ilittut asassavat.“ (3 Mosesi 19:18) Ukiuni hundredelinni siullerni juutit upperisarsiornikkut siuttui isumaqarput oqaatsit ’inuiaqatit’ aamma „tullit“ juutinuinnaq atuuttut. Mosesip inatsisaani piumasaqaatigineqarpoq Israelikkut inuiaqatigiinnit allanit avissaaqqajuarniarnissaat, juutiunngitsulli tamarmik akeraanerannik taakkualu tamarmik immikkut uumissorneqartussaanerannik isuma nalinginnaalersimavoq.

4. Jiisusip ajoqersugai imminnut akeraasunut qanoq pissuseqartussaappat?

⁴ Tamatuma akerlianik Jiisusi ima oqarpoq: „Akeqqasi asasigit, ilissinnillu qinuginnittut qinnussigit.“ (Matthæusi 5:44) Tassa ajoqersukkat imminnut akeqqersimaartunik asannittussaapput. Lukasip iivangkiiliua naapertorlugu Jiisusi ima oqarpoq: „Ilissinnut, tusaasunut, oqarpunga: Akeqqasi asasigit, ilissinnillu uumissuisut ajunngitsuliorfigisigit. Ilissinnik perloqqusisut pilluaqqusigit, ilissinnik naalliutsitsisut qinnussigit.“ (Lukasi 6:27, 28) Ukiuni hundredelinni siullerni Jiisusip oqaasiinik pigiliussillutillu maleruaasut pisarsimanerattut ’uagutsinnik uumissuisut ajunngitsuliorfigisarpavut’ taakkua akeqqersimaaraluartut inussiarnisaarfigalugit. ’Uagutsinnik perloqqusisut pilluaqqusarpavut’ inussiarnersumik oqaluffigalugit, aamma nakuusernermikkut arlaatigulluunniit ’naalliutitsinermikkut’ ’uagutsinnik qinuginnittut qinnuttarpavut’. Taamatut qinusarnitsigut ersersittarparput uagutsinnut akeraasut asallutigit, malersuisitta allamik isumataarnissaat Guutimillu iluarisaalissutigisaminnik iliuuseqartalernissaat pillugu Jehova qinnuigisaratsigu.

5, 6. Sooq uagutsinnut akeraasut asassavavut?

⁵ Sooq uagutsinnut akeraasut asassavavut? Jiisusi ima akivoq: „Ataatassinnut qilanniittumut qitornaaqqullusi.“ (Matthæusi 5:45) Jiisusip siunnersuutaa malikkutsigu Guutimut ’qitornaalissaagut’, Guuti ’seqinerminik ajunngitsunut ajortunullu nueqqusisartoq iluartunullu iluaatsunullu siallersitsisartoq’ ilaartaratsigu. Imaluunniit soorlu Lukasi allaatiginnittoq, Guuti „qujasuitsunut ajortunullu ajunngitsuliortuuvoq“. — Lukasi 6:35.

⁶ Jiisusip ajoqersukkat ’akeqqaminnik asanninnissaata’ qanoq pingaaruteqartiginera erseqqissarpaa ima oqarluni: „Ilissinnik asannittut kisiisa asagussigit, taava suna akissarsiarissasoraasiuk? Ilanngaaserisuttaaq taamaaliortarput. Qatanngutisimi kisiisa inussiarnisaarfigigussigit, taava sumik immikkooruteqartumik iliuuseqarpisi? Guutimik nalusuttaaq taamaaliortarput.“ (Matthæusi 5:46, 47) Asanninnerput akillugu iliuuseqartut kisiisa asagutsigit Guutimit ’akissarsiaqartariaqanngilagut’, imaluunniit nersornaaserneqartariaqanngilagut. Ilanngaaserisut, ajorineqarajuttut, allaat asannitsiminnik asannittarput. — Lukasi 5:30; 7:34.

7. Sooq ’qatanngutivut’ kisiisa ilassisarutsigit immikkooruteqartumik iliuuseqassanngikkaluarpugut?

⁷ Juutit ilassinnissutigisartagaanni oqaaseq ’eqqissineq’ ilaavoq. (Lukasi 10:5; Johannesi 20:19) Ilassinnissummi ilaavoq ilassisap peqqinnissaanik, pilluarnissaanik atugarissaarnissaanillu kissaassineq. ’Immikkooruteqassanngikkaluarpoq’ ’qatanngutitsitut’ isigisavut kisiisa ilassisarutsigit, imaluunniit inussiarnisaarfigisarutsigit. Soorlu Jiisusi uparuaasoq, „Guutimik nalusuttaaq“ taamaaliortarput.

8. Jiisusip tusarnaartuni sunissaannut kajumissaarpai ima oqarami: „Ilissi iluarluinnaritsi“?

 ⁸ Ajorti kingornussaq pissutigalugu Jiisusip ajoqersugai kukkujuitsuunatilluunniit naammalluinnartuunngillat. (Romamiut 5:12) Taamaakkaluartorli Jiisusip oqalugiaatimi immikkoortua taanna ima naggaserpaa: „Ilissi iluarluinnaritsi, soorlu Ataatarsi qilammiittoq iluarluinnartuusoq.“ (Matthæusi 5:48) Taamaalilluni Jiisusip tusarnaartuni kajumissaarpai ’Ataataminnik qilammiittumik’, Jehovamik, ilaarseqqullugit, imminnut akeraasunik asanninnermikkut asanninnerminnik naammalluinnartunngortitsillutik — asannilluinnarlutik. Uaguttaaq taamatut piumaffigineqarpugut.

Sooq isumakkeerfiginnittassaagut?

9. Oqaatsit „akiitsukkatsinnik isumakkeerfigitigut“ qanoq paasisariaqarpat?

⁹ ’Ajunngitsuliortarpugut’ uagutsinnut ajortuliorsimasoq nallittorlugu isumakkeerfigigaangatsigu. Jiisusip qinunissamut najoqqutassiaa ima ilaqarpoq: „Akiitsukkatsinnik isumakkeerfigitigut, soorlu uaguttaaq akiitsortivut isumakkeerfigigivut.“ (Matthæusi 6:12) Soorunami matumani pineqanngilaq akiitsunik, akiligassanik, isumakkeerfiginninneq. Lukasip iivangkiiliuani erserpoq ’akiitsut’ Jiisusip eqqarsaatigisai tassaasut ajortuliat, imami allassimavoq: „Ajortitsinnik isumakkeerfigitigut, uaguttaarmi kinaluunniit uagutsinnut akiitsortoq isumakkeerfigaarput.“ — Lukasi 11:4.

10. Isumakkeerfiginninneq eqqarsaatigalugu Guuti qanoq ilaarsinnaavarput?

¹⁰ Guuti, ajortuliortunik peqqissimisunik isumakkeerfiginneriaannaasartoq, ilaartariaqarparput. Apustili Paulusi ima allappoq: „Immissinnut ajunngitsuliorfigigitsi nallittuillusilu, isumakkeerfigeqatigiittaritsilu soorlu Guutip Kristusimi isumakkeerfigigaasi.“ (Efesosimiut 4:32) Tussiaasiortoq Daavi ima erinarsorpoq: „[Jehova] naakkinnillunilu saammaasuuvoq, kamajaatsuullunilu ilumoorsusermillu peqangaarluni. . . . Iliorfiginngilaatigut ajortuliatta nalissaannik, akilernatalu pinerlunnitta taamaaqataanik. . . . Soorlu kangia kitaanit ungasissoq, taamatut unioqqutitsinivut ungasillisippai uatsinnit. Soorlu ataataasup qitornani nallittortarai, taamatut [Jehovap] nallittortarpai mianerinnitsini. Nalunngilaami pinngortitaasugut, eqqaamavaa pujualaasugut.“ — Tussiaat 103:8-14.

11. Kikkut Jehovamit isumakkeerfigineqassappat?

¹¹ Guutimit isumakkeerfigineqarsinnaavugut aatsaat uagutsinnut ajortuliorsimasut uagut nammineq isumakkeerfigisimagutsigit. (Markusi 11:25) Jiisusip tamanna erseqqissarpaa ima nangilluni: „Inuimmi unioqqutitsinerinik isumakkeerfigigussigit, taava Ataatassi qilammiittup aamma ilissi isumakkeerfigissavaasi. Inuilli isumakkeerfiginngikkussigit, taava aamma Ataatassi unioqqutitsinissinnik isumakkeerfigissanngilaasi.“ (Matthæusi 6:14,15) Aap, Guutip allanik isumakkeerfiginneriaannaasut kisiisa isumakkeerfigisarpai. Ilaatigullu ajunngitsuliorsinnaavugut Paulusip kajumissaarutaanik matuminnga malinninnitsigut: „Soorlu [Jehovap] isumakkeerfigigaasi taamatuttaaq ilissi iliussaasi.“ — Kolossemiut 3:13.

„Eqqartuussissaaritsi“

12. Allanik eqqartuussinermut tunngatillugu Jiisusi qanoq siunnersuiva?

¹² Ajunngitsulioriaaseq alla eqqaaneqarpoq Jiisusip Qaqqami oqaluutsimini tusarnaartuni ima oqarfigimmagit: „Eqqartuussissaaritsi eqqartuunneqaqqunasi.“ (Matthæusi 7:1, NV) Tamatuma kingorna peqqussut tamanna erseqqissarniarlugu torrattumik assersuusiorpoq. (Atuaruk Matthæusi 7:2-5.) Misissoriartigu Jiisusip suna pineraa ima oqarami: „Eqqartuussissaaritsi.“

13. Jiisusip tusarnaartui susussaappat?

¹³ Matthæusip allagaanut assingusumik, Lukasi naapertorlugu Jiisusi ima oqarpoq: „Eqqartuusseqinasi [Eqqartuussissaaritsi, NV], taava ilississaaq nammineq eqqartuunneqassanngilasi; assuarleqinasi, taava ilississaaq assuarlerfigineqassanngilasi. Isumakkeerfiginnigitsi, taava ilississaaq isumakkeerfigineqassaasi.“ (Lukasi 6:37) Ukiuni hundredelinni siullerni farisiiarit allanik sukannersumik eqqartuussisarput, taamaaliortarlutillu ileqqutoqqat Biibilimik tunngaveqanngitsut tunngavigalugit. Jiisusip tusarnaartuisa ilaat taamaaliortartut ’eqqartuussissaartussaapput’. Allat kukkuneri pillugit ’isumakkeerfigisussaavaat’. Apustili Paulusi isumakkeerfiginninnermut tunngasumik tamatumunnga assingusumik siunnersuuteqarpoq, soorlu tamanna eqqaaneqareersoq.

14. Jiisusip ajoqersugaasa namminneq isumakkeerfiginnittarnermikkut allat sunissamut kajumissisissinnaavaat?

¹⁴ Jiisusip ajoqersugaasa isumakkeerfiginnittarnermikkut allat isumakkeerfiginnikkumassuseqarnissamut  kajumissisissinnaavaat. Jiisusi ima nangippoq: „Eqqartuussissutigisassinnimmi eqqartuunneqarumaarpusi, uuttuutigisassinnillu uuttuiffigineqarumaarpusi.“ (Matthæusi 7:2) Siaruartikkatsinnik katersuiumaarpugut, aamma allanik qanoq pinnittarnitsinnut tunngatillugu. — Galatiamiut 6:7.

15. Ingasattumik isornartorsiuiniartarnerup eqqunngitsuunera Jiisusip qanoq ersersippaa?

¹⁵ Ingasattumik isornartorsiuiniartarnerup qanoq eqqunngitsiginera ersersinniarlugu Jiisusi ima aperivoq: „Sooq qatanngutivit issiutaa makiarninnguaq isiginiarpiuk, paakkarut illit isinniittoq maluginagu? Imaluunniit qatanngutinnut qanoq oqarsinnaavit: Issiutit peerallarlara uffa paakkarummik illit isinniittoqartoq?“ (Matthæusi 7:3, 4) Isornartorsiueqqajaasartup kukkulaarninnguit qatanngummi ’isaaniittut’ maluginiartarpai. Isornartorsiuisartup qatanngummi pissutsinik isiginnittaasia ajoquteqarneramisaartarpaa, aamma naliliilluarsinnaannginneramisaartarpaa. Kukkulaarneruinnaraluartoq — issiutitut mikitigisoq — ’issiutaa peerumasarpaa’. Ilumoortuusaarluni qatanngut paasinninnerulernissaanut ikiorniarlugu neqeroorfigisarpaa.

16. Sooq oqartoqarsinnaava farisiiarit isiminni ’paakkaruteqartut’?

¹⁶ Ingammik juutit upperisarsiornikkut siuttui allanik sakkortuumik isornartorsiuisarput. Assersuutigalugu eqqaasinnaavarput inunnguuserisaminik tappiitsup Jiisusimit ajorunnaarsinneqartup Jiisusip Guutimeersuusimassanera oqaatigimmagu farisiiarit ima akipiloornerat: „Ajortilissuullutit inunngorsimallutit qanoq ilillutit ilitsersorniarsinnaavisigut?“ (Johannesi 9:30-34) Anersaakkut tappissuseq Jehovallu najoqqutassiai tunngavigalugit eqqortumik naliliilluarsinnaaneq eqqarsaatigalugit farisiiarit isiminni ’paakkaruteqarput’ tappiilluinnarlutillu. Taamaattumik Jiisusi ima nangippoq: „Ilumoortuusaartutit uumaa, paakkarut illit isinniittoq peeqqaarallaak, taava isigilluarsinnaassaatit qatanngutivit issiutaata peernissaanut.“ (Matthæusi 7:5; Lukasi 6:42) Ajunngitsuliornissarput inussiarnisaartarnissarpullu aalajangiusimagutsigu sukannerluta allanik eqqartuussissanngilagut qatanngutittalu isaani issiummik assersuutaasumik ujaasiuaannassanata. Naammalluinnanngitsuunerput miserratigissanngilarput, taamaattumillu uppeqatitsinnik eqqartuusseqqajaanaveersaarlutalu isornartorsiueqqajaassanngilagut.

 Allanik qanoq pinnittariaqartugut

17. Matthæusi 7:12 naapertorlugu allat qanoq pisassavavut?

¹⁷ Jiisusip Qaqqami oqaluutsimini uparuarpaa Guuti kiffami qinnutaat tusarnaaraangamigit taakkununnga ataatatut ittartoq. (Atuaruk Matthæusi 7:7-12.) Aamma malittarisassaq Jiisusip saqqummiussaa una maluginiariaruk: „Taamaattumik: Inunnut qanorluunniit iliorfigeqqugussi ilississaaq taamatut iliorfigisigit.“ (Matthæusi 7:12) Aatsaat inoqativut taamatut pisarutsigit ersersissinnaavarput Jiisusimut Kristusimut ajoqersugaalluta ilumoortut.

18. ’Inatsisini’ qanoq ersersinneqarpa nammineq pineqarusunnitsitut allanik pinnittariaqartugut?

¹⁸ Nammineq pineqarusunnitsitut allanik pinnittarnissaq pillugu oqaaseqareerluni Jiisusi ima nangippoq: „Taamaappummi inatsisit pruffiitillu.“ Jiisusip oqarneratut allanik pinnikkaangatta anersaaq ’inatsisinut’ — tassa Mosesimik allakkanit siullerniit tallimaannut — tunngaviusoq naapertorlugu iliortarpugut. Allakkat taakkua Jehovap kinguaassamik ajortunik tamanik piiaasussamik pilersitsinissamik siunertaqarneranik paasinarsisitsinerisa saniatigut, inatsisinik ukiumi 1513-imi u.n.s. Guutip Mosesi aqqutigalugu Israelikkunnut tunniussaanik imaqarput. (1 Mosesi 3:15) Ilaatigut Israelikkut naapertuilluartumik iliortarnissaannik, kinaassusersiortuunnginnissaannik aamma piitsunut takornartanullu nunaminniittunik ajunngitsuliorfiginnittarnissaannik peqqussummik imaqarput. — 3 Mosesi 19:9, 10, 15, 34.

19. ’Pruffiitinit’ qanoq ersersinneqarpa ajunngitsuliortassasugut?

¹⁹ Oqaaseq ’pruffiitit’ atorlugu Jiisusip allakkat siulittuutaasut Allakkani Hebræerisuuniittut innersuussutigai. Taakkua Missiarsi pillugu siulittuutinik Jiisusimut namminermut eqquuttunik imaqarput. Aamma taakkunani erserpoq Guutip innuttani pilluaqqusarai nammineq isimini eqqortumik ilioraangata aamma allanik iluamik pinnikkaangata. Assersuutigalugu Israelikkunnut siunnersuut una Esajap siulittuutaaniippoq: „Ima oqarpoq [Jehova]: ’Eqqartuussinermi iluartuliornissaq sianiginiarsiuk naapertuilluartumillu iliorlusi. . . . Pilluarpoq taama iliortoq, inuk matuminnga aalajangiussisoq . . . iluaatsuliornaveersaarlunilu.’“ (Esaja 56:1, 2) Aap, Guutip innuttami ajunngitsuliortuarnissaat piumasaraa.

Tamatigut allanut ajunngitsuliortarit

20, 21. Inuit Jiisusip Qaqqami oqaluusia qanoq periarfigaat, aamma sooq tamatumani pineqartut eqqarsaatigeqqissaartariaqarpavut?

²⁰ Jiisusip Qaqqami oqaluutsimini nalissaqanngitsumi oqaaserisarpassuisa pingaarutillit ilaannaat sammivavut. Taamaakkaluartorli taamanikkut oqaasiinik tusarnaartut periarnerat paasinartipparput. Biibilimi ima allassimavoq: „Jiisusilu oqalulluni inermat ajoqersuutaa inuit tupigusuutigingaarpaat [ajoqersueriaasia pillugu inuit uissuummilluinnarput, NV], ajoqersormatimmi naalattariaqartutut allakkanik ilisimasortamissut pinnani.“ — Matthæusi 7:28, 29.

²¹ Qularnanngilluinnarpoq Jiisusi tassaasoq „Siunnersuisoq Nalissaqanngitsoq“ siulittuutigisaq. (Esaja 9:5) Qaqqami oqaluuseq Jiisusip Ataatani qilammiusoq taassumalu pissutsinik isiginnittaasia pillugit ilisimasaqarluarneranut takussutissaalluarnerpaavoq. Sammeriikkatta saniatigut Qaqqami oqaluuseq qanoq ililluni piviusumik pillualertoqartarneranut, qanoq ililluni kinguaassiuutitigut inuunerlunnaveersaartoqartarneranut, qanoq ililluni naapertuilluartuliortoqartarneranut, qanoq ililluni toqqissisimanartumik pilluarnartumillu siunissaqalertoqartarneranut allarpassuarnullu tunngassuteqarpoq. Soormi Matthæusip iivangkiiliuani kapitalit 5-imiit 7-imut qinunikkut atuaqqissaaqqikkukkit? Jiisusip Qaqqami oqaluutsimini siunnersuutai asseqanngitsut eqqarsaatigeqqissaakkit taakkualu malillugit iliorlutit. Taava Jehovamut iluarisaasinnaanerussallutillu allanik eqqortumik pinnissinnaanerussallutillu ajunngitsuliortuaannarsinnaanerussaatit.

Qanoq akissavit?

• Uagutsinnut akeraasut qanoq pisassavut?

• Sooq isumakkeerfiginnittariaqarpugut?

• Allanik eqqartuussisarneq pillugu Jiisusi qanoq oqarpa?

• Matthæusi 7:12 naapertorlugu allanik qanoq pinnittariaqarpugut?

[Atuaqqissaarnermi apeqqutit]

[Qupp. 14-mi issuagaq]

Nalunngiliuk sooq Jiisusi ima oqartoq: „Eqqartuussissaaritsi“?

[Qupp. 12-mi assiliartaq]

Sooq uagutsinnik malersuisut qinnuttassavavut?

[Qupp. 14-mi assiliartaq]

Illit nammineq pineqarusunnittut allat tamatigut pisarpigit?