Akissutit atorsinnaasut
Akissutit atorsinnaasut
ATUAGARPASSUARNI imminut ikiorniarnermut naatsorsuussani ullumikkut pineqarsinnaasuni siunnersuutit ilarpassui inunnut inuttut ajornartorsiortunut iluaqutissiaapput. Biibilimut tunngatillugu allaavoq. Ilumoorpoq aliasuuteqartut Biibili iluaqutigisinnaagaat, tamannaannaanngilarli. Tassani siunnersuutigineqartut iluaqutigalugit kukkunissaraluit pisariaqanngitsumik inuunermi artorsartitsisinnaasut pinngitsoorsinnaavavut.
Biibili iluaqutigalugu ’misilittagakitsoq paasisimasaqalersinnaavoq angullu inuusuttoq ilisimasaqalersinnaalluni isumatussuseqalersinnaallunilu’. (Ussatit 1:4) Biibilimi siunnersuutit maleruarukkit „isumatusaarnerup paarissavaatit, siuneqarnerullu sernigissavaatit. Annaatissavaatsit aqqummit ajortumit.“ (Ussatit 2:11, 12) Aalajangersimasunik assersuuteqarluta misissoriartigu Biibilimi siunnersuutinik maleruaaneq peqqinninnut qanoq iluaqutaasinnaasoq, ilaqutariittut inuunissinnik qanoq pitsaanerulersitsisinnaasoq sulisartuulluarnerunissannullu sulisitsisuulluarnerunissannulluunniit qanoq iluaqutaasinnaasoq.
Imigassaq ingasaannagu
Ingasaassinani imigassartortarneq Biibilimi ajorineqanngilaq. Apustili Paulusip viinnip nakorsaatitut iluaqutaanera inuusuttumut Timotheusimut ima eqqaavaa: „Viinnisulaartarniarit naarissaatigalugu, peqqiilliortaannaravit.“ (1 Timotheusi 5:23) Allassimaffiilli allat ersersippaat Guutip eqqarsaatigisimagaa viinni nakorsaataaginnassanngitsoq. Viinni ’inunnik nuannaalersitsisartutut’ eqqaaneqarpoq. (Tussiaat 104:15) Biibilimili ’imerajuttuunermut’ mianersoqquneqarpugut. (Titusi 2:3) Ima allassimavoq: „Ilaginiaqinagit viinnisorpallaartut, imaluunniit taakku ingasattumik neqitortut, imerpallaartut nerivallaartullu piitsunngortussaapput.“ (Ussatit 23:20, 21) Unnersuussut taamaattoq sumiginnarneqaraangat qanoq pisoqartarpa? Kisitsisit tulliuttut nunat ilaanneersut malugikkit.
Silarsuarmi Peqqissaanikkut Suliniaqatigiiffiup nalunaarusiaani Global Status Report on Alcohol 2004-mi ima allassimavoq: „Ajornartorsiutit aalakoornartutortarnermik pissuteqartut Irlandimi inuiaqatigiinnut ukiumut 2,4 milliard eurot missaannik akeqartarput.“ Aningaasartuuterpassuarnut tamakkununnga ilaapput „peqqinnissaqarfiup aningaasartuutai (279 million eurot), aningaasartuutit angallannermi ajunaarnermut tunngassuteqartut (315 million eurot), aningaasartuutit imigassartorsimalluni pinerluuteqarnermut tunngassuteqartut (100 million eurot) kiisalu imigassartorsimaneq pissutaalluni sulinngitsoornerit kingunerisaannik tunisassiornikkut annaasat (1034 million eurot),“ nalunaarusiaq nangillugu allassimavoq.
Imigassamik atornerluinerup aningaasartuutaaneranit ilungersunarnerungaartoq tassaavoq inunnut
naalliuutaanera. Assersuutigalugu Australiami ukiup ataatsip ingerlanerani inuit millionit affaat sinnerlugit aalakoortunit nakuuserfigineqarsimapput. Frankrigimi angerlarsimaffimmi nakuusernerit tamarmik 30 procentiisa missaat imigassamik atornerluinermik pissuteqarnerarneqarput. Tamakkua eqqarsaatigalugit imigassaq pillugu Biibilimi siunnersuutit ingasaassinianngitsuusutut oqaatigisariaqarput.Peqqiilliuutaasinnaasunik ileqqoqarnaveersaarit
1942-mili, pujortartarneq nuannaartorineqarallarmat, atuagassiap matuma atuartartuni paasitippai tupatorneq Biibilimi najoqqutassianik unioqqutitsinerusoq taamaattumillu atorneqartariaqanngitsoq. Ukiumi tamatumani allaaserisami eqqaaneqarpoq Guutimit iluarisaarusuttut ’timimi anersaamilu mingunnik tamanik piiaanissaq’ pillugu Biibilimi peqqussut maleruartariaqaraat. (2 Korinthimiut 7:1) Maanna ukiut 65-it qaangiutereersut paasinarsivoq Biibilimi siunnersuut taanna silatusaarnerusoq.
2006-imi Silarsuarmi Peqqissaanikkut Suliniaqatigiiffimmit nalunaarutigineqarpoq tupatorneq „silarsuarmi toqussutaanerpaat tullerigaat“. Ukiut tamaasa inuit 5 millionit missaat tupatornerup kinguneranik toqusarput. Naleqqiussinnaavarput ukiut tamaasa inuit 3 millionit missaat aids-imik toqquteqartartut. 1900-kkunni pujortartarneq inuit 100 millionit missaasa inuunerannik akeqarpoq, ukiuni hundredelinni taakkunani sorsunnerni tamani toqutaasut amerlaqatingajaat. Ullumikkut tupatortannginnerup silatusaarnerunera isumaqatigineqartorujussuuvoq.
„Kanngunartuliorneq qimarratigiuk“
Inuit akueriuminaatsinnerusaat tassaapput atoqatigiinnermut tunngasut pillugit Biibilimi siunnersuutit. Inuppassuit tammartitaallutik isumaqalersimanerattut Biibili ingasaassiniarpallaartuunngilaq kinguaassiuutitigullu perusussuseqarnerit tamaasaanngitsoq assuaralugit. Kinguaassiuutitigulli perusussuseqarnerup qanoq ersersinneqarnissaa pillugu erseqqissumik unnersuussuteqarpoq. Ajoqersuutigaa angut arnarlu katissimasut taamaallaat kinguaassiuutitigut atoqatigiissinnaasut. (1 Mosesi 2:24; Matthæusi 19:4-6; Hebræerit 13:4) Kinguaassiuutitigut atoqatigiinneq tassaavoq aappariit asanninnermik tunniusimanermillu ersersitsiffigeqatigiiffigisinnaasaat. (1 Korinthimiut 7:1-5) Inooqatigiinnerup taamaattup kingunerisaanik meeqqat inunngortut tamarmik isumassoqatigiittunik angajoqqaaqarneq iluaqutigingaarpaat. — Kolossemiut 3:18-21.
Taarserartunik atoqateqartarneq pillugu Biibilimi toqqaannartumik ima allassimavoq: „Kanngunartuliorneq qimarratigiuk!“ (1 Korinthimiut 6:18, 1936) Peqqussutip tamatuma naalattariaqarneranut pissutaasut ilaat versip nanginnerani ima eqqaaneqarpoq: „Inuup ajortuliarisai allat tamarmik timip avataaniittarput, kinguaassiuutitigulli inuunerluttoq nammineq timiminut ajortuliortarpoq.“ Atoqatigiinnermut tunngasut pillugit Biibilimi unnersuussutit sumiginnarneqaraangata qanoq pisoqartarpa?
USA-mi pissutsit atugaasut malugikkit. Nunani suliffissuaqarfiusuni inuusuttuaqqat naartusartut ullumikkut USA-mi amerlanerpaapput — ukiut tamaasa 850.000-iullutik. Meeqqat naartuuinnarsimasut amerlanersaat anaananit katissimanngitsunit erniarineqarput. Qularutissaanngilaq
anaanaasut inuusuttut taakkua ilarpassui sapinngisartik tamaat asannittumik qitornaminnik perorsaaniartut siunnersuiniartullu, ilaallu iluatsittumik perorsaasarput. Piviusuiilli tassaapput anaanaasut inuusuttuaqqat ernerisa siunissami parnaarussaanissaat anaanaasullu inuusuttuaqqat paniisa namminneq inuusuttuaraallutik anaananngornissaat ilimanaateqarnerujussuusoq. Ukiuni qulikkuutaani kisitsisitigut naatsorsueqqissaarnerit misissoreerlugit ilisimatooq Robert Lerman ima allappoq: „Ataasiinnarmik pilersuisoqartumik ilaqutareeqalernera inuit atugarisaasigut ajornartorsiutinut allanut pissutaaqataasimasinnaavoq, assersuutigalugu meeqqat atuarfimmi atuarnerminnik unitsitsiaartartunut, imigassamik ikiaroornartumillu atornerluisunut, inuusuttuaqqat naartulertartut meerartaartartunullu kiisalu inuusuttut pinerluttuliortartut amerlinerannut.“Tamalikartumik kinguaassiuutitigut atoqateqartartut timikkut sianissutsikkullu peqqinnertik aamma navianartorsiortingaartarpaat. Atuagassiami Pediatrics-imi ima nalunaaruteqarpoq: „Misissuinerit paasinarsisippaat inuusuttut atoqatiginnittartut isumatsarujussuaqqalernissaat imminornissaalluunniit ilimanartorujussuusoq.“ Peqqiilliuutaalersinnaasunut allanut atatillugu American Social Health Association-imi ima allassimavoq: „[USA-mi] inuit tamarmik affaat sinnerlugit inuunermik ilaani kinguaassiuutitigut tuniluuttartumik nappaateqalissapput.“ Eqqarsaatigiuk atoqatigiinneq pillugu Biibilimi unnersuussutit atoriaannaasut maleruarnerisigut aliasuutit naalliuutillu pinngitsoorneqarsinnaanerat.
Ilaqutariittut ataqatigiilluarneq ineriartortissiuk
Biibilimi ileqqunut aserorsaataasunut mianersoqqussuteqaannanngilaq. Ilaqutariittut inuunerup qanoq pitsaanerulersinnaanera pillugu siunnersuutit pitsaasut malugikkit.
Assersuutigalugu Guutip oqaasiani ima allassimavoq: „Uiusut nuliatik asassavaat namminneq timimittut.“ (Efesosimiut 5:28) Uiusut kajumissaarneqarput nuliatik taamaattussaannartut isiginagit ’[imminnit] qajannarnerusutut qajassuullugit inooqatigissagaat; ataqqissagaallu’. (1 Petrusi 3:7) Isumaqatigiinngissutaasinnaasut pillugit angutit ima kajumissaarneqarput: ’Angutit ukorsii, nuliasi asaniarsigik, ajuallaffigeqinasigillu.’ (Kolossemiut 3:19, 1936) Uiusoq siunnersuummik tamatumannga maleruaasoq nuliaminik asaneqarlunilu ataqqineqassasoq ilimanarpoq, ilaa?
Nuliaasut Biibilimi ima siunnersorneqarput: ’Nuliaasusi uissinnut naalatsigitigitsi soorlu Naalakkamut, uiusoq nuliaminut niaquummat soorlu Kristusi ilagiinnut niaquusoq . . . Nuliaasup uini mianerisussaavaa.’ (Efesosimiut 5:22, 23, 33) Nuliaasup uini oqaluukkaangamiuk allanulluunniit eqqartoraangamiuk kajumissaarummik tamatuminnga maleruaanini uiminit asaneqaatigissagaa ilimanarpoq, ilaa?
Meeqqanik perorsaanermut tunngatillugu Biibilimi siunnersuutigineqarpoq ’angerlarsimatillusi issiasaraangassi, angalaartaraangassi, innartaraangassi makittaraangassillu’ ilissi angajoqqaajususi qitornasilu oqaloqatigiittassasusi. (5 Mosesi 6:7) Pingaartumik ataataasut kajumissaarneqarput qitornatik ileqqussatigut ilinniartissagaat asannittumillu perorsartassagaat. „Ataataasusi, qitornasi kamatseqinasigit, perorsarsigilli anusinngorsartarlugit oqaaqqissaartarlugillu [Jehovamit] pisumik,“ Guutip oqaasiani allassimavoq. (Efesosimiut 6:4) Aamma meeqqat ima oqarfigineqarput: „Angajoqqaasi naalassigit“ aamma „ataatat anaanallu ataqqikkit“. * — Efesosimiut 6:1, 2.
Isumaqarpit kajumissaarutinik taakkunannga maleruaaneq ilaqutariit iluaqutigissinnaagaat? Immaqa ima akissaatit: ’Oqaatsit tusarnerput, atorsinnaappalli?’ Jehovap Nalunaajaasuisa naalagaaffilersaarfianni ataatsimiinnermut qaaqqorusuppatsigit. Tassani ilaqutariit Biibilimi siunnersuutinik pitsaasunik maleruaaniarlutik ilungersortut naapissavatit. Taakkua oqaloqatigikkit. Malugiullu ilaqutariinni ataasiakkaat qanoq imminnut pissuseqarfiginersut. Nammineerlutit takussavat ilaqutariit Biibilimi najoqqutassianik maleruaasut pilluartuusut.
Sulisartoq eqiasuitsoq sulisitsisorlu naapertuilluartoq
Suliffik annaajumanagu unamminiagassat pillugit Biibilimi qanoq allassimasoqarpa? Allassimavoq suliaminut pikkorissup pingaartinneqarnissaa akilerneqarnissaalu ilimanartorujussuusoq. „Takusaqaruit angummik suliamini pikkorissaartumik taava taanna kunnginut sassartiguk,“ kunngi silatooq Salomo oqarpoq. (Ussatit 22:29) Paarlattuanilli „eqiasuttoq“ sulisitsisiminut ’putsutut isillernartutut’ uuminartigaaq. (Ussatit 10:26) Sulisut Biibilimi kajumissaarneqarput unneqqarissooqqullugit eqiasuitsooqqullugillu. „Tillittartoq tillissaarli, ilungersorlunili suliniarli assani atorlugit sulinermigut ajunngitsunik naammassisaqarniarluni.“ (Efesosimiut 4:28) Aamma taamaattariaqarpoq sulisitsisumit nakkutigineqanngikkaluarluni. „Nunami naalagarisasi tamatigut naalattarsigit, ilumoortuusaartutut inunnut iluareqqusaaginnartutut pinnasi, uummatissigulli ilumoorlusi [Jehova] mianeralugu.“ (Kolossemiut 3:22) Sulisitsisuuguit sulisoq kajumissaarummik taassuminnga malinnittoq pingaartissannginnerpiuk?
Sulisitsisunut Biibilimi ima allassimasoqarpoq: „Sulisup akissarsiassani pisassaraa.“ (1 Timotheusi 5:18) Guutip Israelikkunnut inatsisai naapertorlugit sulisitsisut sulisitatik naleqquttumik akilertassavaat — taamaaliortassappullu piffissaq eqqorlugu. „Tullit tilliffigissanngilat ujajaaffiginagulu. Sulisitassi akissarsisinnissaat aqagumut utaqqisissanngilarsi,“ Mosesi allappoq. (3 Mosesi 19:13) Sulisitsisoq naleqquttumik piffissarlu eqqorlugu akissarsisitsineq pillugu Biibilimi peqqussummik maleruaasoq pingaartissannginnerpiuk?
Ilisimassutsimut pilerfiusoq pitsaanerpaaq
Tupaallaatiginngiliuk atuakkami pisoqqami Biibilimi allaat nalitsinni atorsinnaasunik siunnersuuteqarmat? Atuagarpassuit allat nalitsinnut naleqqukkunnaarsimasut, Biibilip suli atorneqarsinnaaneranut pissutaavoq ’Guutip oqaasianik’ imaqarnera, inuit oqaasianik pinnani. — 1 Thessalonikamiut 2:13.
Kajumissaarumavatsigit Guutip oqaasiata ilinniarnerunissaanut piffissaqaqqullutit. Taava Biibilip atuakkiortua Jehova Guuti asaleriartuaassavat. Guutip ilinnut siunnersuutai malikkit, taava paasissavat siunnersuutit ajortumut illersuutigalugit inuuninnilu iluaqutigalugit. Taamaaliornikkut ’Guuti qanillissavat, taava taanna ilinnut qanillissaaq’. (Jaaku 4:8) Atuakkap allap taamatut ikiorsinnaanngilaatit. (w07 04/01-E)
[Quppernerup ataani ilanngussaq]
^ imm. 20 Biibilimi najoqqutassiat ilaquttavit iluaqutigisinnaasaat sukumiisumik nassuiarneqarput atuakkami Ilaqutariittut pilluarneq isertugaateqarpoq-imi, Jehovap Nalunaajaasuinit saqqummersinneqartumi.
[Qupp. 4-mi assiliartaq]
Isumaqarpit imigassaq pillugu Biibilimi isiginnittaaserineqartoq silatusaarnerusoq?
[Qupp. 5-mi assiliartaq]
Tupatortannginnissaq pillugu siunnersuut Biibilimik tunngaveqartoq isumaqatigaajuk?
[Qupp. 5-mi suminngaanneernera]
Nunarsuaq: Asseq NASA-meersoq atorlugu tunuliaqutaliarineqarpoq