Guutip naalagaaffiata aniguisitsinissaa qanillivoq!

„Naalagaaffiit tikiulli, piumasat qilammisut nunamissaaq pili.“ — MATTHÆUSI 6:10.

1. Jiisusip oqaluussinerani pingaarnersaasoq suua?

JIISUSIP KRISTUSIP qinnut ajoqersukkaminut ilinniartitsissutigisaa Qaqqami oqaluusianut ilaavoq. Tamatumani naatsumik ersersinneqarpoq ajoqersuutigisaani suna pingaarnersaanersoq. Ajoqersukkat ima qinusussaasimapput: „Naalagaaffiit tikiulli, piumasat qilammisut nunamissaaq pili.“ (Matthæusi 6:9-13) Jiisusi pillugu allassimasoqarpoq taanna angalasoq „illoqarfiit illoqarfeeqqallu aqqusaartorlugit oqaluussisarluni Guutillu naalagaaffianik iivangkiiliu tusarliuttarlugu“. (Lukasi 8:1) Ajoqersukkanilu kajumissaarpai ’Guutip naalagaaffianik iluarneranillu ujaaseqqaaqqullugit’. (Matthæusi 6:33) Allaaserisaq una atuartillugu, atuakkatit oqaluussinermi qanoq atorsinnaanerlugit eqqarsaatigiuk. Assersuutigalugu eqqarsaatigiuk apeqqutit ukua qanoq akisinnaaneritit: Guutip naalagaaffia pillugu tusarliussaq qanoq pingaaruteqartigaa? Inuit sumit aniguisinneqarnissartik pisariaqartippaat? Aamma Guutip naalagaaffia qanoq ililluni aniguisitsissava?

2. Guutip naalagaaffia pillugu tusarliussaq qanoq pingaaruteqartigaa?

² Jiisusi ima siulittuivoq: „Naalagaaffimmik nutaarsiassaq nuannersoq tamanna nunarsuarmi inuit najugarisaanni tamarsuarmi oqaluussissutigineqassaaq inuiannut tamanut nalunaajaatitut; taavalu naggatissaq nalliutissaaq.“ (Matthæusi 24:14, NV) Guutip naalagaaffia pillugu nutaarsiassaq nuannersoq pingaaruteqarnerpaavoq. Aap, tusarliussaavoq silarsuarmi tamarmi pingaaruteqarnerpaaq! Nunarsuaq tamakkerlugu ilagiinni 100.000-init amerlanerusuni Jehovap Nalunaajaasuisa 7 millionit missaanniittut oqaluussinermik suliaq nallerneqarsimanngitsoq peqataaffigaat, inoqatitik oqaluttuullugit Guutip naalagaaffiata pilersinneqarsimanera pillugu. Tamanna nutaarsiassaavoq nuannersoq Guuti qilammi naalagaaffimmik pilersitsisimammat piffissaq nalliuppat nunarsuarmut tamarmut atuutilerumaartumik. Jehovap naalagaaffiata aqutsinerani taassuma piumasaa qilammisut nunarsuarmissaaq pissaaq.

3, 4. Guutip piumasaata nunarsuarmi pinera qanoq kinguneqassava?

³ Guutip piumasaa nunarsuarmi pippat pissutsit inuit atugaat qanoq ilissappat? Jehovap „qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu“. (Saqqummersitat 21:4) Taamanikkussamut inuit ajorti naammalluinnanngissuserlu kingornussaasut pissutigalugit napparsimalissanatillu toqussanngillat. Toqusimasut Guutip eqqaamasai naassaanngitsumik inuunissamut periarfissaqassapput, Biibilimimi ima neriorsuuteqarpoq: „Toqusut [makikkumaarput] — iluartut iluaatsullu.“ (Apustilit Suliaat 24:15) Sorsuttoqarunnaarlunilu nappaateqartoqarunnaarlunilu kaattoqarunnaassaaq, nunarsuarlu paratiisinngortinneqassaaq.  Allaat uumasut maanna ulorianartuusut ulorianarunnaassapput, aamma uumasut inuillu akornanni uumasoqatigiillu akornanni eqqissineqarumaarpoq. — Tussiaat 46:10; 72:16; Esaja 11:6-9; 33:24; Lukasi 23:43.

⁴ Guutip naalagaaffiata pilluaqqussutigisassai misinnangaartussat taakkua tunngavigalugit taamanikkussamut inuunissaq Biibilimi siulittuutini tuppallernangaartumik ima allaatigineqarpoq: „Qanilaartut nuna kingornutissavaat pilluangaarnertillu nuannaarutigissallugu.“ Ajornartorsiutinulli pisuusut qanoq pineqassappat? Biibilimi ima siulittuuteqarpoq: „Iluanngitsoq erniinnaq peeruttussaavoq. . . . [Jehovamulli] neriuttut nuna kingornutissavaat.“ — Tussiaat 37:9-11.

5. Pissutsit aaqqissuussaanerat maanna atuuttoq qanoq pineqassava?

⁵ Tamakkuali tamarmik naammassineqassappata pissutsit aaqqissuussaanerat maanna atuuttoq naalagaaffiillu aamma upperisarsioqatigiit niuernermillu aaqqissuussinerit tamatumaniittut imminnut akerleriissut peerneqassapput. Tamannarpiarlu Guutip naalagaaffiata isumagissavaa. Pruffiiti Danieli isumassarsisitaalluni maanna kunngiusut pillugit ima siulittuivoq: „Kunngit taakkua inuutillugit qilaap Guutiata naalagaaffik qaqugumulluunniit atasussaq [qilammi] pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.“ (Danieli 2:44) Taava Guutip naalagaaffia — naalagaaffik qilammiusoq nutaaq — inuiaqatigiinnut nunarsuarmiittunut nutaanut naalakkersuissaaq. Tassani atuutissapput „qilaat nutaat nunalu nutaaq iluassutsip najugarisassai“. — 2 Petrusi 3:13.

Aniguisitaanissaq aatsaat taama pisariaqartinneqartigisoq

6. Silarsuarmi matumani ajussuseq Biibilimi qanoq allaatigineqarpa?

⁶ Saatanip, Adamip Evallu suup eqqortuunera suullu eqqunngitsuunera namminneq aalajangerusullugu Guutimut pikitsitsinerat oqaluttuarisaanermut alianartumut aallarniutaavoq. Ulersuup, ukiut 1600-t sinnerlugit tamatuma kingorna pisup, siorna Guutip takuaa „inuit ajussusiat angeqisoq ullorlu tamaat iliuuseriumasaat pilersaarusiaallu ajortuinnaasut“. (1 Mosesi 6:5) Ukiut 1300-t missiliorlugit tamatuma kingorna Salomop nunarsuarmi pissutsit ajornerat ima ingasagitigaa ima allalluni: „Pilluarnerarpakka toqusut, toqoreersimammata, sulilu inuusunit pilluaateqarnerummata. Kisianni pilluaateqarneruvoq suli inunngorsimanngitsoq, ajortunik seqernup ataani pisartunik misigisaqarsimannginnami.“ (Oqaluussisartup oqaasii 4:2, 3) Taamanimiilli ukiut 3000-it ingerlapput, ullumikkullu suli ajussuseqaqaaq.

7. Sooq aniguisitaanissaq maannakkut aatsaat taama pisariaqartinneqartigaa?

⁷ Tassa silarsuarmi ajussuseq sivisoorujussuarmik atuussimavoq. Aniguisitaanissarli maanna aatsaat taama pisariaqartinneqartigilersimavoq, ukiunilu 100-ni kingullerni pissutsit ingasatsikkaluttuinnarsimapput. Assersuutigalugu Worldwatch Institute-imit nalunaarusiaq imaappoq: „[1900]-kkunni sorsunnerni toqutaasut ukiuni hundredelinni siullerniit 1899-imut sorsunnerni tamani toqutaasimasunit pingasoriaammik amerlanerupput.“ 1914-imiilli inuit 100 millioninik sinneqartut sorsunnerni toqutaasimapput! Leksikonit ilaanni allassimavoq inuit 60 millioningajaat sorsunnersuit aappaanni toqusimasut. Inuiaqatigiit arlallit maanna atomimik sakkussiaateqarnerat eqqarsaatigalugu,  inuit silarsuup inuisa ilarparujussuinik suujunnaarsitsinissamut periarfissaqarput. Aamma ilisimatuussutsikkut teknologiimullu tunngasutigut siuariartortoqaraluartoq ukiut tamaasa meeqqat 5 millioninit amerlanerusut perlertarput. — Takuuk kapitali 9 atuakkami Hvad er det Bibelen virkelig lærer? *

8. Inuit ukiuni tusindilinni aqutsisimanerat qularnanngilluinnartumik sumut uppernarsaataava?

⁸ Inuit ilungersornerat ajussuseerutitsisinnaasimanngilaq. Silarsuarmi matumani politikkikkut, niuernikkut upperisarsiornikkullu aaqqissuussinerit inuit eqqissinermut, siumukarnissamut peqqinnissamullu tunngatillugu pisariaqartitaannik tunngaviusunik matussusiisinnaasimanngisaannarput. Ajornartorsiuterujussuarnik inuit atortariaqagaannik aaqqiinatik suli amerlanerusunik ajornartorsiuteqalersitsisimapput. Inuit ukiuni tusindilinni aqutsinerat oqaatsit uku ilumoornerannut uppernarsaataapput: „Inuup ingerlavissi [oqartussaaffiginngilaa]. Ingerlasup alloriartarnini aqussinnaanngilai.“ (Jeremia 10:23, NV) Ila ilumuussusia ’inuit ilaata ataatsip inoqatiminut ajoqutaasumik pissaaneqarpallaartarnera’! (Oqaluussisartup oqaasii 8:9) Aap, „pinngortitat tamarmik suli peqatigiillutik anersaarulullutillu [nimaarput]“. — Romamiut 8:22.

9. „Ullussani kingullerni“ pissutsit suut atuunnissaat kristumiut naatsorsuutigaat?

⁹ Ullut kingulliit maanna inuuffigisavut Biibilimi ima siulittuutigineqarput: „Ullussani kingullerni [nalliukkumaarput] ullut atugarliungaarfissat.“ Ulluni taakkunani pissutsit allaatigineqarnerata kingorna ima allassimasoqarpoq: „Inuit ajortut peqquserluttullu ajortumut nakkaakkiartuinnartussaapput.“ (Atuaruk 2 Timotheusi 3:1-5, 13.) Kristumiut tamannarpiaq naatsorsuutigaat, ’silarsuarmi tamarmi Ajortumut naalatsigitippoq’. (1 Johannesi 5:19) Guutilli imminik asannittunik qanittukkut aniguisitsiumaarnera nutaarsiassaavoq nuannersoq. Taakkua silarsuarmit matumannga ajorsigaluttuinnartumit aniguisitaassapput.

Uagutsinnik aniguisitsisinnaasutuaq

10. Sooq Jehova uagutsinnik aniguisitsisinnaasutuaava?

¹⁰ Nutaarsiassaq nuannersoq allanut oqaluussissutigigaangakku, Jehovap uagutsinnik aniguisitsisinnaasutuaanera erseqqissartaruk. Taanna kisimi kiffaminik ajortunit tamanit aniguisitsinissamut pissaaneqarlunilu piumassuseqarpoq. (Apustilit Suliaat 4:24, 31; Saqqummersitat 4:11) Qularutiginngilluinnarsinnaavarput Jehovap innuttaminik tamatigut aniguisitsisarumaarnera siunertaminillu tamatigut naammassinnittarumaarnera, imami uppernarsaavoq: „Eqqarsaatikka eqqorlugit pisoqassaaq.“ Oqaasia „susaarluni [taassumunnga] utissanngilaq“. — Atuaruk Esaja 14:24, 25; 55:10, 11.

11, 12. Jehovap kiffani qanoq uppernarsaavigai?

¹¹ Jehovap uppernarsaavigaatigut ajortunut eqqartuussut naammassiguniuk kiffaminik aniguisitsiumaarnerminik. Pruffiiti Jeremia aallartikkamiuk ingasattumik ajortuliortunut nakimaalluni tusarliiniassammat ima oqarfigaa: „Qunugissanngilatit.“ (NV) Sooq qunugissanngilai? „Uanga najorakkit annaatissallutillu.“ (Jeremia 1:8) Jehovap Sodoma Gomorralu guutiitsuunerat pillugu piuneerunnialeramigit inngilit marluk Lotimut aallartippai, Loti taassumalu ilaqutai nunap ilaanit tamatumannga isumannaatsumut siulersorniassammatigik. Aatsaat tamatuma kingorna Jehova „Sodomamut Gomorramullu ikuallassaammik innermillu . . . nakkaatitsivoq“. — 1 Mosesi 19:15, 24, 25.

¹² Silarsuaq tamakkerlugu piuneerussinissaq pineqaraluartoq Jehovap piumasani malillugu iliortut aniguisissinnaavai. Ulersuarmi silarsuaq ajortoq tamaat piuneerukkamiuk, „Noa iluarnermik nalunaariartortitaq allallu arfineq-marluk . . . [asattuuppai]“. (2 Petrusi 2:5) Jehova assuarnaatsunik aniguisitseqqissaaq silarsuaq ajortoq manna piuneerukkuniuk. Taamaattumik taassuma oqaasiani ima kajumissaaruteqarpoq: „[Jehova] ujarsiuk nunami maniguuttusi tamassi . . . Iluarsuseq noqqaassutigisiuk, maniguunneq noqqaassutigisiuk. Immaqa taava qimarnguissarsiumaarpusi ullormi [Jehovap] kamaffissaani.“ (Sefania 2:3) Silarsuaq tamakkerlugu piuneerussinerup kingunerisaanik ’peqqusersuitsut nunami najugaqassapput, iluanngitsulli nunamit piiagaassapput’. — Ussatit 2:21, 22.

13. Jehovamut kiffaasut toqusimasut qanoq ilillutik aniguisinneqassappat?

¹³ Guutilli kiffaasa ilarpassui nappaateqarneq, malersorneqarneq allalluunniit pissutigalugit toqoreersimapput.  (Matthæusi 24:9) Taakkua qanoq aniguisinneqassappat? Soorlu eqqaaneqareersoq, ’iluartut toqusimasut makikkumaarput’. (Apustilit Suliaat 24:15) Jehovap kiffaminik aniguisitsiniarnermini sumilluunniit akornuserneqarsinnaannginnera nalunagu tuppallernangaarami, ilaa?

Naapertuilluartumik naalakkersuineq

14. Sooq qularutiginngilluinnarsinnaavarput Guutip naalagaaffiata naapertuilluartumik naalakkersuinissaa?

¹⁴ Oqaluussininni nassuiarsinnaavat Jehovap naalagaaffia qilammiittoq naapertuilluartumik naalakkersuissasoq. Tamatumunnga pissutaasoq tassaavoq Jehovap pissusii malunnarnerpaat, soorlu naapertuilluarneq asanninnerlu, naapertorlugit naalakkersuisoqarumaarnera. (5 Mosesi 32:4; 1 Johannesi 4:8) Guutip kunngitut pissaaneq Jiisusimut Kristusimut, nunarsuarmut naalakkersuilluarsinnaanerpaamut, tunniutereerpaa. Aammattaaq Jehovap siunertaraa kristumiut tanitat 144.000-it akiliunneqarlutik nunamiikkunnaarsitaanissaat qilammilu inuunermut Kristusip Guutip naalagaaffianik kingornusseqatissaasut makititaanissaat, aamma Kristusi peqatigalugu nunarsuarmi suliassanik ingerlatsissapput. — Saqqummersitat 14:1-5.

15. Inuit aqutsinerata Guutillu naalagaaffiata aqutsinerata assigiinngissutaat suussava?

¹⁵ Jiisusip 144.000-illu naalakkersuinerat inuit naammalluinnanngitsut naalakkersuinerannit allaanerulluinnassaaq. Silarsuarmi matumani naalakkersuisut amerlanertigut naakkittaatsuusarsimapput innuttamillu sorsunnernik, inuit millionillit toqunerannik kinguneqartartunik, misigisaqartarnerannut pisuusarsimallutik. Tupinnanngilaq Biibilimi siunnersorneqaratta ’inunnik annaassisinnaanngitsunik’ tatiginneqqunata. (Tussiaat 146:3) Maluginiariarulli anersaaq Kristusip aqutsinerata ilisarnaatigiumaagaa. Soorlu Jiisusi ima oqartoq: „Ornissinga tamassi suleruluttusi nanertugaasusilu, nukissaqalerseqqissavassi. Nammaatara ilissinnut pisissiuk, ilinniarfigisingalu saamagama uummatikkullu makitajuikkama; tarnissigullu nukissaqalissaasi. Nammaatarami iluaqaaq, nammakkiussaralu oqeqaluni.“ — Matthæusi 11:28-30, NV.

Ullut kingulliit qanittukkut qaangiutissapput!

16. Ullut kingulliit qanoq naggaserneqassappat?

¹⁶ Silarsuaq manna 1914-imiilli ullussaminiilersimavoq kingullerni, imaluunniit ’pissutsit aaqqissuussaanerata naggataatungaani’. (Matthæusi 24:3, NV) Qanittukkut Jiisusip ’naalliunnartoqangaarnissamik’ taasaa nalliutissaaq. (Atuaruk Matthæusi 24:21.) Naalliunnartoqangaarnissaq, imaluunniit annikilliornartorsuaq, nallerneqarsimanngisaannartoq, Saatanip silarsuaanik tamarmik suujunnaarsitsissaaq. Qanorli ililluni aallartissava, aamma qanoq naassava?

17. Annikilliornartorsuup qanoq aallartinnissaa pillugu Biibilimi allassimasoqarpa?

¹⁷ Annikilliornartorsuaq tassanngaannaq aallartissaaq! Aap, ’Jehovap ullussaa’ ilimagineqanngiffimmigut nalliutissaaq, „inuit oqarpata: ’Sumilluunniit aarlerinartoqanngilaq!’“ (Atuaruk 1 Thessalonikamiut 5:2, 3.) Annikilliornartoq siulittuutigineqartoq aallartissaaq inuiaqatigiit isumaqalerpata ajornartorsiuterujussuarmik  ilaannik aaqqiingajalerlutik. ’Babylonersuarmik’, upperisarsiornerup eqqunngitsup silarsuarmi tamarmi naalagaaffissuanik, tassanngaannaq aseruineq silarsuarmik tupaallatsitsissaaq. Nunarsuarmi kunngiusut allallu tupigusussapput Babylonersuarmut eqqartuussut naammassineqarpat. — Saqqummersitat 17:1-6, 18; 18:9, 10, 15, 16, 19.

18. Saatani Jehovap innuttaanik saassussippat Taanna qanoq qisuariassava?

¹⁸ Piffissami ernumanartorsiorfiusumi „nalunaaquteqarumaarpoq seqinermi, qaammammi ullorissanilu“, aamma „Inuup Ernerata nalunaaqutaa qilammi erserumaarpoq“. Tamanna pippat ’niaqquvut massitsisinnaassavavut aniguisitaanissarput qanillimmat’. (Lukasi 21:25-28; Matthæusi 24:29, 30) Saatanip, imaluunniit Gogip, sakkutuuni Guutip innuttaanik saassussitissavai. Kiffaminilli aalajaatsunik saassussisut pillugit Jehova ima oqarpoq: „Ilissinnik attuisut isima tappiutaat attorpaat.“ (Zakaria 2:12) Taamaattumik Saatanip taakkuninnga suujunnaarsitseriaraluarnera iluatsinnavianngilaq. Naalagaq kisimi oqartussaasoq Jehova ingerlaannaq akuliutissaaq kiffanilu aniguisillugit. — Ezekieli 38:9, 18.

19. Sooq Guutip sakkutuuisa Saatanip pissutsinik aaqqissuussineranik piuneerussiumaarnerat qularutiginngilluinnarsinnaavarput?

¹⁹ Guutip inuiaat iliuuseqarfiginialerpagit, taakkua paasissavaat ’taanna tassaasoq Jehova’. (Ezekieli 36:23) Sakkutuuni — pinngortitat anersaajusut Kristusimit Jiisusimit siulersorneqartut — Saatanip aaqqissuussinerata sinneranik nunarsuarmiittumik piuneerussisussat aallartissavai. (Saqqummersitat 19:11-19) Eqqarsaatigigutsigu ilaanni unnuami ataatsimi akeraasut tammaarsimaffianni inunnik ’185.000-inik’ toqutsinissamut inngili ataasiinnaq pisariaqartinneqarsimasoq, annikilliornartorsuaq Harmagedonimi sakkortuseruttorpat sakkutuut qilammiusut Saatanip nunarsuarmi pissutsinik aaqqissuussineranik takussaasunik piuneerussilluinnarnissaat qularutiginngilluinnarsinnaavarput. (2 Kunngit 19:35; Saqqummersitat 16:14, 16) Saatanip taassumalu inngilipilui itinersuarmut iginneqassapput ukiunilu tusindini qilersorneqarsimallutik, tamatumalu kingorna naassaanngitsumik suujunnaarsinneqassapput. — Saqqummersitat 20:1-3.

20. Jehova naalagaaffini atorlugu sujumaarpa?

²⁰ Taamaalilluni nunarsuaq ajussuseerulluinnassaaq, inuillu naapertuilluartut naassaanngitsumik inuussapput. Jehovap takutereersimassavaa Aniguisitsisorsuulluni. (Tussiaat 145:20) Guutip naalagaaffini atorlugu kisimi oqartussaassutsini qutsissisissavaa, atersuani illernarsisillugu nunarsuarmullu siunertani nuanningaartoq naammassillugu. Qanortoq illit nutaarsiassamik nuannersumik oqaluussissutiginninnerup ’inuunermillu naassaanngitsumik eqqortumik isumaqarfiginnittunik’ Guutip naalagaaffiata aniguisitsinissaata qanillineranik paasinninnissaannut ikiuinerup nuannersua misigigiuk! — Apustilit Suliaat 13:48, NV.

[Quppernerup ataani ilanngussaq]

Eqqaamavigit?

• Jiisusip Guutip naalagaaffiata pingaaruteqassusia qanoq erseqqissarpaa?

• Sooq aniguisinneqarnissaq aatsaat taama pisariaqartinneqartigaa?

• Annikilliornartorsuarmi sunik pisoqarnissaa ilimagisinnaavarput?

• Jehovap qanoq ersersissavaa Aniguisitsisorsuulluni?

[Atuaqqissaarnermi apeqqutit]

[Qupp. 16, 17-mi assiliartaq]

Guutip oqaasiani siulittuutigineqarpoq nalitsinni silarsuaq tamakkerlugu nallerneqarsimanngitsumik oqaluussisoqarumaartoq

[Qupp. 19-mi assiliartaq]

Jehovap Noamik ilaqutaanillu aniguisitsisimanermisut uagut aniguisissinnaavaatigut

[Qupp. 20-mi assiliartaq]

Jehovap „qulliit tamaasa isaannit allarterumaarpai, toqulu peerukkumaarpoq“. — Saqqummersitat 21:4