Inunnik allanik qanoq pinnittariaqarpugut?

„Qanoq inunnut iliorfigeqqugussi ilississaaq taamatut iliorfigisigit.“ — LUKASI 6:31.

1, 2. (a) Qaqqami oqaluuseq suua? (b) Allaaserisami matumani tulliuttumilu suut sammissavavut?

JIISUSI KRISTUSI ilumut ajoqersuisorsuuvoq. Upperisarsiornikkut taassumunnga akeraasut nakkutilliisunik taassuminnga tigusarinnikkiartortitsimmata, nakkutilliisut tigusarisimanagu uterput imalu oqarlutik: „Inummik taassumatut oqaluttoqarsimanngisaannarpoq.“ (Johannesi 7:32, 45, 46) Qaqqami oqaluuseq Jiisusip oqalugiaataasa torrallatat ilagaat. Taanna Matthæusip iivangkiiliuani kapitalini 5-7-imi allaatigineqarsimavoq, aamma Lukasi 6:20-49-mi taama sukumiitiginngikkaluamik allaatigineqarsimavoq. *

² Oqaluutsimi tamatumani immaqa ilisimaneqarnerpaaq tassaavoq maleruagassatut atortuujuaannartutut ilisimaneqalersimasoq. Allanik qanoq pinnittariaqarnitsinnut tunngassuteqarpoq. Jiisusi ima oqarpoq: „Qanoq inunnut iliorfigeqqugussi ilississaaq taamatut iliorfigisigit.“ (Lukasi 6:31) Oqartariaqarpugullu taanna ilumut allanut ajunngitsuliortoq! Napparsimasunik ajorunnaarsitsivoq allaallu toqusunik makititsilluni. Pingaartumillu allanut iluaqutaasoq tassaavoq taakkua Guutip naalagaaffia pillugu nutaarsiassamik nuannersumik Jiisusip imminnut oqaluussissutigisaanik ilassinninnerat. (Atuaruk Lukasi 7:20-22.) Jehovamut nalunaajaasuugatta tamatumunnga assingusumik oqaluusseqataanerput nuannaarutigisinnaavarput. (Matthæusi 24:14; 28:19, 20) Allaaserisami matumani tulliuttumilu oqaluussineq tamanna pillugu Jiisusip oqaasii Qaqqamilu oqaluutsimi sammineqartut allat ingammik allanik qanoq pinnittariaqarnitsinnut tunngassuteqartut sammissavavut.

 Saamasuusariaqarpugut

3 Saamasuuneq qanoq paasisariaqarpa?

³ Jiisusi ima oqarpoq: „Pilluarput qanilaartut [saamasut, NV], taakkuami nunarsuaq kingornutissavaat.“ (Matthæusi 5:5) Biibilimi saamaneq sammineqaraangami sanngiitsuunermut tunngassuteqarneq ajorpoq. Saamasarpugut, imaluunniit sallaatsuusarpugut, Guutip taamatut piumaffigimmatigut. Taamatut pissuseqarnerput allanut pissusilersornitsinni ersertarpoq. Assersuutigalugu ’ajortoq ajortoqataanik akilerneq ajorparput’. — Romamiut 12:17-19.

4 Saamasut sooq pilluartuuppat?

⁴ Saamasuusut pilluarput ’nunarsuaq kingornutissagamikku’. Jiisusi, ’saamasuullunilu’ (NV) ’uummatikkut makitajuitsoq’, ’tamanik kingornussisussanngortinneqarpoq’, taamaattumillu pingaarnertut nunarsuarmik kingornussisussaavoq. (Matthæusi 11:29; Hebræerit 1:2; Tussiaat 2:8) Siulittuutigineqarpoq ’inuup ernera’ naalagaaffimmi qilammiittumi naalakkersueqateqarumaartoq. (Danieli 7:13, 14, 21, 22, 27) ’Kristusimut kingornussisussaaqataagamik’ tanitat 144.000-it, aamma saamasuusut, Jiisusi nunarsuarmik kingornusseqatigissavaat. (Romamiut 8:16, 17; Saqqummersitat 14:1) Allat saamasuusut Guutip naalagaaffiata aqutsinerani nunarsuarmi naassaanngitsumik inuussapput. — Tussiaat 37:11.

5. Jiisusitut saamanerput inuttut pissusitsinnut qanoq sunniuteqassava?

⁵ Misigittaatsuugutta qularnanngitsumik allat naammagittarsinnaanerat misilissagaluarparput, taakkulu uagutsinnit ungasillissagaluarput. Jiisusitulli saamagutta ilakkuminartuussaagut ilagiinniittunullu allanut ineriartornartuussalluta. Apustilip Paulusip saamaneq anersaap inerititaanut ilannguppaa ima allakkami: „Saamaneq, imminut naalakkersinnaaneq. Taamaattunut inatsisit assortuinngillat.“ Guutip nukingata sulisup inerititaq taanna uagutsinni ineriartortissavaa ’anersaamut naapertuuttumik inuullutalu saqigutta’. (Galatiamiut 5:23, 25, NV) Soorunami Jehovap anersaavanit siulersorneqartut ilaattut taamaattumillu saamasutut isigineqarnissarput kissaatigaarput.

„Pilluarput nallittuisut“

6. Pissuserineqartussat ajunngitsut suut nallittuisut ilisarnaatigisarpaat?

⁶ Qaqqami oqaluutsimini Jiisusi aamma ima oqarpoq: „Pilluarput nallittuisut, taakkumi nallittorneqassapput.“ (Matthæusi 5:7) „Nallittuisut“ atugarliortunik misiginneqatiginningaartarput, aamma taakku inussiarnisaarfigalugillu soqutigisarpaat; pissutsit atugaat takullugit nalligingaartarpaat. Jiisusip tupinnartuliornikkut inuppassuit naalliuutaat atoruminarsisittarpai ’nalligingaalertaramigit’. (Matthæusi 14:14; 20:34) Aamma naakkinninneq soqutigittarnerlu nallittuinissamut kajumississutigisariaqarpavut. — Jaaku 2:13.

7. Jiisusip misiginneqataanini sunissaminut kajumississutigaa?

⁷ Jiisusi qasuersaalaarfissaminukartilluni inuppassuarnit naapigiarneqarpoq, taakkualu „nalligingaalerpai savatut paarsisoqanngitsutut immata“. Taamaattumik „amerlasuunik ajoqersulerpai“. (Markusi 6:34) Nuannaangaarsinnaavugut tamatumunnga assingusumik tusarliussaq allanut oqaluussissutigisarutsigu Guutillu nallittuingaarnera pillugu oqaluttuullugit.

8. Sooq nallittuisut pilluartuuppat?

⁸ Nallittuisut pilluartuupput, ’nallittorneqassagamik’. Nallittugaqaraangatta nallittukkatta amerlanertigut taamatuttaaq pisarpaatigut. (Lukasi 6:38) Aammattaaq Jiisusi ima oqarpoq: „Inuit unioqqutitsinerinik isumakkeerfigigussigit, taava Ataatassi qilammiittup aamma ilissi isumakkeerfigissavaasi.“ (Matthæusi 6:14) Nallittuisut kisimik Guutimit isumakkeerfigineqarnerup akuerineqarnerullu nuannersua misigissavaat.

Sooq „eqqisseqatigiissitsisut“ pilluartut

9. Eqqisseqatigiissitsisartunut ilaagutta qanoq iliortassallutalu qanoq iliortassanngilagut?

⁹ Jiisusip pilluarnissamut pissutissaq alla eqqaavaa  ima oqarami: „Pilluarput eqqisseqatigiissitsisut, taakkumi Guutip qitornaanik taaneqassapput.“ (Matthæusi 5:9) Eqqisseqatigiissitsisartunut ilaagutta ’ikinngutigiinnik avissaartitsisinnaasut’, assersuutigalugu ingutsinerit, akuersaarnagillu peqataaffiginavianngilavut. (Ussatit 16:28) Oqaatsitsigut iliuutsitsigullu kikkut tamaasa eqqisseqatiginiassavavut, ilagiinni aamma ilagiit avataanni. (Hebræerit 12:14) Pingaartumik Jehova Guuti eqqisseqatiginiarlugu sapinngisarput tamaat iliuuseqassaagut. — Atuaruk 1 Petrusi 3:10-12.

10. Sooq „eqqisseqatigiissitsisut“ pilluarpat?

¹⁰ Jiisusi oqarpoq „eqqisseqatigiissitsisut“ pilluartut ’Guutip qitornaanik taaneqassagamik’. Kristumiut tanitat Jiisusimik Missiarsitut upperinninnertik pissutigalugu ’Guutimut qitornanngorsinnaalertarput’. (Johannesi 1:12; 1 Petrusi 2:24) Taavami Jiisusip ’savaatai allat’ aamma eqqisseqatigiissitsisartut? Taakkua Jiisusi ’Naassaanngitsumik Ataatagilissavaat’ taassuma kingornusseqatinilu qilammi ukiuni tusindini naalakkersuinerani. (Johannesi 10:14, 16; Esaja 9:5; Saqqummersitat 20:6) Ukiut tusindit taakkua naalerneranni eqqisseqatigiissitsisut taakku nunarsuarmi maani tamakkiisumik Guutimut qitornaalissapput. — 1 Korinthimiut 15:27, 28.

11. ’Ilisimassusermit pavannga pisumit’ siulersortittarutta allanik qanoq pinnittassaagut?

¹¹ Jehovamut, ’eqqissinerup Guutianut’, anngigisaqarnata attaveqalerumalluta taassuma pissusii ilaartariaqarpavut, ilaatigut eqqisseqatigiissitsisuunera. (Filippimiut 4:9) ’Ilisimassusermit pavannga pisumit’ siulersortikkutta eqqissinermut siuarsaataasumik allat pisassavavut. (Jaaku 3:17) Aamma pilluassaagut eqqisseqatigiissitsisarutta.

’Qaamasorsi qaamali’

12. (a) Jiisusip ajoqersukkani soqquai? (b) Qanoq ililluta qaamanerput qaamatissinnaavarput?

¹² Allanut iliuuserisinnaasarput pitsaanerpaaq tassaavoq sallusuissutip qaamarnganik Guutimit pisumik ilassinninnissamut ikiuineq. (Tussiaat 43:3) Jiisusip ajoqersukkani oqarfigai ’silarsuup qaamasorigai’, kajumissaarpaalu qaamanerminnik „inunnut“ qaamatitseqqullugit, inuit ajoqersukkat ’suliaat ajunngitsut’ takusinnaaniassammatigik. Qaamanermik tamatuminnga qaamatitsinerata kingunerisaanik inunnut tamanut iluaqutaasumik anersaakkut qaammarsaasoqassaaq. (Atuaruk Matthæusi 5:14-16.) Ullumikkut qaamanerput qaamatittarparput inoqatitsinnut ajunngitsuliornitsigut aamma „silarsuarmi sumiluunniit tamarmi“, „inuianni tamani“ (NV), nutaarsiassamik nuannersumik oqaluussissutiginninnitsigut. (Matthæusi 26:13; Markusi 13:10) Tamatumunnga peqataaneq immikkut pisinnaatitaaffiuvoq angisooq.

13. Suut pissutigalugit inunnit maluginiarneqartarpugut?

¹³ Jiisusi ima oqarpoq: „Illoqarfik qaqqap qaaniittoq isertorneqarsinnaanngilaq.“ Illoqarfik qaqqap qaaniittoq takuneqariaannaavoq. Tamatumunnga assingusumik inuit malugisarpaatigut nutaarsiassaq nuannersoq oqaluussissutigigaangatsigu aamma ingasaassinianngitsuullutalu ileqqorissaaraangatta. — Titusi 2:1-14.

14. (a) Oqaluttuariuk ukiuni hundredelinni siullerni qulliit qanoq isikkoqartarnerat aamma qanoq atorneqartarnerat. (b) Qanoq ililluta qaamanerput ’nappartap’ ataanut toqqortoorsinnaavarput?

¹⁴ Jiisusi oqarpoq qullermik ikitsigaanni qulleq nappartap ataanut inissinnagu, qullilerfimmulli inissinneqartartoq, illumiittunut tamanut qaammaqqutaaqqullugu. Qulleq taamanikkut atorneqartartoq qummuattaaraavoq marrarmik sanaaq imerpalasumik (amerlanertigut olivenip uuliaanik) imaqartartoq, aamma sulloq amitsoralaannguaq aqqutigalugu uuliamik ikummataasumik milluaasumik iperaqartartoq. Taanna qullilerfimmut qisuusumut saviminiusumulluunniit ilineqartarpoq ’illumiittunullu tamanut qaammaqqutaasinnaasarluni’. ’Nappartap’ ataanut ilineqarneq ajorpoq. Tassa Jiisusip ajoqersukkani oqarfigai anersaakkut qaamanertik ’nappartap’ assersuutaasup  ataanut toqqussanngikkaat. Qaamanerput qaamatissavarput akerlilersorneqarnerlu malersugaanerluunniit pissutigalugu sallusuissut Biibilimiittoq toqqunngisaannassallugu namminerluunniit pigiinnanngisaannassallugu.

15. ’Suliavut ajunngitsut’ inuit ilaannut qanoq sunniuteqartarpat?

¹⁵ Qullermik assersuusioreerami Jiisusip ajoqersukkani ima oqarfigai: „Taamatuttaaq qaamasorsi qaamali inunnut, suliasi ajunngitsut taakkununnga takoqqullugit Ataatarsilu qilanniittoq unnersiutigeqqullugu.“ Tassa suliavut ajunngitsut pissutigalugit Guutimik ’unnersiutiginnittoqartarpoq’ taassumunnga kiffanngornermikkut. ’Qilaap qaammaqqutaasut silarsuarmi qinngorsimajuarnissamut’ tamanna ilumut pissutissaalluarpoq. — Filippimiut 2:15.

16. ’Silarsuarmi qaamasuussagutta’ qanoq iliortariaqarpugut?

¹⁶ ’Silarsuarmut qaamasuussagutta’ Guutip naalagaaffia pillugu oqaluussineq ajoqersuganngortitsiortornerlu pimooruttariaqarpavut. Aammali suli allamik piumaffigineqarpugut. Apustili Paulusi ima allappoq: „Inuugitsi qaamasup qitornaasut, qaamasup inerititai tamatigut tassaammata ajunngitsuuneq, iluarneq ilumoornerlu.“ (Efesosimiut 5:8, 9) Pissutsitsigut maligassiuilluartariaqarpugut. Aap, apustilip Petrusip oqaaqqissaarutaa una malillugu iliortariaqarpugut: „Guutimik nalusut akornanni ajunngitsumik inuugitsi, tamatumuunarpiaq taakkua ilissinnik pinerluttuuneraallutik mamarliisartut takusinnaaniassammatigit suliasi ajunngitsut taakkunuunatigullu Guuti unnersiutigisinnaaniassammassuk ullormi takusarneqarfissami.“ (1 Petrusi 2:12) Qanorli iliussaagut uagut nammineq uppeqatittalu ilaata akunnitsinni pissutsit najummassimanarsippata?

„Qatanngutit saammaakkiartoqqaarallaak“

17-19. (a) ’Tunissutissaq’ Matthæusi 5:23, 24-mi eqqaaneqartoq suua? (b) Qatanngummik saammaateqateqarnissaq qanoq pingaaruteqartigaa, Jiisusillu tamanna qanoq erseqqissarpaa?

¹⁷ Jiisusip Qaqqami oqaluutsimini mianersoqqussutigaa qatanngummik kamaassiuarlunilu suusupaginnittuarneq. Qatanngumulli ajuallassimasumut attaveqarluaqqilipallattariaqarpoq. (Atuaruk Matthæusi 5:21-25.) Jiisusip siunnersuutaa maluginiaqqissaaruk. Tunissummik pilliivimmukaassitilluni eqqaaleraanni qatanngut uagut pilluta unnerluussutissaqartoq, taava qanoq iliussaagut? Tunissutissaq pilliivimmut qimallugu qatanngut saammaakkiartoqqaartariaqarpoq, imaluunniit eqqisseqatigiartoqqaartariaqarpoq. Taamaalioreeraanni aatsaat tunissutissaq pilliutigineqarsinnaavoq.

¹⁸ ’Tunissutissaq’ pilliutaavoq naalaffimmi Jehovamut pilliutigerusutaq. Uumasunik pilliutit pingaaruteqangaarput, Mosesimmi inatsisaani Israelikkut guutisiornerannut ilagitillugit Guutimit pilliutigeqquneqarput. Eqqaaleraannili qatanngut uagut pilluta unnerluussutissaqartoq, tamatuma aaqqinneqarnissaa suli pingaaruteqarneruvoq. Jiisusi ima oqarpoq: „Tunissutissat pilliivimmut qimallugu qatanngutit saammaakkiartoqqaarallaak, taavalu aatsaat kingorna tunissutissat pilliutigiartorlugu.“ Qatanngummik saammaateqateqarnissaq Mosesip inatsisaanut pisussaaffinnik naammassinninnissaminngarnit pingaarnerutinneqartussaavoq.

 ¹⁹ Jiisusip oqaaserisani pilliutinut unioqqutitsinernullu immikkut ittunuinnaq tunngatinngilai. Eqqaaleraanni qatanngut uagut pilluta unnerluussutissaqartoq pilliut suugaluartorluunniit utaqqisinneqartussaavoq. Uumasoq pilliutissaq uumappat „pilliivimmut“ naalaffimmi palasit silarliannut qimanneqassaaq. Taava ajornartorsiut aaqqereeraanni aatsaat pilliutissaq pilliutigineqarsinnaavoq.

20. Qatanngummik kamaassaqarutta sooq aaqqinniapallattariaqarparput?

²⁰ Qatanngutitsinnut attaveqarnerput Guutip isaani tassaavoq pallorfiginninnerup ilumoortup ilaa pingaarutilik. Uumasut pilliutigineqartut Jehovap isaani suunngillat, taakkuninnga pilliutiginnittut qatanngutiminnut attaveqarluarniarlutik sapinngisaminnik iliuuseqarsimanngippata. (Mika 6:6-8) Taamaattumik Jiisusip ajoqersukkani kajumissaarpai imminnut unnerluussutissaqartut ’isumaqatigilipallaqqullugit’. (Matthæusi 5:25) Tamatumunnga naapertuuttumik Paulusi ima allappoq: „Kamassimariannguaritsi, kisiannili ajortuliornasi. Seqineq tarrisinaveersiuk narrutsassimanissinni. Diaavululu inissaqarteqinasiuk.“ (Efesosimiut 4:26, 27) Pissutissaqarluarluta kamakkutta, tamatuma aaqqipallannissaa isumagisariaqarparput narrutsassimajuannginniassagatta taamaalillutalu Diaavulu pissutsinik atuuttunik atornerluinissaanut periarfissinngitsoorlugu. — Lukasi 17:3, 4.

Tamatigut allanik ataqqinnittarit

21, 22. (a) Siunnersuutit Qaqqami oqaluutsimeersut sammeriikkavut malillugit qanoq iliorsinnaavugut? (b) Allaaserisami tulliuttumi suna sammissavarput?

²¹ Jiisusip Qaqqami oqaluutsimini oqaaserisaanik misissuinerput allanik inussiarnisaarfiginninnissamut ataqqinninnissamullu iluaqutigissavarput. Tamatta naammalluinnanngitsuugaluarluta Jiisusip siunnersuutai malillugit iliorsinnaavugut, Jiisusimmi, aamma Ataatatta qilammiusup, sapikkatsinnik piumaffiginngilaatigut. Qinunikkut, ilumoorluni ilungersornikkut Jehovallu Guutip ikiuineratigut saamasinnaallutalu nallittuisinnaallutalu eqqisseqatigiissitsisinnaavugut. Anersaakkut qaamanermik ersersitsinitsigut Jehova naalannarsisissinnaavarput, aamma qatannguterput pisariaqaraangat eqqisseqatigisinnaavarput.

²² Akuerineqarsinnaasumik Jehovamik pallorfiginninnermut ilaavoq tullitsinnik eqqortumik pinnittarnissarput. (Markusi 12:31) Allaaserisami tulliuttumi Qaqqami oqaluutsimi oqaaserineqartut allanut ajunngitsuliortuartarnissamut iluaqutigisinnaasavut sammissavavut. Sammeriikkavut Jiisusip oqalugiaataanit nalissaqanngitsumeersut eqqarsaatigereerlugit immaqa imminut ima aperissaagut: ’Allanut qanoq ajunngisaartigisarpunga?’

[Quppernerup ataani ilanngussaq]

Qanoq akissavit?

• Saamasuuneq qanoq paasisariaqarpa?

• Sooq „nallittuisut“ pilluartuuppat?

• Qaamanerput qanoq ililluta qaamatissinnaavarput?

• Sooq qatannguterput eqqisseqatigipallattariaqarparput?

[Atuaqqissaarnermi apeqqutit]

[Qupp. 8-mi assiliartaq]

Qaamanerput qaamatissagutsigu oqaluussinissaq pingaaruteqarluinnarpoq

[Qupp. 9-mi assiliartaq]

Kristumiut pissutsimikkut allanut maligassaasariaqarput

[Qupp. 10-mi assiliartaq]

Qatanngutit eqqisseqatiginiarlugu sapinngisat tamaat iliuuseqarit