Romamiunut allakkanit pingaarnersat
Jehovap oqaasia uumavoq
Romamiunut allakkanit pingaarnersat
UKIUP 56-IP MISSAANI apustilip Paulusip pingajussaanik ajoqersuiartorluni angalatilluni illoqarfik Korinthi tikippaa. Kristumiut juutiusut juutiunngitsullu Romamiittut arlaatigut assigiinngitsunik isumaqartut paasisimavaa. Paulusi aalajangerpoq Romamiut allaffiginiarlugit neriulluni Kristusimi ataasiussuseqatigiilluinnalersissinnaallugit.
Allakkamini taakkunani Paulusip nassuiarpaa inuit qanoq naapertuilluartuutinneqarnersut, imaluunniit iluartuutinneqarnersut, aamma inuit taama pineqartut qanoq inuusariaqarnersut. Allakkatigut taakkunuuna Guutimik taassumalu oqaasianik ilisimasaqarnerulersinneqarpugut, Guutip ajunngissusia pisassarinngisaraluaq qutsissisinneqarpoq annaanneqarnissatsinnullu tunngatillugu Kristusip inissisimaffia erseqqissarneqarluni. — Hebræerit 4:12.
NAAPERTUILLUARTUUTINNEQARPUT — QANOQ?
„Tamarmik ajortuliorput Guutimit naalannassuseq pigiunnaarlugu,“ Paulusi allappoq. ’[Guutip] saammaanneranit iluartuutinneqarput akeqanngitsumik, utertitaagamik Kristusi-Jiisusikkut.’ (1936) Nangilluni Paulusi allappoq „inuk iluartuutitaasoq uppernikkut, inatsisit suliareqqusaasigut pinnani“. (Romamiut 3:23, 24, 28) ’Inuup ataatsip naammassisaata iluartup’, imaluunniit ’iliuutsip naapertuilluartuutitsisup ataatsip’ (NV), upperineratigut kristumiut tanitat aamma ’amerlangaartut’ ’savanut allanut’ ilaasut ’iluartuutinneqarsinnaapput’. Taaneqartut siulliit naapertuilluartuutinneqarput qilammiittussatut Kristusip kingornusseqatissaasut, taaneqartullu kingulliit Guutimut ikinngutaasutut „annikilliortitaangaarnermit“ aniguinissamik neriuuteqartutut. — Romamiut 5:18; Saqqummersitat 7:9, 14; Johannesi 10:16; Jaaku 2:21-24; Matthæusi 25:46.
Paulusi ima aperivoq: „Inatsisit ataanniinnata saammaannerup ataaniikkatta ajortuliussanerpugut?“ Nammineq ima akivoq: „Naamerluinnaq!“ Ima nassuiaavoq: ’Ilissi inussiatut kiffartorfigisarsi ajortiuppat toqumik kinguneqassaaq, naalanneruppallu iluarnermik kinguneqassaaq.’ (Romamiut 6:15, 16) „Anersaap ikiuineragut timip suliai toqukkussigit inuujumaarpusi,“ allappoq. — Romamiut 8:13.
Allassimaffiit pillugit apeqqutinut akissutit:
1:24-32 — Ileqqussatigut ajortunngorsimaneq pillugu uani allaatiginninnermi juutit imaluunniit juutiunngitsut pineqarpat? Taakku tamarmik pineqarsimasinnaagaluarput, Paulusilli itsaq Israelikkut tunussisut immikkut pivai. Guutip aalajangersimasaa naapertuilluartoq ilisimagaluarlugu ’Guutimik ilisimanninneq sussarinngilaat’. Taamaattumik ajattorneqarput.
3:24, 25 — Utertitsissut Kristusi Jiisusikkut akilerneqartoq, suli akilerneqarani, qanoq ililluni itsaq ajortulianik matoorisinnaava? Missiarsi pillugu siulittuut siulleq, Mosesimik allakkani siullerni 3:15-imi allassimasoq, ukiumi 33-mi Jiisusi nappakkami anniartitaaffimmi toqutaammat eqquuppoq. (Galatiamiut 3:13, 16) Jehovalli siulittuut tamanna siulittuutiginiariarmagu utertitsissut taassuma isaani akilerneqareersutullusooq ippoq, Guutimi pilersaarutiminik naammassinninnissaminik sumilluunniit akornuserneqarsinnaanngilaq. Taamaammat Adamip kinguaaviisa neriorsuummik tamatuminnga upperinnittut ajortuliaat Jehovap Jiisusip pilliutigiumaagaa tunngavigalugu isumakkeerfigisinnaavai. Taamaalilluni utertitsissut aamma kristumiut sioqqullugit inuusut makitinneqarnissaannik periarfissiivoq. — Apustilit Suliaat 24:15.
6:3-5 — Kristusimut Jiisusimut kuisinneq aamma taassuma toquanut kuisinneq qanoq paasisariaqarpat? Kristusip ajoqersugai Jehovamit anersaamik illernartumik taninneqaraangamik Jiisusimut atalluinnalertarput ilagiinnullu, tassaasumut Kristusip timaanut taassumalu niaquuffigisaanut, ilaalertarlutik. (1 Korinthimiut 12:12, 13, 27; Kolossemiut 1:18) Taama isumaqarpoq Kristusimut Jiisusimut kuisinneq. Kristumiut tanitat aamma ’[Kristusip] toquanut kuisipput’, tassa imaappoq inuunertik pilliutigisariaqaraat nunarsuarmilu naassaanngitsumik inuunissamik neriuut isumakkeerluinnartariaqarlugu. Taamaattumik toqunerat Jiisusip toquneratut pilliutitut toquneruvoq, utertitsissutitulli naleqarani. Kristusip toquanut kuisinnerat naammassissaaq taakku toquppata qilammullu makititaappata.
7:8-11 — ’Ajorti’ qanoq ’inassutikkut periarfissaqalerpa’? Inuit Inatsisit iluaqutigalugit paasisinnaavaat suut ajortuliaanersut ajortiliunertillu paasilluarnerusinnaallugu. Tassa qanoq ajortuliortuutiginerminnik paasinninnissaannut inuillu amerlanerusut ajortiliunerminnik paasinninnissaannut Inatsisit iluaqutaapput. Taamaattumik oqartoqarsinnaavoq ajorti ’inassutikkut periarfissaqalersoq’.
Ilinniarfigisinnaasavut:
1:14, 15. Aallussilluarluta nutaarsiassamik nuannersumik oqaluussissutiginninnissatsinnut pissutissarpassuaqarpugut. Tamakkua ilaat tassaavoq inuit Jiisusip aavanik pisiarineqartut Guutimut attaveqarlualernissaannut ikiuinissatsinnik pisussaanerput.
1:18-20. Guutiitsut naapertuilluanngitsullu „patsisiginiagassaqanngillat“, Guutimmi pissusii takussaanngitsut pinngortitarsuarmi erseqqipput.
2:28; 3:1, 2; 7:6, 7. Paulusi juutinut mamiatsaataasorisinnaasaminik oqaaseqareeraangami saammarsaataasinnaasunik oqaatsini ilasarpai. Tamatumuuna ersersinneqarpoq qanoq ililluta eqqartukkat mianernartut inussiarnersumik periaaserissumillu sammisinnaanerivut.
3:4. Inuit oqaasii Guutip oqaaserisaanut Biibilimiittunut akerliugaangata ersersittariaqartarparput ’Guuti sallusuitsutut’ isigigipput Biibilimi allassimasunik qularutiginninngilluinnarnitsigut Guutillu piumasaanut naapertuuttumik iliornitsigut. Allat Guutip sallusuitsuuneranik paasinninnissaannut ikiorsinnaavavut aallussilluarluta Guutip naalagaaffianik oqaluussissutiginneqataanitsigut ajoqersuganngortitsiortoqataanitsigullu.
4:9-12. Aaperaat 99-inik ukioqarluni kipineqarnini sioqquterujussuarlugu uppernini pissutigalugu naapertuilluartuutinneqarpoq. (1 Mosesi 12:4; 15:6; 16:3; 17:1, 9, 10) Tamatumuuna Guutip sunniuteqarluartumik ersersippaa suna pissutigalugu inuk naapertuilluartutut isigineqalersinnaanersoq.
4:18. Neriunneq uppernermut ilaavoq pingaarutilik. Upperneq neriunnermik tunngaveqarpoq. — Hebræerit 11:1.
5:18, 19. Jiisusip Adamimut assigiissuteqarneranik paasiuminartumik allaaserinninnermigut Paulusip naatsumik eqqorluartumillu nassuiarpaa inuup ataatsip qanoq ililluni ’inuunini akissatut tunniussinnaaneraa amerlasuut utertinneqaatissaattut’. (Matthæusi 20:28) Naatsunik paasiuminartunillu tunngavilersuuteqartarneq ilinniartitseriaasiuvoq sunniuteqarluartoq.
7:23. Oqarput avativullu, soorlu assavut nissuvullu, atornerlunnaveersaartariaqarpavut ’ajortip inatsisaanit tiguagaatissinnaammatigut’.
8:26, 27. Nalaataqaraangatta ima isumakulunnartigisumik suna qinnutigissanerlugu nalulerlutigu, „Anersaap nammineq qinnuttarpaatigut“. Taava Jehovap ’qinnutinik tusartartup’ qinnutit oqaatsiminiittut naleqquttut qinnutitsitut akuerisarpai. — Tussiaat 65:3.
8:38, 39. Ajunaarnerit, anersaapiluit nunamilu naalakkersuisut Jehova uagutsinnik asannikkunnaarsissinnaanngilaat; taakkua aamma uagut Jehovamik asannikkunnaarsittussaanngilaatigut.
9:22-28; 11:1, 5, 17-26. Israelip kingumut aaqqissugaalluartunngortinneqarnissaanik siulittuuterpassuit kristumiut tanitat ilagiissaannut, ’juutinit pisuinnaanngitsunik aammattaarli Guutimik nalusunit pisunik’ qaaqquneqartunik ilaasortalimmut, eqquupput.
10:10, 13, 14. Guutimut tullermullu asanninneq Jehovamik taassumalu neriorsuutaanik upperinnilluinnarnermik ilaqartoq kristumiutut kiffartornermut qasusuilluta peqataanissamut kajumississutigisinnaavarput.
11:16-24, 33. „Guutip ajunngitsuunera sukannissusialu“ oqimaaqatigiilluinnarput. „Qaarsuuvoq [Jehova], naammalluinnartuupput suliai, innarluitsuupput aqqutigisai tamarmik.“ — 5 Mosesi 32:4.
NAAPERTUILLUARTUUTITAASUT QANOQ ILIORTARIAQARTUT
Paulusi ima allappoq: „[Taamaattumik, 1936] qatanngutit! Guutip nallittuineratigut oqaaqqissaarniarpassi timisi sassaateqqullugit pilliutitut uumasutut illernartutullu Guutip iluarinartitaatut.“ (Romamiut 12:1) Taamaattumik, imaluunniit kristumiut uppernertik pissutigalugu naapertuilluartuutinneqarmata, Paulusip oqaasii tulliuttut kristumiut taakkua imminut, tullerminnut oqartussaasunullu qulliunerusunut isiginnittaasiannut sunniuteqartariaqarput.
Paulusi ima allappoq: „Tamassi immikkut ima oqarfiginiarpassi: Immissinnik pingaarteqinasi pisariaqartumit annerusumik.“ Ima kajumissaarivoq: „Asanninneq pisuusaarnerunngikkili.“ (Romamiut 12:3, 9) „Inuit tamarmik naalakkersuisunut qullersarisaminnut naalatsigitillit.“ (Romamiut 13:1) Paulusip kristumiut kajumissaarpai nalunngeqatiginnissuseq malillugu aalajangigassat pillugit ’eqqartuuteqatigiittannginnissaannik’. — Romamiut 14:13.
Allassimaffiit pillugit apeqqutinut akissutit:
12:20 — Qanoq ililluta uagutsinnut akeraasup niaquanut ’aamarsuit aamaartut katersortarpavut’? Biibilip nalaani saviminissaq aamarsuarnut aamaartunut aatsitsivimmiittunut ilineqartarpoq. Aamma suli kissarnerulersinniarlugu saviminissaq aamarsuarnik aamaartunik qallerneqartarpoq saviminissaq aanniassammat minguerunniassammallu. Tamatumunnga assingusumik aamarsuit aamaartut uagutsinnut akeraasup niaquanut katersortarpavut taassumunnga ajunngitsuliornitsigut taanna ’aqilisinniarlugu’ pissusini ajunngitsut ersersinniassammagit.
12:21 — Qanoq ililluta ’ajunngitsoq atorlugu ajortoq ajugaaffigiuartarparput’? Ilaatigut taamaaliortarpugut Guutip naalagaaffia pillugu nutaarsiassamik nuannersumik qunusuilluta qasusuillutalu oqaluussissutiginninnitsigut suliassatta Guutimeersup tamatuma Jehovamit nalerisimaarutigineqalernissaata tungaanut. — Markusi 13:10.
13:1 — Oqartussaasut qulliunerusut ’Guutimit atulersinneqarnerat’ imaluunniit ’atorfimminnut annerusumik minnerusumilluunniit oqartussaassuseqarfiusunut Guutimit ivertitaanerat’ (NV) qanoq paasisariaqarpa? Silarsuarmi oqartussaasut ’atorfimminnut annerusumik minnerusumilluunniit oqartussaassuseqarfiusunut Guutimit ivertitaapput’, tassa imaappoq Guutip akuersineratigut naalakkersuisut, aamma ilaatigut Guutip siulittuutigisarsimavaa kina naalakkersuisunngorumaarnersoq. Tamanna erseqqilluinnarpoq naalakkersuisut arlallit Biibilimi siulittuutigineqarneranni.
Ilinniarfigisinnaasavut:
12:17, 19. Akiniaagutta Jehovap kisimi iliorsinnaatitaaffigisaanik iliussaagut. ’Ajortoq ajortoqataanik akileraluarutsigu’ anneruniartuussaagut.
14:14, 15. Nerisassanik imigassanillu qatanngutitsinnut sassaalliinikkut taassuminnga ajuallatsitsinaveersaartariaqarlutalu naakkiutsitsinaveersaartariaqarpugut.
14:17. Nerisassat imigassallu arlaannik sutorneq imaluunniit sutornaveersaarneq Guutimut attaveqarluarnissamut pingaarnertut aalajangiisuunngilaq. Guutimulli attaveqarluarneq naapertuilluarnermut, eqqissinermut nuannaarnermullu tunngassuteqarpoq.
15:7. Kinaassusersiornata sallusuissummik ilumoorlutik ujarlersut tamaasa ilagiinnut tikilluaqqusariaqarpavut Guutillu naalagaaffianik tusarliussaq naapitatsinnut tamanut oqaluussissutigisariaqarlugu. (w08 06/15-E)
[Qupp. 23-mi assiliartaq]
Utertitsissut suli akilerneqarani itsaq ajortulianik matoorisinnaava?