„Asannissutsit siulleq“ attatiinnaruk

„Pigisat aalajangiunniaruk.“ — SAQQUMMERSITAT 3:11.

1, 2. Jehova pillugu ilinniakkavit sallusuissutaanerat qularutigiunnaarakku qanoq misigivit?

SIUNISSAQ nuanningaartoq Jehovap imminut naalattunut neriuutissiissutaa pillugu tusaqqaaravit eqqaamaviuk? Upperisarsioqatigiinnut allanut siornatigut ilaasortaasimaguit, Guutip suna siunertarineraa Biibili tunngavigalugu nassuiaanneqaravit imaluunniit allassimaffiit siornatigut paasiuminaatsissimasatit pillugit nassuiaanneqaravit qanoq misigivit? Immaqa paasilerpat salloqittarneqarsimallutit. Maannali sallusuissummik paasinnissimanerit nuannaarutigivat! Angajoqqaanit kristumiunit perorsarneqarsimaguit, Jehova pillugu ilinniakkavit sallusuissutaanerat qularutigiunnaarakku ilisimasatillu taakkua malillugit inuuniarlutit aalajangeravit qanoq misiginerlutit eqqaamaviuk? — Romamiut 12:2.

² Qatanngutitta ilagiinniittut ilarpassuisa oqaluttuarisinnaavaat Jehovamit ilagiinnut kajungilersinneqarsimanerminnik taassumunngalu qanillinerminnik nuannaarutiginningaarnertik qujamasuutiginningaarnertillu. (Johannesi 6:44) Nuannaarnertik kristumiutut sammisassanut peqataanissaminnut kajumississutigaat. Aap, ima angorniortigipput qanoq misiginertik kikkunnut  tamanut oqaluttuarerusullugu. Ilinniakkavit sallusuissutaanerat paasigakku tamatumunnga assingusumik misigivit?

3. Jiisusi ilagiinnut Efesosimiittunut tusarliussimmat, taakkua pissutsinik qanoq ittunik atugaqarpat?

³ Jiisusip ukiuni hundredelinni siullerni ilagiinnut kristumiunut Efesosimiittunut tusarliussamini qatanngutit tassaniittut ’asannissusiat siulleq’ eqqartorpaa. Taakkua ajunngitsorpassuarnik pissuseqarput, Jehovamilli siornatigutut asannitsigiunnaarsimapput. Taamaattumik Jiisusip taakkua ima oqarfigai: „Ilisimavakka suliatit assoroornerillu nikallujuissutsillu nalunagulu ajortut akaarinngilluinnaritit misilissimagitillu imminnik apustiliunerartut taamaattuunatilli, paasisimallugulu salluliortut. Nikallujuitsuuvutit naalliussimaqalutillu atera pillugu, qasusimanngilatilli. Kisianni assuaraakkit asannissutsit siulleq soraarukkakku.“ — Saqqummersitat 2:2-4.

4. Sooq Jiisusip ilagiinnut Efesosimiittunut tusarliussaa aamma ullumikkumut naleqquppa?

⁴ Jiisusip ilagiinnut Efesosimiittunut ilagiinnullu allanut Saqqummersitani eqqaasaminut siunnersuutai pissutsit piffissap ilaani, tassa 1914-imiit, tanitanit atugarineqartut eqqarsaatigalugit naleqqupput. (Saqqummersitat 1:10) Allaat ullumikkut kristumiut ilaasa Jehovamik sallusuissummillu ’asanninnertik siulleq’ annaasinnaavaat. Tamanna eqqarsaatigalugu nammineq misigisimasanik eqqaasaqarniarnikkut eqqarsaatiginneqqissaarnikkullu Guutimik sallusuissummillu asanninneq siulleq qanoq ililluni attatiinnarlugulu nutarterlugulu ineriartortinneqarsinnaanersoq misissoriartigu.

Suna qularunnaassutigaajuk?

5, 6. (a) Suut pillugit kristumiut tamarmik immikkut imminut qularunnaarsittariaqarpat? (b) Suna pissutigalugu illit qulariunnaarpiuk Jehovap Nalunaajaasuisa sallusuissut oqaluussissutigigaat? (c) Asanninnerup siulliup nutarternissaanut suna iluaqutigisinnaaviuk?

⁵ Jehovamut tunniulluinnartup kialuunniit ’sianigileqqaartariaqarpaa [qulakkeeqqaartariaqarpaa, NV] sunaasoq Guutip piumasaa: ajunngitsoq, iluarinartoq, naammalluinnartoq’. (Romamiut 12:1, 2) Tamatumunnga ilaavoq sallusuissutit Biibilimiittut pillugit ilinniarneq. Inuup allap Jehovap Nalunaajaasuisa sallusuissummik oqaluussissutiginninnerannik qularunnaassutigisaa inuup allap qularunnaassutigisaanit allaanerusinnaavoq. Ilaat allannguilluinnarput Guutip aqqa Biibilimi atuaramikku, imaluunniit paasigamikku toqusut qanoq pisarnersut. (Tussiaat 83:19; Oqaluussisartup oqaasii 9:5, 10) Allat killinneqaatigingaagaat tassaavoq Jehovap innuttaasa asaqatigiinnerat. (Johannesi 13:34, 35) Allat silarsuarmut ilaannginnerup qanoq paasisariaqarneranik paasinnikkamik killinneqangaarput, aamma paasivaat kristumiut ilumoortut politikkikkut akerleriinnernut inuiaallu kikkuugaluartut sorsunnerinut peqataasinnaanngitsut. — Esaja 2:4; Johannesi 6:15; 17:14-16.

⁶ Inuit ilarpassuisa tamakkuninnga sallusuissutinillu allanik paasinninnertik Guutimik asannilissutigaat. Illit suut pissutigalugit ilikkakkavit sallusuissutaanerat qulariunnaarsimanerlugu  eqqarsaatiginissaanut piffissaqartarit. Inuimmi tamavimmik pissutsit atukkat inuttullu pissuserisat eqqarsaatigalugit asseqanngilluinnarput. Taamaattumik Jehovamik asanninninnut neriorsuutaanillu upperinninninnut pissutigisatit tunngaviusut inuit allat pissutigisaannit allaanerussagunarput, qularnanngitsumillu taamani sallusuissut paaseqqaarakku ilinnut pingaaruteqartiginermissulli ullumikkut pingaaruteqartigipput. Sallusuissut allanngorsimanngilaq. Tassa eqqarsaatit misigissutsillu tamakkua eqqaaqqinnerisigut sallusuissummut asanninnerit siulleq nutarterlugulu ineriartortissinnaavat. — Atuaruk Tussiaat 119:151, 152; 143:5.

Asanninnerit siulleq nakussatsiguk

7. Sooq sallusuissummut asanninnerput siulleq nakussatsittariaqarparput, aamma qanoq ililluta taamaaliorsinnaavugut?

⁷ Immaqa Jehovamut tunniulluinnarninniilli inuuninni allanngortoqarsimaqaaq. Sallusuissummut asanninnerit siulleq pingaaruteqartupilussuuvoq, piffissalli ingerlanerani suli asanninnerulertariaqarsimavutit ajornartorsiutit nutaat upperninnut misilinneqaataasut naammagalugit atorsinnaaniassagakkit. Jehovalli napatippaatit. (1 Korinthimiut 10:13) Taamaammat ukiut ingerlanerini misigisimasatit aamma ilinnut pingaaruteqangaarput, asanninninnimmi siullermik nakussatsitsinissamut iluaqutigisimavatit, aamma misigisimasatit iluaqutigalugit qulakkeersinnaavat ajunngitsut iluarinartullu suut Guutip piumasarinerai. — Josva 23:14; Tussiaat 34:9.

8. Jehova Mosesimut imminut qanoq ilisaritippa, aamma Israelikkut taanna qanoq ilillutik suli ilisarisimanerulerpaat?

⁸ Tamanna assersuusiornikkut erseqqissarneqarsinnaavoq. Eqqarsaatigeriakkit pissutsit Israelikkut atugaat Jehovap taakku ilisimatimmagit Egyptenimi inussiaataanermit aniguisikkumaarlugit. Guuti Mosesimut imminut ilisaritippoq ima oqarluni: „Tassaavunga uangaasoq.“ (2 Mosesi 3:7, 8, 13, 14) Jehovap matumani pisaa tassaavoq innuttani aniguisikkumallugit pisariaqarnera naapertorlugu sunngorsinnaalluniluunniit. Tamatuma kingorna pisimasuni Israelikkut pissutsit qanoq innerat apeqqutaatillugu Jehovap — Ajugaqanngitsutut, Eqqartuussisutut, Siulersuisutut, Aniguisitsisutut, Sorsuttartutut Pilersuisutullu — pissutsiminik ersersitsineranik takunnittuupput. — 2 Mosesi 12:12; 13:21; 14:24-31; 16:4; Nehemia 9:9-15.

9, 10. Misigisat suut Guutimik ilisarisimannilernissamut iluaqutaasinnaappat, aamma sooq misigisimasanik tamakkuninnga eqqaaqqiineq pitsaava?

⁹ Pissutsit atukkatit Israelikkut atugarisimasaattut inngillat. Taamaakkaluartorli misigisaqarsimassagunarputit Guutip ilinnik soqutiginninneranik qularunnaarutigisannik, tamannalu upperninnut nakussatsissutaavoq. Immaqa Jehovap Pilersuisuunini, Tuppallersaasuunini Ajoqersuisuuniniluunniit arlaatigut ersersissimavaa. (Atuaruk Esaja 30:20b, 21.) Immaqaluunniit qinnutit erseqqissumik akineqartoq misigisimavat. Immaqa uppeqativit ilaata ajornartorsiorninni ikiorsimavaatit. Aamma imaassinnaavoq nammineq atuaqqissaarninni allassimaffiit pissutsinut illit atukkannut naleqquttut maluginiarsimagitit.

¹⁰ Misigisimasatit taakkua pillugit allat oqaluttuutissagaluarukkit immaqa taakkua illit killinneqarnittut killinneqartiginavianngillat. Pisummi tupinnartuliaanngillat. Misigisimasatilli taakkua ilinnut pingaaruteqangaarput. Aap, Jehova illit pisariaqartitarpiattut ilivoq. Ukiut sallusuissummiiffigisimasatit eqqaariakkit. Ataasiaannarnak Jehovamit isumassorneqarlutit misigininnik eqqaasaqarsinnaavit? Taamaappat, pisimasunik tamakkuninnga taakkualu ilinnut qanoq sunniuteqarsimanerannik eqqaamanninnerit pissutigalugu taamanikkut Jehovamut asanninnittut asannitsigilersinnaavutit. Misigisimasatit tamakkua qujamasuutigikkit. Eqqarsaatigeqqissaakkit. Jehovap ilinnik inuttut soqutiginninneranut uppernarsaataapput, kialuunniillu tamatuminnga qularutiginnilersissinnaanngilaatit.

Imminut misissoqqissaarit

11, 12. Kristumiu siornatigutut sallusuissummik asannitsigiunnaarsimappat tamatumunnga suna pissutaasinnaava, aamma Jiisusi qanoq siunnersuiva?

¹¹ Misigiguit Guutimik sallusuissummillu siornatigutut asannitsigiunnaarsimallutit, Guutip allanngorsimanera tamatumunnga pissutaanngilaq. Taanna allanngunngisaannarpoq. (Malaki 3:6; Jaaku 1:17) Taamanikkut ilinnik soqutiginnitsiginermisut ullumikkut soqutigaatit. Jehovamut attaveqarninni allanngortoqarsimappat,  taava allannguutaasoq suusimasinnaava? Tatineqarnerulersimasutut, isumakuluuteqarnerulersimasutut, misigisimasinnaavit? Siornatigut immaqa ilungersornerullutit qinusarputit, peqqissaarnerusumik nammineq atuaqqissaartarputit akulikinnerusumillu eqqarsaatiginneqqissaartarlutit. Maannakkornit aallussilluarnerullutit oqaluusseqataasarsimavit, aamma aalajangersimanerusumik ataatsimiigiartarsimavit? — 2 Korinthimiut 13:5.

¹² Imaassinnaavoq imminut misissoreerlutit inuuninni taamatut allanngortoqarsimannginnera isummiukkit, allanngortoqarsimanerali malugigukku, taava suna tamatumunnga pissutaava? Isumakuluutit, soorlu ilaquttannik isumassuineq, peqqissuujuarniarnerit tamatumunngaluunniit assingusut, pissutigalugit Jehovap ullussaata qanilliartornerani piffissap nukinginnassusia sianigerpiarunnaarsimasinnaaviuk? Jiisusip ajoqersukkani ima oqarfigai: „Mianersoritsi uummatisi malussarlersitaaqqunagit aalakoornermit imerajunnermillu inuunerullu matuma piinik isumakuluutinit, pakasarteqqunasi ullup taassuma tassanngaannaq tikiunneranit nigartuutitut illuni, inuiaammi nunarsuarmi tamarmi najugaqartut tamaasa tikissammagit. Eqqumajuarniaritsi, qinugitsilu nukissaqartitaaqqullusi pisussat suut tamaasa qimarratigisinnaaqqullugit.“ — Lukasi 21:34-36.

13. Jaakup Guutip oqaasia sumut assersuuppaa?

¹³ Biibilimik allattut ilaata Jaakup uppeqatini kajumissaarpai Guutip oqaasia atorlugu unneqqarillutik imminut misissoqqullugit. Jaaku ima allappoq: „Oqaaseq tusaaginnarnagu maleruarsiuk, taamaaliunngikkussi immissinnut salloqittaqinaasi. Oqaatsimimmi tusaaginnartup maleruarnagulu assigaa inuk kiinnaminik tarrarsuutikkut qimerluuisoq: Imminut qimerlooraluarpoq, qimagukkamili qanoq isikkoqarnini erniinnaq puiorpaa. Kiffaanngissutsilli inatsisaanik naammalluinnartunik isumaliutiginneqqissaartoq aalajangiussisorlu, tusakkaminik puigutuujunani suliassamillu naammassinnittartuulluni, taanna taamaaliornermigut pilluarumaarpoq.“ — Jaaku 1:22-25.

14, 15. (a) Anersaakkut ineriartornissamut Biibili qanoq iluaqutigisinnaaviuk? (b) Apeqqutit suut eqqarsaatigisinnaavigit?

¹⁴ Inuup takujuminartuunissani qulakkeerniarlugu tarrarsuut atorsinnaavaa. Assersuutigalugu angutip qilerniusani equngasoq takuguniuk aaqqissinnaavaa. Arnap paasiguniuk nutsani tukatsissimasut iluarsisinnaavai. Tamatumunnga assingusumik Biibili imminut misissornissamut iluaqutigaarput. Qanoq ittuusariaqarnerput pillugu Biibilimi allassimasunut sanilliukkaangatta, taava tarrarsuutitut atortarparput. Kukkunerli takusarput aaqqinniarlugu iliuuseqanngikkutta tarrarsorneq sumut iluaqutaassagami? Siunnersuutit Guutip ’inatsisaani naammalluinnartuniittut’ malikkutsigik taamaalillutalu ’oqaatsimik maleruaasunngorluta’ silatusaassaagut. Taamaattumik kialuunniit paasiguniuk Jehovamik sallusuissummillu siornatigutut asannitsigiunnaarsimalluni, taava apeqqutit ukua eqqarsaatigisariaqarpai: ’Inuuninni suut tatineqaatigaakka, taamatullu tatineqarneq qanoq periarfigaara? Siornatigut qanoq periartarpunga? Arlaannik allanngortoqarsimava?’ Taamatut imminut misissorneq pissutigalugu sanngiissutit qulaarneqarpata sumiginnaqinagit, ingerlaannarlu pisariaqartumik allannguigit. — Hebræerit 12:12, 13.

¹⁵ Taamatut eqqarsaatiginneqqissaarneq aamma anersaakkut ineriartornissannut naleqquttunik imminut anguniagassinnissamut iluaqutigisinnaavat. Apustilip Paulusip suleqatini  inuusuttoq Timotheusi kiffartornerminik pitsanngorsaanissaanut ikiorniarlugu isumassarsisitaalluni ima siunnersorpaa: „Tamakku eqqarsaatigeqqissaartakkit, itisilertakkit, siumukarnerit tamanit takuneqarsinnaaqqullugu.“ Uaguttaaq Guutip oqaasia atorlugu eqqarsaatigeqqissaartariaqarparput sutigut siumukarsinnaanerluta. — 1 Timotheusi 4:15, NV.

16. Biibili atorlugu imminut misissoraangatta navianartoq suna eqqumaffigisariaqarparput?

¹⁶ Unneqqarilluni imminut misissortup kialuunniit sanngiissutiminik qulaarinissaa qularnanngilluinnarpoq. Tamanna nikallussutaasinnaavoq, nikalluutigeqinaguli. Imminummi misissorsinitsinnut siunertaasoq tassaavoq sutigut pitsanngorsaasinnaanerluta paasiniaanissaq. Soorunami Saatanip kristumiu naammalluinnanngissutini pissutigalugit suunngitsutut misigiterusuppaa. Allaat Guuti uagut taassumunnga kiffartorniarluta iliuuserisatsinnik tamanik suusupaginninnerarneqarpoq. (Jobi 15:15, 16; 22:3) Tamanna salluliorneruvoq Jiisusip erseqqissumik ilumuunnginneragaa. Tamarluinnatta Guutip isaani erlinnartuuvugut. (Atuaruk Matthæusi 10:29-31.) Naammalluinnanngissutivulli paasigaangatsigit Jehovap ikiuineratigut annertoqqusersuineratigullu pitsanngorsaanissarput maniguulluta aalajangiusimasariaqarparput. (2 Korinthimiut 12:7-10) Nappaatit utoqqalinerluunniit pissutigalugu iliuuserisinnaasavut killeqarpata piviusorsiortumik imminut anguniagassittariaqarpugut tunniutiinnarnatalu imaluunniit asannikkunnaarnata.

Qujamasuutissaqaqaagut

17, 18. Asanninninnik siullermik nakussatsitsinerit qanoq iluaqutigalugulu nuannaarutigisinnaaviuk?

¹⁷ Asanninnermik siullermik nakussatsitsiuarneq iluaqutissartarpassuaqarlunilu nuannaarutissartarpassuaqarpoq. Guuti pillugu ilisimasaqarnerujartuinnarsinnaallutillu taassuma asannilluni siunnersuutaanik qujamasuutiginninnerujartuinnarsinnaavutit. (Atuaruk Ussatit 2:1-9; 3:5, 6.) Tussiaasiortoq ima allappoq: „[Jehovap aalajangersagai] maleruaraanni tamanna naammattumik akissarsissutaassaaq.“ „[Jehovap] nalunaajaatai aalajaatsuupput, misilittagakitsunik ilisimasunngortitsisarput.“ Aamma: „Pilluarpoq assuarnaalluni inuusoq [Jehovallu] inatsisaanik maleruaasoq.“ — Tussiaat 19:8, 12; 119:1.

¹⁸ Isumaqatigissagunarpatsigut oqarutta qujamasuutissarpassuaqartutit. Ullumikkut silarsuarmi pisartunut pissutaasut paasivatit. Guutip ullumikkut innuttaminik anersaakkut isumassuinera aamma soqutiginninnera iluaqutigingaarpat. Aamma qularnanngitsumik qujamasuutigaat Jehovap silarsuaq tamakkerlugu ilagiissiminut kajungilersissimammatit imminullu nalunaajaasuunissamut immikkut pisinnaatitaaffilersimammatit. Nuannaarutigisinnaasatit tamaasa eqqarsaatigikkit. Allattussagukkit qularnanngitsumik amerlassapput. Ilaannikkut taamaaliortarneq ’pigisannik aalajangiussinissaq’ pillugu kajumissaarutip malinnissaanut qularnanngitsumik iluaqutigissavat. — Saqqummersitat 3:11.

19. Guutimut attaveqarninnik eqqarsaatiginneqqissaarnerup saniatigut anersaakkut peqqissuujuarumallutit suut iliuuserisinnaavigit?

¹⁹ Uppernerpit ukiut ingerlanerini qanoq ineriartorsimaneranik eqqarsaatiginninneq pigisannik aalajangiusimanninnissamut iluaqutigisinnaasavit ilaannaraat. Atuagassiami matumani arlaleriarluni malugeqquneqartarsimapput anersaakkut peqqissuujuarnissamut iluaqutigineqarsinnaasut pingaarutillit allat, soorlu qinuneq, kristumiut ataatsimiinnerinut najuunneq peqataanerlu aammalu tamanut oqaluussinermi eqiasuilluni suliniuteqarneq. Aamma Paulusip ima kajumissaarpaatigut: „Qulakkeertuartarsiuk Naalakkamut suut iluarinartuunersut.“ Tamakkua tamaasa asanninninnik siullermik nutarteriuarnissamut nakussatsitsiuarnissamullu iluaqutigisinnaavatit. — Efesosimiut 5:10, NV; 1 Petrusi 3:15; Judasi 20, 21. (w08 06/15-E)

Qanoq akissavit?

• Jehovamik asannilerninnut pissutaasut maannakkut ilinnut qanoq qiimmassaataasinnaappat?

• Ukiut ingerlanerini misigisimasannik eqqarsaatiginnikkuit suna qulariunnaarsinnaaviuk?

• Sooq Guutimik asanninnerit eqqarsaatigalugu imminut misissortariaqarpit?

[Atuaqqissaarnermi apeqqutit]

[Qupp. 29-mi assiliartaq]

Sallusuissummi sunaana kajungernaralugulu qularunnaarutigigit?

[Qupp. 31-mi assiliartaq]

Illit ilinni naqqinneqartariaqartunik takusaqarsinnaavit?