Jehovap oqartussaassusia akueriuk

„Guutimut asanninneq tassaavoq inassutai maleruaratsigit, inassutaalu artornartuunngillat.“ — 1 JOHANNESI 5:3.

1, 2. (a) Sooq inuppassuit allat oqartussaassusiannut naalatsigitikkumaneq ajorpat? (b) Inuit allat oqartussaassusiannut naleqqussarusunngitsut ilumut kiffaanngissuseqarlutillu nammineersinnaappat? Nassuiaruk.

OQAASEQ oqartussaassuseq oqaasiuvoq inuit amerlanersaasa nuannarinngisaat. Inuppassuit inunnut allanut naalatsigitikkumanngillat. Inuit allat oqartussaassusiannut naleqqussarusunngitsut ima oqartarput: „Kialuunniit oqaluttuutissanngilaanga qanoq iliussasunga.“ Inuilli taakkua ilumut kiffaanngissuseqarlutillu nammineersinnaappat? Naamerluinnaq. Taakkua amerlanersaasa najoqqutassiat allat ’silarsuarmut matumunnga naleqqussartut’ tamarmik malitaat maliinnarpaat. (Romamiut 12:2) Kiffaanngissuseqanngilluinnarlutillu nammineersinnaanngilluinnarput, ’aserornartumulli inussiaataapput’, soorlu apustili Petrusi taama allattoq. (2 Petrusi 2:19) ’Inuunertik aalajangerneqartittarpaat silarsuup matuma pissuserisaanit silaannarsuullu naalagaaffiani naalagaasumit’, Saatanimit Diaavulumit. — Efesosimiut 2:2.

² Atuakkiortoq pingaakujulluni ima oqarsimavoq: „Angajoqqaakka, palasit, upperisamik ajoqersuisut Biibililuunniit suut eqqortuunerat pillugu isummannut aalajangiisuutinnianngilakka.“ Ilumoorpoq inuit ilaasa oqartussaassutsiminnik atornerluisarnerat immaqalu naalanneqarnissaminnut qinngaqqunnartuusarnerat. Siunnersuutinilli tamanik akuerinnikkumanngilluinnarneq aaqqiissutaava? Apeqqummut tamatumunnga akissut aviisit qulequtaanni erseqqippoq. Alianarpoq, piffissami inuit siunnersorneqarnissaminnik pisariaqartitsingaarfianni, inuit amerlanersaasa siunnersuutinik maanna aatsaat taama akuerinnikkumanngitsiginerat.

Oqartussaassutsimut isiginnittaaserput

3. Ukiuni hundredelinni siullerni kristumiut qanoq ersersippaat eqqarsaatigeqqaarlugu inuit oqartussaassusiannut naalatsigitittarlutik?

³ Kristumiuugatta inunnit silarsuarmiittunit allaanerulluinnartumik isumaqarpugut. Imaanngilaq qanorluunniit peqquneqaraluarutta eqqarsaatigeqqaarnagu peqquneqarnitsitut iliortartugut. Ilaannikkut allanut, aamma oqartussaasunuugaluartunulluunniit, naalatsigitikkumanngittariaqartarpugut.  Ukiuni hundredelinni siullerni kristumiut aamma taamaaliortarsimapput. Assersuutigalugu apustilit oqaluussiunnaaqquneqaramik palasiunerup oqartussaasullu Killisiuisoqatigiinnut ilaasortaasut allat tatisinerat nakkaannarfiginngilaat. Inuit oqartussaassusiannut naalanniaannarlutik eqqortuliortarunnaanngillat. — Atuaruk Apustilit Suliaat 5:27-29.

4. Allakkani Hebræerisuuniittuni oqaluttuani sorlerni erserpa Guutip kiffaasa ilarpassui inuit amerlanersaasa nuannarinngisaannik iliuuseqartartut?

⁴ Guutimut kiffaasut ilarpassui kristumiut sioqqullugit inuusut taamatuttaaq aalajangiusimannittarput. Assersuutigalugu „Mosesi inersimalerami uppernikkut Faraop paniata erneranik taaneqaqqunngilaq. Guutip innuttai naallioqatigiumanerungaarpai“, tamanna ’kunngip kamanneranik’ kinguneqaraluartoq. (Hebræerit 11:24, 25, 27) Josefip Potifarip nuliata, akiniaanissamut imminillu ajoqusiinissamut pissaaneqartup, qaninniarnera nakkaannarfiginngilaa. (1 Mosesi 39:7-9) Danieli „aalajangerpoq kunngip nerisartagaanik . . . minguttunnguutigisinnaasaminik neriumanani“, naak isummani Babylonimi kunngikkormiuni qullersaasumit akueriuminaatsinneqaraluartoq. (Danieli 1:8-14) Oqaluttuani taakkunani erserpoq Guutip innuttai oqaluttuarisaanerup ingerlanerani eqqortunik aalajangiussisarsimasut — tamanna qanorluunniit kinguneqassagaluaraangat. Guutip kiffai inunnut qujanarniaannarlutik taakkua tatisinerinut nakkaannartanngillat, aamma uagut nakkaannartussaanngilagut.

5. Oqartussaassusermut isiginnittaaserput silarsuarmi isiginnittaaserineqartumit qanoq allaanerua?

⁵ Sapiilluta aalajangiussigatta imaanngilaq uteriiginnartugut, imaluunniit inuit ilaasa pisarnerattut politikkikkut isummanik erseqqissaaniaannarluta pikitsitsiumatuujusugut. Sapiillutali aalajangiussinerput inuit oqartussaassusiannik akuerinninnissaminngarnit Jehovap oqartussaassusianik akuerinninniarluta aalajangiusimanninnerunitsinnut ersiutaavoq. Inatsisit Guutip inatsisaanut akerliugaangata qanoq iliorniarnerluta aalajangeruminaatsinneq ajorparput, ukiunimi hundredelinni siullerni apustilit pinerattut Guuti naalakkatsitut inunnit naalanneruarput.

6. Sooq Jehovap peqqussutaanut naalanneq pitsaanerpaajuaannarpa?

⁶ Guutip oqartussaassusianik akuerinninnissamut suna iluaqutigaarput? Ussatit 3:5, 6-imi allassimasut uku isumaqatigaavut: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ Upperaarput Guutip uagutsinnut piumasaqaatai tamarmik naggataatigut uagutsinnut pitsaanerpaassasut. (Atuaruk 5 Mosesi 10:12, 13.) Jehovap Israelikkut ima oqarfigai: „Uanga tassa . . . iluaqutaasunik ilinnik ajoqersuisoq, illit ingerlavigisassakkut ingerlatitsisoq.“ Imalu nangippoq: „Ilumulli inassutikka tusaaniarsimagaluarukkit taava eqqississutissat ilissagaluarpoq kuussuartut, iluassutsillu immap malingisut.“ (Esaja 48:17, 18) Oqaatsit taakkua ilumoornerat qularutiginngilarput. Aap, Guutip peqqussutaanut naalannerup uagutsinnut iluaqutaajuaannarnera qularutiginngilluinnarparput.

7. Peqqussummik Guutip oqaasianiittumik paasinnilluinnanngikkaluarluta susariaqarpugut?

⁷ Jehovap oqartussaassusia akueraarput taannalu naalattarlugu taassuma oqaasiani piumasaqaammut aalajangersimasumut pissutaasumik paasinnilluinnartuaannanngikkaluarluta. Imaanngilaq eqqarsaqqaarata naalattartugut, tatiginningaarpugulli. Qularutiginngilluinnarparput Jehovap nalunngikkaa suna uagutsinnut pitsaanerpaanersoq. Taassumunnga naalannerput asanninnitsinnut ersiutaavoq, apustilimi Johannesi ima allappoq: „Guutimut asanninneq tassaavoq inassutai maleruaratsigit.“ (1 Johannesi 5:3) Naalannitsinnulli tunngasoq aamma alla arajutsissanngilarput.

Paasinnissinnaassuserput sungiusartariaqarparput

8. ’Paasinnissinnaassusermik sungiusaaneq’ Jehovallu oqartussaassusianik akuerinninneq imminnut qanoq attuumassuteqarpat?

⁸ Biibilimi allassimavoq ’paasinnissinnaassuserput sungiusartariaqaripput eqqortumik eqqunngitsumillu immikkoortitsisinnaalersillugu’. (Hebræerit 5:14, NV) Tassa Guutip inatsisai itinerusumik eqqarsaatiginagit naalaannassanngilavut. Jehovalli najoqqutassiai tunngavigalugit ’eqqortumik eqqunngitsumillu immikkoortitsisinnaarusuppugut’. Jehovap unnersuussutaanik malinninnerup silatusaarnerussusia takusinnaarusupparput, tussiaasiortutut ima oqarsinnaaniassagatta: „Inatsisitit uanga ilunni ipput.“ — Tussiaat 40:9.

9. Nalunngeqatiginnissut Jehovap unnersuussutaanut qanoq ililluta naleqqussarsinnaavarput, aamma sooq taamaaliornissarput pingaaruteqarpa?

 ⁹ Tussiaasiortutut Guutip inatsisaanik pingaartitsiumalluta Biibilimi atuakkatsinnik eqqarsaatiginneqqissaartariaqarpugut. Assersuutigalugu Jehovap piumasaqaataasa ilaannik paasisaqaraangatta, imminut ima aperisinnaavugut: ’Sooq peqqussut imaluunniit najoqqutassiaq taanna pitsaava? Sooq tamatuminnga malinninnera uannut pitsaanerpaassava? Guutip siunnersuutaanik tamatuminnga sumiginnaasimasunut qanoq ajortumik kinguneqarsimava?’ Nalunngeqatiginnissuterput taamaalilluni Jehovap unnersuussutaanut naleqqussarneqartarpat, taassuma piumasaanut naapertuuttumik aalajangiisarnissarput ilimanarnerussaaq. ’Suna Jehovap piumasarigaa paasiniartuarsinnaavarput’ paasisavullu malillugit iliorluta, naalalluta taassuma piumasaatut iliornitsigut. (Efesosimiut 5:17) Tamannali ajornaatsuujuaannanngilaq.

Saatani Guutip oqartussaassusianik aserorsaaniarsarivoq

10. Saatani Guutip oqartussaassusianik sutigut aserorsaaniarsarisimava?

¹⁰ Saatani Guutip oqartussaassusianik sivisuumik aserorsaaniarsarisimavoq. Siulersorneqarumanngissusia amerlasuutigut erseqqippoq. Assersuutigalugu eqqarsaatigeriaruk Guutip aappariinnermik aaqqissuussaanik ataqqinninnginneq. Ilaat katissimanatik inooqatigiikkumanerusarput, allat avinnissaminnut periarfissarsiortut. Eqimattani taakkunani marlunni inoqassagunarpoq isiginnaartitsisartup arnap tusaamasap oqaasiinut ukununnga isumaqataasunik: „Angutit arnallu ataasiinnarmik aappaqarlutik inuusinnaanngillat.“ Ima nangippoq: „Aapparminut ilumoorfiginnittumik imaluunniit ilumoorfiginnikkumasumik ilisarisimasaqanngilanga.“ Isiginnaartitsisartoq angut tusaamasaq iluatsinngitsumik arnaateqartarsimanini eqqarsaatigalugu tamatumunnga assingusumik ima oqarpoq: „Inuuneq tamaat ataasiinnarmik inooqateqarnissamut ilumut pinngortitaanersugut qularaara.“ Silatusaassaagut imminut ima aperigutta: ’Jehovap oqartussaassusia aappariinnermut tunngatillugu akueraara, imaluunniit aappariinnermut isiginnittaasera silarsuarmi isiginnittaaserineqartumit qasungasumit sunnerneqarsimava?’

11, 12. (a) Sooq Jehovap oqartussaassusianik akuerinninnissaq inuusuttunut artornarsinnaava? (b) Misigisaq Jehovap inatsisaanik najoqqutassiaanillu sumiginnaanerup sianiilliorneruneranik ersersitsisoq oqaluttuariuk.

¹¹ Inuusuttut Jehovap peqatigiissortaaniittut ilagaatsit? Taamaappat Saatanip illit isumaqalersinniarsaraatit Jehovap oqartussaassusianik akuerinninnerit iluaqutiginavianngikkit. Tatineqarneq „inuusuttullu kajungerisaat“ pissutigalugit isummersinnaavutit Guutip inatsisai artornartuusut. (2 Timotheusi 2:22) Taama pisoqarteqinagu. Guutip najoqqutassiaanik malinninnerup silatusaarnerussusia takusinnaajumallugu iliuuseqarit. Assersuutigalugu Biibilimi erseqqissumik ima peqquneqarputit: „Kinguaassiuutitigut inuunerlunneq qimarratigisiuk.“ (1 Korinthimiut 6:18, NV) Aamma tamatumunnga tunngatillugu imminut ima aperisinnaavutit: ’Sooq peqqussut taanna pitsaava? Taanna naalakkukku qanoq iluaqutigissavara?’ Immaqa ilisarisimasaqarputit Guutip siunnersuutaanik sumiginnaasimasunik tamatumalu kingunerinik ajortunik atugaqartunik. Taakku ilumut nuannaarlutillu nalerisimaarpat? Jehovap peqatigiissortaaniinnerminninngarnit inuulluarneruppat? Pilluarnissamut isertugaataasumik Guutip kiffaasa allat tamarmik arajutsisimasaannik ilumut nassaarsimappat? — Atuaruk Esaja 65:14.

¹² Maluginiariaruk qatanngut arnaq kristumiu Sharonimik atilik ungasissorsuunngitsukkut qanoq allassimanersoq: „Jehovap inatsisaa sumiginnarpara taamaattumillu toqussutaasartumik aids-imik nappaateqalerlunga. Ukiorpassuit Jehovamut  kiffartorallarama pilluarfigisakka eqqarsaatigigajuppakka.“ Jehovap inatsisaanik unioqqutitsinerup sianiilliornerunera taakkuninngalu ataqqinninnerungaartariaqaraluarsimanini miserratiginngilaa. Jehovap inatsisaanik maleruaanerput uagut nammineq illersorneqaatigissavarput. Sharon qulaani allatani allareerlugit sapaatip-akunneri arfineq-marluinnaat qaangiuttut toquvoq. Misigisami alianartumi tamatumani erseqqippoq Saatani silarsuarmut ajortumut matumunnga ilaalersunut pitsaasunik neqeroorutissaqanngivissoq. „Sallumut ataataagami“ neriorsuuterpassuaqartarpoq eqqortinneq ajukkaminik, soorluttaaq Evamut neriorsuutiminik eqqortitsinngitsoq. (Johannesi 8:44) Aap, Jehovap oqartussaassusianik akuerinninneq pitsaanerpaajuaannarpoq.

Siulersorneqarumanngissuseq mianersorfigisariaqarparput

13. Ilaatigut sumut tunngatillugu siulersorneqarumanngissuseq mianersorfigisariaqarparput?

¹³ Jehovap oqartussaassusianik akuerinnissinnaajumalluta siulersorneqarumanngissuseq mianersorfigisariaqarparput. Makitagutta misigilersinnaavugut siunnersorneqarnissarput pisariaqartinnagu. Assersuutigalugu Guutip innuttaasa akornanni siuttuusut siunnersuutaannik akuerinnikkumanngissinnaavugut. Guutip inussiaq aalajaallunilu silatooq piffissaq eqqorlugu anersaakkut inuussutissanik pilersuisussanngortissimavaa. (Matthæusi 24:45-47) Tamanna Jehovap ullumikkut innuttaminik isumassueriaaserigaa maniguulluta nassuerutigisariaqarparput. Apustilit aalajaatsut malitsigit. Ajoqersukkat ilaat mamiatsammata Jiisusip apustilit ima aperai: „Aamma ilissi qimanniarpisinga?“ Petrusip ima akivaa: „Naalagaq, kina ornissagatsigu? Illit oqaatsinik naassaanngitsumik inuussutaasunik pigisaqarputit.“ — Johannesi 6:66-68.

14, 15. Sooq siunnersuutit Biibilimeersut maniguulluta malittariaqarpavut?

¹⁴ Jehovap oqartussaassusianik akuerinninnermut ilaavoq siunnersuutinik Biibilimik tunngaveqartunik malinninneq. Assersuutigalugu inussiaqatigiit aalajaallutillu silatuut ilungersorlutik kajumissaarpaatigut ’eqqumaniaqqulluta aalakooqqunatalu’. (1 Thessalonikamiut 5:6) Taamatut mianersoqquneqarnerput naleqqulluinnarpoq ulluni kingullerni makkunani inuppassuit ’namminissarsiorlutillu aningaaserituuffianni’. (2 Timotheusi 3:1, 2) Isiginnittaatsinit taama ittunit sunnerneqarsinnaavugut? Aap. Silamiorpaluttunik anguniagaqarneq anersaakkut sinilissutigisinnaavarput, imaluunniit pigisanik pingaartitsilissutigisinnaavarput. (Lukasi 12:16-21) Taamaattumik siunnersuutinik Biibilimeersunik akuerinninneq namminissarsiortumillu inooriaaseqarnermik Saatanip silarsuaani nalinginnaaqisumik pinaveersaarineq silatusaarnerungaarpoq! — 1 Johannesi 2:16.

¹⁵ Anersaakkut inuussutissat inussiaqatigiinnit aalajaallutillu silatuuneersut utoqqaanertat toqqakkat aqqutigalugit ilagiinnut ingerlateqqinneqartarput. Biibilimi kimittuumik imaattumik kajumissaaruteqarpoq: „Siulersortisi naalassigit peqqusaallu maleruarlugit [pitseriartuugitsilu, NV], taakkuami tarnisi pigaappaat nalunnginnamikku taakku pillugit akisussaatitaajumaarlutik. Taamaaliorsinnaalit nuannaarlutik anersaarulunnatilli; taamaanngippammi ilissi tamanna atugarliuutigissavarsi.“ (Hebræerit 13:17) Imaappa utoqqaanertat ilagiinniittut kukkunngisaannartut? Soorunami naamik! Guutip taakkua naammalluinnanngissutaat inunnit tamanit nalunnginneruai, taamaakkaluartorli pitseriartuunissarput piumasaraa. Utoqqaanertat naammalluinnanngikkaluartut suleqatiginerisigut ersersissavarput Jehovap oqartussaassusia akueralugu.

Maniguunnissaq pingaaruteqarpoq

16. Jiisusi ilagiinnut kristumiunut niaquusutut qanoq ililluta ataqqisinnaavarput?

¹⁶ Eqqaamajuartariaqarparput ilagiinnut niaquusoq,  imaluunniit qullersaviusoq, tassaasoq Jiisusi. (Kolossemiut 1:18) Tamanna utoqqaanertat toqqakkat siunnersuutaannut maniguulluta naalattarnitsinnut taakkuninngalu ’asanningaarnitsinnut’ pissutaasut ilagaat. (1 Thessalonikamiut 5:12, 13) Soorunami ilagiinni utoqqaanertat aamma namminneq Jiisusimut naalatsigitinnerminnik ersersitsisussaapput Guutip tusarliussaanik, namminneq isummatik pinnagit, ilagiinnut ingerlatitseqqinnissartik peqqissaarlutik isumagalugu. Namminneq paasinnittaatsiminnik siuarsaaniarlutik ’allassimasut qimmullugit isumaliorneq ajorput’. — 1 Korinthimiut 4:6, 1936.

17. Sooq ataqqineqarumatuneq navianarpa?

¹⁷ Ilagiinniittut kikkut tamarmik imminut ataqqinartinniarsarineq mianersorfigisariaqarpaat. (Ussatit 25:27) Imminut ataqqinartinniarneq ajoqersukkap aalajangersimasup apustilip Johannesip naapitaata naakkiuffigisimannguatsiarpaa. Ima allappoq: „Diotrefesip taakkunani tamatigut salliujumasartup akuersaanngilaatigut. Taamaattumik tikiukkuma eqqaasikkumaarpara qanoq iliornerinik, tassa mamarlerluta ajortumik oqallisigisarsimammatigut.“ (3 Johannesi 9, 10) Tamanna ullumikkut ilinniutigisinnaavarput. Uagut nammineq ataqqineqarumatulluta paasissagaluarutsigu, ataqqineqarumatujunnaarluinnarnissamut pissutissaqarluassaagut. Biibilimi ima allassimavoq: „Imminut pingaartinneq ajunaarnerup siulerisarpaa makitasaarnerlu naakkiunnerup.“ Guutip oqartussaassusianik akuerinnittut makitanaveersaartariaqarput, makitanaveersaanngikkunimmi ataqqineqarunnaarsinnaapput. — Ussatit 11:2; 16:18.

18. Jehovap oqartussaassusianik akuerinninnissamut suna iluaqutigissaviuk?

¹⁸ Aap, Jehovap oqartussaassusianik akuerinninnissat aalajangiusimajuk silarsuarmilu siulersorneqarumanngissuseq akiorlugu. Jehovamut kiffartornerup immikkut pisinnaatitaaffiuneranik qujamasullutit eqqarsaatiginneqqissaarnissat piffissaqarfigisaruk. Guutip innuttaanut ilaanerit anersaakkut illernartukkut taassumannga kajungilersinneqarsimaninnut uppernarsaataavoq. (Johannesi 6:44) Guutimut attaveqarnerit taamaattussaannartut isigeqinagu. Siulersorneqarumanngissusermik akuerinninnginnerit Jehovallu oqartussaassusianik akuerinninnerit inuuninni sutigut tamatigut ersersiguk.

Eqqaamavigit?

• Jehovap oqartussaassusianik akuerinninneq qanoq paasisariaqarpa?

• ’Paasinnissinnaassusermik sungiusaaneq’ Jehovallu oqartussaassusianik akuerinninneq imminnut qanoq attuumassuteqarpat?

• Saatani Guutip oqartussaassusianik qanoq aserorsaaniarsariva?

• Jehovap oqartussaassusianik akuerinnissinnaajumalluni sooq maniguunnissaq pingaaruteqarpa?

[Atuaqqissaarnermi apeqqutit]

[Qupp. 24-mi assiliartaq]

Guuti naalakkatsitut inunnit naalattariaqarneruarput

[Qupp. 26-mi assiliartaq]

Guutip najoqqutassiaanik malinninneq silatusaarnerujuaannarpoq