Korinthimiunut allakkanit pingaarnersat
Jehovap oqaasia uumavoq
Korinthimiunut allakkanit pingaarnersat
APUSTILIP Paulusip ilagiit Korinthimiittut anersaakkut atugaat isumakuluutigingaarpaa. Qatanngutit akornanni saqitsaattoqarnera tusarsimavaa. Kinguaassiuutitigut inuunerlunneq isiginngitsuusaarneqarpoq. Aamma ilagiit Paulusimut allassimapput assigiinngitsut pillugit aperalugu. Taamaattumik ukiup 55-ip missaani u.n.k., pingajussaanik ajoqersuiartorluni angalanermini Efesosimiitilluni, Paulusip Korinthimiunut allakkami marluusut siulliat allappaa.
Allakkat aappaat, allakkat siulliit allanneqarnerisa kingorna qaammatialuinnaagunartut qaangiuttut, allakkanut siullernut malitsigitillugit allanneqarput. Ukiuni hundredelinni siullerni Korinthimi ilagiinni taakkualu avataanni pissutsit ullutsinni pissutsinut amerlasuutigut eqqaanarmata, Paulusip Korinthimiunut allagaani saqqummiunneqartut uagutsinnut pingaaruteqangaarput. — Hebræerit 4:12.
’EQQUMAGITSI, AALAJAAGITSI, NAKUUGITSI’
’Isumaqatigiigitsi,’ Paulusi kajumissaarivoq. (1 Korinthimiut 1:10) ’Jiisusi-Kristusimit allaasumik tunngaveqanngilaq’, kristumiutullu pissuserineqartussat Jiisusi tunngavigalugu ineriartortinneqartarput. (1 Korinthimiut 3:11-13) Angut kinguaassiuutitigut inuunerluttoq ilagiinniittoq pillugu Paulusi ima allappoq: „Ajortoq akornassinnit piissavarsi.“ (1 Korinthimiut 5:13) „Timi kinguaassiuutitigut inuunerlunnermut atugassaanngilaq, Naalakkamulli,“ allappoq. — 1 Korinthimiut 6:13.
Ilagiit ’allaaserisaannut’ akissutitut Paulusi aappariinneq aappaqannginnerlu pillugit pitsaasunik siunnersuuteqarpoq. (1 Korinthimiut 7:1) Kristumiut siulersuinermut najoqqutassaat, kristumiut ataatsimiinnerisa torersuunissaat makititaanissamillu neriuutip qularnaatsuunera eqqartoreerlugit Paulusi ima kajumissaarivoq: „Eqqumagitsi, uppernissinni aalajaagitsi, angutivittut ilioritsi, nakuugitsilu!“ — 1 Korinthimiut 16:13.
Allassimaffiit pillugit apeqqutinut akissutit:
1:21 — Uppertut annaanniarlugit Jehovap ilumut ’sianiissuseq’ atorpaa? Naagga, taamaaliunngilaq. ’Silarsuulli ilisimassutsimigut Guuti ilisimannginnamiuk’ Guutip inuit annaanniarlugit iliuusii sianiitsuliornerusorai. — Johannesi 17:25.
5:5 — ’Inuup [guutiitsup] Saatanimut pisinneqarnissaa uinngata nungutinneqaatissaanik anersaava [anersaaq, NV] annaanneqaqqullugu’ qanoq paasisariaqarpa? Peqqissiminani ingasattumik ajortuliortartoq ilagiinnut ilaajunnaarsinneqaruni Saatanip silarsuaanut ajortumut ilaaqqilissaaq. (1 Johannesi 5:19) Taamaattumik oqartoqarsinnaavoq Saatanimut pisinneqartoq. Ilagiinnut ilaajunnaarsinneqarpat ajortunngortitsisinnaanera ilagiinnit peerneqassaaq, ilagiillu anersaavat, imaluunniit ilagiinni isiginnittaaseq malunnarnerusoq, ajortunngutsaalineqassaaq. — 2 Timotheusi 4:22.
7:33, 34 — „Silarsuaq“ aappaqartup sammisarisaa suua? Paulusip uani pivai ulluinnarni suliassat kristumiut aappaqartut isumagisariaqagaat. Ilaatigut tassaapput nerisassat, atisat ineqarnerlu, tassaanatilli silarsuarmi matumani sammineqarsinnaasut ajortut kristumiut ingalassimasariaqagaat. — 1 Johannesi 2:15-17.
11:26 — Qanoq akulikitsigisumik Jiisusip toqua eqqaaniarneqartassava, aamma qaqugumut? Paulusi isumaqanngilaq Jiisusip toqua akulikitsumik eqqaaniarneqartassasoq. Paulusili allappoq kristumiut tanitat eqqaaniaanermi assersuutit ukiumut ataasiarlutik, nisanip 14-iani, nerisaraangamikkit ’Naalakkap toqua nalunaajaatigisaraat’. Taamaaliortassapput „tikiutserlugu“, tassa makititaanikkut taassumannga qilammukartinneqarnissamik tungaanut. — 1 Thessalonikamiut 4:14-17.
13:13 — Asanninnerup uppernermit neriunnermillu pingaarnerunera qanoq paasisariaqarpa? ’Neriugisaq’ piviusunngorpat ’tatiginnilluinnarnerlu’ eqquuppat uppernerup ilaa neriunnerullu ilaa piujunnaassapput. (Hebræerit 11:1) Asanninneq naassaanngitsumik piusussaanermigut uppernermit neriunnermillu pingaarneruvoq.
15:29 — ’Toqusut sinnerlugit kuisinneq’ qanoq paasisariaqarpa? Paulusip pinngilaa kuisimanatik toqusut sinnerlugit inuit inuusut kuisissasut, naak Biibilimik nutsikkat ilaanni taamatut nutserneqarsimagaluartoq. Paulusip uani pivaa kristumiut tanitat toqu tikillugu assuarnaattuarlutik inuunermut anersaatut makititaanermik malitseqartumut kuisinnerat.
Ilinniarfigisinnaasavut:
1:26-31; 3:3-9; 4:7. Maniguulluta imminut pinnata Jehova usorsisimaarutigisarutsigu ilagiinni ataasiussuseq siuarsassavarput.
2:3-5. Paulusi Korinthimi, grækerit isumaliutersorneranni ilisimatusarnerannilu qitiusumi, oqaluussigami immaqa isumakuluutigaa tusarnaartini qularunnaarsissinnaanerlugit. Sanngiinninili annilaanganiniluunniit kiffartornerminut Guutimit suliassiissutigineqartumut akornutaatinngilaa. Uaguttaaq Guutip naalagaaffia pillugu nutaarsiassamik nuannersumik oqaluussissutiginninnissatsinnut pissutsit unamminiarnartut akornutaatissanngilavut. Paulusip iliorneratut isumalluarluta Jehovamut ikiortissarsiorsinnaavugut.
2:16. ’Kristusip eqqarsaataanik [isumaanik, 1961]’ piginninneq isumaqarpoq taassuma eqqarsartaasianik ilisimannilluni eqqarsarneratullu eqqarsarluni kinaassusianillu ilisimannilluarluni maligassiaanik malinninneq. (1 Petrusi 2:21; 4:1) Jiisusip inuunera kiffartorneralu pillugit peqqissaartumik atuaqqissaartarnissatta pingaaruteqassusia!
3:10-15; 4:17. Ilinniartitsisinnaanerput ajoqersuganngortitsiortorsinnaanerpullu misissoqqissaartariaqarpavut pitsaanerulersittariaqarlugillu. (Matthæusi 28:19, 20) Ilinniartitsillaqqinngikkutta immaqa ilinniartitarput uppernikkut misilinneqarnermini aalajaassinnaassanngilaq, uagullu immaqa ima annernartigisumik annaasaqassaagut annaanneqarnerput „soorlu innikkut“ pilluni.
6:18. ’Kinguaassiuutitigut inuunerlunneq nigorsimaniarlugu [qimarratiginiarlugu, 1961]’ iliuutsit pornei’a-tut taaneqarsinnaasuinnaanngitsut, aammali pornografii, ileqqussatigut minguttuujuneq, atoqatigiinnermik takorluuinerit, qaninniarujoornerit — aap, kinguaassiuutitigut inuunerlunnermik kinguneqarsinnaasut tamaasa — iliuuserinaveersaartariaqarpavut. — Matthæusi 5:28; Jaaku 3:17.
7:29. Aappariit mianersortariaqarput imminnut sammivallaarlutik Guutip naalagaaffiata soqutigisai inuunerminni pingaarnerpaatikkunnaassannginnamikkit.
10:8-11. Israelikkut Mosesimut Aronimullu naammagittaalliormata Jehovamut ajuallaataangaarpoq. Silatusaassaagut naammagittaallioqqajaalerumanata mianersorutta.
16:2. Guutip naalagaaffiata soqutigisaanik siuarsaanermut akuttoqatigiimmik aningaasatigut tunissuteqartarsinnaavugut taamaaliortarnissaq siumut pilersaarusiortarutsigu aaqqissuulluagaatikkutsigulu.
„ILUARSARNEQARTIGITSI“
Paulusip Korinthimiut allaffigai unioqqutitsisoq peqqissimisoq naveersissimasoq ’isumakkeerfigalugulu tuppallersassagaat’. Naak allagai siulliit aliasuutigigaluaraat Paulusip nuannaarutiginerarpaa ’aliasunnerisa allamik isumataarnermik kinguneqarnerat’. — 2 Korinthimiut 2:6, 7; 7:8, 9.
Paulusip Korinthimiut kajumissaarpai ’soorlu tamanik peqangaartut’ taamatuttaaq allanut ’tunisingaassasut’ (1961). Akerlilersuisut akereerlugit naggammik tamaasa ima siunnersorpai: „Nuannaaritsi! Tamaasa iluarsarsigit [Iluarsarneqartigitsi, NV], oqaaqqissaarutit ilassisigit, isumaqatigiigitsi, eqqisseqatigiigitsi!“ — 2 Korinthimiut 8:7; 13:11.
Allassimaffiit pillugit apeqqutinut akissutit:
2:15, 16 — Sooq ’uagut Kristusip naamajuminartuutigaatigut’? Taamaappugut Biibili maleruaqqissaartaratsigu tusarliussamillu oqaluussissutiginneqataagatta. Immaqa tamanna naapertuilluanngitsunut ’naamajuminartuunani’ maajunnartuuvoq, Jehovamulli eqqortuliorusuttunullu tamanna naamajuminartuuvoq.
5:16 — Kristumiut tanitat ’kimilluunniit ilisarinninngitsut inuit pisarnerat malillugu’ qanoq paasisariaqarpa? Inunnik allanik inuit pisarnerat malillugu nalilersuineq ajorput, assersuutigalugu pisuujuneq, naggueqatigiissuseq inuiaqatigiissuserluunniit tunngavigalugu salliutitsinikkut. Taakkununnga pingaaruteqartoq tassaavoq uppeqatiminnut anersaakkut ittumik attaveqarnerat.
11:1, 16; 12:11 — Paulusi Korinthimiunut tunngatillugu ’silaarussimava’? Naagga, taamaanngilaq. Apustiliuninili illersorniarlugu oqaaserisariaqagai pissutigalugit ilaat isummersimasinnaapput oqarissaartoq ’silaarussimasorlu’.
12:1-4 — „Tassanngaannaq Paratiisimut pisitaasoq“ kinaava? Biibilimi taamatut takorruuisumik allamik eqqaasaqartoqanngimmat, taamatullu allassimanera Paulusip apustiliunerminik illersuinerata malitsigimmagu, ilimanarpoq Paulusi nammineq taamatut misigisimassasoq. Apustilip takorruuinikkut takusaa tassaagunarpoq paratiisi anersaakkut ittoq ilagiit kristumiut „naggatissap“ nalaani atugaat. — Danieli 12:4.
Ilinniarfigisinnaasavut:
3:5. Versimi tamatumani oqaluttuunneqarpugut Jehovap kristumiut kiffartorsinnaanngortikkai oqaatsini, anersaani illernartoq peqatigiissortamilu ilaa nunarsuarmiittoq aqqutigalugit. (Johannesi 16:7; 2 Timotheusi 3:16, 17) Silatusaassaagut Biibili atuagassiallu Biibililersaarutit eqiasuilluta atuaqqissaartarutsigik, anersaaq illernartoq qasusuilluta qinnutigisarutsigu kristumiullu ataatsimiinnerinut aalajangersimasumik najuuttarutta peqataasaruttalu. — Tussiaat 1:1-3; Lukasi 11:10-13; Hebræerit 10:24, 25.
4:16. Jehovap ’inuuserput ilorleq ullut tamaasa nutaanngortittarmagu’, Jehovap pilersitai aalajangersimasumik atortariaqarpavut ullullu tamarluinnaasa anersaakkut ittunik eqqarsaatiginnittariaqarluta.
4:17, 18. ’Naalliuutitta maanna atukkatta oqitsuunerat’ sivikitsuunerallu eqqaamasarutsigu atugarliornermi Jehovamut aalajaattuarnissatsinnut iluaqutigisinnaavarput.
5:1-5. Uani Paulusip kristumiut tanitat qilaliarnissamik neriugisaminnik isumaqarfiginninnerat kusanartumik allaatigaa.
10:13, NV. Pisariaqartitsiffiunerusumi ikiuunnissatsinnik immikkut isumaqatigiissuteqartoqarsimanngippat ilagiinnut ilaaffigisatsinnut oqaluussiffigeqquneqartumiinnaq amerlanertigut oqaluussisariaqarpugut.
13:5. ’Immitsinnik paasiniaaffiginiarluta uppernermiinnersugut’ misissortariaqarparput pissusilersornerput ilikkakkatsinnut Biibilimeersunut naapertuuttuunersoq. ’Immitsinnik misilinniarluta’ nalilertariaqarparput anersaakkut ittunik qanoq pingaartitsitiginerluta, ilaatigut qanoq paasinnillaqqitsiginerluta uppernikkullu suliavut qanoq amerlatiginersut. (Hebræerit 5:14; Jaaku 1:22-25) Paulusip siunnersuutai pitsaasut maleruarnerisigut sallusuissutip aqqutaatigut saqiuarsinnaavugut. (w08 07/15-E)
[Qupp. 10, 11-mi assiliartaq]
Oqaatsit uku qanoq isumaqarpat: „Timiusamik tamatuminnga nerisaraangassi ermutsimillu tamatuminnga imeraangassi“? — 1 Korinthimiut 11:26.