Pissuserineqartussat noqqaassutigisariaqakkavut

„Noqqaassutigikkit naapertuilluarneq, Guutimut tunniusimaneq, upperneq, asanninneq, pinertusaarneq [saamanerlu].“ — 1 TIMOTHEUSI 6:11, NV.

1. Inuit inuunerminni sunik noqqaassuteqartarpat?

ULLUMIKKUT silarsuatsinni inuit inuunerminni suut noqqaassutigisarpaat? Soorlu Biibilimi ersersinneqartoq, inuppassuit suunngitsunik noqqaassuteqartarput. Ilaat ’aningaaserituujusarput’, isumaqarlutik pigisat pillualissutigisinnaallugit. Ilaat ’inuulluarniutinik pingaarnerutitsisarput’, nuannaarniutit aliikkusersuutillu inuunerminni salliutillugit. (2 Timotheusi 3:2, 4) Inuit tamakkuninnga noqqaassuteqarnerminni ilungersorput, ilumoortumilli ’anorimik tigusiniarsaripput’. — Oqaluussisartup oqaasii 1:14.

2. (a) Ajugaasutut nersornaatisiassaq Guutip kristumiut ilaannut noqqaassutigeqqusaa suua? (b) Jehovap ullumikkut kristumiut amerlanersaannut suna neriuutissiissutigaa?

² Apustilili Paulusi kristumiut anguniagarilluarsinnaasaannik uparuaavoq ima allakkami: „Apuuffissaq anguniarpara ajugaasup nersornaatisiassaa piniarlugu, Guutip Kristusi-Jiisusikkut pavannga uatsinnut qaaqqusissutaa.“ (Filippimiut 3:14) Biibilimi ersersinneqarpoq kristumiut tanitat katillutik 144.000-iusut, Paulusip ilaaffigisaasa, qilammi inuuneq ajugaasutut nersornaatisiassarigaat. Taakku Jiisusi Kristusi nunarsuarmut ukiuni tusindini naalakkersueqatigissavaat, anguniagassaq nuanningaartoq Jehovamit Guutimit taakkununnga tunniunneqartoq. Ullumikkulli kristumiut ilumoortut amerlanerpaartaat allamik anguniagassaqarput. Jehovap asannilluni taakkua Adamip Evallu annaasaannik, tassa nunarsuarmi paratiisiusumi peqqilluinnarluni naassaanngitsumik inuunissamik neriuummik, tunivai. — Saqqummersitat 7:4, 9; 21:1-4.

3. Guutip ajunngissusianik pisassarinngisaraluamik qujamasuutiginninnerput qanoq ililluta ersersissinnaavarput?

³ Inuit ajortillit naammalluinnanngitsutut eqqortumik namminneq iliuuseqarniarnermikkut naassaanngitsumik inuulersinnaanngillat. (Esaja 64:5) Taamaallaat Guutip Jiisusi Kristusi aqqutigalugu annaassissutissatut asannilluni aaqqissuussaanik upperinninnermikkut naassaanngitsumik inuulersinnaapput. Qanormi ililluta Guutip ajunngissusianik pisassarinngisaraluamik qujamasuutiginninnerput ersersissinnaavarput? Peqqussut una malissinnaavarput: „Noqqaassutigikkit naapertuilluarneq, Guutimut tunniusimaneq, upperneq, asanninneq, pinertusaarneq [saamanerlu].“ (1 Timotheusi 6:11, NV) Pissuserineqartussanik taakkuninnga misissuinerput „suli annerusumik“ taakkuninnga noqqaassutiginnittuarnissatsinnik aalajangiusimanninnissamut tamatta immikkut iluaqutigissavarput. — 1 Thessalonikamiut 4:1.

’Naapertuilluarneq noqqaassutigiuk’

4. Sooq ’naapertuilluarnermik noqqaassutiginninnissap’ pingaaruteqarnera qularutiginngilluinnarsinnaavarput, qanorlu ililluni tamatuminnga noqqaassutiginnittoqalertarpa?

⁴ Paulusip Timotheusimut allakkamini marlunni pissuserineqartussat noqqaassutigisariaqakkat taagorpai, tamatigullu „naapertuilluarneq“ taaqqaartarpaa. (1 Timotheusi 6:11; 2 Timotheusi 2:22, NV) Aammattaaq Biibilimi allassimaffinni allani naapertuilluarnermik noqqaassutiginninnissaq kajumissaarutigineqarpoq. (Ussatit 15:9; 21:3; Esaja 51:1) ’Naapertuilluarnermik noqqaassutiginnittoqalertarpoq’ ’ilumut kisimi Guutiusoq aallartitaalu Jiisusi-Kristusi’ pillugit ilinnialeraanni. (Johannesi 17:3) Taamaalilluni iliuuseqarnissamut — siornatigut ajortuliarisimasanik peqqissimissutiginninnissamut, allamik isumataarnissamut Guutillu piumasaanik iliorumalluni saannissamut — kajumissisoqartarpoq. — Apustilit Suliaat 3:19, 20a.

5. Guutimut eqqortumik attaveqalerumallutalu attaveqartuarumalluta susariaqarpugut?

 ⁵ Inuit millionillit naapertuilluarnermik ilumoorlutik noqqaassutiginnittut inuunertik Jehovamut tunniulluinnarsimavaat tamannalu imermi kuisinnermikkut ersersissimallugu. Kristumiuuguit kuisimasoq, eqqarsaatigisimaviuk naapertuilluarnermik noqqaassutiginninnerit aamma allat takusinnaasariaqaraat? Ilaatigut tamanna ersersissinnaavat illit inuuninni pingaarutilinnik aalajangiissagaangavit suup ’ajunngitsuuneranik’ suullu ’ajortuuneranik’ Biibilip aalajangiisuutinneratigut. (Atuaruk Hebræerit 5:14.) Assersuutigalugu aappaqanngikkuit aappanissinnaanngoreersimaguillu, kristumiutut kuisissimanngitsumik sammisaqannginnissat aalajangiusimalluinnarpiuk? Tamanna aalajangiusimalluinnassavat naapertuilluarnermik noqqaassutiginnikkuit. — 1 Korinthimiut 7:39.

6. Naapertuilluarnermik noqqaassutiginnikkumagaanni qanoq iliortariaqarpa?

⁶ Naapertuilluartuuneq tassaanngilaq imminut iluartuutinneq imaluunniit ’iluarniarpallaarneq’. (Oqaluussisartup oqaasii 7:16) Jiisusip mianersoqqussutigaa allanit pitsaanerorpasinniarluni iluarniarneq. (Matthæusi 6:1) Naapertuilluarnermik noqqaassutiginnikkumaneq uummammit aallaaveqarpoq. Eqqarsaatit, isummat, pissutiginiakkat kissaatillu eqqunngitsut naqqinneqartariaqarput. Tamanna sulissutigiuaraanni ilimanarnavianngilaq ingasattumik ajortuliornissaq. (Atuaruk Ussatit 4:23; naleqqiuguk Jaaku 1:14, 15.) Aammattaaq Jehovap kristumiunit pissuserineqartussanik pingaarutilinnik allanik noqqaassutiginninnitsinni pilluaqqullutalu ikiussavaatigut.

’Guutimut tunniusimaneq noqqaassutigiuk’

7. „Guutimut tunniusimaneq“ qanoq paasisariaqarami?

⁷ Inummut allamut tunniusimanermut ilaavoq taassuminnga asanningaarneq ilumoorfiginninnerlu. Grækerit oqaasiat „Guutimut tunniusimaneq“-mik nutserneqartartoq Biibilimi oqaatsinik qinerlerfissiami „iluaqutaasumik Guutimik mianerinninnertut“ nassuiarneqarpoq. Israelikkut pissuserineqartussamik tamatuminnga ersersitsinngitsoorajupput, soorlu arlaleriaqalutik Guutimut naalannginnerannit tamanna ersertoq, ingammik Egyptenimit aniguisitaanermik kingorna.

8. (a) Adami ajortuliormat apeqqut suna pilerpa? (b) ’Anngigisaq’ qanoq ililluni paasinarsisinneqarpa?

⁸ Angutip naammalluinnartup Adamip ajortuliornerata kingorna ukiut tusindillit qaangiuttut apeqqut una akineqarsimanngilaq: ’Inuk kinaluunniit Guutimut tunniusimalluinnarsinnaava?’ Ukiorpassuit taakkua ingerlaneranni inummik ajortilimmik Guutimut tunniusimalluinnarluni inuusinnaasoqarsimanngilaq. Piffissanngormalli ’anngigisamut illernartumut’ tamatumunnga akissutaasoq Jehovap nammineq paasinarsisippaa. Ernituami qilammiusup inuunera Mariap illiaanut nuuppaa, tamatumalu kingorna erneq taanna inuttut naammalluinnartutut inunngorpoq. Nunarsuarmi inuunini tamaat nikanarsaataasumillu toqussi tikillugu Jiisusip ersersippaa Guutimut ilumoortumut iluunngarluni tunniusimanerup taassuminngalu  ilumoorfiginnilluinnarnerup qanoq paasisariaqarnerat. Qinnutai Ataataminik qilammiusumik asannittumik ataqqinningaarneranik ersersitsipput. (Matthæusi 11:25; Johannesi 12:27, 28) Taamaattumik Jehovap Paulusi isumassarsisippaa Jiisusip inuuneranik maligassaalluartumik allaatiginninnermini ’anngigisamik illernartumik Guutimut tunniusimanerup pianik’ eqqartuinissamut. — Atuaruk 1 Timotheusi 3:16, NV. *

9. Guutimut tunniusimaneq qanoq ililluta noqqaassutigisinnaavarput?

⁹ Ajortiliugatta Guutimut tunniusimalluinnarsinnaanngilagut. Tamannali noqqaassutigisinnaavarput Jiisusip maligassiaanik sapinngisatsinnik malinninnitsigut. (1 Petrusi 2:21) Taamaaliorutta ilumoortuusaartutut ’Guutimik mianerinninnermik ileqqoqartuusaartutut pissaaneranilli asiginnaasutut’ issanngilagut. (2 Timotheusi 3:5) Imaanngilaq ilumoortumik Guutimut tunniusimaneq qallikkut ittunut tunngassuteqanngitsoq. Qallikkut ittunut tunngassuteqarluinnarpoq. Assersuutigalugu katinnermi atisassanik toqqaassagaangatta imaluunniit pisiniarfileritilluta atisat suut pisiarissanerlugit aalajangissagaangatta isikkorput ’Guutimik mianerinninnermut nassuerutigisatsinnut’ naapertuuttariaqarpoq. (1 Timotheusi 2:9, 10) Aap, Guutimut tunniusimaneq noqqaassutigissagutsigu Guutip najoqqutassiai naapertuilluartut ulluinnarni inuunitsinni eqqarsaatigisariaqarpavut.

’Upperneq noqqaassutigiuk’

10. Upperluartuarumalluta qanoq iliortariaqarpugut?

¹⁰ Atuaruk Romamiut 10:17. * Upperluarnermik ineriartortitsiumalluta tamatuminngalu attassiuarumalluta sallusuissutinik Guutip oqaasianiittunik erlinnartunik eqqarsaatiginneqqissaartuartariaqarpugut. Tamanna siunertaralugu „inussiaq aalajaallunilu silatooq“ (NV) atuagarpassuarnik atuagassiarpassuarnillu pitsassuarnik pilersuisimavoq. Atuakkat immikkut piukkunnaatillit marluk tassaapput Inuk inuit inuusimasut pingaarnerpaartaat aamma Biibilimik oqaluttuaatikka, atuakkat Jiisusimik ilisarisimannilluarnerulernissamut ilaarsisinnaanngornissamullu iluaqutissavut. (Matthæusi 24:45-47) Inussiaqatigiit aamma ataatsimiinnernik, ataatsimeersuarnernik ataatsimeersuaararnernillu aaqqissuussisarput, taakkualu ilarpassuini ’Kristusi pillugu oqaatsit’ erseqqissarneqartarput. Illit Jehovap tunniuttagai ’sianigilluaqqissaarsinnaaniassagakkit’ aaqqissuussinerit tamakkua tamaasa qanoq atorluarnerusinnaaneritit eqqumaffigaajuk? — Hebræerit 2:1.

11. Qinuneq naalannerlu ’uppernermik noqqaassutiginninnissamut’ qanoq iluaqutigisinnaavavut?

¹¹ Qinuneq aamma upperluartunngornissamut iluaqutaasarpoq. Ilaanni ajoqersukkat Jiisusi ima oqarfigaat: „Uppernermik annerusumik tunisigut!“ Maniguulluta Guuti tamatuminnga qinnuigisinnaavarput. (Lukasi 17:5) Uppissuseqarnerulerumalluta Guutip anersaava illernartoq qinnutigisariaqarparput, uppernermi ’anersaap inerititaasa’ ilagaat. (Galatiamiut 5:22, NV) Aammattaaq Guutip peqqussutaanut naalannerput uppernitsinnut nakussatsissutaassaaq. Assersuutigalugu oqaluusseqataanerusinnaavugut. Tamanna qamannga pisumik pillualissutigissavarput.  Aamma ’Guutip naalagaaffianik iluarneranillu ujaaseqqaarnitta’ iluaqutissartai eqqarsaatigisarutsigit uppernerput ineriartussaaq. — Matthæusi 6:33.

’Asanninneq noqqaassutigiuk’

12, 13. (a) Jiisusip inassutaa nutaaq suua? (b) Sutigut pingaaruteqartutigut Jiisusip maligassiaa malillugu asannittuliorsinnaavit?

¹² Atuaruk 1 Timotheusi 5:1, 2. Paulusi qanoq asannittuliorfigeqatigiissinnaanerput pillugu atoriaannaasumik siunnersuuteqarpoq. Guutimut tunniusimanitsinnut ilaasariaqarpoq Jiisusip uagutsinnik asanninneratut ’asaqatigiinnissaq’ pillugu taassuma inassutaanut nutaamut naalanneq. (Johannesi 13:34) Apustili Johannesi ima allappoq: „Nunap piinik peqartup qatanngutini ajorsartoq isigigaluarlugu uummatini taassumunnga matuppagu, taava qanoq ililluni Guutip asanninnera taassumaniittuarsinnaava?“ (1 Johannesi 3:17) Illit asannittuliortarsimavit?

¹³ Asannittuliornissamik noqqaassutiginninniarluni periaaserineqarsinnaasoq alla tassaavoq qatanngutitsinnik isumakkeerfiginninneq taakkununngalu puttarsisaqannginneq. (Atuaruk 1 Johannesi 4:20.) Siunnersuut isumassarsiarititaasoq una malittariaqarparput: „Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi. Soorlu [Jehovap] isumakkeerfigigaasi taamatuttaaq ilissi iliussaasi.“ (Kolossemiut 3:13) Ilagiinniittut arlaannut siunnersuut taanna malillugu iliorniarsinnaavit? Isumakkeerfigissaviuk?

’Pinertusaarneq noqqaassutigiuk’

14. Ilagiit Filadelfiamiittut qanoq ilinniarfigisinnaavavut?

¹⁴ Anguniakkamik piffissap sivikitsup ingerlanerani angusiniarluni ilungersortoqarsinnaavoq; anguniagarli angujuminaappat ilimagisamilluunniit sivisunerusumik anguniagassaappat allarluinnaassaaq. Erseqqippoq inuuneq naassaanngitsoq noqqaassutigissagaanni pinertusaarnissaq pisariaqartoq. Naalakkap Jiisusip ilagiit Filadelfiamiittut ima oqarfigai: „Nikallujuissuseq pillugu oqaatsikka paarigakkit uangattaaq paariumaarpakkit ullussani misilinneqarfiusuni.“ (Saqqummersitat 3:10) Aap, Jiisusip nikallujuinnissap, imaluunniit pinertusaarnissap — pissuserineqartussap misilinneqarnernut usserneqarnernulluunniit nakkaannannginnissamut iluaqutigisartakkatta — pingaaruteqassusia erseqqissarpaa. Ukiuni hundredelinni siullerni qatanngutit Filadelfiami ilagiinniittut uppernikkut misilinneqarnerminni amerlasuuni maluginiarnartumik pinertusaarsimassapput. Taamaattumik Jiisusip neriorsoqqissaarpai misilinneqarnissaanni annerusumi ikiornerujumaarlugit. — Lukasi 16:10.

15. Jiisusip ajoqersukkani nikallujuinneq imaluunniit pinertusaarneq pillugu sumik ilinniartippai?

¹⁵ Jiisusip nalunngilaa ajoqersukkani ilaquttaminnit uppinngitsunit silarsuarmiullu amerlanersaannit uumissorneqarumaartut. Taamaattumik minnerpaamik marloriarluni qiimmassarpai ima oqarluni: „Naggatissamut nikallujuitsuusoq taanna annaanneqassaaq.“ (Matthæusi 10:22; 24:13) Aamma Jiisusip ajoqersukkani takutippai nikallujuinnissamut pisariaqartitaminnik qanoq nakussatsinneqarsinnaanersut. Assersuusiami ilaanni qaarsoq naatsiassat tuffigisaat ’[Guutip oqaasianik] tusarlutik nuannaarlutik ilassinnittunut’, misilinneqaramilli uniinnartunut, assersuuppaa. Ajoqersukkanili aalajaatsut issorissumut assersuuppai Guutip oqaasia ’pigiinnarmassuk pinertusaarlutillu inerititaqarmata’ (NV). — Lukasi 8:13, 15.

16. Asannittumik aaqqissuussaq inuit millionillit pinertusaarnissamut iluaqutigisimasaat suua?

¹⁶ Pinertusaarnerup isertugartaa maluginiarpiuk?  Guutip oqaasia ’pigiinnartariaqarparput’ uummatitsinni isummatsinnilu uummaaritsittuarneratigut. Ny Verden-Oversættelsen af De Hellige Skrifter — eqqoqqissaartumik atuaruminartumillu nutsigaq oqaatsini amerliartuinnartuni saqqummersinneqartartoq — pissutigalugu taamaaliortoqarsinnaallunilu taamaaliortoqariaannaavoq. Guutip oqaasiani allassimasunik ullut tamaasa eqqarsaatiginnittarutta, tamanna ’pinertusaarluta’ inerititaqartuarnissamut pisariaqartumik nakussatsinneqarnissamut iluaqutigissavarput. — Tussiaat 1:1, 2.

’Saamaneq’ eqqissinerlu ’noqqaassutigikkit’

17. (a) Sooq saamanermik ersersitsinissaq taama pingaaruteqartigaa? (b) Jiisusip qanoq ersersippaa saamasuulluni?

¹⁷ Oqaaserisimanngisanik iliuuserisimanngisanillu oqarnerarneqarneq iliuuseqarnerarneqarnerlu inuup kialuunniit nuannarineq ajorpaa. Taamatut pisoqartillugu kamalluni taamaannginneraaneq inuit ileqqorigajuppaat. ’Saamanermilli’ ersersitsinissaq pitsaanerungaassaaq! (Atuaruk Ussatit 15:1.) Naapertuilluanngitsumilli isornartorsiorneqartilluni saamassagaanni aalajaatsumik pissuseqarnissaq pisariaqarpoq. Matumani Jiisusi aamma maligassaavoq naammalluinnartoq. „Oqaasipiluunneqarami oqaasipiluummik akissuteqanngilaq, anniartitaanermini sioorasaarinngilaq; pineqarninili naapertuilluartumik eqqartuussisumut isumagisassanngortippaa.“ (1 Petrusi 2:23) Jiisusitut saamatigisinnaanissarput naatsorsuutigisinnaagunanngilarput, sulili saamanerunissarput sulissutigisinnaavarput.

18. (a) Saamanermik ersersitsinitsigut suna angusarparput? (b) Pissuseq alla uagutsinnut noqqaassutigeqquneqartoq suua?

¹⁸ Qanortoq Jiisusitut uppernitsinnik illersuinissamut piareersimajuarisa, taamaaliorisalu ’saamalluta ataqqinnillutalu’. (1 Petrusi 3:15, NV) Aap, saamaneq oqaluussinermi naapitatsinnik aamma uppeqatitsinnik oqalliseqateqarnernik assortuunninnguunnaveersaartitsisinnaavoq. (2 Timotheusi 2:24, 25) Saamaneq eqqissinermik siuarsaasarpoq. Paulusip Timotheusimut allakkami aappaanni eqqissineq pissuserineqartussat noqqaassutigisariaqakkatta ilaattut eqqaagamiuk immaqa tamanna pissutaavoq. (2 Timotheusi 2:22; naleqqiuguk 1 Timotheusi 6:11.) Aap, „eqqissineq“ pissusiuvoq Biibilimi uagutsinnut noqqaassutigeqquneqartunut ilaasoq. — Tussiaat 34:15; Hebræerit 12:14.

19. Kristumiunit pissuserineqartussanik arfineq-marlunnik misissuereerlutit suup noqqaassutiginissaa aalajangiusimaviuk, aamma sooq?

¹⁹ Kristumiunit pissuserineqartussat uagutsinnut noqqaassutigeqquneqartut arfineq-marluk — naapertuilluarneq, Guutimut tunniusimaneq, upperneq, pinertusaarneq, saamaneq eqqissinerlu — sammillatsiarpavut. Qatanngutit pissuserineqartussanik erlinnangaartunik taakkuninnga pissuseqarniarlutik sapinngisaminnik iliortuarnerat ilagiinnut iluaqutaangaartarpoq. Tamanna Jehovamut ataqqinaataassaaq, aamma Taassuma nersornaatissaminut tamavitsinnik ilusilersuinissamut periarfissaqalissutigissavaa. (w08 06/15-E)

[Quppernerup ataani ilanngussat]

Eqqarsaatigilluagassat

• Naapertuilluarnermik Guutimullu tunniusimanermik noqqaassutiginninnermut suut ilaappat?

• Uppernermik pinertusaarnermillu noqqaassutiginninnissamut suut iluaqutigisinnaavavut?

• Asanninneq allanut attaveqarnitsinnut qanoq sunniuteqartarpa?

• Sooq saamaneq eqqissinerlu noqqaassutigisariaqarpavut?

[Atuaqqissaarnermi apeqqutit]

[Qupp. 19-mi assiliartaq]

Allanit malugineqarumalluni naapertuilluassutsimik nittarsaassiniarneq Jiisusip mianersoqqussutigaa

[Qupp. 20-mi assiliartaq]

Uppernermik noqqaassutiginnissinnaavugut sallusuissutinik Guutip oqaasianiittunik eqqarsaatiginninnitsigut

[Qupp. 22-mi assiliartaq]

Asannittuliornissaq saamanermillu ersersitsinissaq noqqaassutigisinnaavavut