’Guutiuna naajartortitsisoq’

„Ikkussuisoq imerterisorluunniit pingaaruteqanngillat kisiannili Guuti naajartortitsisoq.“ — 1 KORINTHIMIUT 3:7.

1. Suliaq suna eqqarsaatigalugu ’Guutimut suleqataavugut’?

„GUUTIP suleqatai.“ Paulusip tamatta immikkut pisinnaatitaaffigilersinnaasarput taama allaatigaa. (Atuaruk 1 Korinthimiut 3:5-9.) Suliaq Paulusip eqqartugaa tassaavoq ajoqersuganngortitsiortorneq. Naatsiiassanik siaruarterinermut taakkuninngalu imerterinermut assersuuppaa. Suliaq pingaarutilik tamanna iluatsissappat Jehovamit ikiorneqartariaqarpugut. Paulusip eqqaasippaatigut ’naajartortitsisoq’ tassaasoq ’Guuti’.

2. Sooq ’Guutip naajartortitsisuunera’ kiffartornitsinnut eqqortumik isiginnittaaseqarnissamut iluaqutigisarparput?

² Ilumoortoq tamanna kiffartornitsinnut maniguuttumik isiginnittaaseqarnissatsinnut iluaqutigaarput. Eqiasuilluta oqaluussisinnaallutalu ilinniartitsisinnaavugut, ineriartortoqarnerali pingaarnerpaamik Jehovamut ataqqinaataavoq. Sooq taamaappa? Arlaannarpulluunniit, qanorluunniit paasinninniarsaritigigaluaruni, qanoq ineriartortoqartarneranik paasinnilluinnarsinnaanngimmat, taamaammallu ineriartorneq aqussinnaanagu. Kunngip Salomop tamanna ima allaatigaa: „Paasisinnaanngilatit Guutip sunilluunniit suliaqartartup suliai.“ — Oqaluussisartup oqaasii 11:5.

3. Naatsiiassavinnik siaruarterinerup ajoqersuganngortitsiortornerullu suna assigiissutigaat?

³ Qanoq ineriartortoqartarneranik paasinnissinnaannginnerput pissutigalugu suliarput nukillalaarnarpa? Naamik. Nukillalaarnarnani pissanganarlunilu soqutiginarpoq. Kunngi Salomo ima oqarpoq: „Siaruartigassatit ullaakkut siaruarterniakkit unnukkuttaarlu assatit sarliaannartarnagit. Naluammi iliornerpit arlaat sorleq iluatsikkumaarnersoq imaluunniit marluk tamarmik iluatsikkumaarnersut.“ (Oqaluussisartup oqaasii 11:6) Ilumoorpoq naatsiiassaviit eqqarsaatigalugit naatsiiassaq naassanersoq imaluunniit sumi naassanersoq nalusaripput. Sunniuteqarfigisinnaanngisarpassuaqarpugut. Ajoqersuganngortitsiortorneq eqqarsaatigalugu aamma taamatupajaaq ippoq. Tamanna Jiisusip assersuusiani marlunni Markusip iivangkiiliuani kapitalimi 4-miittuni erseqqissarpaa. Assersuusiat taakkua marluk sumik ilinniarfigisinnaanerlugit misissoriartigu.

Narsaat assigiinngisitaartumik issortalik

4, 5. Naatsiiassanik siaruarterisumik assersuusiaq Markusi 4:1-9-miittoq oqaluttuarilaaruk.

⁴ Markusi 4:1-9-mi allassimasutut, Jiisusip naatsiiassanik siaruarterisoq siaruarteriartortoq oqaluttuaraa, naatsiiassallu assigiinngisitaartumik issortalimmut tupput: „Tusarnaaritsi! Naatsiiassanik siaruarterisoq siaruarteriartorpoq. Siaruartigaasa ilaat aqqusinermut tupput, timmissallu tikiullutik nungullugit pukuppaat. Ilaat qaarsortalimmut issoqarpianngitsumut tupput puttussuutilertorlutillu issortaa saattunnguummat; seqinerlu qullarluariarmat uupput, sorlaqannginnamillu toqupput. Ilaat naasupiluit kapinartullit akornannut tupput, naasupiluillu kapinartullit naajartorput ipitillugillu inerititaqartinnagit. Ilaalli issorissumut tupput inerititaqarlutillu; naajartorput alliartorlutillu, ilaallu inerititaqarput 30-riakkanik, allat 60-eriakkanik allallu 100-riakkanik.“

⁵ Biibilip nalaani naatsiiassat assammik siaruarterneqartarput. Naatsiiassanik siaruarterisup naatsiiassat atisami qullunneraniitillugilluunniit puumiitittarpai siaruartertarlugillu talini avungangaatsiaq siaartarlugit. Taamaammat assersuusiami naatsiiassanik siaruarterisup naatsiiassat sianiginagu issumut assigiinngisitaartumut siaruarterpai. Naatsiiassat assigiinngitsunik tuffeqarput.

6. Naatsiiassanik siaruarterisumik assersuusiaq Jiisusip qanoq nassuiarpaa?

 ⁶ Assersuusiaq qanoq isumaqarnersoq eqqoriartariaqanngilarput. Jiisusip nammineq nassuiarpaa, soorlu Markusi 4:14-20-mi allassimasoq: „Naatsiiassanik siaruarterisup oqaaseq siaruarterpaa. Aqqusinermiittut oqaatsip tuffii ima pisarput: Oqaaseq tusaraangassuk Saatani erniinnaq aggertarpoq oqaaserlu taakkunani siaruarterneqarsimasoq peertarlugu. Qaarsortalimmut siaruarterneqartut tassa oqaatsimik tusartut erniinnarlu nuannaarlutik ilassinnittut, imminnili sorlaqannginnamik sivikitsuinnarmik atasarput, kingornalu oqaaseq pillugu atugarliornerit qinugineqarnerilluunniit nalliukkaangata erniinnaq tunussisarput. Allaapput naasupiluit kapinartullit akornannut siaruarterneqartut; taakku tassa oqaatsimik tusartut, silarsuarmili matumani isumakuluutit pisuussutillu nakutitsinerisa sunullu tamanut pileritsannerit nalliullutik oqaaseq ipitittarpaat inerititaqanngitsoortillugu. Issorissumili siaruarterneqartut tassa oqaatsimik tusartut ilassillugulu inerititaqalerlutillu 30-riakkanik, 60-eriakkanik 100-riakkanillu.“

7. Naatsiiassaq issorlu assigiinngisitaartoq sumut assersuutaappat?

⁷ Maluginiaruk Jiisusi oqanngitsoq naatsiiassat assigiinngitsut atorneqartut. Naatsiiassalli assigiiaat issumut assigiinngisitaartumut tuttut eqqartorpai, taakkualu tamarmik immikkut assigiinngitsumik ineriartorput. Issoq eqqaaneqartoq siulleq manngerlunilu tullaarineqarsimavoq, eqqaaneqartut aappaat issortaqarpianngilaq; issoq eqqaaneqartut pingajuat naasupilunnik kapinartulinnik ulikkaarpoq, sisamaallu issorissuuvoq inerititaqarluartoq. (Lukasi 8:8) Naatsiiassaq suua? Taanna tassaavoq Guutip naalagaaffianik tusarliussaq Guutip oqaasianiittoq. (Matthæusi 13:19) Narsaat assigiinngisitaartumik issortalik sumut assersuutaava? Inunnut uummatimikkut assigiinngitsunik pissusilinnut assersuutaavoq. — Atuaruk Lukasi 8:12, 15.

8. (a) Naatsiiassanik siaruarterisoq kikkunnut assersuutaava? (b) Sooq inuit oqaluussineq assigiinngitsumik periarfigisarpaat?

⁸ Naatsiiassanimmi siaruarterisoq kinaava? Taanna Guutip suleqataanut, Guutip naalagaaffia pillugu nutaarsiassamik nuannersumik oqaluussissutiginnittunut, assersuutaavoq. Taakku Paulusip Apollosillu pisimanerattut ikkussuillutillu imerteripput. Eqiasuillutilli suligaluarlutik angusaat assigiinngitsuusarput. Sooq? Oqaatsimik tusartut uummatimikkut pissusii assigiinngimmata. Assersuusiami naatsiiassanik siaruarterisoq kingunissanut sunniuteqarsinnaanngilaq. Tamanna paasillugu tuppallersaataangaarpoq, ingammik qatanngutinut angutinut arnanullu aalajaatsunut angusakippasikkaluarlutik ukiorpassuarni — qatanngutit ilaat eqqarsaatigalugit ukiuni qulikkuutaani arlalinni — sulisimasunut. * Sooq tuppallersaataava?

9. Ilumoortoq qiimmaallannartoq suna Paulusip Jiisusillu erseqqissarpaat?

⁹ Oqaluussisartup aalajaassusia angusimasai naapertorlugit nalilerneqarneq ajorpoq. Paulusip tamanna erseqqissarpaa ima oqarami: „Tamarmik  immikkut akissarsiumaarput suliartik naapertorlugu.“ (1 Korinthimiut 3:8) Angusimasat pinnagit, suliarisimasalli naapertorlugit akissarsisoqartarpoq. Jiisusip tamannattaaq erseqqissarpaa ajoqersukkani oqaluussiartoreerlutik utermata. Taakkua nuannaaqaat anersaapiluit naalattarmatik Jiisusip aqqa atoraangamikku. Ajoqersukkanut tamanna qiimmaallaataasimassaqaaq, taamaakkaluartorli Jiisusip ima oqarfigai: „Nuannaarutigeqinasiuk anersaat naalammasi; nuannaarutigisiulli atisi qilanni allassimammata.“ (Lukasi 10:17-20) Oqaluussisartoq Guutip naalagaaffiata naatsiiassartaanik siaruarterisoq sulinermini angusaqarujussuanngikkaluartoq, imaanngilaq allanit eqiasunnerusimasoq imaluunniit aalajaannginnerusimasoq. Tusarnaartup uummatimigut pissusia angusanut aalajangiisuungaatsiartarpoq. Pingaarnerpaamillu ineriartortitsisuusoq tassaasarpoq Guuti!

Oqaatsimik tusartut akisussaaffiat

10. Oqaatsimik tusartup issorissutut ittuunissaanut suna aalajangiisuusarpa?

¹⁰ Oqaatsimimmi tusartut? Taakkua tusarliussamut periarnerat siumut aalajangerneqareersimava? Naagga. Issorissutut ittuussanerlutik namminneq aalajangertarpaat. Tassami inuup uummatimigut pissusia ajunngitsup ajortulluunniit tungaanut allanngorsinnaavoq. (Romamiut 6:17) Assersuusiamik nassuiaanermini Jiisusi oqarpoq inuit ilaasa oqaaseq ’tusaraangassuk’ Saatani „erniinnaq“ takkuttartoq siaruarterneqarsimasoq peeriartorlugu. Taamatulli pisoqartariaqanngilaq. Jaaku 4:7-imi kajumissaarneqarpugut Diaavulumik ’akiueqqulluta’ (NV), taava taanna uagutsinnit qimaassammat. Jiisusip allat oqaatsimik nuannaarlutik ilassinnikkaluartut, ilassinninnermilli kingorna „sorlaqannginnamik“ tunussisut, oqaluttuarai. Guutilli kiffai oqaaqqissaarneqarput ’sorlaqaqqullugit aalajaatsumillu tunngaveqaqqullugit’, ’paasisinnaaniassammassuk silissusia takissusialu portussusialu itissusialu, ilisimalersinnaaniassammassullu Kristusip asanninnera ilisarsinermit annerungaartoq’. — Efesosimiut 3:17-19; Kolossemiut 2:6, 7.

11. Isumakuluutinik pisuussutillu nakutitsinerinik oqaatsimik ipititsisitsinissaq qanoq ililluni pinngitsoortinneqarsinnaava?

¹¹ Oqaatsimik tusartut allat oqaluttuarineqarput ’silarsuarmi matumani isumakuluutinik pisuussutillu nakutitsinerinik’ oqaatsimik ipititsisitsisutut. (1 Timotheusi 6:9, 10) Tamanna qanoq pinngitsoortinneqarsinnaava? Apustili Paulusi ima akivoq: „Aningaaserituussutsissi qanoq inuunissarsi aalajangissanngilaa, pigisasili naammagisigit. Guutimi nammineq oqarpoq: ’Iperassanngilakkit imminiiginnassanallu.’“ — Hebræerit 13:5.

12. Sooq issorissutut eqqartorneqartut assigiinngitsunik amerlassusilinnik inerititaqarpat?

¹² Naggataatigut Jiisusi oqarpoq naatsiiassat issorissumut siaruarterneqartut ’30-riakkanik, 60-eriakkanik 100-riakkanillu inerititaqalersut’. Tassa oqaatsimik ilassinnittoqartarpoq uummatimikkut eqqortumik isiginnittaaseqartunik inerititaqalersunillu, oqaluussinermili iliuuserisinnaasaat assigiinngillat. Pissutsimmi atugaat iliuuserisinnaasaannut aalajangiisuupput. Assersuutigalugu utoqqalineq sanngiillissutaasumilluunniit nappaateqarneq oqaluusseqataasinnaanerannik killiliisinnaavoq. (Naleqqiuguk Markusi 12:43, 44.) Tassa siaruarterisut naatsiiassap qanoq periarfigineqarsinnaaneranut sunniuteqalaaginnartarlutillu sunniuteqanngilluinnartarput, Jehovalli naajartortissimagaa takugaangamikku tamanna nuannaarutigisarpaat. — Atuaruk Tussiaat 126:5, 6.

Naatsiiassanik siaruarterisoq sinittoq

13, 14. (a) Jiisusip angummik naatsiiassanik siaruarterisumik assersuusiaa Markusi 4:26-29-miittoq oqaluttuarilaaruk. (b) Naatsiiassanik siaruarterisoq kikkunnut assersuutaava, naatsiiassarlu suua?

¹³ Naatsiiassanik siaruarterisumik assersuusiaq alla Markusi 4:26-29-miippoq: „Guutip naalagaaffia soorlu tassa inuk naatsiiassanik nunamut siaruarterisimasoq. Sinittarpoq makittarlunilu, unnukkut ullukkullu [Unnukkut sinittarpoq ullunngoraangallu makittarluni, NV], karrillu [naatsiiassallu, NV] naajartorput alliartorlutillu, naluaali qanoq pisut. Nuna imminik inerititaqarpoq — siullermik kanaartamik, taava karrertaqarfimmik taavalu karrertaqarfimmi karrertanik inerissimasunik. Karrilli inerikkaangata erniinnaq killuilersarpoq katersuiffik nalliummat.“

¹⁴ Naatsiiassanik siaruarterisoq taanna kinaava? Kristumiuunerartut ilaat isumaqarput taanna tassaasoq Jiisusi Kristusi nammineq. Qanorli ililluni Jiisusi Kristusi sininnerarneqarsinnaava, aamma  qanoq oqartoqarsinnaava taassuma nalugaa naatsiiassaq qanoq naajartortarnersoq? Qularnanngivippoq Jiisusip taakkua qanoq naajartortarnerat nalunngikkaa. Naatsiiassanilli siaruarterisoq taanna, siaruarterisutut eqqaaneqareersutut, oqaluussisartunut eqiasuillutik oqaluussinermikkut Guutip naalagaaffiata naatsiiassartaanik siaruarterisunut assersuutaavoq. Naatsiiassarlu nunamut siaruarterneqartoq tassaavoq oqaaseq oqaluussissutigisaat. *

15, 16. Ilumoortoq naatsiiassap naajartorneranut inuullu anersaakkut ineriartorneranut tunngasoq suna Jiisusip naatsiiassanik siaruarterisumik assersuusiamini malugeqquaa?

¹⁵ Jiisusi oqarpoq naatsiiassanik siaruarterisoq ’unnukkut sinittartoq ullunngoraangallu makittartoq’. Matumani naatsiiassanik siaruarterisup paarsinerlunnera pineqanngilaq. Inuit amerlanersaasa ulluinnarni periaaserisartagaat oqaluttuarineqaannarpoq. Oqaatsini atorneqartuni ersersinneqarpoq pineqartoq tassaasoq piffissami sivisunerusumi ullukkut suliffiusartumi unnukkullu siniffiusartumi ineriartorneq. Jiisusip nassuiarpaa piffissami tamatumani susoqarnersoq. Ima oqarpoq: „Karrit [Naatsiiassat, NV] naajartorput alliartorlutillu.“ Taava ima nangippoq: „Naluaali qanoq pisut.“ Naatsiiassap „imminik“ naanera erseqqissarneqarpoq. *

¹⁶ Jiisusimuna matumani suna paasitikkusukkaa? Maluginiaruk Jiisusip erseqqissagaa tassaasoq naajartornera. „Nuna imminik inerititaqarpoq — siullermik kanaartamik, taava karrertaqarfimmik taavalu karrertaqarfimmi karrertanik inerissimasunik.“ (Markusi 4:28) Tassa naajartorpoq, assigiinngitsunik killiffeqartarluni. Naajartornera sukkatsisinneqarsinnaananilu pilertortinneqarsinnaanngilaq. Anersaakkut ineriartornermut tunngatillugu aamma taamaappoq. Ineriartortoqartarpoq Jehova inuup oqaatsimik ’eqqortumik isumaqarfiginnittup’ uummataani sallusuissummik ineriartortitsisillugu. — Apustilit Suliaat 13:48, NV; Hebræerit 6:1.

17. Sallusuissutip naatsiiassartaa inerititaqaraangat kikkut nuannaaqataasarpat?

¹⁷ Siaruarterisoq ’karrit inerinniariartut’ qanoq ililluni katersueqataalertarpa? Jehova ajoqersuganngorlaat uummataanni Guutip naalagaaffia pillugu sallusuissummik ineriartortitsigaangat, taakkua naggataatigut Jehovamik asanninnertik taassumunnga tunniulluinnarnissaminnut kajumississutigisarpaat, tunniulluinnarnertillu imermi kuisinnermikkut ersersittarpaat. Qatanngutit angutit inersimassummut siumukartuartut  ilagiinni annerusunik akisussaaffeqarsinnaanerujartortarput. Guutip naalagaaffiata inerititai naatsiiassanik siaruartereqqaartumiinnaanngitsoq, aammali oqaluussisartunit allanit naatsiiassamik ajoqersuganngortumik immaqa siaruartereqataasimanngitsunit, katersorneqartarput. (Atuaruk Johannesi 4:36-38.) Aap, ’siaruarterisoq katersuisorlu nuannaaqatigiittarput’.

Ullumikkut qanoq ilinniarfigisinnaagivut

18, 19. (a) Jiisusip assersuusiaanik marlunnik misissuineq illit nammineq qanoq qiimmassaatigaajuk? (b) Allaaserisami tulliuttumi suna sammissavarput?

¹⁸ Assersuusianik taakkuninnga marlunnik Markusi kapitali 4-miittunik misissuinerput sumik ilinniarfigaarput? Erseqqilluinnarpoq suliassaqartugut — tassa siaruarterisussaasugut. Utoqqatsissutissat ajornartorsiutaalersinnaasullu suliap tamatuma suliarinissaanut akornutaatinngisaannartariaqarpavut. (Oqaluussisartup oqaasii 11:4) Tamanna ilutigalugu ilisimaarisariaqarparput Guutimut suleqataaneq immikkut pisinnaatitaaffiusoq nuanningaartoq. Jehova taannaavoq anersaakkut ineriartortitsisartoq aamma uagut ilungersornitsinnik tusarliussamillu ilassinnittut ilungersornerannik pilluaqqusisartoq. Paasivarput uagut allanik anersaakkut ineriartortitsisinnaanata. Aamma kigaatsumik ineriartortoqarpat imaluunniit ineriartortoqanngivippat aliasunnatalu nikallussanngilagut. Qiimmaallannangaarami paasillugu ingerlalluarnerput nalilerneqartartoq Jehovamut aamma ’Naalagaaffimmik nutaarsiassamik nuannersumik inuiannut tamanut nalunaajaatitut’ oqaluussissutiginninnermik immikkut pisinnaatitaaffimmut taassuma uagutsinnut tunniussaanut aalajaannerput tunngavigalugu. — Matthæusi 24:14, NV.

¹⁹ Ajoqersuganngorlaat ineriartornerat Guutillu naalagaaffia pillugu suliaqarneq pillugit Jiisusip sunik allanik ilinniartippaatigut? Apeqqummut tamatumunnga akissut assersuusiani allani iivangkiiliumiittuniippoq. Allaaserisami tulliuttumi assersuusiat taakkua ilaat misissussavavut.

[Quppernerup ataani ilanngussat]

Eqqaamavigit?

• Naatsiiassanik siaruarterinerup Guutillu naalagaaffia pillugu tusarliussamik oqaluussissutiginninnerup assigiissutaasa ilaannik eqqaasaqarit

• Oqaluussisartup aalajaassusia suut naapertorlugit Jehovap nalilertarpaa?

• Naatsiiassat naajartortarnerata anersaakkullu ineriartornerup assigiissutaat suna Jiisusip erseqqissarpaa?

• „Siaruarterisoq katersuisorlu“ qanoq ilillutik ’nuannaaqatigiittarpat’?

[Atuaqqissaarnermi apeqqutit]

[Qupp. 23-mi assiliartat]

Sooq Jiisusip Guutip naalagaaffianik oqaluussissutiginnittartoq naatsiiassanik siaruarterisumut assersuuppaa?

[Qupp. 23-mi assiliartat]

Issorissutut eqqartorneqartut pissutsit atukkatik naapertorlugit uummatikkut iluunngarlutik Guutip naalagaaffianik oqaluussissutiginneqataapput

[Qupp. 26-mi assiliartat]

Guuti taannaavoq naajartortitsisoq