Illumit illumut oqaluussinermi unamminiarnartut

„Guutitsinni nakimaassuseqalersitaavugut [Guutitta ikiuineratigut sapiillivugut, NV] ilungersungaarluta iivangkiiliua ilissinnut tusarliussinnaanngorlugu.“ — 1 THESSALONIKAMIUT 2:2.

1. Jeremia sunik unamminiagaqarpa, qanorlu ililluni naammagalugit atorpai?

JEREMIA inuuvoq uagutsitut misigissusilik. Jehovap ’inuiannut pruffiitinngortimmani’ Jeremia ima akerliliivoq: „Ila Guuti, [Jehova], inuusuttuuvunga; oqalunneq naluvunga!“ Taamaakkaluartorli Jehova tatigalugu suliassiissutigineqartumut akuersivoq. (Jeremia 1:4-10) Ukiut 40-t sinnerlugit soqutigisaqannginneq, itigartitsinerit, mitaatigineqarneq allaallu nakuuserfigineqarneq akiorpai. (Jeremia 20:1, 2) Ilaannikkut uniinnarusuinnartaraluarpoq. Tusarliussarli inuit amerlanersaannit nuannarineqanngitsoq inuiaqatigiinnut oqaluussissutigiuarpaa, taakkualu amerlanersaat aamma tusarnaarusunngillat. Jeremia Guutimit nakussatsinneqarluni nammineerluni suliarisinnaasimanngisaannagaraluaminik naammassisaqarpoq. — Atuaruk Jeremia 20:7-9.

2, 3. Ullumikkut unamminiarnartut Guutip kiffaasa unamminiagaat unamminiartunut Jeremiap unamminiagaanut qanoq eqqaanarpat?

² Ullumikkut Guutip kiffaasa ilarpassuisa Jeremiap misigissusii paasilluarsinnaavaat. Ilavut ikinngitsut ilaanni ima eqqarsarsimapput: ’Illumit illumut oqaluussisinnaanngisaannassaanga!’ Paasigatsiguli nutaarsiassamik nuannersumik oqaluussissutiginninnissarput Guutip piumasarigaa qununerput ajugaaffigaarput oqaluussisalerlutalu.  Pissutsit atugarisatik pissutigalugit ilarpassuatta immaqa piffissap ilaani oqaluussiuarnissartik sapernartissimavaat. Miserratigineqarsinnaanngilaq oqaluussisalernissap naggatissarlu tikivillugu oqaluussiuarnissap unamminiarnartuunerat. — Matthæusi 24:13.

³ Illit immaqa sivisujaamik Jehovap Nalunaajaasuinit Biibilimik atuaqqissaaqatigineqarsimavutit ilagiillu ataatsimiinnerinut najuuttarlutit, illumilli illumut oqaluussisalernissannut nangaallutit. Immaqaluunniit Jehovamut nalunaajaasuuvutit kuisimasoq matumiit matumut oqaluusseqataanissamik sapernartitsisoq, pisinnaagaluarlutit. Eqqarsaatigiuk inuit assigiinngilluinnartunik tunuliaqutallit illumit illumut oqaluussinermikkut unamminiarnartut naammagalugit atornissaat ilikkarsimagaat. Aamma illit Jehovap ikiuineratigut naammagalugit atorsinnaavatit.

Qanoq ililluta sapiissuseqalersinnaasugut

4. Sunaana apustilip Paulusip nutaarsiassamik nuannersumik oqaluussissutiginninnissamut sapiissuseqalissutigigaa?

⁴ Qularnanngitsumik nalunngilat inuit nakuussusiatigut ilisimassusiatigulluunniit pinnani Guutilli anersaavatigut silarsuaq tamakkerlugu oqaluussisoqartartoq. (Zakaria 4:6) Kristumiut tamarmik immikkut kiffartornerannut tunngatillugu aamma taamaappoq. (2 Korinthimiut 4:7) Apustili Paulusi eqqarsaatigeriaruk. Taanna ilaanni nammineq suleqatimilu akerlilersuisunit naalliutsinneqarnertik eqqarsaatigalugu ima allappoq: „Filippimi erloqisinneqaqqammeraluarluta naalliutsitaaqqammeraluarlutalu Guutitsinni nakimaassuseqalersitaavugut [Guutitta ikiuineratigut sapiillivugut, NV] ilungersungaarluta iivangkiiliua ilissinnut tusarliussinnaanngorlugu.“ (1 Thessalonikamiut 2:2; Apustilit Suliaat 16:22-24) Oqaluussisartup aallussilluartup Paulusip ilaannikkut oqaluussinissaminik sapernartitsisarsimanera immaqa takorlooruminaatsipparput. Oqaluussisartulli allat pisarnerattut Paulusi Jehovamik tatiginnittariaqarpoq nutaarsiassamik nuannersumik oqaluussissutiginninnissamut sapiissuseqarumalluni. (Atuaruk Efesosimiut 6:18-20.) Uagut Paulusi qanoq ililluta ilaarsinnaavarput?

5. Qanoq ililluta oqaluussinissamut sapiissuseqalersinnaavugut?

⁵ Sapiissuseqalersinnaavugut ilaatigut qinunitsigut. Pioneri ima oqarsimavoq: „Inunnik qularnanga oqaloqatiginnissinnaanissara qinnutigisarpara, inuit uummataannik killiisinnaanissara qinnutigisarpara, aamma oqaluussinermik nuannaarutiginnissinnaanissara qinnutigisarpara. Oqaluussinermi Jehovap suliaraa, uagut nammineq suliarinagu, taamaammat taassumannga ikiorneqarnata suliaqarsinnaanngilagut.“ (1 Thessalonikamiut 5:17) Tamatta oqaluussinissamut sapiissuseqalerumalluta Guutip anersaavata illernartup ikiuinissaa qinnutigiuartariaqarparput. — Lukasi 11:9-13.

6, 7. (a) Ezekieli sumik takorruugaqarpa, tamannalu qanoq paasisariaqarpa? (b) Ullumikkut Guutip kiffaasa Ezekielip takorruugaa sumik ilinniarfigisinnaavaat?

⁶ Nakimaalluta oqalunnissamut iluaqutigisinnaasarput alla Ezekielip allagaani paasinarsisinneqarpoq. Takorruukkami Jehovap Ezekieli mappersakkamik tunivaa saavani tunuanilu kappialanermik, anersaarulunnermik naalliunnermillu imalimmik allanneqarsimasumik, taannalu nereqquaa ima oqarluni: „Illit inuk, mappersagaq una ilinnut tunniussara iiuk naannullu immiullugu!“ Takorruugaq taanna qanoq paasisariaqarpa? Tassa Ezekielip tusarliussaq saqqummiussassani pigiliulluinnarsimagaa. Tusarliussaq timaanut ilaalissaarlusooq, misigissusiinut ilorlerpaanut sunniuteqarluni. Pruffiiti ima nangippoq: „Taava nerivara, qaninnilu tungusunnitsuutitut mamartigaaq.“ Kikkut tamarmik takkuanni Guutip tusarliussaanik oqaluussissutiginninneq Ezekielimut nuannaarutaavoq, tungusunnitsuutitornertut illuni. Jehovamut sinniisuunini Guutillu suliassiissutigisaanik suliaqarnini immikkut pisinnaatitaaffittut isigaa, naak taamaalioruni tusarliussamik kimittuumik inuppassuit tusarusunngisaannik saqqummiussisussaagaluarluni. — Atuaruk Ezekieli 2:8–3:4, 7-9.

⁷ Ullumikkut Guutip kiffaasa takorruugaq taanna pingaarutilimmik ilinniarfigisinnaavaat. Uaguttaaq tusarliussaq kimittooq inunnut suliatsinnik qujamasuutiginnittuaannanngitsunut saqqummiuttartussaavarput. Kristumiutut kiffartorneq immikkut pisinnaatitaaffittut Guutimeersutut isigiuassagutsigu anersaakkut neriuartariaqarpugut. Qarsupittumik qaqutiguinnarluunniit atuaqqissaartarneq Guutip oqaasianik pigiliussilluinnarsinnaanissatsinnut naammanngilaq. Biibilimik atuartarninnik namminerlu atuaqqissaartarninnik pitsanngorsaasinnaavit imaluunniit aalajangersimanerulersitsisinnaavit? Atuakkavit eqqarsaatigikulanerunissaannut piffissaqarsinnaavit? — Tussiaat 1:2, 3.

 Biibilimut tunngasut pillugit oqaloqateqalerniartarit

8. Periaaseq suna oqaluussisartut ilaasa illumit illumut oqaluussinermi Biibilimut tunngasut pillugit oqaloqateqalerniarnissaminnut iluaqutigisimavaat?

⁸ Oqaluussisartorpassuit pulaakkamik oqaloqateqarniaqqaarneq illumit illumut oqaluussinerup sapernarnerpaartaatut isigaat. Ilumullumi sumiiffiit ilaanni oqaloqateqalerniartarneq unamminiarnartuusarpoq. Oqaluussisartut ilaasa oqaasialunnguit eqqarsaatigilluakkat atorlugit matut silataanni oqaloqateqarniarlutik aallarniinissartik tamatumalu kingorna naqitaaqqamik pulaakkamut tunniussinissartik iluarinerusarpaat, soorlumi tamanna ungalusami siunnersuutigineqartoq. Naqitaaqqap qulequtaa saqqaataluunniit assiliartaa pulaakkap immaqa soqutiginnilissutigaa, taava takkunnitsinnut suna siunertaanersoq eqqaallatsiarsinnaavarput aperalutalu. Aamma pulaagaq naqitaaqqanik pingasunik sisamanilluunniit assigiinngitsunik takutitsivigineqarsinnaavoq soqutigisaanillu toqqaaqqullugu. Soorunami anguniagarput tassaaginnanngilaq kasuttorfigisatsinni tamani naqitaaqqanik tunniussinissaq imaluunniit takutitsinissaq, anguniagarpulli aamma tassaavoq Biibilimut tunngasut pillugit oqaloqateqalerniarnissaq Biibilimik atuaqqissaaqateqartalernermik kinguneqartumik.

9. Piareersarluarsimanissaq sooq taama pingaaruteqartigaa?

⁹ Qanorluunniit periaaseqaraluaruit piareersarluarneq illumit illumut angalaaraangavit annilaangannginnerunissannut angorniornerunissannullu iluaqutigissavat. Pioneri ima oqarpoq: „Piareersarluarsimagaangama nuannisarnerusarpunga.  Saqqummiussassara saqqummiukkusunnerulertarpara.“ Pioneri alla ima oqarpoq: „Atuakkat atuagassiallu neqeroorutiginiakkama imarisaat ilisimalluaraangakkit, taakkua atornissaannut qilanaartarpunga.“ Oqaasissanik eqqarsaatiginninneq iluaqutaasarpoq, amerlasuulli paasisimavaat saqqummiussassamik nipituumik sungiusarneq iluaqutiginerusarlugu. Taamaaliortarnertik Jehovamut pitsaanerpaamik tunisinissaminnut iluaqutigisarpaat. — Kolossemiut 3:23; 2 Timotheusi 2:15.

10. Katersuunnerit qanoq ilillutik atoriaannaallutillu iluaqutaasinnaappat?

¹⁰ Katersuunnerni sammineqartut atoriaannaasut sunniuteqarluarnerusumik oqaluussinissamut oqaluussinermillu nuannaarutiginninnerunissamut iluaqutigisarpavut. Ullormut allassimaffik oqaluussinermut toqqaannartumik attuumassuteqarpat atuarneqarsinnaavoq sivikitsumillu oqaloqatigiissutigalugu. Qatanngutilli katersuutsitsisup saqqummiussassap naatsup angalaarfigisartakkamut naleqquttup oqaloqatigiissutiginissaa saqqummiunnissaaluunniit imaluunniit ulloq taanna oqaluussinermi atorluarsinnaasunik allanik paasissutissiinissani piffissaqarfigilluartariaqarpaa. Tamanna najuuttut sunniuteqarluartumik oqaluussinissaminnut iluaqutigissavaat. Utoqqaanertat taamatullu katersuutsitsisartut allat piareersarluarsimappata, tamakkua katersuunnermut piffissarititaasup iluani angumerineqarsinnaapput. — Romamiut 12:8.

Tusarnaarnissap pingaaruteqassusia

11, 12. Ilumoorluni soqutiginnilluni tusarnaarneq nutaarsiassamik nuannersumik inuit uummataannik killiinissamut qanoq iluaqutigisinnaavarput? Assersuuteqarit.

¹¹ Piareersarluarnerinnaanngitsoq aammattaarli ilumoorluni inuttut soqutiginninneq oqaluussinermi Biibilimut tunngasut pillugit oqaloqateqalerniarnissatsinnut inuillu uummataannik killiiniarnissamut iluaqutigissavarput. Inuttut soqutiginninnerput ersersissinnaavarput ilaatigut tusarnaarluartarnitsigut. Nakkutilliisoq angalasartoq ima oqarpoq: ’Erinitsajuissuseqarnerup tusarnaarusussuseqarnermillu ersersitsinerup qanoq ornigineqartartiginerat tupaallannarpoq, aamma taakkua inuttut soqutiginninnermut ersiutaapput nuannersut.’ Ilumoorluta soqutiginnilluta tusarnaarnerput pissutigerpiarlugu immaqa pulaagarput ammassaaq, soorlu misigisalikkersaarummi tulliuttumi tamanna ersertoq.

¹² Allakkani kikkunnit tamanit atuaqqusaasuni aviisimut Le Progrès-imut illoqarfimmi Saint-Étiennemi saqqummersartumut ilanngunneqartuni arnaq oqaluttuarpoq panimminik pingasunik qaammatilimmik toqusoornermi kinguninngua inuit marluk matuminut kasuttorsimasut. Ima allappoq: „Ingerlaannaq Jehovamut nalunaajaasuusut ilisaraakka. Inussiarnersumik itigartinnissaannut piareersimavunga, taavali maluginiarpara atuagassiaaraq uannut tunniunniagaat Guutip naalliunnartoqarneranik sooq akuerinninneranut tunngasuusoq. Aalajangerpunga iseqquniarlugit, qularutiginnginnakkumi tunngavilersuutitik uppernarsarsinnaanngikkaat. . . . Nalunaajaasut nalunaaquttap-akunnera ataaseq sinnilaarlugu isersimapput. Misiginneqataangaarlutik tusarnaarpaannga, iluaallangaaramalu anilermata aggeqqinnissaat akueraara.“ (Romamiut 12:15) Kingusinnerusukkut arnaq taanna Biibilimik atuaqqissaaqatigineqarnissaminut akuersivoq. Maluginiaruk pulaarneqaqqaarnerminit eqqaamasaa tassaanngitsoq nalunaajaasut taakkua oqaasii, tassaasorli tusarnaarsimanerat.

13. Nutaarsiassamik nuannersumik saqqummiusseriaaserput naapitatsinnut qanoq naleqqussarsinnaavarput?

¹³ Ilumoorluta soqutiginnilluta tusarnaaraangatta ilumoortumik inuit periarfissittarpavut sooq Guutip naalagaaffianik pisariaqartitsinerminnik uagutsinnut oqaluttuarnissaannut. Taamaalilluta taakkua oqaluussiffiginissaannut periarfissarissaarnerulertarpugut. Qularnanngitsumik maluginiarsimassavat oqaluussisartut angusaqarluartartut tusarnaarluartarnerat. (Ussatit 20:5) Oqaluussinermi naapitaminnik ilumoorlutik soqutiginnittarput. Taakkua atii najugaallu maluginiaannarnagit aammali soqutigisaat pisariaqartitaallu maluginiartarpaat. Apeqquteqartoqaraangat paaserusutaat misissortarpaat uteqqipallattarlutillu paasisimasaminnik oqaluttuunniarlugit. Paulusip pisimaneratut tusarliussamik saqqummiusseriaasertik naapitaminnut naleqqussartarpaat. (Atuaruk 1 Korinthimiut 9:19-23.) Taamatut ilumoorluni soqutiginninneq inuit nutaarsiassamut nuannersumut kajungilissutigisarpaat, aamma ’Guutip nallittuingaarneranik’ ersersitsisarpoq. — Lukasi 1:78.

Isumalluartuujuarit

14. Kiffartoraangatta Jehovap pissusiinik qanoq ililluta ersersitsisinnaavugut?

¹⁴ Jehovap ersersissimavaa tamatta immikkut pingaartilluta,  piumasatsitut iliorsinnaatilluta. Guutiugaluarluni ajugaqanngitsoq kimilluunniit pinngitsaaliilluni imminut kiffartortitsineq ajorpoq. Asanninnerli tunngavigalugu kajumissisittarpaatigut, pilersitaminik piumaqalutik ilassinnittut pilluaqqusarlugit. (Romamiut 2:4) Taassumunnga kiffaagatta nalunaajaanivut tamaasa nutaarsiassap nuannersup Guutitsinnut nallittuisumut ataqqinaataasumik saqqummiunnissaanut piareersimasariaqarpugut. (2 Korinthimiut 5:20, 21; 6:3-6) Taamaaliorsinnaajumalluta angalaarfigisartakkatsinni najugaqartut pillugit isumalluartuujuartariaqarpugut. Unamminiarnartup tamatuma iliuuseqarfiginissaanut suna iluaqutigisinnaavarput?

15. (a) Inuit tusarliussaq tusaajumanngikkaangassuk Jiisusip apustilini qanoq iliortaqquai? (b) Qinngaqqunnanngitsut naniniarlugit aallussilluarnissamut suna iluaqutigisinnaavarput?

¹⁵ Jiisusip ajoqersukkani ilinniartippai tusarliussamik tusaajumanngitsoqaraangat tamanna isumakuluutigivallaassanngikkaat qinngaqqunnanngitsunilli nanisinissartik aallulluassagaat. (Atuaruk Matthæusi 10:11-15.) Taamaaliornissamut iluaqutigisinnaasarput tassaavoq imminut inorsinnani anguniagassinneq. Qatanngut angut imminut kuultisiortumut assersuuttarpoq. Uku oqaasinnaarai: „Ullumi kuultimik nassaarnissara qilanaaraara.“ Qatanngutip angutip allap anguniagaraa „sapaatip-akunneri tamaasa inummik inussiarnersumik ataatsimik naapitsisarnissani ullualuillu qaangiukkaangata uteqqilluni soqutiginninnerulersitsisarnissani“. Oqaluussisartut ilaat kasuttorfigisaminni tamani minnerpaamik allassimaffik ataaseq atuarniartarpaat. Illit piviusorsiortumik sumik imminut anguniagassissinnaavit?

16. Oqaluussiuarnissamut sunik pissutissaqarpugut?

¹⁶ Inuit angalaarfigisartakkatsinniittut qanoq periartarnerat illumit illumut oqaluussinerup pingaaruteqassusianut aalajangiisuunngillat. Ilumoorpoq oqaluussineq eqqortuliorusuttut annaanneqarsinnaanissaannut immikkut pingaaruteqartoq, pingaarutilinnulli allanut aamma iluaqutaavoq. Kristumiutut oqaluussinerput Jehovamik asanninnitsinnik ersersitsinissamut periarfissaqalissutigaarput. (1 Johannesi 5:3) Allat toqunerannut pisuutitaannginnissamut iluaqutigaarput. (Apustilit Suliaat 20:26, 27) ’Guutip eqqartuussinissaata nalliunnera’ pillugu guutiitsunik mianersoqqusineruvoq. (Saqqummersitat 14:6, 7) Pingaarnerpaamillu nutaarsiassamik nuannersumik oqaluussissutiginninnikkut Jehovap aqqa maanna nunarsuaq tamakkerlugu unnersiutigineqarpoq. (Tussiaat 113:3) Taamaattumik inuit tusarnaarpata tusarnaanngikkaluarpataluunniit Guutip naalagaaffia pillugu tusarliussaq nalunaajaatigiuartariaqarparput. Aamma nutaarsiassaq nuannersoq oqaluussissutiginiarlugu iliuuserisavut tamarmik Jehovap uummataanik nuannaartitsisarput. — Romamiut 10:13-15.

17. Qanittukkut inuit suna nassuerutigisariaqassavaat?

¹⁷ Ullumikkut inuppassuit oqaluussinitsinnik soqutiginninngillat, qanittukkulli oqaluussinerput allatut isigilissavaat. (Matthæusi 24:37-39) Jehovap Ezekieli neriorsoqqissaarpaa eqqartuussutit oqaluussissutigisai piviusunngorpata Israelikkut pikitsitsiumatuut ’paasissagaat akunnerminni pruffiitimik saqqummersoqartoq [pruffiitimik akunnerminniittoqaraluarsimasoq, NV]’. (Ezekieli 2:5) Guutip pissutsit aaqqissuussaanerannut maanna atuuttumut eqqartuussutini naammassippagit inuit taamatulli nassuerutigisariaqassavaat tusarliussap Jehovap Nalunaajaasuisa kikkut tamarmik takkuanni illumillu illumut oqaluussissutigisaata Guutimeersuunera ilumoortutuamit Jehovamit, aamma Jehovap Nalunaajaasuisa ilumut taassumannga oqariartortitaanerat. Ulluni pingaaruteqaqisuni makkunani Jehovap aqqanik taaguuteqarneq taassumalu tusarliussaanik oqaluussissutiginninneq immikkut pisinnaatitaaffiuvoq angingaartoq! Illumit illumut oqaluussinermi unamminiarnartut taassumannga nakussatsinneqarluta iliuuseqarfigiuartigit. (w08 07/15-E)

Qanoq akissavit?

• Qanoq ililluta oqaluussinissamut sapiissuseqalersinnaavugut?

• Illumit illumut oqaluussinermi Biibilimut tunngasut pillugit oqaloqateqalernissamut suut iluaqutigisinnaavavut?

• Qanoq ililluta ersersissinnaavarput allat ilumoorluta soqutigigivut?

• Inuit angalaarfigisartakkatsinniittut pillugit isumalluartuujuarnissamut suut iluaqutigisinnaavavut?

[Atuaqqissaarnermi apeqqutit]

[Qupp. 19-mi ungalusaq/​assiliartaq]

Biibilimut tunngasut pillugit oqaloqateqarniarluni aallarneeriaatsit

Aallarniut:

▪ Pulaakkat ilassereerukku naqitaaqqamik tunisinnaavat imalu oqarlutit: „Ullumi takkuppunga pingaarutilik manna pillugu qiimmaallannartumik oqaluttuukkusullutit“

▪ Imaluunniit naqitaaqqamik tunisinnaavat imalu oqarlutit: „Ullumikkut alakkalaarpakkit [naqitaaqqami sammineqartoq] qanoq isumaqarfiginerit paaserusullugu“

Pulaakkavit naqitaaraq tiguppagu:

▪ Nipangersimallatsiaannariarlutit aperisinnaavat naqitaaqqap qulequtaa qanoq isumaqarfigineraa.

▪ Akissutaa tusarnaaqqissaaruk; qanoq isumaqarnera paasiniarsariuk. Akissutaa inussiarnerlutit oqaaseqarfigiuk.

Oqaloqatigiinneq ingerlatiinnarneqarsinnaappat:

▪ Allassimaffik ataaseq allassimaffiilluunniit arlallit atuarlugillu oqaloqatigiissutigisigik, saqqummiusseriaatsit pulaakkavit soqutigisaanut pisariaqartitaanullu naleqqussarlugu.

▪ Pulaakkat soqutiginnippat atuagassaanik neqeroorfigisinnaavat ajornanngippallu takutillugu qanoq ililluni Biibilimik atuaqqissaaqatigiittoqartarnersoq. Pulaaqqinnissannik isumaqatigiuk.