Naluat sorleq iluatsikkumaarnersoq!

„Siaruartigassatit ullaakkut siaruarterniakkit unnukkuttaarlu assatit sarliaannartarnagit. Naluammi iliornerpit arlaat sorleq iluatsikkumaarnersoq.“ — OQALUUSSISARTUP OQAASII 11:6.

1. Naasup naajartornera malinnaaffigalugu qanoq misiginarpa, kinalu naajartortitsisuua?

NAASORISSAASOQ erinitsajuitsuusariaqarpoq. (Jaaku 5:7) Naatsiiassat siaruartereerunigit puttunnissaat naanissaallu utaqqisariaqarpaa. Pitsaasunik avatangiiseqarpata naaqqaataat takuneqarsinnaaleriartuaassapput issumit nuillutik. Kanaartanngortarput karrertalinnik karrertaqarfinittartut. Naasorissaasup narsaataa naggataatigut katersuiffigeriaannanngortarpoq. Naajartornermik tupinnartuliaq malinnaaffigalugu tupinnaqaaq, taamatullu naajartortitsisumik eqqarsaatiginninneq assut maniguutilernarpoq. Naatsiiassat paarilluarsinnaavavut imertereqataasinnaallutalu. Guutili kisimi tamatuminnga naajartortitsisinnaavoq. — Naleqqiuguk 1 Korinthimiut 3:6.

2. Assersuusiani allaaserisap matuma siuliani sammisatsinni anersaakkut ineriartorneq eqqarsaatigalugu Jiisusip suna erseqqissarpaa?

² Allaaserisap matuma siuliani eqqaaneqartutut, Jiisusip Guutip naalagaaffiata tusarliussaanik oqaluussissutiginninneq naasorissaasup narsaatimini naatsiiassanik siaruarterineranut assersuuppaa. Narsaammik assigiinngisitaartumik issortalimmik assersuusiami Jiisusip erseqqissarpaa naatsiiassanik ajunngitsunik siaruarterisoqaraluartoq, inuup uummatimigut pissusia naatsiiassap naajartornissaanut inerinnissaanullu aalajangiisuusartoq. (Markusi 4:3-9) Naatsiiassanik siaruarterisoq sinittoq pillugu assersuusiami Jiisusip malugeqquaa naasorissaasup paasilluanngikkaa qanoq naajartortoqartarnera. Paasilluinnanngilaa Guutip pissaaneratigut, inuit ilungersorneratiguunngitsoq, naajartortoqartarmat. (Markusi 4:26-29) Jiisusip assersuusiai suli allat pingasut — tassa siinuppip naatsiiassartaanik, seernarsaammik qassutinillu assersuusiai — misissoriartigit. *

Siinuppip naatsiiassartaanik assersuusiaq

3, 4. Guutip naalagaaffianik oqaluussissutiginninnermut tunngasoq suna siinuppip naatsiiassartaanik assersuusiami erseqqissarneqarpa?

³ Siinuppip naatsiiassartaanik assersuusiami aamma Markusip iivangkiiliuani kapitali 4-miittumi marluk uku ersersinneqarput: siullermik, inuit Guutip naalagaaffianik tusarliussamik eqqumaffiginnittut amerleriarujussuarsimanerat; aappassaanik, tusarliussamik ilassinnittut illersugaanerat. Jiisusi ima oqarpoq: „Guutip naalagaaffia sumik assissarsisinnaavarput assersuulluunniit suna atorlugu oqaatigissavarput? Soorlu tassa siinuppip naatsiiassartaa: Nunamut ikkunneqarnermini nunarsuarmi naatsiiassanit tamanit minnerusarpoq; siaruarterneqareeraangamili allisarpoq naatitanit allanit tamanit annerulersarluni avalequteqalerluni angisuunik alannguani qilaap timmiai ulluliorsinnaalersillugit.“ — Markusi 4:30-32.

⁴ Matumani eqqartorneqarpoq ’Guutip naalagaaffianut’ tunngatillugu ineriartorneq, Guutip naalagaaffianik tusarliussamik siaruarterinermi ilagiillu kristumiut ukiumi 33-mi piinsip  ulluaniilli amerliartorneranni takuneqarsinnaasoq. Siinuppip naatsiiassartaa naatsiiassaavoq mikisuaraq arlaannut mikisuaraarannguamut assersuutitut atorneqarsinnaasoq. (Naleqqiuguk Lukasi 17:6.) Naggataatigulli siinuppip naasortaa 3-5 meterisut portutigilersinnaavoq qajannaatsunillu avalequteqalersinnaalluni, orpittut ililluni. — Matthæusi 13:31, 32.

5. Ukiuni hundredelinni siullerni ilagiit kristumiut amerliartorneq suna misigisimavaat?

⁵ Ilagiit kristumiut amerliartornerat ukiumi 33-mi aallartippoq ajoqersukkat 120-t missaanniittut anersaamik illernartumik taninneqarmata. Piffissap sivisuallaanngitsup ingerlanerani ilagiit ajoqersukkanik ikittunnguanik ilaasortallit tusindilinnik ilaasortaqalerput. (Atuaruk Apustilit Suliaat 2:41; 4:4; 5:28; 6:7; 12:24; 19:20.) Ukiut qulikkuutaat pingasut ingerlaneranni katersuisut ima amerliartupallatsigisimapput apustili Paulusi ilagiinnut Kolossemiittunut oqarsinnaasimalluni nutaarsiassaq nuannersoq „qilaap ataani pinngortitanut tamanut“ oqaluussissutigineqareersimasoq. (Kolossemiut 1:23) Ilumummi amerliartornerat maluginiarnarmat!

6, 7. (a) 1914-imiilli amerliartortoqarsimaneranut suut takussutissaappat? (b) Aamma qanoq amerliartortoqarumaarpa?

⁶ Guutip naalagaaffia 1914-imi qilammi pilersinneqarmalli ’orpiup’ siinuppissallip avalequtai ilimagisamit atittornipilussuupput. Guutip innuttaasa Esajap siulittuutaata matuma eqquunnera misigisimavaat: „Minnersaat tuusintilinngussaaq nukarlersaallu tassaalissalluni inuiaat pissaasut.“ (Esaja 60:22) Tanitat ikittunnguit 1900-kkut aallartinneranni Guutip naalagaaffianik oqaluussissutiginneqataasut taamanikkut nalulluinnarpaat 2008-mi nunani 230-nit amerlanerusuni 7 millionit missaanniittunik Jehovamut nalunaajaasoqarumaarnera. Amerliartorneq tupinnartoq tamanna Jiisusip assersuusiaani siinuppip naatsiiassartaata naajartorneranut assersuunneqarluarsinnaavoq.

⁷ Amerliartornerli tamaanga killeqarpa? Naagga. Naggataatigut nunarsuarmiittut tamarmik Guutip naalagaaffiani innuttaassapput. Akerlilersuisut tamarmik peerneqarsimassapput. Tamanna pissanngilaq inuit ilungersornerisa kingunerisaannik, pissaarli Naalakkap kisimi oqartussaasup Jehovap nunarsuarmi pissutsinut akuliunnerata kingunerisaanik. (Atuaruk Danieli 2:34, 35.) Taamanikkussamut Esajap siulittuutaata allap matuma tamakkiisumik eqquunnera misigissavarput: „[Jehovamik] ilisimasaqarnerup nuna tamakkerumaarmagu soorlu ermit matoqqagaat immap naqqa.“ — Esaja 11:9.

8. (a) Jiisusip siinuppip naatsiiassartaanik assersuusiaani timmissat kikkuuppat? (b) Maannangaaq sumut illersorneqarpugut?

⁸ Jiisusi oqarpoq qilaap timmiai orpiup, tassa Guutip naalagaaffiata, alannguani ulluliorumaartut. Timmissat taakkua Guutip naalagaaffianut akeraasunut naatsiiassanik pukunniarsarisunut assersuutaanngillat, soorlu timmissat assigiinngisitaartumik issortalimmut naatsiiassanik siaruarterisumik assersuusiami naatsiiassanik pukuttut. (Markusi 4:4) Assersuusiami matumani timmissat tassaapput eqqortuliorusuttut ilagiinnit kristumiunit illersorneqarnissaminnik ujartuisut. Taakkua  maannangaaq ileqqunut anersaakkut mingunnartunut iliuutsinullu minguttuunut silarsuarmi ajortumi matumaniittunut illersugaapput. (Naleqqiuguk Esaja 32:1, 2.) Jehovap aamma naalagaaffik Missiarsikkoortoq orpimmut cederimut assersuuppaa ima siulittuilluni: „Israelip qaqqarsuanut ikkutissavara, avalequteqalissaarlu inerititaqalerlunilu cederinngorluni alutornaqisoq. Tassani timmissat tamalaat iniliussapput meqqutaasanilu alanngisimassallutik.“ — Ezekieli 17:23.

Seernarsaammik assersuusiaq

9, 10. (a) Seernarsaammik assersuusiami Jiisusip suna erseqqissarpaa? (b) Biibilimi seernarsaat sumut assersuutaagajuppa, seernarsaammillu assersuusiamut tunngatillugu apeqqut suna misissussavarput?

⁹ Ineriartorneq inuit isaannit takussaajuannaanngilaq. Tamanna Jiisusip assersuusiamini tulliuttumi erseqqissarpaa. Ima oqarpoq: „Qilaap Naalagaaffiata assigaa seernarsaat arnap qajuusanut uuttuutinut pingasunut akuliussaa naqittagaq tamaat seernarsisillugu.“ (Matthæusi 13:33) Seernarsaat sumut assersuutaava, tamannalu Guutip naalagaaffianut tunngatillugu ineriartornermut qanoq attuumassuteqarpa?

¹⁰ Biibilimi seernarsaat ajortimut assersuutaagajuppoq. Apustilip Paulusip oqaaseq taanna taamatut isumaqartillugu atorpaa angutip ajortuliortarnerata ilagiinnut Korinthimiittunut ajortumik sunniuteqarnera eqqartoramiuk. (1 Korinthimiut 5:6-8) Jiisusip maanna seernarsaat ajortumut assersuutitut atorpaa?

11. Itsaq Israelimi seernarsaat qanoq atorneqartarpa?

¹¹ Apeqqutip tamatuma akinnginnerani pingaarutillit pingasut nalunngittariaqarpavut. Siullermik, Jehovap poorskisiornerup nalaani seernarsaammik atuisoqarnissaa akuerinngikkaluaraa, allanut atatillugu pilliutit seernarsaateqartarnissaat akueraa. Assersuutigalugu seernarsaat qujaniutitut pilliummut nereqatigiissutissamut tunngatillugu atorneqartarpoq. Pilliut taanna Jehovap pilluaqqussuterpassui pillugit taassumunnga qujaniutitut nammineq kajumissutsimit pilliutigineqartarpoq, nereqatigiinnerlu najuuttunut nuannaarutaasaqaaq. — 3 Mosesi 7:11-15.

12. Matumani Biibilimi assersuutinik atueriaaseq pillugu suna paasivarput?

¹² Aappassaanik, assersuutigineqartoq allamut tunngatillugu ajortumik isumaqarsinnaagaluartoq, allamut tunngatillugu ajunngitsumik isumaqarsinnaavoq. Assersuutigalugu Saatani 1 Petrusi 5:8-mi løvimut assersuunneqarpoq, taassuma pissusianut ulorianarlunilu ajorluinnartumut assersuutitut. Saqqummersitanili 5:5-imi Jiisusi løvimut — ’løvimut Judamit naggueqartumut’ — assersuunneqarpoq. Matumani løveq sapiitsumik naapertuilluartuliornermut assersuutaavoq.

13. Jiisusip seernarsaammik assersuusiaa inuup anersaakkut ineriartortarnera pillugu sumik ersersitsiva?

¹³ Pingajussaanik, Jiisusi seernarsaammik assersuusiami oqanngilaq seernarsaat naqittakkamik aseruisoq, naqittagaq atorneqarsinnaajunnaarsillugu. Iffioriaatsimit nalinginnaasumit assersuuteqaannarpoq. Arnap seernarsaat qajuusanut akuliuppaa, taamaaliortussaagamimi, kinguneqarluarporlu. Seernarsaat qajuusanut akuliunneqarpoq, naqittakkallu seernarsarneqarnera arnamut takussaanngitsumi pivoq. Matumani eqqaasinneqarpugut angummik ullukkut naatsiiassanik siaruarterisartumik unnukkullu sinittartumik. Soorlu Jiisusi nangilluni oqartoq: „Karrit [Naatsiiassat, NV] naajartorput alliartorlutillu, naluaali qanoq pisut.“ (Markusi 4:27) Taamaalilluni Jiisusip paasiuminarsarpaa naggataatigut ajoqersuganngortup anersaakkut ineriartornerata takussaanngitsumik pisarnera. Aallaqqaammut taassuma ineriartornera takuneq ajorparput, naggataatigulli erseqqissilluinnartarpoq.

14. Seernarsaatip naqittakkamut tamarmut sunniuteqarnera sumut assersuutaava?

 ¹⁴ Ineriartorneq inuit isaannit takussaanngiinnarani aamma siaruariartuinnarpoq. Tamannattaaq seernarsaammik assersuusiami erseqqissarneqarpoq. Seernarsaatip naqittagaq ’qajuusanik uuttuutinik pingasunik’ akusaq tamaat seernarsisittarpaa. (Lukasi 13:21) Guutip naalagaaffianik oqaluussissutiginninneq, taamatut ineriartortoqarneranik kinguneqartoq, seernarsaatitut ima siaruarsimatigaaq maanna „nunarsuup isua tikillugu allaat“ anngussimalluni. (Apustilit Suliaat 1:8; Matthæusi 24:14) Guutip naalagaaffia pillugu tusarliussamik taamatut siaruartereqataaneq immikkut pisinnaatitaaffiuvoq nuanningaartoq!

Qassutit

15, 16. (a) Qassutinik assersuusiaq oqaluttuarilaaruk. (b) Qassutit sumut assersuutaappat, ineriartornermullu tunngasoq suna assersuusiami tamatumani erseqqissarneqarpa?

¹⁵ Jiisusimut Kristusimut ajoqersugaarusuttut amerlassusiannit pingaaruteqarnerusoqarpoq, tassa ajoqersukkat pitsaassusiat. Jiisusip Guutip naalagaaffianut tunngatillugu ineriartornerup ilaa tamanna assersuusiami ilaanni allami, tassa qassutinik assersuusiamini, erseqqissarpaa. Ima oqarpoq: „Qilaap Naalagaaffiata assigaa qassutit immamut nalunneqaramik aalisakkanik tamalaanik pisaqartut.“ — Matthæusi 13:47.

¹⁶ Qassutit, oqaluussinermut assersuutaasut, aalisakkanik tamalaanik katersuisarput. Jiisusi ima nangippoq: „[Qassutit] ulikkaarmata sissamut qaqippaat, ingeriarlutillu immikkoortiterpaat ajunngitsut nappartanut immiullugit ajortullu eqqarlugit. Taamatuttaaq silarsuup naggatissaani [pissutsit aaqqissuussaanerata naggataatungaani, NV] issaaq. Inngilit aallarumaarput ajortut iluartut akornannit avissaartikkiartorlugit aatsitsivimmullu ikumasumut igikkiartorlugit. Tassaniittut qiallutillu qorsaqqortassapput.“ — Matthæusi 13:48-50.

17. Immikkoortiterineq qassutinik assersuusiami eqqaaneqartoq piffissap qanoq ilinerani piva?

¹⁷ Aalisakkanik immikkoortiterinermi tamatumani savanut savaasanullu inaarutaasumik eqqartuussineq Jiisusip oqarneratut naalannassutsimini tikiukkuni pisussaq pineqarpa? (Matthæusi 25:31-33) Naamik. Inaarutaasumik eqqartuussineq tamanna Jiisusi annikilliornartussarsuarmi takkuppat piumaarpoq. Immikkoortiterinerli qassutinik assersuusiami eqqartorneqartoq „pissutsit aaqqissuussaanerata naggataatungaani“ pivoq. * Piffissami tamatumani — piffissami annikilliornartorsuarmik naggaserneqartussami — maanna inuuvugut. Immikkoortiterineq maanna qanoq piva?

18, 19. (a) Maannakkut qanoq ililluni immikkoortiterisoqarpa? (b) Eqqortuliorusuttut suna iliuuserisariaqarpaat? (Aamma takuuk ilanngussaq qupp. 31-mi.)

¹⁸ Nalitsinni inuit millionillit, aalisakkat assersuutaasut inuiaat imarsuannit qaqinneqarsimasut, Jehovap ilagiissaanut kajungilersimapput. Ilaat eqqaaniaaqataasarput, allat ataatsimiinnitsinnut takkuttarput, allallu uagutsinnit Biibilimik atuaqqissaaqatigineqarusupput. Taakkuali tamarmik ajoqersugaappat ilumoortut? Imaassinnaavoq ’sissamut qaqinneqartut’, Jiisusili oqarpoq „ajunngitsut“  kisimik „nappartanut“, tassa ilagiinnut kristumiunut, katersorneqartut. „Ajortut“ iginneqarput, naggataatigut „aatsitsivimmut ikumasumut“, siunissami suujunnaarsitaanissamut assersuutaasumut, iginneqartussaallutik.

¹⁹ Aalisakkat ajortut tassaapput inuppassuit Jehovap innuttaanit siornatigut atuaqqissaaqatigineqartarsimasut, atuaqqissaartarunnaarsimasulli. Kristumiunik angajoqqaallit ilaasa Kristusip tumaanik malinninnissartik kissaatigivissimanngisaannarpaat. Jehovamut kiffartornissartik aalajangiussinnaasimanngilaat, immaqaluunniit piffissap ilaani taassumunnga kiffartorsimapput, kiffartorunnaarsimallutilli. * (Ezekieli 33:32, 33) Ullorli inaarutaasumik eqqartuussiffik nalliutsinnagu uummatimikkut eqqortuliorusuttut tamarmik, aalisakkat nappartanut immiunneqarnerattut, ilagiinnut katersorneqarumanissaat tassanilu isumannaatsumiiginnarnissaat pisariaqarluinnarpoq.

20, 21. (a) Qanoq ineriartortoqartarnera pillugu Jiisusip assersuusiaanik misissuinerput sunik ilinniarfigaarput? (b) Sunissat aalajangiusimaviuk?

²⁰ Jiisusip qanoq ineriartortoqartarnera pillugu assersuusiaanik misissuilaarnerput sunik ilinniarfigaarput? Siullermik, siinuppip naatsiiassartaata naajartortarneratut Guutip naalagaaffianik tusarliussamik eqqumaffiginnittut amerleriarujussuarsimapput. Suliap Jehovap suliarititaata siaruarterneqarnera kialuunniit akornusersinnaanngilaa! (Esaja 54:17) Aamma ’orpiup alannguani ulluliorsimasut’ anersaakkut illersorneqarput. Aappassaanik, Guuti taannaavoq ineriartortitsisoq. Seernarsaatip qajuusiassamiittup naqittakkamut takussaanngitsumik siaruarneratut, ineriartorneq malugiuminaallunilu paasiuminaappoq, taamaakkaluartorli ineriartortoqarpoq. Pingajussaanik, tusarliussamik aallaqqaammut ilassinnittut tamakkeratik ajunngitsuunerat paasinarsisarpoq. Ilaat Jiisusip assersuusiaaniittutut aalisakkatut ajortutut ittuusimapput.

²¹ Taamaakkaluartoq qiimmaallannangaarami takullugu ajunngitsut taama amerlatigisut Jehovamut qanillisarnerat! (Johannesi 6:44) Tamanna nunat ilarpassuini maluginiarnartumik amerliartortoqarneranik kinguneqarsimavoq. Amerliartornermut tamatumunnga tunngatillugu suut tamarmik Jehovamut Guutimut ataqqinaataapput. Uagut taamatut ineriartortoqarneranik takunnittuugatta ukiut hundredet arlallit matuma siorna kajumissaarutigineqartoq una naalakkusuttariaqarparput: „Siaruartigassatit ullaakkut siaruarterniakkit . . . Naluammi iliornerpit arlaat sorleq iluatsikkumaarnersoq imaluunniit marluk tamarmik iluatsikkumaarnersut.“ — Oqaluussisartup oqaasii 11:6. (w08 07/15-E)

[Quppernerup ataani ilanngussat]

Qanoq akissavit?

• Jiisusip siinuppip naatsiiassartaanik assersuusiaa Guutip naalagaaffianut tunngatillugu ineriartorneq anersaakkullu illersorneqarneq pillugit sumik ilinniarfigaarput?

• Seernarsaat Jiisusip assersuusiaaniittoq sumut assersuutaava, ilumoortorlu Guutip naalagaaffianut tunngatillugu ineriartornerup ilaa suna Jiisusip matumani erseqqissarpaa?

• Guutip naalagaaffianut tunngatillugu ineriartornerup ilaa suna qassutinik assersuusiami erseqqissarneqarpa?

• Qanoq ililluta qulakkeersinnaavarput ’nappartanut immiunneqartunut’ ilaajuarnissarput?

[Atuaqqissaarnermi apeqqutit]

[Qupp. 28-mi assiliartat]

Siinuppip naatsiiassartaanik assersuusiaq Guutip naalagaaffianik tusarliussamik siaruarterineq pillugu sumik ilinniarfigaarput?

[Qupp. 29-mi assiliartat]

Seernarsaammik assersuusiaq sumik ilinniarfigaarput?

[Qupp. 31-mi assiliartaq]

Aalisakkat ajunngitsut ajortunit immikkoortiterneqarnerat sumut assersuutaava?