Sooq illumit illumut oqaluussineq ullumikkut taama pingaaruteqartigaa?

„Ullut tamaasa, naalaffimmi illumillu illumut angalaarlutik, soraarnatik ajoqersuiuaannarput Missiarsimillu, Jiisusimik, nutaarsiassaq nuannersoq oqaluussissutigiuaannarlugu.“ — APUSTILIT SULIAAT 5:42, NV.

1, 2. (a) Oqaluusseriaaseq sorleq Jehovap Nalunaajaasuisa ilisimaneqaatigaat? (b) Allaaserisami matumani suna sammissavarput?

NUNARSUARMI nunani tamangajanni takussaasarput. Inuit marluk atisarissaartut illumut kasuttorput tassani najugaqartoq Guutip naalagaaffia pillugu Biibilimi allassimasut pillugit oqaloqatigilaarniarlugu. Pulaarneqartoq soqutiginnippat oqaluussisartut immaqa Biibililersaarutinik atuagassaanik tunissavaat akeqanngitsumillu Biibilimik kursusernissamik neqeroorfigalugu. Taava matup tullianut ingerlaqqittarput. Taamatut oqaluusseqataasaruit qularnanngilaq malugisimassagit inuppassuit takusinnaasaraat Jehovamut nalunaajaasuusutit, allaat suli oqarianngitsutilluunniit. Aap, illumit illumut oqaluussineq ilisarnaatigilersimavarput.

² Jiisusip uagutsinnut suliassiissutigisaa, tassa oqaluusseqqusillunilu ajoqersuganngortitsiortoqqusissutaa, assigiinngitsorpassuarnik periaaseqarluta suliarisarparput. (Matthæusi 28:19, 20) Niueriartortarfinni, aqqusinerni sumiiffinnilu tamanut ammasuni oqaluussisarpugut. (Apustilit Suliaat 17:17) Inuppassuit attaveqarfigisarpavut sianerfigalugit imaluunniit allaffigalugit. Ulluinnarni naapittakkavut sallusuissutit Biibilimeersut pillugit oqaluttuuttarpavut. Allaat pisortatigoortumik nittartagaqarpugut oqaatsit 300-nik sinnillit atorlugit Biibilimut tunngasunik paasissutissartalimmik. * Oqaluusseriaatsit tamakkua tamarmik kinguneqarluartarput. Sumiiffiilli amerlanersaanni pingaarnerpaamik illumit illumut oqaluussinikkut nutaarsiassaq nuannersoq allanut ilisimatitsissutigisarparput. Taamatut oqaluusseriaaseqarnermut suna tunngaviua? Sooruna nalitsinni Guutip innuttaasa periaaseq taanna taama atortigilersimagaat? Aamma sooq ullumikkut taama pingaaruteqartigaa?

Apustilit periaasiat

3. Jiisusip apustilit oqaluussineq pillugu qanoq ilitsersorpai, oqaluusseriaaserisariaqagaallu pillugu suna erserpa?

³ Illumit illumut oqaluussisarneq Biibilimik tunngaveqarpoq. Jiisusip apustilit oqaluussiartoqqugamigit ima ilitsersorpai: „Illoqarfimmut illoqarfeeqqamulluunniit pigaangassi, taava paasiniaasassaasi kina ilissinnik najugaqartitsinissamut naleqquttuunersoq [tassani qinngaqqunnanngitsut tassanimiut ujassavasi, NV].“ Qinngaqqunnanngitsut qanoq ilillutik ujassagamikkit? Jiisusi oqarpoq inuit angerlarsimaffiini naapinniassagaat: „Illumut iseraangassi eqqisseqqusisaritsi. Illup inui tamatumunnga naleqquppata eqqisseqqusissutissi tikissavai.“ Qaaqquneqarnissartik utaqqissavaat? Naagga. Maluginiariaruk Jiisusi nangilluni qanoq oqarnersoq: „Ilassiumanngippasi oqaatsisilu tusaajumanagit, taava illu taanna illoqarfilluunniit taanna qimassiuk, isikkasilu pujoralaajarsigit.“ (Matthæusi 10:11-14) Ilitsersuussutini taakkunani erseqqippoq apustilit ’iivangkiiliu oqaluussissutigalugu illoqarfeeqqanik aqqusaartuigaangamik’ inuit angerlarsimaffiini pulaarumallugit siulliullutik iliuuseqartartussaasut. — Lukasi 9:6.

4. Illumit illumut oqaluussineq Biibilimi sumerpiaq eqqartorneqarpa?

⁴ Biibilimi allassimaqqissaarpoq apustilit illumit illumut oqaluussisartut. Assersuutigalugu taakku pillugit Apustilit Suliaat 5:42-mi ima  allassimasoqarpoq: „Ullut tamaasa, naalaffimmi illumillu illumut angalaarlutik, soraarnatik ajoqersuiuaannarput Missiarsimillu, Jiisusimik, nutaarsiassaq nuannersoq oqaluussissutigiuaannarlugu.“ (NV) Ukiut 20-t missiliorlugit tamatuma kingorna apustilip Paulusip utoqqaanertat ilagiinni Efesosimiittut ima allaffigai: „Nalunngilarsi ilissinnut ikiuutaasinnaasunik nipangiussaqarsimanngitsunga ilissinnulli nalunaajaasimallunga ajoqersorlusilu tamanut saqqumisumik illunilu [illumillu illumut, NV].“ Paulusip utoqqaanertat taakkua uppertunngunnginneranni pulaarsimavai? Aap, pulaarsimassavai, ilaatigummi ilinniartissimavai „Guutimut allamik isumataarnissamik Naalakkatsinnullu Jiisusimut uppernissamik“. (Apustilit Suliaat 20:20, 21) Apustilit Suliaat 20:20 pillugu A.T. Robertson atuakkiamini Word Pictures in the New Testament-imi ima oqaaseqaateqarpoq: „Oqaluussisartut pingaarnerpaartaata taassuma illumit illumut oqaluussisarnera maluginiarnarpoq.“

Ullumikkut sakkutoorpassuit pillertat

5. Oqaluussineq Joelip siulittuutaani qanoq oqaluttuarineqarpa?

⁵ Ukiuni hundredelinni siullerni oqaluussisoqarnera suliamut annertunerusumut ullutsinni suliarineqartussamut qilanaartuutaannaavoq. Pruffiitip Joelip kristumiut tanitat oqaluussinerat sullinerpassuit, ilaatigut pillertat, aseruinerannut assersuuppaa. (Joeli 1:4) Pillertat sakkutoorpassuartut ingerlasarput akornutaasut uniffiginagit, illunut isaasarlutik aqqutiminniittullu suut tamaasa nerisarlugit. (Atuaruk Joeli 2:2, 7-9.) Tamanna Guutip kiffaasa qanoq qasusuitsigalutik peqqissaartigalutillu ullutsinni oqaluussinerannut assersuutaavoq takorlooruminartoq. Assersuutip siulittuutaasup eqquunnerani kristumiut tanitat suleqataasalu ’savat allat’ pingaarnertut periaaserisaat tassaavoq illumit illumut oqaluussineq. (Johannesi 10:16) Sooq uagut, Jehovamut nalunaajaasuusugut, apustilit oqaluusseriaasiat atortalerparput?

6. 1922-mi illumit illumut oqaluussinissaq pillugu qanoq kajumissaarisoqarpa, ilaalli qanoq periarpat?

⁶ 1919-imiilli erseqqissarneqartarpoq kristumiut tamarmik immikkut oqaluusseqataanissamut akisussaaffeqarnerat. Assersuutigalugu allaaserisami „Tjeneste er betydningsfuld“-imi Vagttaarnet-imi septembari 1922-moortumi kristumiunut tanitanut eqqaasitsissutigineqarpoq qanoq pingaaruteqartigisoq eqiasuilluni ’tusarliussamik naqitikkamik inunnut aggiussinissaq taakkualu matuisa saavini oqaloqatigalugit, qilammiup naalagaaffiata qanillinera nalunaajaatigalugu’. Bulletin-imi (maanna Rigets Tjeneste) sukumiisumik saqqummiusseriaatsit  ilanngunneqartarput. Taamaakkaluartorli aallaqqaammut ikittuinnaat illumit illumut oqaluussisarput. Ilaat oqaluussiumanngillat. Akerliullutik assigiinngitsunik patsisissarsiorput, ajornartorsiulli pingaarnerusoq tassaavoq ilaasa illumit illumut oqaluussinermik imminnut nikanarsaataasutut isiginninnerat. Oqaluussineq pingaartinneqarnerujartortillugu taakkua ilarpassui Jehovap peqatigiissortaanit qimagukkiartuaarput.

7. 1950-ikkunni sumik pisariaqartitsisoqarnera paasinarsiva?

⁷ Ukiuni qulikkuutaani tulliuttuni amerligaluttuinnartut oqaluusseqataasalerput. Paasinarsivorli illumit illumut oqaluussinermi inuttut ilinniartinneqarnerunissaq pisariaqartinneqartoq. Assersuutigalugu USA-mi 1950-ikkut aallartinneranni oqaluussisartut 28 procentiisa qaaqqusissutinik agguaanissartik aqqusinermiluunniit atuagassiat tigummillugit nikorfanissartik naammagisarpaat. Oqaluussisartut 40 procentii sinnerlugit aalajangersimasumik oqaluusseqataaneq ajorput; qaammatini arlalinni oqaluussinngissinnaasarput. Kristumiut tunniulluinnarsimasut tamaasa illumit illumut oqaluussinissaannut ikiorniarlugit qanoq iliortoqarsinnaava?

8, 9. Ilinniartitsinermik aaqqissuussineq suna 1953-imi aallartinneqarpa, qanorlu kinguneqartumik?

⁸ 1953-imi New Yorkimi ataatsimeersuarnermi nunanit tamalaanit peqataaffigineqartumi illumit illumut oqaluussineq pingaarnertut sammineqarpoq. Qatanngutip Nathan H. Knorr-ip nalunaarutigaa nakkutilliisut kristumiut tamarmik suliassaat pingaarnerpaaq tassaasoq nalunaajaasunik tamanik illumit illumut aalajangersimasumik oqaluussisalernissaannut ikiuinissaq. Ima oqarpoq: „Kikkut tamarmik matumiit matumut nutaarsiassamik nuannersumik oqaluussissutiginnissinnaasariaqarput.“ Tamanna siunertaralugu silarsuaq tamakkerlugu aaqqissuussamik ilinniartitsisoqalerpoq. Illumit illumut suli oqaluussisalinngitsut ilinniartinneqarput inunnik angerlarsimaffiini saaffiginninnissamut, taakkuninnga Biibili tunngavigalugu eqqarsalersitsiniarluni oqaloqatiginninnissamut taakkualu apeqqutaannik akisinissamut.

⁹ Ilinniartitsinermik aaqqissuussineq tamanna kinguneqarluarpoq. Ukiut qulit ingerlaneranni silarsuarmi tamarmi oqaluussisartut 100 procentimik amerleriarput, pulaaqqittakkat 126 procentimik amerleriarlutik, Biibilimillu atuaqqissaaqatigisartakkat 150 procentimik amerleriarlutik. Ullumikkut Jehovap Nalunaajaasui 7 millioningajaat nutaarsiassamik nuannersumik silarsuarmi tamarmi oqaluussissutiginneqataapput. Taamatut maluginiarnartumik amerliartorneq Jehovap innuttami illumit illumut oqaluussinermi naammassisaannik pilluaqqusineranut uppernarsaataavoq. — Esaja 60:22.

Inuit inuuinnaqqullugit nalunaaqutsersuineq

10, 11. (a) Ezekielip allagaani kapitali 9-mi allaaserineqartutut Ezekieli sumik takorruugaqarpa? (b) Takorruugaq taanna ullutsinni qanoq eqquuppa?

¹⁰ Illumit illumut oqaluussinerup pingaaruteqassusia pruffiitip Ezekielip takorruugaanit erserpoq. Takorruukkami tamatumani Ezekielip takuai angutit arfinillit sakkulisartut taakkualu arfineq-aappaat ilupaassianik atisaqartoq allaffissiamik siffiarmiulik. Angutit arfineq-aappaat peqquneqarpoq ’illoqarfik tamaat ingerlavigeqqullugu tassanilu maajunnartuliat pillugit anersaarulullutik kappialasunik qaavisigut nalunaaqutsersueqqullugu’. Nalunaaqutsersuinerup tamatuma kingorna angutit sakkulisartut arfinillit peqquneqarput nalunaaqutserneqanngitsut tamaasa toqoraqqullugit. — Atuaruk Ezekieli 9:1-6.

¹¹ Paasivarput angut ilupaassianik atisalik siulittuutip tamatuma eqquunnerani kristumiunut tanitanut kinguleruttunut assersuutaasoq. Katersat tanitat oqaluussinikkut ajoqersuganngortitsiortornikkullu Kristusip ’savaataanut allanut’ ilaalersunik assersuutaasumik nalunaaqutsersuisarput. (Johannesi 10:16) Qaavisigut nalunaaqutsiussaq taanna sunaana? Taanna takussutissaavoq savat taakkua Jiisusimut Kristusimut ajoqersugaanerannut tunniulluinnarsimallutillu kuisissimasut aamma inuttut pissutsimik nutaamik Kristusip inuttut pissusianut  assingusumik atisisimanerannut, tamannalu ima erseqqitsigaaq soorlulusooq qaamikkut nalunaaqutserneqarsimasut. (Efesosimiut 4:20-24) Savat taakkua assersuutaasut kristumiut tanitat peqatigalugit savaatinngussapput ataatsit, taakkualu suli amerlanerusunik nalunaaqutsersuiniarneranni ikiussavaat. — Saqqummersitat 22:17.

12. Ezekielip takorruugaa savanik assersuutaasunik ujaasiuarnissatta pingaaruteqassusianik qanoq paasinarsisitsiva?

¹² Ezekielip takorruugaa inunnik ’anersaarulullutillu kappialasunik’ ujaasiuarnissatta sooq taama pingaaruteqartigineranut pissutaasut ilaannik paasinarsisitsivoq. Inuit inuunerat pineqarpoq. Qanittukkut Jehovap sakkutuui qilammiusut, angutitut sakkulisartutut arfinilittut eqqartorneqartut, assersuutaasumik nalunaaqutserneqarsimanngitsunik suujunnaarsitsissapput. Eqqartuussinissaq tamanna pillugu apustili Paulusi allappoq Jiisusip „inngilini pissaasut“ peqatigalugit ’aggiutissagaa pillaatissaq Guutimik ilisimasaqanngitsunut Naalakkamillu Jiisusimik iivangkiiliumut naalakkumanngitsunut’. (2 Thessalonikamiut 1:7, 8) Maluginiaruk inuit iivangkiiliumut, imaluunniit nutaarsiassamut nuannersumut, periarnertik naapertorlugu eqqartuunneqarumaartut. Tamanna pissutigalugu Guutip tusarliussaa naggatissaq tikivillugu qasukkaallanngivissumik oqaluussissutigineqartariaqarpoq. (Saqqummersitat 14:6, 7) Taamaattumik Jehovap kiffai tunniulluinnarsimasut tamarmik akisussaafferujussuaqarput. — Atuaruk Ezekieli 3:17-19.

13. (a) Apustili Paulusi sunissaminut akisussaaffeqartutut misigiva, aamma sooq? (b) Illit angalaarfigisartakkanniittunut suna akisussaaffigalugu misigivit?

¹³ Apustili Paulusi nutaarsiassap nuannersup allanut oqaluussissutiginissaanut nammineq akisussaaffeqartutut misigivoq. Ima allappoq: „Grækerit barbarillu, ilisimasut ilisimaatsullu pisussaaffigaakka. Taamaattumik pilerivunga ilissinnuttaaq Romamiittunut iivangkiiliu nalunaajaatigiumallugu.“ (Romamiut 1:14, 15) Paulusip nallittorneqarsimanini qujamasuutigaa, taamaattumillu misigivoq inuit allat Guutip ajunngissusianik pisassarinngisaraluamik nammineq iluaqutiginnissimanermisut iluaqutiginninnissaannut ikiorniarsarinissaat pisussaaffigalugu. (1 Timotheusi 1:12-16) Misigaaq inuit naapitani tamarluinnaasa akiitsoqarfigalugit, akiitsunilu taanna inuit taakkua nutaarsiassamik nuannersumik avitseqatiginerisigut akilersinnaallugu. Illit angalaarfigisartakkanniittunut tamatumunnga assingusumik akiitsoqartutut misigivit? — Atuaruk Apustilit Suliaat 20:26, 27.

14. Tamanut ammasumik illumillu illumut oqaluussisarnitsinnut pissutaasoq pingaaruteqarnerpaaq suua?

¹⁴ Inunnik annaassiniarnissaq pingaaruteqaraluartoq illumit illumut oqaluussinissamut pingaaruteqarnerungaartumik pissutissaqarpoq. Siulittuummi Malaki 1:11-miittumi Jehova ima oqarpoq: „Kangianiit kitaanut atera inuianni angeqaaq. Tamaginni . . . atinni pilliutissat minguitsut [aanneqartarput] atera inunni angeqimmat.“ Siulittuummi tamatumani siulittuutigineqartutut Jehovap kiffaasa tunniulluinnarsimasut maniguullutik kiffartornerminni taassuma aqqa kikkut tamarmik takkuanni silarsuarmi tamarmi unnersiutigaat. (Hosea 12:6; Tussiaat 109:30; Matthæusi 24:14) Tamanut ammasumik illumillu illumut oqaluussisarnitsinnut pissutaasoq pingaaruteqarnerpaaq tassaavoq Jehovamut ’qujaniutinik pilliuteqarusunnerput’. — Hebræerit 13:15.

Pisussat pingaarutillit

15. (a) Israelikkut Jeriko kaajallallugu ingerlaarnerminni ullut arfineq-aappassaanni qanoq iliuuseqarnerulerpat? (b) Tamatumani oqaluussinermut tunngatillugu suna paasinarsiva?

¹⁵ Oqaluussineq siunissami qanoq ingerlassava? Tamanna Jerikop tiguarneqarneranik oqaluttuami Josvap allagaaniittumi ersersinneqarpoq. Eqqaamassajunnarsivat Guutip Jerikomik suujunnaarsitsinngitsiarnerani Israelikkut peqquneqartut ulluni arfinilinni ullormut ataasiarlutik illoqarfik kaajallallugu  ingerlaartassasut. Ullulli arfineq-aappassaanni suli allanik iliuuseqartussaapput. Jehovap Josva ima oqarfigaa: „Illoqarfik arfineq-marloriarlugu kaajallassavarsi, palasillu sulluartaatinik qarlortassapput. Assigiiginnarmik sivisuumik qarlortartoqarpat . . . inuit tamarmik saassusseqqussummik nilliassapput ima nipitutigisumik, allaat tamatumuuna illoqarfiup qarmai uppikaatinneqartillugit.“ (Josva 6:2-5) Imaassinnaavoq oqaluussinerput tamatumunnga assingusumik annertusisinneqassasoq. Qanorluunniilli pisoqassagaluarpat, pissutsit aaqqissuussaanerat maanna atuuttoq piuneerunneqarpat Guutip aqqa naalagaaffialu pillugit aatsaat taama nalunaajaasoqartiginera misigissavarput.

16, 17. (a) ’Annikilliortitaangaarneq’ qaangiutsinnagu susoqareersimassava? (b) Allaaserisami tulliuttumi suna sammissavarput?

¹⁶ Piffissaq tusarliussap oqaluussissutigisatta ’saassusseqqusissummik nillianertut nipitutigiumaarfia’ nalliussinnaavoq. Saqqummersitani eqqartuussutit kimittuut ’nataqqornatut oqimaatsorsuartut’ eqqartorneqarput. * Aamma Saqqummersitat 16:21-mi ima allassimavoq: ’Perlussiuutaarujussuarput.’ Eqqartuussutinik taakkuninnga oqaluussissutiginninnermut tunngatillugu illumit illumut oqaluussineq qanoq pingaaruteqartigissanersoq suli naluarput. Qularutiginngilluinnarsinnaavarpulli ’annikilliortitaangaarnerup’ qaangiutinnginnerani Jehovap aqqata inuiaat oqaluttuarisaaneranni aatsaat taama ilisimatitsissutigineqartigisimassanera. — 2 Mosesi 3:15; Saqqummersitat 7:14; Ezekieli 38:23.

¹⁷ Pisussat pingaarutillit utaqqitillugit aallussilluarluta Guutip naalagaaffia pillugu nutaarsiassaq nuannersoq oqaluussissutigiuartariaqarparput. Illumit illumut oqaluussigaangatta sunik unamminiagassaqartarpugut, taakkualu qanoq ililluta iliuuseqarfigisinnaavavut? Apeqqutit taakkua allaaserisami tulliuttumi sammissavavut.

[Quppernerup ataani ilanngussat]

Qanoq akissavit?

• Illumit illumut oqaluussinissamut Biibilimi sunik tunngavissaqarpa?

• Ukiuni kingulliunerusuni illumit illumut oqaluussineq qanoq ililluni tamaviaarunneqarnerulerpa?

• Sooq Jehovamut kiffaasut tunniulluinnarsimasut oqaluussinissaq akisussaaffigaat?

• Pingaarutilinnik sunik pisoqarumaarpa?

[Atuaqqissaarnermi apeqqutit]

[Qupp. 14-mi assiliartat]

Apustilip Paulusip pisimaneratut, allanut oqaluussinissamut akisussaaffeqartutut misigivit?

[Qupp. 15-mi assiliartaq]

Qatanngut Knorr 1953-imi