Ilumoorfiginnittuarit — ataasiusumik uummateqarit

„[Inoorusuppunga] sallusuissutinni. Uummatima illit aqqit kisiat mianeriliuk [Uummatiga ataasiulersiguk atinnik mianerinneqqullunga, NV].“ — TUSSIAAT 86:11.

1, 2. (a) Tussiaat 86:2, 11 naapertorlugu misilinneqarlutalu usserneqaraangatta Jehovamut aalajaattuarnissamut suna iluaqutigissavarput? (b) Qaqugu uummatikkut iluunngarluta Jehovamik ilumoorfiginninnermik ineriartortitsisariaqarpugut?

SOOQ kristumiut ilaat parnaarussaagaluarlutik malersorneqaraluarlutilluunniit ukiorpassuarni Jehovamut aalajaattuarsimasut kingusinnerusukkut pigisaleritunermut nakkaannartarpat? Apeqqummut tamatumunnga akissut uummatitsinnut assersuutaasumut — ilorlikkut pissusitsinnut — tunngassuteqarpoq. Tussiaat 86-imi ilumoorfiginninneq uummammut ataasiusumut, tassa tamarmiusumut, ilaannakuunngitsumut, atassuserneqarpoq. Tussiaasiortoq Daavi ima qinuvoq: „Sernissunnga unneqqarikkama [ilumoorfiginnittuugama, NV]. Ikioruk kiffat, illit Guutiga, tatigigakkit.“ Daavi aamma ima qinuvoq: „Ajoqersunnga [Jehova] aqqutigeqqusannik, inuusinnaaqqullunga sallusuissutinni. Uummatima illit aqqit kisiat mianeriliuk [Uummatiga ataasiulersiguk atinnik mianerinneqqullunga, NV].“ — Tussiaat 86:2, 11.

² Guuti ilumoortoq, Jehova, uummatikkut iluunngarluta tatiginngikkutsigu, eqqarsaativut tunniusimanerpullu allamut saassapput, Guutimik ilumoortumik ilumoorfiginnippiarunnaarluta. Namminissarsiorluni kissaatigisat qaartartutut nunamut assaallugit toqqorneqarsimasutut ipput. Immaqa misilinneqarnitsinni Jehovamut aalajaattuarsimagaluarluta napiaaniutinut nakutitsiutinulluunniit Saatanip piliaanut pisaritissinnaavugut. Taamaattumik maannangaaq — misilinneqannginnitsinni usserneqannginnitsinnilu — uummatikkut iluunngarluta Jehovamik ilumoorfiginninnermik ineriartortitsinissatta ila pingaaruteqassusia! Biibilimi allassimavoq: „Paarisassannit tamanit annermik uummatit paariuk.“ (Ussatit 4:23) Tamatumunnga tunngatillugu pruffiitip Judameersup Jehovamit Israelimi kunngimut  Jeroboamimut aallartinneqartup misigisimasai ilinniutigilluarsinnaavavut.

„Tunissuteqarfigissavakkit“

3. Jeroboamip eqqartuussut Guutip pruffiitiata tusarliussaa qanoq periarfigaa?

³ Pisimasoq manna takorlooriaruk. Guutip kiffaata tusarliussaq sakkortooq kunngimut Jeroboamimut, naggueqatigiit quliusut naalagaaffianni Israelimi avannarlermi nersuteeraasaliamik pallorfiginninnermik atulersitsisumut, tusarliuteqqammerpaa. Kunngi kamattorsuanngorpoq angutitanilu peqqullugit aallartitaq tigusareqqullugu. Jehovalli kiffani najorpaa. Assak kunngip kamalluni isatsitaa tupinnartuliornikkut toquvoq, pallorfiginninnermullu eqqunngitsumut pilliivik qupivoq. Jeroboamip pissusilersornera allanngoriataarpoq. Guutip ilumoortup kiffaa ima kimigiiserfigaa: „[Jehova] Guutit saammarsariassagit qinnullungalu assaga utertissinnaaleqqullugu.“ Pruffiitip kunngi qinnuppaa, taassumalu assaa ajorunnaarpoq. — 1 Kunngit 13:1-6.

4. (a) Sooq kunngip neqeroorutaa pruffiitip ilumoorfiginninneranut misilinneqaataangaarpa? (b) Pruffiiti qanoq akiva?

⁴ Taava Jeroboami Guutip ilumoortup kiffaanut ima oqarpoq: „Angerlaqatiginnga neriartorlutit, taava tunissuteqarfigissavakkit.“ (1 Kunngit 13:7) Pruffiiti maanna qanoq iliussava? Kunngi eqqartuussummik tusarliivigereeramiuk inoroorsaarnera itigartissavaa? (Tussiaat 119:113) Imaluunniit kunngi peqqissimerpasimmat kunngip qaaqqusissutaanut akuersissava? Jeroboamimi ikinngutiminut akisuunik tunissuteqarnissaminut qularnanngitsumik naammattunik akissaqarpoq. Guutip pruffiitia pigisanut isertortumik pilerissuseqarsimasuuppat, kunngip neqeroorutaa qularnanngitsumik pilerinartupilussuusimassagaluarpoq. Jehovalli pruffiiti ima peqquaa: „Maani nerissanngilatit, aamma imissanngilatit; maannaravillu aqqutikkoorlutit utissanngilatit.“ Taamaattumik pruffiiti erseqqilluinnartumik ima akivoq: „Pigisavilluunniit affaat tunniunniaraluarukkit angerlaqatigissanngilakkit; maanilu neriumanngilanga imerumanangaluunniit.“ Taava aqqutikkut allakkoorluni Beteli qimappaa. (1 Kunngit 13:8-10) Pruffiitip aalajangernera uummatikkut iluunngarluni ilumoorfiginninneq pillugu sumik ilinniarfigaarput? — Romamiut 15:4.

’Naammaginnittuugit’

5. Pigisalerituneq qanoq ililluni ilumoorfiginninnitsinnut misilinneqaataasinnaava?

⁵ Immaqa isumaqartoqarsinnaavoq pigisalerituneq ilumoorfiginninnermut tunngassuteqanngitsoq, taamaapporli. Jehovap pisariaqartitatsinnik tunisiumaarnerminik neriorsuutaa upperaarput? (Matthæusi 6:33; Hebræerit 13:5) Qanorluunniit kinguneqassagaluarpat inuunermi ilorrisimaarnartunik maanna akissaqarfiginngisatsinnik noqqaassutiginninnata, taakkuninnga pinngitsuuisinnaavugut? (Atuaruk Filippimiut 4:11-13.) Kissaatigisatta ilaat pissarsiarisinnaajumallugit teokratiimut tunngatillugu suliarisinnaasatsinnik isumakkeerinissamut ussernartorsiorpugut? Ilumoorfiginnilluni Jehovamut kiffartorneq inuunermi pingaaruteqarnerpaatut isigaarput? Uummatikkut iluunngarluta Guutimut kiffartornerput kiffartunnginnerpulluunniit apeqqutinut taakkununnga akissutitsinnut aalajangiisuussaaq. Apustili Paulusi ima allappoq: „Nalunanngilaq Guutimik mianerinninneq naammagittarnermik ilaqartoq taamaalluni immini iluanaarnaraluartoq; sunnguamimmi nassataqarata silarsuarmut matumunnga pisimagatta aamma sunnguamik nassataqarnata silarsuaq manna qimattussaavarput. Nerisassaqarlutalu atisassaqarutta tamakku naammagissavavut.“ — 1 Timotheusi 6:6-8.

6. ’Tunissutinik’ sunik neqeroorfigineqarsinnaavugut, neqeroorutigineqartullu akuerissanerlugit akuerissannginnerlugilluunniit aalajangernissamut suna iluaqutigisinnaavarput?

⁶ Assersuutigalugu imaassinnaavoq sulisitsisutta akissarsiaqarnarnerusumik allanillu iluaqutissartalimmik atorfitsinni qaffatsitaanissamik neqeroorfigigaatigut. Immaqaluunniit paasivarput suliffissarsiorniarluta nunamut allamut nuukkutta aningaasatigut atugarissaarnerussalluta. Aallaqqaammut periarfissat tamakkua Jehovamit pilluaqqussutaasorinarsinnaapput. Iliuuseqartinnatali pissutiginiakkavut misissortariaqarpavut. Imminut apeqqutigisariaqagarput pingaaruteqarnerpaaq tassaavoq: ’Aalajangiunniagara Jehovamut attaveqarninnut qanoq sunniuteqassava?’

7. Uummatitsigut pigisaqarusussuataarnerup sorlaata ilanngullugu nusunnissaa sooq pingaaruteqarpa?

⁷ Saatanip silarsuaanit pigisanik noqqaassutiginnilersinniarsarineqartuarpugut. (Atuaruk 1 Johannesi  2:15, 16.) Diaavulup uummatitsinnik ajortunngortitsinissaq anguniagaraa, taamaattumillu mianersortariaqarpugut. Uummatitsigut pigisaqarusussuataalerutta sorlaa ilanngullugu nusuttariaqarparput. (Saqqummersitat 3:15-17) Jiisusip Saatanip silarsuarmi naalagaaffinnut tamanut pissaaneqalernissamik neqeroorutaanik itigartitsinissaq sapernartissimanngilaa. (Matthæusi 4:8-10) Ima mianersoqqusivoq: „Sissueritsi mianersorlusilu piumatussusermut sumulluunniit, inuummi inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.“ (Lukasi 12:15) Ilumoorfiginninneq Jehovamik tatiginninnissamut imminut tatiginissamuunngitsoq iluaqutigissavarput.

Pruffiititoqqap ’salloqittarpaa’

8. Guutip pruffiitiata ilumoorfiginninnera qanoq misilinneqarpa?

⁸ Guutip pruffiitia angerlamut ingerlaannarsimasuuguni suut tamarmik ingerlalluarsimassagaluarput. Tassuuguinnarli misilinneqaqqippoq. Biibilimi ima oqaluttuarineqarpoq: „Betelimi najugaqarpoq pruffiititoqaq, taassumalu ernerisa angerlaramik oqaluttuuppaat“ ulloq taanna siusinnerusukkut pisimasunik tamanik. Angutip utoqqaap ernermi oqaluttuaat tusarnaareeramiuk qinnuigai siutitooq issiaatseqqullugu Guutip pruffiitia angusinnaaniassagamiuk. Tamatuma kinguninngua angutip utoqqaap pruffiiti orpissuup saniani qasuersaartoq nanivaa, imalu oqarfigaa: „Angerlaqatiginnga nereqatigalungalu!“ Guutip ilumoortup aallartitaa aggerumanngimmat angut utoqqaq ima oqarpoq: „Aamma uanga ilittut pruffiitiuvunga, [Jehovallu] peqqusineratigut inngilip ima oqarfigaanga: ’Illunnut uteqatiginiaruk, neriniassaaq imerlunilu.’“ Biibilimili ima allassimavoq: „Sallulluni taama oqarpoq!“ — 1 Kunngit 13:11-18.

9. Inuit peqquserluttartut Biibilimi qanoq allaaserineqarpat, kikkullu ajoqusertarpaat?

⁹ Pruffiititoqaq pissutiginiakkani suugaluarpalluunniit salluvoq. Immaqa taanna Jehovamut pruffiitiusimagaluarpoq aalajaatsoq. Maannali peqquserluppoq, peqquserlunnerlu Biibilimi sakkortunerpaamik assuarineqarpoq. (Atuaruk Ussatit 3:32.) Peqquserluttartut anersaakkut imminuinnaq ajoqusernatik, allanittaarli ajoqusiigajuttarput.

Angut utoqqaq „uteqatigaa“

10. Guutip pruffiitia angutip utoqqaap qaaqqummani qanoq piva, tamannalu qanoq kinguneqarpa?

¹⁰ Pruffiitip Judameersup pruffiititoqqap peqqusersusaarnera paasisimasariaqaraluarpaa. Imminut ima aperisimasinnaagaluarpoq: ’Sooq Jehova qanoq iliornissannik ilitsersorniarlunga inummut allamut, uannuunngitsoq, inngilimik aallartitsissava?’ Pruffiiti Jehovamut siunnersortissarsiorsinnaagaluarpoq, taamaaliorsimanerali Biibilimi eqqaaneqanngilaq. Angulli utoqqaq „uteqatigaa illuanilu nereqatigalugu imeqatigalugulu“. Taamaaliornera Jehovap iluarinngilaa. Pruffiiti salloqittarneqartoq Judamut uterniarluni aallarlunilu  løvimit toqunneqarpoq. Pruffiitiunerata taamatut naggaserneqarnerata ila alianassusia! — 1 Kunngit 13:19-25. *

11. Akija qanoq maligassaalluarpa?

¹¹ Pruffiitili Akija, Jeroboamimik kunngitut taniiartortinneqartoq, inuunermi sinnerani Jehovamut aalajaattuarpoq. Akija utoqqalillunilu tappingermat, Jeroboamip nuliani qinnuigaa Akijamukaqqullugu ernermik napparsimasup qanoq pinissaa apeqqutigiartorlugu. Akijap sapiilluni siulittuutigaa Jeroboamip ernerata toqunissaa. (1 Kunngit 14:1-18) Akijap Guutip oqaasianut isumassarsiarititaasumut taperseeqataaneq pilluaqqussutisiarpassuisa ilagaat, nalunaarsugaami najoqqutassatut palasimit Ezramit kingusinnerusukkut atorneqarput. — 2 Nalunaarsuutit 9:29.

12-14. (a) Pruffiiti inuusunnerusoq pillugu oqaluttuaq qanoq ilinniutigisinnaavarput? (b) Utoqqaanertat Biibili tunngavigalugu siunnersuutaannik qinunikkut eqqarsaatiginneqqissaarnissap pisariaqassusia assersuuteqarlutit erseqqissaruk.

¹² Biibilimi eqqaaneqanngilaq sooq pruffiitip inuusunnerup Jehova isumasioqqaarsimannginneraa neriniarluni imerniarlunilu angummut utoqqarmukannginnermini. Imaassinnaanerpa angutip utoqqaap tusarusutaminik oqaluttuummani Jehova isumasiunngikkaa? Tamanna qanoq ilinniutigisinnaavarput? Tassa Jehovap piumasaqaataasa naapertuilluartuunerat qularutiginngilluinnartariaqaripput. Qanorluunniillu pisoqaraluarpat taakkua maleruarnissaat aalajangiusimasariaqaripput.

¹³ Siunnersorneqarnermut tunngatillugu inuit ilaasa tusarusutatik kisiisa tusartarpaat. Oqaluussisartoq immaqa suliffissaminik, ilaquttami ilaginissaannut sammisassanullu teokratiimut tunngasunut piffissakinnerulernerminik kinguneqartussamik, neqeroorfigineqarpoq. Oqaluussisartoq siunnersorneqarumalluni utoqqaanertamut saaffiginnippoq. Utoqqaanertaq immaqa siullermik oqarpoq taassuma ilaquttaminik qanoq pilersuinissaanut tunngatillugu aalajangiisussaatitaanani. Taava imaassinnaavoq oqaluussisartoq suliffik taanna suliffigilissappagu anersaakkut navianaataasinnaasunut tunngasut pillugit misissueqatigigaa. Oqaluussisartup utoqqaanertap oqaatigisai siulliit kisiisa eqqaamassavai, imaluunniit aamma siunnersuutai eqqarsaatigeqqissaassavai? Soorunami oqaluussisartup paasiniartariaqarpaa anersaakkut ittunut tunngatillugu imminut suna pitsaanerpaanersoq.

¹⁴ Aamma imaassinnaavoq qatanngut arnaq uimi allamik upperisallip qimannissaa eqqarsaatigalugu utoqqaanertamit siunnersorneqarumasoq. Qularnanngitsumik utoqqaanertap oqarfigissavaa tamanna nammineq aalajangigassarigaa. Taava immaqa tamatumunnga tunngatillugu Biibilimi  siunnersuutigineqartut sammissavai. (1 Korinthimiut 7:10-16) Utoqqaanertap oqaasii eqqarsaatigeqqissaassavai? Imaluunniit uimi qimannissaa aalajangiutereerpaa? Aalajangertinnani Biibilimi siunnersuutigineqartunik qinunikkut eqqarsaatiginneqqissaaruni silatusaassaaq.

Anneruniajuitsuugit

15. Guutip pruffiitiata kukkunera qanoq ilinniutigisinnaavarput?

¹⁵ Pruffiitip Judameersup kukkunera qanoq allatut ilinniutigisinnaavarput? Ussatit 3:5-imi ima allassimavoq: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu.“ Pruffiitip Judameersup pisarnermisut Jehova tatiginagu pisimasumi tamatumani nammineq naliliisinnaassutsini tatigaa. Kukkunini toqqutigaa Guutimillu tusaamasaalluarunnaassutigalugu. Pruffiitip misigisimasaa Jehovamut kiffartornitsinni anneruniajuitsuunissap ilumoorfiginnittuunissallu qanoq pingaaruteqartiginerannik sunniuteqarluartumik ersersitsivoq.

16, 17. Jehovamik ilumoorfiginnittuarnissamut suna iluaqutigisinnaavarput?

¹⁶ Uummatitta namminissarsioqqajaasarnerata tammarteriaannaavaatigut. „Tamanit annerusumik uummat tatigisassaanngitsuuvoq.“ (Jeremia 17:9) Jehovamik ilumoorfiginnittuarumalluta inuttut pissusitoqarput, uagutsinnik makitalersitseqqajaasartoq imminullu tatigivallaalersitseqqajaasartoq, pissuseriunnaarniarlugu sapinngisarput tamaat iliuuseqartariaqarpugut. Aammattaaq inuttut pissuseq nutaaq „Guutip piumasaa naapertorlugu ilumoortumik naapertuilluarnikkut ilumoorfiginninnikkullu pinngortitaq“ (NV) atisariaqarparput. — Atuaruk Efesosimiut 4:22-24.

¹⁷ Ussatit 11:2-mi ima allassimavoq: „Qanilaartut [Anneruniajuitsut, NV] ilisimassuseq pigaat.“ Anneruniajuilluta Jehova tatigigutsigu, tamanna kukkorujussuannginnissatsinnut iluaqutigissavarput. Assersuutigalugu nikallunganeq naliliisinnaassutsitsinnik ajoquseeriaannaasinnaavoq. (Ussatit 24:10) Immaqa illernartumik kiffartornermut aalajangersimasumut peqataakatappugut eqqarsalerlutalu ukiut ingerlanerini iliuuserisavut naammattut, maannalu allat sassartariaqartut. Imaassinnaavorluunniit „nalinginnaasumik“ inoorusulersugut. ’Ilungersoruttali’ aamma ’tamaviaartuarluta Naalagaq kiffartuukkutsigu’, tamanna uummatitsinnut illersuutaassaaq. — Lukasi 13:24; 1 Korinthimiut 15:58.

18. Qanoq aalajangiissanerluta nalornissutigilerutsigu qanoq iliorsinnaavugut?

¹⁸ Ilaannikkut aalajangeruminaatsunik aalajangigassaqalersinnaasarpugut, sunalu eqqortuliornerussanersoq nalorninarsinnaasarpoq. Nammineq pitsaanerusorisatsinnik iliuuseqarnissamut ussernartorsiorsinnaavugut? Pissutsini taama ittuni tamatigut Jehova ikioqqulluta qinnuigisarutsigu silatusaassaagut. Jaaku 1:5-imi ima allassimavoq: „Ilisimassutsimigut inorsartumik ilaqarussi taassuma qinnutigissavaa [qinnutigiuassavaa, NV] ilisimassuseq Guutimit . . . naammalluinnartunik tamanut tunisisartumit.“ Isumatusaartumik aalajangiisinnaaniassagatta Ataatatta qilammiusup anersaaminik illernartumik tunissavaatigut. — Atuaruk Lukasi 11:9, 13.

Ilumoorfiginnittuarnissat aalajangiusimajuk

19, 20. Suna aalajangiusimasariaqarparput?

¹⁹ Salomop pallorfiginninnermik ilumoortumik tunussinerata kingorna ukiuni annikilliorfiusuni Guutip kiffai ilumoorfiginninnermikkut sakkortuumik misilinneqarput. Ilumoorpoq ilarpassui aalajangiusimasaminnik arlaatigut qasukkartitsisut, aammali ilaqarput Jehovamik ilumoorfiginnittuartunik.

²⁰ Ullut tamaasa aalajangigassaqartarpugut ilumoorfiginninnitsinnut misilinneqaataasinnaasunik. Uaguttaarli aalajaattuarsinnaavugut. Jehovamik ilumoorfiginnittuarta ataasiusumillu uummateqarluta taassumunnga kiffartorluta, qularinngilluinnarlugu Jehova ’ilumoorfiginnittumut ilumoorfiginnittartoq’. — 2 Samueli 22:26, NV.

[Quppernerup ataani ilanngussaq]

Qanoq akissavit?

• Uummatitsigut pigisaqarusussuataalerutta, sorlaata ilanngullugu nusunnissaa sooq ilungersuutigisariaqarparput?

• Jehovamik ilumoorfiginnittuarnissamut suna iluaqutigisinnaavarput?

• Anneruniajuitsuuneq Guutimik ilumoorfiginnittuarnissamut qanoq iluaqutigisinnaavarput?

[Atuaqqissaarnermi apeqqutit]

[Qupp. 13-mi assiliartat]

Ussernartut akioruminaatsippigit?

[Qupp. 14-mi assiliartat]

Ilinnut siunnersuutigineqartumik Biibilimik tunngavilimmik qinunikkut eqqarsaatiginneqqissaarnissamut piumassuseqarpit?