Jehovap imminik ilumoorfiginnittut imminiiginnarnavianngilai

’Jehovap imminut ilumoortut imminiiginnanngilai. Taakku sernissorneqartuartarput.’ — TUSSIAAT 37:28.

1, 2. (a) Ukiuni 900-kkunni u.n.s. pisimasut suut Guutip kiffaasa ilumoorfiginninnerannut misilinneqaataappat? (b) Pisimasuni pingasuni suni Jehovap kiffani ilumoorfiginnittut sernissorpai?

UKIUNI 900-kkunniippugut u.n.s., aalajangernissamullu piffissanngorsimavoq. Innuttaasut akornanni sorsuunnissaq pinngitsoortinneqaqqatarpoq, Israelikkut naggueqatigiissortaannik avannarlernik eqqissiviilliortunik kiffaanngissuseqalersitsinikkut. Taakkununnga kunnginngortinneqaqqammersoq, Jeroboami, pissaaneqarnerulerniarluni ingerlaannaq iliuuseqarpoq upperisarsiornermik naalagaaffimmut atasumik nutaamik pilersitsinermigut. Innuttaminit ilumoorfigilluinnarneqarnissani piumasaraa. Jehovap kiffai aalajaatsut qanoq iliussappat? Guutimut pallorfigisaminnut ilumoorfiginnittuassappat? Tusindillit ilumoorfiginnittuarput, Jehovallu assuarnaattuartillugit paarai. — 1 Kunngit 12:1-33; 2 Nalunaarsuutit 11:13, 14.

² Ullumikkuttaaq Guutip kiffaasa ilumoorfiginninnerat misilinneqartarpoq. Biibilimi ima mianersoqqussuteqarpoq: „Eqiingagitsi silatusaarlusilu! Akerartortersi Diaavulu løvitut uiannisaartutut angalasarpoq iisassarsiorluni.“ Uagut ’uppernikkut aalajaalluta taanna assortorsinnaavarput’? (1 Petrusi 5:8, 9) Pisimasut Jeroboamip ukiumi 997-imi u.n.s. kunnginngortinneqarneranut tunngassuteqartut ilaat misissoriartigit qanorlu ilinniarfigisinnaanerlugit paasiniarlugu. Ulluni ernumanartorsiorfiusuni taakkunani Jehovap kiffai aalajaatsut naqisimaneqarput. Aamma unamminiarnartunik suliaqarnerminni tunussisunit sunnerniarneqarput. Pisimasuni taakkunani tamani Jehovap imminik ilumoorfiginnittut imminiiginnanngilai, ullumikkut aamma imminiiginnarnavianngilai. — Tussiaat 37:28.

Naqisimaneqaraangata

3. Sooq kunngi Daavi naqisimannittumik naalakkersuinngila?

³ Siullermik misissoriartigit pisimasut Jeroboamip kunnginngorneranik kinguneqartut. Ussatit 29:2-mi ima allassimavoq: „Iluanngitsoq naalakkersuisunngoraangat inuit anersaaruluttarput.“ Kunngip Daavip Israelimut naalakkersuinerani inuit anersaaruluttanngillat. Daavi naammalluinnartuunngilaq, Guutimilli ilumoorfiginnippoq taassuminngalu tatiginnilluni. Naqisimannittumik naalakkersuinngilaq. Jehovap taanna ima angerfigeqatigaa: „Kinguaassatit kunngeqarfiillu atajuassapput kiinnama saani, issiavissaarsuillu soraajuitsumik aalajaassaaq.“ — 2 Samueli 7:16.

4. Salomop naalakkersuinerani pilluaqqussutinut suna aalajangiisuua?

⁴ Daavip ernerata Salomop naalakkersuinera aallaqqaammut ima eqqissisimaffiutigalunilu pigissaarfiutigaaq Jiisusip Kristusip siunissami ukiuni tusindini naalakkersuinissaanut naleqqulluartumik siumut assersuunneqarsinnaalluni. (Tussiaat 72:1, 17) Taamanikkut Israelikkut naggueqatigiissortaat aqqaneq-marluk tamarmik pikitsitsinissaminnut pissutissaqanngillat. Piumasaqaatinilli naammassinnikkamik aatsaat Salomo taassumalu innuttai pilluaqquneqarput. Jehovap Salomo ima oqarfigisimavaa: „Inatsisikka maleruarukkit malittarisassiakkalu naammassillugit peqqussutikkalu tamaasa naalallugit inuuguit, taava ataatannut Daavimut neriorsuutiga ilinnut eqquutitikkumaarpara. Israelikkut akornanni najugaqarumaarpunga, imminiiginnarnianngilakkalu innuttakka Israelikkut.“ — 1 Kunngit 6:11-13.

5, 6. Salomop Guutimik ilumoorfiginninnginnera qanoq kinguneqarpa?

⁵ Salomo utoqqaligami Jehovamut ilumoorunnaarpoq guutipilussiortalerlunilu. (1 Kunngit 11:4-6) Jehovap inatsisaanut naalakkunnaariartorpoq naakkittaanneruleraluttuinnarlunilu. Ima naakkittaallisimatigaaq inuit taassuma toqunerata kingorna taanna naammagittaalliutigalugu taassumalu ernera kingoraartaalu, Rehabeami, qinnuigalugu  oqilisaavigeqqullutik. (1 Kunngit 12:4) Salomo ilumoorunnaarmat Jehova qanoq periarpa?

⁶ Biibilimi ima oqaluttuarineqarpoq: „[Jehovap] Salomo kamaatilerpaa uummammigut tunussimammagu . . . Israelip Guutia marloriarluni imminut takutittarsimasoq.“ Jehovap Salomo ima oqarfigaa: „Angerusera ileqqoreqqusakkalu ilinnut inassutikka naalakkunnaarakkit naalagaaffinnik arsaarumaarpakkit ilinnut kiffaasumut tunniullugu.“ — 1 Kunngit 11:9-11.

7. Salomo ajattorneqarmat Jehovap imminik ilumoorfiginnittut qanoq isumassorpai?

⁷ Taava Jehovap pruffiiti Akija aallartippaa inuiaqatigiinnik aniguisitsisussaq taninniassammagu. Aniguisitsisussaq taanna tassaavoq Jeroboami, angut pikkorissoq Salomomik sullissisoq. Jehovap naalagaaffik pillugu Daavimut angerutsini aalajangiusimajuaraluarlugu naggueqatigiinnut aqqaneq-marlunnut naalakkersuinerup marlunnut avinneqarnissaa akueraa. Naggueqatigiit qulit Jeroboamimut tunniunneqassapput; naggueqatigiillu marluk Daavip kinguaavinit, maanna kunngimit Rehabeamimit sinniisuuffigineqartunit, naalakkersorneqarnerat ingerlaannassaaq. (1 Kunngit 11:29-37; 12:16, 17, 21) Jehovap Jeroboami ima oqarfigaa: „Peqqussutikka tamaasa naalakkukkit ingerlavigeqqusakka ingerlavigalugit uanga isinni eqqortuusut malillugit ileqqoreqqusakkalu peqqussutikkalu naalallugit, soorlu kiffara Daavi taamaaliorsimasoq, taava najorumaarpakkit illuliuukkumaarlutillu Daavimut illuliarisattut qajannaatsigisumik; Israelilu ilinnut tunniukkumaarpara.“ (1 Kunngit 11:38) Jehova innuttaminut iluaqutaasumik iliuuseqarpoq, taakkua naqisimaneqarnermit aniguisinneqarsinnaanngortillugit.

8. Guutip innuttaasa ullumikkut suut misilinneqaatigisarpaat?

⁸ Ullumikkut naqisimanninnerit naapertuilluanngitsuliornerillu nalinginnaaqaat. Oqaluussisartup oqaasii 8:9-mi ima allassimavoq: „Inuit ilaat ataaseq inoqatiminut ajoqutaasumik pissaaneqarpallaartarpoq.“ Piumatulluni niuerneq naalakkersuinikkullu peqquserlunneq aningaasarsiornikkut artornartorsiornermik kinguneqarajuttarput. Politikkikkut, upperisarsiornikkut niuernikkullu siuttuusorpassuit ileqqorissaarnermut tunngatillugu maligassiuinerlupput. Taamaattumik ullumikkut Guutip kiffai ilumoorfiginnittut Lotitut naapertuilluartutut ’inuit soqqusaatsut inuunerlunnerannit atugarliortitaapput’. (2 Petrusi 2:7) Aamma allanut akornutaanngitsumik Guutip najoqqutassiaanik malinninnissarput ilungersuutigigaluarlutigu oqartussaasunit makitasuunit malersugaagajuppugut. — 2 Timotheusi 3:1-5, 12.

9. (a) Jehovap innuttani aniguisinniarlugit suut iliuuserereerpai? (b) Jiisusip aalajaattuarumaarnera qanoq ililluta qularutiginngilluinnarsinnaavarput?

⁹ Qularutiginngilluinnarsinnaavarpulli Jehovap imminik ilumoorfiginnittut imminiiginnarnavianngikkai! Silarsuarmi siuttut peqquserluttut taarserniarlugit iliuuserereersimasai eqqarsaatigeriakkit. Guutip naalagaaffia Missiarsikkoortoq Jiisusikkut Kristusikkut pilersinneqareerpoq. Jiisusi ukiuni hundredengajanni qilammi naalakkersuivoq, qanittukkullu Guutip aqqanik mianerinnittut tamaasa naqisimaneqarnermit aniguisilluinnassavai. (Atuaruk Saqqummersitat 11:15-18.) Jiisusi toqussi tikillugu ilumoorfiginnittuarpoq. Salomolli pisimaneratut pinnani innuttaminik pakatsisitsinngisaannassaaq. — Hebræerit 3:2; 1 Petrusi 2:6.

10. (a) Guutip naalagaaffianik pingaartitsinerput qanoq ililluta ersersissinnaavarput? (b) Misilinneqaraangatta suna qularutiginngilluinnarsinnaavarput?

¹⁰ Guutip naalagaaffia naalagaaffiuvoq piviusoq naqisimanninnernik tamanik suujunnaarsitsisussaq. Jehova Guuti taassumalu naalagaaffia ilumoorfigisariaqarpavut. Taassuma naalagaaffia tatigilluinnarlugu silarsuup guutiitsuussusia naaggaarparput ajunngitsuliornissarlu aallussilluarluta ulapputigalugu. (Titusi 2:12-14) Silarsuarmit matumannga mingutsinneqatsaalinissarput ilungersuutigaarput. (2 Petrusi 3:14) Qanorluunniit misilinneqaraluarluta, anersaakkut ajoquserneqannginniassagatta Jehovap uagutsinnik sernissuiumaarnera qularutiginngilluinnarsinnaavarput. (Atuaruk Tussiaat 97:10.) Aamma Tussiaat 116:15-imi ima neriorsorneqarpugut: „Akisoqaaq [Jehovap] isaani iluartortaasa [ilumoorfiginnittaasa, NV] inuunerat.“ Jehovamut kiffartortut taassumunnga ima erlinnartigipput  taakkua eqimattatut nungutinneqarnissaat akuerinaviarnagu.

Eqqunngitsumik pallorfiginnittunit sunnerniarneqaraangata

11. Jeroboami qanoq ililluni ilumoorfiginnikkunnaarpa?

¹¹ Kunngi Jeroboami naalakkersuinermigut Guutip innuttaasa naqisimaneqarnerannik annikinnerulersitsisimasinnaagaluarpoq. Jeroboamilli iliuusii taakkua ilumoorfiginninnerannut suli misilinneqaataanerulerput. Ataqqineqalersimanini immikkullu pisinnaatitaaffigilersimasani naammaginagit pissaaneqarnerulerniarsarivoq. Ima eqqarsarpoq: „Innuttakka [Jehovap] naalaffianut Jerusalemimiittumut pilliiartortarunik uummataat naalakkaminnut Rehabeamimut Judap kunngianut sammilersinnaapput, taava toqussinnaavaannga Rehabeamilu Judap kunngia kunngigileqqillugu.“ Taamaammat Jeroboami upperisarsiornermik nutaamik nersuteeraasalianik marlunnik kuultiusunik pingaarnerpaatitsiffiusumik atulersitsivoq. „Aappaa Betelimi nappartippaa, aappaalu Danimi nappartillugu. Tamanna ajortuliortunngortitsivoq! Israelimiullu aappaata siornani Danimut ingerlaarput. Aamma qattunernik pilliisarfinnik guutisiorfinnik sanatitsivoq, ileqqoreqqusallu unioqqutillugit palasinik Levikkuunngitsunik ivertitsisarpoq.“ Allaat Jeroboami nammineq isumassarsiaminik „Israelimiut nalliuttorsiortippai, pilliivimmullu qaqivoq pilliissalluni inneq ikinniarlugu“. — 1 Kunngit 12:26-33.

12. Naalagaaffimmi avannarlermiittut Guutimik ilumoorfiginnittut Jeroboami Israelimi nersuteeraasaliamik pallorfiginninnermik pilersitsimmat qanoq pippat?

¹² Guutimik ilumoorfiginnittut naalagaaffimmi avannarlermiittut maanna qanoq iliussappat? Levikkut illoqarfinni naalagaaffimmi avannarlermi imminnut tunniunneqarsimasuni najugallit siuaasamik aalajaatsut pisimanerattut iliuuseqapallapput. (2 Mosesi 32:26-28; 4 Mosesi 35:6-8; 5 Mosesi 33:8, 9) Pigisatik qimallugit kujammut Judamut ilaquttatik ilagalugit aallarput, taavani akornusersorneqaratik Jehovamik pallorfiginnittuarsinnaagamik. (2 Nalunaarsuutit 11:13, 14) Israelikkuusut allat Judami najugaqarallartut angerlarnatik Judamiiginnarniarlutik aalajangerput. (2 Nalunaarsuutit 10:17) Jehovap naalagaaffimmi avannarlermiittut kinguaariinngortussat allat nersuteeraasaliamik pallorfiginnikkunnaarsinnaanissaannut ilumoortumillu pallorfiginneqqilerniarlutik Judamut utersinnaanissaannut periarfissaq ammatippaa. — 2 Nalunaarsuutit 15:9-15.

13. Eqqunngitsumik pallorfiginnittut qanoq ilillutik ullumikkut Guutip kiffaanik navianartorsiortitsisimappat?

¹³ Ullumikkuttaaq eqqunngitsumik pallorfiginnittut Guutip innuttaanik navianartorsiortitsipput. Naalakkersuinikkut pissaanillit ilaat upperisarsiornermik naalagaaffimmut atasumik atulersitsiniarsarisimapput innuttatillu tamatuminnga akuerinninnissaannut tatisimallugit. Kristumiuunerartut  palasii makitasullu allat imminnut palaseqatigiiunerarniarsarisimapput anersaakkut ittut. Tanitalli ilumoortut tassaasut ’palaseqatigiit kunngikkormiut’ taamaallaat kristumiut ilumoortut akornanniipput. — 1 Petrusi 2:9; Saqqummersitat 14:1-5.

14. Upperisamit ilumoortumit nigorsimasut taakkualu isumaat qanoq periarfigisariaqarpavut?

¹⁴ Ukiuni 900-kkunni Levikkut aalajaatsut pisimanerattut ullumikkut Guutimik ilumoorfiginnittut upperisamit ilumoortumit nigorsimasunit nakutitaaneq ajorput. Tanitat taakkualu suleqataasa kristumiut taakkua isumaat tusarnaarunnaarniapallattarlugillu akueriumaneq ajorpaat. (Atuaruk Romamiut 16:17.) Upperisarsiornermut tunngassuteqanngitsunut tunngatillugu oqartussaasunut kajumilluta naalatsigitittarpugut, silarsuarmili matumani akerleriissutinut akuliunnaveersaartarpugut Guutillu naalagaaffianik ilumoorfiginnittuarluta. (Johannesi 18:36; Romamiut 13:1-8) Guutimut kiffartornerartut, iliuutsimikkulli taassuminnga kanngunarsaasut, salluliuutaat tusaarusuttanngilavut. — Titusi 1:16.

15. Sooq „inussiaq aalajaallunilu silatooq“ ilumoorfigisariaqarparput?

¹⁵ Aamma eqqarsaatigeriaruk Jehovap eqqortuliorusuttunik silarsuarmik matuminnga ajortumik assersuutaasumik qimatsisinnaatitsinera, anersaakkullu paratiisimut pilersitaminut isersinnaatitsinera. (2 Korinthimiut 12:1-4) Uummatikkut qujamasungaarluta ’inussiamut aalajaallunilu silatuumut, naalagaata piffissaq eqqorlugu nerisassaannik tunisaqqullugit kiffaminut paarsisunngortitaanut’ qanittumik attaveqarpugut. Kristusip inussiaq taanna „pigisaminut tamanut [paarsisunngortippaa]“. (Matthæusi 24:45-47, NV) Taamaattumik inuttut ataasiakkaatut inussiaqatigiit aalajangigaannik aalajangersimasumik paasinnilluinnanngikkaluaruttaluunniit akuerinninnginnissamut Saatanilluunniit silarsuaanut uternissamut pissutissaqanngilagut. Ilumoorfiginninnerput kajumississutigalugu Jehovap pineqartumik paasinarsisitsinissaa maniguulluta utaqqissavarput.

Guutip imminnut suliassiissutaanik suliarinnikkaangata

16. Pruffiiti Judameersoq sumik suliassinneqarpa?

¹⁶ Jehovap Jeroboamip tunussinera assuaraa. Pruffiiti Judameersoq avannaanut Betelimukartippaa Jeroboamimut sassarniassammat taanna pilliivimmini pilliitillugu. Pruffiitip eqqartuussut sakkortooq Jeroboamimut oqaluussissutigisussaavaa. Suliassaq tamanna pruffiitimut imaannaasimanavianngivippoq. — 1 Kunngit 13:1-3.

17. Jehovap aallartitani qanoq sernissorpaa?

¹⁷ Jehovap assuarinninnera pruffiitip oqaatigimmagu Jeroboami kamattorsuanngorpoq. Assani Guutip aallartitaata tungaanut isatsippaa angutillu eqqaminiittut ima nilliaffigalugit: „Angut una tigusiuk!“ Tassuuguinnarli, suli qisuariartoqanngitsorluunniit, ’assak taassuma tungaanut isatsitaa toquvoq imminullu utertinneq sapilerpaa. Pilliivik qupivoq arsakullu orsupalittut pilliivimmit anialerlutik.’ Jeroboamip pruffiiti qinnuigisariaqarpaa Jehovamik saammarsaaqqullugu qinnuteqqullunilu assani ajorunnaarseqqullugu. Pruffiiti taamaaliorpoq, kunngillu assaa siornatigutut ilivoq. Taamaalilluni Jehovap aallartitani naalliutsinneqannginniassammat sernissorpaa. — 1 Kunngit 13:4-6.

18. Qunusuilluta Jehovamut illernartumik kiffartoraangatta taassuma qanoq sernissortarpaatigut?

¹⁸ Ilumoorfiginnilluta Guutip naalagaaffianik oqaluussissutiginneqataagaangatta ajoqersuganngortitsiortoqataagaangattalu ilaannikkut inussiarniitsunik allaallu akeqqersimaartunik naapitaqartarpugut. (Matthæusi 24:14; 28:19, 20) Itigartinneqarnissamilli annilaangaginninneq oqaluussinermi aallussilluarunnaassutiginngisaannartariaqarparput. Jeroboamip nalaani pruffiitip aqqatigut taaneqanngitsup pisimaneratut immikkut pisinnaatitaaffigaarput ’ersiornata upperluarlutalu [ilumoorfiginnillutalu, NV] Jehovamut kiffartorneq’. *  (Lukasi 1:74, 75) Ullumikkut Jehovap tupinnartuliornikkut akuliunnissaa naatsorsuutigisinnaanngikkaluarparput, anersaanili illernartoq inngilillu atorlugit suli nalunaajaasumisut paaralutalu sernissorpaatigut. (Atuaruk Johannesi 14:15-17; Saqqummersitat 14:6.) Guutip qunusuillutik oqaatsiminik oqaluussissutiginnittuartut imminiiginnanngisaannassavai. — Filippimiut 1:14, 28.

Jehovap imminik ilumoorfiginnittut paarissavai

19, 20. (a) Sooq Jehovap uagutsinnik immineerinngisaannarnissaa qularutiginngilluinnarsinnaavarput? (b) Allaaserisami tulliuttumi apeqqutit suut sammineqassappat?

¹⁹ Jehova Guutigaarput ilumoorfiginnittoq. „Qanoq iliornermini tamani ilumoortuuvoq.“ (Tussiaat 145:17) Aamma Biibilimi neriorsoqqissaarneqarpugut ’ilumoorfiginnitsimi aqqutaat paarisarai’. (Ussatit 2:8) Jehovamik ilumoorfiginnittut upperisamit ilumoortumit nigorsimasunit misilinneqarlutilluunniit sunnerniarneqaraangamik imaannaanngitsumilluunniit suliaqaraangamik taassumannga siulersorneqarlutillu annertoqqusersorneqarnissartik qularutiginngilluinnarsinnaavaat.

²⁰ Maanna tamatta immikkut eqqarsaatigisariaqagarput mannaavoq: Qanorluunniit misilinneqaraluarlunga sumilluunniillu usserniarneqaraluarlunga Jehovamik ilumoorfiginnittuarnissannut suna iluaqutigisinnaavara? Allatut oqaatigalugu: Qanoq ilillunga Guutimik ilumoorfiginninnerulersinnaavunga?

[Quppernerup ataani ilanngussaq]

Qanoq akissavit?

• Jehovap qanoq ililluni ersersippaa imminik ilumoorfiginnittut naqisimaneqaraangata imminiiginnartarnagit?

• Upperisamit ilumoortumit nigorsimasut taakkualu isumaat qanoq periarfigisariaqarpavut?

• Jehovap imminik ilumoorfiginnittut oqaluusseqataagaangata qanoq paarisarpai?

[Atuaqqissaarnermi apeqqutit]

 [Qupp. 5-mi nunap assinga/​assiliartaq]

(Allassimasut qanoq inissisimanersut naqitami takuneqarsinnaavoq)

NAALAGAAFFIK AVANNARLEQ (Jeroboami)

Dani

SIKEMI

Beteli

NAALAGAAFFIK KUJALLEQ (Rehabeami)

JERUSALEMI

[Assiliartaq]

Jeroboamip nersuteeraasaliamik pallorfiginninneq atulersimmagu Jehovap imminik ilumoorfiginnittut imminiiginnanngilai

[Qupp. 8-mi assiliartaq]

Salomo taassumalu innuttai aatsaat piumasaqaatinik naammassinnikkamik pilluaqquneqarput