Aappariinnermi allunaasaq pingasulik paarilluaruk

„Allunaasaq pingasulik kittorajaatsuuvoq.“ — OQALUUSSISARTUP OQAASII 4:12.

1. Inuit siulliit marluk kia katitippai?

JEHOVAP Guutip naasunik uumasunillu pinngortitsereerluni inuk siulleq, Adami, pinngortippaa. Kingusinnerusukkut Adami itisuumik sinitsippaa najungasuisalu ilaat taassuma ikiortissaanik naammalluinnartumik, arnamik, pinngortitsinermut atorlugu. Adamip taanna takugamiuk ima oqarpoq: „Tamanna tassa saaneq saanerma ilaa uinillu uinimma ilaa.“ (1 Mosesi 1:27; 2:18, 21-23) Jehovap inuit siulliit marluk katitikkamigit pilluaqqugamigillu, ersersippaa aappariinnerat akueralugu. — 1 Mosesi 1:28; 2:24.

2. Adamip Evallu attaveqaqatigiinnerat Saatanip qanoq ajoquserpaa?

² Sivitsunngitsorli aappariinneq Guutip pilersitaa saassunneqarpoq. Qanoq? Anersaap ajortup, kingusinnerusukkut Saatanimik taaneqartup, Eva orpimmit aappariinnut neriffigeqqusaanngitsutuamit nereqqullugu usserpaa, Evalu nerivoq. Tamatuma kinguninngua Adami nuliaminut ilaliuppoq, taamaaliornermigullu Guutip eqqortumik naalakkersuineranut siulersuilluarneranullu pikitsitseqataalerluni. (1 Mosesi 3:1-7) Jehovap susimanersut aperimmagit paasinarsivoq taakkua attaveqaqatigiinnerat najummassimanarsereersimasoq. Adamip nuliani pisuutippaa ima oqarluni: „Arnap uannut tunniussavit orpimmiittumik tunimmanga nerivunga.“ — 1 Mosesi 3:11-13.

3. Juutit ilaasa aappariinnermut isiginnittaaseq kukkusoq suna ineriartortippaat?

³ Taamanimiilli Saatani aappariinnik aaqqiagiinngilersitsiniarluni assigiinngitsorpassuarnik periaaseqartarsimavoq. Ilaatigut upperisarsiornikkut siuttut atorlugit aappariinnermut isiginnittaatsimik Biibilimut naapertuutinngitsumik siuarsaasimavoq. Assersuutigalugu juutit upperisarsiornikkut siuttui Guutip najoqqutassiaanik sumiginnaapput uiusoq soorpianngitsunik pissuteqarluni, assersuutigalugu nerisassami tarajoqarpallaarnerat pissutigalugu, nuliaminit avissinnaatillugu! Jiisusili ima oqarpoq: „Kinguaassiuutitigut inuunerlunnerunngitsumik peqquteqarluni avittoq allamillu nuliartoq allasiorpoq.“ — Matthæusi 19:9.

4. Aappariinnermik aaqqissuussineq ullumikkut qanoq saassunneqarsimava?

⁴ Saatanip aappariinnermik aaqqissuussinermik aseruiniarneq suli ulapputigaa. Tamatumunnga tunngatillugu iluatsitsisimaneranut ersiutaapput inooqatigiit katissimanngitsut aappariittut inooqatigiittarnerat, suiaassuseqatigiinnik katititsinerit, averiaannaanerlu. (Atuaruk Hebræerit 13:4.) Uagut kristumiutut aappariinnermut isiginnittaatsimit killormoortumit sunnertikkumanata qanoq iliorsinnaavugut? Aappariittut pilluarnermut ilisarnaataasut ilaat misissoriartigit.

Jehova aappariinnermi ilaatittuarsiuk

5. Oqariartaaseq „allunaasaq pingasulik“ aappariinnermut tunngatillugu atorneqaraangat qanoq isumaqartarpa?

⁵ Aappariinneq ingerlalluassappat, Jehova aappariinnermi ilaasariaqarpoq. Oqaasiani ima allassimasoqarpoq: „Allunaasaq pingasulik kittorajaatsuuvoq.“ (Oqaluussisartup oqaasii 4:12) „Allunaasaq pingasulik“ assersuutaavoq. Assersuut taanna aappariinnermut atoraanni uiusoq nuliaasorlu allunaasaasarput marluk allunaasamut qiterlermut, Jehovamut Guutimut, nermunneqarsimasut. Aappariit Jehovamik ataasioqateqarnermikkut ajornartorsiutinik aaqqiinissamut pisariaqartumik anersaakkut nukissaqalertarput, aamma taassuminnga ataasioqateqarneq aappariittut pilluarnerup annerpaap angunissaanut ’matuersaataavoq’.

6, 7. (a) Kristumiut Guutip aappariinnerminni ilaanissaa qulakkeerniarlugu susinnaappat? (b) Qatanngutip arnap uimini pingaartitani suunerarpai?

⁶ Aappariilli aappariinnermik allunaasatut pingasulittut innissaa qulakkeerniarlugu susinnaappat?  Daavi tussiaasiami ilaanni ima erinarsorpoq: „Guuti, piumasat malillugu iliornissaq tassa kajungerisara; inatsisitit uanga ilunni ipput.“ (Tussiaat 40:9) Taamatuttaaq Guutimik asanninnerput uummatikkut iluunngarluta taassumunnga kiffartorusulissutigissavarput. Taamaattumik aappariit tamarmik immikkut Jehovamut qanittumik attaveqarnermik ineriartortitsisariaqarput piumasaatullu iliornermik nuannaarutiginnittariaqarlutik. Aappaasut aamma aapparmik Guutimik asanninneranik nakussatsitsiniartariaqarput. — Ussatit 27:17.

⁷ Aamma Guutip inatsisai ilumut ilutsinniippata pissuserineqartussat soorlu upperneq, neriunneq asanninnerlu pissuserissavavut, taakkualu aappariinnermik nakussatsitseqataassapput. (1 Korinthimiut 13:13) Qatanngut arnaq kristumiu Sandramik atilik, ukiuni 50-ini aappaqarsimasoq, ima oqarpoq: „Uinnut tunngatillugu pingaartinnerpaasakka tassaapput Biibili tunngavigalugu uannik siunnersuisarnera aamma uannut asanninnerminit annerusumik Jehovamik asanninnera.“ Uiususi, ilissi pillusi tamatumunnga assingusumik oqartoqarsinnaava?

8. Aappariinnermi ’akissarsilluarumagaanni’ suut iliuuserineqartariaqarpat?

⁸ Ilissi aappariittut Guutip naalagaaffiata soqutigisai Jehovamullu attaveqarnersi inuunissinni pingaarnerpaatippisigit? Ilissi immissinnut Jehovamut kiffartoqatigiittut isigivisi? (1 Mosesi 2:24) Kunngi Salomo silatooq ima allappoq: „Marluugaanni ataasiinnaanermit pitsaaneruvoq, suleruloornerminni akissarsilluassapput.“ (Oqaluussisartup oqaasii 4:9) Aap, uiusoq nuliaasorlu ’akissarsilluarumallutik’, tassa Guutimit pilluaqquneqartumik, ataavartumik asannittumillu attaveqatigiikkumallutik, eqiasuillutik sulisariaqarput.

9. (a) Uiusup suna akisussaaffigaa? (b) Kolossemiut 3:19 naapertorlugu uiusup nuliani qanoq pisartussaavaa?

⁹ Guuti aappariinnermi ilaanersoq ersertarpoq uiusup nuliaasullu Guutip piumasaqaataanik eqqortitsiniarlutik tamarmik immikkut iliuuserisaanni. Uiusup pingaarnerpaamik pisussaaffigaa ilaquttami timip piisigut anersaakkullu pisariaqartitaannik isumaginninnissani. (1 Timotheusi 5:8) Aamma nuliami misigissutsikkut pisariaqartitai eqqumaffigisariaqarpai. Kolossemiut 3:19-imi ima allassimavoq: „Uiususi, nuliasi asassavasi, peqqarniisaarfigeqinasigillu.“ Biibilimik misissueqqissaartartoq nassuiaavoq oqaaseq ’peqqarniisaarneq’ isumaqarsinnaasoq „oqaatsit ajuallannartut isatsinerluunniit“, imaluunniit uiusup „nuliaminik asannittariaqarnermisut, isumassuisariaqarnermisut, illersuisariaqarnermisut ikiuisariaqarnermisullu iliorumannginneranik“. Erseqqippoq taamatut pissusilersorneq ilaqutariinni kristumiuni naleqqutinngitsoq. Uiusorli ilaqutariinni ittuusutut asannittumik siulersuippat, nulia nuannaarluni taassumunnga naalatsigitissaaq.

10. Nuliaasut kristumiut qanoq isiginnittaaseqartariaqarpat?

¹⁰ Nuliaasoq kristumiu aappariinnerminni Jehovap ilaajuarnissaanik kissaateqartoq aamma Guutip piumasaqaataanik eqqortitsisariaqarpoq. Apustili Paulusi ima allappoq: „Nuliaasusi uissinnut [naalatsigitigitsi] soorlu Naalakkamut, uiusoq nuliaminut niaquummat soorlu Kristusi ilagiinnut niaquusoq.“ (Efesosimiut 5:22, 23) Saatanip Eva nakutippaa salluliorluni Guutimit siulersorneqannginneq ataavartumik pillualersitsisarnerarlugu. Siulersorneqarumanngissutsip anersaava ullumikkut aappariippassuarni erseqqilluinnarpoq. Arnanulli Guutimik mianerinnittunut uimut asannittumut naalatsigitinneq nuanniitsuunngilaq. Eqqaamavaat Jehovap Eva pinngortikkaa uiusumut „tulluartumik“, erseqqipporlu tamanna Guutip isaani inissisimaffiusoq ataqqinaataasoq. (1 Mosesi 2:18) Nuliaasoq kristumiu aaqqissuussamik tamatuminnga kajumilluni akuerinnittoq ilumut „uiminut niaqorutaavoq“. — Ussatit 12:4.

11. Qatanngutip angutip aappariinnerminnut suut iluaqutaanerarpai?

¹¹ Aamma aappariit Guutip oqaasianik atuaqqissaaqatigiittarnerat Guutip aappariinnermut ilaatittuarnissaanut iluaqutaassaaq. Gerald, nulianilu ukiuni 55-ini pilluarlutik aappariissimasut, ima oqarpoq: „Aappariittut pilluarnissamut pingaaruteqarnerpaaq tassaavoq aappariit Biibilimik atuaqatigiillutillu atuaqqissaaqatigiittarnerat.“ Imalu nangippoq: „Sammisaqaqatigiinneq, pingaartumik Guutimut kiffartornermut tunngassuteqartunik, aappariit imminnut Jehovamullu qaninnerulissutigissavaat.“ Ilaqutariit Biibilimik atuaqatigiillutillu atuaqqissaaqatigiittarnertik Jehovap najoqqutassiaanik eqqaamannittuarnissamut iluaqutigissavaat; anersaakkut ittunik pingaartitsinerulissapput siumukartuassallutillu.

12, 13. (a) Aappariit qinoqatigiittarnissaat sooq taama pingaaruteqartigaa? (b) Kristumiutut sammisassat suut allat aappariinnermut nakussatsissutaassappat?

 ¹² Aamma aappariit pilluartut qinoqatigiittarput. Uiusoq ’uummammiugisaminik tamanik Jehovamut saqqummiussisarpat’ pissutsinullu atukkaminnut naleqquttunik immikkut eqqaasaqarluni qinusarpat, tamanna qularnanngilluinnartumik aappariinnerannut nakussatsissutaassaaq. (Tussiaat 62:9) Assersuutigalugu isumaqatigiinngikkunnaarnissaq ajornannginnerungaassaaq Ajugaqanngitsoq qinnuigereeraanni siunnersoqqulluni! (Matthæusi 6:14, 15) Taamatuttaaq aamma naleqqutissaaq aappariit ikioqatigiinniarlutik aamma ’kamageqatigiittuarniarlutik isumakkeerfigeqatigiittuarniarlutillu’ aalajangerpata. (Kolossemiut 3:13) Qinuneq Guutimik tatiginninnermut ersiutaavoq. Kunngi Daavi ima oqarpoq: „Kikkut tamarmik isaasa isigaatsit neriulluarlutik.“ (Tussiaat 145:15, NV) Guuti qinunikkut neriulluarfigigaangatsigu isumakuluuteqannginnerusassaagut, nalunnginnatsigu ’isumassoraatigut’. — 1 Petrusi 5:7.

¹³ Jehovap aappariinnermi ilaatittuarnissaanut iluaqutaasoq pingaarutilik alla tassaavoq ilagiit ataatsimiinnerinut ataatsimiigiartarneq oqaluussinermilu suleqatigiinneq. Ataatsimiinnerni aappariit ilinniartarpaat ’qoqassiiniutit’ Saatanip ilaqutariinnik avissaartuutsitsiniutai qanoq ilillutik akiorsinnaanerlugit. (Efesosimiut 6:11) Aamma aappariit oqaluusseqatigiittuartartut ’aalajaalluinnarnissaq’ ilikkartarpaat. — 1 Korinthimiut 15:58.

Ajornartorsiuteqaleraangat

14. Aappariinneq qanoq tatineqalersinnaava?

¹⁴ Nassuerutigisariaqarpoq siunnersuutigineqartut nutaajunatillu qaqutigoortuunnginnerat, taamaakkaluartorli pitsaassaaq ilissi aappariittut taakkua oqaloqatigiissutigigussigit. Eqqaaneqareersut aappariinnissinni immikkut sammineqartariaqarnersut oqaloqatigiissutigisiuk. Biibilili naapertorlugu aappariinnerminni Guutimik ilaatitsigaluartulluunniit „inuunerminni ajornartorsiorumaarput“. (1 Korinthimiut 7:28) Inuttut naammalluinnanngissuseq, silarsuup inatsisaatsup ajortumik sunniinera Diaavulullu napiaaniutai pissutigalugit allaat Guutimut kiffaasut aalajaatsut aappariinnerat tatineqangaarsinnaavoq. (2 Korinthimiut 2:11) Jehovalli taamatut tatineqarnermik naammagittarluta atuisinnaanngortissavaatigut. Aap, tatisineq akiorneqarsinnaavoq. Jobip aalajaatsup nersutaatini, kiffani meeqqanilu annaavai, taamaakkaluartorli taanna pillugu ima allassimasoqarpoq: „Jobi tamakkuninnga tamanik  pineqaraluarluni ajortuliunngilaq Guutilu assuarliuteqarfiginngilaa.“ — Jobi 1:13-22.

15. Stressi pissutigalugu ilaat qanoq qisuariarsinnaappat, aappaasorlu aappani ’isumaatsutut oqaluppat’ qanoq iliortariaqarpa?

¹⁵ Jobilli nuliata Jobi ima oqarfigaa: „Assuarnaassutsit suli aalajangiusimaniinnarniarpiuk? Guuti perloqquinnaruk toqullutillu!“ (Jobi 2:9) Aap, ilimaginngisanik pisoqaraangat allanilluunniit ajornartorsiuteqaleraangat misigissutsit maliinnarlugit iliuuseqarsinnaavugut sianiilliorlutalu. Angut sianisooq ima oqarpoq: „Naqisimanninnerup ilisimasoq silaqanngitsutut iliulersissinnaavaa.“ (Oqaluussisartup oqaasii 7:7, NV) Aappat stressernerup ’naqisimaneqarnerulluunniit’ kingunerisaanik annernartunik oqaaseqariataarpat eqqissisimaniarsarigit. Taamaaqataanik akisineq arlassinnik tamassinnilluunniit oqartitsinnaavoq pissutsinik ajornerulersitsiinnartussanik. (Atuaruk Tussiaat 37:8.) ’Isumaatsutut oqalunnerit’ pakatsinermik nikallunganermilluunniit pissuteqarsinnaasut tamaasa tusaanngitsuusaakkit. — Jobi 6:3.

16. (a) Matthæusi 7:1-5-imi Jiisusip oqaasii aappariinnut qanoq tunngatinneqarsinnaappat? (b) Sooq aappariinnermi oqimaaqatigiissaarinissaq pingaaruteqarpa?

¹⁶ Aappariit imminnut piumaffigineq eqqarsaatigalugu piviusorsiortuusariaqarput. Immaqa aappaasup aapparmi eqqumeequtai aalajangersimasut maluginiarpai imalu eqqarsarluni: ’Allanngortissinnaavakka.’ Immaqa asannillutit naammagittarlutillu aappat ilorraap tungaanut allannguinissaanut ikiorsinnaavat. Puiussanngilalli Jiisusip inuk inuup allap kukkunimininnguinik maluginiaasoq inummut qatanngummi isaani ’makiarninnguamik’ isiginiaasumut, ’paakkarummilli’ nammineq isiminiittumik malugisaqanngitsumut, assersuummagu. Jiisusi ima kajumissaarivoq: „Eqqartuusseqinasi [Eqqartuussissaaritsi, NV] eqqartuunneqaqqunasi.“ (Atuaruk Matthæusi 7:1-5.) Tamannali ima paasisariaqanngilaq ingasattumik kukkunerit isiginngitsuusaarneqassasut. Qatanngut Robertimik atilik, ukiuni 40-ngajanni aappaqarsimasoq, ima oqarpoq: „Aappariit imminnut ammaffigeqatigiittarlutillu unneqqariffigeqatigiittarunik qimerluuinerillu tunngavilersorluakkat akuerinissaannut piumassuseqartarunik, tamanna immaqa allannguissutigisinnaavaat.“ Oqimaaqatigiissaarigitsili. Aappavit aalajangersimasunik pissuseqannginnera aliasuutiginagu maannakkut pissuserisaanik nuannersunik eqqumaffiginnillutillu nuannaarutiginnikkuit pitsaanerussaaq. — Oqaluussisartup oqaasii 9:9.

17, 18. Tatineqarpallaalersutut misigigutta sumut ikiortissarsiorsinnaavugut?

¹⁷ Pissutsit atukkat allanngornerat misilinneqaataasinnaavoq. Aappariit meerartaaraangamik arlalinnik unamminiagassaqalertarput. Immaqa aappaasoq imaluunniit meeqqat ilaat perululluni napparsimalerpoq. Angajoqqaat utoqqalisut immikkut isumassorneqartariaqarsinnaapput. Qitornat inersimasunngortut nuuttarput, immaqa angajoqqaanit ungasissumiittumut. Teokratiimut tunngasunik suliassaqarlunilu akisussaaffeqarnerup kingunerisaanik suli allanik allanngortoqarsinnaavoq. Tamakkua tamarmik aappariinnik artukkiisinnaapput.

¹⁸ Misigiguit aappariittut tatineqarnersi ingasappallaalersoq qanoq iliorsinnaavit? (Ussatit 24:10) Qasusuisaarit! Guutip kiffaasa ilumoortumik pallorfiginnikkunnaarnissaat Saatanip kissaatiginerpaavaa. Sulilu nuannaarnerussaaq uiusoq nuliaasorlu pallorfiginnikkunnaarpata. Taamaattumik aappariinnissi allunaasatut pingasulittut ittuujuartinnissaa sapinngisat tamaat sulissutigiuk. Misilinneqangaaraluarlutik aalajaattuartut pillugit Biibilimi oqaluttuarpassuaqarpoq. Ilaanni Daavip Jehova uummammiuminik aniatitsivigaa ima oqarluni: „Saammaannga Guuti, inuit qinugimmannga, ulloq tamaat tatineqarama.“ (Tussiaat 56:2) Aamma illit taamatut misiginikuuit? Tatineqarnerit qanigisarinngisanneeraluarpat qanigisanneeraluarpalluunniit manna eqqaamajuk: Daavi pinertusaarnissamut nakussatsinneqarpoq, aamma illit nakussatsinneqarsinnaavutit. Daavi ima oqarpoq: „[Jehovap] ujaranni akivaanga, aniguisippaangalu siooqqatigisannit tamanit.“ — Tussiaat 34:5.

 Pilluaqqussutit suli allat

19. Saatanip saassussineri qanoq akiorsinnaavavut?

¹⁹ Naggatissap nalaani aappariit ’tuppallersaqatigiittuartariaqarlutillu ineriartorteqatigiittuartariaqarput’. (1 Thessalonikamiut 5:11) Puiorniaqinagu Saatanip uagut Jehovamik ilumoorfiginninnerput namminissarsiornermik pissuteqarneraraa. Assuarnaakkunnaarsinniarluta suut tamaasa — aamma aappariinnermik aseruineq — sakkuginiassavai. Saatanip saassussineri akiorniarlugit Jehova tatigilluinnartariaqarparput. (Ussatit 3:5, 6) Paulusi ima allappoq: „Tamaasa pissatsitsisikkut atussallugit sapinngilakka.“ — Filippimiut 4:13.

20. Aappariinnermi Guutimik ilaatitsineq sunik pilluaqqussutissartaqarpa?

²⁰ Aappariinnermi Guutip ilaatinneratigut pilluaqqussutisiarineqartartut amerlaqaat. Joelip nuliatalu ukiuni 51-ini aappariinnerminni tamanna misigisimavaat. Taanna ima oqarpoq: „Nuliara aappariittullu pilluarnerput pillugit Jehova qutsavigaara. Nuliaalluaqaaq.“ Qanoq ilillutik aappariilluartuarsinnaasimappat? „Inussiarnisaarfigeqatigiittarnissarput, asannittuliorfigeqatigiittarnissarput naammagittarfigeqatigiittarnissarpullu pingaartittuaannarparput.“ Pissutsit aaqqissuussaaneranni matumani kukkunngilluinnarluni taamaaliortoqarsinnaanngilaq, najoqqutassianilli Biibilimeersunik maleruaanissaq Jehovallu aappariinnermi ilaatinnissaa sulissutigineqarsinnaavoq. Tamanna sulissutigigaanni aappariinneq ’allunaasatut pingasulittut kittorajaatsutut’ issaaq. — Oqaluussisartup oqaasii 4:12.

Eqqaamavigit?

• Aappariinnermi Jehovamik ilaatitsineq qanoq paasisariaqarpa?

• Ajornartorsiuteqaleraangat aappariit qanoq iliortariaqarpat?

• Qanoq ililluni nalunnginneqarsinnaava Guuti aappariinnermi ilaanersoq?

[Atuaqqissaarnermi apeqqutit]

[Qupp. 26-mi assiliartat]

Qinoqatigiittarneq aappariit misilinneqaatit unamminiagassallu naammagalugit atornissaannut iluaqutigissavaat