Aliasunneq qanoq akuerineqarsinnaasoq

„Naak [Jaakup] ernermi panimmilu tamarmik tuppallersarniaraluaraanni tuppallersaqqunngilaq ima oqarami: ’Aliasullunga ernera ornikkumaarpara samunga toqusut inaannut.’ Erninilu upputigaa.“ — 1 Mosesi 37:35.

ATAATAANERPAAP JAAKUP ernermi annaanera aliasuutigingaarpaa, toqunissamilu tungaanut taamaannissani naatsorsuutigaa. Immaqa Jaakutut misigivutit, asasannik annaasaqarsimanerit ima anniaatigitigalugu anniaatigiunnaanngisaannassallugu. Taama aliasutsigineq Guutimut uppernikinnermut ersiutaava? Naamerluinnaq!

Biibilimi Jaaku angutitut upperluartutut oqaluttuarineqarpoq. Taassuma uppernera maluginiarnartoq aataata Aaperaap ataataatalu Iisaap uppernerannut naligitillugu eqqaaneqarpoq. (Hebræerit 11:8, 9, 13) Ilaatigut Guutimit pilluaqqusaajumalluni unnuaq naallugu inngili paavaa. (1 Mosesi 32:25-31) Erseqqippoq Jaaku angutaasoq anersaakkut ittunik pingaartitsisorujussuaq. Jaakup aliasungaarneranit ilikkarparput, Guutimut upperluartoqarsinnaasoq asasamik annaasaqarneq aliasuutigingaaraluarlugu. Asasamik annaasaqarsimatilluni aliasunneq nalinginnaalluinnarpoq pissusissamisoorlunilu.

Aliasunneq suua?

Aliasunneq assigiinngitsutigut uagutsinnut sunniuteqarsinnaavoq. Inuit amerlanersaanni misigissuseq malunnarnerpaasoq tassa misigissutsikkut anniaateqangaarneq. Leonardo  14-inik ukioqarluni ataatani uummammigut puammigullu ajoquteqarluni toqoriataarmat qanoq qisuariarnersoq malugiuk. Leonardop puiunngisaannarpaa ulloq taanna ajami qanoq pisoqarsimaneranik oqaluttuummani. Siullermik ilumoornera upperiumanngilaa. Ilisinermi ataatami timaa toqungasoq takuaa, suulli tamarmik piviusuunngitsutut ipput. Leonardo ukiup affaani qiasinnaanngilaq. Akuttunngitsumik pilertarpoq ataatami sulereerluni angerlarnissaa utaqqillugu. Ukiup ataatsip missaa qaangiuttoq aatsaat paasilluarpaa ataatani toqusimasoq, taamaalimmallu kiserliungaalerpoq. Illumut inoqanngitsumut angerlarnerinnaata eqqaasittarpaa angutaa peerussimasoq. Tamanna eqqaagaangamiuk amerlanertigut sapilertarpoq qissasertarlunilu. Ataatani maqaaseqaa!

Soorlu Leonardop misigisimagaa, aliasungaartoqarsinnaavoq. Ingerlaqqittoqarsinnaavorli. Ingerlaqqinnissamulli piffissaq sivisooq atorneqarsinnaasarpoq. Soorlu ikip maminnissaanut piffissaq sivisulaartoq ingerlasartoq, taamatut aamma aliasunnerup annernartua nipaalliartortarpoq. Tamanna pitinnagu, qaammatit arlallit allaallumi ukiut arlallit ingerlasinnaapput. Anniaateqangaarneq aallaqqaammut misigineqartartoq piffissap ingerlanerani milliartuaassaaq, inuunerlu qaammariartorlunilu siunertaqarneruleriartussaaq.

Anniaateqarneq nipaallissappat, oqaatigineqartarpoq aliasunneq aliasunnermik qaangiiartuaarnermut pissutsinullu atugarilikkanut naleqqussarnermut ilaasoq saneqqunneqarsinnaanngitsoq. Inuusimagaluartoq peerussimavoq, taannalu ilaginagu inuunissaq sungiunniartariaqarpoq. Aliasunneq misigissutsinik ersersitsinissamut iluaqutaasinnaavoq. Soorunami inuit tamarmik aliasuttarneri assigiittanngillat, mannali qularnanngilaq: Aliasunnermik naqisimanninneq eqqarsartaatsimik, misigissutsinik, timimillu ajoqusiisinnaavoq. Aliasunneq iluaqutaasumik qanoq ersersinneqarsinnaava? Qanoq iliornissamut siunnersuutinik atoriaannaasunik Biibilimiittoqarpoq. *

Aliasunneq qanoq iliuuseqarfigineqarsinnaasoq

Allanik oqaloqateqarnerup oqiliallaataasinnaanera qimagaasorpassuit paasisimavaat. Jobip Biibilip nalaani inuusup qitornani qulit tamaasa annaareerlugit allanillu alianartunik eqqorneqareerluni oqaasii eqqarsaatigeriakkit: „Inuunera maajugeqaara [qatsuteqaara, 1990]; maanna naammagittaalliuutikka nununagit aniatissavakka isumatsassimaninni oqalullunga.“ (Jobi 1:2, 18, 19; 10:1) Malugiuk Jobip pisariaqartissimagaa isumakuluutimi ’nununagit aniatinnissaat’, taamaaliorusupporlu oqalunnermigut.

Paulop anaanani annaavaa, taannalu ima oqarpoq: „Uannut iluaqutaasimasut ilagaat  anaanama oqaluuserinera.“ Misigissutsit pillugit ikinngummik tatigisamik oqaloqateqarneq oqiliallaataasinnaasorujussuuvoq. (Ussatit 17:17) Yonep anaanami annaanerata kingorna qatanngutini kristumiut qinnuigai pulaakulaneroqqulluni. Taanna oqarpoq: „Oqaloqateqarneq anniaammik nipaallisitsisarpoq.“ Illittaaq paasissagunarpat paasinnittumik oqaloqateqartaraanni misigissutsinillu oqaasinngortitsisaraanni misigissutsit aqukkuminarnerusarnerat.

Aamma allanneq iluaallannarsinnaavoq. Misigissutsimik oqaluuserinissaannik sapernartitsisut immaqa allaganngorlugu oqaatiginissaat sapernannginnerutissinnaavaat. Angut aalajaatsoq Daavi Saulip Jonatanillu toqunerisa kingorna aliasunnini ersersillugu alianartorujussuarmik taalliorpoq. Upput taanna killisimaarnartoq piffissap ingerlanerani Biibilimi Samuelimik allakkat aappaannut ilaalerpoq. — 2 Samueli 1:17-27.

Qianeq aamma misigissutsinik aniatitsinissamut iluaqutaasinnaavoq. Biibilimi ima allassimavoq: „Suut tamarmik aalajangersimasumik piffissaligaapput. . . . Qiaffissaqarpoq.“ (Oqaluussisartup oqaasii 3:1, 4) Asasamik annaasaqaraanni qularnanngivippoq ’qiaffissanngorsimasoq’. Aliasunnermi qianeq ippinnanngilluinnarpoq. Biibilimi assersuutissarpassuaqarpoq angutinik arnanillu uppertunik isertoratik qianermikkut aliasunnerminnik ersersitsisunik. (1 Mosesi 23:2; 2 Samueli 1:11, 12) Jiisusi Kristusi „qullililerpoq“ ikinngutimi asasami Lazarusip qanittukkut toqusup ilineqarfia qanilligamiuk. — Johannesi 11:33, 35, 1936.

Aliasunneq iliuuseqarfiginiaraanni naammagittarnissaq pisariaqarpoq, misigissutsikkut pitsaanerulertoqarlunilu ajornerulertoqartarsinnaammat. Eqqaamajullu qullilinerit kanngusuutigisariaqannginnakku. Guutimut uppertorpassuit misigisimavaat qianeq aliasunnermik qaangiiartuaarnermut ilaasoq nalinginnaasoq pisariaqartorlu.

 Guutimut qanilligit

Biibilimi ima kajumissaarneqarpugut: „Guuti qaninniarsiuk, taava taanna ilissinnut qanillissaaq.“ (Jaaku 4:8) Guutimut qanillinissamut iliuuserineqarsinnaasut pingaarnerpaat ilagaat taassumunnga qinuneq. Qinunerup pingaaruteqassusia suusupagineqassanngilaq. Biibilimi tuppallernartumik ima neriorsuuteqarpoq: „[Jehovap] qanippai sequmissimasumik uummatillit, annaattarpai aserortersimasumik anersaallit.“ (Tussiaat 34:19) Aamma imaattumik neriorsuuteqarpoq: „Nanertuutigisat [Jehovamut] tunniuguk, taava isumagiumaarpaatit.“ (Tussiaat 55:23) Manna eqqarsaatigeriaruk: Eqqaaneqareersutut inuppassuit ikinngummik tatigisamik misigissutsit pillugit oqaloqateqarnertik iluaqutigisimavaat. Sulilu iluaqutaanerussannginnerpa misigissutsit pillugit Guuti oqaluttuukkaanni? Taanna neriorsuisimavoq uummativut tuppallersarniarlugit. — 2 Thessalonikamiut 2:16, 17.

Paulo eqqaaneqareersoq ima oqarpoq: „Naalliuppallaaleraangama sapililivissutullu misigigaangama, seeqqummerlunga Guutimut qinusarpunga. Ikioqqullunga kimigiiserfigisarpara.“ Paulop qularinngilaa qinnutini iluaqutaasut. ’Guutimut tuppallersaajuartumut’ qinujuaruit aamma illit misigissavat  taassuma aliasunnivit iliuuseqarfiginissaanut ilinnik sapiissuseqalersitsillunilu nakussatsitsinera. — 2 Korinthimiut 1:3, 4; Romamiut 12:12.

Makititaanissamik neriuut

Jiisusi oqarsimavoq: „Uanga makissutaallungalu inuussutaavunga; uannut uppertoq toqugaluaruniluunniit inuuinnassaaq.“ (Johannesi 11:25) Biibilimi ajoqersuutigineqarpoq toqusut inuuleqqikkumaartut. * Jiisusip nunamiikkallarami takutippaa toqusunik makititsisinnaalluni. Ilaanni niviarsiaraq aqqaneq-marlunnik ukiulik makitippaa. Angajoqqaavi qanoq qisuariarpat? Taakkua „tupigusunnermik paatsiveerulluinnarput“. (Markusi 5:42) Jiisusip Kristusip qilammi kunngiusup naalakkersuinermini inuit millionillit nunarsuarmi inuunermut eqqissineqarfiusumut naapertuilluarfiusumullu makitissavai. (Apustilit Suliaat 24:15; 2 Petrusi 3:13) Takorlooriaruk qanoq nuannaartoqartigissasoq toqusimasut makeralerpata asasaminnullu takummaalerpata!

Claudetep, ernerminik Renatomik timmisartup ajutoorneratigut annaasaqartup, ernermi assinga nillataartitsiviup saavaniitippaa. Asseq taanna akuttunngitsumik isiginnaartarpaa imminullu ima oqarfigisarluni: ’Makiffissami takoqqikkumaarpugut.’ Aamma Leonardop ataatami silarsuassami nutaami Guutip neriorsuutigisaani uummaqqinnissaa takorloortarpaa. Aap, makititsinissamik neriuut Claudetemut Leonardomullu kiisalu allarpassuarnut asasaminnik annaasaqarsimasunut assut tuppallersaataavoq. Neriuut tamanna aamma illit tuppallersaatigisinnaavat! (w08 07/01-E)

[Quppernerup ataani ilanngussat]

[Qupp. 7-mi ungalusaq/​assiliartaq]

„Guuti tuppallersaajuartoq“

„Unnersiutigineqarli Guuti Naalakkatta Jiisusi-Kristusip Ataataa, Ataataq nallittuisoq Guutilu tuppallersaajuartoq.“ — 2 Korinthimiut 1:3.

Biibilimi allassimaffimmi tamatumani takutinneqarpoq Guutip kiffani ilumoortut ajornartorsiutit suulluunniit naammagalugit atornissaannut ikiorsinnaagai. Ilaatigut Jehova tuppallersaasinnaavoq ikinngut imaluunniit ilaqutaq uppeqatigisaq aqqutigalugu.

Leonardo, ataataminik annaasaqartoq, nakussatsissutigisaminik tuppallersaatigisaminillu misigisaqarpoq. Ullut ilaanni angerlamut apuuteqqammerluni eqqaalerpaa angerlarsimasoqanngitsoq, qiarsuataalerporlu. Qanittumiittumut illoqannginnersamukarpoq issiavimmullu ingilluni, qiaqqilerlunilu. Qullini kuuttut Guutimut ikioqqulluni qinuvoq. Taava biili nioqqutissanik assartuut ungasinngitsuanut uneriataarpoq, Leonardollu biilip aquttua ingerlaannaq ilisaraa. Tassaana uppeqataasa ilaat nioqqutissanik ingerlatsilluni aqqutissaminik kukkusoq. Qanittumiinnerinnaa Leonardomut tuppallersaataavoq.

Ilaanni angut nuleerneq kiserliorlunilu nikallungasupilussuuvoq. Sapilivilluni qialerpoq, suut tamarmik neriuutissaqanngitsutut isikkoqarmata. Guuti ikioqqulluni kimigiiserfigaa. Qinutillugu telefoni sianerpoq. Sianertoq tassaavoq ernutaa. Angut nuleerneq ima oqaluttuarpoq: „Taassuma oqaloqatigilaarnera sapiissuseqaleqqissutigaara. Tamanna ikioqqullunga qinnutinnut akissutaasoraara.“

 [Qupp. 9-mi ungalusaq]

Aliasuttut allanik tuppallersaasarput

„[Guuti] annikilliuuteqarnitsinni tamani uatsinnik tuppallersaasartoq annikilliuuteqartut tamaasa uatsinnut tuppallersarsinnaaqqullugit Guutip uatsinnut tuppallersaatigisaanik.“ — 2 Korinthimiut 1:4.

Oqaatsit taakku qanoq isumaqarnerat kristumiut ilumoortut ilarpassuisa namminneq misigisimavaat. Asasaminnik annaasaqarnermik akuerinninnissaminnut tuppallersarneqarnermik nakussatsinneqarnermillu kingorna, namminneq allanik qiimmassaasinnaanngorlutillu tuppallersaasinnaanngorsimapput.

Claudete assersuutigeriartigu. Taassuma allat upperisaminik Biibilimeersumik oqaluttuunniarlugit pulaartarpai. Ernini annaanngikkallaramiuk arnamut aammigut kræfterluni toqusimasumik ernilimmut pulaartarsimavoq. Arnap taassuma Claudetemit pulaarneqartarnini nuannaraa isumaqarlunili Claudetep anniaatini paasilluinnarsinnaanngikkaa. Claudetep ernerata toqunerata kinguninngua arnaq taanna Claudetemut pulaarpoq, oqaluttuarporlu aggerluni takuniarlugu Claudetep nammineq ernermi toqunerata kingorna Guuti suli upperineraa. Claudetep upperluarnera arnap taassuma killinneqaatigingaarpaa, maannalu Claudetep arnaq taanna Biibilimik atuaqqissaaqatigisarpaa, taassumalu Guutip oqaasia tuppallersaatigingaartarpaa.

Leonardo ataatami toqunerata kingorna aalajangerpoq tusilartut tusarliussamik Biibilimeersumik tuppallersaataasumik avitseqatigisinnaajumallugit ussersorluni oqalunneq ilinniarniarlugu. Nammineq isumaqarpoq tusilartunik ikiuinini assut iluaqutigisimallugu. Taanna oqarpoq: „Aliasunnerma akuerinissaanut iluaqutaasut ilagaat tusilartunik Guutimik ilisarisimannilerniarnissaannut ikiuerusunnera. Tamatumunnga piffissarujussuaq nukippassuillu atorpakka. Biibilimik atuaqqissaaqatigisartagara siulleq kuisittoq takugakku aliasunnera nuannaarninngorpoq. Ataatama toqunerata kingorna aatsaavissuaq nuannaavillungalu nalerisimaavippunga.“ — Apustilit Suliaat 20:35.

[Qupp. 5-mi assiliartaq]

Misigissutsit oqaluuserinerat oqiliallaataasinnaavoq

[Qupp. 6-mi assiliartaq]

Eqqarsaatinik allaganngortitsineq aliasunnerup ersersinnissaanut iluaqutaasinnaavoq

[Qupp. 6-mi assiliartaq]

Makititaanissamik neriuut pillugu atuarneq assut tuppallersaataasinnaavoq

[Qupp. 8, 9-mi assiliartaq]

Jiisusi neriorsuivoq imminut uppertut makititaajumaartut