Jehova uagutsinnik aniguisitsisuuvoq

„[Jehovap] annaallugillu aniguisissavai.“ — TUSSIAAT 37:40.

1, 2. Jehova pillugu sallusuissut tunngaviusoq suna uagutsinnut tuppallersaataallunilu nakussatsissutaava?

TARRAT seqernup pilersitai allanngorartuartarput. Nunarsuup kaavinnera pissutigalugu tarrat nikittuartarlutillu allatut ilusinittuartarput. Nunarsuarmilli seqinermillu Pinngortitsisoq allanngorneq ajorpoq. (Malaki 3:6) Biibilimi allassimavoq taanna ’allanngorneq ajortoq alanngerarfigineqanngitsorlu’. (Jaaku 1:17) Jehova pillugu sallusuissut tunngaviusoq tamanna uagutsinnut tuppallersaataallunilu nakussatsissutaasarpoq, ingammik ilungersunartunik misilinneqarlutalu unamminiagassaqaraangatta. Sooq?

² Soorlu allaaserisap matuma siuliani ersersinneqartoq, paasinarsivoq Jehova Biibilip nalaani kiffaminik aniguisitsisuusoq. (Tussiaat 70:6) Taanna allanngorneq ajormat oqaatsiminillu eqqortitsiuaannarmat, ullumikkut kiffai taassuma ’annaassillunilu aniguisitsiumaarneranik’ qularutiginninnginnissamut pissutissaqarluarput. (Tussiaat 37:40) Jehova ukiuni kingulliunerusuni kiffaminik qanoq ililluni aniguisitsisarsimava? Uagutsinnik inunnik ataasiakkaanik qanoq ililluni aniguisitsisinnaava?

Akerlilersuisuninngaanniit aniguisitaasut

3. Sooq qularutiginngilluinnarsinnaavarput akerlilersuisut Jehovap innuttai nutaarsiassamik nuannersumik oqaluussissutiginnikkunnaarsissinnaassanngikkaat?

³ Saatani Jehovap Nalunaajaasuinik qanorluunniit malersuitigigaluaruni, taakkua iluunngarlutik Jehovamik pallorfiginninnissaannut akornutaasinnaanngisaannassaaq. Guutip oqaasiani ima neriorsoqqissaarneqarpugut: „Sakkut ilinnut sakkuaatissatut saffiukkat atorsinnaassuseqassanngillat, oqqat ilinnik unnerluutiginnittut tamaasa eqqartuutitissavatit pisuusutut.“ (Esaja 54:17) Akerlilersuisut iluatsitsinatik Guutip innuttaanik  oqaluussiunnaartitsiniarsarisimapput. Tamatumunnga takussutissat marluk sammeriartigit.

4, 5. Jehovap innuttai 1918-imi qanoq akerlilersorneqalerpat, qanorlu kinguneqarpa?

⁴ 1918-imi Jehovap innuttai palaseqatigiinnit oqaluussinermik unitsitserusuttunit aallarnerneqartumik malersorneqangaalerput. Maajip arfineq-aappaanni J. F. Rutherford, taamanikkut silarsuaq tamakkerlugu oqaluussinermik nakkutilliisuusoq, qullersaqarfimmiittullu allat arlallit Amerikami eqqartuussiviit qullersaannit parnaaruteqquneqarput. Qaammatit marluunngitsulluunniit tamatuma kingorna qatanngut Rutherford suleqataalu sivisuumik parnaarussassanngortinneqarput ajortumeeriniartartutut eqqunngitsumik unnerluutigineqarlutik. Akerlilersuisut eqqartuussisutigut oqaluussiunnaartitsilluinnarniarnerat iluatsippa? Soorunami naamik!

⁵ Eqqaamajuk Jehovap neriorsuutaa una: „Sakkut ilinnut sakkuaatissatut saffiukkat atorsinnaassuseqassanngillat.“ Marsip 26-ani 1919-imi — qatanngutip Rutherfordip suleqataasalu eqqartuunneqarnerata kingorna qaammatit qulingiluat qaangiuttut — ilimagineqanngitsumik pissutsit allanngoriataarput, qatanngutillu akiliunneqarlutik parnaarussaajunnaarput. Aappaaguani, maajip tallimaani 1920-mi, taakkununnga unnerluussutit atorunnaarsinneqarput. Qatanngutit kiffaanngissusertik eqiasuillutik oqaluussinermut atorpaat. Tamanna qanoq kinguneqarpa? Taamanimiilli tupinnaannartumik amerliartortoqarpoq! Taamatut kinguneqarsimaneranut tunngatillugu suut tamarmik uagutsinnik ’aniguisitsisumut’ ataqqinaataapput. — 1 Korinthimiut 3:7.

6, 7. (a) Tysklandimi nazistit nalaanni Jehovap Nalunaajaasui qanoq pineqarpat, qanorlu pippat? (b) Jehovap innuttaasa nalitsinni oqaluttuarisaaneranni suna erserpa?

⁶ Maanna takussutissaq alla sammeriartigu. 1934-mi Hitler uppernarsaavoq Jehovap Nalunaajaasui Tysklandimiittut nungutinniarlugit. Tamanna oqaasiinnartigut sioorasaarutaanngilaq, tamatumami kingorna inuppassuit tigusarineqarlutillu parnaarunneqarput. Jehovap Nalunaajaasui tusindillit naalliutsinneqarput, hundredellillu tigusanut inissiarsuarni toqupput. Hitlerip Jehovap Nalunaajaasuinik nungutitsiniarnera iluatsippa? Tysklandimi nutaarsiassamik nuannersumik oqaluussissutiginninneq unitsivippaa? Naamerluinnaq! Qatanngutit malersugaatillutik isertortumik oqaluussisarput. Nazistit uppisitaammata kiffaanngissusertik oqaluussinermik ingerlatiinnarneranut atorpaat. Ullumikkut Tysklandimi 165.000-it sinnerlugit oqaluussisartoqarpoq. Uagutsinnik ’aniguisitsisartup’ neriorsuutiminik matuminnga eqqortitsisarnini erserseqqippaa: „Sakkut ilinnut sakkuaatissatut saffiukkat atorsinnaassuseqassanngillat.“

⁷ Jehovap Nalunaajaasuisa nalitsinni oqaluttuarisaaneranni erseqqippoq Jehovap innuttami ataatsimut isigalugit nungutinneqarnissaat qaqugumulluunniit akuerinavianngikkaa. (Tussiaat 116:15) Jehovalli inuttut ataasiakkaatut qanoq illersussavaatigut? Jehovap tamatta immikkut qanoq aniguisittarpaatigut?

 Ajoquserneqannginnissamut illersorneqartarpugut?

8, 9. (a) Qanoq ililluta nalunngilarput ajoquserneqannginnissamut illersorneqarnissarput qulakkeersinnaanagu? (b) Piviusorsiorluta suna paasilluartariaqarparput?

⁸ Nalunngilarput inuttut ataasiakkaatut ajoquserneqannginnissamut illersorneqarnissarput qulakkeersinnaanagu. Hebræeritut aalajaatsutut pingasutut inuusaliamik kuultiusumik kunngip Nebukadnesarip nappagaanik pallorfiginnikkumanngitsutut isumaqarpugut. Angutit inuusuttut Guutimik mianerinnittut taakkua ajortumeerneqannginnissaminnut Jehovamit tupinnartuliornikkut illersorneqarnissartik naatsorsuutiginngilaat. (Atuaruk Danieli 3:17, 18.) Jehovalli aatsitsivimmit ikualasumit aniguisippai. (Danieli 3:21-27) Biibililli nalaani allaat tupinnartuliornikkut aniguisitaasarneq qaqutigoortuuvoq. Jehovamut kiffaasut aalajaatsut ilarpassui akerlilersuisunit toqutaasimapput. — Hebræerit 11:35-37.

⁹ Ullumikkummi? Jehova ’aniguisitsisuugami’ qularnanngilluinnarpoq inunnik ataasiakkaanik navianartunit aniguisitsisinnaasoq. Jehova pisimasuni aalajangersimasuni akuliussimanersoq akuliussimannginnersorluunniit qularnata oqaatigisinnaavarput? Naamik. Navianartumit aniguisimasoq immaqa misigivoq Jehova akuliussimasoq. Allat taassuma taamatut isumaqarnera assortorsinnaanngilaat. Aammali piviusorsiortuusariaqarpugut, kristumiorpassuit aalajaatsut malersugaanertik pissutigalugu, assersuutigalugu nazistit nalaanni, toqusimanerat miserratiginagu. Allat pisimasuni alianartuni allani toqusimapput. (Oqaluussisartup oqaasii 9:11, 1990) Ima aperisinnaavugut: „Nalunaajaasut aalajaatsut toqujaarpallaaraangata, taava tamanna Jehovap aniguisitsinissani pillugu neriorsuumminik unioqqutitsisimaneranut ersiutaasarpa?“ Naamik, taamaattoqarsinnaanngilaq.

10, 11. Sooq inuit toqu soriarsinnaanngilaat, Jehovalli suut iliuuserisinnaavai?

¹⁰ Manna eqqarsaatigeriaruk: Toqu soriarsinnaanngilarput, inuummi kialuunniit ’inuunini annaassinnaanngilaa toqusut inaata’ — tassa Sheolip imaluunniit Hadesip, inuiaat ataatsimut ilerrata — ’pissaaneranit’. (Tussiaat 89:49) Jehovami taamaaliorsinnaava? Qatanngutip arnap nazistit naalliutsitsineranni aniguisup anaanami, Jehovamut nalunaajaasuusup, asasamik ilaasa tigusanut inissiarsuarni toqunerata kingorna tuppallersarniarluni ilaanni oqaaserisimasai uku eqqaamavai: „Toqu naassaanngitsumik atuutissagaluaruni Guutimit nukittunerussagaluarpoq, ilaa?“ Soorunami toqu inuunerup Puilaffianit ajugaqanngitsuusumit pissaaneqarnerunngilluinnarpoq! (Tussiaat 36:10) Toqusut inaanniitttut, tassa Sheolimiittut imaluunniit Hadesimiittut, tamaasa Jehovap eqqaamavai, taakkualu tamaasa immikkut aniguisikkumaarpai. — Lukasi 20:37, 38; Saqqummersitat 20:11-14.

¹¹ Tamannali nalliutserlugu Jehova ullumikkut kiffami aalajaatsut inuuneranni toqqaannartumik akuusarpoq. Maanna uagutsinnik ’aniguisitseriaasii’ pingasut sammissavavut.

Anersaakkut illersorneqarneq

12, 13. Sooq anersaakkut illersorneqarnissarput pingaaruteqarnerpaava, taamatullu illersorneqarnissarput Jehovap qanoq isumagisarpaa?

¹² Jehovap anersaakkut illersortarpaatigut, tamannalu pingaaruteqarnerpaavoq. Kristumiuugatta ilumoortut maanna inuunitsinnit pingaaruteqarnerusoqartoq paasivarput. Pigisarput pingaaruteqarnerpaaq tassaavoq inuttut nammineq Jehovamut attaveqarnerput. (Tussiaat 25:14; 63:4) Taassumunnga attaveqarnata maanna inuunerput isumaqarpiarnavianngikkaluarpoq aamma siunissamut neriuutissaqassanngikkaluarpugut.

¹³ Qujanartumik Jehovap iluaqutissatsinnik tamanik imminut qanimut attaveqartuarnissamut pisariaqartitatsinnik tunivaatigut. Taassuma oqaasia, anersaava illernartoq silarsuarlu tamakkerlugu ilagiissai iluaqutigisinnaavavut. Iluaqutissat taakkua qanoq atorluarsinnaavavut? Eqiasuilluta taassuma oqaasianik atuaqqissaartuartarnitsigut uppernerput neriuuterpullu nakussatsissavavut. (Romamiut 15:4) Ilumoorluta taassuma anersaava qinnutigisarutsigu eqqunngitsumik iliornissamut ussernartorsiornerit akiornissaannut ikiorneqassaagut. (Lukasi 11:13) Inussiaqatigiit atuakkat atuagassiallu Biibililersaarutit aqqutigalugit aamma ataatsimiinnerni ataatsimeersuarnernilu siunnersuutigisartagaannik malinninnitsigut, anersaakkut ’nerisassat piffissaq eqqorlugu tunniunneqartut’ ineriartuutigisarpavut. (Matthæusi 24:45)  Aaqqissuussat taakkua anersaakkut illersuutigisarpavut Guutimullu qanittumik attaveqarnissatsinnut iluaqutigisarlugit. — Jaaku 4:8.

14. Misigisaq Jehovap anersaakkut illersuisarneranik ersersitsisoq oqaluttuariuk.

¹⁴ Jehovap taamatut anersaakkut illersuisarnera erseqqissarniarlugu angajoqqaat allaaserisap matuma siuliata aallaqqaataatungaani eqqaaneqartut eqqarsaatigisinnaavavut. Taakkua panimmik, Theresap, ujaarineqalernerata kingorna ullualuit qaangiuttut alianaqisumik nalunaarfigineqarput: Toqutaasimavoq. * Ataataasoq ima oqaluttuarpoq: „[Panipput] Jehovamut paareqqullugu qinuvunga. Nassuerutigissavara toqutaasimasoq nassaarineqarmat qinnutima tusarneqarsimannginnera aallaqqaataani paasiuminaatsikkaluarakku. Nalunngikkaluarpara Jehovap tupinnartuliornikkut kiffani illersorniarlugit neriorsorsimanngikkai, nassuiaanneqarnissarali qinnutigiuarpara. Tuppallersaatigaara paasigakku Jehova innuttaminik anersaakkut illersuisartoq, attavigiuarnissaminut pisariaqartitatsinnik tunisarluta. Naassaanngitsumik inuuneqalernissamut illersorneqarneq taamaattoq aalajangiisuuvoq, taamaattumillu timikkut illersorneqarnermit pingaarnerulluni. Taamaalillugu Jehovap Theresa illersorpaa, toqussanimi tikillugu aalajaattuarpoq. Nalunnginnakku Theresap siunissaa Jehovap asannittup assaaniittoq qamuuna eqqissivunga.“

Napparsimatilluni nakussatsinneqarneq

15. Nappaateqalersimagutta Jehovap qanoq ikiorsinnaavaatigut?

¹⁵ Jehovap ’napparsimalluta nallavitsinni’ Daavimik nakussatsitsisimanermisut nakussatsissinnaavaatigut. (Tussiaat 41:4) Nalitsinni Jehovap tupinnartuliornikkut ajorunnaarsilluta aniguisinneq ajorpaatigut, ikiortarpaatigulli. Qanoq? Najoqqutassiat taassuma oqaasianiittut katsorsartinnermut allanullu tunngatillugu isumatusaartumik aalajangiinissamut iluaqutigisinnaavavut. (Ussatit 2:6) Allaaserisani Napasuliaq Alapernaarsuiffik-niittuni aamma Vågn op!-iniittuni peqqiilliuutit aalajangersimasut pillugit atorluarsinnaasunik paasissutissaqarlunilu siunnersuuteqarpoq. Jehovap anersaani aqqutigalugu ’pissaanermik pissusissamik akimuisumik’ tunisinnaavaatigut, qanorluunniit pisoqassagaluarpat pissutsit atukkavut naammagalugit atorsinnaaniassagatsigit assuarnaattuarsinnaaniassagattalu. (2 Korinthimiut 4:7, NV) Tamakkua iluaqutigalugit nappaaterput Jehovamut attaveqarnitsinnit eqqarsaatiginerunaveersaarsinnaavarput.

16. Qatanngutip angutip nappaateqalersimanini qanoq naammagalugu atorpaa?

¹⁶ Eqqarsaatigeriaruk qatanngut angut inuusuttoq allaaserisap matuma siuliata aallaqqaataatungaani eqqaaneqartoq. 1998-imi paasivaa amyotrofisk lateralskleroseqarluni, imaluunniit ALS-erluni, naggataatigullu nukillaarluinnarpoq. * Taamatut nappaateqalersimanini qanoq ililluni naammagalugu atorsinnaasimavaa? Ima oqaluttuarpoq: „Ilaanni anniartarlungalu isumatsangaartarpunga,  misigisarlunga toqu kisiat aniguiffissaralugu. Sapililivikkaangama pingasut uku Jehovamut qinnutigisarpakka: uummatikkut eqqissisimanissaq, naammagittassuseq pinertussuserlu. Misigaanga Jehovap qinnutikka akisarai. Uummatikkut eqqissisimallunga tuppallersaataasunik eqqarsaatiginneqqissaarsinnaavunga, assersuutigalugu silarsuassami nutaami inuuneq qanoq ikkumaarnersoq pisussinnaaqqileruma, mamartunik nerisinnaaqqileruma ilaquttannillu oqaloqateqarsinnaaqqileruma. Naammagittassuseq ajornartorsiutinik unamminiagassanillu nukillaarnerup pilersitaanik atuinissamut iluaqutigaara. Pinertussuseq aalajaattuarnissannut anersaakkullu oqimaaqatigiissaarisinnaajunnaannginnissannut iluaqutigaara. Tussiaasiortoq Daavi ilumut paasisinnaavara, uanga aamma misigigama napparsimallunga nallavinni Jehovap nakussatsikkaanga.“ — Esaja 35:5, 6.

Inuussutissanut tunngatillugu ikiorneqarneq

17. Jehovap qanoq neriorsorpaatigut, neriorsuutaanilu suna pineqarpa?

¹⁷ Jehovap neriorsorpaatigut timip piisigut isumaginiarluta. (Atuakkit Matthæusi 6:33, 34 aamma Hebræerit 13:5, 6.) Tamanna ima paasisariaqanngilaq pisariaqartitatta tupinnartuliornikkut pinissaat naatsorsuutigissagipput, imaluunniit suliunnaarsinnaasugut. (2 Thessalonikamiut 3:10) Jehovap neriorsuutaani pineqartoq unaavoq, Guutip naalagaaffia ujaqqaarutsigu imminullu pilersorniarluta suliumagutta qularutiginngilluinnarsinnaagipput Jehovap inuunermi pisariaqartunik pinissatsinnut ikiorumaaraatigut. (1 Thessalonikamiut 4:11, 12; 1 Timotheusi 5:8) Periaatsit ilimaginngisavut atorlugit pisariaqartitatsinnik tunisinnaavaatigut, immaqa uppeqat uagutsinnik ikiuisoq suliffissatsinnilluunniit neqerooruteqartoq aqqutigalugu.

18. Misigisamik annikillioraangatta pisariaqartitatsinnik pisinnaanitsinnik ersersitsisumik eqqaasaqarit.

¹⁸ Eqqarsaatigeriaruk anaanaq kisimiittoq allaaserisap matuma siuliata aallaqqaataatungaani eqqaaneqartoq. Taanna paninnguanilu allamut nuukkamik suliffissarsineq ajulerpoq. Ima oqaluttuarpoq: „Ullaap tungaani oqaluussiartortarpunga ualikkullu suliffissarsiortarlunga. Eqqaamavara ullut ilaanni pisiniarfiliarlunga immussiniarniarlunga. Naatitat isigaakka naatitarsinissannulli akissaqarnanga. Inuuninni aatsaat taama nikallungatigaanga. Ulloq taanna pisiniarfimmit angerlarpunga aneerasaartarfiga puussianik naatitanik assigiinngitsorpassuarnik imalinnik ulikkaartoq. Qaammatinut arlalinnut naammattunik nerisassaqalerpugut. Qissasiinnarpunga Jehovalu qutsavigalugu.“ Qatanngutip arnap taassuma erniinnaq paasivaa puussiat qatanngummit angummit ilagiinneersumit naatsiivimmini naatitanik naatitsisartumit pisut. Kingusinnerusukkut pajuttoq ima allaffigaa: „Ulloq taanna qutsavigisaqattaarpakkit, aammali Jehova qutsavigaara illit inussiarnisaarnerit aqqutigalugu asanninnerminik eqqaasimmanga.“ — Ussatit 19:17.

19. Jehovap kiffaasa annikilliornartussarsuarmi suna qularutiginngilluinnarsinnaavaat, aamma maanna suna aalajangiusimasariaqarparput?

¹⁹ Jehovap Biibilip nalaani nalitsinnilu iliuuserisimasai pissutigalugit uagutsinnik ikiuiumaarnera qularutiginngilluinnarsinnaavarput. Annikilliornartorsuaq Saatanip silarsuaanut qanittukkut nalliuppat, Jehovamit ikiorneqarnissarput aatsaat taama pisariaqartitsigissavarput. Jehovalli kiffaasa taanna tatigilluinnarsinnaassavaat. Niaqqutik massitsissinnaassallugillu nuannaarsinnaassapput, qularinagu aniguisitaanissartik qanillisoq. (Lukasi 21:28) Tamanna nalliutserlugu, qanorluunniit misilinneqaraluarutta, Jehovap tatiginissaa aalajangiusimatigu, qularutiginngilluinnarlugu Guutitta allanngujuitsup ilumut ’aniguisitsisuunera’. (w08 9/15-E)

[Quppernerup ataani ilanngussat]

Eqqaamavigit?

• Jehovap toqujaarpallaartut qanoq ililluni aniguisissinnaavai?

• Sooq anersaakkut illersorneqarnissaq pingaaruteqarnerpaava?

• Jehovap timip piisigut uagutsinnik isumaginnikkumaarnerminik neriorsuutaa qanoq paasisariaqarpa?

[Atuaqqissaarnermi apeqqutit]

[Qupp. 16-mi assiliartaq]

Qatanngut Rutherford suleqataalu 1918-imi tigusarineqarput kingusinnerusukkulli iperagaallutik, taakkununngalu unnerluussutit atorunnaarsinneqarput

[Qupp. 18-mi assiliartaq]

Jehovap napparsimalluta nallavitsinni nakussatsissinnaavaatigut