Misigeqatigaatigut
Guutimut palligunniarit
Misigeqatigaatigut
JEHOVAP Nalunaajaasuinut ajoqersuiartortitat ilaata utoqqaap pissuseq erlinnartoq, misiginneqataaneq, isumasiorlugu ima nassuiarsimavaa: „Misiginneqataaneq tassaavoq illit anniaatinnik uanga uummatikkut misigisaqarsinnaanera.“ Jehova Guuti misiginneqataaneq eqqarsaatigalugu maligassaalluarnerpaavoq. Kiffani naalliukkaangata Jehovap tamanna nammineq naalliuutigisarpaa. Tamanna qanoq qulakkeersinnaavarput? Jehovap misiginneqataangaarnera Jiisusip nunarsuarmiitilluni oqaasiinit suliaanillu naammalluinnartumik ersersinneqarpoq. (Johannesi 5:19) Assersuutigalugu oqaluttuaq Johannesi 11:33-35-mi allassimasoq maluginiariaruk.
Jiisusip ikinngutini Lazarusi toqoriataarmat Jiisusi taassuma nunaqarfianukarpoq. Paasinarluarpoq Lazarusip qatanngutai, Maria Marthalu, aliasungaarmata. Jiisusip ilaqutariit taakku asangaarpai. (Johannesi 11:5) Taava Jiisusi qanoq piva? Oqaluttuaq imaappoq: „Jiisusip Maria ingerlaqatigisaalu juutit qiasut takugamigit kamaammerpoq [qamuuna nimaarpoq, NV] assullu ilungersuummerluni [aliatsalluni, 1936], aperaalu: ’Sumut ilivisiuk?’ Akivaat: ’Naalagaq, qaallutit takusaruk!’ Jiisusi qissaserpoq.“ (Johannesi 11:33-35) Sooq Jiisusi qiava? Ilumoorpoq ikinngutaa asasaa Lazarusi toqusoq, kisianni Jiisusip erniinnaq taanna makitinniarpaa! (Johannesi 11:41-44) Suna alla pissutigalugu Jiisusi misigissutsimigut attortippa?
Versit qulaaniittut atuaqqeriakkit. Maluginiariaruk Jiisusip Maria ingerlaqatigisaalu qiasut takugamigit Jiisusi ’qamuuna nimaarlunilu’ ’aliatsattoq’. Oqaatsit taakku allassimaqqaarfinni grækerisuuni tassani atorneqartut misigissutsinik sakkortuunik inuppalaartunik ersersitsipput. * Jiisusip takusani killinneqaatigingaarpai. Qullililermat misigissusiisa sakkortuut qaffannerat erseqqissivoq. Malunnartumik Jiisusip inuit allat aliasunnerat qamuuna attortissutigaa. Asasavit ilaat qialermat qullilinikuuit? — Romamiut 12:15.
Jiisusip misiginneqataanera Jehovap pissusii qanorlu periartarnera pillugit pingaarutilinnik paasisaqarfigaarput. Eqqarsaatigeqqilaariaruk Jiisusip Ataatami pissusii ima naammalluinnartigisumik ersersikkai ima oqarsinnaalluni: „Uannik takunnittup Ataataq takuaa.“ (Johannesi 14:9) Taava Jiisusi ’qissasertoq’ atuaratsigu Jehovap kiffami naalliunnerat nammineq misigisaraa qularutiginngilarput. Tamanna Biibilimik allattunit allanit aamma uppernarsarneqarpoq. (Esaja 63:9, 1900; Zakaria 2:12) Jehova ilumut Guutiuvoq misiginneqataangaartoq!
Misigeqatiginnittartut kajungerisarpavut. Nikallorluinnarsimagaangatta isumatsaqqagaangattaluunniit inuit pissutsinik atukkatsinnik naalliuutitsinnillu paasinnilluarsinnaasut kajungerisarpavut. Jehova Guutiusoq misiginneqataangaartartoq qullilisarnitsinnullu pissutaasunik paasinnittartoq ila kajungerinerungaassavarput! — Tussiaat 56:9. (w08 05/01-E)
[Quppernerup ataani ilanngussaq]
^ imm. 3 Oqaaseq grækerisooq „qissaserpoq“-mik nutserneqarsimasoq aamma „qullililerpoq“-mik (1936) nutserneqarsimasoq amerlanertigut ’nipaqanngitsumik qianermut’ tunngatinneqartarpoq, oqaaserli Mariap allallu qianerannik oqaluttuarinninnermut atorneqarsimasoq ’nipituumik qianermik, kappialanermillu’ isumaqarsinnaavoq.