Titusimut allakkanit, Fiilimuumut allakkanit Hebræerinullu allakkanit pingaarnersat
Jehovap oqaasia uumavoq
Titusimut allakkanit, Fiilimuumut allakkanit Hebræerinullu allakkanit pingaarnersat
PAULUSI Romami parnaarussaaqqanerminiit siullermit ukiumi 61-imi iperagaanermi kinguningaatsiaa Kretamut tikeraarpoq. Ilagiit anersaakkut qanoq innerat malugaa nakussatsinneqarniassammatalu Titusi tassunga qimallugu. Kingusinnerusukkut, qularnanngitsumik Makedoniamiit, Paulusip Titusi allaffigaa pisussaaffiinik paasitinniarlugu ersersinniarlugulu Titusi suliassaminut apustilimit Paulusimit piginnaatitaaffilerneqarsimasoq.
Siusinnerusukkut, ukiumi 61-imi parnaarusivimmiit iperagaanngitsiarluni, Paulusip Fiilimuut, qatanngut kristumiu Kolossemi najugalik, allaffigaa. Allakkanilu ikinngummiit ikinngummut kajumissaarutitut allappai.
Ukiup tamatuma missaani Paulusip aamma juutit uppertut Judæamiittut allaffigai kristumiussutsip juutit aaqqissuussaanerannit pitsaanerungaarneranik ersersitsisumik. Allakkat pingasut tamarmik uagutsinnut naleqangaartunik siunnersuutitaqarput. — Hebræerit 4:12.
ANERSAAKKUT PEQQISSUUJUARITSI
Paulusip Titusi ’illoqarfinni utoqqaanertassanik ivertissueqqullugu’ siunnersoreerlugu, maanna Titusi kajumissaarpaa naalasseriitsut ’sakkortuumik naqqissoqqullugit uppernerminni peqqissuulerniassammata’. Kretami ilagiinniittut tamaasa kajumissaarpai ’iluaatsuussusermut naaggaaqqullugit silatusaarlutillu inooqqullugit’. — Titusi 1:5, 10-13; 2:12.
Paulusi suli allanik siunnersuuteqarpoq qatanngutit Kretamiittut anersaakkut peqqissuujuarnissaminnut iluaqutissaannik. Titusi siunnersorpaa ’oqallinnerit sianiitsorpallattut inatsisillu pillugit assortuunnerit ingalassimaqqullugit’. — Titusi 3:9.
Allassimaffiit pillugit apeqqutinut akissutit:
1:15 — „Suut tamarmik“ qanoq ’minguitsumut minguitsuusinnaappat mingussimasunulli uppinngitsunullu’ minguttuujullutik? Paulusip oqaatsit „suut tamarmik“ qanoq isumaqartinnerai paasigaanni tamanna akissutissaqartinneqassaaq. Guutip oqaasiani allassimasumi toqqaannartumik assuarineqartut pinngilai, pivaali inuttut nammineq aalajangigassat Biibilimi allassimasunut akerliunngitsumik kristumiut assigiinngitsunik isumaqarfigisinnaasaat. Taamaattut minguitsuupput inummut Guutip najoqqutassiaanut naapertuuttumik eqqarsartaaseqartumut. Allaanerulluinnarpoq inunnut kukkusumik eqqarsartaaseqartunut mingutsinneqarsimasumillu nalunngeqatiginnissuseqartunut. *
3:5 — Kristumiut tanitat qanoq „uffaatikkut“ aamma „nutaanngortitsisukkut Anersaakkut Illernartukkut“ annaanneqarpat? ’Uffaatikkut annaanneqarput’ tassa imaappoq Jiisusip aavanik Guutip ’uffarai’, imaluunniit minguiarai, Jiisusip utertitsissutitut pilliutaata nalinga taakkua iluaqutissaattut atorlugu. Guutimit anersaakkut kinguaassiarititaasutut ernerineqartutut tassaaleramik ’pinngortitaq nutaaq’ nutaanngortinneqarput anersaakkut illernartukkut. — 2 Korinthimiut 5:17.
Ilinniarfigisinnaasavut:
1:10-13; 2:15. Nakkutilliisut kristumiut sapiillutik ilagiinni eqqunngitsuusunik naqqiisariaqarput.
2:3-5. Ukiuni hundredelinni siullernisulli ullumikkuttaaq qatanngutit arnat inersimalluartut ’illernartut ileqqussaat eqqorlugu ileqqoqartussaapput, oqajamaajunatik imerajuttuunatilluunniit ajunngitsuliornermilli ajoqersuussisuussallutik’. Taamaalillutik „arnat inuusuttut“ ilagiinniittut kisimeeqatigitillugit sunniuteqarluartumik siunnersorsinnaavaat.
3:8, 14. ’Ajunngitsuliorniaqqissaarnerput’ (1936) ’ajunngilaq iluaqutaallunilu’, tamannami Jehovamut kiffartornitsinni inerititaqarnissatsinnut silarsuarmillu ajortumit matumannga avissaaqqanissatsinnut iluaqutigaarput.
KAJUMISSAARINEQ ’ASANNINNEQ’ TUNNGAVIGALUGU
Fiilimuut ’asanninnikkut uppernikkullu’ maligassiuigami nersualaarneqarpoq. Kristumioqatini nakussatsissimavai, taamaaliorneralu Paulusimut „annertuumik . . . nuannaarutaallunilu tuppallersaataavoq“. — Fiilimuut 4, 5, 7.
Paulusip Onesimosi pillugu suliassamut mianersornartumut periaasia nakkutilliisunut tamanut maligassaavoq. Naalakkiinani kajumissaarivoq ’asanninneq’ tunngavigalugu. Fiilimuumut ima allappoq: „Allaffigaakkit qularutiginnginnakku naalakkumaarimma, nalunngilarami qinnutigisara akimorlugu iliorumaartutit.“ — Fiilimuut 8, 9, 21.
Allassimaffiit pillugit apeqqutinut akissutit:
10, 11, 18 — Onesimosi, siornatigut ’iluaqutigisimanngisaq’, maanna qanoq ’iluaqutaalersimava’? Onesimosi inussiaavoq pitseriissimasoq Fiilimuup inoqutaanit Kolossemiittunit Romamut qimaasimasoq. Immaqa aamma Onesimosip naalakkani tilliffigisimavaa angalanissaminut 1400 kilometerisut isorartutigisumut tamatumunnga akissaqarniarluni. Aap, Fiilimuup iluaqutigisimanngilaa. Romamili Paulusip Onesimosi kristumiunngornissaanut ikiorpaa. Inussiaq taanna siornatigut ’iluaqutigisimanngisaq’ maanna ’iluaqutaalersimavoq’ anersaakkut qatanngutaalerami.
15, 16 — Sooq Paulusip Fiilimuut qinnuiginngilaa Onesimosi inussiaajunnaarseqqullugu? Paulusip kissaatigaa imminut suliassiissutigineqartup, tassa ’Guutip naalagaaffianik oqaluussissutiginninnerup Naalakkamillu Jiisusi-Kristusimik ajoqersuutiginninnerup’, avaqqutinngilluinnarnissaa. Taamaattumik aalajangerpoq innuttaaqatigiinnermut tunngasut pillugit akerleriissutaasunut, soorlu inussianut tunngasunut, akuliunniarnani. — Apustilit Suliaat 28:31.
Ilinniarfigisinnaasavut:
2. Fiilimuup angerlarsimaffini kristumiunut ataatsimiittarfiusinnaatippaa. Angerlarsimaffiup kristumiutut kiffartornermi qitiusutut atorneqarnera immikkut pisinnaatitaaffiuvoq. — Romamiut 16:5; Kolossemiut 4:15.
4-7. Uppeqatinik uppernikkut asanninnikkullu maligassiuilluartunik nersualaarinnittuusariaqarpugut.
15, 16. Atugarliuuteqalerutta tamanna pisariaqanngitsumik isumakuluutigissanngilarput. Paasinarsisinnaavormi atugarliuuteqarneq iluaqutigiinnaripput, soorlu Onesimosimut tunngatillugu taamaattoq.
21. Paulusip naatsorsuutigaa Fiilimuup Onesimosi isumakkeerfigissagaa. Aamma naatsorsuutigineqarpoq qatanngut uagutsinnut eqqunngitsuliorsimasoq isumakkeerfigissagipput. — Matthæusi 6:14.
’INERSIMASSUMMUT INGERLAGASUARNIARTA’
Jiisusip pilliutaanik upperinninnerup Mosesip inatsisai malillugit iliuuseqarnernit pingaaruteqarnerunera ersersinniarlugu Paulusip erseqqissarpaa kristumiussutsip tunngaviliisuata, taassuma palasiussusiata pilliutaatalu angerutsillu nutaap qutsissisinneqarnerat. (Hebræerit 3:1-3; 7:1-3, 22; 8:6; 9:11-14, 25, 26) Tamatuminnga ilisimasaqarneq kristumiut hebræeriusut juutinit malersorneqarnermik naammagalugu atornissaanut iluaqutigingaarsimassavaat. Paulusip uppeqatini hebræeriusut kajumissaarpai ’inersimassummut ingerlagasuaqqullugit’. — Hebræerit 6:1, NV.
Upperneq kristumiumut qanoq pingaaruteqartigaa? „Uppersuseqarnani Guutimit iluarisaaneq ajornaqaaq,“ Paulusi allappoq. Hebræerit ima kajumissaarpai: ’Angusassamut siunitsinniittumut arpannitsinni tamatumani nikallujuitta,’ taamaaliorlutalu uppernikkut. — Hebræerit 11:6; 12:1.
Allassimaffiit pillugit apeqqutinut akissutit:
2:14, 15 — Allassimammat Saatani „toqup pissaaneranik peqartoq“, isumaqarpa tassa kinaluunniit toqukkusutani toqujaartissinnaagaa? Naagga, taama isumaqanngilaq. Saatanili Edenimi ajortumik iliuuseqartitsilermalli salluliorneri toqumik kinguneqarsimapput, Adami ajortuliormat ajortilu toqulu inunnut kingornutsillugit. (Romamiut 5:12) Aammattaaq Saatanip nunarsuarmi ikiortaasa, Jiisusimut iliorsimanermissut, Guutip kiffai malersortarsimavaat toquttarsimallugillu. Tamannali isumaqarpa Saatani kimilluunniit toqukkumasaminik toqutsinissaminut killeqanngitsumik pissaaneqartoq? Taamaakkaluarpat qularnanngitsumik qangarsuarli Jehovamik pallorfiginnittut nungutissimassagaluarpai. Jehovap innuttani ataatsimut isigalugit sernissorpai, Saatanillu taakkuninnga nungutitsinissaa akuerinavianngilaa. Saatanip saassussinerini arlatta toqunissaat Guutip akuerigaluaraa qularutiginngilluinnarsinnaavarput Saatanip uagutsinnik ajoqusiineri suugaluartulluunniit Guutip aaqqikkumaarai.
4:9-11 — Qanoq Guutip ’qasuersaarfissaanut isersinnaavugut’? Ullut pinngortitsiffiusut arfinillit naaneranni Guuti pinngortitsinerminit qasuersaarpoq nunarsuarmut inunnullu siunertami eqquunnissaa qularutiginngilluinnarlugu. (1 Mosesi 1:28; 2:2, 3) ’Qasuersaarfissamut [tamatumunnga] isersinnaavugut’ iliuutsit imminut naapertuilluartuutitsisut iliuuserinaveersaarnerisigut Guutillu annaassissutissatut aaqqissuussaata ilassineratigut. Jehovamik upperinnikkutta erneralu naalalluta malikkutsigu, soqutigisat namminissarsiortut noqqaassutiginagit, ullut tamaasa pilluaqquneqassaagut inuummarissinartumik nukissaqalerluta. — Matthæusi 11:28-30.
11:10, 13-16 — ’Illoqarfik’ sorleq Aaperaap utaqqivaa? Utaqqisaa tassaanngilaq illoqarfivik, assersuutaasumilli illoqarfik. Aaperaap utaqqivaa „Jerusalemi qilammiittoq“, tassaasoq Jiisusi Kristusi taassumalu naalakkersueqatai 144.000-iusut. Naalakkersueqataasut taakku qilammi naalannassuseqartut aamma ’illoqarfimmik illernartumik, Jerusalemi nutaamik’ taaneqarput. (Hebræerit 12:22; Saqqummersitat 14:1; 21:2) Aaperaap Guutip naalagaaffiata aqutsinerani inuunissaq qilanaaraa.
12:2 — Jiisusip „nuannaarnissaq siunerminiittoq [suna] pillugu sanningasulik [nappagaq anniartitaaffik, NV] naammagalugu atorpaa“? Tassaavoq kiffartornermi kingunissaata — ilaatigut Jehovap aqqata illernarsisinneqarnissaata, Guutip kisimi oqartussaanerata qutsisisinneqarnissaata inuiaallu toqumit utertinneqarnissaata — takunissaata nuannersussaa. Jiisusip aamma qilanaaraa kunngitut naalakkersuisunngornissami akissarsiarinissaa inuillu iluaqutissaannik palasiunertut kiffartornissani.
13:20 — Sooq angeruseq nutaaq ’angerutsitut soraajuitsutut’ allaatigineqarpa? Uku pingasut pissutigalugit: (1) Taarserneqanngisaannassaaq, (2) kingunerisassai ataavartuussapput, aamma (3) ’savat allat’ angerutsimik nutaamik aaqqissuussineq suli Harmagedonip kingorna iluaqutigiuassavaat. — Johannesi 10:16.
Ilinniarfigisinnaasavut:
5:14. Guutip oqaasia, Biibili, eqiasuilluta atuaqqissaartariaqarparput ilikkakkavullu maleruartariaqarlugit. Taamaaliornikkuinnaq ’ajunngitsumik ajortumillu immikkoortitsisinnaanissamut sungiussisimalersinnaavugut’. — 1 Korinthimiut 2:10.
6:17-19. Neriuuterput Guutip neriorsuutaanik uppernarsaataanillu tunngaveqarluartikkutsigu tamanna sallusuissutip aqqutaatigoorunnaannginnissatsinnut iluaqutigissavarput.
12:3, 4. Misilinneqarnerit akerlilersorneqarnerillu annikitsut ’qasulissutiginagit nikallussutiginagillu’ siumukartariaqarpugut inersimallualernissatsinnik aamma misilinneqarnernik naammaginnilluta atuisinnaanitsinnik sulissutiginnittuarnikkut. Allaat ’aammik akeqartillugu’, tassa allaat toqumut, aalajaannissarput aalajangiusimasariaqarparput. — Hebræerit 10:36-39.
12:13-15. ’Sorlak toqunartulik’ sunaluunniit, assersuutigalugu ilagiinni periaaserineqartunik isornartorsiuisartoq kinaluunniit, ’narlumuinnaq pisulluta ingerlanitsinni’ akornutaatissanngilarput.
12:26-28. ’Pinngortitat’ Guutimeersuunngitsut — pissutsit aaqqissuussaanerat maanna atuuttoq aamma „qilak“ ajortoq — aalatinneqassapput. Tamanna pippat „aalatinneqarsinnaanngitsut“, tassa Guutip naalagaaffia tamatuminngalu tapersersuisut, kisimik ’ataannassapput’. Taamaattumik pingaaruteqarluinnarpoq aallussilluarluta Guutip naalagaaffianik oqaluussissutiginninnissarput naalagaaffiullu tamatuma najoqqutassiaanik maleruaanissarput.
13:7, 17. Ilagiinni nakkutilliisunut naalannissatsinnik peqqusaannillu maleruaanissatsinnik oqaaqqissaarummik eqqarsaatitsinniititsiuarutta kajumilluta taakkuninnga suleqataanissamut iluaqutigissavarput. (w08 10/15-E)
[Quppernerup ataani ilanngussaq]