Ataatarput qilammiusoq qanoq ittuua?

INUPPASSUIT Ataatarpooq — qinnut najoqqutassaasoq Jiisusip ajoqersukkaminut ilinniartitsissutaa — alanngaarsinnaavaat. (Matthæusi 6:9-13) Qinnut tamanna qinnutigigaangamikku Guuti „Ataatarput“-mik taasarpaat. Ataatarpuumilli qinusartut qassit Guutimik ilisarisimannilluarpat?

Illimmi? Guuti qanoq ilisarisimalluartigaajuk? Taassumunnga qanittumik attaveqarpit? Oqaluttuuttarpiuk? Aliasuutitit nuannaarutitillu taassumunnga oqaluttuarisarpigit? Guutimik ilisarisimanninneq qanorpiaq paasisariaqarpa?

Aqqa tassa Jehova

Meeqqat mikisut immaqa ataatartik pillugu ilisimasatuaat tassaavoq ’ataatamik’ taaneqartarnera. Peroriartornerminnili ataatamik aqqa qanorlu ilisimaneqarnera nalujunnaartarpaat, ataatartillu usorsisimaarutigisarunarpaat. Taavami Inuunermik Tunisisorput qilammiusoq? Taassuma nammineq aqqa tamatumalu isumaa ilisimavigit?

Oqariartaaseq ’aqqit illernarsili’ (1936) alanngaartaraluarlugu ataatarpuumik qinusartorpassuit immaqa nalornissapput qanoq akissanerlutik ima aperineqarunik: „Ateq-una suna pineqartoq?“ Qilak ulloriarpassualik, qaqqarsuaq alutornangaartoq, koraalit ikkanninnguuttut qalipaatigissaarlutillu uumasorpassuallit, tamakku Guutip piuneranut uppernarsaataapput. Taamaattoq taassuma aqqanik qulaarinngillat. Ateq tamanna ilisimalissagutsigu Biibilimut saattariaqarpugut. Tassani erseqqissumik ima allassimasoqarpoq: „Aqqa tassa Jahve.“ (2 Mosesi 15:3) Biibilimik nutsikkani allani, assersuutigalugu Otto Fabriciusip 1822-mi kalaallisuunngortitaani, ateq Jahve atornagu Jehova atorneqarpoq.

Guutip kissaatigaa atini, Jehova, ilisimassagipput. Sooq? Aqqa kinaassusilittut qanoq ittuuneranut ersiutaammat. Ateq tamanna toqqaannartumik nutserlugu isumaqarpoq „-nngortippoq (imaluunniit: -tippaa)“. Allatut oqaatigalugu siunertani naammassiniarlugu Jehova sunngorsinnaavorluunniit pisariaqarnera naapertorlugu. Imatut eqqarsaatigeriaruk: Ilaquttani isumaginiarlugit ataataasoq pilersuisunngortarpoq, siunnersuisunngortarpoq, eqqartuussisunngortarpoq, isumaqatigiissitsiniartunngortarpoq, sernissuisunngortarpoq ilinniartitsisunngortarlunilu — ilaqutariit sunik pisariaqartitsinerat pissutsinillu qanoq ittunik atugaqarnerat apeqqutaatillugu. Taamatuttaaq ateq Jehova uatsinnut uppernarsaataavoq Guutip piumasaminik kiffami tamarmik iluaqutigisaannut naammassinnissinnaalluinnarneranik — qanorluunniit pisoqassagaluarpat.

Sammeriartigu Guutitta asannittup atermi isumaa naapertorlugu sunngortarnera. Tamanna Jehovap Guutitut qanoq ittuuneranik aamma taassumunnga palligunniarluta qanoq iliortariaqarnitsinnik paasinninnissatsinnut iluaqutigissavarput.

’Guuti asannittoq eqqissisitsisorlu’

Apustilip Paulusip Pinngortitsisorput ’Guutimik asannittumik eqqissisitsisumillu’ taavaa. (2 Korinthimiut 13:11) Sooq? Siusinnerusukkut Jiisusi Kristusi ima oqarpoq: „Guutip silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.“ (Johannesi  3:16) Inuiaat asangaaramigit Guutip ernini asasani utertitsissutitut tunniuppaa, taassumunnga uppertut naassaanngitsumik inuusinnaaniassammata ajortip kingunerisaanik anniaateqarnatillu naalliuuteqarnatik. Taamaattuminguna Paulusi ima allassinnaasimasoq: „Ajortip akissarsiarititaa tassa toqu, Guutilli saammaannermit tunissutaa tassaavoq inuuneq naassaanngitsoq Kristusi-Jiisusimi Naalakkatsinni.“ (Romamiut 6:23) Tamanna Guutimut asanninnissatsinnut palligunnissatsinnullu kajumississutigisariaqarparput, ilaa?

Guutip asanninnini ersersittarpaa inuiannut eqimattanuinnaanngitsoq aammattaarli upperlutillu aalajaatsunut inunnut ataasiakkaanut. Itsaq Israelikkut naalasseriikkajuttut Mosesip ima oqarfigai: „Eqqortuusoraasiuk [Jehova] taama akilissallugu, ilissi inuiaat silaatsuususi sianiitsuususilu? Tassaannginnerpa ataatat pinngortitsisillu, ilissinnik pinngortitsisoq ilusiliisorlu?“ (5 Mosesi 32:6) Oqaatsit taakkua isumaat paasiviuk? Ataatatut asannittutut Jehovap innuttani isumassorpai taakkua kukkussutaat sanngiissutaallu ilisimaarigaluarlugit. Pisariaqartitaallu tamaasa isumagisarpai — timikkut, misigissutsikkut anersaakkullu.

Tamatta inuunerup allanngorartuarnera misigisarparput, tamatumalu kingunerisaanik ilaannikkut isumakuluttarpugut imaluunniit allaat nikallungasarluta. Taamaakkaangatta pissutsinut atukkatsinnut ajornartorsiutitsinnullu eqqortumik isiginnittaaseqarnissatsinnut ikiorneqartariaqarpugut. Kia ikiorsinnaavaatigut? Oqaatsini, Biibili, aqqutigalugu Jehovap ersersittarpaa Siunnersuisartuulluni Isumasuisuullunilu asannittoq. Atuakkami illernartumi tamatumani nassuiarneqarpoq sooq taama naalliuuteqartiginersugut tamakkulu qanoq naammagalugit atorsinnaanerivut. Soorlu ataataasup ernini orlulluni annertoq asannilluni ikiortaraa, taamatuttaaq pisariaqartumik ikiorniarluta Jehova asanningaarluni peqiffigisarpaatigullusooq. Ilumut, Jehovap uppertimi ikiornissaannut talia naappallaanngilaq. — Esaja 59:1.

Guutip uatsinnut asanninnera aamma erserpoq ’qinnutitsinnik tusartartuuneragut’. (Tussiaat 65:3) Taamaattuunera uatsinnik asanninneranut qanoq ersiutaava? Apustili Paulusi ima nassuiaavoq: „Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu. Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.“ (Filippimiut 4:6, 7) Guutimut qamannga pisumik qinusaruit taassumalu Oqaatsimini siunnersuutaanik malinnikkuit illittaaq ’eqqissineq Guutimit pisoq siuneqassusernit tamanit annerungaartoq’ misigisinnaavat.

’Guuti ilisarsinertooq’

Jehova Guuti Biibilimi ’Guutitut ilisarsinertuutut’ allaatigineqarpoq. (1 Samueli 2:3, 1900) Taamaattuugami inunnik pisariaqartitaannillu taanna allanit tamanit paasinnilluarneruvoq. Kiffani Mosesi aqqutigalugu paasinarsisippaa ’inuup timiusaannaq inuussutiginngikkaa, oqaaserli sunaluunniit [Jehovap] qarnanit anisoq inuussutigisaraa’. (5 Mosesi 8:3; Matthæusi 4:4) Tassa imaappoq inuunermi piviusumik pillualissagutta pigisat naammanngillat.

Pinngortitsisitta Oqaatsini, Biibili, aqqutigalugu ilitsersorlutalu siunnersortarpaatigut naleqangaartunik. Biibilimik atuaqqissaaraangatta Guutillu siunnersuutai inuunitsinni malikkaangatsigit „oqaaseq sunaluunniit [Jehovap] qarnanit anisoq“ iluaqutigisarparput. Assersuutigalugu arnaq kristumiu, Zuzanna, ilaqutariittut  inuunertik pillugu ima oqarpoq: „Biibilimik atuaqatigiittarnerput, kristumiut ataatsimiinnerinut marluulluta najuuttarnerput ilikkakkavullu pillugit allanut oqaluttuartarnerput aappariinnitsinnut nakussatsissutaapput. Guutip anersaakkut ilitsersuutai pissutigalugit assigiinnik anguniagaqarpugut immitsinnullu qaninnerulerluta.“

Illittaaq Guutip siunnersuutai ilitsersuutaalu iluaqutigiumavigit? Aalajangersimasumik Biibilimik atuaqqissaartaruit siunnersuutillu tassaniittut malittarukkit Guutip anersaakkut pilluaqqungaassavaatit. — Hebræerit 12:9.

’Guuti annatsitsisoq’

Ullumikkut silarsuaq eqqissiviilliorfiungaarpoq. Aqagussaq qanoq pisoqarfiussanersoq nalunartaqaaq. Nunami sorsuffiusumi najugaqaruit eqqissineq erinigigunarpat. Nunani allarpassuarni inuit pinerlunneq, nakuuserneq, aningaasatigut allanngorarnerit peqqarniisaarniarnerillu aarlerigalugit inuupput. Kia tamakkunannga tamanit aniguisissavaatigut? Maanna inuit illersorneqarnissartik aniguisinneqarnissartillu aatsaat taama pisariaqartitsigaat.

„[Jehovap] aqqa pallittaalisap napasuliaatut ippoq, iluartoq tassunga qimaanasuartarpoq isumannaatsumilu inissittarluni,“ Biibilimi allassimavoq. (Ussatit 18:10) Guutip aqqanik tamatumalu isumaanik ilisimanninnerput upperinnilluinnarnerpullu taassuma imminut uppertut aniguisinniarlugit qanoq iliorsimaneranik qanorlu iliorumaarneranik eqqarsaatiginnilissutigisinnaavavut. Jehovap Guutip erseqqilluinnartumik uppernarsareerpaa innuttaminik aniguisitsisinnaalluni. Assersuutigalugu Israelikkut annaappai Faraop qamutai sorsuutit sakkutoorpassuilu suujunnaarsillugit. Jehovap ersersippaa Guutiulluni aalajaatsoq, Guuti annikilliortunik eqqarsaatiginnittoq taakkununngalu iluaqutaasumik akuliuttartoq. — 2 Mosesi 15:1-4.

Jehovap Guutip uatsinnik Annaassisuuneranik upperinninnerput siunissatsinnut naassaanngitsumut aalajangiisuuvoq. Itsaq Israelimi kunngip Daavip atugarliungaartup ersersippaa taamatut upperluni. Jehova pillugu ima allappoq: ’Illit tassaavutit Guuti annatsitsisiga.’ (Tussiaat 25:5) Qularani apustili Petrusi ima allappoq: „[Jehovap] mianerinnitsini ussernartunit aniguisinneq sapinngilai.“ — 2 Petrusi 2:9.

Guuti kinaluunniit imminut ikiortissarsiortartoq pillugu ima neriorsuivoq: „Sernigissavara atera ilisimammagu.“ (Tussiaat 91:14) Ullumikkut Guutimut kiffaasut neriorsuutip tamatuma ilumuussusia misigisimavaat. Atugarlioraluarluni malersorneqaraluarlunilu Henryk Polenimiu ukiuni 70-ini aalajaalluni Jehovamut kiffartorpoq. Henryk 16-iinnarnik ukioqartoq ataataa tigusanut inissiarsuarmut Auschwitzimut pisitaavoq. Henryk angajunilu nazistit inuusuttunut perorsaaviannut pisitaapput. Tamatuma kingorna tigusanut inissiarsuarmit inissiarsuarmut allamut nuunneqaqattaarpoq. Taamani pisimasut pillugit Henryk ima oqaluttuarpoq: „Misilinneqarninni tamani Jehovap qimanngisaannarpaanga. Aalajaattuarnissannut — naak arlaleriarlunga  toqungajattaraluartunga — tamatigut ikiortarpaanga.“ Ilumut, Jehovap kiffani pinertusaarnissamut uppissuseqalersillugillu nukissaqalersittarpai.

Qanittukkut Guutip ersersikkumaarpaa imminut uppertunik aniguisitsinissaminillu tatiginnittunik tamanik Annaassisuulluni. Ima oqarpoq: „Uanga kisima tassaavunga [Jehova], uangaanngitsumik annatsitsisinnaasoqanngilaq.“ (Esaja 43:11) ’Guutip Ajugaqanngitsup ullussarsuamini sorsunnissami’ ajortut nunarsuarmiittut nungutikkumaarpai assuarnaatsullu aniguisillugit. (Saqqummersitat 16:14, 16; Ussatit 2:21, 22) Jehovap ima neriorsoqqissaarpaatigut: „Qanilaartut nuna kingornutissavaat pilluangaarnertillu nuannaarutigissallugu.“ — Tussiaat 37:11.

’Guutimut qitornaalersinnaavugut’

Pruffiitip Malakip nalaani Israelikkut Jehova ataataginerarpaat. Taassuminngali ataqqinninnerminnik tunniusimanerminnillu ersersitsisussaagaangamik timiusat mingunnartut aamma nersutaatit tappiitsut tusiattullu pilliutigisarpaat. Taamaattuminguna Jehovap ima aperigai: „Uanga ataataasunga ataqqinaatiga sumiippa?“ — Malaki 1:6.

Israelikkut ilumuunngitsut taakkua kukkunerattut kukkoqinak. Kajumissaarpatsigit Jehova Guuti pillugu ilinniarnissannut taassumunngalu palligunnissannut. Ajoqersugaq Jaaku ilungersorluni ima kajumissaarivoq: „Guuti qaninniarsiuk, taava taanna ilissinnut qanillissaaq.“ — Jaaku 4:8.

Jehovamik Ataataqarneq akisussaaffittaqarpoq. Guuti ataqqinniarlugu ilumoorfiginnillutit taassuma najoqqutassiai inuuninni sutigut tamatigut sapinngisannik maleruartarukkit taassuma ilungersuutitit puiunngisaannassavai. Ikiussavaatilli aqqutikkut narlusuukkut silarsuassamut nutaamut neriorsuutigisamut sammisukkut ingerlanissannut. Silarsuassami nutaami „toqu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq“. (Saqqummersitat 21:4) Taamanikkussamut inuit Guutimut naalattut tamarmik ’aniguisitaajumaarput nungujassusermi inussiaataanermit kiffaanngissuseq Guutip qitornaasa naalannarsiffissami pisassaat pigilerlugu’. — Romamiut 8:21. (wp08 09/01-E)

[Qupp. 5-mi issuagaq]

Guutip kissaatigaa atini Jehova, toqqaannartumik nutserlugu isumaqartoq „-nngortippoq (imaluunniit: -tippaa)“, ilisimassagipput

[Qupp. 6-mi issuagaq]

„Misilinneqarninni tamani Jehovap qimanngisaannarpaanga.“ — HENRYK

[Qupp. 7-mi issuagaq]

„Biibilimik atuaqatigiittarnerput, kristumiut ataatsimiinnerinut marluulluta najuuttarnerput ilikkakkavullu pillugit allanut oqaluttuartarnerput aappariinnitsinnut nakussatsissutaapput.“ — ZUZANNA